Wari umukino w’umunsi wa 34 wa shampiyona iyi kipe yari yakiriye,isabwa inota rimwe gusa kugira ngo itware igikombe cy’amateka aho cyatumye inganya na Manchester United ibikombe 20. Uyu mukino yawutangiye ariko itsindwa igitego cya Dominik Solanke ku mu munota wa 12. Iyi kipe yishyuye ku munota wa 16 ku gitego cyatsinzwe na Luis Diaz maze inarenzaho ibindi bibiri ku munota wa 24 n’uwa 34 bitsinzwe na Alexis Mac Allister na Cody Gakpo , igice cya mbere kirangira ari ibitego 3-1.

Mu gice cya kabiri, Liverpool yatsinzemo ibitego bibiri byuzuza 5-1 bitsinzwe na Mohamed Salah ku munota wa 63 mu gihe Destin Udogie wa Spurs yitsinze icya gatanu ku munota wa 69. Iyi ntsinzi y’amanota yatanze amanota atatu nyamara hasabwaga nibura rimwe, yatumye Liverpool itwara igikombe cya shampiyona, itari yarangira dore ko mu mukino 34 imaze gukinwa ifitemo amanota 82 aho mu gihe hasigaye imikino ine irusha Arsenal ya kabiri amanota 15 mu gihe imikino isigaye ifite amanota 12, bivuze ko idashobora kuyifata.

Ni igikombe cy’amateka :

Ikipe ya Liverpool ikuyeho agahigo kari gafitwe na Manchester United itwara igikombe cya 20, ibyari bimaze gukorwa n’iyi kipe yo mu Mujyi wa Manchester yonyine.Liverpool yaherukaga gutwara shampiyona 2019-2020 mu gihe umutoza wayo Arne Slot abaye umutoza wa gatanu ukoze amateka gutwara iyi shampiyona ari ubwa mbere atoje mu Bwongereza.