Binyuze mu mikino, abana bafite ubumuga bo muri icyo kigo bagaragaje ibibazo bakunda guhura nabyo birimo kwitwa amazina abatesha agaciro ndetse n’urugamba Leta y’u Rwanda ikomeje kurwana kugira ngo imibereho yabo igende neza.

Binyujijwe muri utwo dukino tugufi n’imivugo abana bafite ubumuga berekanye ko gukoreshwa imirimo ivunaye bibagiraho ingaruka mu mikurire yabo.

Umunsi w’umwana w’umunyafurika wizihizwa tariki 16/06/2012 washyizweho ugamije guteza imbere uburenganzira bw’umwana bwari bukomeje kubangamirwa hirya no hino; nk’uko byatangajwe naMukantagazwa Brigitte, umuyobozi w’ishami ry’igenamigambi, ikurikirana n’isuzumabikorwa mu karere ka Nyanza.

Yagize ati: “Ibyo byatumye buri mwaka tariki 16/06/2012 hizihizwa umunsi mpuzamahanga w’umwana w’umunyafurika ushyizweho n’umuryango w’abumwe bw’afurika kuva mu mwaka w’1990”.

Mukantagazwa Brigitte yakomeje asobanura ko kuri iyi tariki hanibukwa abana biciwe i Soweto muri Afurika y’Epfo mu mwaka w’1976.

Abana bafite ubumuga barerwa mu kigo cya Gatagara yabakanguriwe kumenya uburenganzira bwabo ndetse bakanabuharanira mu gihe cyose bahayeho kubuhonyora.

Ku munsi w’umwana w’umunyafurika akarere ka Nyanza kageneye impano ikigo cya Gatagara ingana n’amafaranga ibihumbi ijana ndetse abakozi b’akarere basabana n’abana bafite ubumuga binyujijwe mu mbyino zinyuranye no gusangira.

Insanganyamatsiko y’umunsi w’umwana w’umunyafurika ku rwego rw’igihugu yagiraga iti: “ Twubake umuryango nyarwanda duteza imbere uburenganzira bw’abana bafite ubumuga, turandura imirimo mibi ikoreshwa abana”.

Jean Pierre Twizeyeyezu