Iyi mpanuka yabaye ubwo imodoka yo mu bwoko bwa Toyota Coaster ya sosiyete Excel ifite pulaki RAB 873 U, yavaga mu karere ka Nyagatare yerekeza i Kigali yagonganaga na taxi minibus yo mu bwoko bwa Toyota Hiace ifite uulaki RAB 994 M.

Impanuka yabereye mu murenge wa Kiziguro mu karere ka Gatsibo.

Nyirabayazana w’iyi mpanuka ikaba ngo ari umuvuduko mwinshi ku binyabiziga byombi, nk’uko bitangazwa n’Umuvugizi wa Polisi, ishami rishinzwe umutekano wo mu muhanda, Spt Ndushabandi Jean Marie Vianney.

Spt Ndushabandi yaboneyeho umwanya atanga ubutumwa ku batwara ibinyabiziga n’abaturage muri rusange, aho yavuze ko hashyizweho imirongo itishyurwa kugira ngo abagenzi mu gihe babonye batwawe nabi bajye bahita biyambaza polisi.

Imodoka yangiritse cyane ku buryo gukuramo abayirimo byasabye kuyitema.

Spt Ndushabandi yagize ati: “Buri muturarwanda wese akwiye kugira uruhare mu kuburizamo impanuka, tukirinda ikizitera mbere y’uko ziba”.

Abaguye muri iyi mpanuka bahise bajyanwa mu buruhukiro bw’ibitaro bikuru bya Kiziguro, 24 bakomeretse bikabije bahise bajyanwa mu bitaro by’Umwami Faysal i Kigali, abandi 11 bari kuvurirwa mu bitaro bya Kiziguro.

Inzego zitandukanye zirimo izishinzwe umutekano zitabiriye gukora ubutabazi.

Iyi mpanuka ikimara kuba, ubuyobozi bw’Intara y’uburasirazuba hamwe n’ubuyobozi bw’Akarere ka Gatsibo bahise bihutira gutabara , Umuyobozi w’Intara Uwamariya Odette, akaba yasabye imiryango yabuze ababo gukomera no kwihangana.

Minisitiri w’Intebe, Dr Pierre Damien Habumuremyi nawe abinyujije ku rubuga rwa Twitter yihanganishije ababuze ababo ndetse yizeza ko abakomeretse barimo kwitabwaho mu buryo bushoboka.

Benjamin Nyandwi