Iyi Hoteli ya mbere iri kubakwa mu Kagari ka Bumba mu Murenge wa Mushubati, mu birometero nka bibiri uvuye ku biro by’Akarere ka Rutsiro izaba igizwe n’ibice bitandukanye; harimo icyumba cy’inama gishobora kwakira abantu 400, ibyumba by’amacumbi 49, akabari na resitora, akabyiniro ( Night Club), Sauna Massage, ndetse n’urwogero (Piscine).

Iyi Hoteli ngo izafasha mu guteza imbere ishoramari.

Biteganijwe ko iyi hoteli izaba ifite n’andi mazu yo guturamo (appartements) 13, yatangiye kubakwa mu mwaka wa 2012, izuzura mu kwezi kwa gatanu uyu mwaka wa 2015 itwaye amafaranga asaga miliyoni 950.

Hitimana Nathanael uhagarariye sosiyete yitwa ECOFOHINA yubaka iyi Hoteli yemeza ko nyuma yo kwishyurwa amafaranga yari amaze iminsi ategereje bitarenze muri gicurasi azaba yayujuje.

Yagize ati “ubu aho bampereye amafaranga maze iminsi nishyuza ndizera ko mu kwezi kwa 5 nzaba ndangije kubaka Hoteli”.

Kigali Today yabajije Rwiyemezamirimo impamvu abakozi bamaze hafi ibyumweru bibiri badakora avuga ko ari uko nta mafaranga yari yahawe, kandi ko atakoresha abakozi atizeye ko azabahembera igihe ndetse nta n’ibikoresho afite.

Biteganyijwe ko iyi hoteli izaba yuzuye mu kwezi kwa Gatanu.

Icyumba cy’inama cyo gisa n’icyarangiye.

Hoteli niyuzura ni uku izaba imeze.

Nta mukozi n’umwe wagaragaye ku nyubako y’iyi hoteli mu byumnweru bibiri bishize kubera ko akarere kari kataratanga amafaranga ngo imirimo ikomeze.

Mbarushimana Aimable