Uyu musaza iyo umubona ubona ashaje, ariko agira atya akikora agafata akabando ke akagera ahacururizwa inzoga zengwa n’uruganda akanywa icupa rimwe akitahira.

Agira ati “nubwo nta bushobozi mfite, ariko iyo mbonye agafaranga hari uwakamaye ndasindagira nkagotomera agacupa kamwe nkongera nkitahira, aho kugirango ngende nandavure muri biriya biyoga by’ibikorano”.

Sekabuga avuga ko uretse ububi bw’inzoga z’inkorano yumva, ngo asigaye yanga n’ahantu bazinywera kuko abahanywera akenshi barangwa n’imirwano gusa mu gihe iyo yasangiye n’abanywa inzoga zujuje ubuziranenge abavanaho ibitekerezo byiza bikamufasha mu buzima bwe.

Gusa nubwo uyu musaza yikundira inzoga zo mu ruganda, ngo niyarenza imwe kuko igihe agezemo atakibashije.

Aha ni naho ahera asaba abantu cyane cyane abakiri bato, kunywa inzoga bashyiramo ubwenge kuko hari abantu benshi azi zatesheje umurongo zikababuza kugera ku ntego biyemeje.

Ahamya ko kuba ageze mu myaka 93, byatewe n’uko yagiye anywa inzoga ze mu rugero. Ibi bigashimangirwa n’abamuzi bakunze gusangira nawe akayoga, aho bavuga ko uyu musaza yinwera icupa rimwe gusa agataha bigatuma abantu bose bamukunda.

Eric Muvara