Buri muryango wahawe ihene ibyeri zo korora, matola, imyambaro ndetse bemererwa n’ ubwisungane mu kwivuza mu gihe cy’imyaka ibiri.

Karinda Callixte, umusaza wo mu kigero cy’imyaka nka 70, yabanyuriyemo muri make ubuzima yaciyemo haba mbere ya Jenoside yakorewe abatutsi muri Jenoside na nyuma yayo uko babayeho.

Yagize “ Njye ubusanzwe iwacu twari dutuye mu cyahoze ari Komine Ndusu Perefegitura ya Ruhengeri, ariko batuzanye gutura hano mu Bugesera mu myaka ya 1959, tugeze aho turibwa n’isazi bita tse tse maze umuntu akicwa no gusinzira”.

Karinda avuga ko abagiye barokoka iyo sazi bicwaga na malariya iri aho kuko hari amashyamba menshi ndetse bamwe bakaribwa n’inyamaswa zitandukanye.

Yakomeje agira ati “Abarokotse ibyo byose baje kwicwa mu gihe cya Jenoside yo mu 1994. Twagiye duhungira mu nsengero ariko ntibyatinze kuko badusanzeyo baratumara, ubu twe twarokotse turi inshike n’ibimuga nubwo mutubona duhagaze”.

Murekeyisoni Prisica, nawe yagizwe inshike na Jenoside yakorewe Abatutsi, mu butumwa yagejeje kuri abo baje kubasura, yagize ati “ Twaciye muri byinshi kuko twiswe inzoka maze abagore bakabafomoza abana batwite bareba ndetse bakanabicira abana babo mu maso. Nubwo twarokotse ubu turi inshike nta miryango tugira, gusa turabashimira ko muba mwaje kudufata mu mugongo”.

Daniel Barrientos, Umuyobozi Mukuru wa R Switch yabwiye abo barokotse ko baje kubafata mu mungongo kugira ngo bagire umucyo maze ukureho umwijima w’abaranze.

Ati“ Turi hano kugira ngo twifatanye namwe kwibuka abazize Jenoside, twerekana ko ibyabaye bitazongera ukundi ndetse no kubagaragariza ko mugomba kugira icyizere cy’ejo hazaza twubuka ariko tuniyubaka”.

Uyu muyobozi yasabye abari aho ko buri wese agomba gutekereza kugira ngo ibyabaye bitazongera ukundi haba mu Rwanda ndetse no mu mahanga.

R Switch yashinzwe mu mwaka wa 2003 ikaba ikora ibijyanye no gukora amakarita yifashishwa mu kubikuza amafaranga mu byuma byabugenewe ndetse ikanabikora igihe byagize ikibazo.

Egide Kayiranga