Ibi uyu muyobozi yabitangarije mu muhango iyi kipe yamurikiyemo abakinnyi izakoresha mu mwaka w’imikino wa 2024-2025 barimo abashya bagaragayemo nka Sugira Ernest n’abasanzwe, aho yavuze ko baje gutwara shampiyona, dore ko kamarampaka ibera mu kibuga.

Perezida wa Kiyovu, Nkurunziza David, yagize ati “Tugiye mu irushanwa ryitwa shampiyona y’u Rwanda (2024-2025) kuyitwara. Kamarampaka ni mu kibuga, si ho bibera? Umupira ntabwo ukinirwa muri Banki."

Nkurunziza David yunganiwe na Visi Perezida we wa mbere, Karangwa Joseph, na we wavuze ko uyu mwaka bazatwara ibikombe bagahinyuza abavuga ko iyi kipe iyobowe n’abasaza, avuga ko nubwo baba bashaje ariko ari abayobozi beza.

Ati “Uyu mwaka w’imikino 2024-2025 uradusigira ibikombe, maze ndebe abavuga ngo Kiyovu Sports iyobowe n’abasaza icyo bazavuga. Turi abasaza ariko turi abayobozi beza. Muzabona Kiyovu Sports nshya."

Muri rusange, ikipe ya Kiyovu Sports yamuritse abakinnyi barimo amazina akomeye arimo Amissi Cedric utari muri uyu muhango, akaba yarakiniye ikipe ya Rayon Sports mu 2013, rutahizamu Sugira Ernest wari umaze imyaka ibiri adafite ikipe, Nsanzimfura Keddy wigeze gukinira iyi kipe akayivamo ajya muri APR FC gusa akaba yakinaga mu Misiri.

Aba biyongeraho rutahizamu ukomoka muri Uganda, Emmanuel Okwi ugarutse muri Kiyovu Sports nyuma yo kuyikinira mu mwaka w’imikino wa 2021-2022 waraye ageze mu Rwanda mu ijoro rishyira kuri uyu wa gatandatu ku isaha ya saa saba aje kurangizanya n’iyi kipe.

Kiyovu Sports izatangira shampiyona 2024-2025 tariki 16 Kanama 2024 yakira ikipe ya AS Kigali kuri Kigali Pelé Stadium ku isaha ya saa cyenda zuzuye.