Imwe mu nyubako z’ibitaro bya Gisenyi

Ubuyobozi bw’Akarere ka Rubavu bubitangaje mu gihe ubuyobozi bw’ibitaro bya Gisenyi buvuga ko bimaze guhomba miliyoni 200 kubera abaturage badafite ubwishingizi mu kwivuza bagana ibi bitaro bagahabwa serivisi ariko bakabura ubwishyu.

Abaturage bambuye ibitaro bavuga ko bafatwa n’uburwayi batarabona ubwisungane mu kwivuza, bakoherezwa ku bitaro bakabarirwa fagitire iri hejuru aho bamwe bavuga ko babariwe amafaranga ari mu bihumbi 800, abandi ibihumbi magana abiri, ibihumbi ijana kugera kuri miliyoni 200.

Ubuyobozi bw’ibitaro bugerageza kubagumana mu bitaro kugira ngo abafite ababo babishyurire ariko hari abamara igihe kinini batarabona ubwishyu bagataha, nk’uko hari abaganira n’ibitaro bakavugana uburyo bazajya bishyura bakarekurwa bagataha.

Umuyobozi w’ibitaro bya Gisenyi, CSP Dr Tuganeyezu Oreste, avuga ko bafitiwe umwenda urenga miliyoni 200Frw bitewe n’abadafite ubwisungane mu kwivuza aho kwishyura 10% bagasabwa kwishyura ijana ku ijana (100%) kandi kudatanga aya mafaranga bigira ingaruka ku mikorere y’ibitaro.

Agira ati “Bigira ingariuka ku mikorere y’ibitaro kuko aya amafaranga ni yo yifashishwa mu kugura imiti ihabwa abandi barwayi, guhemba abakozi no kugura ibindi bikoresho.”

Ubuyobozi bw’Akarere ka Rubavu buvuga ko nubwo hari abaturage bambuye ibitaro bya Gisenyi bagomba kwishyurwa kuko bose batari mu cyiciro cy’ubukene cyo gusonerwa.

Umuyobozi w’Akarere ka Rubavu w’agateganyo, Nzabonimpa Deogratias, avuga ko hagomba gukorwa isesengura ku bafitiye umwenda ibitaro kugira ngo abafite ubushobozi bishyuzwe naho abatishoboye bakomeze bafashwe nk’uko Leta isanzwe ibikora.

Uyu muyobozi avuga ko abaturage basanzwe bari mu cyiciro cy’ubukene batazakorwaho kuko baterejwe ibyabo n’ubundi bagira ubuzima bubi.

Umwenda abaturage bo mu Karere ka Rubavu bafitiye ibitaro bya Gisenyi wongeye kuvugwa mu myaka ine ishize ubwo abaturage bari bamaze kwambura Akarere miliyoni 100.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1646 )