KT TV
Nyampinga n’ibisonga bye bagiye kongera gukusanya inkunga yo gufasha Mutebi Hamissi wakiniraga KBC
Nyuma y’aho Nyampinga Doriane n’ibisonga bye bakoze igikorwa cyo gukusanyiriza inkunga umukinnyi wa KBC Mutebi Hamissi “Junior” urwaye bikomeye nyuma y’impanuka yakoreye ku Kamonyi muri Gashyantare 2015 ntibagire ikintu kinini babona, Nyampinga Doriane yadutangarije ko bari gutekereza ubundi buryo bukomeye bakoramo iri kusanya bityo ubushobozi bukenewe bungana na hafi miliyoni eshatu z’amafaranga y’u Rwanda bukabasha kuboneka.
Aba ba Nyampinga babanje gufata ifoto bari hamwe n’uyu mukinnyi ikaba ari ifoto itaravuzweho rumwe aho bamwe babagaye ngo kuko bifotoje bigaragara ko bishimye, bakabibona nko kumushinyagurira no kumwifotorezaho mu gihe ba Nyampinga bo bavugaga ko ari we wabibasabye kuko yifuzaga ko ifoto itagaragara nk’aho bari mu gahinda.
Gufata iyi foto ngo byari mu rwego rwo kugira ngo bayikwirakwize hose hanyuma banabonereho kwegera abantu batandukanye babasaba ubufasha mu kugira ngo Hamissi abashe kubona amafaranga akenewe ngo abashe kuvurwa neza.
Byabaye intandaro yo kutagenda neza kw’iki gikorwa n’aho bageze bakomanga ngo bakababwira ko batabizera, ngo ni iki kibizeza ko iyo nkunga izagera kuri nyira yo.
Abandi bagahamya ko kudatanga umusaruro kw’iki gikorwa byaba byaratewe n’uko aba ba Nyampinga bakoresheje uburyo butizewe cyane ko hagiye hagaragara ibikorwa bitandukanye byo gukusanyiriza ubufasha ababukeneye nyamara ntibubagereho.
Nyampinga Doriane avuga ko bari bari mu bikorwa bitandukanye bijyanye no kwibuka, ko kuri ubu bagiye kujya hamwe babyige neza barebe icyo bakora ariko kandi ko bakeneye ubufasha bw’Abanyarwanda bose.
Yagize ati “...n’ubundi natwe tubitekerezaho kwicara yaba ari top 5 (5 ba mbere mu irushanwa rya Nyampinga w’u Rwanda) yaba ari top 15 twese tukareba niba ari ikintu dukeneye gukora uburyo twagikoramo twese hamwe ariko kikaba gikomeye ku rwego rw’igihugu, abantu bose bakakimenya bakakitabira.”
Akomeza agira ati “Turi gutegura uko twabikora ariko ntabwo turashyiraho uburyo buhamye kubera ko ntabwo twese twari duhurije hamwe ngo twicare tubitekerezeho neza ariko ni byo dushaka gukurikizaho...”
Igisonga cye, Akacu Lynca, we avuga ko ari gahunda bagiye gushyiramo imbaraga, bakaba basaba Abanyarwanda bose kubashyigikira.
Marie Clemence CYIZA UWIMANIMPAYE
Ibitekerezo ( 2 )
Ohereza igitekerezo
|
|
We wenyine arahagije no gukusanya milioni 10 .ariko uko mbibonaumenya ataramenya aho ahera . Niy organiser activités zimwe na zimwe atumire abantu yegere sponsors arebe ko atabigeraho.
ko impano bayifite ari ubwiza bwabo se babikoreshe neza maze bamushakire ubufasha