Mu gikorwa cyo gusura Umulindi w’Intwari mu Karere ka Gicumbi, mu Ntara y’Amajyaruguru Intore zavuze ko zasobanukiwe amateka y’urugamba rwo kubohora u Rwanda no kwimakaza indangagaciro z’ubutwari, ubwitange no gukunda Igihugu.

Izi Ntore, zirimo urubyiruko rw’u Rwanda rwavukiye ndetse runatuye mu mahanga, zatangiye Itorero ku wa 1 Nyakanga 2026 i Gabiro, rikazasozwa ku wa 10 Kanama 2026.

Mu gihe cy’iri torero, ziga amateka y’u Rwanda, umuco, indangagaciro na kirazira by’umuco nyarwanda.

Intore zasobanuriwe amateka y’ahari icyicaro gikuru cy’Ingabo za RPA-Inkotanyi mu gihe cy’urugamba rwo kubohora u Rwanda, zerekwa ibikorwa n’inyubako n’ibindi bikorwa byagize uruhare rukomeye muri urwo rugamba.

Mubyo izi ntore zasuye harimo inzu yabayemo Chairman wa RPF icyo gihe, Col. Alexis Kanyarengwe, inzu yabayemo umugaba mukuru w’ingabo za RPA Paul Kagame, yari ifite ubwirinzi bwihariye, n’inzu yabayemo Lt. Gen. James Kabarebe wari wungirije umugaba w’ingabo za RPF.

Banasuye inyubako ya Arusha House, yakorerwagamo ibiganiro birebana na politiki, inzu ya Women’s Wing, yakorerwagamo ibikorwa by’abagore bagize uruhare mu rugamba rwo kubohora Igihugu.

Intore zaneretswe kandi ikibuga cy’imikino, ndetse n’inzu yakorerwagamo inama zitandukanye zafatiwemo ibyemezo bikomeye byagize uruhare mu rugendo rwo kubohora u Rwanda.

Bamwe mu Ntore bavuze ko gusura Umulindi w’Intwari byabafashije gusobanukirwa neza amateka y’urugamba rwo kubohora Igihugu, bavuga ko byabongereye ubushake bwo gukorera Igihugu no kurangwa n’indangagaciro zirimo ubunyangamugayo, gukunda umurimo no gukorera hamwe.

Manzi Bob Dylan, umwe mu rubyiruko rwitabiriye iri torero, yavuze ko yize byinshi birimo indangagaciro na kirazira.

Nk’urubyiruko, yavuze ko azaharanira ko nta cyatuma u Rwanda rusubira inyuma, kuko yasanze abarubohoye na bo bari urubyiruko nka we.

Ati: "Itorero ridufasha gukunda Igihugu cyacu kandi rizadufasha gukomeza gusigasira amahoro dufite ubu, kuko twabonye ko yavuye mu kwitanga kw’Inkotanyi."

Keza Bithia, umwe mu rubyiruko rwaturutse i New York, yavuze ko yigiye byinshi ku mateka y’urugamba rwo kubohora Igihugu, kuko yamenye neza imvune n’ibigeragezo abari abasirikare ba RPA-Inkotanyi banyuzemo.

Ati: "Twebwe nk’urubyiruko ruba hanze tuzarwanya umuntu wese uzagerageza kugoreka amateka y’Igihugu cyacu, kuko twabonye kandi tumenya ukuri kw’aho amahoro dufite aturuka."

Keza yavuze ko bazakomeza kurwanya buri wese ugoreka amateka y’Abanyarwanda, kuko usanga hari abantu benshi baba hanze bayavuga uko atari.

Umunyamabanga Uhoraho muri Minisiteri y’Ubumwe bw’Abanyarwanda n’Inshingano Mboneragihugu, Mahoro Eric, yavuze ko Itorero rifasha urubyiruko kumenya amateka y’Igihugu cyarwo.

Ati: "Urubyiruko rwaciye mu Itorero, rwaba uruba mu Rwanda cyangwa uruba hanze yarwo, usanga ari abantu bakomeza kuruhagararira, ndetse bagafasha kugaragaza ukuri ku bayapfobya."

Mahoro avuga ko gahunda y’itorero ry’urubyiruko rizakomeza kubaho rikagera ku byiciro bitandukanye mu rwego rwo kurufasha gusobanukirwa amateka y’igihu cyabo.

Gusura Umulindi w’Intwari ni kimwe mu bikorwa by’ingenzi bigize gahunda y’Itorero ry’Indangamirwa, kigamije gufasha urubyiruko kumenya amateka y’Igihugu, gukomera ku ndangagaciro na kirazira by’umuco nyarwanda no kwiyemeza kugira uruhare rufatika mu kubaka no guteza imbere u Rwanda.