My District Today
 
KT TV  KT TV
 
Amakuru
 
Imikino
 
KT Radio
 
KT Press
 
Amakuru yose ku Rwanda
Amakuru mu byiciro

Afurika y’Epfo: Perezida Kagame yitabiriye irahira rya Cyril Ramaphosa (Amafoto)

Yanditswe na

Perezida wa Repubulika, Paul Kagame, ni umwe mu bakuru b’ibihugu na za Guverinoma bitabiriye umuhango w’irahira rya Perezida Cyril Ramaphosa uherutse gutorerwa kuyobora icyo gihugu.

Uwo muhango witabiriwe n’abantu basaga ibihumbi 30 biganjemo abaturage ba Afurika y’Epfo, ukaba ubera kuri Stade Loftus Versfeld mu Mujyi wa Pretoria.

Perezida Cyril Ramaphosa w’imyaka 66 y’amavuko yemejwe n’Inteko Ishinga Amategeko ya Afurika y’Epfo nka Perezida w’icyo gihugu tariki 22 Gicurasi 2019. Ni nyuma y’uko ishyaka rye rya ANC ryari ryegukanye intsinzi mu matora y’Abadepite yabaye tariki 08 Gicurasi 2019.

Muri ayo matora, ishyaka ANC ryegukanye intebe 230 mu myanya 400, imyanya ingana na 57,5%, ikaba ari yo mike iryo shyaka ryabonye mu mateka yaryo kuva mu myaka 25 ishize ubwo muri icyo gihugu hakurwagaho ubutegetsi bwa ‘Apartheid’ bwashyiraga imbere ivangura hagati y’abirabura n’ab’uruhu rwera.

Perezida Ramaphosa afite akazi katoroshye ko kuzahura ubukungu bw’icyo gihugu butifashe neza ndetse no gushaka ikibazo cy’abaturaage benshi b’icyo gihugu badafite akazi.

Agiye kuyobora manda y’imyaka itanu nyuma y’uko n’ubundi yari asanzwe ayobora icyo gihugu arangiza manda uwo yasimbuye Jacob Zuma atabashije kurangiza.

Bwana Zuma yeguye muri Gashyantare 2018 nyuma yo kotswa igitutu n’abamusabaga kwegura bamushinja ibyaha bya ruswa.

Hari ubushake bugaragara bwo kunoza umubano w’ibihugu byombi, u Rwanda na Afurika y’Epfo, umubano wakunze kurangwamo agatotsi mu myaka ishize, biturutse ahanini ku kuba u Rwanda rushinja Afurika y’Epfo gucumbikira bamwe mu bafite imigambi yo guhungabanya umutekano w’u Rwanda barimo Kayumba Nyamwasa n’ishyaka rye rya RNC.

Muri iyi minsi kandi havugwa ikibazo cy’Abanyarwanda bashaka kwerekeza muri Afurika y’Epfo ariko kubona Visa ntibiborohere.

Ubwo ANC yari imaze gutsinda amatora, bigaha Cyril Ramaphosa icyizere cyo gukomeza kuyobora Afurika y’Epfo, Perezida Kagame yaramushimiye, amwizeza ubufatanye n’imikoranire myiza igamije iterambere ry’ibihugu byombi.

Cyril Ramaphosa yarahiriye kuyobora Afurika y'Epfo muri manda y'imyaka itanu
Cyril Ramaphosa yarahiriye kuyobora Afurika y’Epfo muri manda y’imyaka itanu

Ubwo yarahiraga kuri uyu wa gatandatu tariki 25 Gicurasi 2019, Perezida Matamela Cyril Ramaphosa yasezeranyije Abaturage ba Afurika y’Epfo ko azakora neza inshingano ze, ko azubaha Itegeko Nshinga n’andi mategeko, kandi ko azaharanira iterambere ry’Igihugu n’iry’Abaturage muri rusange.
Ati “Imana Ibimfashemo.”

MENYA UMWANDITSI

Umunyamakuru

@ h_malachie
Reba inkuru zose nanditse ( 1672 )
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka