Colonel Murenzi yashimiye urwo rubyiruko kubera intambwe rumaze gutera, aho yatanze urugero rw’umusore basanze Iwawa tariki 19/11/2013 ukomoka mu karere Gicumbi mu murenge wa Bukure wageze Iwawa yarishwe n’urumogi, ariko akaba yarahaherewe ubumenyi mu bijyanye no kubaza ku buryo muri icyo kigo hagaragara akabati k’intangarugero yakoze.

Yabahaye n’urundi rugero rw’umusore wo mu karere ka Rubavu wari warananiranye akora ibikorwa byangiza umutekano, bamuzana Iwawa none ubu akaba ari umwe mu basirikari bawucunga, ndetse akaba ageze ku ipeti rya Lieutenant.

Colonel Murenzi yasabye urwo rubyiruko kuba aba mbere mu gufatanya n’inzego zishinzwe umutekano bagatanga amakuru y’abantu bahungabanya umutekano, cyane cyane nk’abanywa urumogi, dore ko bamwe muri urwo rubyiruko baje Iwawa barunywa, ariko bakaba batakirunywa.

Ati “uko mwahungabanyaga umutekano w’igihugu, ni na ko mugiye kuwubungabunga, si byo?” na bo baramusubiza bati “ni byo.”

Yasabye urwo rubyiruko ko nirugera iwabo ruzajya rutanga amakuru hakiri kare mu gihe rwumvise umuntu ufite umugambi wo gukora icyaha kugira ngo gikumirwe kitaraba.

Yabahaye ingero za bimwe mu byaha biherutse gukorwa bo bagomba kwirinda ndetse bagatungira agatoki inzego z’umutekano mu gihe hari aho bumvise biri gutegurwa.

Izo ngero ni nk’aho mu karere ka Ngororero mu murenge wa Hindiro, umuturage aherutse gutema inka, nyamara ari itungo rifite agaciro mu muco nyarwanda, asaba urwo rubyiruko kwirinda ko bene ayo mahano yakomeza kubaho.

Yatanze urundi rugero aho yavuze ko mu murenge wa Mubuga mu karere ka Karongi, abaturage baho baherutse gukubita umushoferi wari uzaniye abana baho amata y’uruganda rw’inyange. Ibi na byo yavuze ko ari amahano kuko ubusanzwe amata yubashywe mu muco nyarwanda.

Abo mu murenge wa Kivumu, by’umwihariko mu kagari ka Kabujenje mu karere ka Rutsiro bari mu kigo cya Iwawa yabasabye kujya guhindura imyumvire y’abaturage bo muri ako kagari baherutse kwiba ibendera ry’igihugu ndetse bakica n’umukecuru uhatuye bamuziza ko ngo ari umurozi.

Urwo rubyiruko ruri Iwawa rwashimiye umukuru w’igihugu washyizeho icyo kigo bakemererwa kukigamo ku buntu, rwemerera abo bashyitsi bo mu nzego z’umutekano hamwe n’abayobozi bo mu karere ka Rutsiro barusuye ko ingeso mbi zabarangaga bagiye kuzisimbuza ibikorwa byiza bakiteza imbere ndetse bagateza imbere igihugu.

Ibi babigaragaje babinyujije mu mvugo batoye yumvikanisha intego yabo, aho bose hamwe bavugira hamwe bati “amahoro, ubumwe, ubwiyunge, abadaheranwa, imbaraga z’igihugu. Turahari, tuzakomeza kuhaba duharanira iterambere n’imibereho myiza, ejo heza cyane. Ukuri kurakiza, kumva birafasha, guhinduka bidufitiye akamaro, aho twakererewe tuhishyure kwihuta cyane, intangarugero igihe cyose, ...uwari Sawuli yahindutse Pawulo, uwahindutse Pawulo azahora ari Pawulo.”

Ku kirwa cya Iwawa harabarizwa urubyiruko 1972, barimo 113 biga imyuga, n’abandi 859 biga igororamuco. Bigishwa imyuga itanu ari yo ubuhinzi, ubworozi, ububaji, ubudozi n’ubwubatsi. Bigishwa na gahunda yo guhanga umurimo, bakigishwa na mudasobwa ku bufatanye na DOT Rwanda.

Umuhuzabikorwa w’ikigo ngororamuco giteza imbere imyuga cya Iwawa, Niyongabo Nicolas avuga ko umuntu uhavuye aba afite imyitwarire myiza kandi akaba afite umwuga ashobora kujyana ku isoko ry’umurimo.

Malachie Hakizimana