Iki gihembo cyerekana uburyo Banki ya Kigali ikomeje kuyobora mu gushyiraho urwego rwo hejuru mu kubahiriza inshingano no kugaragaza mu mucyo ibyo ikora.

Iki gihembo gitangwa ku bufatanye bw’Ikigo gishinzwe Isoko ry’Imari n’Impapuro mpeshwamwenda muri Kenya (CMA Kenya), Ishyirahamwe ry’Abagenzuzi b’Ibikorwa by’Ubwiteganyirize bemerewe gukora muri Kenya (ICPAK), Isoko ry’Imigabane rya Nairobi (NSE), Inama ishinzwe amahame yo kubara no gutanga raporo mu bigo bya Leta muri Kenya (PSASB), n’Ikigo gishinzwe iby’Ubwiteganyirize (RBA). FiRe Award ishimira ibigo birangwa n’ubutabera, gusobanura neza ibikorwa no kugaragaza inshingano mu miyoborere yabyo.

Anita Umuhire, Umuyobozi Ushinzwe Imari muri Banki ya Kigali (Chief Finance Officer) yagize ati “Gutsindira igihembo cya FiRe ni ikimenyetso cy’ubunyamwuga budufasha mu byo dukora byose muri Banki ya Kigali.”

Yongeyeho ati “Ni igihembo kigaragaza ko ukwiyemeza kwacu mu kurangwa n’ubunyakuri bituma dukomeza kubaka icyizere mu bakiriya bacu, kandi bigashyiraho urwego rushya ku rwego rw’inganda z’imari mu Rwanda no hanze yarwo.”

Dr. Diane Karusisi, Umuyobozi Mukuru wa Banki ya Kigali, yongeyeho ati: “Iki gihembo tugituye abakozi bacu bakorana umurava, abagenzuzi bacu, abafatanyabikorwa, ndetse n’umukiriya wese ukomeza kutwizera, akaba ari we utuma duhora twongera urwego rw’imikorere buri mwaka. Iki gihembo kiradutera imbaraga zo gukomeza kuba abayobozi mu bwiza bw’ibyo dukora byose.”

Banki ya Kigali
Banki ya Kigali yashinzwe mu 1966, ikaba ari yo banki nini mu Rwanda mu rwego rw’ubucuruzi, ikaba ifite abakiriya barenga miliyoni imwe ibifashijwemo n’amashami menshi ndetse n’imiyoboro ya serivisi z’ikoranabuhanga.
Banki ya Kigali yiyemeje guteza imbere ubukungu bw’igihugu ibinyujije mu gutanga serivisi z’imari zinoze ku bantu ku giti cyabo, ibigo bito n’ibiciriritse (SMEs), ndetse n’ibigo binini.

Ikomeje guteza imbere udushya n’imikorere yizewe mu rugendo rw’u Rwanda rwo kugera ku bukungu buteye imbere. Ubuhanga bwayo bwakomeje kugaragazwa n’ibihembo bitandukanye birimo kuba Best Bank in Rwanda mu bihembo bya Euromoney Awards for Excellence (2021, 2024, 2025), ndetse na Global Finance Magazine, aho iheruka kwegukana iki gihembo mu 2025 ku nshuro ya 5.

FiRe Award
FiRe Award (Financial Reporting Award) ni urubuga rukomeye muri Afurika y’Iburasirazuba rushimira ubuhanga mu gutanga raporo z’imari, imiyoborere myiza, no gukorera mu mucyo ku bigo by’imari. Igihembo kije ku nshuro ya 18, kikaba kigamije guteza imbere imikorere myiza, raporo zigaragaza imikorere irambye, ndetse no gutanga amakuru y’isesengura ryuzuye, mu bigo bya Leta n’ibyigenga mu karere kose.