Ibi Perezida Kagame yaraye abibwiye Inama idasanzwe y’Abakuru b’Ibihugu bya Afurika y’Uburasirazuba(EAC)yaraye iganiriye ku kibazo cy’Intambara ibera muri Congo, aho yabasabye kuticara ngo barebere.

Perezida Kagame asaba bagenzi be n’abandi bose bireba kubanza kumva neza imiterere y’ikibazo, aho gukomeza gushimana, buri wese yigira mwiza ariko ngo akurikirana inyungu ze aho gushyira imbere inyungu rusange nk’Abanyafurika y’Iburasirazuba.

Perezida Kagame avuga ko mu minsi ibiri cyangwa itatu ishize u Rwanda rwatakaje abantu barenga 10, hanakomereka ababarirwa mu magana kubera ibitero by’amasasu byaturutse i Goma, ariko byo ngo azabyikemurira nta kabuza.

Perezida Kagame asobanura ko impamvu y’ibyago by’intambara yugarije abaturage mu burasirazuba bwa Congo ihera mu myaka irenga 20 ishize, kubera iyo mpamvu amahanga akaba ngo atagomba kuvuga ko iriya ntambara itunguranye.

Perezida Kagame agira ati "Bakuye abantu mu byabo, barabishe, barabatoteza umunsi ku wundi kubera icyo bari cyo. Dufite impunzi zimaze imyaka irenga 20 hano, zarirukanywe muri Congo zoherezwa mu Rwanda zitwa Abatutsi, bityo ngo bakwiye kuba mu Rwanda, ntabwo bakwiye kuba hariya."

Ati "Hanyuma ibintu nk’ibyabaye mu cyumweru gishize byadutse, tugatangira kwigira nk’abatunguwe, bikavugwa ngo duteje abantu akaga. Mbese gukandamiza abantu, kubica no kubakura mu byabo ntibigize icyaha cyo gushyira abantu mu byago? Twe nk’Abanyafurika y’Iburasirazuba twicara hano, hanyuma turabikoraho iki!"

Perezida Kagame avuga ko ingabo z’amahanga zarunzwe ku bwinshi muri Congo, harimo MONUSCO, SAMIDRC, abacancuro, u Burundi na "FDLR yabiyunzeho", kandi buri wese ngo ari aho arebera, bidakwiye gutuma ’abantu bigiza nkana bavuga ko batumva ibibazo bimaze imyaka myinshi hariya mu burasirazuba bwa Congo.

Umukuru w’Igihugu yagaragaje ko atishimiye mugenzi we wa Afurika y’Epfo, Cyril Ramaphosa, utarashatse ko ingabo za EAC ziza kugarura amahoro muri Congo, kuko ngo zitakoraga ibintu nk’uko abyifuza, ahitamo kuzana iza SADC ’zifatanya n’umutwe wa FDLR wasize ukoze Jenoside mu Rwanda’.

Aha ni ho Perezida Kagame ahera asaba Abakuru b’Ibihugu bigize Umuryango wa Afurika y’Uburasirazuba kutaba indorerezi.