Nk’uko bamwe babitangarije umunyamakuru wa Kigali Today ngo ku masaha y’umugoroba nibwo bumvise amasasu menshi hamwe n’ibisasu bya rutura bituma bahitamo guhungira mu Rwanda.

Benshi mu bahungiye mu Rwanda bavuga ko bari biriwe bumva amasasu kubera gusubiranamo kwa M23 kandi iyi mirwano n’ubundi isanzwe iba ku buryo butunguranye harimo n’amasaha y’ijoro.

Ku isaha ya saa kumi n’imwe nibwo benshi bari bageze mu Rwanda bacumbika mu baturanyi babo bavuga ko bashaka gucungira hafi kugira ngo nibigenza amaguru macye basubire mu byabo.

Mu gitondo cyo kuri uyu wagatanu tariki 15/03/2013 ubuyobozi bw’akarere ka Rubavu n’umurenge wa Bugeshi wegereye umupaka wa Congo bakoze ibarura ry’Abanyecongo bahungiye mu Rwanda basanga ari 1143 ariko benshi bahise bisubirira iwabo nyuma yo kumva amasasu acecetse.

Ubuyobozi buvuga ko ntabagumye mu Rwanda cyangwa ngo bajyanwe mu nkambi ahubwo bisubiriye iwabo kubera ko amasasu yahagaze.

Sylidio Sebuharara