Mu itangazo iyi kipe yashyize ahagaragara, yavuze ko ishimira uyu mugabo w’imyaka 54 y’amavuko wayigezemo mu mpeshyi ya 2022 kuri buri kimwe cyose yayikoreye.

Itangazo riragira riti “Erik Ten Hag yavuye mu nshingano ze nk’umutoza w’ikipe ya mbere y’abagabo ya Manchester United. Turashimira Erik kuri buri kimwe cyose yakoze mu gihe cye ari hamwe natwe, turamwifuriza ibyiza mu bihe biri imbere."

Iri tangazo rikomeza rivuga ko Umuholandi wayikiniye nka rutahizamu Ruud Van Nestelrooy ari we usigarana inshingano zo gutoza ikipe by’agateganyo afashwa n’itsinda rindi ry’abatoza mu gihe hari gushakwa umutoza mukuru.

Asize iki i Manchester?

Erik Ten Hag yageze muri Manchester United mu mpeshyi ya 2022 asinya amasezerano y’imyaka itatu yari kurangira mu 2025 ariko ashobora kongerwaho umwaka. Mu mpeshyi ya 2024 nibwo uyu mwaka yawongerewe aho yari kuzasoza amasezerano mu mpeshyi ya 2026, ibi bikaba bitaravuzweho rumwe n’abakunzi b’iyi kipe.

Mu myaka ibiri yari amaze, asigiye iyi kipe igikombe cya FA Cup 2023-2024 yari yabuze mu mwaka wabanje wa 2022-2023 kuko yari yatsindiwe ku mukino wa nyuma. Yatwaye na EFL Cup/Carabao Cup mu mwaka wa 2022-2023. Muri shampiyona mu mwaka we wa mbere w’imikino wa 2022-2023 Manchester United yabaye iya gatatu n’amanota 75 mu gihe muri 2023-2024 yabaye iya munani, umwanya wa mubi iyi kipe yari igize bwa mbere mu myaka 34 ishize.

Mu mpeshyi ya 2024 nyuma yo kongererwa amasezerano, ubuyobozi bwa Manchester United bwiyemeje kumushyigikira maze bashora hafi miliyoni 200 z’amapawundi ku isoko, hagurwa abakinnyi, ariko kuri ubu Erik Ten Hag yirukanywe ikipe iri ku mwanya wa 14 muri shampiyona n’amanota 11 mu mikino icyenda, mu gihe muri UEFA Europa League mu mikino itatu yose yanganyije afitemo amanota atatu.