Imiryango yimuwe ku musozi wa Rubavu na Gishwati yajyanywe gutuzwa mu Murenge wa Cyanzarwe mu Kagari ka Busigari bavuga ko bahawe ibibanza bito ku buryo iyo hagize uwitaba Imana kubona aho bamushyingura ari ikibazo, mu gihe ubuyobozi bw’akarere butigeze buteganya amarimbi rusange.

Bamwe mu baturage batuye muri aka kagari bavuga ko iyo umuntu apfuye bamushyingura mu ngo zabo nyamara ngo mu ngo naho guturwa si aho gushyingurwa. Kuva muri 2010 aba baturage bimurwa muri Gishwati no ku musozi wa Rubavu iki kibazo cyaragaragajwe ariko ntikirabonerwa igisubizo.

Abaturage bavuga ko kuba batabonerwa irimbi bibavuna, kuko bakora ibirometero byinshi kugira ngo bashobore gushyingura ababo mu irimbi rya Karundo riri mu Murenge wa Rubavu, Akagari ka Mbugangari, bakavuga ko bemera gukora izi ngendo kuko aho batuye n’ubwo ari hato ngo iyo bacukuye basangamo urutare bakabura aho bashyingura.

Umuyobozi w’akarere ka Rubavu, Sheikh Bahame Hassan avuga ko ikibazo cyaho gushyingura gihari ariko kirimo gushakirwa igisubizo.

Sylidio Sebuharara