Ifoto y’iyi noti nshya yatangiye kugaragara ku mbuga nkoranyambaga nka “Twitter”. Ibara ry’iyo noti rijya gusa n’ubururu bwerurutse. Yandikishijeho inyuguti zijya gusa n’umukara.

BNR ivuga ko iyo noti ifite kandi ibimenyetso bituma abafite ubumuga bwo kutabona bayikoraho bakamenya ko ari iya 500.

Ikindi ngo ni uko iyi noti nshya ndetse n‘iyo yasimbuye zizakomeza gukora zombi kugeza igihe iyasimbuwe izashira ku isoko.

Mu kwezi kwa Kamena 2013 nibwo inama y’abaminisitiri yagejejweho umushinga wo guhindura inoti y’amafaranga 500 igasimburwa n’indi nshya.

Kuva icyo gihe inoti ya 500 yakoreshwaga bisanzwe ariko yabonekaga hake ndetse n’aho ibonetse ikagaragara ishaje cyane. Akenshi wasanganga abantu bakoresha ibiceri kuko iyo noti yanonekaga gake.

Umushinga w’iyi noti nshya wagaragazaga ko kimwe mu bimenyetso bishobora kujya kuri iyi noti ari inka eshatu zigaragaza aho Abanyarwanda bageze bivana mu bukene ndetse banaca imirire mibi.

Uyu mushinga kandi werekanaga ko kuri iyo noti hazaba hariho abanyeshuri bane bari gukoresha imashini za mudasobwa; iki akaba ari kimwe mu bimenyetso byerekana ko ikoranabuhanga rihera mu bana bato.

Inoti nshya ya 500 hamwe n’iyari isanzwe ikoreshwa.

Iyi noti biteganijwe ko ishobora kuba yatangiye gukoreshwa guhera mu mpera z’uyu mwaka. Itariki izatangira gukoreshwaho ntiramenyekana.

Inoti ya magana atanu yasimbuwe, yari ifite ibara ryiganjemo icyatsi kibisi ikaba yari irimo inyubako banki nkuru y’igihugu ikoreramo, ku rundi ruhande ikabaho ifoto y’abantu batatu bari gusoroma icyayi cyane ko ari kimwe mu bihingwa bigize ubukungu bw’u Rwanda kandi kikaba gitunze abaturage batari bake.

Mu Rwanda hakunze kugenda hahindurwa amafaranga ahakoreshwa nk’aho inoti y’ijana yakoreshwaga yahinduwe ubu hakaba hakoreshwa igiceri cy’ijana n’andi atandukanye.

Norbert Niyizurugero