Ni umukino wihariwe na PSG mu buryo bwo guhererekanya umupira kuko warangiye iyi kipe ifite ijanisha rya 75% ndetse na 25% ya Arsenal. Nubwo byari bimeze gutya ariko Arsenal yafunguye amazamu ku munota wa gatandatu ku gitego cyatsizwe na Kai Havertz ahawe umupira na Leandro Trossard banyuze ku ruhande rw’ibumoso kugeza awugeje ku izamu Safonov.

Igice cya mbere cyarangiye Arsenal iyoboye n’igice 1-0 ariko PSG ikiyoboye mu buryo bwo guhererekanya. Ku munota wa 61 binyuze ku ruhande rw’ibumoso Kvicha Kvaratskhelia yazamukanye umupira yinjira mu rubuga rw’amahina maze myugariro Christian Mosquera amugusha mu rubuga rw’amahina, PSG ibona penaliti.

Uyu mupira watewe neza na Ousmane Dembele yishyura ikipe ya PSG igitego. Iminota 90 isanzwe yarangiye ari igitego 1-1, hongerwaho itandatu nayo yarangiye gutyo biba ngombwa ko hashyirwaho indi minota 30. PSG yakomeje gukina neza Arsenal nayo yugarira neza kugeza iminota 120 irangiye amakipe yombi akinganya 1-1 hitabazwa penaliti.

Ku ruhande rwa Arsenal Declan Rice, Kai Havertz na Gabriel Martinelli binjije penaliti zayo, Ebereche Eze na Gabriel Maghalaes barazihusha mu gihe ku ruhande rwa PSG Goncalo Ramos, Achram Hakimi, Leandro Belardo na Desire Doue bazinjije igahushwa na Nuno Mendes byatumye begukana igikombe batsinze penaliti 4-3.

Ni igikombe cya kabiri PSG itwaye yikurikiranya kuko ari nayo ifite igikombe cya 2024-2025 ari nabwo yari igitwaye bwa mbere mu gihe Arsenal itsindiwe ku mukino wa nyuma inshuro ebyiri zose iyigezeho yo kuhatsindirwa na FC Barcelona mu 2006, ibitego 2-1.