KT TV
Volleyball: REG yatsinze APR, bigoranye POLICE itsinda KEPLER, imikino ibanza ishyirwaho akadomo
Kuri uyu wa gatandatu taliki ya 6 Ukuboza nibwo imikino ibanza muri shampiyona ya volleyball mu Rwanda yashyizweho akadomo aho Gisagara na APR ziyoboye izindi mu bagabo n’abagore.
Imwe mu mikino y’umunsi wa munani yari itegerejwe ndetse ari nayo yashyiraga akadomo ku mikino ibanza, harimo umukino wagombaga guhuza ikipe ya REG VC na APR, KEPLER icakirana na POLICE naho APR y’abagore ikisobanura na RRA.
Mu mukino wabanjirije indi kuwa gatanu, ikipe ya APR WVC yatsinze biyoroheye ikipe ya RRA amaseti 3-0. Uyu mukino wakurikiwe n’umukino wahuje ikipe ya REG VC ndetse na APR nawo warangiye amakipe yombi akijijwe na kamarampaka maze ikipe ya REG itsinda APR amaseti 3-2.
Hakurikiyeho umukino wahuje ikipe ya POLICE VC ndetse na KEPLER maze nabwo bisabye kamarampaka, ikipe ya POLICE VC itsinda KEPLER amaseti 3-2 gusa ibi ntacyo byahinduye ku rutonde rwa shampiyona kuko Kepler yagumye imbere ya POLICE aho iyirusha amanota abiri kuko KEPLER ubu imaze ku gwiza amanota 19 naho POLICE yo ikaba ifite amanota 17.
Imikino ibanza isize ikipe ya Gisagara volleyball club ariyo iyoboye urutonde rwa shampiyona mu cyiciro cy’abagabo n’amanota 20 aho ikurikiwe na APR n’amanota 19, KEPLER ku mwanya wa gatatu n’amanota 19 naho POLICE yo ikaba isoje imikino ibanza iri ku mwanya wa kane n’amanota 17.
Mu cyiciro cy’abagore, ikipe ya APR iracyayoboye abandi n’amanota 18 aho isoje iyi mikino idatsinzwe umukino numwe. POLICE VC iza ku mwanya wa kabiri n’amanota 14, Kepler ku mwanya wa gatatu n’amanota 12 naho RRA yo ikaba iri ku mwanya wa kane n’amanota 10.
Nyuma yo gusoza imikino ibanza, amakuru agera kuri Kigali Today nuko hagiye gukurikiraho irindi rushanwa ry’iminsi 2 rizahuza amakipe 4 ya mbere nyuma bakerekeza mu mikino ya volleyball yo kumucanga (Beach Volleyball) mbere yo gufata akaruhuko bategura imikino yo kwishyura izaba mu mpera za Mutarama 2026.
Ibitekerezo
Ohereza igitekerezo
|
|
