Minisitiri Mushikiwabo yagize ati: “u Rwanda ruha agaciro amahoro; u Rwanda rufite ubushake bwo kuzana amahoro, gucunga amahoro no guharanira kuzana amahoro aho atari”.

Mushikiwabo yibukije abitabiriye ayo mahugurwa yabaye kuva tariki ya 21/05 kugeza kuya 01/06/2012, ingufu u Rwanda rwashyize mu butumwa bwo kugarura amahoro hirya no hino ku isi.

Minisitiri w’ububanyi n’amahanga w’u Rwanda yagaye abantu boherezwa mu butumwa bw’umuryango w’abibumbye bwo kugarura amahoro barangiza bakananirwa kurengera ubuzima bw’inzirakarengane ahubwo bakajya muri politiki.

Aha Minisitiri Mushikiwabo yatungaga agatoki ingabo z’umuryango w’abibumbye zimaze imyaka isaga 11 mu butumwa bw’amahoro muri Repubulika Iharanira Demokarasi ya Congo (MONUSCO).

Abari muri ayo mahugurwa bahakuye ubumenyi buhagije burebana n’uko ubutumwa bwo kugarura amahoro bukomeye ndetse n’imbogamizi ziburimo; nk’uko byatangajwe n’Intumwa yihariye y’umunyamabanga mukuru w’umuryango w’abibumbye mu muryango w’ubumwe bwa Afurika, Zachary Muburi Muita.

Muburi Muita yavuze ko kutagira ubushobozi buhagije ari imwe mu mbogamizi zikomeye zigora abari mu butumwa bw’amahoro.

Aya mahugurwa y’ibyumweru bibiri yateguwe na Rwanda Peace Academy itewe inkunga na Leta ya Australia yitabiriwe n’abantu bagera kuri 45 baturutse hirya no hino ku isi harimo n’abayobozi bakuru b’umuryango w’abibumbye.

U Rwanda ruri ku mwanya wa gatandatu mu bihugu bitanga umusanzu mu butumwa bwo kugarura amahoro ku isi.

Emmanuel Nshimiyimana