Ibi byatangajwe na minisitiri ushinzwe iterambere ry’umuryango n’ubwuzuzanye, Oda Gasinzigwa hamwe n’umunyamabanga wa Leta ushinzwe amashuri abanza n’ayisumbuye, Mathias Harebamungu, mu mihango yo gutangiza ubukangurambaga bwo kurwanya inda zitifuzwa mu bana bato, cyane cyane abakiri ku ntebe y’ishuri. Iyi gahunda ifite insanganyamatsiko yiswe ngo “Ndi umukobwa ufite icyerecyezo, kwiga kwanjye ni ingenzi, Nanze gutwita kw’Abangavu”.

Ba minisitiri Harebamungu na Gasinzigwa bemeje ko Leta ifite gahunda yo gukurikirana uzashuka umwana w’umukobwa wese.

Muri iyi mihango yabereye mu karere ka Rwamagana ku ishuri rya Saint Aloys, kuwa 13/02/2014 aba baminisitiri bashimangiye ko ngo Guverinoma y’u Rwanda yamaze kunoza imiyoboro y’ibanga rikomeye kandi ngo izaba ifite amaso hirya no hino mu gihugu ku buryo ngo n’umugabo uzajya atangira gushukashuka umwana w’umukobwa mu nzira, azajya ahita amenyekana hatarashira iminota 30.

Icyi cyemezo aba baminisitiri bombi bavuganye imvugo ikaze, ngo cyirimo ubuhanga n’ubwitonzi ku buryo ntawe uzabasha kunyura mu rihumye inzego Leta yashinze gukurikirana abagabo bakuru bagira imyitwarire yo gushukashuka abana b’abakobwa.

Minisitiri Oda Gasinzigwa yavuze ko uyu mugambi wo gukumira abagabo b’ingeso mbi nk’izi urimo inzego zose z’igihugu kuko Leta yasanze hari abana bamwe bagikomeje kubuzwa gukomeza amashuri n’abo bagabo biswe ibisiga n’ibisumizi.

Ngo abashuka abana nk’aba bose bakababuza kwiga babatesha icyerecyezo cyiza Leta itagishoboye kwihanganira.

Dr Mathias Harebamungu yagize ati “Abafite izo ngeso mbi babe bitegura ko batazongera kwangiza abana b’Abanyarwanda ngo bakomeze kwidegembya kandi ntabwo bazongera kugirirwa akabanga. Tuzajya tubashyira ku kabonabose, rubanda bose babamenye ndetse n’imiryango yabo n’abana babo bamenye ibyo abo biyita abagabo bakora bahemukira igihugu.”

Aba baminisitiri ariko banze gutangariza abanyamakuru uburyo ibi bizagerwaho, bavuga ko byateguwe neza kandi inzego z’umutekano na minisiteri y’Ubutarebera ngo biteguye bihagije gusohoza uyu mugambi ntawe ubashije kuwunyura mu rihumye.

Ababyeyi n’abakobwa ubwabo baratungwa agatoki

Uyu mugambi wa Guverinoma ngo ubwawo ntiwabasha gucyemura iki kibazo ku buryo burambye niba ababyeyi n’abana b’abakobwa ubwabo badahinduye imyitwarire n’imitekerereze.

Aha abanyeshuri bakinaga umukino werekana uko ngo abagabo bashukashuka abana mu mayira n’ahandi bahuriye nabo batari ku ishuri.

Imibare ya nyuma yizewe iherutse gutangazwa mu Rwanda mu mwaka wa 2011 yavugaga ko muri 2010 abana basaga 600 bari bataye ishuri kubera ko bari batwise mu gihe cyitateganijwe.

Inzobere n’abandi bakurikirana iby’iki kibazo bahuriza ku kuba abakobwa benshi batwara inda z’indaro mu gihe cy’ibiruhuko cyangwa igihe bari mu mayira bava ku ishuri kuko ngo ntaharamenyekana umukobwa watwaye inda ku ishuri ayitewe n’umunyeshuri.

Ibi rero ngo ni ikimenyetso gikomeye ko ababyeyi aribo bakwiye kuba ku isonga mu kumenya uburyo abana babo basama inda igihe kitifuzwa dore ko bamwe ngo basa n’abaterera abana babo amashuri, bakazasigara bijujuta igihe bamaze gusama.

Abana b’abakobwa nabo bagerwaho cyane cyane n’ingaruka z’ubu bushukanyi ngo barimo bamwe babiterwa n’ubukene ariko hakaba abandi babiterwa ngo n’umurengwe bagashaka ukundi bakwishimisha, cyangwa se bamwe bakaba batanyurwa n’ibyo imiryango yabo ibagenera, bakishora mu mibonano mpuzabitsina bashaka udufaranga n’irindi raha ry’akanya gato.

Uyu munyeshuri yasabye ko hanozwa gahunda zifite akamaro zajya zigenerwa abanyeshuri mu biruhuko.

Ishuri rya Saint Aloys Rwamagana ryatangirijwemo iyi gahunda ngo rifite umwihariko w’uko ritarigera na rimwe rigira umunyeshuri uryigamo usama inda itifujwe itanateguwe. Mu kuhatangiriza iyi gahunda ngo Leta yashakaga gushimira abahiga n’abarezi baryo, ndetse no kwereka abandi ko kwirinda bishoboka, aho ngo basaba abanyeshuri bose kumenya kuvuga Oya ku babashuka bose.

Ahishakiye Jean d’Amour