Volleyball: Amakipe ya APR, REG na Police agiye kwerekeza muri Uganda

Yanditswe na

Amon B. Nuwamanya

25-02-2025 - 10:19' | Ibitekerezo ( )

Kuri uyu wa kabiri tariki 25 Gashyantare 2025, amakipe ahagarariye u Rwanda mu mukino wa volleyball, APR VC (Abagabo n’abagore) Police VC ndetse na REG VC arahaguruka i Kigali yerekeza mu gihugu cya Uganda mu irushanwa ry’akarere ka gatanu rihuza amakipe yabaye aya mbere iwayo, ‘CAVB Club Championship 2025’ rizabera i Kampala.

Ni irushanwa rizahuza amakipe yo mu bihugu bitandukanye byo mu karere k’Iburasirazuba, aho kuri iyi nshuro hazitabira amakipe yo mu bihugu bya Uganda izakira iri rushanwa, Tanzania, Kenya, Burundi na Sudani y’Epfo.

Ni irushanwa biteganyijwe ko rizamara icyumweru rikinirwa mu mujyi wa Kampala muri Uganda. Amakipe 12 mu bagabo ni yo yemeje kwitabira naho mu bagore akaba ari amakipe 9.

Amakipe yamaze kwemeza kwitabira mu bagabo ni Rukinzo VC (Burundi), Rwanda National Police (Rwanda), Armée Patriotique Rwandaise (APR - Rwanda), Rwanda Energy Group (REG - Rwanda), Cobra Sports Club (Sudani y’Epfo), Jeshi Stars (Tanzania), Tanzania Prisons Services (Tanzania), Nemostars (Uganda), Sport-S (Uganda), KCCA (Uganda), KAVC (Uganda) na UCU Doves (Uganda).

Abagore: Kenya Pipeline Company (Kenya), Armée Patriotique Rwandaise (APR- Rwanda), Tanzania Prisons Services (Tanzania), Sport-S (Uganda), KCCA (Uganda), Vision Volleyball Camp (VVC- (Uganda), Ndejje University Elites (Uganda), KCB-Nkumba (Uganda).