APR FC yatsinze Bugesera ifata umwanya wa gatandatu (Amafoto)

Yanditswe na

Sammy Imanishimwe

27-11-2024 - 21:44' | Ibitekerezo ( 2 )

Ikipe ya APR FC yatsinze Bugesera FC mu mukino w’ikirarane wabereye kuri Kigali Pelé Stadium, ihita ijya ku mwanya wa gatandatu ku rutonde rw’agateganyo rwa shampiyona.

Mu mukino waranzwe n’imvura yabanje kuba nyinshi mu gice cya mbere, ikipe ya APR FC yari yakiriye ikipe ya Bugesera mu mukino utarabereye igihe, umukino wabereye kuri Kigali Péle Stadium i Nyamirambo.

Ni umukino ikipe ya APR FC yari imaze iminsi ititwara neza yatangiye igaragaza ishyaka ryo gutsinda, iza no kubona igitego mu gice cya mbere, cyatsinzwe na Lamine Bah ku munota wa 39, ni ku mupira wari uvuye kuri Mugisha Gilbert.

Mu gice cya kabiri, Tuyisenge Arsene wari winjiye mu kibuga asimbuye, yakoreweho penaliti mu rubuga rw’amahina n’umunyezamu Arakaza Mac Arthur, iza kwinjizwa neza na Niyibizi Ramadhan ku munota wa 78.

Umukino waje kurangira APR FC yegukanye intsinzi y’ibitego 2-0, iba intsinzi yayo ya kane muri shampiyona yatumye ijya ku mwanya gatandatu n’amanota 14, ivuye ku mwanya wa 10.

APR FC irasubira mu kibuga tariki 01/12 ikina na AS Kigali, ikazongera gukina na Police FC ku wa Gatatu w’icyumweru gitaha, mbere yo gukina na Rayon Sports ku wa Gatandatu tariki 07/12 kuri Stade Amahoro.