Mu Karere ka Kicukiro, abagize Inama y’Ihuriro ry’Ubumwe n’Ubudaheranwa, biganjemo abari mu myanya y’ubuyobozi n’abahoze ku buyobozi, abayobozi b’inzego z’umutekano n’abandi, muri uku kwezi barahuye, barebera hamwe ibikorwa bitandukanye bimaze kugerwaho mu rwego rwo kuzamura imibereho y’abaturage, gusana imitima ndetse no kwimakaza Ubumwe n’Ubudaheranwa cyane cyane mu bakiri bato.

Bimwe mu bikorwa byakozwe mu mwaka ushize mu rwego rwo kwimakaza Ubumwe n’Ubudaheranwa, nk’uko byagaragajwe n’Umuyobozi Nshingwabikorwa w’Akarere, Mutsinzi Antoine, harimo : Gutanga ibiganiro mu Midugudu ndetse no mu rubyiruko mu gihe cyo kwibuka Jenoside yakorewe Abatutsi. Hakozwe umuganda wo gutera ibiti hagamijwe kurengera no kubungabunga ibidukikije; Gutanga ibiganiro ku Bumwe n’Ubudaheranwa mu mashuri yisumbuye , mu nteko z’abaturage no mu mugoraba w’umuryango; Gusanira abarokotse Jenoside yakorewe Abatutsi bafite inzu zikeneye gusanwa, n’ibindi.

Nubwo hari byinshi bishimira, bagaragaje inzitizi zikibangamiye ubumwe n’ubudaheranwa, hafatwa n’imyanzuro y’uko zakemuka, nk’uko Mutsinzi Antoine uyobora Akarere ka Kicukiro yakomeje abisobanura.

Yagize ati “Mu mbogamizi tugifite muri Kicukiro harimo imanza gacaca tutarabasha kurangiza zose. Dufite imanza zigera kuri 65 tutarabona amakuru ahagije yadufasha kugira ngo izo manza zirangizwe, ariko hafashwe umwanzuro ko hagiye gushakishwa amakuru yose ashobora kudufasha kugira ngo izo manza zirangire.”

“Hari izindi mbogamizi dufite z’abarokotse Jenoside yakorewe Abatutsi. Twabashije kugira abo dusanira n’abo dutuza, ariko mwabonye ko tugifite umubare munini. Dufite imiryango isaga 200 igaragaza ko ikeneye ubufasha, ikeneye kubona aho bacumbika, ariko ntiturababonera amacumbi. Ndetse hari n’abo twubakiye imiryango igera kuri 760 ariko muri bo imiryango 260 ikeneye gusanirwa.”

“Umwaka ushize twabashije gusanira abagera kuri 30, ariko murumva ko dufite urugendo runini. Uno mwaka twihaye intego nibura yo gusanira imiryango 50 ariko urumva umubare uracyari mutoya. Ariko icyo dushimira abagize ihuriro ni uko bagaragaje ubushake bwo kudufasha kugira ngo tubashe gukemura ibibazo dushingiye ku muryango, mu Isibo no ku Mudugudu aho dutuye.”

Hon. Edda Mukabagwiza wari intumwa y’Umuryango Unity Club Intwararumuri ugamije gutanga umusanzu mu kubaka ubumwe bw’Abanyarwanda, yasabye abagize Ihuriro ry’Ubumwe n’Ubudaheranwa mu Karere ka Kicukiro gukomeza kurangwa n’Indangagaciro zo Kwigira no Kwishakamo ibisubizo, bakaba umusemburo w’impinduka aho batuye n’aho bakorera .

Yagize ati “Ni ugukomeza gutoza urubyiruko kugira ubudaheranwa mu bitekerezo, mu kwihangira imirimo, no mu gukunda Igihugu. Za ndangagaciro rero navugaga ziyongereyeho n’izindi nyinshi tuzi, zigomba gukomeza kudufasha kwimakaza ubumwe n’ubudaheranwa. Tugaharanira kurangwa n’izo ndangagaciro zo kugira ukuri, ubunyangamugayo, gukunda Igihugu, kubaha abandi, koroherana,… izo zose ni indangagaciro zagombye gukomeza kutuyobora nk’Abanyarwanda.”

Ihuriro ry’Ubumwe n’Ubudaheranwa mu Karere ka Kicukiro ryiyemeje kurushaho kugira uruhare mu bikorwa bihindura imibereho y’abaturage no kubaka umuryango. Bihaye intego ko bazajya bahura inshuro irenze imwe mu mwaka kugira ngo bihutishe gahunda zose zubaka umuryango Nyarwanda wifuzwa.