Ibiro by’Umukuru w’Igihugu, Village Urugwiro dukesha iyi nkuru, bivuga ko ibiganiro by’Abakuru b’Ibihugu byombi byibanze ku gukomeza umubano usanzwe hagati y’u Rwanda na Tanzania, ndetse baganira ku zindi ngingo zireba akarere.

U Rwanda na Tanzaniya bisanzwe bifitanye amasezerano y’ubufatanye, yashyizweho umukono tariki ya 2 Nzeri 2021 na Perezida wa Tanzaniya, Samia Suluhu Hassan, ubwo yagiriraga uruzinduko rw’iminsi 2 mu Rwanda.

Ayo masezerano harimo agamije kunoza ubufatanye mu burezi, kunoza ibyerekeranye n’abinjira n’abasohoka ndetse n’ubufatanye mu gukurikirana ibirebana n’ikorwa ry’imiti n’ikoreshwa ryayo, no kwifashisha ikoranabuhanga mu itumanaho.

Ibicuruzwa byo mu Rwanda biva n’ibijya mu mahanga, ibingana na 90% byose binyuzwa mu gihugu cya Tanzaniya, bityo kuba u Rwanda na Tanzaniya bifitanye umubano mwiza byorohereza abacuruzi mu byo bakora.

Perezida Samia Suruhu ari mu bashyitsi bagejeje ijambo ku bitabiriye iyi nama, avuga ko Afurika igomba gushyira imbere ibikorwa by’ubukerarugendo biramba, hagabanywa iyangizwa ry’ibidukikije.

Yavuze ko muri Afurika, bakwiye guteza imbere ibungabunga ry’umutungo kamere, no gushyigikira ibikorwa by’imishinga y’ ubukerarugendo ishingiye ku baturage.

Avuga ko hagahyirwa imbaraga mu bukerarugendo bushingiye ku rusobe rw’ibinyabuzima, biteza imbere ingendo zizirikana ahantu h’umwimerere, no kugira uruhare mu kubungabunga ibidukikije, binatanga umusanzu mu bukungu mu buryo burambye ku baturage.

Yashishikarije ibihugu bya Afurika kwiha umukoro wo kwiyandikira inkuru zibareba, mu gihe Isi yugarijwe n’isakara ry’amakuru y’ibinyoma.