Uyu muhanzi yari amaze iminsi ashyize imbere cyane gukora indirimbo mu buryo bw’amajwi (Audio), ariko avuga ko mu ntangiriro z’uyu mwaka yahisemo gutangira no kuzifatira amashusho, kuko ari zimwe mu zizaba zigize Album ye nshya.

Eric Reagan aganira na Kt Radio, yavuze ko umushinga wa Album ugikomeje ariko yahisemo gushyira hanze amashusho y’iyi ndirimbo, kugira ngo ateguze abantu iyo Album ye nshya.

Ati "Umushinga wa Album wo urakomeje, ibi nabikoze kugira ngo nteguze abantu iyo Album yanjye nshya nitegura gushyira hanze."

Eric Reagan avuga ko kugira ngo Album ye izagere kure, yahisemo ko indirimbo zizaba ziyigize ziri mu ndimi zitandukanye mu rwego rwo kugeza ubutumwa bwiza kuri buri wese.

Ati “Niwumva neza nk’indirimbo My Lord, harimo aho ndirimba Ikigande, Ikinyankole, Ikinyarwanda, izo zose ni indimi zikoreshwa muri Uganda, cyane nk’Ikinyankole ndacyumva neza, iwacu n’i Nyagatare, Ikinyankole ndacyumva neza, ikindi rero urumva ko harimo n’Icyongereza.”

Ngabo avuga ko uretse kuba avuka mu Burasirazuba bw’u Rwanda, yanabaye igihe kinini mu Mujyi wa Kampala na Mbalala, bikaba byaratumye bimworohera kumenya indimi zo muri Uganda, biri mu mpamvu zituma abasha kuririmba indirimbo ziri mu ndimi zabo.

Akomeza ati “Ubutumwa dutanga bugiye bwumvwa n’Abanyarwanda gusa n’abo muri Uganda gusa ntibyaba ari byiza, kuko ari na yo mpamvu nahisemo kuririmba no mu Giswahili kugira ngo ibihangano byanjye bigere cyane cyane mu bihugu byo mu Karere ka Afurika y’Iburasirazuba.”

Yunzemo ko nubwo mugenzi we Israel Mbonyi, yamutanze kuririmba indirimbo zihimbaza Imana mu rurimi rw’Igishwahili, yari yaratekereje kubikora mbere ye, ariko byose bigakomwa mu nkokora no kuba atarajyaga ahozaho.

Ati “N’uko ntagiye mpozaho, ariko ndi mu bahanzi ba mbere bari batekereje gukora indirimbo mu ndimi nyinshi harimo n’Igiswahili, ku buryo abantu hafi ya bose bazisangamo. Ariko kandi nishimira ko ari ikintu kimaze gukura, kuko ubona ko muri ’Gospel’ abantu bamaze gufunguka, bari kubyumva neza.”

Ku itandukaniro n’abandi bakora umuziki wo kuramya no guhimbaza Imana, yagize ati “Wumvise indirimbo zanjye ubona ko ndi umuhanzi ugerageza gukora ibintu bitandukaye. Mu myaka ishize ntabwo nakoraga umuziki mbiha umwanya cyane, ariko noneho muri iki gihe ni ibintu nshaka gukora mpaye umwanya, nabyo bikaza imbere mu byo ngomba gukora, cyane cyane muri gahunda y’ibyo ngomba gukora muri uyu mwaka, ku buryo ivugabutumwa ndimo rigera kuri benshi.”

Eric Reagan yavuze ko muri iki gihe ari gukora ku ndirimbo ziri mu rurimi rw’Ikinyarwanda, kuko n’ubwo atuye muri Finland atagomba kwibagirwa aho akomoka.

Mu kwezi k’Ugushyingo 2021, Eric Reagan Ngabo yashyizwe ku rutonde rw’abahataniye ibihembo ‘Rhema Awards Global 2021’, aho icyo gihe yari ahatanye mu byiciro bitatu birimo icyiciro cya ‘Best New Male Gospel Vocalist’, ‘Best Gospel Worship Song ndetse na ‘Best Gospel Praise Song’ biturutse ku ndirimbo yise ‘Wewe ni mungu’.

Mu 2008, ni bwo Eric Reagan Ngabo yatangiye umuziki nk’umuhanzi wigenga, dore ko kuririmba ari impano yakuranye kuva i Nyagatare ku ivuko. Imwe mu ndirimbo ze zaramenyakanye harimo ’Ishimwe n’iryawe’, ’Imbere ni heza’ n’izindi nyinshi.

Dore imwe mu ndirimbo za Eric Reagan Ngabo