Inzego zitandukanye ziteguye gufatanya zirwanya ruswa

Yabitangaje ubwo Kuri uyu wa 4 Ukuboza 2017 mu biganiro byahuje inzego zirebana n’ubutabera harimo,Minisiteri y’ubutabera,Ubushinjacyaha bukuru, Polisi y’igihugu hamwe na Transparency international Rwanda, ubwo hatangizwaga icyumweru cyo kurwanya ruswa.

Umuvunyi mukuru Anastase Murekezi, akaba yavuze ko ikoranabuhanga mu guhuza amakuru ari kimwe mu bizabafasha guhangana na ruswa, aho hazashyirwaho umuyoboro uhurizwaho amakuru aturutse mu nzego zitandukanye ku buryo bwihuse.

Yagize ati “inzego nyinshi zivugwamo ruswa ndetse n’izifite inshingano yo kuyirwanya. Turashaka guhuza amakuru twese kugira ngo tubyumve kimwe kandi bizadufasha kubona kimwe uko ruswa iteye”.

Umuvunyi mukuru avuga ko amakuru y’urwego rw’umuvunyi, polisi y’igihugu, ikigo cy’igihugu cyakira imisoro, ibiro bishinzwe ubutaka n’ibindi bigo,bizatuma amakuru yihuta kandi ahari imitungo ikomoka kuri ruswa hakamenyekana.

Umushinjacyaha mukuru w’u Rwanda Jean Bosco Mutangana, yagaragaje ko mu myaka ine ishize hari imanza 2225 zakiriwe n’inkiko kuri ruswa, aho ibyaregwaga byose bifite agaciro ka miliyari 45 z’amafaranga y’u Rwanda. Kunyereza imisoro bikaba byihariye miliyari 18 Frw, zingana na 40% by’ibyaha byose byakurikiranywe.

Polisi y’u Rwanda ni rumwe mu nzego zifite kurwanya ruswa mu nshingano, ariko ikaba ikunze kuza mu nzego zigaragarwaho na ruswa. ACP Mbonyumuvunyi Jean Nepo,ukuriye ishami ryo kurwanya ruswa muri polisi avuga ko bahagurukiye guhagarika Abapolisi barya ruswa.

Ati “nubwo muri polisi hari iki kibazo, kigenda gikemuka, hakurikiranwa ababifatirwamo,aho mu myaka ine Abapolisi 280 bafashwe, 170 birukanywe mu kazi naho 62 bashyikirizwa inkiko. Ruswa irahari ariko nta gikuba cyacitse “.

Ku ruhande rwa Minisiteri y’ubutabera, Rutazana Angeline, umugenzuzi mukuru mu nkiko avuga ko hafashwe ingamba zo kwihutisha imanza za ruswa ku buryo nta rurenza amezi 6 rudaciwe kugira ngo abayiregwa bakurikiranwe hakiri kare.

Uretse ibiganiro byahuje inzego z’ubutabera, hanateganijwe ibiganiro bizatumirwamo inzego zitandukanye nk’abikorera n’abanyamadini. Insanganyamatsiko y’uyu mwaka ikaba igira iti “uruhare rwawe ni ingenzi mu kurandura ruswa".

Polisi yabafashije kuva mu mwijima

Uyu mudugudu uherereye mu kagali ka Musenyi mu murenge wa Sovu mu karere ka Ngororero. Ni umudugudu uri ku birometero 60 uvuye ku muhanda wa kaburimo, ukaba no mu birometero 15 uvuye ku murenge wa Sovu, aho ushobora kubona umuriro w’amashanyarazi.

Ako kagali kagizwe n’imisozi ihanamye aho 80% by’abagatuye batuye mu manegeka.
Kuwa 25 Gicurasi 2017, mu cyumweru cyahariwe ibikorwa bya polisi y’igihugu, nibwo yatanze amashanyarazi akomoka ku mirasire y’izuba ku miryango 117 yari yaremeye kwimukira mu mudugudu wa Rubindi.

Niyonsaba Melaniya ati « mfite abana babiri. Umwe yari umuswa pe. Ariko kuva twabona amashanyarazi ndamwigisha nijoro kuko kumanywa ntabona umwanya none yatangiye gutsinda neza mwishuri ».

Bazimaziki Evariste we avuga ko ayo mashanyarazi atuma babona umuriro w’amatelefoni yabo ndetse bakanarahurira abakiri mu manegeka, bakumva radiyo ndetse bakanabona uko basabana nk’imiryango.

Ibyo ngo nibyo byatumye bamwe mu bari bakiri mu manegeka batangira kuza bagana uwo mudugudu kugira ngo nabo bazabone kuri ibyo byiza.

Bagirinka Patricie, umwe mu bimukiye muri uwo ati « Nasanze nta kundi urugo rwnjye ruzagera kwiterambere nkiri mu manegeka mpitamo kwimuka. Ubu ntegereje ko nanjye bazampa amashanyarazi nkabona urumuri ».

Kuva uwo mudugudu wahabwa amashyanyarazi, ingo ziwugize zimaze kuva ku 117 zigera kuri 200. Umuyobozi wungirije ushinzwe imibereho myiza y’abaturage muri aka karere Kuradusenge Janvier avuga ko ayo mashanyarazi yababereye ubukangurambaga bwiza.

Ati « kariya kagali kari kure y’insinga z’amashanyarazi asanzwe muri uyu murenge. Ariko kanari ahantu h’icyaro ku buryo no kuhumvikanisha gahunda za Leta byatugoraga cyane. Iki gikorwa cyatubereye umukangurambaga ukomeye ku buryo ubu muri gahunda zitandukanye abaturage basigaye bizana ».

Umuyobozi wungirije wa polisi y’igihugu Juvenal Marizamunda, avuga ko ibyo bikorwa bigamije gushyira mu bikorwa gahunda ya Leta yo kwishakamo ibisubizo.

Ati « ibikorwa nibyo dushyira imbere kurusha amagambo. Muri gahunda yo kwishakamo ibisubizo, polisi y’Igihugu yiyemeje gufatanya n’abaturage tukaba twishimiye umusaruro ibyo dufatanya bigenda bitanga”.

Muri gahunda ya police week 2017, mu ntara y’Iburengerazuba, polisi y’igihugu yatanze amashanyarazi nkayo ku miryango 700 ikaba 3200 mu gihugu cyose kandi iki gikorwa ngo kikazakomeza.

Uko niko ibiro bagiye kubaka bizaba bimeze

Biteganyijwe ko ibiro by’uwo murenge bizaba byuzuye mu gihe cy’umwaka umwe n’igice, bitwaye miliyoni 74RWf.

Ayo mafaranga yose azatangwa n’abaturage batuye muri uwo murenge n’abandi bawuvukamo ariko bakorera ahandi kimwe n’ibigo bitandukanye bikorera muri uwo murenge.

Umurenge wa Ndaro utuwe n’abaturage 24284 batuye mu ngo 5900. Buri rugo rwiyemeje gutanga nibura amafaranga 1000RWf.

Abo bandi basigaye nabo biyemeje gutanga inkunga uko bishoboye. Ku ikubitiro ayo bamaze kwiyemeza abarirwa muri miliyoni 30RWf.

Umurenge wa Ndaro ni umwe mu mirenge y’icyaro yo mu Karere ka Ngororero, ukaba ari na wo ufite inyubako ntoya itajyanye n’igihe.

Abaturage bo muri uwo murenge bavuga ko ku mbaraga bafite biyemeje kwiyubakira ibiro by’umurenge bifite inyubako ijyanye n’igihe; nk’uko uwitwa Sebazungu Modeste abisobanura.

Agira ati "Twarebye dusanga hari bimwe mu bikorwa twafasha mu murenge wacu, dusanga icya mbere ari ugufasha abakozi bize kandi bashoboye twahawe, kubona ibiro byiza bikwiriye gutangirwamo serivisi."

Kuri ubu,abaturage batangiye gusiza ikibanza no kukigezamo ibikoresho byo kubaka birimo nk’amabuye n’umucanga.

Ibiro by’umurenge wa Ndaro ni uko bimeze ubu

Mugisha Dan, umunyamabanga nshingwabikorwa w’Umurenge wa Ndaro avuga ko bamaze kujya inama n’abaturage ko baziyubakira ibyo biro badategereje inkunga.

Agira ati "Twabonye gukomeza gutegereza inkunga bizadutinza, kandi dufite imbaraga z’abaturage. Twagiye inama y’uko tuzafatanya ngo twubake inyubako y’ibiro byacu."

Umuyobozi wungirije w’Akarere ka Ngororero ushinzwe iterambere ry’ubukungu, Kanyange Christine avuga ko abaturage ba Ndaro batanze urugero rwiza rwo gushyira hamwe no gufata icyemezo cy’iterambere ryabo.

Abagenerwa bikorwa ba Gira inka muri Ngororero bahamya ko nta ruswa ikirangwa muri iyo gahunda

Mu myaka ishize abagenerwabikorwa ba Gira inka bakunze kugaragaza ko bakwa ruswa ku buryo butandukanye.

Yaba amafaranga yo kugura inzoga cyangwa kugushwa muri ruswa ishingiye ku gitsina, nk’uko hari umugore wo mu Murenge wa Kavumu wabishinje umunyamabanga nshingwabikorwa w’akagari muri Mata 2016.

Kuri ubu ariko bavuga ko ayo makosa atakigaragara; nk’uko Mukandori Marie Solange wo mu Murenge wa Hindiro abisobanura.

Agira ati “Njye bari barampaye inka mbere kuko ndi umukene. Nyuma naje kubyara abana batatu maze banyongera indi nka n’iyayo muri gahunda ya Gira inka. Nta ruswa nigeze ntanga rwose ibyo byari kera.”

Mugenzi we witwa Uwamurera Doroteya wo mu Murenge wa Gatumba, nawe ahamya ko nta ruswa ikirangwa muri Gira inka.

Agira ati “Njye najyaga numva ko ugomba gutanga ibihumbi 50RWf ngo uhabwe inka. Kuko nari nzi ko ndi ku rutonde narayahingiye ntegereza ko bazayanyaka ndababura kugeza inka itashye iwanjye.”

Akomeza avuga ko ayo mafaranga yagombaga gutanga ubu ngo ayakoresha mu gucuruza inyanya mu isoko rya Gatumba.

Mukamwerekande Beatrice, Gitifu w’Akagari ka Rugendabari mu Murenge wa Hindiro yemeza ko ubu gutanga inka za Gira inka hakurikizwa urutonde rukorerwa mu nteko z’abaturage no mu miganda.

Kuradusenge Janvier, umuyobozi wungirije w’Akarere ka Ngororero,ushinzwe imibereho myiza y’abaturage yemeza ko hari amakosa yakozwe mbere ariko ubu akaba yaraciwe burundu.

Agira ati “Ababigiragamo uruhare abenshi bari abayobozi. Twakoranye n’abaturage ubu barakangutse, abayobozi bamwe barabizize abandi bacika intege. Ubu muri gahunda zo gufasha abatishoboye ruswa yaraciwe burundu.”

Mu Karere ka Ngororero ba gitifu b’utugari umunani, ba veterineri bane n’abayobozi b’imidugudu bakurikiranweho ruswa muri “Gira inka” ndetse bamwe banavanywe mu kazi.

Akarere ka Ngororero kamaze gutanga inka 7200 muri gahunda ya Gira inka. Bateganya ko mu mwaka wa 2018 bazaba bamaze gutanga izigera ku bihumbi 12.

36% ntibarabona amazi meza

Imibare itangwa n’ibitaro bya Muhororo igaragaza ko indwara ziterwa n’umwanda bahura nazo zihariye 30% by’indwara zose bavura.

Amazi makeya ashyirwa mu majwi mu kuba ku isonga mu kutagira isuku aho 64% by’Abanya-Ngororero, ari bo bafite amazi meza. Ariko hari n’abitwaza ubukene n’imyubakire idahwitse itaborohereza kugira isuku.

Umwe mu bafire resitora mu Mujyi wa Ngororero ati « rwose isuku ntituyanze ariko n’abayobozi hari aho baturenganya.

Nonese amazi turayakura he ko tuvoma ibinamba ! ikindi reba ahantu nkorera. Nta metero 4 zirimo uvuye ku gikoni ujya aho abakiriya barira. Urabona se n’uwakwagura inzu yakwagurira he ? ».

Bamwe mu bayobozi ariko bavuga ko hakirimo n’ikibazo cy’imyumvire. Mukasano Gaudence uyobora Umurenge wa Nyange avuga ko aho bigeze hakwiye gukoreshwa n’ibihano.

Ati « turigisha uko dushoboye kose ariko ugasanga hari abantu basa n’abatumva. Nsanga tuzakoresha ibihano kugira ngo aho dusanze isuku yarasubiye inyuma bahanwe babere abandi urugero ».

Muganza JMV umuyobozi ushinzwe ubuzima mu Karere ka Ngororero na we ati « ni ikibazo kubona hari abantu bagikerensa ubuzima bwabo n’ubw’abakiriya. Inama tubagira ngo bubahirize isuku ntibazikurikiza ».

Mu bugenzuzi buherutse gukorwa muri Ngororero mu cyumweru cyo ku wa 28-31 Kanama 2017, byagaragaye ko urugendo rukiri rurerure mu kunoza isuku muri ako karere. Hamwe na hamwe byagaragaye ko batanita ku isuku y’ibiribwa cyane cyane ababicuruza.

Iyi marigarine bigaragara ko yarangiye mu Kwezi kwa Werurwe 2017

Muri uko gusuzuma isuku kandi hanagaragaye abacuruza ibiribwa byarengeje igihe hamwe n’ibibikwa mu mu buryo budakwiye, na byo bikaba bibangamiye isuku y’ibiribwa.

Zimwe mu ngamba zafashwe mu guhashya umwanda harimo ubugenzuzi ku isuko buzajya bukorwa mu karere hose buri cyumweru nk’uko bivugwa na Kanyeganza Emmanuel ushinzwe gukurikirana ibikorwa by’ubuzima muri ako karere.

Bihangiye imirimo aho guhora bicaye

Bamwe muri urwo rubyiruko batunganya ibikomoka ku musaruro w’ubuhinzi n’ubworozi, aho bakora imitobe (jus) itandukanye, imigati, foromage, yawurute n’amandazi.

Abandi bakora ibikomoka kumpu nk’inkweto, imikandara n’ibindi bikoresho.

Ntirivamunda Venuste ukora ibikomoka kumpu ati “Nari inzererezi ntacyo nzi gukora ariko aho abagiraneza bafatanyije n’akarere banshyiriye mwishuli nifatanyije n’abandi ubu tugeze kure twiteza imbere”.

Mugenzi we Sindayigaya Jean Paul na we utunganya ibikomoka ku buhinzi n’ubworozi asanga ngo guteza imbere made in Rwanda ari ukwitura igihugu ineza cyabagiriye gishyiraho amashuri.

Agira ati “ubu tugura amata n’imbuto zitandukanye mu baturage nabo bakabona isoko ry’umusaruro wabo kandi ibyo dukora nibo bongera bakabigura.

Dusanga ari ukwitura igihugu kuko bituzamura kandi bikanafasha abaturage”.

Uretse urwo rubyiruko rwibumbiye muri koperative, hari na bagenzi babo bikorera ku giti cyabo, abandi bakaba barabonye akazi ahandi.

Abo bakorera muri koperative bagera kuri 40 bavuga ko byibura buri wese yinjiza amafaranga ri hagati y’ibihumbi 60 n’100 ku kwezi.

Uru rubyiruko rukaba rufite intego yo kuzakora koperative imwe ihuriweho n’abize kuri VTC Hindiro bose.

Ibyo bakora babikura mu bihingwa biva mu baturage

Umunyamabanga nshingwabikorwa w’inama y’igihugu y’urubyiruko Mwesigwa Robert ashimira urwo rubyiruko agasaba n’abandi kurwigiraho.

Ati “aba bo mu ngororero bigaragara ko bamenye amahirwe bafite bakaba baratangiye kuyabyaza umusaruro. Ndasaba n’abo mu tundi turere kubigiraho maze bakiteza imbere”.

Ibikorwa n’uru rubyiruko ngo birakunzwe kwisoko ugereranyije n’ibihasanzwe bikomoka ahandi.

Gusa ngo baracyafite imbogamizi zo kutagira imashini zihagije ngo bongere ibyo bakora ubu barimo gushakira icyemezo cy’ubuziranenge.

Hano abapadiri berekanaga ko bazi gukina umupira w’amaguru

Ku wa 26 Kamena 2017, nibwo imikino ya nyuma mu mukino w’amaguru (Football) no mu mikino y’amaboko Volleyball na Basketball yabereye muri Diyosezi ya Kabgayi mu Karere ka Muhanga.

Byari mu rwego rwo kwitegura yubile y’imyaka 100 Abapadiri ba mbere b’Abanyarwanda Barthasar Gafuku na Donat Reberaho babuhawe.

Padiri Gafuku yavukiye i Zaza muri Diyosezi ya Kibungo, abatirizwa i Mibirizi muri Diyosezi ya Cyangugu. Ubu ashyinguye i Mugombwa muri Diyosezi ya Butare.

Iyo mikino yabereye i Kabgayi nk’ahantu hatangiwe ubupadiri bwa mbere mu mwaka wa 1917.

Berekanye ko na Basketball bayizi

Muri Volleyball, ikipe y’abapadiri ba diyosezi ya Kibungo yatwaye igikombe itsinze iya Kabgayi amaseti 3 kuri 0.

Muri Basketball, ikipe ya Diyosezi ya Kabgayi yatsinze iya Kigali naho mu mupira w’amaguru ikipe y’abapadiri ba Diyosezi ya Cyangugu inyagira iya Nyundo ibitego 3-0.

Padiri Leonard Munyangaju, umunyamabanga w’akanama k’Abepiskopi gashinzwe urubyiruko mu Rwanda akaba ari na we muhuzabikorwa w’iyo mikino yateguwe n’inama y’Abepiskopi Gatolika mu Rwanda, avuga ko ibasigiye byinshi.

Agira ati “Twabonye impano zadutunguye z’abapadiri, kandi byadufashije gusabana no guhura n’abakirisitu benshi. Nyuma ya yubile tuzatekereza uko imikino nk’iyi yazakomeza kuko abasenyeri basanze ari uburyo bwiza bwo gusabana no gukora iyogezabutumwa.”

Bakinnye na Volleyball

Musenyeri Antoine Kambanda wa Diyosezi ya Kibungo avuga ko bateguye iyo mikino kugira ngo Abapadiri basabane kandi bahure n’abalayiki.

Agira ati “Twatekereje guhuza abapadiri kugira ngo basabane kandi babashe guhura n’Abalayiki (abakirisitu batihaye Imana) ndetse tunatoza abapadiri kuba abasimbura beza b’abababanjirije kuko bakoze ibikorwa bikomeye mu iyogezabutumwa.”

Akomeza avuga ko abapadiri babuhawe bwa mbere mu Rwanda bakoze ibikorwa bikomeye birimo kuba barajyaga kwiga muri Tanzania n’amaguru.

Uretse iyo mikino yabaye mu rwego rwo kwitegura iyo yubile, hanakozwe ingendo nyobokamana ahantu hatandukanye mu Rwanda no mu mahanga, imyiherero. Muri Kiliziya Gaturika uyu mwaka wa 2017 wiswe uw’ubusaseridoti.

Iyo yubile izaba ku itariki ya 07 Ukwakira 2017, ikazabera i Kigali. Ariko mbere y’aho ku itariki ya 22 Nyakanga 2017 abadiyakoni bose bazahabwa ubusaseridoti buzatangirwa i Kabgayi.

Musenyeri Smaragde Mbonyintege ashyikiriza igikombe ikipe y’umupira w’amaguru y’abapadiri ba Diyosezi ya Cyangugu

Mabuye wari mukuru muri abo bana niwe wenyine warokotse

Ubwo buhamya bwatangiwe ku rwibutso rwa Kavumu ruri mu Karere ka Ngororero ubwo hibukwaga abana 12 b’Abatutsi bahambwe ari bazima, tariki ya 08 Kamena 2017.

Cyirima Felicien waharokokeye avuga ko abo bana bishwe ku buryo bwateguwe n’Interahamwe ariko ababyeyi babo barabareka.

Agira ati “Bafashe ababyeyi babo barabegeranya babashyira mu nzu imwe bari basigaje batayisenye maze babasezeranya ko bo n’abana babo ntacyo bazaba.

Nyamara nyuma byaje kumenyekana ko ngo bari babibikiye ngo bazabikuze bavuye guhamba umubyeyi wabo Habyarimana.”

Akomeza avuga ko abo bana na ba nyina bahamaze iminsi ariko Interahamwe zibacunga buri munsi.

Ku itariki ya 08 Kamena 2017, nibwo ngo abo bicanyi bagarutse maze bavuga ko baje gusoza akazi kabo. Basabye ba nyina gucukura imva y’abana babo maze babikora bakubitwa kugeza bacukuye icyobo Interahamwe zifuzaga.

Interahamwe ngo zafashe abo bana zibashyira mu cyobo zibarenzaho itaka ari bazima maze zirigendera, abana babura ubatabara naho ba nyina basabwa gusubira iwabo kuko bari Abahutukazi bashakanye n’Abatutsi.

Abo bana ubundi ngo bari 13 ariko umwe wari mukuru muri bo witwa Mabuye Janvier yacitse abicanyi ararokoka n’ubu akaba ari we ubara iyo nkuru.

Agira ati “Njyewe nari mukuru mbaruta kuko batampekaga. Mbonye Interahamwe zidutera buri mugoroba ndacika mpishwa n’umuturanyi.”

Imibiri y’abo bana 12 hamwe n’iy’abandi bazize Jenoside bashyinguye mu rwibutso rwa Kavumu

Depite Manirarora Annoncée yasabye abatuye Ngororero kugira urukundo no kuvugisha ukuri, kuko kuri uwo munsi hanashyinguwe imibiri itandatu yabonetse kandi abayihashyize bakiriho bakaba barimanye amakuru.

Nyuma y’inyigisho n’ubuhamya bahawe na Padiri Ubald Rugirangoga usanzwe azwiho gutanga inyigisho z’ubumwe n’ubwiyunge , abaturage bemeye ko bagiye kwiminjiramo agafu bagashyigikira ibikorwa by’ubwiyunge ari byo gusaba imbabazi, kubababarira no gukundana.

Umuhanda uhuza Ngororero na Rutsiro watangiye kwangirika

Imwe muri iyo mihanda ni umuhanda wa Kaburimbo uhuza Muhanga-Ngororero-Nyabihu, aho wangijwe n’umugezi witwa Gakoma hafi y’agakiriro ka Ngororero mu murenge wa Ngororero, ndetse inkuta z’ako gakiriro nazo zikaba zigaragaza ko zigiye guhirima.

Uyu muhanda wa kaburimbo kandi wugarijwe n’inkangu iri ahitwa i Buyungu mu murenge wa Hindiro kubera umugezi uri munsi yawo n’amasoko yawo.

Umugezi wa Satisyi nawo urimo gusatira bikomeye umuhanda Kazabe –Rutsiro unyuze ku mukore wa Rwabugiri, ndetse umugezi wa Giciye nawo ntiworoheye umuhanda mu murenge wa Muhanda.

Umugezi wa Satansyi

Kimwe mu bivugwa ko bitiza umurindi iyo migezi mu kwangiza imihanda harimo ubucukuzi bw’amabuye y’agaciro, amabuye yo kubakisha hamwe n’imicanga.

Kanyange Christine umuyobozi wungirije ushinzwe ubukungu muri aka karere yemeza ko hari ababaca murihumye bakangiza imihanda.

Yagize ati « nibyo nubwo hari ibyangombwa duha abakora ubucukuzi kandi bagacukura ahagenzuwe, hari n’abiha gucukura badafite ibyangombwa bakangiza imigezi ndetse na bamwe mu bafite ibyangombwa barenga ku mategeko ».

Abacukura amabuye ku migezi ngo bayongerera ubukana

Gusa ngo bene aba iyo bafashwe bacibwa amafaranga ndetse bamwe bakanafungwa, ubu hakaba hamaze gufatwa batandatu.

Kanyange yemera kandi ko habaye uburangare mu kuyobora amazi hakorwa umuhanda ujya mu murenge wa Kavumu akaba ariyo yangiza agakiriro n’umuhanda wa kaburimbo.

Kanyange ariko anavuga ko imiterere y’akarere ubwayo nayo ituma imigezi yuzura cyane ikangiza ibindi bikorwa.

Avuga ko bafatanyije n’ikigo cy’igihugu gishinzwe ubwikorezi, batangiye gusana umuhanda wa kaburimbo ndetse akarere karimo gukora inyigo yo kubakira agakiriro.

Umugezi wa Giciye nawo wangiza umuhanda

Ku birebana n’imigezi yangiza imihanda y’igitaka ihuza Ngororero n’utundi turere ngo baracyashaka abafatanyabikorwa bo kubafasha kuyobya iyo migezi.

Biyujurije uruganda rwa Miliyoni 370Frw.

Uru ruganda ruzajya rutunganya kawa ku kigero cya Kawa y’icyatsi (Green Coffee ihita ikarangwa ikaba yanyobwa), ruzanafasha ayandi makoperative ya kawa akorera mu turere twegeranye na Karongi nk’uko bivugwa na Hakizimana Frederic, umuyobozi warwo.

Agira ati ʺTwajyaga tugomba kujya gutonoza Kawa yacu i Kigali, rimwe na rimwe bigatuma dukererwa kuyoherereza abaguzi bacu hanze y’igihugu kuko twahuriragayo n’abandi benshi kandi twanahatangiye amafaranga menshi.

Ubu rero ayo ni amafaranga twabitangagaho ndetse n’igihe turengeye. Bigiye rero no gufasha andi makoperative ya Kawa yaba ayo muri Karongi ndetse n’uturere duturanye kuko bazayizana hano batagiye kure.ʺ

Abanyamuryango ba koperative Kopakama mu nteko rusange yo kuwa 04 Gicurasi 2017.

Hakizimana avuga ko gutonoza Kawa yabo i Kigali, babacaga 45 Frw ku kilo kimwe, aza asanga ay’ubwikorezi.

Abanyamuryango ba Kopakama bavuga ko ibikorwa bya koperative yabo birimo uru ruganda rwuzuye bibaha icyizere ku ihinduka ry’imibereho yabo mu minsi izaza nk’uko bivugwa na Nyirasafari Leoncie.

Ati ʺIbi biranyereka icyizere cy’ejo hazaza, icyizere ku rubyaro rwacu,….nkumva ko ibyo turimo biri kubyara inyungu kandi bicunzwe neza.ʺ

Hakizimana Fredric umuyobozi w’uru ruganda avuga ko ruzafasha n’andi makoperative yo muri aka gace.

Habimana Jackson nawe ati ʺNk’abanyamuryango turishimye cyane kuko turizera ko koperative yacu igiye kurushaho kunguka, amafaranga twakoreshaga tujya gutonoza Ikawa i Kigali tugiye kuyakoresha ibindi, ahubwo abandi nabo bayaduhe kuko tuzabatonorera.ʺ

Umuyobozi w’Akarere ka Karongi, Ndayisaba Francois avuga ko uru ruganda ruri mu bikorwa binini biri mu mihigo y’aka Karere y’umwaka wa 2016-2017. Yongeraho ko ari n’imwe mu nzira zikomeje gushyirwaho zizafasha abaturage kwikura mu bukene.

Uretse abakozi bahoraho, biteganijwe ko uru ruganda ruzajya rutanga akazi ku bakozi badahoraho bari hagati ya 250Frw na 300Frw bazajya bakora mu gihe cy’amezi atanu buri mwaka ku mwero wa Kawa.

Kugeza ubu iyi koperative ifite abanyamuryango 2029.

Imihanda mibi ituma bashyikira serivisi bibagoye

Abafite iki kibazo kurusha abandi ni abo mu mirenge ya Bwira, Muhanda na Ndaro.

Sibomana Augustin, ati « kuva aha kugera i gatumba aho nshobora gufotoza urupapuro cyangwa kubona banki, nkoresha amasaha atatu n’amaguru cyangwa bikantwara amafaranga ibihumbi bitandatu ngatega moto nshaka icyangombwa ubundi cyishyurwa amafaranga magana atanu ».

Habarugira Francois ukora akazi ko gutwara abagenzi kuri moto atuye mu Murenge wa Ndaro nawe yemeza ko bibagora kubona izo serivisi.

Ati « mperutse kujya guhinduza uruhushya rwo gutwara ibinyabiziga ariko byantwaye amafaranga ibihumbi icumi na bitatu mu gihe abegereye ibikorwa remezo batarenza ibihumbi bitanu».

Mu kugerageza kunoza imitangirwe ya serivisi z’irembo, muri Werurwe 2017, akarere ka Ngororero katanze terefoni zigezweho 159 ku banyamabanga nshingwabikorwa b’imirenge n’utugari ndetse n’abashinzwe iterambere mu tugari kugira ngo bafashe abaturage.

Bamwe muri aba bazihawe nabo bakaba bavuga ko zishobora kutazatanga umusaruro kubera ibura ry’ibikorwa remezo.

Umunyamabanga nshingwabikorwa w’akagari ka Runyinya Nyiranshimyemungu Francoise agira ati « ntabwo nakwizeza ko ikibazo kigiye gukemuka kuko haracyabura ibikoresho kuko ahenshi nta mashanyarazi ahari, ndetse n’umuyoboro wa interineti uboneka hakeya».

Umuyobozi wungirije ushinzwe imari n’iterambere ry’ubukungu mu karere ka Ngororero, Kanyange Christine, avuga ko akarere karimo gukoresha imbaraga mu kongera ibikorwa remezo bikiri bikeya.

bahawe telefone ariko ntibizeye kuzifashisha kubera kutagira amashanyarazi

Ati «turimo kuvugana n’ubuyobozi bw’ikigo gitanga serivisi z’amashanyarazi ndetse n’abacuruza itumanaho ngo twihutishe gukwirakwiza amashanyarazi na interineti, gusa igihe bizaba byarageze hose bitewe n’ubushobozi ndetse n’imiterere y’akarere kacu ».

Anavuga ko buri mwaka akarere gakora imihanda ijya mu cyaro byibura kuri kilometero ijana ku buryo ingendo zizoroshywa.

Mu ngo zirenga gato ibihumbi 80 zo mu karere ka Ngororero, ingo 14.400 nizo zifite umuriro w’amashanyarazi, mu gihe ari igikorwa remezo cy’ibanze mu kubona serivisi z’irembo.

Urugendo rugana ku rwibutso

Kesho ni umusozi ukikijwe n’indi misozi ibiri minini, ku rundi ruhande hakaba umugezi wa Giciye.

Abatutsi baharokoke bavuga ko bakunze guhungira kuri uwo musozi kuva mu mwaka w’1990.

Makuza Gerard ati "Aha twagize intambara zikomeye kuva mu 1990, ariko iyo twatotezwaga twazaga aha kuri aka gasozi tukirwanaho ku buryo ibitero byinshi byagendaga nta muntu byishe. Imiterere y’uyu musozi yaradufashaga cyane".

Ibi ngo byatumye interahamwe zihuruza abasirikare kuko zabonaga bazongera bakazinesha.

Havugimana Sammuel Songa avuga ko ngo abasirikare babeshywe ko kuri uwo musozi hariho inkotanyi zifite imbunda.

Ati "Uwitwa Ryaribu wari diregiteri w’uruganda rw ‘icyayi rwa Rubaya niwe wazanye abasirikare afatanyije n’izindi Nterahamwe hamwe na Bazubahande Ignace wari burugumesitiri wa komini Gaseke.

Baragiye babwira abasirikare ko kuri kano gasozi hariho inyenzi zihishe mu myobo zifite imbunda arizo zituma abaturage baneshwa ».

Abantu bagana ku rwibutso ahabereye umuhango wo gushyingura imibiri y’Abazize Jenoside yakorewe Abatutsi

Icyo gihe kandi, ngo kuba umurambo wa habyarimana wari wahungishirijwe muri urwo ruganda hamwe na guverinoma yari yariyise iyabatabazi, ngo byatumye abasirikare baba benshi ndetse n’urwango rw’abahutu ruriyongera.

Ikindi ngo cyatumye bamwe mu bahutu bahishaga abatutsi babireka, ngo ni urwango bigishijwe mu ijambo ryavuzwe na Leon Mugesera, abwira abahutu ko umwanzi wabo ari umututsi.

Kuri uyu wagatatu tariki 12 Mata 2017 naho hibutswe ku nshuro ya 23 Abatutsi 1417 biciwe ku gasozi ka Kesho.

Urwibutso rwa Jenoside ruri ku gasozi ka Kesho

Guverineri w’Intara y’Iburengerazuba alphonse Munyantwari yasabye abarokotse Jenoside yakorewe Abatutsi hamwe n’abaturanyi babo kubaka ubumwe no kwisubiza agaciro bari barambuwe.

Ati « ubu twaje guha agaciro abacu bakambuwe bakicwa muri Jenoside yakorewe abatutsi. Duhaguruke twihe agaciro natwe twanga icyadusubiza inyuma nk’uko perezida wa Repubulika ahora abidusaba ».

Guverineri Munyantwari kandi yasabye abazi ahaba hari imibiri itarashyingurwa mu cyubahiro gutanga amakuru nayo igashyingurwa.

Muri Ngororero, ikigage gihumanye cyahitanye babiri. Aba bari kuvurirwa kwa muganga

Tariki ya 27 Werurwe 2017, nibwo bamwe mu baturage bo mu Murenge wa Bwira bagiye mu bukwe maze banywa ikigage.

Nyuma yo kuva muri ubwo bukwe abagisomyeho bose batangiye kujya kwa muganga bafashwe n’impiswi. Kuri ubu babiri muri bo bamaze kwitaba Imana.

Ababarirwa muri 34 barimo kuvurirwa ku kigo nderabuzima cya Gashubi mu Murenge wa Bwira naho batandatu bajyanywe ku bitaro bya Muhororo.

Abaturanyi b’abo barwayi bavuga ko ikigage banyoye gishobora kuba cyarahumanijwe n’umuntu utazwi, nk’uko uwitwa Nyiramariba Mariya Goreti abisobanura.

Umuyobozi w’ikigo nderabuzima cya Gashubi cyakiriye abo barwayi, Beninka Leoncie avuga ko barimo kubitaho kandi ko abarembye bajyanywe ku bitaro ku buryo bafite icyizere ko bazakira vuba.

Avuga kandi ko barimo gushakisha icyaba cyarateye ubwo burwayi.

Agira ati “Twohereje ibizamini by’icyo kigage n’umusarane ku bitaro no kuri raboratwari nkuru y’Igihugu kugira ngo tumenye impamvu nyakuri yatumye aba bantu barwariye icyarimwe kandi mu gihe gito.”

Akomeza ahamagarira abaturage kwita ku isuku y’ibiribwa n’ibinyobwa byabo kuko n’umwanda ushobora kuba intandaro y’ubwo burwayi. Abapfuye bazize icyo kigage bamaze gushyingurwa.

Ishuri ry’Intwari ry’Inyange ryatangiye gusanwa

Iri shuri ryari risanzwe rifite ibyumba byo kwigiramo bidahagije kandi bishaje, ritanazitiye,ubu ryatangiye kuvugururwa no kwagurwa.

Ni nyuma y’ubusabe bw’umuyobozi waryo hamwe n’Akarere ka Ngororero, ku bufatanye n’urwego rw’Igihugu rushinzwe intwari z’Ihiguhu, impeta n’imidari by’ishimwe, hamwe na za minisiteri ebyiri, iy’umuco na siporo ndetse n’iy’uburezi.

Mu 2015, nibwo Minisitiri w’umuco na Siporo Uwacu Julienne yemeye ubuvugizi mu gusana iri shuri, umuyobozi w’aka karere avuga ko bifuza ko riba ikitegererezo.

Yagize ati « Iri shuri ribumbatiye amateka y’akarere kacu ndetse n’ayigihugu kuko hari n’abanyamahanga baza kureba no gusobanuza ibyahabereye mu 1997.
Twasabye ko ryakubakwa kuko inyubako zaryo zari nkeya kandi zigayitse none bigiye mu bikorwa ».

Amashuri ya kera y’Inyange

Akomeza avuga ko bifuza ko ryaba ikigo gifasha urubyiruko muri rusange gukurana umuco w’Ubutwari no gukunda igihugu, ariyo mpamvu bifuza ko inyubako zaryo ziba nziza kandi nyinshi.

Guverineri w’intara y’iburengerazuba Alphonse Munyantwari nawe ashima iki gikorwa, akavuga ko ari ngombwa kubera amateka habitse.

Ati « Aha hari igicumbi cy’intwari cyubatswe mu minsi ishize, byari bikwiye ko iri shuri naryo ritunganywa rikajya ku rwego rubereye amateka meza y’igihugu cyacu ».

Gusana iri shuri byatangiye muri Nzeli 2016, ubu imirimo ikaba igikomeje aho umuyobozi waryo Gapasi Uwamungu Leonard asaba ko yakwihutishwa kuko irimo gukorwa ibangikanye n’amasomo y’abanyeshuri.

Iri shuli niryo rya mbere ryashinzwe mu cyahoze ari komini Kivumu (perefegitura Kibuye), rishinzwe n’ababyeyi mu 1988, aho ryari rifite ibyumba 8.

Ubu hifuzwa ko ishuri ryagurwa, rikagira ibyumba bigera kuri 20 harimo n’icyumba kizabikwamo amateka y’intwari z’i Nyange.

Igice cya mbere kigizwe n’imirimo yo kurisana kizatwara Miliyoni 250 z’amafaranga y’u Rwanda, bikaba biteganijwe ko icyiciro cya mbere cyo gusana kizarangira muri Werurwe 2017, nyuma hakurikireho igice cyo kwagura inyubako.

Ahashyinguwe intwari z’Imena

Inzu zahawe abatishoboye babaga mu manegeka muri Ngororero, buri nzu ifite agaciro ka Miliyoni 5RWf

Izo nzu 11 zubatswe ku bufatanye bwa Minisiteri yo kurwanya ibiza no gucyura impunzi (MIDIMAR), Ishami ry’umuryango w’abibumbye ryita ku miturire (UN Habitat) n’Akarere ka Ngororero, zatashywe mu mpera z’icyumweru gishize.

Buri nzu ifite agaciro ka Miliyoni 5RWf. Ifite ibyumba bine, igikoni, ubwiherero hakiyongeraho televiziyo na radiyo.

Sekabanza Francois, umwe mubahawe inzu n’ibyishimo bigaragara ku maso, amwenyura agira ati “Nabaho nibwo nakandagira mu nzu nziza noneho ikaba ari n’iyanjye. Nzayifata neza ku buryo nzanayisigira abanjye imeze neza.”

Izo nzu uko ari 11 zubatse mu Mudugudu wa Kimiramba, Akagari ka Nyenyeri, Umurenge wa Kabaya.

Izo nzu zahawe ababaga mu manegeka muri Ngororero zirimo Tereviziyo na Radiyo

Umuyobozi w’Akarere ka Ngororero, Ndayambaje Godefroid avuga ko imiryango 11 yahawe izo nzu ari iyatoranyijwe yari ibabaye kurusha iyindi.

Agira ati “Ntabwo abayakeneye bose bayabonye ariko hari abari babaje kurusha abandi nibo twahereyeho.”

Uhagaririye Umuryango w’abibimbye mu Rwanda, Lamin Mane avuga ko batazahwema gukora ibikorwa biteza imbere Abanyarwanda.

Agira ati “UN ishimishijwe no gukorana n’umuntu nka Perezida wanyu ushyira imibereho myiza y’abaturage imbere y’ibindi, kandi ntituzahwema gushyigikira ibikorwa bituma Abanyarwanda barushaho kubaho neza.”

Avuga ko uretse izo nzu 11 zubakiwe abaturage bavuye mu manegeka mu Murenge wa Kabaya, hari n’izindi 10 zizubakwa mu Murenge wa Sovu nazo ziri kuri urwo rwego.

Buri nzu ifite ibyumba bine

Mukantabana Seraphine, Minisitiri wa MIDIMAR avuga ko ibyo bikorwa byose bituma Abanyarwanda batura heza babikesha imiyoborere myiza.

Agira ati “Ibi byose bituma mutura neza kandi heza tubikesha imiyoborere myiza. Leta izakomeza gufasha abatishoboye kunoza imiturire kuko ari inshingano zacu kandi zishyigikiwe n’Umuyobozi mukuru w’igihugu.”

Uretse kubaka ngo hari n’amabati azahabwa imiryango 250 mu Karere ka Ngororero mu kuyifasha kuva mu manegeka.

Izo nzu zubatse zegeranye mu buryo by’umudugudu

Ingabo z’igihugu zisanzwe zikora ibikorwa byo kuvura abaturage batishoboye. (Photo internet)

Muri iki gikorwa kimara icyumweru cyose, ingabo zizaba zivura abarokotse Jenoside yakorewe Abatutsi mu 1994 bafite uburwayi bunyuranye.

Kuri ibi bitaro bya Kabaya, hazavurirwa abarwayi bagera kuri 909.

Abaturage bategereje ari kwivuza ari benshi.

Iyi nkuru turacyayibakurikiranira.

Kuba barahezwaga mu mashuri ni kimwe mubyabadindije

Mu matora y’abakuru b’imidugudu 419 igize aka karere yabaye mu muri Gashyantare 2016, abagore 29 gusa bangana na 7% nibo baje mu bayobozi b’imidugudu.

Mu tugari 73 tugize aka karere, abagore ni 20 bahwanye na 27% nibo banyamabanga nshingwabikorwa, naho muri ba perezida b’inama njyanama z’imirenge 13, harimo 4 bangana na 30%.

Ibi nibyo bituma hari abavuga ko abagore bakitinya n’ubwo bo bagaragaza izindi mpamvu.

Yamfashije fortunée yagize ati « njyewe mbona kuba tutarize neza kubera umuco wahezaga abagore nibyo byatumye dutinda kugira imyumvire yo kuba abayobozi ».

Mbabajende Josianne we avuga ko no kwitinya bikiriho kuko abagore bamwe cyane cyane abo mu cyaro bumva ko ubuyobozi ari ubw’abagabo.

Ati « abagore twakunze kwibera mu icuraburindi ryo gutinya abagabo tukumva tutahangana nabo, ariko bigenda bihinduka abagore bagatinyuka ».

Abatinyutse kujya mu nzego z’ubuyobozi barasaba bagenzi babo kutitinya

Akomeza avuga ko ubu icyo abagore bashyize imbere ari ukwita ku burere n’uburezi bw’abakobwa ku buryo bazaba abayobozi beza.

Mukanyandwi Bellancile, umunyapolitiki wo mu Ishyaka ry’Ubwisungane n’Iterambere (PSP) avuga ko abagore bakwiye gutinyuka kuko bahawe uburenganzira bwabo.

Ati « umugore yahawe ijambo, umugore afite ubushobozi ubu noneho atanga ibitekerezo bikumvikana, nibatinyuke kandi bahere mu nzego zo hasi bahe abana b’abakobwa urugero ».

Umuyobozi w’Akarere ka Ngororero Ndayambaje Godfrois, we avuga ko imyanya myinshi y’akazi inyuzwa mu ipiganwa, bityo ko kuhasanga abagore bacyeya atakwemeza niba bifitanye isano no kwitinya.

Gusa asaba abagore muri rusange kugira umuhate wo gupiganwa, ndetse no guhangana mu matora kugira ngo bakomeze kuzamura umubare wabo mu buyobozi no kubyaza amahirwe agaciro leta yabahaye.

Imibare rusange igaragaza ko mu buyobozi bw’ibanze abagore ari 10% mu Karere ka Ngororero.

Abadamu ntibemera ko bakorera abagabo ihohotera

Muri aka karere hakunze kuvugwa abagore bahangayikisha abagabo, babakubita bakanabangisha abana babyaranye, ndetse ngo abagabo bamwe bakanahunga ingo zabo.

Bamwe ntibemera ko ibyo bihari ariko n’ababyemera bitana bamwana kuri nyirabayazana w’amakimbirane hagati y’abagore n’abagabo babanye batyo.

Rubari Vincent, umusaza ufite imyaka 76 avuga ko ari abagore bitwaza uburinganire maze bagahangayikisha abagabo.

Yagize ati « ivanjiri yo kumenesha abagabo yadukanywe n’abagore bavuga ngo ni uburinganire, maze batuma abana banga ba se, abandi bakabatesha imitungo kugeza naho bamwe barogwa».

Yamfashije Forotonata we avuga ko ahanini abagabo aribo nyirabayazana b’amakimbirane kuko nta mugore wakwanduranya ku mugabo we.

Ati « Nta mugore utubaha umugabo we, ariko umugabo araza akagukubita wakwitabara ukamurusha imbaraga bakavuga ngo ni umugore wahohoteye umugabo».

N’ubwo hari abagore bemera ko hari bagenzi babo bafata abagabo nabi kugeza n’aho babakubita abenshi bavuga ko ibyo bakora byose baba birwanaho.

Mukandengeye Kirisitina wo mu Murenge wa Matyazo avuga ko yarambiwe guhora agira inama abagore n’abagabo barwana kuko batamwumva.
Agira ati « nararambiwe ndababwira ntibumva. Ndabareba nkabihorera baba bica abagabo babo uwanjye musigaranye ni akazi kabo ».

Kampire Christine, perezidante w ‘inama y’Igihugu y’abagore mu karere ka Ngororero, na Kuradusenge janvier umuyobozi w’akarere wungirije ushinzwe imibereho myiza, bemeza ko hari koko abagore bitwaza uburinganire bagahohotera abagabo.

Ariko kandi bakanavuga ko ahanini aya makimbirane mu miryango, aterwa n’ubusinzi, na bamwe mu bagabo baba bashaka kwikubira imitungo y’urugo.

Ubuyobozi buvuga ko bugiye gushyira imbaraga mu mugoroba w’ababyeyi, imiryango ibanye neza ikajya ifasha ibanye nabi, mu mugoroba w’ababyeyi ikabagira inama.

Abatewe inda (bamwe muri aba bana) barasabwa kudahishira abazibateye.

Ubuyobozi bw’Akarere ka Ngororero buhangayikishijwe n’ababyarira mu rugo bakiri bato bityo bikaba umuzigo ku miryango no ku gihugu. Buvuga ko akenshi biba ku bakobwa bakomoka mu miryango ikennye.

Ibi ngo bibaviramo guhabwa ko akato mu gihe abazibateye nta bibazo bafite, kuko akenshi abakobwa batabashyira ahagaragara ngo babafashe kubarera cyangwa nibatabikora babihanirwe.

Bamwe mu bafatiwe mu bikorwa by’uburaya mu ngororero harimo n’abana bato.

SSP Gasangwa Marc, uhagarariye polisi mu Karere ka Ngororero avuga ko abo bakobwa babaye ababyeyi imburagihe, kuko badashobora kwiyishyurira ubwisungane mu kwivuza cyangwa kurihira abana babo amashuli.

Avuga ko ibyo bitera bamwe gukomeza kwishora mu ngeso mbi bakoresha ibiyobyabwenge bakanishora mu buraya mu buryo buhoraho.

Kuri ibyo hiyongeraho kwandura virusi itera SIDA, nk’uko Uwiringiyimana Rose wicuruza ufite imyaka 17 gusa ahamya ko kubona mugenzi wabo udafite virusi itera SIDA muri aka karere ari tombora.

SSP Gasangwa asaba abaturage guca ubusambanyi no gutanga amakuru ku batera inda abana bato.

Mu myaka ya 2015 na 2016, mu Mujyi wa Ngororero havuzwe ubwiyongere bukabije kw’abana b’abakobwa baza kwicuruza cyangwa bagacuruzwa n’abantu bakuru, abenshi bagahita batwara n’inda.

Inama y’igihugu y’abagore, sosiyete civile, inzego z’ubuyobozi kimwe n’abafatanyabikorwa bashyizeho ubukangurambaga budasanzwe ku bangavu, babakangurira kwirinda ingeso mbi zibakururira imiruho mu buzima kandi bagashyira ahagaragara ababatera inda.

Ku rundi ruhande ariko, ababyeyi bavuga ko abana b’abakobwa aribo bikururira ibyo bibazo. Emmanuel Rwakarengwa, agira ati “ntibakitwaze ubukene ahubwo ni ubujiji hamwe n’irari ry’ibintu birukira ugasanga baratunaniye tukabura uko tugira.”

Nta mubare nyawo w’abangavu babyariye mu rugo turabona, ariko hari imirenge nka Gatumba habaruwemo abagera kuri 300.

Abenshi muri bo bemeza ko bashukwa n’abasore bakuru n’abagabo bubatse. Ikindi ngo baba bashaka imibereho kuko bavuka mu miryango ikennye cyangwa se ifite amakimbirane.

Barasaba kwishyurwa ngo babone uko bohereza abana ku ishuri

Abo baturage bahamya ko bafitiwe umwenda w’amezi abiri abandi atatu bitewe n’igihe bamaze bakora. Nyamara ngo mu masezerano bafitanye n’umukoresha wabo yo yerekana ko bagombaga kujya bahembwa buri byumweru bibiri.

Bose uko ari 420, bakora umuhanda no mu materasi y’indinganire. Amafaranga batarishyurwa abarirwa muri miliyoni 8RWf.

Iyakaremye Adela avuga ko bamurimo ibihumbi 40RWf. Ahamya ko kuba atarahembwa byamuteye ubukene, bituma atohereza abana be ku ishuri.

Agira ati "Nta handi nkura amafaranga kandi mfite abana ngomba kugurira ibikoresho by’ishuri ubu bicaye mu rugo".

Si we gusa ufite icyo kibazo kuko na bagenzi be batandukanye bavuga ko abana babo bakiri mu rugo kuko batajya ku ishuri batujuje ibisabwa.

Aba bakozi biganjemo abagore bavuga ko uku kutishyurwa binabateza inzara mu miryango yabo kuko bakora muri VUP buri munsi ; nkuko Mukeshimana Beatrice abisobanura.

Agira ati "Uretse n’abana tutohereje kwiga, n’aho bari mu rugo barashonje kuko aho twagakuye icyo kurya batatwishyura".

Umunyamabanga nshingwabikorwa w’umurenge wa Matyazo, Habiyakare Etienne yemera ko habaye gukererwa kwishyura abo bakozi.

Agira ati "Koko abaje mbere twabishyuye igice kimwe ariko abaje nyuma ntibarishyurwa na rimwe.

Twakoze urutonde turwohereza muri SACCO ariko bitinzwa nuko ubu iyo koperative iri mu igenzura (control) riisoza umwaka (2016) tukaba tugitegereje ko babikora abaturage bagahembwa".

Aba baturage bavuga ko bamaze amezi abiri badahembwa none bikaba byarateye ubukene mu miryango yabo

Umuyobozi w’Akarere ka Ngororero, Ndayambaje Godfrois we avuga ko niba hari abakozi batarahembwa ari amakosa y’ababishinzwe kuko amafaranga ya VUP ahari.

Agira ati « Amafaranga arahari ndetse twanayagejeje mu makoperative (SACCOs) bahemberwamo, ubwo amakosa ni ay’ababishinzwe ».

Uretse uku gukererwa kwishyurwa, abo bakozi banavuga ko amafaranga 1000RWf bahabwa kuva saa moya za mu gitondo kugera saa cyenda z’umugoroba ari make cyane. Bifuza ko yongerwa.

Ariko ubuyobozi bwo bubabwira ko badafite ubushobozi bwo kongera ayo mafaranga kuko agenwa ku rwego rw’igihugu.

Abana 60 baracyafite imirire mibi ikabije

Nk’uko imibare yatangajwe n’urwego rw’ubuzima muri aka karere ibigaragaza, haracyari abana bagwingira kubera imirire mibi, muri aba 572, 60 bafite imirire mibi ikabije.

Mukagasana Odette, ushinzwe imirire mu kigo nderabuzima cya Rususa, avuga ko ku kigo cyabo imirire mibi yagabanutse ariko ababyeyi bagenda biguruntege mu kurandura izi ndwara.

Yagize ati « Nka hano mfite abana 35 barwaye harimo 5 bafite imirire mibi ikabije.
Amata turayabaha buri munsi kandi tukanigisha ababyeyi uko bategurira abana amafunguro. ariko bamwe baragenda ntibabikore uko bikwiye ».

Ibi anabihurizaho na Yankurije Petronille, umujyanama w’ubuzima uvuga ko bisaba guhoza ijisho mu ngo zirwaza izo ndwara, kuko akenshi ababyeyi batabifata nk’ibyabo.

Umuyobozi w’akarere wungirije ushinzwe imiberehomyiza y’abaturage Kuradusenge Janvier avuga ko bageze kure mu kurwanya imirire mibi ugereranyije no mu myaka ishize, ariko abaturage bamwe batabyitaho bakaba inzitizi.

Ati « Ubundi tubigeze kure kuko mu myaka 3 ishize twari ku mwanya wa kabiri mu gihugu mu kurwaza bwaki.

Ubu ikibazo dusigaranye ni ikirebana n’imyumvire y’ababyeyi bacyumva ko abaganga n’abajyanama b’ubuzima aribo bonyine bazahangana n’iki kibazo ».

Kuradusenge akomeza avuga ko hashyizweho gahunda y’igikoni cy’umudugudu ariko bamwe ntibabikurikiza mungo zabo

Ati « Amata aratangwa haba ku mashuri no ku bana bagaragaza imirire mibi.

Ndetse girinka yabagejejweho banigishwa guhinga imboga, ariko mbabazwa no kubona hari benshi bafata amata n’undi musaruro byakabafashije guhangana na bwaki bakabyijyanira mu masoko bikaribwa n’abasanzwe bifashije ».

Imibare iherutse kugaragazwa n’umushinga SUN wita ku mirire, igaragaza ko mu karere ka Ngororero kugwingira bikiri ku gipimo cya 39% .

Iyi mbangukiragutabara imaze imyaka irindwi iparitse ku kigo nderabuzima cya Rususa kuko yananiwe gukora mu mihanda yaho

Ubuyobozi bw’icyo kigo nderabuzima buvuga ko iyo mbangukiragutabara bayihawe na Diyosezi Gatolika ya Nyundo mu mwaka wa 2010.

Icyo kigo nderabuzima giherereye mu cyaro, ahantu hari imihanda y’ibitaka kandi hari imisozi.

Sœur Mukansanga Solina, uyobora ikigo nderabuzima cya Rususa avuga ko yatangiye kukiyobora muri 2012.

Yasanze uwo yasimbuye yarandikiye Minisiteri y’Ubuzima (MINISANTE),ayisaba ko yabahindurira ikabaha indi mbangukiragutabara kuko iyo bahawe ari ngufi cyane kuburyo idashoboye kugenda mu mihanda y’ibitaka yaho.

Agira ati "Nageze aha nsanga umuyobozi wambanjirije yarandikiye Minisiteri y’ubuzima ababwira iki kibazo, nanjye nanditse inshuro ebyiri nsaba ko baduhindurira iyi modoka ariko amaso yaheze mu kirere."

Akomeza avuga ko kubera uburyo iyo mbangukira gutabara bahawe ari ngufi bituma idashobora gutwara abarwayi bayikene. Kuva bayihabwa iraparitse nta kindi ikoreshwa kuburyo yatangiye no kwangirika.

Sœur Mukansanga avuga ko iyo abarwayi bakeneye imbangukiragutabara bagomba gutegereza ituruka ku bitaro bya Muhororo.

Bandikiye MINISANTE bayisaba kubahindurira Imbangukiragutabara kuko iyi bahawe ikora hasi bigatuma idashobora kugenda mu mihanda y’ibitaka

Uwamurera Josiane, wivuriza ku kigo nderabuzima cya Rususa avuga ko abafite amikoro bagomba gukodesha imodoka zisanzwe iyo bashaka kugera kwa muganga badatinze.

Agira ati "Yewe nanjye byambayeho batinda kuza kumfata mu rugo ndi kunda. Byatumye umugabo wanjye yiyambaza inshuti bakodesha indi modoka."

Ubu buryo bwo kwishakira imodoka ngo ntibwizewe kuko umurwayi agenda nta muganga umuherekeje.

Ubwo abadepite basuraga iki kigo nderabuzima mu mwaka wa 2014, bari bemeye gukora ubuvugizi kuri iki kibazo ariko ntikirakemuka.

Umuyobozi wungirije w’Akarere ka Ngororero ushinzwe imibereho myiza y’abaturage, Kuradusenge Janvier avuga ko bavuganye na MINISANTE ikemera kubaha indi modoka ubu bakaba bategereje.

Agira ati "Umunyamabanga uhoraho muri MINISANTE yatwemereye ko bazaduhindurira iyi modoka, ubu dutegereje ko izaza."

Iyo mbangukiragutabara yatangiye kwangirika

Umunyamabanga uhoraho muri MINISANTE, Nyemazi Jean Pierre avuga ko iki kibazo bakizi ndetse ko hari imbangukiragutabara iyi minisiteri yatumije ku buryo nizibageraho bazahita bagikemura.

Ubwo yatangarizaga Kigali Today ayo makuru ariko nta gihe ntarengwa yavuze izo mbangukiragutabara zizaziraho.

Abayobozi b’ibigo by’amashuri baburiwe ko umwanda ushobora kubirukanisha

Abo bayobozi babibwiwe mu nama itegura itangira ry’umwaka w’amashuri yabaye tariki ya 17 Mutarama 2017.

Umuyobozi wungirije w’Akarere ka Karongi, ufite uburezi mu nshingano ze, Kuradusenge Janvier yihanangirije abo bayobozi b’ibigo ababwira ko nta kibazo cy’umwanda na kimwe bashaka kumva mu bigo by’amashuri cyane cyane muri izi ntangiro z’umwaka.

Agira ati "Ndabamenyesha ko ahazagaragara umwanda ubwo abanyeshuri bazaba baje bizakora ku bayobozi b’ayo mashuli, ku buryo bashobora no kwirukanwa bagasimbuzwa abashoboye gukora".

Akomeza avuga ko ibi ari ukwibutsa abayobozi b’amashuli kuko bari barabibwiwe mu itorero baherutsemo.

Ati "Kwari ukubibutsa ariko no kubabwira ko nta mikino irimo kugira ngo babihe agaciro kabyo".

Mubyo amashuli asabwa gukora byihuse harimo gusenya ubwiherero bushaje no kubaka ubundi, gusukura ibikoni, gusiga amarangi ku nkuta no gutera imiti yica udukoko mu mazu abanyeshuri bararamo.

Kuba iyi mirimo ije hasigaye iminsi mike ngo abanyeshuri bagere ku bigo byabo, bamwe mu bayobozi b’ibigo by’amashuli basanga ntacyo bibahungabanyaho.

Tegereza Justin, umuyobozi wa College ADEC Ruhanga avuga ko n’ubundi gusana inyubako z’amashuli bisanzwe mu nshingano zabo.

Ati "Haramutse hari ufite inyubako ikeneye gusanwa byihutirwa akaba atarabikoze yaba yararangaye kuko duhabwa ingengo y’imari yo gukora bene iyo mirimo yoroheje. Twiteguye rero gukora ibyo dusabwa kuko turi intore".

Mugenzi we Butera J Claude uyobora TTC Muramba avuga ko hari imbogamizi zigihari, nko kutagira amazi ku bigo bimwe na bimwe ndetse ahandi ibigo bikaba bigorwa no kubona ibibanza byakubakamo ubwiherero.

Mu karere ka Ngororero hari amashuli abanza 99, ayisumbuye 34, naho acumbikira abanyeshuri ni 14.

Kuri ubu abaturage ba Ngororero bamwe bari guhabwa inzitiramibu nazo ariko ngo ntizihagije

Abaturage batangaza ibi mu gihe muri ako karere kose abaturage barara mu nzitiramibu, babarirwa muri 46% gusa.

Nyiringondo Augustin, umwe mu baturage ba Ngororero avuga ko amaze ibyumweru bitatu arwaje umugore we Malaria.

Agira ati "Ubu maze ibyumweru bitatu umugore wanjye arwaye Malaria kuko nta nzitiramibu turyamamo."

Akomeza ahamya ko mbere inzitiramibu yari afite zitarasaza umuryango we utajyaga wibasirwa na Malaria.

Ubuyobozi bw’Akarere ka Ngororero nabwo bwerekana ko kubura inzitiramibu ari ikibazo gikomereye benshi mu batuye ako karere ; nkuko Birorimana Jean Paul ushinzwe igenamigambi muri ako karere abihamya.

Agira ati « Murabona ko abatageze kuri ½ mu karere kacu aribo bonyine baryama mu nzitiramibu, kandi nibwo buryo dufite bwo kwirinda Malaria mu karere kacu ».

Akomeza ahamagarira abafatanyabikorwa b’Akarere ka Ngororero mu by’ubuzima ko ababishaka banafasha abaturage mu birebana no kurwanya.

Mu myaka ishize ibipimo by’abafite inzitiramibu muri aka karere byaramanutse kuko mu mwakwa wa 2012, abari bazifite babarirwaga muri 80%.

Ibi ngo byatumye imibare y’abarwara Malaria ikomeza kwiyongera, aho mu mwaka wa 2016 yari imaze kwikuba gatatu ugereranyije no muri 2012.

Gusa ariko mu rwego rwo guhanga n’icyo kibazo kuri ubu mu karere ka Ngororero abaturage bari guhabwa inzitiramibu.

Nubwo bari kuzitanga ariko ngo nta cyizere ko zizagera kuri bose ; nkuko umwe mu bajyanama w’ubuzima uri mu gikorwa cyo gutanga inzitiramibu abitangaza.

Agira ati "Zatubanye nkeya ku buryo izo urugo rukeneye tuzigabanya kabiri kugira ngo byibura ingo zose zisaranganye."

Ibi bisobanuye ko n’ingo zahawe inzitiramibu muri iki cyiciro atari ko abazigize bose baziraramo kuko bahabwa nkeya.

Umuyobozi w’Akarere ka Ngororero wungirije ushinzwe imibereho myiza y’abaturage, Kuradusenge Janvier avuga ko icyo cyiciro cyo gutanga inzitiramibu kizasiga abagera kuri 60% aribo baryama mu nzitiramibu.

Avuga ariko ko basabye Minisiteri y’Ubuzima (MINISANTE) ko yabaha izindi nzitiramibu, kuko bafite imibare igaragaza ko Malaria yiyongereye muri Ngororero bakaba bategereje igisubizo.

Gutinda kurangiza imanza bihombya leta

Umuhuzabikorwa wa AJIC muri aka karere Habineza Norbert yagaragarije ubuyobozi bw’akarere n’inzego zitandukanye zirimo n’abafite kurangiza imanza mu nshingano ko kutarangiriza imanza ku gihe muri aka karere byateje igihombo.

Yagize ati « leta ihomba amafaranga menshi kubera abahesha b’inkiko batarangiriza imanza ku gihe. Ntihagaragara impamvu zitarangizwa ariko akenshi bavuga ko ari umwe mu baburanyi wanze ko urubanza rurangizwa ».

Imibare igaragazwa n’uyu muryango yerekana ko mu mwaka wa 2016, inkiko z’ibanze za Kabaya na Gatumba zibarizwa muri aka karere zaciye imaza 358 z’imbonezamubano hamwe n’imanza nshinjabyaha 353.

Avuga ko mu rukiko rw’ibanze rwa Kabaya gusa, imanza nshinjabyaha zitarangirijwe igihe zahombeje Leta amafaranga (amande cyangwa izahabu) angana na miliyoni 12.448.555frw, na miliyoni 8.825.000frw z’amagarama y’urubanza.

Kuba imibare y’imanza zaciwe muri izi nkiko zombi ijya kungana, bituma bemeza ko leta yahahombeye atari munsi ya miliyoni 40RWf.

Bigirimana Jean Paul, Perezida w’urukiko rw’ibanze rwa Kabaya avuga ko akazi k’urukiko kaba karangiriye mu guca urubanza ariko abahesha b’inkiko bagatinda kubishyira mu bikorwa.

Ati « imanza ziba zamaze gucibwa twanatanze imyanzuro. Abahesha b’inkiko nibo bagombye kureba ikibura ngo imanza zirangizwe ku gihe ».

Uretse guhombya Leta, uku kutarangiza imanza ku gihe binahombya abaturage (ababuranyi) kuko bamara igihe basiragira banatanga amafaranga ku manza zagombye kuba zararangiye.

Umuyobozi w’akarere ka Ngororero Ndayambaje Godfrois avuga ko kuba hari abatsindwa bakigomeka ku myanzuro y’urubanza atari impamvu ikwiye gutuma imanza zitinzwa bene ako kageni.

Yemeza ko bagiye gukorana n’inzego zose zibishinzwe kugira ngo imanza zirangizwe uko bikwiye kandi mu gihe nyacyo.

Urwibutso rurimo kubakwa.

Hari hashize imyaka 22 abarokotse Jenoside yakorewe Abatutsi bo muri ako gace batishimiye uburyo imibiri y’ababo yari ishyinguwemo n’abakilisitu gaturika bababajwe no kuba basengera hanze, nk’uko umwe mu baharokokeye Rwamasirabo Aloys abivuga.

Agira ati “Kuba tugiye kubona urwibutso rutunganye rwo kubika imibiri y’abacu, bizadufasha kwiyubaka. Abaturage bose bagira uruhare mu mirimo irukorwaho ndetse no kubungabunga imibiri y’abishwe aho yabaye yimuriwe.”

Kiliziya ya nyange irimo kubakwa.

Avuga ko kuba na kiliziya yahiritswe ku Batutsi mu 1994 irimo kubakwa hirya y’urwibutso, nabyo ari igisubizo ku bayisengeramo barimo n’abarokotse jenoside.

Ati “Mbere byavugwaga ko diyosezi yashakaga ko bubaka inzu nini irimo urwibutso na kiliziya. Byaratubabazaga ariko kuba kiliziya yubakwa hirya y’urwibutso ni byiza kuko ari amateka ya kano gace, ndetse abakilisitu bakaba bari bayikeneye.”

Aho abakirisitu gaturika basengeraga.

Bimenyimana Seth nawe utuye muri aka gace, avuga ko kuba bagira uruhare mu kubaka izo nyubako zombi, ari ikimenyetso cy’uko bazanabibungabunga.

Ati “Ari urwibutso, ari na kiliziya hose turitanga ngo bigende neza, kugira ngo twubake amateka meza tunakomeze umubano. Ubu nta muntu twakwemerera kwangiza ibyo dukora.”

Umuyobozi w’akarere wungirije ushinzwe imibereho myiza y’abaturage muri Ngororero Kuradusenge Janvier, avuga ko ari abahigwaga n’abatarahigwaga muri Jenoside bose bagira uruhare mu gutuma izi nyubako zihuta.

Abayobozi basura urwibutso na kiliziya birimo kubakwa.

Ati “Iyo urebye ukuntu bitanga ku mpande zombi usanga ari ibintu bishimishije. Biduha ikizere ko koko ngororero yateye imbere mu bumwe n’ubwiyunge. Tuzabafasha kubigeraho kandi no kwita ku nyubako bagiramo uruhare.”

Urwibutso rwa Jenoside rurimo kubakwa ruzatwara miliyoni 500Frw, nk’uko bitangazwa n’ubuyobozi bw’akarere. Naho kiliziya izatwara miliyoni 300Fw, nk’uko bitangazwa na padiri mukuru wa Paruwasi ya Nyange, Tuyishimire J Baptiste.

Gukoresha interineti ngo bizaca gutekinika kw’abakozi b’akarere.

Birorimana Jean Paul, Umukozi w’Akarere ushinzwe igenamigambi, avuga ko hari abakozi batanga raporo zidahuje n’ukuri, izindi zigatinda kugezwa ku nzego zibishinzwe,ariko akemeza ko byose bizarangirana n’uko internet ishyizwe mu mirenge yose

Agira ati “Hari abakozi badatangira raporo ku gihe bitwaje uburyo butaborohera kuzohereza. Hari n’abazitekinika bamwe bikagaragara ariko kubibasubiza nabyo bigafata igihe, interineti izakemura iki kizabazo.”

Ba gitifu b’utugari bavugwaho gutekinika nta buryo bwo gukoresha interineti basanganywe.

Ndayambaje Godfrois, Umuyobozi w’Akarerere avuga ko abayobozi bagize uruhare mu gutuma akarere kabo gasubira inyuma mu mihigo iheruka, aho kavuye ku mwanya wa gatatu (3) kakagera ku mwanya wa cumi na kane (14).

Ati “Amakosa yaragaragaye kandi twese twabigizemo uruhare cyane cyane abayobozi n’abakozi b’akarere. Dukwiye kwisubiraho buri wese akamenya icyo akosora amazi atararenga inkombe.”

Nawe yemeza ko gukoresha ikoranabuhanga ari kimwe mu bizafasha mu kwihutisha imirimo no gutahura abagitekinika. Avuga ko amakosa agomba gukosorwa kandi umuturage akagira uruhare rukomeye mu mihigo kuko niwe mugenerwabikorwa w’ibanze.

Umuyobozi wa police muri aka karere SSP Gasangwa Marc, avuga ko abaturage bitangiraga ubuhamya bakagaragaza ibihabanye n’ibyo bamwe mu bayobozi b’inzego zibegereye bavuga mu maraporo.

Ibyo byose nibyo bituma ngo mu mezi asigaye y’iyi ngengo y’imari bazihatira gukwirakwiza interineti mu mirenge hifashishishijwe ingengo y’imari y’uyu mwaka nkuko umuyobozi w’akarere abivuga, akanahamagarira abafatanyabikorwa b’akarere kubibafashamo.
Abatungwa agatoki kuba abakora raporo zidahuje n’ukuri harimo n’abanyamabanga nshingwabikorwa b’utugari.

Aba bamaze igihe basaba ko bahabwa imiyoboro ya interineti ndetse bamwe ngo mudasobwa bahawe ntizikora abandi barazambuwe zishyirwa mu yandi ma serivisi.

Ubusanzwe Umurenge wa Ngororero, Nyange na Kabaya niyo isanzwe ifite serivisi za interineti zitangwa n’akarere.

Minisitiri w’Intebe ubwo yasuraga bamwe mu bafashijwe na gahunda ya NEP-Kora Wigire bamurikaga ibyo bakora

Byatangajwe mu muhango wo guha inyemezabumenyi abantu 2000 bahuguwe muri gahunda ya NEP-Kora Wigire no guhemba ibyiciro bitandukanye by’abantu bagize uruhare mu iterambere ry’iyo gahunda.

Gasana Jerome, umuyobozi w’ikigo cy’igihugu gishinzwe guteza imbere ubumenyingiro (WDA), avuga ko mu myaka ibiri ishize gahunda ya NEP-Kora Wigire itangiye, abantu bakabakaba ibihumbi 26 bamaze gufashwa mu buryo butandukanye.

Akomeza avuga ko kandi ibyo byatumye abarenga ibihumbi 80 babona imirimo mishya.

NEP-Kora Wigire yahaye imirimo abarenga ibihumbi 80 kuva muri 2014

Minisitiri w’Intebe w’u Rwanda, Anastase Murekezi witabiriye uwo muhango yakanguriye abari aho gukomeza guteza imbere urwego rwo kwihangira umurimo kugira ngo ababona imirimo mishya bakomeze kwiyongera.

Agira ati "Umurimo w’abatuye igihugu ni ubudahangarwa bwacyo. Tubatumye gutanga imbaraga zanyu mu kuzamura ubwinshi bw’imirimo mishya idashingiye ku buhinzi, nk’imwe mu ntego za guverinoma."

Akomeza avuga ko Abanyarwanda miliyoni 5.5 kuri miliyoni 12 zituye u Rwanda, bari mu cyiciro cyo gukora akazi gatanga inyungu ariko leta ngo ifite ubushobozi bwo kubonera akazi 3% byabo gusa.

Yungamo avuga ko guhanga imirimo mishya bizafasha mu kurwanya ubushomeri ngo bwiyongeraho 14% buri mwaka.

Minisitiri w’Intebe avuga ko guverinoma yihaye intego yo guhanga imirimo mishya ibihumbi 200 buri mwaka.

Ariko ngo kugeza ubu haboneka imirimo ibihumbi 146. NEP-Kora ngo niyo izaba igisubizo mu kugera ntego guverinoma yihaye.

Bisangwa Bruno, umwe mu baturage bafashijwe na NEP-Kora Wigire avuga ko we na bagenzi be ari inzererezi ariko bakaza gufashwa ubu bakaba bafite koperative y’ubudozi imaze kwiteza imbere.

Agira ati "Njye nahoze ndi mayibobo, NEP inkura mu muhanda banyigisha ubudozi. Ubu njye na bagenzi banjye batanu twabaye abagabo kandi mu gihe gito, ku buryo dutegereje ibyiza byinshi biri imbere."

Abagize uruhare mu iterambere rya NEP-Kora Wigire bahawe ibihembo

Minisitiri w’abakozi ba Leta n’Umurimo, Uwizeye Judith avuga ko hakurikijwe umuvuduko Abanyarwanda bariho mu gihe gito bazashobora gutungwa n’ibyo bakora badategereje ibiva ahandi.

Muri uwo muhango abahawe inyemezabumenyi bahuguwe mu birebana n’ububaji, gukora za biyogazi, ubudozi, ubwubatsi n’itsinda rya ba gafotozi 76 b’umwuga n’abatekinisiye ba radiyo 31 bahuguwe na Kigali Today Ltd ku bufatanye na WDA.

Muri uwo muhango kandi hanahembwe ibyiciro bitandukanye harimo abagize uruhare mu gufasha abantu kubona imirimo, uturere dutatu twahize utundi mu kwitabira iyo gahunda ya NEP-Kora Wigire.

Harimo kandi ibigo by’imari bifasha ababigana muri Kora Wigire, abahanze udushya, ibigo bitanga ubumenyi ngiro, hamwe n’abakoze ibikorwa by’indashyikirwa.

Andi mafoto yo muri uwo muhango

Abafashijwe na NEP-Kora Wigire bihangira imirimo itandukanye irimo gukora ibikoresha bitwarwamo ibintu

Minisitiri w’Intebe yasuye abantu batandukanye bafashijwe na NEP-Kora Wigire bamurikaga ibyo bakora

Abanyeshuri biga muzika ku Nyundo basusurukije abitabiriye uwo muhango

Abitabiriye uwo muhango bacinye akadiho

Abayobozi batandukanye n’abahawe ibihembo bafata ifoto y’urwibutso

Abantu batandukanye barimo abana bazaga kureba amafoto yafotowe n’abahuguwe na Kigali Today Ltd

Iyi foto nayo yafotowe n’umwe mu bahuguwe na Kigali Today Ltd

Aba biherega abaso amafoto meza yafotowe n’abahuguwe na Kigali Today Ltd

Yakunze iyi foto ntiyazuyaza ahita ayifitora kugira ngo nawe ayitunge

Yakunze iyi foto ahita ayifotorezaho

Bamwe mu bagore bakoreshwa inama ku bijyane n’uburinganire.

Muri uwo murenge, hamaze iminsi havugwa abago bata ingo, abandi ngo bakarogwa n’abagore bashakanye. Ibi ngo ni impamvu ituma bamwe mu bagabo bahitamo guta ingo bakigendera, nk’uko bitangazwa n’uwitwa Nzungize Cyriaque.

Agira ati “Hari abagore benshi ubona bigize nk’indaya bagatesha umutwe abagabo maze bakigendera.”

Atanga urugero ko mu kwezi kwa Nzeri hari abagabo bane bataye ingo zabo kubera guhototerwa.

Umusaza witwa Rubali Vincent, ufite imyaka 75, nawe yemeza aya makuru nawe ngo byamubayeho. Ati “Iyo urebye nabi baranakuroga inaha hari abagabo barogwa. Njyewe umugore yankuye mu isambu yanjye ndimuka ndamuhunga.”

Uyu musaza avuga ko ahanini biterwa n’ubusinzi cyangwa gushaka kwigarurira imitungo.

Ugirumurera Elisabeth, umukobwa utarashaka we avuga ko yumva amakuru ko abagabo nkabo batotezwa bagata ingo biterwa no kuba badahahira ingo zabo.

Kampire Christine ukuriye Inama y’Igihugu y’Abagore mu Karere ka Ngororero, avuga ko iki kibazo bazagikemura binyujijwe mu mugoroba w’ababyeyi.

Ati “Byose biterwa no kuba batitabira umugoroba w’ababyeyi. Tugiye gushyira imbaraga mu bwitabire bwawo maze abagabo n’abagore bongere banoze imibanire.”

Kuradusenge Janvier, umuyobozi wungirije ushinzwe imibereho myiza y’abaturage muri aka karere nawe avuga ko ibyo biterwa n’abagore bitiranya uburinganire no kwiganzura abagabo.

Ati “Ni byo turacyafite bamwe mu bagore bumva ko genda (gender) ari ukwiganzura abagabo, ariko twatangiye gusura ingo nkizo tukazigira inama.”

Nta mubare nyawo w’abagabo bataye ingo zabo kubera guhunga abagore uratangazwa, kuko ngo hari abagenda bakagira isoni zo kuvuga ko bahunze ahubwo bakavuga ko bagiye gupagasa, ariko ntibagaruke.

Mbere ngo babonaga toni eshanu z’amafi ariko ngo ubu n’imwe ntibayibona

Iyo koperative, igizwe n’abahinzi-bororozi 74, isanzwe ariyo rukumbi itanga amafi ku isoko ry’akarere ka Ngororero. Yari isanzwe itangaga toni eshanu z’amafi buri gihembwe ariko ubu ngo nta nubwo ikibona toni imwe.

Abayigize bavuga ko ibiryo bagura bitagitunga amafi yabo. Babwirwa ko go ku isoko nta biryo byujuje intungamubiri z’amafi bihari; nkuko Bajyagahe Donatha abisobanura.

Agira ati “Ubu ntitukibona umusaruro kandi aya mafi yari adutunze. Abayobozi batubwira ko ibiryo byabuze ko ibiri ku isoko bidafite intungamubiri.”

Uyu mugore avuga ko ubu amafi yabo atungwa n’ibiryo bisaguka mungo bakabizana muri ayo mafi.

Bavuga ko ibiryo babona bitujuje intungamubiri bigatuma amafi adakura

Mugenzi we witwa Dusabimana Elina uvuga ko ngo ibiryo bagura ku isoko rya Muhanga bidafasha amafi gukura ahubwo ngo bituma agwingira andi agahinduka umukara.

Agira ati “Ahubwo ibyo biryo tubishyiramo amafi agahundura ibara akaba umukara, ntitukibona umusaruro.”

Aba borozi bavuga ko ubundi mu mezi atatu babonaga toni eshanu z’amafi, zifite agaciro ka miliyoni 10Rwf kuko ikilo kimwe cyayo kigura 2000RWf. Icyo gihe buri munyamuryango yabonaga akabakaba ibihumbi 150RWf mu mezi atatu.

Musabyimana Ernest, umukozi ushinzwe ubworozi mu murenge wa Ngororero ntahuza n’abo borozi b’amafi.

Agira ati “Kudindira kwayo byatewe n’abanyamuryango bahora bategereje ubafasha. Mu ntangiriro bafashwaga n’umushinga witwa PAIGLAC aho uhagarariye babura amikoro yo gukomeza kugurira amafi ibiryo byujuje ibisabwa.”

Aborozi b’amafi muri Ngororero bahamya ko ubworozi bw’amafi aribwo bubatunze

Musabyimana avuga ko ibiryo by’amafi bitabuze ku isoko nkuko abo baturage babivuga. Yemeza ko bihenze ku buryo kubona ibihagije amafi bafite bigoye nubwo atavuga amafaranga bigura. Ahamya ko hari umushinga barimo kuvugana nawo uzafasha abo borozi.

Igishushanyo kigaragaza ahazubwa uwo mudugudu ku gasozi kitwa Kigali

Uyu mudugudu uzatwara arenga miliyari 1 na miliyoni 617RWf. Ugiye kubakwa mu kagari ka Binana mu murenge wa Matyazo ku musozi witwa Kigali. Biteganyijwe ko uzuzura muri Kamena 2017.

Uzaba ugizwe n’amazu 25 bita “4 in 1” bishaka kuvuga ko buri nzu izaba ituwe n’imiryango 4 bityo uyu mudugudu ukazaba utuwe n’imiryango 100 itishoboye ituye mu manegeka.

Minisitiri Mukantabana Seraphine, ufite mu nshingano ze kurwanya ibiza no gucyura impunzi, niwe watangije ku mugaragaro imirimo yo kubaka uwo mudugudu, tariki ya 13 Ukwakira 2016.

Umuyobozi w’akarere ka Ngororero, Ndayambaje Godfrois ahamagarira abafatanyabikorwa b’akarere kugira uruhare mu kubaka uwo mudugudu.

Agira ati “Ntabwo akarere kakwiharira ibikorwa nkibi konyine ndetse ntanubushobozi kabona. Abafatanyabikorwa bacu turabasaba gutanga inkunga zabo mu kubaka uyu mudugudu uzaba ari umwe mu igezweho muri iki gihugu.”

Akomeza avuga ko abazatuzwa muri uwo mudugudu bazatoranywa hakurikijwe abatuye mu manegeka kandi batishoboye.

Uretse abazatuzwa muri uwo mudugudu, abaturage batuye mu murenge wa Matyazo bishimira ko bagiye kwegerezwa ibikorwa remezo; nkuko Turikunkiko Augustin abivuga.

Agira ati “Dore nkubu bahise batwubakira umuhanda, amashanyarazi yarahageze, ndetse barimo kudushakira amazi, amashuri n’ibindi kubera uyu mudugudu.”

Munyantwari Alphonse, Guverineri w’Intara y’Iburengerazuba avuga ko uwo mudugudu uzubakwa ku gasozi kitwa “Kigali” uzatuma abahatuye bagera ku iterambere n’imyubakire igezweho nk’iyo bumva mu mujyi wa Kigali.

Imiryango 100 izatura muri uwo mudugudu izahabwa inka, hanatunganywe imihanda. Kuri ubu igishushanyo mbonera cyawo kikaba kirimo gukorwa.

Yahanze umuhanda uhuza utugari twa Nsibo na Bambiro mu murenge wa Nyange

Nshunguyinka avuga ko mu guhanga uwo muhanda wa km 7, uhuza utugari twa Nsibo na Bambiro yashakaga kugira igikorwa akorera abaturage bazajya bamwibukiraho.

Yagize ati « Nta yindi nyungu narimbifitemo uretse kuba nifuza kugira ibikorwa nsiga ku isi cyagirira akamaro abantu nanjye bakazabinyibukiraho.»

Uyu muhanda ni nawe uwitaho akoresheje amafaranga ye kugira ngo utangirika.

Avuga ko kuwuhanga byamutwaye amafaranga arenga miliyoni 5Rwf kandi buri mwaka umutwara byibura ibihumbi 150frw byo kuwitaho.

Ahahanzwe uyu muhanda ngo ntihari nyabagendwa, kandi hatuye abantu, bitewe no kuba nta muhanda wahabaga nk’uko Niyomugabo Jean Dominique, utwara moto abivuga.

Ati «Yadukoreye igikorwa cyiza, ubu natwe gukorera amafaranga dutwara abagenzi biratworohera, mu gihe mbere twakoreraga kuri kaburimbo gusa ».

Nshunguyinka yahanze umuhanda wa km 7 ngo ufashe abaturage

Uyu muhanda kandi unifashishwa mu bikorwa byose nk’ubwikorezi ndetse ngo ni nawo watumye imbangukira gutabara zibasha kuhagera.

Umunyamabanga nshingwabikorwa w’umurenge wa nyange Ernest Niyonsaba ashima igikorwa cya Nshunguyinka we yita icy’ubutwari.

Ati « biriya yakoze nabyo ni igikorwa cy’ubutwari nk’uko hano inyange hari igicumbi cyazo, ndetse ni nigikorwa cyo gukunda igihugu kuko aha abaturage akazi muri uwo muhanda ».

Yemeza ko nta nkunga iyo ariyo yose ubuyobozi bwateye Nshunguyinka kuri uyu muhanda.

Uretse kuba yarakoze uyu muhanda utuma afatwa nk’Intwari, Nshunguyinka ubundi usanzwe ari rwiyemezamirimo mu buhinzi n’ubworozi.

Yigisha abaturage guhinga urutoki, inanasi no korora bya kijyambere kandi akabagurira umusaruro wabo akawukoresha imitobe na divayi zitandukanye, ndetse akanaboroza amatungo.

Ibiza bimaze gusenya amazu 4611

Minisitiri Mukantabana Seraphine yabitangarije mu Karere ka Ngororero, ubwo yatangizaga icyumweru cyahariwe kugabanya ingaruka z’ibiza, tariki ya 13 Ukwakira 2016.

Agira ati “U Rwanda rwiyemeje gufata icyumweru cyose hakorwa ubungangurambaga mu baturage. Ibiza bidutwara imbaraga nyinshi, ubuzima n’imitungo nyamara byashobokaga ko tugabanya ingaruka mbere y’uko biba.”

Icyegeranyo cya Minisiteri ayoboye kigaragaza ko kuva muri Mutarama kugera muri Nzeli 2016, ibiza byahitanye abantu 166 bikomeretsa 136. Byasenye amazu 4611, byangiza ibihingwa biri kuri hegitari 5388, byica amatungo 1882.

Byanangije kandi imihanda 26, ibiraro 41, ibyumba by’amashuri 47, imiyoboro y’amazi 11 n’amasoko 20. Iyo mitungo yose ifite agaciro ka miliyari zirenga 27RWf. Ibyo biza byagize ingaruka mbi ku miryango 59854.

Kubera umubare munini w’ibyangizwa n’ibiza, Leta y’u Rwanda isaba abaturage n’abafatanyabikorwa bayo gushyira imbaraga mu kugabanya ingaruka ziterwa n’ibiza.

Ibiza bimaze gusenya amazu 4611

Mu byihutirwa basabwa harimo kuva mu manegeka, kuzirika ibisenge by’amazu, guhoma neza amazu, gutera ibiti ku misozi, kubakira abimuwe mu manegeka no gusibura ibyobo bifata amazi.

Umuyobozi w’Akarere ka Ngororero, Ndayambaje Godfrois avuga mu mezi ashize ibiza byasenye amazu 555, binahitana bw’abantu batandatu.

Agira ati “Akarere kacu kibasirwa n’ibiza kandi abaturage benshi baracyatuye ahantu habi bitewe n’imiterere y’akarere, mu gihe ubushobozi bwo kubimurira rimwe butaboneka.”

Minisitiri Mukantabana avuga ko Leta ihora yiteguye kufasha abagwiriwe n’ibiza. Ariko agasaba abaturage kubikumira hakiri kare kuko ngo imbaraga zikoreshwa mu gukumira zikuba inshuro 100 mu guhangana n’ingaruka.

Minisitiri Anastase Murekezi arashima Ngororero ko iri imbere mu bumwe n’ubwiyunge

Minisitiri Murekezi yatangije icyumweru cyubumwe nubwiyunge, aanatangiza igihembwe cyihinga Amuri aka karere ka Ngororero kuri uyu wa 01 Ukwakira 2016.

Ashima aba baturage yagaragaje uko ibipimo mu bumwe nubwiyunge bihagaze muri aka karere, kari imbere y’utundi, abasaba gukomeza gutera intambwe ntibasubire inyuma.

Yagize ati«Ibipimo byo muri 2015 bigaragaza ko abaturage ba Ngororero bari ku gipimo cya 96,8% mu kugira ubwizerane mu baturage, na 97,3% mu kwizere inzego z’umutekano».

Abatuye Ngororero barashimwa ubumwe n’ubwiyunge bagezeho

Ubushakashatsi bwo mu mwaka wa 2015 bugaragaza ko mu gihugu hose igipimo cy’ubumwe n’ubwiyunge kiri kuri 92%, aho cyari kivuye kuri 81,3% mu 2010.

Umunyamabanga nshingwabikorwa wa komisiyo y’Igihugu y’Ubumwe n’Ubwiyunge Fidel Ndayisaba yasabye abagiseta ibirenge guhinduka bagashyira hamwe n’abandi baturage.

Ati «Niba hari abakibwira ko bazateza umwiryane mu banyarwanda baribeshya. Bakwiye kwisubiraho vuba, nta muntu ukwiye kubona mugenzi we nk’ikibazo ahubwo akwiye kumubona nk’igisubizo ».

Fidel Ndayisaba umunyamabanga wa komisiyo y’ubumwe n’ubwiyunge

Ndayisaba nawe yemeje ko Ngororero ikataje mu bumwe n’ubwiyunge, ndetse ikaba yarabiherewe igikombe ku rwego rw’Igihugu.

Yanagarutse ku mateka yaranze umurenge wa Kabaya ahafatwa nk’ahacuriwe umugambi wa Jenoside, ariko ubu hakaba havugwa imibanire myiza kurusha ahandi.

Muri iki cyumweru cyubumwe nubwiyunge hazamurikwa abarinzi b’igihango ku nzego zose.

Insanganyamatsiko y’iki cyumweru cyahuriranye n’igihe cy’imiyoborere myiza ikaba igira iti « dukomere ku gihango dufitanye n’urwanda, turinda ibimaze kugerwaho ».

Ngirabakunzi Fabien wo mu murenge wa Kabaya, avuga ko guhenda kw’imbuto gukabije, kandi ko mbere bitigeze bibaho.

Yagize ati «Nk’ubu tugeze mu gihe cyo guhinga ibishyimbo n’amashaza, ariko ikiro cy’imbuto y’amashaza ni 1500frw naho ibishyimbo ni 800frw. Ntibyigeze bibaho mu mateka yacu ».

Abatuye Ngororero bavuga ko, mbere imbuto itarenzaga amafaranaga 350frw ku kilo cy’ibishyimbo, n’amafaranga 650frw ku kilo cy’amashaza.

Intandaro yo kubura umusaruro, abaturage bavuga ko yaba ari amapfa yabaye muri aka gace mu mpera z’umwaka wa 2015, kugera ku isarura rishize.

Bavuga ko kuba imbuto ihenze bishobora gutuma hari abadatera ihagije, nabyo bikazagira ingaruka ku musaruro.

Ndirirehe Tharcisse, avuga ko igihe cy’ihinga ubundi yabaga afite imbuto iwe mu rugo ndetse akanaha abaturanyi be ariko ubu akaba nawe ntayo afite.

Ati « ntabwo warenganya abaturage kuko ntibari kubika imbuto kandi bashonje mu ngo zabo. Ibyabaye nanjye byangezeho sinabitse imbuto nk’ibisanzwe »

bateguye imirima ariko bagowe no kubona mbuto

Kuva mu mwaka wa 2014, mu karere ka Ngororero bashyizeho ibigega abaturage bahuriraho bagahunika umusaruro.

Umuyobozi w’akarere wungirije ushinzwe imari n’iterambere ry’ubukungu Kanyange Christine, avuga ko mu musaruro bahunitse hatarimo ibishyimbo n’amashaza.

Nawe agaruka ku kuba abaturage batarejeje neza mu gihembwe cy’ihinga gishize, ariko nabo ngo bakaba bataribikiye imbuto ku bera uburangare.

Ati « kuba bihenze ni ingaruka zo kuba abahinzi batarejeje neza ariko nabo bakagira n’ingeso yo kugurisha umusaruro wabo wose ntibasige imbuto ».

Akomeza abasaba gukora uko bashoboye bakabona imbuto bagahingira igihe kugira ngo babashe guhangana n’icyo kibazo kitazagaruka no mu bihe bitaha.

Mu karere ka Ngororero, ibishyimbo n’amashaza biri mu bihingwa byatoranyijwe kwibandwaho muri iki gihembwe cy’ihinga.

Ngororero barahumurizwa ko batakererewe guhinga

Habimana emmanuel wo mu murenge wa Ngororero avuga ko batinze kubona imbuto n’ifumbire, none bakaba baratinze gutangira igihembwe cy’ihinga 2017.

Yagize ati«Twagombye kuba twarateye mu ntangiriro za Nzeli none dore ukwezi kugiye kurangira nibwo tukibona imbuto».

Umuyobozi w’Ikigo cy’Igihugu gishinzwe ubuhinzi b’ubworozi (RAB)’ mu ntara y’Iburengerazuba Nuwumuremyi Jeannine arahumuriza aba bahinzi, avuga ko batarakererwa.

Avuga ko batarakererwa cyane, kandi ko byatewte n’imvura yaguye itinze.

Ati «Ubundi igihembwe cy’ihinga kibanzirizwa n’imvura igomba kubanza gusomya ubutaka.

Kuba yaratinze kugwa nta gikuba cyacitse ahubwo abahinzi barasabwa kurangiza uku kwezi kwa nzeli bamaze gutera.»

Nuwumuremyi Jeannine arashishikariza abahinzi kwihutira gutera imyaka

Aba bahinzi banavuga ko babangamiwe n’uko bahabwa ifumbire mva ruganda nyinshi ugereranyije n’iyo bari basanzwe bakoresha, nk’uko Bajyagahe Donatha avivuga.

Ati «Barimo baradutegeka kujyana ifumbire nyinshi ugereranyije n’iyo twari dusanganywe bigatuma dukoresha amafaranga menshi kandi dufite ubuso butoya.

Biratubangamiye, barayitugurisha ku ngufu ».

Kuri iki kibazo, Nuwumuremyi, avuga ko atari uguha abaturage ifumbire nyinshi ahubwo hakurikizwa amakuru ari ku mafishi y’abahinzi.

Ati« mbere biguriraga uko babonye mu kajagari,ubu twarakosoye buri muhinzi afite ifishi imuranga.

Ni nayo abatanga inyongeramusaruro bareberaho ingano y’ubuso hanyuma bagatanga imbuto n’ifumbire bihuye nabwo ».

Uyu muyobozi asaba abahinzi bafite ikibazo nkicyo ko bazajya bareba ku mafishi yabo, maze ahaba hari amakosa agakosorwa hakiri kare.

Umukozi w’akarere ushinzwe ubuhinzi Dusabimana Leonidas akaba avuga ko agiye gukurikirana iki kibazo ahari amakosa ku mafishi agakosorwa.

Abunzi bishimira amahugurwa bahabwa azabafasha guca imanza neza

Abunzi ni abakorerabushake bakemura ibibazo by’abaturage bitarinze kujya mu nkiko. Kuba bahabwa amahugurwa atandukanye ngo birabafasha cyane bagakora kinyamwuga; nkuko Nshimiyima Jean Pierre, umwe muri bo yabisobanuye nyuma yo guhabwa amahugurwa n’umuryango witwa RCN Justice et Democratie uterwa inkunga n’Ububiligi.

Agira ati « Bigiye kutubera umwanya mwiza wo kubahiriza amategeko n’umuco tugenderaho mu kazi kacu ».

Akarere ka Ngororero gafatanyije n’uwo muryango bari guhugura abunzi 602 bo muri aka karere, babasanga mu mirenge bakoreramo. Bahabwa ubumenyi ku itegeko ribagenga no ku yandi mategeko afite aho ahurira n’akazi kabo.

Kiruhura Fiston, umukozi wa RCN Justice et Democratie avuga ko ari ngombwa ko abunzi bahabwa ubumenyi bitewe n’uko amategeko nayo agenda ahinduka.

Agira atti « Ni ngombwa ko mu kazi bakora bahabwa ubumenyi bwabafasha gukora neza. Umuryango wacu ukorana na Minisiteri y’Ubutabera mu guhugura abunzi mu turere tumwe na tumwe, kandi bitanga umusaruro ».

Uretse amahugurwa bahabwa, RCN inasanga abunzi aho bakorera igakurikirana uko bakemura ibibazo maze ikabagira inama.

Inatanga ibikoresho abunzi bakenera mu kubafasha gucika burundu ku ngeso ikunze kubavugwaho yo kwaka umuti w’ikaramu cyangwa andi mazina babyita.

Mukayisenga Caroline, umuyobozi w’Inzu y’ubufasha n’ubujyanama mu by’amategeko (MAJ) mu karere ka Ngororero, avuga ko abunzi bafite uruhare rukomeye mu miyoborere ishingiye ku muturage.

Avuga ibyo agendeye ku kuba bakemura ibibazo by’abaturage babarinda gusiragira mu nkiko no gupfusha ubusa imitungo yabo.

Uretse abunzi bahabwa amahugurwa, abanyamabanga nshingwabikorwa b’utugari bakaba n’abahesha b’inkiko batari ab’umwuga hamwe n’umukozi w’umurenge ushinzwe ibibazo by’abaturage nabo bitabira ayo mahugurwa.

Abamwe mu bana bo mu karere ka Ngororero bata ishuri bakajya gukoreshwa imirimo ivunanye

Muri kamena 2016, mu karere ka Ngororero habaruwe abana 7395 bataye ishuli. Mu isuzuma ryakozwe mu kwezi kwa Nzeli 2016, ryagaragaje ko abagera 2992 batararisubiramo barimo abo mu ashuri abanza n’ayisumbuye.

Iryo suzuma ryerekana mo kandi abenshi muri abo bana bakoreshwa imirimo ivunanye nk’iy’ubucuruzi, gukora mu mirima y’icyayi, mu nzuri no mu bindi bikorwa bitateganyirijwe abana bato.

Musabyimana Ildephonse uyobora ikigo cy’amashuli cya Nyabihu mu murenge wa Hindiro ufite abanyeshuli 28 bataragaruka yemeza ko abana bata ishuli igihe cy’amapfa ngo ariko ku gihe cy’umwero bakiga bose nta kibazo.

Agira ati “Ababyeyi bafite uruhare runini mu gutuma abana bata ishuli, kuko akenshi barivamo mu gihe hariho igabanuka ry’umusaruro abaturage bagasonza kandi ugasanga abana bakora imirimo yinjiza amafaranga mu rugo rw’ababyeyi”.

Barigora Evariste, umugenzuzi w’umurimo mu karere ka Ngororero, ufite mu nshingano ze kurwanya imirimo ivunanye ikoreshwa abana, avuga ko ubukangurambaga buri gukorwa kugira ngo ababyeyi bibutswe uburenganzira bw’umwana.

Agira ati “Twarahagurutse ngo dutabare abana bakoreshwa bene iyo mirimo, kuko bahemukirwa kandi igihugu kikaba kitabyemera”.

Ku bufatanye n’umuryango Winrock International, Akarere ka Ngororero kihaye gahunda y’iminsi 4 y’ubukangurambaga mu mirenge yose uko ari 13 mu kurwanya imirimo ivunanye ikoreshwa abana, ikanabiviramo kureka ishuli.

Depite Manirarora Annoncee, umwe mu bakoze ubugenzuzi yemeza ko mu karere ka Ngororero hakiri ikibazo cyo kutita ku bana bagata amashuli.

Hafashwe ingamba ko abazafatwa bakoresha abana bazahanishwa amande kuva ku bihumbi 50Frw kugeza ku bihumbi 100FRw, naho ababyeyi bazahanishwa amende ya y’ibihumbi 10FRw.

Guverineri-Mukandasira-Caritas-araburira-abafite-ibitekerezo-by’ubugizi-bwa-nabi-ko-nta-mwanya-bazahabwa

Byagarutsweho mu kiganiro aba bayobozi bagiranye n’abatuye akarere ka Ngororero kuwa 15 Nzeli 2016.

Mukandasira avuga ko batazihanganirauzashaka guhungabanya umutekano w’intara yabo, by’umwihariko aka karere.

Yagize ati «Harimo n’abo muri iyi ntara bagiye muri ibyo bikorwa bigamije kurimbura abantu. Igihugu cyacu by’umwihariko akarere ka Ngororero twabonye umutekano bigoranye, ntabwo dushobora kwemerera uwo ariwe wese wakongera kugerageza kuwuhungabanya ».

Umuyobozi w’Ingabo mu ntara y’Iburengarazuba Gen. Maj. Alexis Kagame avuga ko abanyarwanda badakwiye kwigana imico bumva mu bindi bihugu bigira abaturage bahora barwana hagati yabo, kuko ntacyo bapfa.

Yongeraho ko kubera ubunararibonye abanyarwanda n’inzego z’umutekano bafite bataha icyuho uwo ariwe wese ushaka kuvutsa abanyarwanda ubuzima.

Gen. Maj. Alexis Kagame avuga ko inzego z’umutekano zitazihanganira abashaka guhungabanya abanyarwanda

N’ubwo muri aka karere nta bikorwa bifatika bihungabanya umutekano by’abitwaza idini ya Islam bihavugwa, bamwe mu bayisilamu bavuaga ko hari abajya bahagaragara batazwi, bakabasaba ibyangombwa by’aho baturutse, bagasubirayo.

Shehe Nkenga Gulam, Immam w’akarere ka Ngororero avuga ko bahagurukiye kurwanya ababanduriza izina.

Ati « Ubu abantu bose bitwaza idini ryacu bagasengera ahantu hatari mu misigiti ntitubafata nk’abacu, ahubwo tubatangaho amakuru bagakurikiranwa kandi tuzabikomeza ».

Umuyobozi wa polisi mu ntara y’Iburengerazuba ACP Bertin Mutezintare, yeruriye abadashaka kubumbatira amahoro ko hazakoreshwa imbaraga zose zishoboka mu kubarwanya.

Ati « Iki kibazo cyatuzanye si umutekano muke uterwa n’abajura ahubwo ni abashaka kuturimbura. Niba batisubiyeho hazakoreshwa imbaraga zose dufite duhangane nabo kandi twiteguye kubahashya ».

Abayisilamu bo muri aka karere bavuga ko hari abaturage bababona nk’abafite ibitekerezo by’ubutagondwa bitewe n’abiyitirira idini ryabo bagakora amahano.

Basaba ko byahinduka kuko bidakorwa na bose,ahubwo bagafatanya kubatahura.

Guverineri Mukandasira asanga gusubira inyuma kwa Ngororero ari ubugwari

Yabigaragaje tariki ya 15 Nzeli 2016, ubwo yagiriraga uruzinduko muri ako karere, aho yaganiriye n’abayobozi batandukanye akanabanenga, ababwira ko biteye isoni kubona akarere bayoboye karaje ku mwanya wa 14 mu mihigo y’umwaka wa 2015-2016.

Agira ati "ubwo murumva bidateye isoni! iyi siyo intambwe idasubira inyuma nkuko twari twabyiyemeje, ahubwo ni ukudohoka ku ntego ku buryo ntatinya kuvuga ko ari ubugwari"

Mu myaka y’imihigo ibiri yashize, Akarere ka Ngororero kazaga ku mwanya wa gatatu. .

Guverineri Mukandasira yasabye abayobozi bo muri ako karere kudatererana abaturage, yibanze cyane ku bayobozi b’imidugudu kuko ari bo bahorana n’abaturage, ibyo ngo bizatuma ako karere karushaho kwesa imihigo.

Ati "Abayobozi b’imidugudu nimwe mubana cyane n’abaturage, nimwe muzi ibyo bakora kandi nimwe mufite iterambere ry’akarere mu biganza byanyu. Ntabwo abayobozi b’akarere n’imirenge bakwishoboza kwesa imihigo igihe mutabishyizemo imbaraga".

Abayobozi b’imidugudu basabwe kudatererana abaturage

Bisengumukiza Bernard, umwe mu bakuru b’imidugudu, avuga ko nabo batunguwe no gusubira inyuma, ariko batangiye kwisuzuma kugira ngo bafate ingamba nshya.

Agira ati "Twaratunguwe kubona dusubira inyuma kuriya kuko twumvaga ntako tutagize kandi dusanga n’abaturage barashyize mu bikorwa ibyo bahize nubwo atari 100%. Twatangiye gukora isuzuma ngo turebe aho byapfiriye ariko dufite ingamba zo kwisubiza umwanya wacu".

Akomeza avuga ko ariko hari inzitizi zimwe bagiye bahura nazo, nko kuba izuba ryacanye igihe kirekire, bigatuma umusaruro ugabanuka bitera inzara hamwe na hamwe.

Umuyobozi w’Akarere ka Ngororero, Ndayambaje Godfrois, avuga hari imwe mu mihigo yadindiye. Ibyo ngo byaturutse ku kuba hari abaturage bahugijwe no gushaka ibibatunga kubera kugabanuka kw’umusaruro.

Aya mahugurwa yasojwe kuri uyu wa gatanu tariki ya 9 Nzeli 2016, yari agizwe n’abafotora 16 baturuka mu bigo bitandukanye by’itangazamakuru mu Rwanda.

Ifoto y’Urwibutso y’abagize icyiciro cya gatanu cyasoje amahugurwa kuri uyu wa Gatanu n’abayobozi

Abahuguwe basabwe gufatanya na bagenzi babo bahuguwe mbere, kuzamura urwego rwo gufotora mu Rwanda, ndetse no kugaragaza isura nziza y’igihugu mu mafoto.

Prosper Bitembeka, umukozi wa Kigali Today wari ushinzwe ayo mahugurwa, avuga ko abahuguwe mbere batangiye kubigeraho.

Agira ati “Ubu babaye 77 duhaye amahugurwa. Abahawe aya mahugurwa mbere, batangiye gushyira hanze amafoto afite itandukaniro n’ayari asanzwe akoreshwa”.

Bitembeka prosper wari umuhuzabikorwa w’ aya mahugurwa muri kigali Today.

Nzabandora Abdallah, umuyobozi wa gahunda ya Kora Wigire (NEP) mu kigo cy’igihugu giteza imbere ubumenyingiro (WDA) gitera inkunga aya mahugurwa, avuga ko gutanga ubumenyi ngiro biri mu ntego zikomeye za Leta.

Ati “ Ibi dukora biri mu ntego zayo muri vision 2020, ndetse na EDPLS II, aho abantu bagomba kwihangira imirimo”.

Nzabandora Abdallah Umuyobozi muri WDA ushinzwe kora wigire (NEP).

Peace Maker Mbungiramihigo umunyamabanga Nshingwabikorwa w’Inama Nkuru y’Itangazamakuru (MHC), asanga ubu bumenyi, buzatuma n’itangazamakuru rirushaho gutera imbere.

Ati “Gutanga amahugurwa nkaya biri mu nshingano za MHC niyo mpamvu twishimira uwo ariwe wese wadufasha kubigeraho”.

Peace Maker Mbungiramihigo Umunyamabanga nshingwabikorwa w’Inama y’igihugu y’Itangazamakuru

Umurerwa Anita wakurikiye aya mahugurwa, avuga ko aya mahugurwa agiye kumufasha kunoza umwuga we w’itangazamakuru asanzwe akora.

Ati” Mu nkuru nakoraga numvaga amafoto adafite agaciro cyane, ariko ubu nahumutse ngiye guhindura byinshi mubyo nakoraga,”.

Kuba abahabwa aya mahugurwa kuri photo journalism baturuka mu gihugu hose, bizafasha gukwirakwiza ubumenyi vuba ku gukora neza amafoto mbarankuru.

Bizanafasha guhesha umwuga wo gufotora agaciro, kugira ngo gufotora bibe umwuga ufatika utunga abawukora.

Batangiye kongera ubuso bwa Soya.

Iki gihingwa gikize ku ntungamubiri ngo kizafasha kurwanya imirire mibi ikigaragara mu miryango imwe n’imwe y’imirenge ihinga Soya ari yo Gatumba, Nyange, Ngororero, Matyazo, Muhororo, Kageyo na Ndaro. Ibi bikazafasha abana bakigaragara mu ibara ry’umutuku.

Nyirasinamenye Jeanne, ushinzwe imbonezamirire muri zone y’Ibitaro bya Muhororo avuga ko soya ikungahaye ku byubaka umubiri (protein) bingana n’ibikomoka ku nyamaswa kandi ngo byorohera umubiri kugogora.

Ati “Twe soya tuyigereranya n’inyama z’abakene. Ifitiye abana n’abakuru akamaro mu kunoza imirire. Ni yo twifashisha mu gutegura indyo yuzuye y’abana barwaye Bwaki”.

Imibare y’ishami ry’ubuzima mu Karere ka Ngororero, ubu harabarurwa abana 699 bari munsi y’imyaka 5 bafite imirire mibi barimo 605 bari mu ibara ry’umuhondo na 94 bari mu mutuku.

Umurenge wa Kageyo akaba ari wo ufite benshi kuko imibare igaragaza ko muri Kamena 2016 bageraga ku 162.

Byabaye ngombwa kongera ubuso buhinzeho soya byinjira mu mihigo y’akarere ya 2016/2017, ngo iki gihingwa kirusheho kugira uruhare mu kurwanya imirire mibi.

Soya izafasha ababyeyi kurandura imirire mibi.

Nk’uko bivugwa na Dusabimana Leonidas, ushinzwe ubuhinzi, ngo umuhigo ni uguhinga Soya ku buso bungana na hegitari 1040 ku bihembwe by’ihinga 3: 2016C, 2017A, 2017B. Mu Karere ka Ngororero ngo abahinzi 5% ni bo bitabira guhinga soya.

Ubusanzwe ibihembwe by’ihinga byibandaga ku bihingwa ngandurarugo nk’Ibigori n’Ingano ariko byabaye ngombwa ko kuva muri 2016 C bizibanda kuri Soya nk’igihingwa bategerejeho kubafasha guhangana n’imirire mibi.

Inkeragutabara nizo zeguriwe gukwirakwiza inyongeramusaruro.

Hashize imyaka icyenda hatangijwe Gahunda y’Imbaturabukungu mu buhinzi (Crop Intensification Programme - CIP), abahinzi bagezwaho ifumbire kuri “Nkunganire”.

Bamwe mu bahinzi ariko bamaze igihe bijujutira uburyo bahabwamo inyongeramusaruro, aho bavuga ko zibageraho zitinze kandi zihenze.

Gakuru Pieerre umukozi wa ENASE Ltd yinjiza amafumbire mu gihugu, avuga ko hari ibiciro bagabanura ku nyongeramusaruro iyo bazinjije mu gihugu ariko abashinzwe ku zikwirakwiza bo ntibakaturire abahinzi kandi ariyo ntego baba bafite.

Abahinzi bizeye ko bizakemura ibibazo bahuraga nabyo.

Ati “Hari abakwirakwiza inyongeramusaruro badakaturira abahinzi kandi twe tuba twarakuyeho amafaranga ndetse na minisiteri igakiuraho ayandi. Ibyo bituma abahinzi batagura inyongeramusaruro uko bikwiye maze bagakoresha ifumbire nkeya.”

Mu gukemura iki kibazo, gukwirakwiza inyongeramusaruro muri aka karere byamaze kwegurirwa inkeragutabara, aho bategereje ko amakosa yakorwaga azakosorwa.

Umukozi ushinzwe ubuhinzi mu karerere Dusabimana Leonidas, yameza ko guhindura abakwirakwiza inyongeramusaruro bizabafasha.

Ati “Hari hakenewe amavugurura. Guhera mu gihembwe cy’ihinga 2017 A, abahinzi bazajya bagura inyongeramusaruro ku nkeragutabara zabyemerewe mu tugari kandi bizakemura ikibazo cyari gihari.”

Inkeragutabara izacuruza ifumbire n’imbuto (Reserve Force Agrodealer) azahabwa inyandiko zabugenewe (formats) azajya yandikaho amazina y’umuhinzi, nomero y’irangamuntu, ubuso azahingaho, ubwoko n’ingano y’ifumbire kimwe n’ubwoko n’ingano by’imbuto y’indobanure, n’amafaranga yishyuwe n’umuhinzi kandi umuhinzi agashyira umukono cyangwa igikumwe imbere y’ibyo aguze yunganiwe.

Harerimana Dominique umufashamyumvire n’umujyanama w’ubuhinzi wo mu Murenge wa Ngororero, avuga ko amafishi bakoreshaga mbere atandukanye n’ayo inkeragutabara kuko ari ho nimero y’icyangombwa cy’ubutaka n’ubuso bwabwo n’umukono w’inkeragutabara mu mudugudu izaba ikoreramo.

Ibyo ngo bizabafasha kumenya umubare byukuri uko abahinzi bakoresha inyongeramusaruro. Harerimana yemeza ko mbere wasangaga ifumbire ari nyinshi ku mbuto ugasanga ikoze ibyo itagenewe bityo ikaba ipfuye ubusa.

KVCS yiyemeje gufasha Akarere ka Ngororero kuzamuri imisoro ikomoka kuri kariyeri.

KVCS (Kigali Veterans Cooperative Soseaty: impuzamashyirahamwe y’abasezerewe mu ngabo z’Igihugu), ngo izafasha mu kwakira amahoro aturuka ku bucukuzi bw’amabuye yo kubakisha, imicanga, igitaka, ibumba n’amatafari, ubundi ngo bitakorwaga neza nk’uko meya abivuga.

Binemezwa n’Umuyobozi wa Njyanama y’Akarere ka Ngororero, Hareriman Margueritte, uvuga ko gukorana n’iyo sosiyete bizatuma bongera imisoro.

Ati «Bigaragara ko ubusanzwe umutungo kamere wacu utabyazwa umusaruro uko bikwiye, aho usanga hibandwa gusa ku mabuye y’agaciro. KVCS ibifitemo uburambe, izadufasha gukusanya imisoro ituruka ku mutungo kamere aka karere gafite.»

Muri aka karere, ngo hagaragaraga abakoresha uwo mutungo nk’ibitaka bakoresha mu muhanda batabyishyura kandi baratsindiye isoko bavuga ko bizagurwa.

Abakoreshaga itaka ryo mu karere ntibaryishyuraga.

Shyerezo Norbert, umwe mu bagize Inama Njyanama y’Akarere ka Ngororero, agira ati «Nka bariya bakora imihanda cyangwa bubaka ibikorwa bitandukanye baca amafaranga bavuga ko bazagura itaka ryo gukoresha kandi rikabarirwa agaciro. Ikibabaje ni uko wasangaga barifatira ubuntu kandi ari umutungo w’akarere ».

Umwe mu bayobozi KVCS yadutangarije ko aho bageze mu turere byafashije kuzamura imisoro twinjiza.

Nko muri Nyabihu ngo basanze kariyeri zarinjizaga miliyoni 48 z’amafaranga y’ u Rwanda ku mwaka bahita batangira kuyakuba inshuro enye agera kuri miliyoni168.

Ubusanzwe kariyeri z’Akarere ka Ngororero zinjiza agera kuri miliyoni 36 ku mwaka mu gihe imisoro n’amahoro muri rusange igera kuri miliyoni 500FRW mu mwaka .

Umuyobozi w’Inama Njyanama y’aka karere avuga ko bamaze kumvikana na KVCS, igisigaye ngo ari ukwiga ku biciro uyu mufatanyabikorwa azajya akoresha maze byamara kwemezwa agatangira imirimo, aho avuga ko bitazaranza Kanama 2016 KVCS itaratangira.

Kuva mu myaka 4 ishize, nibwo abakozi b’ibi bitaro biyemeje kwishakamo ubushobozi bwo gufasha abarwayi babagana batifashije kubona ubuvuzi n’ibijyana nabwo. Buri mukozi ashyira umusanzu we wa buri kwezi mu isanduku ibahuza.

Umuyobozi w’ibitaro n’abakozi batanga ubufasha ku barwayi

Usanase Nsengimana Emmanuel, umukozi ushinzwe imbonezamubano muri ibyo bitaro avuga ko iyo sanduku itabara benshi.

Ati“Twararebye dusanga hari abarwayi batugana bafite ibibazo birenze ibyuburwayi gusa. Bamwe tubishyurira ubwisungane mu kwivuza, abandi turabagaburira ndetse hakaba n’abo duha imyambaro n’ibikoresho by’isuku”.

Nyirabavakure Marie Chantal, umwe mu barwayi bari muri ibi bitaro ubwo twabasuraga kuwa 1 Kanama 2016, ni umwe mu bahabwa ubwo bufasha. Yadutangarije ko iyo sanduku yamubereye umubyeyi kuko ababyeyi be n’abavandimwe bamutereranye bakanga kumuvuza.

Ati “Ubundi ndwaye diyabete, ababyeyi banjye barantereranye kuko bashakaga kumvuza mu Kinyarwanda ngo ni amarozi nkanga. Ubu ibitaro nibyo bimvuza, bikangaburira ndetse n’ibindi nkeneye bakabimpa. Ni ababyeyi beza”.

Muri raporo zigaragazwa n’umukozi ushinzwe gucunga iyo sanduku, ubufasha nkubu bugera ku barwayi byibura 15 buri kwezi. Uretse ibyo, buri mwaka bagira uruhare mu gutegura umunsi w’abarwayi no kubaha impano, ndetse no mu gikorwa cyo kwibuka abari abakozi b’ibyo bitaro bazize jenoside banaremera abasigaye bo mu miryango yabo.

Umuyobozi w’ibi bitaro Dr Ahishakiye Emmanuel, avuga ko ibyo babikesha kuba bunze ubumwe. Ati “burya ikintu abayobozi Babura akenshi ni ukwicisha bugufi ngo begere abo bayobora. Hano rero twabigezeho tuba umwe niyo mpamvu guhuza ubushobozi bwacu kandi bugakoreshwa neza tubigeraho”.

Uyu muyobozi ariko avuga ko bataragera ku rwego rwo gukemura ibibazo byose bahura nabyo, ubu bakaba bakora ubukangurambaga banashaka inkunga zaturuka ahandi mu gufasha iyo sanduku.

Abaturage 346 basoje inyigisho zo gusoma, kwandika no kubara.

Umushinga GCS ukomoka muri Koreya y’Epfo, watangiye gufasha abaturage b’Umurenge wa Nyarubaka mu mwaka wa 2009, imiryango 800 ikaba yaragiye ihabwa inguzanyo nto yo kubafasha kwivana mu bukene.

Twagirayezu Aimable, Umuhuzabikorwa w’uyu mushinga, avuga ko mu myaka 5 bari bamaze bakorera muri uwo murenge, batabashije kugera ku ntego yabo neza kubera ubujiji bwa bamwe mu baturage bwababereye inzitizi.

Agira ati «Twagerageje kubafasha ariko kutamenya gusoma no kwandika byatumye tutabageza aho twifuza. Ni bwo kuva muri Nyakanga 2015, twahisemo gushyiraho gahunda yo kwigisha gusoma no kwandika ku batabizi.»

Umunyakoreya Sun Mi Kim (wa kabiri uhereye ibumoso) avuga ko bazakomeza kwigisha abaturage.

Abigiye gusoma, kwandika no kubara mu masomero ya GCS bavuga ko ubwo bumenyi kuri bo ari nk’urufunguzo rubageza ku iterambere batashoboraga kwigezaho.

Niyitegeka Frodourd w’imyaka 64 y’amavuko, ubwo yahabwaga impamyabushobozi yabyo tariki 29 Nyakanga 2016, yavuze ko ayo masomo yamuvanye mu icuraburindi ryamudindizaga.

Yagize ati «Najyanaga imyaka yanjye ku isoko bakanyiba kubera ubujiji, ubu nta mubare ntazi. Nta wanyiba. Uyu mushinga umpaye impamba izansajisha.»

Uyu musaza na bagenzi be bize gusoma bakuze, ngo batangiye gukora ubukangurambaga kuri bagenzi babo kugira ngo na bo bakangukire kwiga.

Abagore ngo ni bo bitabira aya masomero ku bwinshi.

Muri uyu murenge ariko, ngo ubwitabire bw’abagabo buracyari hasi ugereranyije n’abagore. Abasoje muri iki cyiciro ni 26 gusa mu gihe abagore ari 320.

Twagirayezu yemeza ko imyumvire ikiri hasi ari yo ituma bamwe badashaka kwiga, ndetse n’ababitangiye ntibabirangize kuko muri icyo cyiciro, ngo batangiranye n’abantu 1031 ariko hagasoza 346 gusa.

Sun Mi Kim, Umunyakoreya y’Epfo uyoboye uwo mushinga, yizeza ko bazakomeza kwigisha aba baturage ariko agasaba ubufatanye bwa hafi n’inzego z’ubuyobozi zegereye abaturage.

GCS ivuga ko ifite intego yo kwigisha gusoma, kwandika no kubara abaturage basaga 1500 bo muri uyu murenge wa Nyarubaka ivuga ko batari babizi.

Ibi ibigarukwaho n’Umuyobozi mushya wa Croix Rouge y’u Rwanda Dr Bwito Paul, watowe mu nteko rusange ya gatandatu y’uyu muryango yateranye tariki ya 24 Nyakanga 2016 ku cyicaro gikuru cy’uyu muryango.

Abanyamuryango bateraniye mu nama rusange

Nyuma yo kugaragarizwa ibyagezweho mu myaka itanu ishize (2012-2016), Umuyobozi mushya, Dr Bwito Paul avuga ko abayobozi bashya batowe bazusa ikivi cyatangiwe n’abo basimbuye.

Ashimangira ariko ko bazakora ibishoboka byose kugirango Croix-Rouge y’u Rwanda yigire ishobore gufasha abayitabaje.

Ati “Hari ibyagezweho ariko hari zimwe mu mbogamizi Croix-Rouge ihura nazo mu gufasha abatishoboye harimo n’amikoro make. Twe tugiye gukora ibishoboka uyu muryango wigire maze wishakemo ubushobozi bwo kugera ku nshingano zawo’.

Muri iyo gahunda yo gukomeza kwigira kugira ngo Croix-Rouge ikomeze kugoboka abayikeneye, inteko rusange ya gatandatu yemeje ko umusanzu w’umunyamuryango uba amafaranga y’u Rwanda ibihumbi bibiri (2.000 frw) ku bantu bakuru na magana atanu (500 frw) ku rubyiruko.

Ngo uyu muryango kandi uzanashyiraho ibikorwa rusange byafasha umuryango guhorana ubushobozi bwo kugera ku bawitabaje utabanje gutegereza akimuhana.

Ati“Ntidukwiye gushaka inkunga mu bandi ngo tubone gufasha. Tugiye gushaka uburyo uretse umusanzu w’abanyamuryango ba Croix-Rouge, umuryango wishakamo ubushobozi buhoraho kuko tutakwiringira inkunga ziturutse ahandi”.

Dr Bwito avuga ko Abanyarwanda batojwe umuco wo kwigira, bityo ko aba Croix-Rouge nabo batasigara inyuma, nk’umuryango ubundi ukwiye kugira ubushobozi kugira ngo nawo ufashe abatabufite.

Nk’uko bisobanurwa na Perezida wa Croix-Rouge y’u Rwanda ucyuye igihe Dr. Nzigiye Bernard, muri iyi myaka 5 ishize hubatswe amazu asaga 2.000 yubakiwe abanyarwanda bari mu kaga harimo abirukanywe bava mu gihugu cya Tanzaniya.

Umuyobozi wa Croix-rouge ucyuye igihe asanga ibyagezweho mu myaka 5 bishimishije

Harimo kandi abatahutse bava muri Repubulika Iharanira Demokarasi ya Congo, abari batuye mu manegeka n’abandi batishoboye. Ati “uyu muryango usanzwe ari umufatanyabikorwa wa Leta mu kugoboka abari mu kaga. Abo bose twubakiye bagiye banahabwa ibikoresho byo mu rugo banahabwa amatungo magufi n’amaremare”. Uyu muyobozi kandi yerekana ko hitawe ku bikorwa byo kuzamura imibereho myiza y’abaturage mu dusozi ndatwa aho abakene kurusha abandi bagiye bafashwa bashyirwa mu makoperative.

Dr Nzigiye avuga ko intambara Croix-Rouge y’u Rwanda irimo kurwana ari iyo guhashya ubukene mu baturage, aho avuga ko mu gihe cy’imyaka itanu amaze ayoboye uyu muryango imbogamizi zikomeye bahuye nazo ari iz’imyumvire y’abaturage ikiri hasi hamwe na hamwe n’amikoro make kubera ko ibikenewe gukorwa ari byinshi.

Mu ntako rusange ya 6 y’uyu muryango yateranye kuwa 24 Nyakanga 2016, abayigize banashyizeho ubuyobozi bushya bw’umuryango, nabwo bwahawe inshingano yo kongera umuvuduko mu guteza imbere abaturage bakennye n’abari mu kaga.

Perezida wa Croix-Rouge y’u Rwanda watowe Dr. Bwito Paul yasobanuye ko bagiye kusa ikivi abo basimbuye bari batangiye. “tugiye gukomereza aho abo dusimbuye bari bagereje ariko dushyiraho n’ibikorwa bishya”. Dr Bwito asobanura.

Muri iyo nteko rusange ya 6 hanatowe abayobozi b’umuryango mu ntara 4 n’umujyi wa Kigali. Henemejwe ko umusanzu w’umunyamuryango ku mwaka ari amafaranga ibihumbi bibiri (2000frw) ku bantu bakuru na Magana atanu (500frw) ku rubyiruko.

Umunyamabanga Nshingwabikorwa w’Intara y’Iburengerazuba, Jabo Paul, asobanura uko izo komite ngenzuzi zizajya zikora.

Uyu muyobozi avuga ko mu kwihutisha iterambere no kwiga ibyiza abandi bakora, ubuyobozi bw’iyi ntara bwafashe gahunda yo gushyiraho urwego rw’ubugenzuzi muri gahunda zose za Leta buzakorwa hagati y’imirenge ubwayo.

Agira ati «Nk’ubu mu birebana n’ikoreshwa ry’umutungo usanga mu karere hari abagenzuzi babiri gusa. Abo rero ntibashobora kugenzura ibigo byose biba mu karere. Kugenzurana hagati y’imirenge rero bizanoza imikorere binakureho abakoraga amakosa ntamenyekane ».

Jabo avuga ko ku murenge hazashyirwa komite igizwe n’abantu 10 iyobowe n’umunyamabanga nshingwabikorwa w’umurenge, igashyirwamo n’abantu b’ingeri zitandukanye nk’abakora mu bigo bya Leta n’ibyigenga, abikorera n’abandi.

Ku wa 28 Kamena 2016, Inama Njyanama y’Akarere ka Ngororero yatoye yemeje umushinga wo gushyiraho izo komite ndetse isaba komite nyobozi y’akarere gukurikirana ishyirwaho ryazo kugira ngo zizatangirane imirimo yazo n’ingengo nshya ya 2016-2017.

Njyanama ya Ngororero yemeza ko izo komite zijyaho.

Umuyobozi w’Akarere ka Ngororero, Ndayambaje Godfrois, yemeza ko izo komite zigiye gufasha mu gukurikirana buri munsi ishyirwa mu bikorwa rya gahunda z’akarere mu mirenge.

Ati «Iki gitekerezo tucyakiranye yombi kuko bizadufasha gukurikirana byimbitse uko imari ya Leta ikoreshwa ndetse n’uko serivisi zihabwa abazigenewe. »

Ubusanzwe imirenge ipiganira umwanya wa mbere mu kwesa imihigo, ariko ubu ngo igiye kujya isangira ubunararibonye mu kuyesa.

Perezida w’Inama Njyanama y’akarere ka Ngororero, Dr Emmanuel Ahishakiye, avuga ko nta kibazo asanga bizateza hagati y’imirenge.

Ati «Ikigamijwe ni ukwigira ku bandi. Umurenge uzigira ku wundi kugira ngo uzamuke kandi ndumva ntawakwima undi ibyiza kandi icyo twifuza ari uko imirenge yose yaba iya mbere mu kwesa imihigo ».

Umunyamabanga Nshingwabikorwa w’Intara y’Iburengerazuba, Jabo Paul, avuga ko ku ngengo y’imari yahawe uturere harimo amafaranga azafasha izi komite gukora neza akazi kazo.

Inzego zitandukanye mu Karere ka Ngororero zifatanyije n’Intore mu gusoza Urugerero rwa 2016.

Yabivuze kuri uyu wa Gatanu, tariki 24 Kamena 2016, mu gikorwa cyo gusoza urugerero rw’intore z’abanyeshuri basoje amashuri yisumbuye bo mu Karere ka Ngororero.

Mukantabana yagize ati «Urugerero ni icyiciro gikomeye ku ntore z’abanyeshuri. Hari byinsi baba batazi bungukira muri ibyo bikorwa, bigatuma bakurana ubumenyi n’ubushake mu kubaka igihugu. Abatitabira urugerero rero ni ibigwari. Ndasaba bagenzi babo bitabiriye, bazadufasha kubacengezamo amatwara yo gukunda igihugu cyabo.»

Muri uyu mwaka wa 2016, mu banyeshuri 1217 bagombaga gukora urugerero muri aka karere, 140 bangana na 11.5% ntibarukoze. Mu batararukoze ngo harimo ab’impamvu zidafatika, ari na bo bahamagarirwa kwisubiraho.

Intore 1077 zo mu Karere ka Ngororero zasoje urugerero rwa 2016.

Uretse abanyeshuri bishimira ibiganiro bahabwa mu gihe cy’urugerero hamwe n’ibikorwa bakorera hamwe, abaturage na bo babashimira ko babafasha mu bikorwa biba byarabananiye nk’ibirebana n’isuku.

Umutoni Algentine, umuturage wo mu Murenge wa Muhororo ati «Aba banyeshuri ni bo banyigishije gukora agatanda k’amasahani no gukora akarima k’igikoni keza. Sinarinzi ko kumena imyanda mu ngarani ari ngombwa, njye nayimenaga mu murima, ndabashima rwose.»

Rutazihana Theogene ufite umwana usoje urugerero rw’uyu mwaka, avuga ko umuhungu we yahinduye imyitwarire kubera urugerero n’itorero muri rusange. Ati «Umuhungu wanjye rwose usigaye ubona afite gahunda. Aribwiriza gukora, ntakijya mu gakungu, ntagisinda, mbese nsaba Imana ngo azagume uku.»

Umutahira w’Intore mu Karere ka Ngororero, Mukantabana Odette, anenga abatoroka urugerero.

Ubuyobozi bw’Itorero mu Karere ka Ngororero buvuga ko uretse kuba izi ntore zunguka ubumenyi, ngo iyo habonetse n’imirimo yihutirwa, zirifashishwa ndetse n’itanga amafaranga izi ntore zikazirikanwa. Bityo, ngo abatitabira ibikorwa by’urugerero baba bahomba byinshi.

Muri rusange, mu Karere ka Ngororero bamaze gutoza intore z’inkomezabigwi 7000, abagera kuri 400 bakaba ari bo batitabiriye ibikorwa by’itorero uko bikwiye.

Basanga ubuvugizi n’ubwitange bwabo bizakemura ibibazo by’abaturage.

Mu nama yo kuri iki cyumweru tariki 19 Kamena 2016, abanyamuryango ba FPR Inkotanyi bagaragaje ko hari abaturage bafite ibibazo byinshi ahanini bishingiye ku kudindira mu iterambere.

Biyemeza gukora ubuvugizi mu nzego zibakuriye kuko umuryango bayobotse ngo ufitiwe icyizere n’abaturage, nk’uko Kayinamura Alexandre, umukuru w’umuryango FPR Inkotanyi mu kagari ka Nyange yabirangaje.

Yagize ati “ Ibyo twagezeho ni byinshi, ariko haracyari ibikorwa bidindiza abaturage nko kutagira imihanda itunganye, amashanyarazi ataragera hose, amazi akiri makeya n’ibindi. Nka moteri ya guverinoma, tugiye gusaba abakuru bacu ko bakwihutisha gukora ibi bikorwa.”

Basanga ubuvugizi n’ubwitange bwabo bizakemura ibibazo by’abaturage.

Ibindi bibazo bikomeye bagaragaje ko bifuza ko byakorwa vuba harimo ibirebana no kubakira abatishoboye, guca ubuzererezi no kunoza imiturire.

Umuyobozi wa FPR mu Karere ka Ngororero Ndayambaje Godrois akaba n’umuyobozi w’akarere akaba yizeza aba banyamuryango ko ntakinanira abishyize hamwe.

“ Ati Nta bibazo tutazashobora biri imbere yacu. Twarahiriye gutera intambwe idasubira inyuma. Ibi mwita ibibazo rero ntimuhangayike biri kumwe n’ibisubizo byabyo.”

Aba banyamuryango ariko banasabwa kwita ku bikorwa byakozwe mbere yo gusaba ibindi, kuko hari ibyangirika hakiri kare nk’uko Uwamwiza Dative.

Ati Hari ibikorwa nk’imihanda usanga byaratwaye imbaraga z’abanyamuryango ariko bikangirika bidatinze. Mbere yo gusaba ibindi mubanze munakurikirane ibyakozwe mubibungabunge.

Mundanikure Joseph, umuyobozi w’umuryango mu Murenge wa Ngororero avuga ko atari ukwikubira ibikorwa bahuriyeho n’andi mashyaka ya politiki.

Ati “ Ubundi ibikorwa tubifatanya n’andi mashyaka, ariko tutirengagije uruhare rukomeye tubigiramo. Tuba twanabatumiye kugira ngo ibyo tuvuga n’ibyo duteganya gukora tuzakomeze tubisangire.”

Mu muhango wo gusoza iminsi 100 yo kwibuka wabereye ku Rwibutso rwa Kavumu mu Murenge wa Kavumu ku rwego rw’Akarere ka Ngororero, kuri uyu wa 8 Kamena 2016, Minisitiri Uwacu wifatanyije n’Abanyengororero yasabye abaturage cyane cyane abakuze « kurandura ingengabitekerezo ya Jenoside ikigaragara kuri bamwe no kurangiza kwishyura imitungo batsindiwe mu manza ».

Minisitiri Uwacu Julienne avuga ko nta gihe cyo kurwaza abadashaka kumva kigihari.

Minisitiri julienne yagize ati «Abantu bakuru ni bo bakomeje gushuka urubyiruko no kuruha amakuru atari yo barwerekeza ku ngengabitekerezo ya Jenoside. Abo ntituzakomeza kubarwaza kandi badashaka gukira, tuzafatanya n’inzego dukorana bagarukwe n’ibyo bakora».

Mutabisi Gaspard, warokotse Jenoside wo mu Murenge wa Kavumu, avuga ko muri ako gace hakunze kugaragara ingengabitekerezo ya Jenoside ahanini ishingiye ku bafite benewabo bakiba mu mashyamba ya Kongo.

Avuga kandi ko hari abacunga imitungo y’abarokotse Jenoside bagiye bahohoterwa ndetse bamwe bakanicwa.

Niyonsenga Jean d’Amour, uhagarariye abarokotse Jenoside bo mu Karere ka Ngororero, yagaragarije Minisitiri Uwacu ko ikibazo cy’imitungo itarishyurwa kibangamiye ubumwe n’ubwiyunge.

Yagize ati «Hari imitungo myinshi itarishyurwa kandi abantu batsindiwe. Bidindiza ubumwe n’ubwiyunge kuko ntiwakwiyunga neza n’umuntu mugifitanye urubanza».

Urubyiruko rwasabwe kwima amatwi abarushuka.

Minisitiri Uwacu yasabye ubuyobozi bw’akarere bwari buhagarariwe na Kuradusenge Janvier, Umuyobozi Wungirije ushinzwe Imibereho Myiza y’Abaturage, kwihutisha kurangiza imanza za Gacaca hifashishijwe uburyo bwose buteganywa n’amategeko kandi bigakorwa vuba.

Yagize ati «Ntabwo tuzahora dusubira mu bintu bitarangira, ubuyobozi bw’akarere n’abandi mufite inshingano n’uburenganzira bwo kurangiza imanza nimuvane iki kibazo mu nzira kandi mubikore byihuse».

Imanza za Gacaca zitararangizwa mu Karere ka Ngororero ni igihumbi na cumi n’eshashatu zifite agaciro ka miliyoni zikabakaba 771 z’amafaranga y’u Rwanda.

Urwibutso rwa Kavumu rwasorejweho ibikorwa rusange byo kwibuka muri aka karere rushyinguwemo abantu 367.

Mbanjimbere washinjwaga gukubita abaturage yahise yeguzwa.

Kuri uyu wa gatatu tariki 9 Kamena 2016, Minisitiri Kaboneka yagiriye uruzinduko muri uyu Murenge wa Muhanda uherereye mu Krere ka Ngororero, ari naho abaturage bashinjirije aba bayobozi babiri kubakorera urugomo rurimo no kubakubita.

Muri bo harimo umugabo witwa Ntambara umaze imyaka ibiri yivuza uruguma avuga ko yatewe na Mbanjimbere. Bavuga ko babakubita babahatira gukora vuba gahunda zitandukanye bababwira ko ari imihigo, nk’uko uwo Ntambara yabitangaje.

Minisitiri Kaboneka yavuze ko abo bayobozi batazongera kuyobora abo baturage.

Yagize ati "Nakubiswe na Gitifu maze antera uruguma n’ubu ndacyarwivuza kandi buri gihe baradukubita bakatubwira ko ntaho twabarega."

Nyuma yo gushinjwa n’abaturage batari bake, Minisitiri Kaboneka yahise yizeza abaturage ko abo bayobozi babiri bashyizwe mu majwi batakiri abayobozi babo.

Ati "Nimugende mukore mutuje ntawe uzongera kubakubita muri aba, kuko kuva ubu ntibazongere no kubayobora, akarere kabashakire abandi."

Abaturage babashinje kubakubita bari benshi.

Bamwe mu baturage bavuze ko ishimiye icyemezo Minisitiri yafashe cyo kubakiza abo bayobozi. Umwe ati "Nka njye ndi umucuruzi ariko bariya bayobozi baranjujubije pe! twishimiye ko babadukijije."

Ni ubwa kabiri Minisitiri Kaboneka asuye aka karere mu gihe kitarengeje iminsi 20, kuko yahaherukaga tariki 18 Gicurasi 2016 aho yari mu Murenge wa Nyange asaba abayobozi kujya bakemura ibibazo by’abaturage ku gihe.

Bamwe mu baturage barerura bakavuga ko bapfukiranwe.

Ngaboyishema Faustin umwe mu baturage, avuga ko hari n’ababuzwa kugera aho inama ziri bubere. Ati "Ntabwo watinyuka kuvuga bakubujijije. Nonese wavuga ukazatakira nde umutware yamaze kukwijundika."

Nyirakayijemahe Yozafina wo mu Murenge wa Kavumu, ni umwe mu batinyutse kuvuga ikibazo cye ariko umuyobozi w’akagari yamubujije nyuma aza kumwuka inabi bituma avanwa ku rutonde rw ‘abakene bafashwa. Ingaruka nkiyi ikaba ariyo ituma abenshi batinya kuvuga.

Kanyange Christine, umuyobozi w’akarere wungirije ushinzwe ubukungu, avuga ko hari abaturage babaha amakuru ko abayobozi babo mu tugari n’imidugudu bababuza kubaza ibibazo byabo iyo bari busurwe n’abayobozi.

Ngo iyo basuwe hari ababuzwa kubaza ibibazo byabo.

Avuga ko bituma ibibazo bikomeza kwiyongera, bikanatuma iyo haje abayobozi ku rwego rw’igihugu babazwa ibibazo byagombye kuba byarakemutse.

Agira ati "Byaragaragaye ko hari abayobozi bamwe bafata umunwa abaturage bababuza kuvuga ibibazo byabo iyo twabasuye cyangwa haje izindi nzego.

Ibi ni kimwe mu bituma abaturage batabizera ndetse bagaceceka maze haza abayobozi bakuru ugasanga barabazwa ibibazo bikwiye kuba byarakemutse."

Kanyange avuga ko ahanini ibyo biterwa n’amanyanga aturuka ku ruhare abayobozi nk’abo baba bafite mu kibazo cy’umuturage. Avuga ariko ko abameze gutyo bagiye guhagurukirwa akanabagira inama yo kwegura ku buyobozi kuko batabushoboye.

Umuyobozi w’akarere ka Ngororero Ndayambaje Godfrois, avuga ko icyo kibazo gihari, ahereye ku ruzinduko Minisitiri Kaboneka Francis aherutse kugirira muri aka karere, abaturage ngo bamubajije ibibazo byagombye kuba byarakemuwe n’inzego zo hasi, bikagaragaza ko hari abayobozi bategera abaturage cyangwa bakabpfukirana nyuma bakabirambirwa.

Muri gahunda ya leta ya VIUP, abaturage babasha kwishyira hamwe bagurizwa amafaranga yo gukora imishinga baba berekanye. Gusa muri aka karere hakomeje kuvugwa ko hari abagiye bakora amatsinda bagamije kwirira amafaranga kandi na bamwe mu bayobozi b’ibanze babizi.

Kanyange Chrishtine, umuyobozi w’akarere wungirije ushinzwe ubukungu, byatumye kugeza ubu, miliyoni zirenga 285Frw zagombye kuba zaragaruwe zitarishyurwa.

Kanyange Chrishtine, umuyobozi w’akarere wungirije ushinzwe ubukungu mu Karere ka Ngororero.

Agira ati “Hashyizwemo imbaraga nyinshi mu kwishyuza aya mafaranga ku buryo hari ayagarutse. Ariko ayahawe amatsinda ya baringa ahanini yashinzwe n’abayobozi niyo ataragaruka.”

Kanyange avuga ko hari abayobozi batatu mu tugari bafunzwe bakurikiranyweho ayo makossa, abandi barimo gukurikiranwa ngo hagarurwe ayo mafaranga ahabwe abandi.

Yongeraho ko hari abaturage bamwe batishyura amafaranga bahawe, bavuga ko ari inkunga leta yabageneye nk’abatishoboye. Gusa ngo abayobozi bakomeje kubasobanurira imikorere ya VUP n’imikoresherezwe y’ayo mafaranga.

Umukozi ushinzwe ibikorwa bya VUP mu karere, Ndayisenga Simon, agaragaza ko muri aka karere hamaze gutangwa inguzanyo ku mishinga zirenga miliyoni 833Frw.

Avuga ko hari amafaranga menshi yagarujwe ku mbaraga z’ubufatanye bw’inzego zitandukanye ariko hakaba hari amatsinda atarakozwe batarabona uko bishyuza.

Ati “Dufite ikibazo cy’abantu bagiye bakora amatsinda atabaho bagahabwa inguzanyo barangiza ntibishyure. Harimo gushakwa uburyo bakwishyuzwa hifashishijwe amategeko.”

Hari ariko n’abacungamutungo za Sacco z’imirenge bavugwaho gukoresha nabi amafaranga ya VUP ariko nabo bakaba barimo gukurikiranwa nk’abandi.

Kuva muri 2016 ibikorwa bya VUP bimaze kugera mu mirenge yose igize Akarere ka Ngororero. Muri rusange amafaranga yose amaze kwishyurwa angana na 68%, naho ayambuwe akaba 32%.

Minisitiri Seraphine Mukantabana yizeje abasenyewe n’ibiza ubufasha bwihuse.

Minisitiri wa MIDIMAR, Seraphine Mukantabana, yavuze ibi ku wa 18 Gicurasi 2016, ubwo yasuraga abaturage b’Umurenge wa Nyange mu Karere ka Ngororero, mu rwego rwo kubihanganisha no kubamenyesha ko Leta irimo gukora ibishoboka ngo abasenyewe n’ibiza babone aho batura.

Misitiri Mukantabana yabwiye abaturage ko Leta y’u Rwanda izi ko hari imiryango 450 yasenyewe n’ibiza burundu, irimo gukora ibishoboka byose kugira ngo iyo miryango yubakirwe.

Mu ntangiriro z’icyumweru gishize, Minisitiri w’Intebe Anastase Murekezi, yifatanyije n’abaturage b’Akarere ka Gakenke mu muhango wo gutabara ababuriye ababo mu biza byatewe n’imvura ndetse akabizeza ko Guverinoma y’u Rwanda izakomeza kubaba hafi.

Umuyobozi w’Akarere ka Ngororero, Ndayambaje Godfrey, avuga ko uretse ayo mazu yasenyutse burundu, hari n’andi yangiritse ku buryo hakenewe ubufasha mu kuyasana.

Agira ati «Mu by’ukuri ibiza twagize muri iyi minsi ni kimwe mu bibazo bikomeye dufite, kuko imiryango isaga 500 idafite aho iba.»

Minisitiri w’Ubutegetsi bw’Igihugu, Francis Kaboneka, na we wari muri urwo ruzinduko rw’akazi, yabwiye Abanyangororero ko icyo kibazo kizakemurwa vuba kandi ko n’Umukuru w’Igihugu azi ibyabaye muri aka karere akaba azabafasha mu kwihutisha ubufasha.

Ati «Ku biza mwahuye na byo, twaje kwifatanya namwe no kubamenyesha ko Umukuru w’Igihugu abizi kandi ko na we yiteguye gufatanya namwe mu gusubiza abasenyewe [n’ibiza] mu buzima busanzwe.»

Minisitiri Kaboneka yanashimiye abaturage bo muri aka karere uko bakomeje gufasha abasenyewe n’ibiza kuko ubu bose bacumbikiwe mu baturanyi babo.

Uretse inzu 450 zasenyutse burundu n’izindi zangiritse, abantu 6 bo muri aka karere bahasize ubuzima, imiryango yabo ikaba ikomeje guhabwa ubufasha butandukanye.

Minisitiri ushinzwe imicungire y’ibiza yongeye kwibutsa Abanyangororero ko gutura ku midugudu yateguwe ari umuti ukomeye wo kurwanya ibiza biterwa n’imvura.

Urugendo yakoze kuri uyu wa gatatu tariki 18 Gicurasi 2016, Minisitiri Francis yabwiye abatuye Umurenge wa Nyanye, bari biteguye uruzinduko rwa Perezida ariko rukaza gusubikwa ku mpamu z’akazi ako akibizirikana kandi azagaruka bidatinze.

Minisitiri Kaboneka aganira n’abaturage.

Yagize ati "Leta y’u Rwanda yifatanyije namwe mwese, ariko byumwihariko abahuye n’ibiza. Leta izakomeza kubafasha gusubira mu buzima busanzwe."

Minisitiri Kaboneka kandi yanaboneyeho umwanya wo guha impanuro abaturage aho yibanze cyane ku kibazo cy’abana bata ishuri n’imirire mibi n’isuku nke bikigaragara muri aka karere.

Ati "Sinumva ukuntu mwirirwa mwubaka ibyumba by’amashuri mwarangiza mugafasha abanyeshuli kurivamo. Ntibikwiye kandi kubona umwana ukirwara bwaki no kugwingira kubera kurya nabi."

Abaturage bizejwe ko umukuru w’igihugu azabasura vuba.

Abantu bakirangwa n’umwanda nabo bakwiye kumva ko umwanda utera indwara kandi kuwirinda bikaba byoroshye.

Yanavuze ko aho bigeze Leta igiye gukoresha imbaraga z’amategeko mu guhashya ikibazo cy’abana bata ishuli.

Mu bibazo yagejejweho n’umuyobozi w’Akarere ka Ngororero, Ministiri yavuze ko Leta ibinyujije muri Minisiteri ibishinzwe igiye gukemura ikibazo cy’imihanda yafunzwe n’inkangu nk’umuhanda Gatumba-Ndaro-Nyange ugana ku bitaro bya Muhororo.

Yari kumwe n’abayobozi batandukanye.

Yemeye kandi ubuvugizi mu gutanga uburenganzira bwo gucukura ibuye ry’agaciro ryitwa Amytiste ryavutse muri aka karere, bamwe mu baturage baricukura bitemewe n’amategeko.

Minisitiri kaboneka kandi yasabye inzego zibanze kurushaho kwegera abaturage kuko hari abagaragaje ibibazo byagombye kuba byarakemuwe.

Yari aherekejwe na Minisitiri ushinzwe Kurwanya ibiza no gucyura Impunzi Seraphine Mukantabana na Minisitiri Stella Ford Mugabo, Guverineri w’intara y’Iburengerazuba n’inzego z’umutekano.

Gakuru Peter, umukozi wa ENASE Ltd, sosiyete yinjiza mu Rwanda ikanahakwirakwiza inyongeramusaruro, avuga ko hari amafaranga bagabanya ku giciro cyazo ariko abacuruzi b’inyongeramusaruro mu karere ntibabyubahirize ngo abaturage bahendukirwe.

Ahanini abahinzi ngo bahendwa ku biciro by’amafumbire n’imiti y’ibihingwa.

Agira ati "Hari amafaranga tugabanyiriza abahinzi kugira ngo nabo babone inyungu ariko byagera ku bacuruza inyongeramusaruro ntibayakureho umuhinzi agakomeza guhendwa. Turasaba ko bikosorwa abagihenda abaturage bagakurikiranwa n’amategeko."

Gakuru avuga ko nk’ubu ifumbire yitwa DAP bayikatuye ku buryo umuturage yayigura amafaranga 420frw, ariko barimo kuyigura hejuru ya 445frw, abihereye ku bugenzuzi yakoze mu mirenge imwe n’imwe.

Ubusanzwe, minisiteri y’ubuhinzi igena ibiciro by’inyongeramusaruro mu gihugu, ariko abazinjiza mu gihugu bagakaturaho andi mafaranga mu rwego rwo gufasha abahinzi. Ayo akaba ariyo abacuruzi b’inyongeramusaruro bikubira aho kuyagabanyiriza ku baturage.

Uwayisaba Pacifique, umuyobozp wa koperative y’abacuruzi b’inyongeramusaruro mu Karere ka Ngororero we avuga ko ayo mafaranga bayagabanya ku giciro bagurishaho abahinzi.

Ati "Amafaranga turayagabanya kuko ntidushobora kujya hejuru y’igiciro minagiri ishyiraho."

Gusa yemeza ko DAP irimo kugura 445Frw, ibinyuranye n’igiciro gakuru avuga ko yagombye kuba irimo kugurwaho.

Hitimana Aloys, umuhinzi wo mu Murenge wa Kabaya, avuga ko batazi ibyo kugabanyirizwa ibiciro, asaba ko bajya bahabwa amakuru mbere bajya kugura inyongeramusaruro bakagenda bazi ibiciro bagombye kugurishwaho.

Abajyanama 42 bahawe izi telefoni babikesha kuba baruzuje neza inshingano zabo, nk’uko umuyobozi wa RAB mu Ntara y’Uburengerazuba Nuwumuremyi Jeannine yabitangaje ubwo yazibashyikirizaga kuwa kane tariki 28 Mata 2016.

Kuba indashyikirwa mu buhinzi byatumye bahabwa telefoni.

Yagize ati "Izi terefoni zihabwa uturere tubiri gusa muri buri ntara. Mu karere naho hatoranywa umurenge umwe gusa. Muri Ngororero twatoranyije Kabaya kuko abajyanama b’ubuhinzi baho bakora neza kurusha abandi, tukaba twifuje kubereke ko tubashyigikiye."

Habyarabatuma Elysaphane umujyanama w’ubuhinzi wahawe terefoni, avuga ko zigiye kubafasha gukora neza kurushaho.

Ati "Izi terefoni zigiye kutwongerera imbaraga kuko hari ubwo twakeneraga agoronome cyangwa guhana amakuru hagati yacu bikatugora. Twiteguye gukomeza kuba aba mbere muri aka karere."

Dusabimana Leonidas, umukozi w’Akarere ka Ngororero ushinzwe ubuhinzi nawe yemeza ko Umurenge wa Kabaya ari indashyikirwa mu bikorwa bishingiye ku bujyanama mu by’ubuhinzi, akaba asanga guhabwa terefoni mbere y’abandi babikwiye.

Ati "Kabaya twayitoranyije kuko abajyanama baho bongereye ubuso buhingwaho, bongera ikoreshwa ry’ifumbire ndetse banazamura ikoreshwa ry’imbuto y’indobanure, ku buryo bakwiye kubihemberwa."

Aba bajyanama b’ubuhinzi bahawe terefoni basabwe kuzikoresha uko bikwiye kugira ngo bakomeze kubera abandi urugero.

Rwamasirabo Aloys wo mu Murenge wa Nyange, agira ati « Nta kundi ! Igihano cy’urupfu Leta yacu yagikuyeho kuko iha agaciro ubuzima. Ubundi ni cyo cyari kimukwiye ariko icyo yahawe kirahagije azabona umwanya wo kwicuza ibyo yakoze.»

Ubwo Canada yashyikirizaga u Rwanda Leon Mugesera.

Umuturage wo mu Murenge wa Ngorororero, utarahigwaga muri Jenoside, utarashatse ko amazina agaragazwa, avuga ko we ababjwe no kubona Mugesera ahakana ibyo yakoze.

Ati «Kubona akihagararaho agahakana njye birambabaza! N’ubu numvise ngo arimo kujurira, ni akumiro kubona akomeje kurushya inkiko.»

Niyonsenga jean d’Amour, Umuyobozi wa IBUKA mu Karere ka Ngororero, avuga ko ari abarokotse jenoside yakorewe abatutsi n’abayigizemo uruhare mu Karere ka Ngororero bemeza ko Leon Mugesera ari we washishikarije abahutu kwica abatutsi.

Ati «Ari twe abarokotse, ari n’abagize uruhare muri Jenoside bireze bakemera icyaha tukaba twaranabababriye, twemeranywa ko Mugesera yaduhemukiye bikomeye. Twishimiye ko yahawe igihano bizatuma n’izindi nkoramahano zumva ko icyaha gikenya.»

Aha ni ho Leon Mugesera yavugiye ijambo rutwitsi mu 1992.

Ntamitondero Andereya, umusaza w’imyaka 74 wo mu Murenge wa Kabaya aho Mugesera yavugiye ijambo mu 1992 ryakanguriraga abahuti kwica abatutsi, na we avuga ko ntampamvu y’uko mugesera ahakana ibyo ashinjwa kuko yabivuze ahibereye ndetse abatutsi bagahita batangira kwicwa ako kanya.

Leon Mugesera yafashwe n’Inkiko zo muri Canada ashyikirizwa u Rwanda muri Mutarama 2012 ngo aburanishwe ku byaha aregwa. Nyuma yo kumuhamya ibyaha urukiko rukaba rwamukatiye igifungo cya burundu ku wa 14 Mata 2016.

Tariki 14 Mata 2016, ni bwo Musabimana Claver wo mu Kagali ka Rugeshi na Simbikeka d’Amour wo mu Kagari ka Birembo, batawe muri yombi nyuma yo gushinjwa n’abaturage imbere ya Guverineri w’Intaray’Iburengerazuba, ko babaka amafaranga ngo bahabwe inka.

Aba bakozi b’utugari bombi bemera icyaha bakavuga ko biteguye no kugisabira imbabazi.

Aba bayobozi bemera amakosa bakoze bakavuga ko biteguye gusaba imbabazi no kwishyura abaturage bose bahemukiye.

Kuri uyu wa Kabiri tariki 19 Mata 2016, mu nama yahuje inzego z’ubuyobozi n’iz’umutekano, abaturage bagera ku 100 bagaragaje ko barenganyijwe muri izo gahunda.

Umuyobozi w’Akarere ka Ngororero, Ndayambaje Godfrey, yavuze ko iyo myitwarire ibabaje.

Ati “Kubona abaturage bagenerwa inkunga na Perezida wa Repubulika, abayobozi bakamwaka ikiguzi, ntidushobora kubyihanganira.”

Imirongo miremire y’abaturage yatanze ikirego kuri ruswa batswe muri girinka.

Umuyobozi wa Polisi y’u Rwanda mu Karere ka Ngororero, SSP Marc Gasangwa, yavuze ko polisi igiye gukomeza gukurikirana abatanzweho amakuru n’abaturage.

Umujyanama wa Guverineri w’Intara y’Iburengerazuba, Nsengiyumva Laurent, yasabye ko n’abayobozi b’imidugudu batagarutse mu buyobozi ariko batanzweho amakuru, bakurikiranwa.

Ati “Ntabwo umuyobozi yakora ibintu nk’ibi ngo yigendere birangire. Iyi ni ruswa, bakurikiranwe bahanwe.”

Muri iki gikorwa, abayobozi b’utugari, imidugudu n’umurenge bahawe igihe cy’icyumweru uhereye ku wa 19 Mata, bakaba bamaze gukemura ibibazo byose byagaragaye n’ibitabashije kuvugwa.

Abanyamabanga nshingwabikorwa b’utugari bahawe igihe cyo kuba barangije ibibazo bigaragara muri Girinka.

Harimo no kugaragaza ingano y’amafaranga yose yatswe abaturage no gusubiza amafaranga abayambuwe kandi hagatangwa raporo ku rwego rw’akarere.

Biyemeje kandi ko mu byumweru bibiri abayobozi bazasubira kureba niba ibyo bibazo byarakemuwe.

Kuri iki Cyumweru, tariki 17 Mata 2016, Umuyobozi w’ibitaro bya Muhororo n’inzego zitandukanye bizihije umunsi mpuzamahanga w’abarwayi.

Abarwayi barwariye mu bitaro bahawe inkunga.

Ahishakiye Emmanuel, Umuyobozi w’Ibitaro, yavuze ko mu ndwara bahangana na zo, 10% ari izo abantu bashobora kwirinda ahanini zituruka ku mwanda.

Yagize ati "Mu by’ukuri, abantu baratugana tukabavura ariko ikibabaje ni uko usanga hakiri indwara nyinshi abantu bikururira zikabazonga. Hano muri ibi bitaro ziracyari nyinshi ku buryo abantu bakwiye kumva ko kwirinda biruta kwivuza."

IP Minani Alexandre, ukorera muri aka karere, yavuze ko ibyo byiyongeraho n’urugomo ruvamo gukomeretsa.

Umuyobozi w’Akarere ka Ngororero Wungirije ushinzwe Ubukungu mu, Kanyange Christine, yasabye abaturage kwisubiraho no kugirana inama bagafatanya kurwanya izo ndwara biteza.

Bamwe mu barwariye mu bitaro bya Muhororo bitabiriye ibirori.

Ati "Nimudufashe namwe mwifashe mujye muhwiturana mwongere isuku munarwanye ibindi byose byabateza indwara nk’izi zibatwara umwanya, amafaranga hamwe n’ubuzima."

Yanenze abaturage bagiseta ibirenge mu gutanga umusanzu w’ubwisungane mu kwivuza.

Sendama Faustin, umaze amezi atanu arwariye mu bitaro bya Muhororo, avuga ko bafashe ingamba zo kuzajya gukangurira bagenzi babo kwita ku isuku by’umwihariko kuko badahwema kuyigishwa muri ibi bitaro.

Abarwayi 100 barwariye mu bitaro bya Muhororo bahawe inkunga y’ibiribwa n’imyambaro, byaturutse ku bwitange bw’ingeri zitandukanye z’abagiraneza.

Ubusanzwe, umunsi w’abarwayi uba ku wa 11 Gashyantare, kuva washyirwaho na Papa Yohani Pawulo II mu 1992.

Babisabye Minisitiri w’Umuco na Siporo, Uwacu Julienne, ubwo kuri uyu wa Gatandatu, tariki 16 Mata 2016, yari yifatanyije na bo mu muhango wo kwibuka Abatutsi 7479 biciwe i Nyange basenyeweho Kiliziya muri Jenoside yabakorewe mu 1994.

Ministre Uwacu Julienne ubwo yifatanyaga n’abaturage ba Ngororero kwibuka Abatutsi biciwe i Nyange basenyeweho Kiliziya bari bahungiyemo.

Niyonsenga Jean d’Amour ukuriye IBUKA mu Karere ka Ngororero avuga ko gutinda kwandika amateka ya Jenoside yakorewe Abatutsi muri aka karere bishobora kuzatera icyuho ku bakiri bato, kuko abafite ibyo bazi cyangwa babonye, bagenda basaza.

Avuga ko aka karere gafite umwihariko ku birebana na Jenoside yakorewe Abatutsi kuko yahageragerejwe ndetse abicanyi bakaba barasenyeye Kiliziya ku Batutsi bari bayihungiyemo, bakabica.

Muri aka karere ka Ngororero ni na ho havuka Dr. Leon Mugesera uherutse guhamwa (n’urukiko) n’ibyaha bya Jenoside n’ibyibasiye inyoko muntu yari akurikiranweho ku ijambo yavugiye ku Kabaya mu 1992, ryashishikarizaga Abahutu kwica Abatutsi.

Niyonsenga Jean d’Amour ukuriye IBUKA mu Karere ka Ngororero asaba ko amateka ya Jenoside yakorewe Abatutsi muri aka karere yandikwa.

Minisitiri Uwacu yabwiye Abanyangororero ko hari ibyatangiye gukorwa kugira ngo amateka ya Jenoside mu Ngororero n’icyahoze ari Gisenyi muri rusange, yandikwe.

Yagize ati «By’umwihariko mu cyahoze ari Perefegitura ya Gisenyi, Komisiyo y’Igihugu yo Kurwanya Jenoside yatangiye kwegeranya ayo mateka kandi icyegeranyo kizasohoka vuba ku buryo amateka ya Ngororero na yo azaba agaragaramo.»

Umuhanzi Nigirente Laurent yashyize ahagaragara indirimbo ivuga kuri Jenoside yakorewe Abatutsi, i Nyange.

Ministre Uwacu avuga ko nubwo ubwo bushakashatsi butazaba ari umwihariko ku Karere ka Ngororero, bwazafasha abandi bashakashatsi gukomerezaho. Yasabye abayobozi, abarezi, abanditsi n’Abihaye Imana kugira ubushake mu kwandika amateka ya Jenoside.

Kuri uyu wa 3 Mata 2016, mu muhango wabereye mu Karere ka Ngororero, 36 muri abo bakobwa biswe “Inkubito z’icyeza” bahawe ibihembo (ikamba ry’ishimwe) na Madamu Jeannette Kagame, ari na we watangije uyu muryango.

Madamu Jeannette Kagame ashyikiriza ibihembo umwe mu Nkubito z’Icyeza.

Madamu Jeannette Kagame yavuze ko iyi gahunda igamije gushishikariza ababyeyi, abarezi n’abana by’umwihariko, kwimakaza umuco w’ubudasumbana bw’ibitsina, no guha agaciro umwana wese, kuko mu myaka ya cyera abana b’abakobwa batahabwaga agaciro maze bagasigara inyum mu burezi.

Yagize ati “Nk’uko mu bizi igihugu cyacu gikataje mu iterambere. Ni iki twahugiraho kindi tudahugiye ku bana bacu? Uruhare rwacu mu burere bw’abana rurakomeye mpereye ku barezi, ababyeyi n’abana”.

Muri muhango hari harimo na Lamin-Manneh, Umuhuzabikorwa wa Loni mu Rwanda.

Mu mwaka ushize, Umuryango Imbuto Foundation wizihije imyaka 10 utangiye guteza imbere uburere bw’umukobwa, ndetse ubu ukaba wizihiza imyaka 15 utanga umusanzu mu guteza imbere Umuryango Nyarwanda.

Umuyobozi w’Akarere ka Ngororero, Ndayambaje Godefroid, yashimiye Imbuto Foundation kubera ubufasha yatanze muri aka karere byumwihariko mu burezi.

Ati “Turashima cyane uyu mushinga kuko wadufashije mu gusubiza abana mu ishuri bari bararitaye. Mu myaka 2 gusa, abana 5000 barisubiyemo. Ni umusanzu ukomeye cyane”.

Byukusenge Anne Marie, umwe mu Nkubito z’Icyeza zahawe ibihembo, avuga ko iki gikorwa gituma abana b’abakobwa bagira umuhate wo kwiga neza.

Ifoto y’urwibutso.

Ati “Sinari nzi ko nzahembwa, ariko nifuzaga kuzaba nk’abambanjirije none mbigezeho. Nzi neza ko hari abandi bandi inyuma kandi bazakomereza aho tugeze”.

Muri uyu muhango, Inkubito z’Icyeza zahembwe zaturutse mu turere twa Rubavu, Karongi, Rutsiro, Nyabihu, Muhanga na Ngororero.

Andi mafoto

KUREBA ANDI MAFOTO MENSHI KANDA AHA

Abenshi muri abo bahinzi ni abahinga ibigori mu duce dufite imisozi miremire nka Kabaya, Muhanda, Sovu n’ahandi, aho ngo nkongwa ituma ibigori byabo byuma bitarera, kuri ubu bakaba batagishaka kubihinga.

Bavuga ko nkongwa yabagamburuje mu guhinga ibigori.

Mukezangango Cleophace, umuhinzi wo mu Murenge wa Kabaya, agira ati «Hashize igihe kigera ku myaka 5 turwaza nkongwa.

N’ubu dufite ibigori byamaze gufatwa ku buryo nta musaruro dutegereje, tumaze gucika intege aka karere dutuyemo ibigori bimaze kutunanira ».

Hari n’abahinzi bavuga ko ubwo burwayi bushobora kuba buterwa n’uko bahinduriwe imbuto. Tuganira kuri iki kibazo, Uwimana Theogene wo mu Murenge wa Muhanda, yagize ati “Bimera ari byiza byagera hejuru bimaze guheka bikabona gupfa.

Ubundi imbuto baduhaga mbere yareraga cyane, ariko iyo baduhaye ubu nta musaruro tuyibonamo».

Ikizere ni gikeya ku musaruro w’uyu mwaka.

Mbere y’uko nkongwa yibasira umusaruro w’aba bahinzi, ngo umusaruro wari waravuye kuri toni 1 kuri hegitari igera kuri toni 3, ariko byongeye gusubira hasi.

Rukundo Aimable, Umukozi wa RAB ushinzwe Ubuhinzi mu ntara y’Iburengerazuba, avuga ko nkongwa atari indwara idasanzwe ahubwo ko biterwa n’abahinzi batazi uko bakwita ku bihingwa byabo.

Ati «Natwe ubwacu hari imiti twabaha, ariko nkongwa si indwara ikanganye kuko n’abacuruza inyongeramusaruro babafasha kuyirwanya. Bashobora kuba barwaza ntibabimenye ».

Rukundo avuga ko iki kibazo kizakemurwa n’amavuriro y’ibihingwa (plant clinics) yakwirakwijwe mu mirenge aho abahinzi bajya gusuzumisha ibihingwa byabo.

Anavuga ko hashyizweho abajyanama mu by’ubuhinzi bafasha abahinzi binyujijwe muri gahunda ya «Twigire Muhinzi », aho asaba abahinzi bose kuyayoboka.

Nkubana Alphonse, Umunyamabanga Mukuru wa PSP (Parti pour la Solidarité et du Progrès), avuga ko hari abo bumva “bigize abavugizi b’Abanyarwanda, bavuga ko nta bwisanzure bafite kandi bihabanye n’ukuri”.

Perezida wa PSP, Kanyange Foiby.

Agira ati “Igihugu cyacu gifite umutekano n’ubwisanzure bw’amashyaka menshi. Usanga amashyaka yose ahabwa agaciro mu gufata ibyemezo, ndetse ijwi rya PSP ugasanga ringana n’irya FPR cyangwa andi mashyaka."

Yongeyeho, ati "Nta mashyaka akirirwa aterana amagambo cyangwa bakorerana urugomo nka kera. Ni yo mpamvu tutemeranya n’ababeshyera igihugu cyacu.”

Ishyaka PSP kuri ubu ririmo kuzenguraka Intara y’Amajyepfo mu bukangurambaga bwo gusobanurira Abanyarwanda n’abanyamuryango baryo amatwara yaryo rinabakangurira kuzitabira ibikorwa byo Kwibuka ku nshuro ya 22 Jenoside yakorewe Abatutsi.

Kuri uyu wa 13 Werurwe 2016, bari bari mu Karere ka Muhango ari na ho twaganiriye na Nkubana Alphonse ndetse na bamwe mu banyamuryango baryo.

Umuyobozi wa PSP, Kanyange Foiby (kuri terefone), we yadutangarije ko kuba batanga ibitekerezo bya politiki bikemerwa ndetse bakagira uruhare mu gukora ibikorwa by’iterambere mu bwisanzure, binyomoza abaharabika u Rwanda.

Ati “Hari gahunda nyinshi amashyaka atandukanye akora. Nkatwe twatangije gahunda ya ’Sasa neza Munyarwandakazi’, tugira uruhare muri gahunda z’imirire n’ibindi. Ntabwo tujya ku rugamba n’intwaro ariko twiteguye gutabara aho igihugu cyaterwa n’abagitesha agaciro, dukoresheje ijwi ryacu.”

PSP iravuguruza abavuga ko mu Rwanda hatari demokarasi.

Komite Nyobozi ya PSP irimo kuzenguruka igihugu isobanura amatwara y’ishyaka inasaba Abanyarwanda kuzitabira ibikorwa byo kwibuka ku nshuro ya 22 Jenoside yakorewe Abatutsi mu Rwanda mu 1994.

Bamwe mu bagize iri shyaka ariko, basanga hakiri ibibura bifuza ko ishyaka ryabo rigiramo uruhare ngo bihinduke.

Mutoni Chadia wo mu Karere ka Nyamagabe avuga ko basanga Umuco Nyarwanda ushingiye ku bikoresho gakondo n’ururimi ugenda ukendera akaba asanga ishyaka ryabo ryabikoraho ubuvugizi.

Umunyamabanga Mukuru w’iri shayaka avuga ko byatangiye, ndetse ko PSP yagize uruhare mu gusaba ko Ikinyarwanda cyakongera kuba ari rwo rurimi rwigishwamo asasomo yose mu mashuri abanza uretse ay’indimo, kandi ko ubuvugizi bugikomeje.

Muri aka karere uretse amashuri make yegereye ibigo nderabuzima, usanga ibigo by’amashuli byarakosheje ingobyi gakondo, ari zo zifashishwa buri gihe mu kugeza abarwayi kwa muganga.

Infirmeries ngo zabafasha kwita ku barwayi

Ibi ngo biterwa n’uko imiterere y’Akarere ahenshi itorohereza imodoka kugera ku bigo by’amashuli, hakiyongeraho ko imbangukiragutabara zikiri nke kandi amashuli menshi adafite ubushobozi bwo kwigurira imodoka.

Maniragaba Laurent, umuyobozi w’ishuri mu Murenge wa Muhororo avuga ko izo mpamvu zose zituma bakosha ingobyi gakondo, aho bifashisha abanyeshuri mu kugeza abarwayi kwa muganga. Ati”Amashuli yacu nta modoka agira, ndetse n’imbangukiragutabara uretse kuba ari nke ariko nta n’ubwo zabasha kugera hose, ni ikibazo kitatworoheye”.

Uyu muyobozi avuga ko amashuli afite umwarimu uhabwa amasaha make yo kwigisha akaba ari we ujya kwita ku banyeshuri bajyanywe kwa muganga kugeza igihe ababyeyi be bazahagerera. Bamwe mu banyeshuli nabo batangaza ko bamaze kumenyera ko isaha iyo ariyo yose bashobora gusabwa kujyana umurwayi kwa muganga.

Uwamungu Elie wiga kuri GS Kanogo agira ati “Ntibitubangamiye kuko ni bwo buryo dufite bwo gutabara mugenzi wacu ugize ikibazo. Animateri asaba ababishaka guheka umurwayi tumujyana ku kigo nderabuzima nko mu bilometero 3 uvuye ku ishuli”.

Ingobyi zihora ziri hafi ku bigo by’amashuli bimwe

Hari abayobozi basanga kugira utuvuriro duciriritse (infirmeries) ku mashuli byajya bibafasha kwita ku murwayi byibanze mu gihe yaba yarwaye bikomeye hategerejwe imbangukiragutabara. Mu bigo by’amashuli 100 byo mu karere ka Ngororero 2 gusa Nibyo bifite imodoka zabyo zishobora kwifashisha havutse ikibazo gikomeye.

Muganza JMV, umuyobozi w’ubuzima muri aka karere avuga ko n’ubwo uburyo bwo gukoresha ingobyi gakondo butizewe cyane bitewe n’icyo umurwayi arwaye, ngo ari bwo bushobozi buhari, ariko ko barimo gukorana n’abafatanyabikorwa mu by’ubuzima ngo bashake uko babona ingobyi zafasha kurusha izisanzwe.

Bimwe mu byo abagenzi binubira ni uburyo abakorera imodoka zitwara abagenzi babakurubana babarwanira, kubatinza mu nzira no guhindagura ibiciro uko bishakiye.

Abashaka abagenzi baba babyiganira ku modoka babarwanira.

Abafite aho bahuriye n’iki kibazo bavuga ko kurwanira abagenzi biterwa n’imodoka za ONATRACOM zagabanije ibiciro, nk’uko Hitimana Ali, ukuriye abakorera muri iyo gare abivuga.

Ati “RURA yashyizweho igiciro cy’amafaranga 2000frw. Ariko ONATRACOM yo igatwarira 1500frw. Abandi nabo bakagabanya amafaranga kandi ntacyo twe twakora ngo tubabuze.”

Hitimana avuga ko babimenyesheje Polisi ko hari abagenzi babangamirwa
ibaha ishami ryayo rikorera muri gare.

Umukozi wa sosiyete ya SAGA PLAGE, avuga ko ubuke bw’abagenzi no kugabanya ibiciro kwa ONATRACOM bitazatuma akajagari gashira.

Bahera impande zose barwanira abagenzi ari na ko bakatura ibiciro.

Nubwo ibindi bigo bitwara abagenzi biterura ngo bivuge ko byagabanije ibiciro mu guhangana na ONATRACOM, abafite sosiyete zitwara abagenzi bajya i Kigali bakatirwa amatike bamaze kwambuka Nyabarongo, bageze mu Karere ka Muhanga aho bemerewe kugurisha itike 1500frw.

Ibrahim Mvugwihamye ukorera International Express asanga atari ukugabanya igiciro, ahubwo ibiciro bigabanywa na ONATRACOM bemeza ko itagenzurwa na RURA.

Ubuyobozi bwa RURA ntibwifuje kugira icyo butangaza ku birebana no kuba iki kigo cyaba kitagenzura ONATRACOM cyangwa niba ba nyir’imodoka bemerewe kugabanya ibiciro bya RURA uko bashatse.

Lt Colonel Murasanyi J Bosco, Umuyobozi w’agateganyo wa ONATRACOM, avuga ko batazi niba hari abakozi bagabanije ibiciro kuko ibyo bagenderaho ari ibiciro rusange.

Ati “Ntabwo twaba tugura amavuta y’imodoka nk’abandi hanyuma ngo tugabanye ibiciro. Gusa, byashoboka ko hari abajya guhangana ku isoko, ariko icyo kibazo kiraba cyakemutse mu byumweru bibiri kuko ONATRACOM yamaze guhabwa indi sosiyete izaba iyikoresha kandi yigenga.”

Guhagarara kwa hato na hato mu muhanda bibangamira abagenzi

Bavuga ko imodoka zihagarara henshi n’ahatari ibyapa.

Abagenzi bo basanga nubwo hari abunguka mu gucibwa amafaranga make ku yari ateganyijwe ariko babangamirwa n’ibidakorwa uko bikwiye.

Nyiramana Jeannette agira ati “Wenda twakwishimira ko ako kavuyo kabo gatuma ducibwa amafaranga makeya ariko na none, duhombera mu gutakaza igihe kinini mu nzira.”

Mustapha Munyantwari, Umuyobozi wa gare ya Ngororero, avuga ko hari abahagarara inshuro nyinshi n’ahantu hatemewe bashaka abagenzi.

Aho imodoka zemerewe guhagarara kuva Ngororero kugera mu Mujyi wa Muhanga ni ahamtu umunani. Ariko abakoresha uyu muhanda bavuga ko zihagarara inshuro zirenga 15 zose.

Bituma igihe kiri hagati y’isaha n’isaha n’iminota 15 zikoresha kugera i Muhanga kigera mu masaha abiri cyangwa aburaho iminota micye.

Nubwo ibigo bitwara abagenzi bikorera muri aka karere byose bifite umukozi kuri buri cyapa kemewe na Polisi, usanga muri izo modoka harimo abakozi bazwi nka komvuwayeri (Convoyeur) bagenda binjiza abagenzi ari na bo babishyuza.

Akajagari nkaka kagiye kirukanisha abakozi abandi bagafungwa

Polisi yashyize ishami ryayo muri gare ngo rifashe mu gucunga umutekano.

Muri Mutarama 2014, abakozi 10 bakoreraga International Express, La Colombe Express, African Tours n’abashakiraga abagenzi imodoka zizwi nka twegerane birukanywe muri Gare ya Ngororero, kubera kurwanira abagenzi no kubahungabanya, babashikuza ibyo bafite ngo babishyire mu modoka.

Umwaka ushize undi mukozi yarafashwe arafungwa akurikiranyweho gukoresha ibiyobyabwenge muri gare.

Muri uyu mwaka, ONATRACOM yashyizwe mu majwi nyuma y’uko izindi modoka zahagararaga muri gare nshya naho yo igahagarara kuri sitasiyo, mu rwego rwo gushakisha abagenzi ariko polisi iza gukemuraa iki kibazo.

SSP Gasangwa Marc, umuyobozi wa Polisi mu Karere ka Ngororero, avuga ko bashyize abapolisi muri gare kugira ngo bafatanye n’abayiyobora kurwanya akajagari no guharanira umutekano w’abagenzi.

Avuga kandi ko biteguye gufatanya na RURA mu gutuma abatwara abagenzi bubahiriza ibyo amategeko asaba.

Iki kibazo ni kimwe mu bimenyerewe muri aka karere, aho usanga ku biro by’imirenge n’iby’akarere hahora abaturage baza gusaba kurenganurwa bavuga ko bambuwe na ba rwiyemezamirimo kandi bikamara igihe kirekire batarishyurwa.

Aba ni bamwe mu bambuwe, bari bazindukiye ku karere gusaba kwishyurizwa.

Ntibarikure Mathias na bagenzi be, bavuga ko bambuwe amafaranga bakoreye mu 2003 bubaka isoko ry’ahitwa Mutake mu Murenge wa Kavumu. Iyo imyaka 13 ngo bayimaze basiragira mu buyobozi ariko ntibishyurwa.

Umunyamabanga Nshingwabikorwa w’Akarere ka Ngororero, Niramire Nkusi, yemeza ko aba baturage basiragiye kenshi bishyuza, bamwe bakishyurwa abandi ibibazo byabo bikaba bigikurikiranwa.

Agira ati “Ntiturabona neza umubare w’abantu n’uw’amafaranga bambuwe, ariko turimo kubikurikirana kugira ngo abambuwe na ba rwiyemezamirimo bahawe isoko n’akarere tubishyurize.

Twarabitangiye ubu bamwe barishyuwe ariko hari n’aho dusaba izindi nzego zatanze amasoko ko zakwishyuriza abaturage kuri ba rwiyemezamirimo bayahaye.”

Baba bitwaje ibipande bigaragaza ko bakoze.

Ba rwiyemezamiromo bashyirwa mu majwi mu kwambura abaturage ni Rwiyemezamirimo Usengimana Richard wahawe isoko n’Ikigo cy’Igihugu gishinzwe Ubwikorezi (RTDA), akaza guhagarika imirimo atayisoje ntanishyure abaturage.

Bamwe muri ba rwiyemezamirimo bavugwaho kwambura abaturage bemera kwishyura, ariko ubuyobozi bw’imirenge bukavuga ko abambuwe babarirwamo, ni uko usanga hari abatemera igiteranyo cy’amafaranga bishyuzwa bakayagabanya.

Ndagijimana Faida umwe muri ba rwiyemezamirimo batarishyura abaturage avuga ko badafite gahunda yo kwambura.

Ati “Mu kazi hari ubwo uhura n’ingorane zitunguranye zikaba zatuma utinda kwishyura. Ku ruhande rwanjye ndumva ntawajya gukora isoko agambiriye kwambura, ni nayo mpamvu dukorana n’ababishinzwe ngo abakozi bacu bishyurwe nubwohari ubwo bitinda.”

Nubwo uyu rwiyemezamirimo adatanga itariki yo kwishyuriraho abaturage, ntibibuza ko umunsi ku wundi, umwaka ku w’undi umubare w’abaturage baarega ko bamburwa na ba rwiyemezamirimo ukomeza kwiyongera.

Iyi gahunda ihinduwe nyuma y’uko tariki 31 Ukwakira 2015, umuyobozi w’urwego rushinzwe Intwari z’Iguhugu, impeta n’imidari by’ishimwe, Pierre Damien Habumuremyi, yari yizeje abatuye Ngororero ko abana b’intwari z’inyange bazashyingurwa mu gicumbi cyazo.

Minisitiri Uwacu Julienne asobanurirwa aho imirimo yo kubaka igeze i Nyange.

Icyo gihe nibwo hahise hatangira imirimbo yo kubaka icyo gicumbi. Gusa mu ruzinduko Minisitiri Uwacu yakoreye muri aka karere kuwa kane tariki 11 Gashyantare 2016, yatangaje ko kwimura imibiri y’izo ntwari bitagikozwe.

Yagize ati “Nk’uko byemejwe n’inama y’abaminisitiri, kwimura imibiri y’Intwari si ngombwa. Icyingenzi ni ukuzubakira igicumbi cyazo kiziranga. Ntabwo rero tukimuye imibiri y’izi ntwari. ”

Gusa yongeyeho ko hari umwe muri izo ntwari ushyinguye mu Murenge wa Nyange hadatunganye, ari we uzimurwa akazanwa ku gicumbi cy’intwari.

Yasabye ko kubaka igicumbi cy’intwari birangira bitarenze kuwa 25 Gashyantare.

Yanasabye ko imirimo yo kubaka icyo gicumbi yakwihutishwa kuko yadindiye, ku buryo bitarenze tariki tariki 25 Gashyantare yaba yarangiye ku buryo itariki yo kwibuka izi ntwari izaba tariki 19 Werurwe izasanga hatunganye.

Umuyobozi w’ishuli abo bana bigagamo, ES Nyange, ari naho hubatwe igicumbi cyabo, Uwamungu Gapasi Leonard, avuga ko nta kibazo bafite ku kuba iyo gahunda ihindutse.

Ati “Leta niyo ireberera abanyarwanda kandi ntiyaduhitiramo ibibi. Ndumva nta kibazo biduteye kuko nubundi harimo kubakwa ngo habungabungwe amateka.”

Yemeye ubuvugizi mu kuvugurura ishuli rya ES Nyange.

Avuga ko bishimiye ko Minisitiri Uwacu usanzwe ari n’imboni ya Guverinoma muri aka karere, yemeye ubuvugizi mu gusana iryo shuli akanasaba akarere gukora bya vuba umuhanda uriganaho.

Abari abanyeshuri b’i Nyange bashyizwe rwego rw’Intwari z’Imena ni Bizimana Sylivestre, Mukambaraga Beatrice, Ndemeye Valens, Benimana Hélène, Mukarutwaza Séraphine, Niyongira Ferdinand na Mujawamahoro Marie Chantal ari nawe wenyine uruhukiye ahubakwa igicumbi i Nyange.

Abo baturage bari barahawe akazi mu kubaka isoko rya Birembo riherereye mu Murenge wa Sovu mu Kagari ka Birembo mu Karere ka Ngororero.

Bamwe muri abo baturage na Rwiyemezamirimo baganira n’abadepite

Bavuga ko barenga ijana ariko badafite imibare neza kuko amalisiti banditsweho afungiranye mu biro bya rwiyemezamirimo, ndetse kugeza ubu bakaba bahora ku murenge basaba kwishyurizwa.

Umwe mu bari bashinzwe abakozi muri iyo mirimo yemeza ko rwiyemezamirimo witwa Ndagijimana Faida ngo ahora abeshya abakozi ntaze kubishyura bakaba bararambiwe ndetse rimwe na rimwe bakagaragaza umujinya nko gushaka kwica urugi ngo bafate ibipande bakoreyeho nk’ikimenyetso cy’uko batishyuwe.

Hategekimana Damascene, umufundi na we uri mu bambuwe agira ati “Uyu mugabo ahora atubeshya ni ngo araza kutwishyura ntaze. Akaba ari yo mpamvu tumaze kugira umujinya. Mu minsi ishize twakoze imyigaragambyo hano ariko ntibyagira icyo bitanga, ubu tugiye kujya ku karere kuko umurenge utadukemurira ikibazo”.

Hamwe na bagenzi be ngo ntibazahara amafaranga akabakaba miliyoni 4 rwiyemezamirimo yabambuye. Ndagijimana we yemera ko afite umwenda ungana gutyo koko ndetse ko yemera kwishyura.

Ku wa 25 Mutarama 2016 ubwo abadepite baherutse mu Karere ka Ngororero basuye abo baturage ndetse na Rwiyemezamirimo ahari.

Icyo gihe hijeje izo ntumwa za rubanda ko azaba yishyuye abaturage bitarenze ku wa 29 Mutarama 2016, ariko kugeza ubu ntarabikora.

Nubwo abaturage bakomeje gusaba kwishyurwa kuko bimaze igihe kandi bakaba baratakaje icyizere, Depite Mukandekezi Petronille, yabizeje ko bazishyurwa.

Yagize ati “Hari amafaranga akarere kagifitiye rwiyemezamirimo, ntabwo rero ashobora kubambura kandi twizeye ko azubahiriza ibyo atubwiye”.

Ubu, bigaragara ko ibyo Ndagijimana yemeye atabikora kandi abo afitiye umwenda bavuga ko ari uko bisanzwe. Uretse aba baturage, hari n’abacuruzi afitiye amafaranga ya sima, amabuye n’imicanga tutabashije kumenyera agaciro k’ibyo bamuhaye.

Twagerageje kuvugana n’uyu rwiyemezamirimo atubwira ariko ko nta bushake yagize muri uko kutishyura ahubwo ko yabuze amafaranga ku buryo arimo kugurisha imwe mu mitungo ye ngo ashobore kwishyura.

Ndikumana Caludien, Umukozi ushinzwe Ubuhinzi mu Murenge wa Sovu, avuga ko ibigega bizajya bihunikwamo umusaruro w’ubuhinzi byubatswe muri uyu murenge bigiye gufasha abahinzi kubona isoko ry’umusaruro n’inyongeramusaruro, bikazabafasha gukizwa n’imirimo yabo.

Kimwe mu bigega bibiri byubakwa i Sovu mu Karere ka Ngororero.

Ati “Twagize amahirwe Minisiteri y’Ubuhinzi n’Ubworozi itwubakira ibi bigega. Abahinzi ba hano bagiraga ikibazo cy’umusaruro batageza ku isoko kubera umuhanda mubi no gutura kure ya kaburimbo. Ibi bigega rero bizabafasha nta kabuza.”

Ndikumana avuga ko ubundi muri aka gace hera cyane ibirayi, ingano n’ibigori ariko abahinzi bakabura isoko, bigatuma bahendwa cyangwa umusaruro ukabapfira ubusa.

Semana Claver, umwe mu bahinzi bo muri ako gace, avuga ko akurikije uko basobanuriwe ibi bigega, bigiye kubabera igisubizo.

Buri muturage ubishaka yaba atuye muri uyu murenge cyangwa ahandi, ngo yemerewe kujya muri koperative y’abazakoresha ibi bigega yishyuye amafaranga ibihumbi 5Frw.

Hibukimfura Jean Pierre, Umunyamabanga Nshingwabikorwa w’Agateganyo w’Umurenge wa Sovu, avuga ko aho ibi bigega byakoreshejwe, byazamuye abahinzi benshi, ari na ho bakuye isomo.

Agira ati “Twarebeye ku turere nka Rwamagana aho abahinzi bishyize hamwe bakajya bahunika umusaruro wabo none byakijije benshi kandi hano na ho harera cyane.”

Ibi bigega ngo bizafasha abahinzi gutera imbere.

Ibi bigega 2 byubakwa i Sovu ya Ngororero bizuzura bitwaye abarirwa muri miliyari 1 y’amafaranga y’u Rwanda.

Uretse kuba koperative y’abahinzi izajya ihunika imyaka ikayishakira isoko, ngo izajya inatanga imbuto n’izindi nyongeramusaruro ku bahinzi.

Abayigize bavuga ko bateganya kuzakora uruganda rucirirtse ruzajya rutunganya umusaruro bahunitse bakawongerera agaciro.

Ibigega nk’ibi, ngo ni icyitegererezo mu Karere ka Ngororero no mu turere bihana imbibi, ku buryo n’abatuye hanze y’aka karere bashaka gukora ubuhinzi bw’umwuga, bemerewe kujya muri koperative izakoresha ibyo bigega.

Muri aka karere hari hatangijwe ibyumba 35 byose byadindijwe no kubura amabati naho ibindi bikoresho byari bihari ndetse amashuri yarubatswe.

Ibyumba by’amashuli 35 byose nta na kimwe kiruzura

Ndorayabo Evariste, umukozi w ‘akarere ushinzwe gukurikirana inyubako z’amashuri, avuga ko impamvu y’uku gutinda ari rwiyemezamirimo (uruganda SIMACO Ltd), wazanye ibikoresho bitujuje ubuziranenge bikubiye mu masezerano bigasubizwayo.

Ati «Rwiyemezamirimo ntiyazanye amabati yari yarasabwe bituma asubizwayo maze bitinza imirimo yo kubaka ibyumba by’amashuli ». Ibyumba by’amashuri 35 byose byagombaga gutangira gukorerwamo mu ntangiriro z’umwaka w’amashuri 2016 dore ko yagombaga kumurikwa ku wa 30 Ugushyingo 2015.

Iki gihe SIMACO Ltd yongeye kuzana amabati na bwo asubizwayo. Bamwe mu bayobozi b’ibigo by’amashuri banavuga ko babangamiwe n’umwanda w’ibikoresho nk’imicanga, amabuye n’amatafari bikinyanyagiye mu mashuri hagati.

Bavuga kandi ko hari ibyumba by’amashuri byifashishijwe nk’ububiko bw’ibikoresho ubu bigifunze bakaba bataribubashe kubyigiramo, bagasaba ko byafungurwa kuko bisanzwe byigirwamo.

Abayobozi b’amashuli bahangayikishijwe no kutabona ibyo byumba hamwe n’umwanda uri mu kigo

Mu gitondo cyo ku wa 2 Gashyantare 2015, Habarurema Denys, Umukozi ushinzwe Uburezi mu Karere ka Ngororero avuga ko bandikiye Ikigo cy’Igihugu cy’Ubuziranenge basaba ko ayo mabati apimwa kuko SIMACO yayazanye inshuro 2 yangwa ariko ko kutaboneka kw’ibyo byumba bitaribuhungabanye itangira ry’amasomo.

Ati «Twandikiye RSB ngo idupimire ariya mabati, ubu dutegereje igisubizo. Biriya byumba ntabwo biribubuze amasomo gutangira kuko ibyinshi ni ibisimbura ibindi bishaje kandi byari bigikoreshwa. Gusa turashaka uburyo mu bigo hakorwa amasuku kugira ngo ibikoresho byo kubabangamira».

Mu gihe hari abayoboraga uturere bavuga ko bajyanye ipfunwe ryo kudasohoza bimwe mu byo basanga byari bikenewe, uwari Umuyobozi w’Akarere ka Ngororero, Ruboneza Gedeon,avuga ko we na bagenzi be bakigera mu buyobozi bubatse icyo bise “umuryango wa Ngororero” (Ngororero Family) waranzwe no gukorera hamwe nk’ikipe (team work) no gutahiriza umugozi umwe.

Mazimpaka Emmanuel yari ashinzwe ubukungu

Mu ihererekanya bubasha, imbere y’abakozi b’akarere n’inzego z’umutekano; Ruboneza yagaragaje intambwe akarere kamaze gutera aho kazamutse mu bukungu n’imibereho myiza y’abaturage. Ibi ngo bituma bishimira uko bakoze muri manda zabo.

Abazi Ngororero ikibamo amacakubiri, ubukene n’ubwigunge ubu ngo bayigeramo bagatangara. Mu by’ingenzi bavuga ko bagezeho harimo kuba haragabanijwe ubukene ku buryo abaturage bari munsi y’umurongo w’ubukene bavuye kuri 64% bagera kuri 49.6% naho abari mu bukene bukabije bakava kuri 38% bagera kuri 23.5%.

Ingo zifite amashanyarazi zavuye kuri 4% zigera kuri 17.2% naho abaturage begerejwe amazi meza bava kuri 49% bagera kuri 63%.

Ruboneza Ngo agiye yemye

Mu myaka itanu ishize, Akarere ka Ngororero kegukanye ibikombe bitandukanye: Igikombe cy’uburezi (2010/2011) ; Igikombe cya Coffee of Excellence (2010) ; Igikombe cy’Igikorwa ntangarugero cy’umuganda (2010/2011) aho abaturage b’Umurenge wa Kavumu bikoreye urugomero ruto rw’amashanyarazi, Igikombe cy’Imyumvire myiza cyatanzwe na Unity Club muri 2013; Ibikombe 2 by’Imihigo (2013-2014) na (2014-2015). Ibi 2 bya nyuma byatanzwe na Nyakubahwa Perezida wa Repubulika.

Mu butumwa yoherereje aba bayobozi bacyuye igihe, Perezida w’Inama Njyanama y’Akarere, Bigenimana Emmanuel, yagize ati "...tubashimiye uburyo twakoranye nk’ikipe imwe kandi ifite intego.

Turabashimira ubwitange n’umurava mwakoranye tukaba twarashoboye kuba indashyikirwa no gutera intambwe ikomeye mu iterambere ry’Akarere kacu”.

Nyiraneza Clotilde yari ashinzwe imibereho myiza

Aba bacuruzi basanga kuba batanga amafaranga y’ipatante, umusoro n’amahoro y’akarere angana n’ayakwa abacuzi bakorera mu mijyi, ari akarengane bamwe bakihisha ababishinzwe.

Aha bita ku Cyome barasaba kugabanyirizwa imisoro.

Bamwe mu bakorera mu murenge wa Gatumba ahitwa ku Cyome, no mu murenge wa Sovu ahitwa mu Birembo, hose haremera amasoko inshuro ebyiri mu cyumweru ari nabwo abacuruzi babasha kugurisha, bavuga ko amafaranga bakorera aho bayishyuzwa nk’abakorera mu mujyi.

Harelimana Jean Damascene uhagarariye abikorera bo mu murenge wa Sovu, avuga ko bakwiye kugabanyirizwa amafaranga bakwa, kuko n’ubwo iminsi ibiri ifatwa nk’iyisoko aho baba biteze abakiriya, na bwo ngo umunsi umwe niwo isoko rirema neza.

Agira ati “Nk’aha ni mu cyaro. Urebye ducuruza rimwe mu cyumweru kuwa gatanu isoko ryaremye. Ku yindi minsi hari abatirirwa bafungura. Nyamara batwaka amafaranga angana n’ayakwa abacururiza mu mijyi ugasanga duhora gukwepana n’abayaka.”

Aha mu birembo nabo ngo bakora rimwe mu cyumweru.

Nzabonimpa Emmanuel ukorera ku cyome, avuga ko hari n’abagomba kugurisha imyaka yabo bahinze kugira ngo bishyure amafaranga bakwa kuko ubucuruzi bw’umunsi umwe mu cyumweru butabasha kubyishyura.

Ati “Akarere gakwiye kutwumva ntibadufate nk’abacuruzi bakora buri munsi, kuko babizi ko dukora rimwe mu cyumweru. Ni ukubura ikindi umuntu akora agashakishiriza hose.”

Bavuga ko amafaranga bakwa y’uburenganzira bwo gucuruza (patente) 30.000frw, bagatanga 3.000frw y’umusoro buri kwezi, 1.000frw cy’umutekano, 1.000frw cy’isuku n’andi 10.000frw ngo bakwa bita ayinyubako.

Umukozi w’akarere ushinzwe kwakira amahoro avuga ko bitoroshye gusubiza ikifuzo cy’aba bacuruzi kuko ibyemezo by’amafaranga yakwa bifatwa n’inama njyanama y’akarere, kandi igikorwa cyo kuyakusanya cyarashyizwe mu maboko y’ikigo cy’Igihugu cyakira imisoro n’amahoro, akabasaba kubahiriza amategeko.

Bamwe muri aba batuye mu mirenge ya Gatumba na Ndaro mu mazu yangiritse cyane kandi ashaje. Nk’uko bivugwa na Mudahogora Violette umukozi w’Akarere ufite gukurikirana imibereho y’abacitse Ku icumu mu nshingano ze, amazu yangiritse bikabije azubakwa bundi bushya naho afite ibibazo byoroheje asanwe.

Amazu mashya yubakwa kuri ubu buryo

Mudahogora ati “hari abatuye mu mazu yangiritse cyane ku buryo ubona bitajyanye n’icyerekezo cy’Abanyarwanda bafite icyizere. Amwe azasanwa naho ayandi yubakwe bundi bushya ariko bature heza”.

Amazu yangiritse bikabije ari mu murenge wa Ndaro mu kagari ka Kabageshi. Imwe muri zo ni iya Nirere Chistine wishimiye ko ubuyobozi bw’Akarere bukora ibishoboka ngo imibereho ye na bagenzi be irusheho kuba myiza.

Ati “N’ubwo turi mu mazu ameze nabi, turabizi ko ubuyobozi bw’akarere bukora ibishoboka ngo twubakirwe. Turabizi ko hari abubakiwe mu mwaka ushize n’uwawubanjirije, natwe dufite icyizere ko bizatugeraho vuba”.

Inzu ya Nirere Christine iri mu zizubakwa bundi bushya

Aya mazu azubakwa n’inkeragutabara ku mafaranga akabakaba 74,000,000frw. Gusa hakaba hari imbogamizi yo kuhageza ibikoresho kuko umuhanda ujya aho mazu ari wangiritse bikomeye.

Ubuyobozi bw’Umurenge wa Ndaro na Gatumba bwijeje ko bagiye gushyira ingufu mu isanwa ry’imihanda ku buryo bwihuse. Mu mazu yubakirwa abarokotse Jenoside batishoboye ubu hashyirwaho ibigega bifata amazi ndetse hakanashyirwamo amashanyarazi ku batuye aho ibikorwa Remezo byayo bamaze kugera.

Mu gihe kuri uyu wa kane tariki ya 21 Mutarama 2016, ikipe ya repubulika iharanira demokarasi ya Kongo icakirana n’iya Angola, abafana ba RD Congo bakomeje kwiyongera mu Rwanda. Ahagana mu ma saa sita z’amanywa, coasters 4 hamwe n’izindi modoka zari zambutse Ngororero zerekeza mu mujyi wa Huye.

Zimwe mu modoka zazanye abandi bafana b’abakongomani

Abari i huye bavuga ko hari abafana benshi b’iyi kipe, kandi ko bakomeje kuhasusurutsa nkuko Niwemfura Alphonse wo muri uwo mugi yabidutangarije kuri terefoni.

Aha basatiraga akarere ka Huye,bari barangajwe imbere na Polisi y’u Rwanda

Mu gihe hari abakongomani bavuze ko abafana b’amavubi batangiye gutinya iyi kipe bakifanira Ethiopia ubwo iyi yatsindwaga 3-0, uyu munsi ngo biteguye kwereka abakongomani ko babari inyuma. Ugereranyije, abo bafana bambutse none baraba bageze mu mujyi wa Huye saa saba na mirongo ine n’itanu z’amanywa.

Impuguke mu kwiga imishinga, Mugabonejo Raphael, avuga ko inyigo yakoze igaragaza ko ubukene buzava kuri 49,6% bukagera kuri 25% naho ubukene bukabije (extreme poverty) bukava kuri 23,5% bukagera kuri 5%.

Ubucukuzi bw’amabuye y’agaciro ndetse n’ubuhinzi bukoresha imashini biri mu byo bitezeho kubafasha kurandura ubune.

Yagize ati “Twabyizeho, tubikorera ubusesenguzi dukoresheje amakuru twakuye muri aka karere n’ubunararibonye twavanye mu tundi duce. Hari icyizere rero ko nibikorwa neza, ubukene buzaba amateka.”

Afatanyije n’umukozi w’akarere ushinzwe Igenamigambi, Birorimana Jean Paul, Mugabonejo yagaragaje ko mu gihe cy’imyaka 3, guhashya ubukene bishoboka mu nyigo y’umushinga ukomatanyije amajyambere y’akarere ( Ngororero Integrated Development Project NIDP).

Kugira ngo bishoboke, ngo hazifashishwa inganda nto n’iziciriritse zitunganya ibikomoka ku buhinzi n’ubworozi kandi zigatanga imirimo. Hazubakwa kandi ibikorwaremezo bivana abaturage mu bwigunge ndetse bigatuma umusaruro wabo ugera ku masoko byihuse.

Uwo mushinga ugaragaza ko hazanibandwa ku guteza imbere ubucuruzi n’ubucukuzi bw’amabuye y’agaciro aboneka mu mirenge yose igize Akarere ka Ngororero.

Nubwo ibi byose byari bisanzwe bikorwa muri Ngororero, ngo ntibyari byarakorewe inyigo igaragaza uko bizazamura akarere.

Inyigo igaragaza kandi ko ubukerarugendo n’imiturire myiza na byo bizitabwaho bakanongera ingano y’umusaruro w’ibihingwa byoherezwa mu mahanga, nyuma yo kwihaza mu biribwa biturutse ku buhinzi bukoresha imashini (mechanization).

Byose ngo bizaherekezwa no kugeza amazi n’amashanyarazi ku baturage bose kandi bigashyirwa mu bikorwa mu buryo butabangamira ibidukikije.

Birorimana avuga ko iyi nyigo izajya igenderwaho mu gutegura imihigo y’akarere no kuyishyira mu bikorwa.

Iyi nyigo ikozwe mu gihe Umuyobozi w’Akarere ka Ngororero yari aherutse gutangaza ko barimo gukora inyigo izabafasha kurwanya inzara ikunze kumvikana muri ako karere.

Ibi yabitangaje kuri uyu wa Kabiri tariki 19 Mutarama 2016, ubwo yari mu muhango wo gusoza itorero ry’abanyeshuri. Yagize ati « Uko imyaka ishira mbona intore zigenda zirusha izazibanzirije kugira ishyaka mu bikorwa no muri Morari. Intore zo muri aka karere zose ndazikurikirana ndazizi ».

Ngo intore z’ubu zigira ishyaka na Morari kurusha abazibanzirije

Iyi myitwarire ngo iratanga icyizere ko mu cyerekezo 2020-2050, u Rwanda ruzaba rufite abayobozi n’abakozi basobanutse. Mu butumwa yahaye izi ntore yazisabye kutita ku bizirangaza no kudategereza akimuhana maze bakihangira imirimo.

Umwe mu basoje itorero witwa Tuyisenge Innocent yavuze ko nabo babibona ko bafite akarusho kurusha bakuru babo. Ati « Twe abatubanjirije baba baraduhaye amasomo kandi tugahera ku byabo natwe tukongeraho ibyacu. Si ubundi butwari rero tubarusha ahubwo ni uko ari ukubigiraho tugasenyera umugozi umwe ».

Bakoze ubufindo bwerekana uko bazafatanya kubaka igihugu bwashimishije abantu

Umutahira w’intore mu karere ka Ngororero Mukantabana Odette avuga ko na bo mu gutegura itorero bahora bazamura imitegurire bagamije ko biba byiza kurushaho.

Muri uyu mwaka abasoje itorero bose mu karere ka Ngororero ni 1214 harimo abahungu 558 n’abakobwa 656.

Basabwe ko nibasubira mu miryango yabo bazihatira gufasha abaturage kurwanya imirire mibi no kwimakaza umuco w’isuku.

Abataka iyi nzara bavuga ko bayitewe no kuteza uko byari bisanzwe. Iyi nzara ngo ibagaragaraho mu buryo bwo gutakaza ibilo, ngo bahisemo kuyita “Warwaye ryari” kuko bananuka batararwaye.

Abacuruza mu masoko bavuga ko bahombye kubera iyo nzara.

Bazubagira Jacqueline utuye mu Murenge wa Gatumba avuga ko iyi nzara igenda ibototera gahoro gahoro kandi ishobora kuzababera akanda gakomeye.

Agira ati “Yewe, dore n’abo nitaga ko ari abagabo, isigaye yarabagezeho. Igenda ituzahaza gahoro gahoro. Jye mbona bizarangira ibaye icyorezo.”

Ibi abihurizaho n’abandi baturage twasanze mu masoko ya Gatumba na Ngororero, mu ntangiriro z’uyu mwaka wa 2016, bavuga ko bafite inzara.

Uwitwa Theophile (utarashatse kudutangariza irindi zina rye) ukora ubucuruzi bw’imyenda mu masoko atandukanye y’aka karere, na we avuga ko iyi nzara ayibona.

Agira ati “Irahari nyine. Bayita ‘warwaye ryari?’. Ntitugicuruza n’imyenda itatu ku munsi kandi mbere twaracuruzaga! Abaturage nta mafaranga bafite, nawe wareba uko iri soko ryifashe. Nta bantu baririmo.”

Nyuma yo kumva ibisobanuro byabo ku bigaragaza iyo nzara babatije “warwaye ryari”, twashatse kumenya uko ibiciro by’ibiribwa bihagaze.

Mu isoko rya Cyome mu Murenge wa Gatumba, ahasanzwe hahahirwa n’abantu benshi biganjemo abaturuka mu tundi turere, ibiciro byaho byarazamutse.

Ibiciro by’ibiribwa muri iyi minsi byarazamutse cyane.

Urugero ni ibirayi bigura amafaranga 180 mu gihe byari bisanzwe ari 130. Ibijumba n’amateke, agatebo kageze ku 3700 mu gihe gasanzwe kagura hagati ya 1500frw na 2000frw. Ibindi biribwa nk’inyama, imboga n’imbuto bisanzwe byiganje muri aka gace na byo byaruriye ku buryo abaguzi babaye bakeya.

Ubwo twaganiraga n’Umuyobozi ucyuye igihe w’Akarere ka Ngororero, Ruboneza Gedeon, tariki 11/12/2015, yadutangarije ko inzara koko ihari.

Yagize ati “Aya mezi, buri gihe aratugora abaturage bagasonza ariko turimo kwiga uko twafata ingamba.”

Gusa Ruboneza ntiyari azi ko iyo nzara yamaze kwitwa izina "Warwaye ryari?".

Gushaka umugore badasezeranye ibyo bita « Guterura cyangwa mariyaje(mariage) koco », ngo ni bintu byiganje mu basore bo mu karere ka Ngororero kubera kutagira amikoro yo kubaka, gushaka inkwano no gukora ubukwe bwemewe n’umuco, idini n’amategeko.

Abadashaka guterurwa bahitamo gufasha abasore kubaka

Iyaturinze Isaac, wo muri aka karere avuga ko kubaka bikora umugabo bigasiba undi akaba ariyo mpambu nyamukuru ituma bashaka bateruye. Ati « nta mikoro tukibona ibihe byarahindutse. Ubu uwumvise ari ngombwa gushaka ni uguterura na kundi, keretse bake bavuka mu miryango ikize ».

Ibi iyaturemye abihuririzaho n’abandi barimo umubyeyi witwa Nyiramana Jeannette nawe uhamya ko ababyeyi babyuka bagasanga abasore bazanye abagore mu nzu zo hanze (annexes) z’ababyeyi rimwe na rimwe no mu bikoni cyangwa se utuzu duto cyane abasore baba bariyubakiye tuzwi nka « ikibahima ».

Uru rubyiruko ruvuga ko amikoro rwayakuraga ahanini mu mirimo y’ubucukuzi bw’amabuye y’agaciro no mu mirimo rusange. Kuri ubu ubucukuzi ngo ntibugikorwa neza naho abashaka akazi bakunze kwamburwa abandi bagahitamo kujyagupagasa kure nabwo bakagaruka bafite abagore bateruye.

Kutagira akazi ngo nibyo bituma abasore baterura

Icyakora bamwe mu bakobwa bo muri aka gace bavuga ko badakozwa ibyo guterurwa kuko bigira ingaruka. Ayinkamiye Anatalie avuga ko atabyemera. « umusore aragushuka akakujyana aguteruye mwamara kubyarana amikoro abuze akaguta. Njye sinabyemera pw ». Ayinkamiye asobanura.

Undi witwa Nyiraminani Alphonsine we avuga ko ubu abakobwa bahagurukiye kujya bafasha abasore kubaka ariko bakagirana amasezerano ko inzu niyuzura bazabana. Aya masezerano ngo akorwa hari abo mu miryango yombi, aho amafaranga abakobwa bakunze gutanga ari hagati y’ibihumbi 300 na 500.

Umuvuduko akarere ka Ngororero kihaye mu kongera ibikorwa remezo mu myaka itandatu ishize, usize abatari bake baririra mu myotsi, kubera ko ba rwiyemezamirimo babakoresheje mu masoko batsindiye ariko ariko bakabambura komite nyobozi ntibashe kubishyuriza.

Abubatse kuri aya mazu y’ahazwi nk’Agakiriro ntibigeze bahembwa amafaranga yabo.

Nahayo Jean d’Amour wambuwe mu mirimo yo gukora umuhanda Kazabe-Rutsiro agira ati “ Ni byo hari ibyo iyi komite yakoze byinshi. Ariko hari nibyayinaniye nko kubeshya abaturage ngo tubonye akazi ariko bakaba basoje mande batatwishyurije kandi twarabiyambaje kenshi.”

Uyu mugabo avuga ko rwiyemezamirimo wamukoresheje amaze imyaka ine yaramwambuye ibihumbi 120Frw.

Undi witwa Hakizabera Callixte we avuga ko yakoze mu mirimo yo kubaka kuri farumasi nshya y’akarere. Kuri we ngo kuba akarere katarabasha kubishyuriza amafaranga ba rwiyemezamirimo bababmbuye ari igisebo kuri iyi komite.

Ati “ Nonese ko baduhaga akazi bavuga ngo batugiriye neza byatumariye iki ? dukeneye uwatubera umuvugizi kuko abayobozi b’akarere twiyambazaga manda yabo irarangiye, nta kizere tugifite.”

Abubatse uru rukuta kuri farumasi y’akarere nabo barambuwe.

Nkusi Niramire, umunyamabanga nshingwabikorwa w’akarere ka Ngororero ari nawe uzaba akayobora mu gihe katarabona umuyobozi mushya, avuga ko hafashwe ingamba ko ba rwiyemezamirimo batazambura abaturage.

Ati “ Hari abo tugifitiye amafaranga batarahabwa abo ntibazambura abaturage kuko bazayabona babanje gukemura ibibazo byose bafitanye. Abakoze amakosa yo kwambura tutarafata izi ngamba ubwo hazisungwa izindi nzira zikurikije amategeko.”

Kugeza ubu, imirenge ifite abaturage bambuwe ikomeje kwegeranya umubare nyawo w’abavuga ko bambuwe mu bikorwa bitandukanye kugira ngo bazishyurizwe.

Uyu musaza utuye mu kagari ka Gatega Umurenge wa Kibangu mu karere ka Muhanga, ubu afite imyaka 64. Yatangiye kunyonga igare nk’umukinnyi afite imyaka 27 mu mwaka wa 1979, ndetse aza no gutwara tours du rwanda mu mwaka wa 2001.

Nsengiyumva Bernard amaze imyaka 37 anyonga igare

Kuri ubu Nsengiyumva aracyanyonga igare byo kwishimisha aho avuga ko adashobora gutega imodoka mu ngendo akora imbere mu gihugu.

Avuga ko ahantu akunda kujya ari Muhanga –Gisenyi na Butare, aho akoresha igare risanzwe ritari irya siporo.

Nsengiyumva avuga ko mu gihe cyabo bagiraga ishyaka ryinshi ku buryo umunyamahanga wazaga imbere yabaga ari mu myanya 10 inyuma y’Abanyarwanda, n’ubwo babaga bafite amagare atagezweho nk’ayakoreshwa ubu.

Uko rimeze inyuma

Kuri we yishimira umusaruro abasigaye inyuma ye batanze mu myaka 2 ishize, ariko akanabasaba kongera imbaraga ku ruhando mpuzamahanga.

Agira ati « Twe kera wasangaga dufite ishyaka pe ! N’ab’ubu baragerageza kuko mu myaka ibiri batwaye umwenda w’umuhondo ariko bakwiye kongera imbaraga bagahigika abanyamahanga ».

Uyu musaza ngo aracyafite inyota yo gukina tour du Rwanda kugira ngo yipime n’abanyonzi biki gihe.

Igare rye rigaragara ko rishaje ariko rigera kure

Avuga ko bitoroshye ko bazabimwemerera, ariko ngo mu isiganwa ry’uyu mwaka nabona igare azaryitabira nk’umufana agamije kureba ibihe yakoresha.

Kuba atabasha kubona igare rya siporo ngo biramubabaza cyane, kuko umwuga w’ubuhinzi umutunze utamuha ubushobozi bwo kuryigurira, aho asaba ababishoboye ko bazamuzirikana bakamufasha kutareka umukino we.

Asigaye anyonga igare rishaje ritari irya siporo

Nsengiyumva adutangariza ko agifitanye umubano n’abantu ba hafi mu by’umukino w’amagare nka bamwe mu bayobozi muri federasiyo yayo ndetse n’umukinnyi Abraham Ruhumuriza by’umwihariko.

Ku wa Kabiri, tariki 5 Mutarama 2016, ni bwo umurambo w’uyu mwana w’umuhungu, Tuganumukiza Jean Baptiste, wigaga mu mwaka wa 5 w’amashuri abanza, watoraguwe mu gice cy’umugezi wa Nyamata giherereye mu Mudugudu wa Kavumu mu Kagari ka Bijyojyo mu Murenge wa Ndaro.

Abaturage b’Umurenge wa Ndaro bakeka ko uyu mwana yishwe n’abagizi ba nabi kuko ababonye umurambo bavuga ko umubiri we wari washinyaguriwe.

Umuyobozi w’Akarere ka Ngororero wungirije ushinzwe imibereho y’abaturage, Nyiraneza Clotilde hamwe n’Umuyobozi wa Polisi muri aka karere, SSpt. Gasangwa Marc, tariki 5 Mutarama bagiye kwa Nzirorera, se w’uwo mwana, mu rwego rwo kwihanganisha uwo muryango no gusaba abaturage gutanga amakuru yafasha mu iperereza.

Nyiraneza yagize ati “Tuje gufata mu mugongo umuryango wa Nzirorera ariko Polisi inakeneye amakuru muyiha kugira ngo abakoze aya mahano bashakishwe bashyikirizwe ubutabera.”

Ubwo abaturage basabwaga gutanga amakuru, bamwe basabye ko abegereye kwa Nzirorera ari bo bayabazwa.

Cyakora, hari n’abandi basabye gutanga amakuru mu ibanga hifashishijwe impapuro zashyirwa mu gaseke.

SSpt. Gasangwa yasezeranije abaturage ko uwo icyaha kizahama azacirwa urubanza mu ruhame rwa benshi kugira ngo abandi babone isomo.

Uru rupfu rwa Tuganumukiza ruje rukurikira urwa Bazimezente Francois w’imyaka 54 wo mu Mudugudu wa Kabeza, Akagari ka Ruhanga mu Murenge wa Gatumba; wishwe mu mpera z’umwaka ushize.

Uyu muyobozi urangiza manda ye kuri uyu munsi tariki ya 31 Ukuboza 2015, avuga ko mu myaka ibiri ishize ngo ubuharike bwaragabanutse ndetse hamwe na hamwe ntibukiharangwa muri aka karere, nk’uko abivuga.

Abagore bakuze ngo nibo baharikwaga kurusha abandi

Ibi ngo ni umusaruro waturutse ku gutandukanya abishyingira mu buryo budakurikije amategeko hakoreshejwe ubujyanama ku bashatse bwa mbere n’imbaraga ku bagabo cyangwa abagore bafite abandi bashakanye.

Ruboneza agira ati “Twabafatiye ingamba zikomeye aho iyo dufashe abishyingiye n’iyo baba badasanzwe barashatse tubagira inama yo kubireka bagaca mu nzira nyazo. Abagabo basanzwe bafite abandi bagore iyo tubafashe tubaca ibihumbi icumi kuri buri muntu kandi tukabatandukanya”.

Ruboneza akomeza avuga ko iyi migirire ari yo yatumye ubuharike bugabanuka muri aka karere bwari bwarabayemo akarande, n’ubwo hatarakorwa ubushakshatsi bushingiye ku mibare.

Ubwo hafatwaga ibyemezo byavuzwe haruguru, kuva mu myaka 2 ishize, bamwe mu baturage n’abayobozi b’inzego zibanze babifataga nk’ibitazatanga umusaruro. Umwe mu banyamabanga Nshingwabikorwa w’Umurenge muri aka karere yagize ati“Biriya ndabona bitaba umuti w’ikibazo kuko noneho bazajya babikora mu ibanga rikomeye. Ikiza ni ugukoresha ubukangurambaga binyujijwe mu buryo ubwo ari bwo bwose, nko mu nama n’abaturage, mu miganda, mu nsengero n’amadini n’ahandi”.

N’ubwo adahakana ko ubujyanama bwagize uruhare mu guca iyi ngeso, Ruboneza we yemeza ko gucibwa amafaranga no gushyirwa ku karubanda ari kimwe mu byo abantu batinye bityo bagahitamo gushaka mu buryo bwemewe n’amategeko cyangwa kudaharika igihe basanzwe barashatse.
Guca ubuharike hifashishijwe guca amafaranga ababifatiwemo no kubatandukanya bikaba byaremejwe n’inama njyanama y’aka karere.

Uretse iyi mihanda yo mu karere ka Ngororero Inama ya 13 y’umushyikirano yanasabye kubaka mu gihe kimwe umuhanda Ngoma-Bugesera-Nyanza n’indi mihanda ihuza Uturere.

Igice cy’umuhanda wa kaburimbo Kabaya-Nyabihu nacyo cyatangiye gusanwa

Abaturage n’abayobozi bo muri aka karere bavuga ko umwe mu myanzuro y’inama y’umushyikirano bishimiye cyane ari iyubakwa ry’umuhanda wa kaburimbo ufite ibilometero 2, uzava ku muhanda mukuru Ngororero-Nyabihu ukagera ku kigo nderabuzima no ku bitaro bya Kabaya.

Iki kibazo kikaba cyari gihangayikishije abaturage benshi bivuriza mu bigo nderabuzima 5 byo muri aka karere bigize ibitaro bya Kabaya ubihuza na Nyabihu.

Bimwe mu bice by’umuhanda ugana ku bitaro bya Kabaya

Umunyamabanga Nshingwabikorwa w’umusigire mu murenge wa Kabaya nawe avuga ko bahoraga basabwa n’ubuyobozi bw’ibitaro kugira icyo bakora kuri uwo muhanda, kuko n’imodoka zabyo zishobora kwihanganira imihanda mibi ngo zihangirikira bikomeye.

Uretse uyu muhanda ugana ku bitaro bya Kabaya, umuhanda Cyanika –Musanze-Ngororero nawo ugomba gutunganywa bitarenze ukwezi kwa Kamena 2016 nk’uko byemejwe n’inama y’umushyikirano.

Uyu muhanda utegerejweho kwagura imihahiranire n’ubucuruzi by’aka karere nk’uko umuyobozi wako Ruboneza Gedeon abivuga.

Kuri iki kiraro niho umuhanda Cyanika_Musanze uzahurira na Ngororero

Agira ati « Iyi mihanda yombi yagombaga gukorwa kuva mu myaka ibiri ishize. Twakoze inyigo ariko tubura amikoro yo kuyubaka ».

Ruboneza akomeza avuga ko uretse korohereza abagana ibitaro n’ikigonderabuzima bya Kabaya, umuhanda Cyanika-Musanze-Ngororero, uzafasha mu mihahiranire n’utundi turere ndetse n’igihugu cya Uganda.

Kubaka umuhanda ugana Kabaya bizanajyana no gusana ibice by’umuhanda wa kaburimbo ugana ku Kabaya uturuka mu karere ka Nyabihu.

Imihanda yangirika vuba kuko iba idafite imifurege iyobora amazi

Umuyobozi wa RTDA Guy Muhigirwa akaba aherutse gutangariza Kigali Today ko gusana ibyo bice bizarangirana n’ukwezi kwa Gashyantare 2016.

Uretse iyi mihanda yo mu karere ka Ngororero Inama ya 13 y’umushyikirano yanasabye kubaka mu gihe kimwe umuhanda Ngoma-Bugesera-Nyanza n’indi mihanda ihuza uturere, aho Meya Ruboneza avuga ko bidashoboka ko byazageza ku yindi nama y’umushyikirano bitarakorwa kuko byasabwe na Perezida wa Repubulika.

Kuri uyu wa 18 Ukuboza 2015, Abanyarwanda bazatora itegeko nshinga rivuguruwe nk’uko byasabwe n’abaturage bikemezwa n’inteko ishinga amategeko.

Ba depite Nyirahirwa Veneranda (iburyo) na Nyiramadirida Fortunee basanga abayobozi bararangaranye abo baturage

Mu gihe mu ntara y’Iburengerazuba Akarere ka Ngororero ari ko gafite abaturage benshi basabye ko iri tegeko rivugururwa bamwe muri bo ntibazabasha kuritora.

Ndagijimana Damascene wo mu murenge wa Matyazo avuga ko yaje muri uyu murenge aturutse mu karere ka Nyabihu. Amaze imyaka 9 ngo atarashyirwa ku ilisiti y’itora, ubu akaba ababajwe n’uko adatora kandi nta miziro afite.

Agira ati “Birababaje kubona maze imyaka 9 nsaba ko banshyira ku rutonde nanjye ngatora ariko ari I nyabihu ari no muri Ngororero bikaba bitarakunda”.

Undi witwa sibomana Claude nawe ngo amaze imyaka 6 atabasha gutora, nawe avuga ko yagerageje kwiyandikisha ariko bikaba bitarakunda.

Ubwo ku wa 16 /12/2015 babigaragarizaga intumwa za rubanda zasuye aka karere, abaturage 15 nibo bagaragaje ko bafite iki kibazo mu murenge wa Matyazo.

Depite Nyirahirwa Veneranda akaba yaravuze ko bikwiye gukorwa vuba aba baturage ntibabuzwe amahirwe n’uburenganzira byabo.

Bamwe mu baturage basaba abadepite kubafasha bakazatora

Yagize ati “Biragaragara ko hajemo uburangare. Kuba iki kibazo kigaragaye uyu munsi. Mukore uko bishoboka umunsi w’amatora uzagere aba baturage bafite uburyo bwo gutora”.

N’ubwo umuyobozi wungirije ushinzwe ubukungu muri aka karere Mazimpaka Emmanuel yavuze ko bagiye gukora ku buryo aba baturage bazatora, Nyirabakiga Immaculee ukuriye komisiyo y’amatora mu murenge wa Matyazo yavuze ko kwimura abaturage kuri liste byarangiye.

Avuga ko iki kibazo cyakemurwa na komisiyo y’amatora ku rwego rw’igihugu.

Ku wa 16 Ukuboza 2015 ubwo abadepite mu nteko ishinga amategeko basozaga urugendo rwo gusobanurira abaturage ibikubiye mu ngingo zavuguruwe itegeko nshinga, abaturage batangaje ko n’ubwo hari abadashaka ko iryo tegeko ritorwa ngo ntawe uzabasha kubahindura ku byifuzo bahaye abadepite ubwo basabaga ko ingingo y’101 ivugururwa.

Ni igiterane cyo gusaba Imana ngo amatora azagende neza

Nayigiziki Aloys wo mu murenge wa Hindiro yagize ati « Uko ngana uku mfite imyaka 64. Nzi icyo ngomba gukora kandi ndi mu banditse basaba ko ingingo y’101 ivugururwa. Niyo haba hari utabishaka gutyo njye hamwe n’abo tubana mu matsinda y’abahetsi twamaze kwiyemeza gutora Yego”.

Uretse aba basheshe akanguhe, Mbarushimana Richard wo mu murenge wa Matyazo ufite imyaka 20 avuga ko urubyiruko narwo rwahumutse ubu bamaze gusobanukirwa n’ibyiza byo kuyoborwa neza bityo ngo bakaba batakwemera uwaza kubasaba gutora Oya.

Ngo ntawe uzabajya mu matwi ku byo bisabiye babishaka

Richrad ati “Ubu nanjye maze gukura ndabona ibyiza tumaze kugeraho mu murenge wacu tubikesha imiyoborere myiza. wari wabonase ikipe yirukana umutoza utsinda?. Natwe rero ntawadushuka ngo bikunde”..

Aba baturage ariko banasaba ko nibamara kurangiza inshingano zabo, Perezida Kagame nawe azabemerera ko aziyamamaza kuri manda itaha. Nyiramadirida Fortunee, umwe mu badepite basuye Akarere ka Ngororero akaba yarabamaze impungenge.

Abagore bakoze akarasisi

Yagize ati “Perezida wacu akunda Abanyarwanda ntiyabyanga. Ikindi kandi mu itegeko nshinga muzatora birimo ko nta muntu Abanyarwanda basaba gukora inshingano runaka ngo abyange”.

Ibi bikaba byaratumye abaturage bo muri aka karere ngo bongera ubushake bwo gutora bose nkuko babidutangarije.

NYIRANGUGE Noella, Umukozi wa MKU mu Karere ka Ngororero avuga ko ubuyobozi bw’iyo kaminuza bwari bwiteguye gutangiza amasomo mu byiciro bitandukanye harimo na masters, ariko bagakomwa mu nkokora no kubura abanyeshuri.

Izi nyubako ni zo MKU yari gutangiramo amasomo.

At « Twari twiyemeje gutangira gutanga amasomo ariko abashaka kwiga babaye bakeya, ku buryo abasomo atatangirwa hano mu Ngororero ».

Akomeza avuga ko mu byiciro byose bagombaga gutangiza bari bakeneye abanyeshuri byibura 12 muri buri shuri (12personnes/classe), ariko ngo aho babonye abanyeshuli benshi ntibarenze 6.

Ubu ngo bahisemo kureka gutangiza amasomo mu Karere ka Ngororero. Icyakora, ngo bafasha abashaka kwiga muri iyi kaminuza i Kigali kubona ibisabwa byose batagiyeyo.

Mu ntangiriro z’uyu mwaka wa 2015, Umuyobozi wa MKU/Ishami rya Kigali Dr Mercyline Kamen, yari yatangarije ubuyobozi n’abakozi batandukanye muri aka karere ko nihaboneka umubare uhagije w’abanyeshuri bazahita bahafungura imiryango.

Yagize ati «Ibyo dukora ni bizinesi (busness), ntabwo rero twatangira tutagaragaza ko tuzabona inyungu. Nimutugaragariza ko abakeneye amasomo bahari, natwe turahari tuzayatanga ».

Nyiranguge asobanurira Minisitiri Imena Evode impamvu batarafungura imiryango mu Ngororero.

Nyuma y’amezi abiri (muri Gicurasi 2015), umukozi wa MKU muri ako karere yadutangarije ko bari bamaze kubona abantu 250, ndetse ubuyobozi bwa kaminuza bwemeza ko amasomo azatangira muri Nzeri 2015, dore ko ubuyobozi bw’akarere bwari bwaramaze gutanga inyubako zizifashishwa.

Nyiranguge avuga ko aba biyandikishije batakomeje kugaragaza ubushake bwo kuzuza ibisabwa ngo bige, bityo umubare ukaba warabaye muto cyane bahitamo kutahatangira amasomo.

Umuyobozi w’Akarere ka Ngororero, Ruboneza Gedeon, ariko avuga ko bazakomeza gukorana n’iyi kaminuza maze igihe ibyo yifuza bizaba byakemutse igatanga amasomo muri aka karere.

Uyu mubyeyi utuye mu mudugudu wa Giko akagari ka Gaseke, umurenge wa Nyange, avuga ko yamaze imyaka 16 ahisha umwana we w’umukobwa wavukanye ubumuga. Avuga ko yabiterwaga n’uburyo abafite ubumuga bahezwaga icyo gihe.

Mukantaganda wagaragaje umwana we nyuma y’imyaka 16.

Agira ati "Ubuyobozi bwiza bwakira abantu kimwe nibwo bwatumye umwana wanjye ajya ahagaragara. Namaze imyaka 16 ntifuza ko hari n’uwamenya ko uyu mwana mugira. Ariko ubu nshimishwa no kumujyana ahabona agahura n’abandi kandi bituma ubuzima bwe buba bwiza kurushaho."

Avuga ko padiri mukuru wa paruwasi ya Nyange n’ubuyobozi bw’umurenge wabo, aribo bamutumije bakamugira inama. Avuga ko ubu yicuza iyo myaka umukobwa we ubu ufite imyaka 26 yamaze afungiranye kuko ishobora kuba yaratumye amugara kurushaho.

Uwayezu nawe yemeza ko ubuyobozi butacyemera abahisha abana bafite ubumuga.

Uwayezu Deikora wo mu murenge wa Ndaro nawe ufite ubumuga, yemeza ko hari abana benshi bahishwaga aho babitaga ibimuga.

Ati "Nonese ntiwumva nyine izina batwitaga ‘ibimuga’. Ibimuga ubundi biba mu gikari kuko nta kamaro biba bigifite. Abana benshi rero nuko babagaho."

Aba bose na bagenzi babo bashimira Leta ko ifite politiki itavangura, bagasaba abafite ubumuga nabo kwiyubaha no gutanga imbaraga bafite mu kubaka igihugu.

Umuyobozi wungirije ushinzwe imibereho myiza y’abaturage mu karere ka Ngororero Nyiraneza Clotilde avuga ko mu karere kabo, nta bantu bagihishwa kubera ko bafite ubumuga, kandi ngo byakorewe ubucukumbuzi babifashijwemo n’inzego z’abafite ubumuga.