Iyo alubumu igizwe n’indirimbo z’Imana zigisha zinyuze mu buzima busanzwe kandi arateganya gukora indirimbo zihumuriza, z’amahoro n’ubworoherane; nk’uko Vincent de Paul yabitangaje ubwo yari muri Narrow Road studio aho yari yaje gukorera indirimbo.

Vincent de Paul yatangiye muzika muri 2000 biturutse ko yari amaze igihe kirekire asenga asaba Imana gushyira ahagaragara impano yiyumvagamo. Yatangiye gucuranga gitari muri 2002. Acuranga accompagnement, basse.

Yagize ati « Impano nayiyumvisemo cyera nkiri muto ariko kuko ntari mfite ubushobozi bwo kuyishyira ahagaragara niyo mpamvu yatinze kugaragara».

Imbarutso yo kugaragaza impano yo kuririmba ngo yabaye ishuri ry’iyogezabutumwa yakoreye mu kigo cy’umuryango wa Emmanuel (Centre de la communaute de l’Emmanuel). Kubera kubona abandi baririmba ndetse n’inyigisho yahawe byatumye yumva abohotse atangira kuririmba; nk’uko abyivugira.

Vincent de Paul yamenyekanye cyane ku ndirimbo «Ngwino urebe», «Uracyandagiye», «Impuhwe za Nyagasani», «Reka kwiheba» n’izindi.

Mu buzima busanzwe, Vincent de Paul ni umugabo wubatse ufite umugore n’umwana umwe. Ni umunyamakuru kuri Radio Mariya akaba azwi cyane mu kiganiro «Twige kubaho» n’ikiganiro cy’abahanzi kizwi ku izina rya «Shira irungu».

Marie Clemence CYIZA UWIMANIMPAYE