Mu masaha ya saa saba nibwo uyu musirikare yinjiye mu Rwanda afite imbunda abajijwe abashinzwe abinjira n’abasohoka abakura mu nzira nkufite aho agiye, biba ngombwa ko abapolisi bamuhagarika.

Uyu musirikare wa Congo yinjiye mu Rwanda nta burenganzira.

Nyuma yo gufatwa n’inzego z’umutekano zo ku ruhande rw’u Rwanda, inzego za gisirikare za Congo zongereye abasirikare ku mupaka ndetse zirawufunga, ubuyobozi bushinzwe abinjira n’abasohoka ku ruhande rwa Congo bavuga bafungura umupaka aruko uwo musirikare wabo asubijwe Congo.

Kuva uyu musirikare yafatirwa mu Rwanda Abanyarwanda bari Goma bari guhamagara imiryango yabo bavuga ko barimo huhohoterwa.
Kigali Today iracyabikurikirana.

Ubwo Congo yari imaze gufunga umupaka abantu bakuwe mu nzira.

Umuyobozi w’akarere ka Rubavu, Sheikh Bahame Hassan, avuga ko ibyakozwe n’uyu musirikare ari urugomo rusanzwe rukorwa n’inzego z’umutekano za Congo.

Umuyobozi w’akarere ka Rubavu avuga ko ahangayikishijwe n’umutekano w’Abanyarwanda bafatiwe i Goma, aho avuga ko niba umurikare akoze amakosa, bitagombye gukosorwa bahohotera Abanyarwanda b’abaturage, ahubwo inzego zibishinzwe zagombye kureba uko zicyemura ikibazo.

Ubuyobozi bw’umujyi wa Goma buza gusaba abaturage gusubira mu ngo.

Gufatwa k’uyu musirikare w’umukomando wa Congo byateje ikibazo ku mipaka yombi ihuza Rubavu na Goma kuko yahise ifungwa n’abakozi ba Congo bavuga ko bawufungura ari uko umusirikare wabo arekuwe, gusa nyuma y’isaha umupaka munini wahise ufungurwa bisabwe n’ubuyobozi bwa Kinshansa nkuko umunyamakuru wa Kigali Today yabitangarijwe n’abakora kuri uyu mupaka.

Umupaka muto wakomeje gufungwa ku ruhande rwa Congo ndetse n’abaturage batuye mu Birere baza kwigaragambya bamagana u Rwanda, ibikorwa byakurikiwe no guhohotera abaturage b’Abanyarwanda bari bagiye i Goma.

Bamwe mu Banyarwanda bashima Imana ubwo bari bageze mu Rwanda nyuma yo gufungirwa Goma.

Kugera saa kumi n’imwe z’umugoroba umubare w’abafashwe wari utaramenyekana, uretse ko hari hamaze gutangazwa batanu barimo n’abanyeshuri b’abakobwa batwawe n’abasirikare.

Ku isaha ya 16h53 ubuyobozi bwa Congo bushinzwe abinjira n’abasohoka bwemereye Abanyecongo bari baje mu Rwanda gusubira mu gihugu cyabo, naho 16h56 Abanyarwanda bari bahejejwe Congo bemererwa kuza mu Rwanda. Nyuma y’iminota itatu, Congo yahise ifunga umupaka Abanyarwanda bagumishwaho n’abanyecongo bari mu Rwanda baguma mu Rwanda.

Abanyecongo bari mu Rwanda bambukaga ariko Abanyarwanda bari Congo batemerewe kuza mu Rwanda.

Ubwo abayobozi b’umujyi wa Goma bageraga ku mupaka bavuze ko uyu musirikare Musakana yafatiwe muri zone neutre aho gufatirwa mu Rwanda nkuko byemezwa na Juvénal Ndabereye Senzige wungirije umuyobozi w’umujyi wa Goma.

Juvénal Ndabereye Senzige asaba abaturage gusubira mu ngo aho yaraherekejwe na Col Mamadou Ndal Coast bavuga ko ikibazo cy’uyu musirikare kizigwaho n’ubuyobozi akarekurwa.

Iki kibazo cy’inzego z’umutekano za Congo zinjira mu Rwanda mu buryo butemewe si ubwa mbere bibaye kuko taliki 12/09/2013 nabwo umupolisi wo mu rwego rwa Officier yinjiye mu Rwanda ku mupaka muto agatuka umupolisi w’u Rwanda agasabwa gusubira mu gihugu cye.

Sylidio Sebuharara