Urubyiruko rudakunze kuboneka mu birori binyuranye kubera ubwoko bw’inshingano rukora, harimo no gucunga umutekano w’abari muri ibyo birori, na rwo rwari ruhagarariwe, rwicaye mu cyumba cy’inama, rukurikira ibiganiro, ndetse runatanga ibitekerezo n’inama ku bitabiriye.

Ingabo z’u Rwanda, RDF zari zihagarariwe n’urubyiruko rubarizwa mu mitwe inyuranye, yaba iy’izirwanira ku butaka, mu kirere no mu mazi.

Polisi y’Igihugu na yo yari ihagarariwe n’urubyiruko rutanga icyizere cy’ejo hazaza, ndetse yazanye n’abahagarariye abacunga amagororero y’u Rwanda, bose nu mpuzankano uko zigenwa n’amategeko abagenga.

Muri ibi byiciro byose by’inzego z’umutekano n’iz’ingabo, uru rubyiruko rufite amapeti agiye atandukanye, harimo aba sous officier, aba ofisiye bato, ndetse n’abageze mu ba ofisiye bakuru.

Bagiye bazamurwa mu ntera kubera inshingano n’ubumenyi batanga mu nzego babarizwamo.

Abandi baje mu mpuzankano zabo, ni urubyiruko rubarizwa mu Rwego rw’Igihugu rw’Ubugenzacyaha, RIB.

Mu mpuzankano y’icyatsi kibisi, urubyiruko rushinzwe umutekano mu nzego z’ibanze, DASSO, na rwo rwari rwitabiriye iri huriro.