Mu kiganiro cyatanzwe n’abakozi ba RGB muri Kaminuza yigenga ya Kigali (ULK), ishami rya Gisenyi, abanyeshuri bagaragarijwe ubushakashasti bukorwa n’iki kigo ku mikorere y’ibigo bya leta mu Rwanda n’uko abanyarwanda babibona, basabwa kugira uruhare mu iterambere ry’igihugu.

Bonny Mukombozi, umukozi muri RGB avuga ko gahunda yo kuganira n’abanyeshuri biga mu mashuri makuru yateguwe na RGB ifatanyije na Kaminuza kugira ngo bahe urubyiruko rwiga muri Kaminuza umwanya wo gutanga ibitekerezo, ariko babasaba gukora ubushakashatsi buzana impinduka no gutanga ibisubizo mu mibereho y’abanyarwanda.

Ubushakashatsi bwamuritswe na RGB muri Kaminuza ya ULK-Gisenyi bugaragaza uko abanyarwanda bahagaze kuri serivisi bahabwa mu turere tw’igihugu, hakaba haribanzwe muri gahunda z’ubutaka, ibikorwa remezo, ubuzima, ubuhinzi, uburezi, ubutabera n’ imiyoborere.

Nyuma y’ubushakashatsi bwa RGB, abanyeshuri bo muri Kaminuza basabwa nabo kwibanda ku bushakashatsi buzana impinduka kandi bwibanda ku bibazo biboneka aho batuye ariko bashaka uburyo byabonerwa ibisubizo.

Umuyobozi wa Kaminuza ya ULK-Gisenyi ushinzwe amasomo Dr Cyeze Emmanuel avuga ko bashimira RGB igaragariza abanyarwanda ibyavuye mu bushakashasti bwakozwe kugira ngo abanyarwanda bamenye aho bageze muri serivisi bahabwa.

Ngo bizatuma abanyeshuri bandika ibitabo bamenya aho bagomba kwibanda kugira ngo buzurize leta bayigaragariza icyo ibifuzaho. Akavuga ko kuba ubu bushakashatsi bwagaragarijwe abanyeshuri bisa no kwigisha imiryango yabo kuko bazabisangiza aho batuye.

Dr Cyeze avuga ko n’ibindi bigo byagombye kujya bigira umwanya wo kugaragaza ibyo bikora aho gukora ubushakashatsi bukabwikwa mu tubati kandi abanyarwanda bacyeneye kumenya ibyo bakorerwa, n’urwego bagezeho kugira ngo n’ahacyenewe imbaraga zishakishwe zishyirweho ariko umuvuduko igihugu kirimo mu iterambere ntuhungabane.

Sylidio Sebuharara