KT TV
Volleyball: Amakipe ane ya mbere muri shampiyona agiye guhurira mu irushanwa i Gisagara
Amakipe ane ya mbere mu bagabo n’abagore mu mwaka usanzwe wa shampiyona ya Volleyball 2025-2026 agiye guhatana mu irushanwa ryateguwe n’Ishyirahamwe ry’Umukino wa Volleyball mu Rwanda ku bufatanye n’Ikigo cy’Igihugu gishinzwe Kurengera Ibidukikije (REMA).
Ni irushanwa ryiswe ’Climate Action Volleyball Tournament’ biteganyijwe ko rizabera mu Karere ka Gisagara mu nzu yaho y’imikino, rikamara iminsi ibiri kuva kuri uyu wa Gatanu, tariki 29 kugeza ku wa Gatandatu tariki 30 Gicurasi 2026.
Iri rushanwa rizitabirwa n’amakipe yaje mu myanya ine ya mbere ku rutonde rwa shampiyona mu mwaka usanzwe, aho mu bagabo aya makipe ari REG VC, Police VC, Kepler VC na Gisagara VC mu gihe mu bagore ari ikipe ya APR WVC, Kepler WVC, Police WVC ndetse na RRA WVC.
Mu bagabo Gisagara VC yabaye iya mbere izahura na Police VC yabaye iya kane, Kepler VC yabaye iya kabiri ihure na REG VC yabaye iya gatatu mu gihe mu bagore ikipe ya APR WVC yabaye iya mbere izakina na RRA WVC yabaye iya kane, Kepler WVC yabaye iya kabiri igakina na Police WVC yasoreje ku mwanya wa gatatu, imikino yose iteganyijwe kuri uyu wa Gatanu kuva saa saba z’igicamunsi.
Amakipe azagera ku mukino wa nyuma azahatanira ibikombe kuri uyu wa Gatandatu, mu gihe azaba yatsinzwe imikino ya 1/2 azahatanira umwanya wa gatatu.
Ibitekerezo
Ohereza igitekerezo
|
|
