Zimwe mu mpunzi ibihumbi 44 na 600 ziri muri iyi nkambi zivuga ko kuba mu mashitingi byari bibangamye bitewe n’uko ku manywa usanga zishyuha cyane, nijoro nabwo zigakonja bikabije bigatuma ubuzima bwabo bwari bubangamiwe.

Imwe muri izi mpunzi z’abarundi yavuze iti”Amashitingi arashyuha cyane igihe cy’umunsi bikatugora cyane kubera ubwo bushyuhe, iyo bigeze mu ijoro usanga hakonje cyane rwose bigatuma abana natwe bakuze tugorwa.”

Ikindi izi mpunzi zivuga ngo ni uko amahema bari bahawe ngo atangiye gusaza bakabona baramutse bahawe aho kuba hakomeye byakemura ibibazo nk’ibi bibangamiye ubuzima bwabo mu nkambi.

Ubuyobozi bw’umuryango mpuzamahanga wita ku mpunzi UNHCR muri iyi nkambi, buvuga ko bwatangiye kubakira izi mpunzi amazu akomeye y’amabati n’urwondo, ku buryo biteganyijwe ko bose bazubakirwa.

Mu gishushanyo mbonera cyeretswe abanyamakuru kigaragaza iyi nkambi igizwe n’ibice bitatu, igice cya mbere kuri ubu kigizwe n’amahema arimo impunzi zaje mbere inkambi cyubakwa, igice cya Kabiri kikaba kigizwe n’ahakirirwa(ahashyirwa) impunzi ziba zikigera muri iyi nkambi mu gihe igice cya gatatu cy’iyi nkambi kigizwe n’amazu menshi ari kubakwa asakaje amabati.

Ubuyobozi bw’iyi nkambi buvuga ko nyuma yo kurangiza kubakwa aya mazu azahabwa impunzi zose zihacumbikiwe, bakazituramo.

Umuyobozi wa UNHCR mu Rwanda, Dr Azam Saber, ari kumwe na Minisitre w’u Rwanda wo kurwanya ibiza no gucyura impunzi, ubwo batemberezwaga iyi nkambi bashimye ibikorwa ko biri kwihutishwa byo kuyigezamo ibikorwaremezo no kubaka aya mazu.

Impunzi z’Abarundi za mbere zagejejwe mu nkambi ya Mahama iri mu karere ka Kirehe mu ntara y’Iburasirazuba bw’u Rwanda mu kwezi kwa Kane 2015.

Izi mpunzi ziri muri iyi nkambi zivuga ko ibyakorwa byose, icyifuzo cyazo cya mbere ari uko amahanga yahaguruka agashyira igitutu kuri leta y’u Burundi mu kugarura amahoro maze bagasubira mu gihugu cy’amavuko.

Jean Claude Gakwaya