Abaturage ngo ntibari basobanukiwe n’inyungu bashobora gukura mu cyayi cyane ko bumvaga atari igihingwa washyira mu murima ngo uhite ubona umusaruro mu gihe gito, ariko kubera amafaranga gisigaye giha abahinzi ngo bamenye akamaro kacyo.

Abahinzi b’icyayi ngo bamaze gusobanukirwa akamaro kacyo.

Uwitwa Pascal Nsabimana, umwe mu bahinzi b’icyayi akaba na perezida wa koperative y’abahinzi b’icyayi, aravuga ko buri kwezi umuhinzi w’icyayi asigaye abona amafaranga kandi agaharanira kuba yagikorera neza.

Aragira “Uyu munsi wa none umuhinzi w’icyayi yageze aho abona ko kimuha amafaranga ya buri kwezi, atuma rero umuhinzi w’icyayi ashaka kurusha mugenzi wo ngo arusheho kugira icyayi kizatanga umusaruro mwiza”.

Arakomeza avuga ko n’abaturage bahinze ahantu habi bafite gahunda yo kujya bishyira hamwe bagahuza ubutaka.

Aragira ati “Turi kubiganira n’inzego zinyuranye, dufite gahunda yo guhinga icyayi ku buso bunini, ubu dufite gahunda yo guhuza ubutaka bya bindi byo guhinga akarima ku kandi uturima dutandukanye turi kubivamo, icyo tubura ni imbuto kandi ziri gukorwa zizaboneka”.

Kugeza ubu abahinzi b’icyayi aho babonaga miliyoni 12 ku kwezi ubu babasha kubona hagati ya miliyoni 50 na miliyoni 70 bitewe n’umusaruro wabonetse.

Caissy Christine Nakure