Komisiyo y’Amatora yatangaje ko Samia yabonye amajwi arenga Miliyoni 31,9 bingana na 97,66% by’abatoye bose. Ubwitabire muri aya matora bwari kuri 87% mu gihe abiyandikishije ku gutora bari Miliyoni 37,6.

Gutsinda amatora uyu mugore wa mbere mu mateka wayoboye Tanzania, bimwemerera gukomeza kuyobora icyo gihugu mu myaka itanu iri imbere.

Aya matora yabaye ku wa Gatatu yakurikiwe n’myigaragambyo yaranzwemo urubyiruko rwiraye mu mihanda mu mijyi inyuranye yo muri Tanzania, mu kwamagana amatora ruvuga ko ataciye mu mucyo.

Abigaragambya bashinja leta kubangamira demokarasi kubera kuburizamo abayobozi bakomeye batavuga rumwe n’ubutegetsi, aho umwe muri bo yafunzwe, undi akabuzwa kwiyamamaza, bikongerera amahirwe yo gutsinda amatora Perezida Samia Suluhu Hassan, hamwe n’ishyaka arimo riri ku butegetsi rya Chama Cha Mapinduzi (CCM).

Ishyaka rya mbere rikomeye ritavuga rumwe n’ubutegetsi (CHADEMA) rivuga ko abantu babarirwa mu magana bishwe muri Tanzania mu gihe cy’iminsi itatu y’imyigaragambyo yakurikiye amatora.

Bwa mbere Samia ajya ku butegetsi byari mu 2021 nyuma y’urupfu rwa John Pombe Magufuli. Samia w’imyaka 65, akaba agiye kongera kuyobora mu gihe cy’imyaka itanu iri imbere, Tanzania ituwe n’abaturage barenga miliyoni 68