Koreya y’Epfo: Imbata ni yo yateje impanuka y’indege yahitanye abantu 179 - Iperereza

Yanditswe na

Mediatrice Uwingabire

28-01-2025 - 15:58' | Ibitekerezo ( )

Muri Koreya y’Epfo, raporo y’iperereza ku cyateje impanuka y’indege ya Kompanyi ya Jeju, yasohotse igaragaza ko iyo mpanuka yatewe n’imbata y’i gasozi (Baikal teal), kuko ibyaje muri moteri y’iyo ndege hagaragayemo amababa y’iyo mbata, ndetse n’utunyangingo duto duto twayo (DNA), dukwirakwiye hose muri moteri.

Iyo mpanuka y’indege bivugwa ko ari yo yabaye mbi kurusha izindi zose zabayeho mu mateka ya Koreya y’Epfo, imaze hafi ukwezi kose ibaye kuko yabaye ku itariki 29 Ukuboza 2024, ihitana abantu 179, abandi babiri bararakoka mu buryo butangaje.

Gusa raporo y’iperereza yatinze gusohoka kuko mu ntangiriro ngo bari babanje kwibeshya ko impanuka ishobora kuba yatewe n’uko indege yagonze urukuta rwo ku kibuga cy’indege cya Muan, aho yaguye nyuma igafatwa n’inkongi y’umuriro.

Abenshi mu bari muri iyo ndege, ngo bari abagenzi bavuye gusangira umunsi mukuru wa Noheri mu Mujyi wa Bangkok, Thailand n’ahandi. Iyo raporo y’amapaji yasohotse ku wa Mbere tariki 27 Mutarama 2025, igaragaza ko mu bisigazwa bya moteri zose z’iyo ndege yo mu bwoko bwa Boeng 737-800, habonetsemo ‘DNA’ y’iyo mbata y’i gasozi, harimo amababa yayo n’amaraso yayo.

Izo mbata z’i gasozi ngo ziboneka ku bwinshi aho muri Koreya y’Epfo, kandi zizwiho gukora ingendo ndende zijya gushaka ibyo kurya ndetse n’ahantu heza ho kubangurirana kugira ngo zishobore kororoka.

Bimwe mu bigize iyo raporo nk’uko byatangajwe n’ikinyamakuru Al Jazeera, yagize iti “Hari ibisigazwa by’amaraso n’amababa by’iyo mbata y’i gasozi byasanzwe muri moteri zose z’iyo ndege”.

Gusa muri iyo raporo nta bisobanuro byatanzwe, ku cyatumye umupilote w’indege adahita ayimanura ku butaka nk’uko bijya bigenda iyo hari ikibazo kigaragaye, ndetse ntiyanasobanuye icyatumye bigaragara ko agasanduka k’umukara kabika amakuru y’ibibera mu ndege (black box), kahagaritse kubika amakuru iminota ine yose, mbere y’uko impanuka y’indege iba.

Ishyirahamwe mpuzamahanga rishinzwe ubwikorezi bwo mu kirere (ICAO) ryari ryategetse Koreya y’Epfo, kurishyikiriza raporo igaragaza neza uko iyo mpanuka yagenze n’icyayiteye nyacyo, iyo rapro ikaboneka mu gihe kitarenze amezi abiri uhereye umunsi yabaye, none bayitanze n’iminsi 30 itarashira impanuka ibaye.