Amakuru agezweho ni uko iyo kipe yiyemeje guhindurira ikicaro cyayo mu karere ka Musanze.

Rayon Sports mu minsi mike iraba ibarizwa mu Mujyi wa Musanze.

Iki cyemezo kije gikurikira ibiganiro bikorerwa mu ibanga rikomeye iyi kipe imaze iminsi igirana n’umuherwe w’umwongereza witwa Goldon Clark wiyemeje kuyitera inkunga ndetse asaba n’ubuyobozi bw’iyi kipe kwimukira mu majyaruguru y’u Rwanda.

Impamvu ikekwa yateye uyu muherwe gusaba ikipe ya Rayon Sport kwimukira mu majyaruguru y’u Rwanda ngo yaba ari urugendo uyu munyemari aherutse kugirira mu birunga ubwo yasuraga ingagi bikamutera gukunda akarere ka Musanze.

Muri urwo ruzinduko uwo muherwe yagiriye mu Rwanda yegerewe n’abayobozi ba Rayon Sport bamugezaho ikibazo cy’ubukungu cyugarije ikipe yabo ndetse bamusaba kubatera inkunga.

Nyuma y’ibiganiro byamaze amezi atatu hagati y’impande zombi, Clark yemeye kugenera ikipe ya Rayon Sport miliyoni 5 z’amadorali ndetse asaba ko iyo kipe yakwimukira mu mugi wa Musanze aho uwo muherwa ateganya kubaka ibikorwa by’amajyambere byinshi.

Icyitonderwa : Umuntu wese usoma iyi nkuru yibuke ko uyu munsi ari tariki ya mbere Mata. Uyu munsi akaba ari umunsi wo kubeshya ("poisson d’avril" mu rurimi rw’igifaransa cyangwa se "April fool’s day" mu rurimi rw’icyongereza)

Kigali Today