Wari umukino w’umunsi wa 10 wa shampiyona y’icyiciro cya mbere mu Rwanda (Rwanda Premier League), aho ibitego bya Kiyovu Sports byatsinzwe na Ishimwe Kevin ndetse na Mbonyingabo Regis mu gihe igitego kimwe rukumbi cya Etincelles cyatsinzwe na Niyonkuru Sadjat.

Ni umukino watangiye amakipe yombi ubona ashaka itsinzi hakiri kare kuko yari aherutse kwitwara nabi, aho ikipe ya Kiyovu Sports yari yatsinzwe na Gasogi United ibitego 4-3, n’aho Etincelles itsindwa na Rayon Sports igitego 1-0.

Igice cya mbere, cyarangiye amakipe yombi anganya ubusa ku busa kuko nta kipe yari yabashije kureba mu izamu ry’iyindi nubwo ikipe ya Kiyovu Sports yari yagerageje uburyo butandukanye.

Ubwo bari bavuye kuruhuka, ku munota wa 49, ikipe ya Kiyovu Sports yafunguye amazamu ku gitego cyatsinzwe na Rutahizamu Ishimwe Kevin.

Ikipe ya Kiyovu Sports yakomeje gusatira ndetse ubona ko ishaka gutsinda igitego cya kabiri, gusa ubwugarizi bwa Etincelles bwaranzwe n’amakosa menshi uyu munsi bukomeza kwihagararaho.

Ikipe ya Etincelles yakomeje gushaka uburyo yakwishyura igitego yari yatsinzwe, maze ku munota wa 82 mbere ho gato ko iminota 90 irangira, Niyonkuru Sadjat atsindira Etincelles igitego cyo kwishyura.

Mugihe abakunzi ba Kiyovu Sports bibwiraga ko bongeye gutakaza undi mukino, kuko n’umusifuzi wa kane yari yamaze kongeraho iminota 5, ikipe ya Kiyovu sports yatsinze igite cya kabiri cyatsinzwe na Mbonyingabo Regis ku munota wa 96.

Ikipe ya Kiyovu sports nyuma yo gutsinda Etincelles, ihise iva ku mwanya wa nyuma ijya kuwa 15 n’amanota 6.

Kiyovu Sports izakurikizaho ikipe ya Rutsiro FC, mu mukino uzabera kuri Stade Umuganda mu gihe Etincelles yo ikazakirwa na Musanze FC kuri Stade Ubworoherane.