Ni amahugurwa ngarukamwaka aho akorwa mbere gato y’uko umwaka w’imikino muri Shampiyona ya Volleyball utangira aho hareberwa hamwe uko umwaka ushize wagenze, gusasa inzobe no kwihugura ku mategeko.

Umuyobozi wa w’abasifuzi mu Rwanda, Ndayisaba Alphonse, avuga ko intego y’aya mahugurwa akenshi ari ukongera gukarishya ubumenyi kuri uyu mukino haba mu kibuga ndetse n’amategeko.

Yagize ati “Ni amahugurwa y’abasifuzi basifura amarushanwa yose ya Volleyball mu Rwanda harimo na Volleyball yo ku mucanga (Beach Volleyball).

Ni amahugurwa agamije kongera gukarishya ubumenyi bw’abasifuzi no gukora isuzumabumenyi ku mategeko agenga umukino wa Volleyball na Beach Volleyball no kurebera hamwe uko umwaka w’imikino ushize wagenze no gutegura neza umwaka w’imikino wa 2024-2025.”

Aya mahugurwa kandi yitabiriwe n’abasifuzi mpuzamahanga babiri basanzwe basifura Volleyball yo mu nzu (Indoor Volleyball) ndetse n’umusifuzi mpuzamahanga wa Beach Volleyball, abasifuzi ku rwego rw’Igihugu( Nationals), abo ku rwego rw’Intara(Regional) ndetse n’abatangizi (beginners) bose hamwe bakaba bari abasifuzi 80.

Biteganyijwe ko aya mahugurwa asozwa kuri iki Cyumweru tariki ya 13 Ukwakira 2024 hakorwa isuzumabumenyi ry’umukoro-ngiro (pratique).