Mu ndirimbo ye, Knowless aba asa n’ubwira umuntu ko agomba kwitonda, ntiyemere ibyo abakobwa bagenzi be bamubwira kabone n’ubwo baba ari inshuti ze magara.

Agira ati: “Aho iyi si igeze biragoye kubona uwo wakwizera. Buri wese asigaye akurura yishyira. Kumenya ukubwiza ukuri cyangwa uvuga ibinyoma ni ikibazo cy’ingutu.

Mperutse guhura n’umukobwa w’inshuti yanjye magara anyangisha uwo nikundira, aramuvugavuga aramumanuka koko avuga ukuntu ari mubi atankwiye. Nyamara iyo umukunzi wanjye aje mbona amureba bidasanzwe nkabona ibinezaneza bimwuzuye mu maso!”

Knowless akomeza agira ati: “Abakobwa b’iki gihe ntibazagushuke ngo utandukane n’uwo ukunda urarye uri menge baramushaka witonde, baramushaka umukomeze, baramushaka, ubiyame ntibakagushuke.” Aya ni amagambo agaragara mu nyikirizo y’iyi ndirimbo ye.

Knowless Butera.

Arongera akagira ati: “Ntako batagira ngo bakwereke ibibi bye ngo ntimuberanye ngo ahora aberamye ukagira ngo ni impuhwe baba bagufitiye zahe zokajya ko ari nka za zindi za bihehe.

Bahora bahimbahimba, bahora bashakashaka icyadutandukanya bakavuga n’ibitajyanye ngo agenda nabi ndetse anasa nabi ngo n’ikimenyimenyi n’iyo yambaye ntajya aberwa. Ibi ni ibiki koko? nzabagenze nte koko? ego, aha!”

N’ubwo bisa n’aho ari ubutumwa bukubiye mu ndirimbo ibyinitse kandi iryoheye amatwi, ibivugwa muri iyi ndirimbo koko hari igihe usanga bibaho ndetse rimwe na rimwe bigasenya urukundo rw’abikundaniye, iyo ba nyiri ugukundana batabaye maso.

Ni kenshi abahanzi batanga ubutumwa bukomeye mu ndirimbo nyamara ugasanga ababuhawe ntibabuha agaciro, bagahungira mu kumva injyana ibyinitse no kwibyinira gusa.

Knowless azwi mu zindi ndirimbo ze nka “Nkoraho”, “Wari uri he?”, “Follow you”, “Rejoice”, “Icyizere”, “Sinzakwibagirwa”, “Ninkureka” n’izindi nyinshi.

Marie Clemence CYIZA UWIMANIMPAYE