Muhoza Eric na Nyirarukundo Claudette begukanye isiganwa ry’Ingufu n’Igare (Amafoto)

Yanditswe na

Jean Jules Uwimana

25-07-2026 - 22:03' | Ibitekerezo ( )

Kuri uyu wa Gatandatu, Muhoza Eric ukinira ikipe ya Amani yegukanye Isiganwa ry’Amagare ryiswe Ingufu n’Igare ryegukanwa na Muhoza Eric mu nagabo ndetse na Nyirarukundo Claudette mu bagore.

Ni isiganwa ryahagurukiye ku Ruyenzi mu Karere ka Kamonyi rikinwa mu bagabo n’abagore ndetse n’abato muri ibyo byiciro byombi. Abagabo n’abagore basiganwe ibilometero 96,3 kimwe n’abakiri bato mu bagabo mu gihe mu bagore ho basiganwe ibilometero 50 aho bahagurukiye i Rugende, ahanahagurukiye abatarabigize umwuga.

Isiganwa ryahagurutse Saa Saba z’igicamunsi maze mu bagabo ryegukanwa na Muhoza Eric ukinira ikipe ya Amani wakoresheje amasaha abiri, iminota 44 n’amasegonda 24 anegukana ibihumbi 500, 000 Frw akurikirwa na Tuyizere Etienne ukinira Java Innovotec yarushije umunota umwe n’amasegonda 37 wahawe ibihumbi 200,000 Frw mu gihe Nshutiraguma Kevin ukinira Mamba Devo yabaye uwa gatatu arushwa n’uwa mbere iminota itatu n’amasegonda icyenda ahabwa ibihumbi 100,000 Frw.

Mu bagore isiganwa ryegukanywe na Nyirarukundo Claudette ukinira ikipe ya Amani akoresheje amasaha atatu, iminota icyenda n’amasegonda 44 ahabwa ibihumbi 300,000 Frw, akurikirwa na Nirere Xaveline nawe bakinana wegukanye ibihumbi 150,000 Frw amurushije isegonda rimwe mu gihe ku mwanya wa gatatu haje Ingabire Diane ukinira ikipe ya Benediction warushijwe iminota 11 n’amasegonda ane n’uwa mbere akegukana ibihumbi 100,000.

Mu cyiciro cy’abakiri bato, mu bagore Masengesho Yvonne ukinira Black Mamba Devo niwe wegukanye isiganwa ahembwa ibihumbi 100,000 Frw akurikirwa na Akimana Donatha ukinira Java Innovetec wahembwe ibihumbi 80,000 Frw naho Kanyange Zawadi ukinira Bugesera Cycling aba uwa gatatu yegukana ibihumbi 50,000 Frw.

Mu bagabo, mu bakiri bato Ishimwe Bryan ukinira Black Mamba Devo niwe wabaye uwa mbere ahembwa ibihumbi 200,000 Frw akurikirwa na Byusa Pacifique ukinira Les Amis wahembwe ibihumbi 150,000 Frw naho Mugabo Jules ukinira Les Amis aba uwa gatatu ahembwa ibihumbi 100,000 Frw.

Hakinwe kandi icyiciro cy’abatarabigize umwuga, umwanya wa mbere wegukanwa na Yves Nkurunziza wahoze akina nkuwabigize umwuga, aho ibilometero 50 basiganwe yabisoje akoresheje isaha imwe, iminota 31 n’amasegonda 25, akurikirwa na Roman Meszaros bagereye ku murongo rimwe mu gihe kandi banahagereye rimwe na Niyonshuti Asuman wabaye uwa gatatu.