Amasezerano ya Maputo yashyizweho umukono n’ibihugu bya Afrika n’u Rwanda rurimo, mu wa 2004 mu ngingo yayo ya 14 asobanura ko umuntu wemerewe gukuramo inda ari uwasamye yafashwe ku ngufu, uwatewe inda n’uwo bafitanye isano, n’ uwashyingiwe ku ngufu.

Tom Mulisa asanga mu itegeko ryo gukuramo inda mu Rwanda ryakubahirizwa nk’uko bikorwa ahandi bitabangamiye abaganga

Bene aba bemerewe kwifashisha abaganga bemewe n’amategeko bagakuramo izo nda nk’uko bigenwa n’amategeko kuko hari n’izindi ngingo zirengera urusoro (umwana utarageza ku mezi atanu mu nda).

Mu Rwanda abaganga bavuga ko inda ishobora gukurwamo n’abaganga ntigire ikibazo kuri nyirayo no ku rusoro, ari itarengeje ibyumweru 22 kuko iyo birenze umwana aba yatangiye gukura, kumukuramo bikaba bifatwa nko kumwica.

Ikibazo kiri hagati y’abaganga n’ubucamanza ariko ni uko umugore yemererwa gukuramo inda ari uko byemejwe n’inkiko, yabanje kuburana ibikubiye muri iriya ngingo ya 14 ya Maputo, ingaruka zikaba gutinda guhabwa imyanzuro bityo rwa rusoro rwagombaga gukurwamo rugatangira kuba umwana udakorwaho mu nda ya nyina.

Abaganga ntibarwanya guca inzira y’amategeko kuko nibwo buryo bubarinda kuba abafatanyacyaha mu kwica, ariko bagaragaza ko iyo imyanzuro y’urukiko itanzwe igihe cyarenze, biteza ikibazo hagati yabo n’uwo bagomba gufasha.

Inkiko zishinjwa gutanga imyanzuro yo gukuramo inda zarengeje igihe

Biragaragara ko guca mu nkiko bikerereza ushaka gufashwa gukuramo inda
Urugero rutangwa rubangamiye abaganga n’abasaba serivisi zo gukurirwamo inda ku bushake ni urwo mu Karere ka Muhanga aho umwana wafashwe ku ngufu ngo yagiye kwa muganga asaba ko bamufasha kuyikuramo, abaganga bakamutuma ibyangombwa by’urukiko, umwana agasiragira akabibona inda ibura ukwezi kumwe ngo ivuke.

Urukiko rwisumbuye rw’i Muhanga ngo rwasohoye imyanzuro yemerera uwo mwana gukuramo inda kuko yafashwe ku ngufu imaze kugira amezi umunani kandi yaratangiye gusaba ko yayikurirwmo igifite amezi abiri, maze nyuma y’amezi atandatu mu mwanzuro warwo rugira ruti, “Dutegetse ko abaganga bakuramo iyo nda kuko umwana yafashwe ku ngufu”, ibyo abaganga basanga bidashoboka kuko inda y’amezi umunani kuyikuramo aba ari ukwica kandi haba hirengagijwe amategeko arinda urusoro n’ubwo nta n’uburyo runaka buteganyijwe ku byakoreshwa ngo iyo nda ikurwamo.

Nyuma y’uko iyo myanzuro yategekaga abaganga ngo bakuremo inda y’uwo mwana tutashatse kuvuga amazina ye, ubu umubyeyi w’umwana yareze abaganga kuko banze gukurikiza imyanzuro y’urukiko.

Abaganga barifuza ko ari bo bagira uruhare runini mu kwemeza inda ikurwamo kurusha abacamanza

Rutaganira Ildephonse ushinzwe ubuzima bw’umubyeyi n’umwana ku bitaro bya Kibagabaga, agira ati, “None se uwo mwana nitumukuramo tuzamuniga, tuzamushyira he ko aba ari umwana wuzuye, ibyemezo by’inkiko byagakwiye gufatwa kare igihe kitararenga kuko ntabwo byemewe gukuramo inda y’amezi umunani ku muganga, none se urumva itegeko ritatugonga kandi abacamanza babireba”?

Rutaganira avuga ko kuba urukiko rwrafashe umwanzuro wo gukuramo inda irengeje igihe giteganywa bigaragaza ko hari ingingo zidasobanutse

Rutaganira avuga ko hari ibidasobanutse ku ikurwamo ry’inda n’impamvu ikurwamo kuko ngo inda zose zidakurwamo n’iyo urukiko rwaba rwabitegetse, muganga we ashobora kutabikora.

Abaganga bavuga ko itegeko ryemerera abagore gukuramo inda ritagaragaza neza
icyo abaganga bakurikiza kuko usanga inkiko zanzura ko inda ishobora gukurwamo, ariko batagaragaza uko iyo nda yaba ingana.

Abaganga bavuga ko inda ikurwamo mbere y’ibyumweru 22, bivuze ko inda y’uwo mwana yari imaze kurenza igihe, bakifuza ko abaganga ari bo bajya bafata umwanzuro wo gukuramo inda cyangwa kuyireka imyanzuro ikamenyeshwa abacamanza, cyangwa nk’uko Polisi yorohereza ku gukurikirana abafashwe ku ngufu, n’abacamanza bakaba bajya borohereza abashaka ubufasha bwo gukuramo inda.

Kagaga Jeannette akora mu bitaro bya Gisirikare, akaba ahagarariye ababyaza, avuga ko iyo haje umuntu asaba ubufasha asobanurirwa ko agomba kubanza guca mu nkiko, bigatuma iyo agiye ahita ajya kwishakira uko ayikuramo byamumenera nabi akagaruka kwa muganga.

Kagaga avuga ko kujya mu nkiko bigora abifuza gukuramo inda ku bushake akifuza ko kugira ngo habeho imikorere n’imikoranire inoze hagati y’abashaka ubufasha, abaganga n’ubucamanza bakwegerana vuba bakaganira uburyo bwo gufasha umuntu babona wemerewe kuba yakurirwamo inda.

Kagaga avuga ko abakobwa n’abagore benshi bapfa bagerageza kwikuriramo inda kuko nta tegeko ririnda umuganga wafashije gukuramo inda iyo nta byemezo by’urukiko, “Iyo umugore aje akugana, ugatangira kumusobanurira iby’inkiko aragenda ntagaruke, kera kabaye ukazabona aje yenda gupfa yagerageje kuyikuriramo ukamufasha, njyewe mbona abaganga n’abacamanza bakwiye kwicara bakigira hamwe uko umurwayi yajya afashwa”.

Kagaga asaba inkiko ko zakwemera ko abaganga ari bo bagira uruhare runini mu ikurwmo ry’inda

mu miryango itegamiye kuri Leta isanga itegeko ryari rikwiye kugororwa
Umuryango wita ku iterambere n’uburenganzira bwa muntu mu Karere k’ibiyaga bigari GLIHD ugaragaza ko impungenge z’abaganga zifite ishingiro kuko amategeko mpanabyaha y’u Rwanda agonga ingingo ya 14 ya Maputo kuko ibyo iteganya bibangamiwe n’uko mu Rwanda bikorwa kuko usaba ubufasha agomba kubanza guca mu nkiko.

Mulisa uyobora uyu muryango akaba n’inzobere mu by’amategeko asanga no mu Rwanda hagakwiye koroshywa uburyo itegeko rihari ritanga uburyo ritagira imbogamizi zo kurishyira mu bikorwa.

Mulisa avuga ko bari gukora ubuvugizi n’amahugurwa kugirango hagire ibihinduka agira ati, “ Tumaze gusangira amakuru na Minisiteri y’ubutabera, ndetse turimo kuganira uburyo twatanga ibitekerezo mu ivugururwa ry’itegeko rihana kugirango gukuramo inda mu Rwanda bikorwe nk’uko mu bindi bihugu byashyize umukono ku masezerano ya Maputo bikorwa.

Mulisa atanga urugero rwo muri Ethiopia aho ushaka gukuramo inda afashwa cyane n’abaganga bikorohera ubyemerewe, kuko atabanza guca mu nzira zimukereza, ahubwo ahita ahabwa ubufasha bikorohera abaganga, n’abasaba ubufasha.

Ephrem Murindabigwi