Uyu ni umwanzuro uje ukurikira uwari warafashwe mbere, aho Umurenge wa Bwishyura wari warashyizwe muri Guma mu rugo kuva ku itariki ya 6 Gicurasi 2021, bitewe n’ubwandu bwa Covid-19 bwari bwazamutse cyane.

Minisiteri y’Ubutegetsi bw’Igihugu ni yo yatangaje ko imirenge irindwi yo mu Ntara y’Amajyepfo yari muri Guma mu rugo irayikurwamo kuko ubwandu bushya bwahagabanutse naho ibiri yo muri Gicumbi na Karongi ishyirwa muri Guma mu Rugo kubera ubwiyongere bw’ubwandu bwa Covid-19.

Itangazo rya Minisiteri y’ubutegetsi bw’Igihugu ryari ryasohotse ku itariki ya 5 Gicurasi 2021, rivuga ko imirenge ya Rwamiko muri Gicumbi n’uwa Bwishyura wo muri Karongi yashyizwe muri Guma mu rugo kubera ubwandu bushya bwari bukomeje kuhagaragara.

Minisiteri y’Ubutegetsi bw’Igihugu yasabye inzego z’ibanze n’iz’umutekano gukurikirana ishyirwa mu bikorwa ry’ayo mabwiriza, abaturage na bo bagakomeza kubahiriza amabwiriza y’inzego z’ubuzima.

Ubuhahirane n’imigenderanire hagati y’iyo mirenge n’uduce bituranye byari bibujijwe, keretse impamvu zihutirwa zirimo nko kwivuza. Abakozi ba leta bahatuye basabwe gukorera mu rugo, amashuri yo yakomeje gukora ariko imodoka zahanyuraga zijya mu tundi turere ntizari zemewe
kuhahagarara