Bamporiki kandi uzwi mu kinamico URUNANA akina nka ‘Kideyo’, avuga ko yatangiye kumenya ubwoko bwe afite imyaka icyenda, abubwiwe na nyina umubyara kuko ku ishuri bari babasabye kuvuga ubwoko bwabo ariko we akabiyoberwa kuko yari akiri umwana.

Ati: “nabajije mama ubwoko bwanjye arambwira ngo mvuge ngo ndi Umuhutu utavangiye”.

Uyu musore akomeza avuga ko Jenoside yatangiye ari mu bitaro by’i Kibogora mu cyahoze ari perefegitura ya Cyangugu. Bimwe mu byo yaboneye muri ibi bitaro avuga ngo ni uburyo bagiye bica Abatutsi bari muri ibi bitaro.

Ati: “ndibuka umugabo witwaga Pascal wari Umututsi bamuvumbuye munsi y’igitanda twariho bamukuyemo baramwica, ikindi ntazibagirwa ni uburyo bishemo Bayingana Aphrodis nawe biciye muri ibi bitaro”.

Ibi byose byabaga Bamporiki avuga ko byamuhungabanyije, ati: “icyo gihe navugije induru cyane ntaka ngo bari kwica Abatutsi, mama ampfuka umunwa ngo ninceceke batagirango natwe twaje kwihisha mu bitaro kandi twaje kwivuza”.

Amayobera kuri Bamporiki Jenoside irangiye

Ni ikiniga kinshi, uyu muhanzi avuga ko yababajwe no nyuma ya Jenoside yasubiye ku ishuri nk’ibisanzwe ariko yagerayo agasanga nta witwa Umututsi ukiramgwa ku kigo cyabo kuko abenshi bari barishwe.

Yaje kugera mu mashuri yisumbuye i Kibogora aho yahuye n’umwe w’Umututsi biganye mu mushuri abanza wabashije kurokoka, ababazwa n’inkuru ye.

Ati: “naje kobona Jean Paul Niyonsaba hari hashize imyaka itatu yaragiye mu kigo cy’imfubyi mbabazwa n’uko yaje kumbwira ko Abahutu b’iwabo bamumariye umuryango wose akaba asigaye ari myakamwe byanteye ikimwaro!”

Bamporiki avuga ko nyuma ya Jenoside yumvaga icyo bari bakwiye ari ukwiturwa inabi ariko ngo yaje gutungurwa no kubona ibyo yakekaga ko aribyo bizaba ataribyo bibaye. Aha yatanze urugero rw’umwarimu wari wararokotse Jenoside wamuhaye ibikoresho by’ishuri nawe abikuye mu majyambere y’ubukwe bwe bwari bumaze iminsi bubaye.

Uyu mwarimukazi yahaye uyu musore ibikoresho kubw’uko we na nyina umubyara batari babashije kubinona kubera amikoro make, ati: “yabonye ngiye ku ishuri n’igikapu kirimo ubusa agira impuhwe arampamagara ambaza ibyo mbura, afata amajyambeye arabimpa”.

Uyu musore yaje kugeraho yijyira inama yo kujya i Kigali aje gushaka umugabo witwa Dieudonne Munyenshoza uzwi ku kabyiniriro ka Mibilizi mu ndirimbo z’icyunamo kuko ari uw’iwabo ku ivuko kandi akaba yarumvaga ko aba mu mujyi wa Kigali.

Akigera muri uyu mujyi ntiyahise abona Munyenshoza ahitira Kimicanga ahura n’umugabo wo ku Kibuye umwumvisha ko nta kazi ateze kuzabona mu mujyi wa Kigali kuko ari Umuhutu. Ati: “yarambwiye ngo nubwo waba uzi ubwenge kajana, nta Muhutu uhabwa akazi k’ubwenge akora akazi nk’ako gucukura amabuye mbese akazi k’ingufu gusa”.

Bamporiki ngo yumvise ibyo yumva neza ko ariko bimeze nawe abyishyira mu mutwe akajya ashaka akazi k’ingufu gusa ndetse n’uyu mugabo wabimubwiye amushakira ikiraka cyo gucukura umusarani muremure, awurangiza wenyine.

Ati: “icyambabaje ni uko narangije umusarane njyenyine ari nabwo bwambere nari nkoze ako kazi kandi mu busanzwe bitanoroshye gucukura umusarane wenyine, bakambwira ko amafaranga bayahaye wa mugabo. Kuva ubwo sinongeye kubona uwo mugabo na n’ubu sindongera kumuca iryera”.

Yaje kugeraho ahura na Munyenshoza yaje ashaka nyuma y’igihe kinini ageze i Kigali, bahurira mu marushanwa y’imivugo n’indirimo mu mwaka w’2006, Munyenshoza aba uwa mbere mu ndirimbo naho Bamporiki aba uwa mbere mu muvugo. Yahise asaba Munyenshoza ko bajyana iwabo ako kanya bahita bajyana nta handi aciye kuko ntacyo yari kwimukana aho yabaga.

Bamporiki yatunguwe no kubona nawe ahawe agaciro

Bamporiki avuga ko yaje gutungurwa cyane no kubona atumiwe na Minisiteri y’umuco na siporo bamubwira ko hazaba irushanwa muri perezidansi kandi ko nawe azaryitabira.

Avuga ko yagiye muri perezidansi yikandagira cyane kuko yumvaga nta Muhutu ushobora kwinjira ahantu nka hariya. Ati: “bancishije mu cyuma gisaka ariko icyahise kinza mu mutwe, ni uko iki cyuma ahubwo ari igipima ngo bandebe ko ndi Umuhutu koko!”.

Yaje gutungurwa no kubona aya marushanwa yo muri perezidansi ayatsinze ariko kubyemera ko yayatsinze nabyo byanje kumubera ihurizo rikomeye.

Mu byo yajyagamo byose yabikoraga nta byishimo kuko yahoranaga urwicyekwe, ati: “jye najyaga ahantu nkagenda mpfutse amauzu ngo basi batabona ko ndi Umuhutu nkabura amahirwe.”

Uko yakize

Yaje gukomeza gukuza impano ye, rimwe ngo yagiye kuvuga umuvugo i Kibagabaga mu mujyi wa Kigali aho yaje kumva ubuhamya bw’umwana warokotse Jenoside avuga inzira yanyuzemo bimukoraho cyane kuburyo nawe kuvuga umuvugo yari yateguye byamunaniye aza kubeshya ko arwaye kugirango atajya kuwuvuga.

Ati: “Mu by’ukuri Ubuhutu bwanjye nabusize i Kibagabaga, nyuma yaho natangiye kugenda nemye ntihisha, ntahisha amazuru kuko nasanze naribeshyaga no kugeza ubu narabohotse”.

Bamporiki umaze igihe akubutse muri Amerika aho yari yarahawe buruse yo kwiga ku bijyanye n’amahoro yagarutse mu Rwanda ashinga umuryango ugizwe ahanini n’abahanzi bavuga ku mahoro n’ubworoherane. Uyu muryango bakaba barawise ‘Art for peace’.

Gerard GITOLI Mbabazi