Aba bakobwa bakomeje gutakambira ubuyobozi aho bavugaga ko babuze ubushobozi bwo gutanga amafaranga y’ubukerererwe, nyuma y’uko abagabo babyaranye na bo bihakanaga abo bana babyaranye.

Uwimana Consolee w’imyaka 20 ufite umwana w’imyaka 4 yatewe inda ubwo yigaga mu Rwunge rw’Amashuri rwa Mushubati mu mwaka wa gatatu. Yavuze ko yari yarabuze uko yandikisha umwana kuko se atemera umwana.

Yagize ati “Umuhungu twiganaga yanteye inda arananyihakana none natinze kwandikisha umwana. Ubu ndi gusabwa amafaranga y’ubukerererwe kandi ntayo mfite kereka bamwandikiye Ubuntu.”

Nyampinga Jeannette ufite umwana w’imyaka itatu, avuga ko nta bushobozi yari afite bwo kwandikisha umwana we, kuko n’iwabo batamufashaga.

Ati “Nanjye nta bushobozi mfite bwo gutanga amafaranga y’ubukerererwe kandi uwo twabyaranye yanze kwandikisha umwana, byongeye mu rugo ntibampa amafaranga. Ku bw’ibyo, ubuyobozi bwadufasha tukabandikisha ku buntu.”

Umunyamabanga Nshingwabikorwa w’Umurenge wa Mushubati, Nirere Etienne, avuga ko nyuma y’ubusabe bw’aba bakobwa, babyizeho bagasanga ntacyo byakwica babandikishije ku buntu kubera ko ngo ari no guha uburenganzira abo bana.

Ati “Abakobwa babyariye iwabo badusabye kubandikishiriza abana ku buntu nyuma y’uko abo babyaranye babuze, abandi bakihakana abana ariko twasanze mu rwego rwo guha uburenganzira abo bana twabandikira ubuntu mu bitabo by’irangamimerere kandi ubu byaratangiye kuva ku kagari kugera ku murenge.”

Nirere akomeza agira inama abasore cyangwa abagabo babyarana n’abakobwa bakihakana abana kujya bagira ubutwari bakabemera kandi bakandikishiriza abana igihe, kuko ngo ari ukwihesha agaciro ukanagahesha uwo mwana ubyaye.

Ubusanzwe umubyeyi agomba kwandikisha umwana uvutse mu bitabo by’irangamimirere mu gihe kitarenze iminsi 15.

Iyi minsi iyo irenze, umuryango utarandikishirije umwana ku gihe ucibwa ibihumbi 25Frw igihe ubyifuza kandi bagaca mu rukiko. Mu gihe umwana yandikwa ku mubyeyi umwe kuko hari undi utamwemera, icyo gihe ubukerererwe buba 2000Frw.