Mahoro Yvan, umukinnyi w’ikipe y’igihugu ndetse akaba na kapiteni w’ikipe ya Kepler Volleyball Club ndetse na Mugabe Aristide wasezeye ku gukinira ikipe y’Igihugu ariko ubu akaba ari umukinnyi wa Kepler Basketball Club bose barakora ubukwe kuri uyu wa Gatandatu.

Mugabe Aristide waraye usezeranye imbere y’amategeko n’umukunzi we Ndahiro Nadine ku wa Kane tariki ya 21, ubukwe bwabo buteganyijwe kubera mu mujyi wa Kigali, aho gusaba no gukwa bizabera Heaven Garden, Rebero saa tatu (9h), Gusezerana imbere y’imana kuri Foyer De Charité, Rebero saa saba (13h) ari na ho abatumiwe baziyakirira saa kumi n’ebyiri z’umugoroba.

Mugabe Aristide ni umwe mu bakinnyi beza u Rwanda rwagize mu mukino wa Basketball ndetse muri Gicurasi 2022 Ishyirahamwe Nyafurika ry’Umukino wa Basketball muri Afurika (BAL), ryamushimiye nk’umwe mu bakinnyi b’Abanyarwanda b’icyitegererezo mu mikino yose u Rwanda ruserukamo.

Mugabe Aristide w’imyaka 36 amaze imyaka 15 akina Basketball kuko yatangiriye mu ikipe ya Rusizi BBC mu 2007, yerekeza muri Espoir BBC mu 2009 yavuyemo mu 2015 ajya muri Patriots nayo yaje kuvamo akereza mu ikipe ya Kepler BBC arimo ubu.

Mahoro Ivan n’umukunzi we Irakoze Uwacu Teta Kevine bo ubukwe bwabo buzabera I kinyinya aho gusaba no gukwa bizabera ahitwa ku Ineza Garden saa tatu za mugitondo 9:00, gusezerana imbere y’imana bikazabera kuri paroisse ya st famille muri Chapelle cela peres blancs ku isaha ya saa cyenda 15:00 naho kwiyakira bikazabera I kinyinya n’ubundi mu Ineza Garden saa kumi nimwe z’umugoroba.

Mahoro Nsabimana Iva ni umukinnyi usanzwe ukinira ikipe y’igihugu ndetse akaba ari mu bakinnyi bakinina volleyball bamaze gukinira ikipe y’igihugu imikino myinshi.

Mahoro yakiniye amakipe atandukanye arimo ayo mu mashuri isumbuye yakiniye nka Groupe Scholaire Officiel De Butare, Rayon Sports VC mu 2014, UTB VC yakiniye kuva mu mpeshyi ya 2018, ubwo yari avuye muri Ekaterniburg yo mu Busuriya, REG VC ndetse na Kepler arimo gukinira ubu.