MAVCC2026: APR VC, Police VC na Kepler VC zabonye itsinzi ya kabiri, REG VC ibona iya mbere ‎

Yanditswe na

Habiyaremye Japhet

25-04-2026 - 00:08' | Ibitekerezo ( )

‎Amakipe ya APR VC, Police VC na Kepler VC ahagarariye u Rwanda yitwaye neza mu mikino yayo ya yakabiri muri Shampiyona Nyafurika y’Abagabo muri Volleyball, (CAVB Men’s Club Championship 2026) iri kubera mu Rwanda naho REG VC itsinda umukino wa mbere.

‎Ku wa Gatanu, tariki ya 24 Mata 2026, muri Petit Stade ndetse na BK Arena, habereye imikino y’umunsi wa gatatu w’irushanwa hakinwa umukino wa kabiri mu matsinda yose uko ari ane, maze amakipe ahagarariye u Rwanda yose yitwara neza abona itsinzi.
‎
‎Ikipe y’Ingabo z’Igihugu yakiriye iyi mikino iri mu itsinda rya mbere yatsinze Litto Team Volleyball yo muri Cameroun amaseti 3-0 (25-17, 25-18, 25-22) yuzuza imikino ibiri itaratsindwa iseti, Kepler VC iri mu itsinda rya kabiri nayo yihanangirije Sport-S yo muri Uganda amaseti 3-0 ( 25-22, 25-17, 25-20) mu mukino wabereye muri Petit Stade.
‎

‎Ikipe ya Police y’Igihugu mu mukino wari uryoheye ijisho yatsinze FUS Rabat amaseti 3-1 (19-25, 28-26, 25-20, 25-21) maze Police VC yuzuza amanota atandatu nyuma y’itsinzi ebyiri. Ikipe ya REG VC yisubije icyubahiro nyuma yo gutsinda Rukinzo VC yo mu Burundi amaseti 3-0 (25-22, 25-15, 25-22) iba ibonye itsinzi ya mbere.
‎

‎Imikino y’uyu munsi kandi yakurikiwe na Minisitiri wa Siporo Nelly Mukazayire ndetse na Perezida wa CAVB Bouchra Hajij mu gihe izakomeza kuri uyu wa Gatandatu kuva Saa sita zuzuye, aho amakipe ahagarariye u Rwanda azakinira muri BK Arena.