Abagore bakora ubucuruzi bwambukiranya imipaka bagiye gufashwa kwiteza imbere

Ni mugihe abagore bakora ubucuruzi bwambukiranya imipaka bakunze kumvikana bavuga ko n’ubwo ubu bucuruzi bubatunze ariko bagihuriramo n’inzitizi cyane cyane gusoreshwa kenshi iyo bageze muri Congo.

Nyiranzabamwita Agnes avuga ko bahura n’ikibazo cyo gusoreshwa kenshi,abandi bagasabwa icyitwa ‘echantillon’ (icyo kumviraho) uburyohe bw’ibicuruzwa byabo baba bajyanye muri Congo.

Ati “Upfa kwambuka umupaka buri wese akagenda agusoresha, cyangwa akubwira ngo muhe ku byo uje gucuruza, ukamuha nk’inyanya eshanu cyangwa ebyiri ugakomeza no kubandi”.

Aba bagore kandi bavuga ko bamaze igihe bakora ubu bucuruzi ariko bakaba babona badatera imbere bakurikije imbaraga bakoresha ngo kubera ubumenyi buke mu gukora imishinga myiza ibyara inyungu yatuma ibigo by’imari bibaha amafaranga bakongera igishoro.

Abagore bakora ubucuruzi buciriritse bwambukiranya imipaka bagiye gufashwa kwiteza imbere haba mu kubakorera imishinga yunguka no kubakorera ubuvugizi

Ntabugi Odette ati “Ntituzi gukora imishinga kandi ari yo twakabaye tujyana mu bigo by’imari bikaduha amafaranga yo kongera igishoro.”

Ibi bibazo byose kimwe n’ibindi aba bagore bahura na byo ngo ni byo ubu bihagurukije umuryango uharanira amahoro Alert International ukaba ugiye gufatanya na bo mu kubikemura binyuze mu mushinga Mupaka shamba letu (umupaka, imibereho yacu).

Mutesi Betty uhagarariye Alert international mu Rwanda agira ati “Tugomba gukorana na bagenzi bacu bo muri Congo mu gukemura ibyo bibazo,naho abatazi gukora imishinga,icyo ni cyo tuzaheraho tubahugure mbere yo gutangira gukora.”

Uyu mushinga uzakorana n’abagore bo mu bihugu by’u Rwanda,Congo n’u Burundi,ukazamara imyaka ine.Mu karere ka Rusizi uzakorana n’abagore 300 bakoresha imipaka itatu uwa Rusizi ya mbere,Rusizi ya Kabiri n’uwa Kamanyola unyuze mu kibaya cya Bugarama ,ukazarangira utwaye Miliyoni eshanu n’ibihumbi ijana na mirongo itatu na bitatu by’amadolari ya Amerika.

Aba baturage basobanura ko batangira kurinda imyaka yabo bakimara kiyishyira mu butaka kugeza umunsi wo kuyisarura. Iyo hagize uwibeshya gato agasa n’unyarukira mu yindi mirimo agaruka asanga inkende zibasiye umurima we. Ni ikibazo kimaze imyaka myinshi bahora bagaragariza ubuyobozi, bakababwira ko izi nyamaswa ziva muri pariki ya Nyungwe zibabangamiye.

Justin Mugemana ati “iyo ucunga inyamaswa ngo zitona ugasiba umunsi umwe gusa zishobora kuyirya ugataha burundu ntuzongere kugira icyo wabarizamo kijyanye n’umusaruro.”

Nubwo bagerageza kurinda izi nyamaswa bacungana nazo ngo zitabonera ntizibura kubanyura murihumye zikibeta mu gice batarimo zikona zikarya imyaka ndetse yewe abandi zikabatwara n’amatungo mu rugo.

Ni mugihe mu mwaka wa 2011 ubuyobozi bwashyizeho ikigega cyihariye gitanga indishyi ku bonewe n’inyamaswa zo muri parike n’ibindi byanya bikomye; ariko nyamara aba bo bakavuga ko birengagijwe kuko bamaze kuruha kubera guhora basiragizwa n’ubuyobozi bubizeza ko bazishyurwa ariko amaso agahera mu kirere.

Aba baturage bo mu murenge wa Bweyeye bavuga ko bonerwa n’inkende zo muri Nyungwe

Singirankabo Jaques ati “njyewe zanyoneye urugano Mugemana zimutwara inkoko ze... Twabimenyesheje ubishinzwe ku kagari ati ikibazo cyanyu ngiye kugikurikirana, tukigeza kuri agoronomi ati ngiye kubikurikirana, tukigeza nanone kuri visi meya ati ikibazo ngiye kugikurikirana kugeza uyu munsi ntakintu turabona.”

Aba baturage barasaba Leta kuzitira iyi pariki cyangwa bakajya bishyurwa.

Ku ruhande rw’inzego z’ibanze zireberera abaturage zemeza ko izi nyamaswa zibonera zabaye nyinshi kandi ngo ziri mu bwoko bw’inyamaswa zitishyurirwa ibyo zonnye, bakaba basaba abaturage gukomera ku ngamba zo gukomeza kurinda imyaka yabo nkuko Uwizeyimana Emmanuel umuyobozi w’umurenge wa Karambi mu karere ka Nyamasheke abisobanura.

Ati “usanga inkende zarabaye nyinshi kandi zangiza imyaka y’abaturage twabitanzemo Raporo ariko ikibazo gihari ni uko zitarajya ku rutonde rw’inyamaswa zonera abaturage zikishyurirwa. Icyo tugerageza kubwira abaturage ni ugukora uburinzi bakagerageza no guhinga imyaka itonywa n’inyamaswa”.

Guverineri Munyantwari Alphonse ntiyumva impamvu inyamaswa zimwe zishyurirwa ibyo zangije izindi ntishyurirwe

Umuyobozi wa Pariki y’igihugu ya Nyungwe Ntihemuka Pierre yunga mu rya gitifu wa Karambi, akavuga ko izi nyamaswa zimaze gukwira hafi mu gihugu hose ariko kugeza ubu ngo ntagisubizo kirambye iki kibazo kirabonerwa usibye kwirwanaho kw’abaturage bakarinda imyaka yabo.

Ati “inkende ziri hafi mu gihugu cyose abaturage ni ukureba uburyo bajya birindira imyaka mu gihe igisubizo kirambye kitaraboneka.”

Umuyobozi w’intara y’uberengerazuba Munyantwari Alphonse we siko abibona aha akaba yizeza aba baturage ko iki kibazo kizakemuka.

Ati “Ndumva tugiye gushyira ingufu muri iki kibazo nk’inzego zihagarariye abaturage kuko kuvuga ko inkende yava muri pariki ikona ntibibarwe ariko indi nyamaswa yakona bikabarwa ndumva ari ibintu bikwiye gukosoka kuko niba yamwoneye kandi irinzwe itakomwa byanze bikunze abaturage bagomba kwishyurwa.”

Abayobozi batandukanye bitabiriye umuhango wo kwibuka abahoze ari abakozi b’uruganda rwa Shagasha

Ni kenshi abarokotse Jenoside yakorewe Abatutsi bakunze kuvuga ko babangamirwa n’uko ari bo bonyine batanga ubuhamya mu gihe cyo kwibuka kandi abayikoze banafite amakuru menshi kubarusha bicecekeye dore ko abarokotse bo babaga biruka bahunga.

Uwitwa Mukangarambe Seraphine yagize ati “Ese ni njyewe ukwiye guhora mvuga ngo bambaraga amakoma, bisigaga ingwa, kandi ababikoze bahari? Ese nzahora mbatangira ubuhamya kandi batarapfuye? Bajye bavuga ibyo bakoze kuko byabaye ku mugaragaro, ntibikwiye kubatera ipfunywe.”

Uwitwa Ngendahimana Wellars wakoraga mu ruganda rwa Shagasha ni we wabaye uwa mbere mu bagize uruhare muri Jenoside yakorewe Abatutsi wateye intambwe yo kugira ubuhamya atanga nyuma y’imyaka 25 yose ishize.

Ngendahimana Wellars watanze ubuhamya, asaba abakoze Jenoside kwicuza bagasaba imbabazi

Muri ubwo buhamya yavuze ko abayobozi babo bababwiraga ko nta Mututsi ugomba kwinjira muri icyo kigo. Ibyo ngo byatumye bashyiraho bariyeri, bamwe mu bahahungiraga barahicirwa, na Ngendahimana agira uruhare muri ubwo bwicanyi nk’uko abyiyemerera, ariko akaba yarabisabiye imbabazi.

Abarokotse Jenoside bakiriye neza ubu buhamya bavuga ko bituma imitima yabo ibohoka ndetse ko n’abandi mu bagize uruhare muri Jenoside bakwiye kugira uyu mutima wo gutanga ubuhamya no gusaba imbabazi.

Habiyambere Leon ati “Biriya byaba byiza cyane ababikoze bagiye batanga ubuhamya kuko hari byinshi byamenyekana bitazwi. Kuba ndetse hari imibiri myinshi itarashyingurwa kubera kutamenya aho yajugunywe ni uko hari abataratobora ngo bavuge kandi iyo bavuze biratwubaka twe nk’abarokotse.”

Bamwe mu barokokeye muri Shagasha bavuga ko bakiriye neza ubuhamya bwa Ngendahimana, bagasaba ko n’abandi batera iyo ntambwe

Mu gihe muri aka karere hari abahavuka bakoze Jenoside kandi bakaba bakomeje guhembera ingengabitekerezo ya Jenoside mu bihugu bahungiyemo,Umuyobozi w’Akarere ka Rusizi wungirije ushinzwe imibereho myiza y’abaturage, Nsigaye Emmanuel, yasabye abaturage kwitandukanya na bo anashimira abatangiye gutanga ubuhamya.

Ati “Abakoze Jenoside harimo n’abahungiye mu bihugu duturanye baracyumva ko bagaruka bagakomeza umugambi wabo ariko mwitandukanye na bo tubarwanye kuko nta n’umwe ugomba gushyigikira ingengabitekerezo ya Jenoside.”

Uruganda rw’icyayi rwa Shagasha rwibuka abari abakozi barwo 37 bamaze kumenyekana kandi amakuru avuga ko hari indi mibiri myinshi itaraboneka.

Uruganda rwanoroje abarokotse Jenoside batishoboye

Urubyiruko na rwo rwifatanyije n’uruganda rwa Shagasha kwibuka abahoze ari abakozi barwo

Urugendo rwo kwibuka abahoze ari abakozi b’uruganda rw’icyayi rwa Shagasha

Mukarusine Oliva avuga ko atarabona umubiri w’umugabo we

Bamwe mu barokokeye mu Gisakura, bavuga ko iyo babonye Nyungwe ndetse n’imirima y’icyayi cy’uruganda rwa Gisakura bibuka ababo batamenye irengero ryabo.

Mukarusine Oliva, ubu utuye mu karere ka Muhanga ni umwe muri bo utarashyingura umugabo we wakoraga muri urwo ruganda mu myaka 25 ishize.

Aragira ati “Ngisohoka Nyungwe mpita ntangira kubona abacu. Ikintu cya mbere nasaba kandi duhora dusaba ni uko abantu badufasha bakatwereka aho abacu baguye.”

Uretse gufasha abarokotse genocide bari bafite ababo barukoragamo, ubuyobozi bw’uru ruganda buvuga ko bwashyizeho uburyo bwose bushoboka bwo gutanga aya makuru ku waba ayafite wese nk’uko Yves Mungwakuzwe uyobora uru ruganda abivuga.

Abayobozi batandukanye n’abaturage bibutse abahoze ari abakozi b’uruganda rw’icyayi rwa Gisakura

Ati “Twabonye bumwe mu buryo twakoresha imibiri itaraboneka ikagaragazwa icyambere ni uko abantu bagomba kubohoka, bwaba ari mu buryo bwo kuba Umunyarwanda mwiza ukeneye kubaka igihigu, ariko natwe nk’ubuyobozi bw’uruganda tugiye kubishyiramo ingufu dufate umwanya wo kubiganiraho bihagije kugira ngo icyo kibazo kive munzira abantu bashyingurwe mu cyubahiro. ikindi ni uko twahaye buri wese karibu yaba uwabicisha mu nyandiko agatanga amakuru cyangwa ubundi buryo ubwo ari bwo bwose.”

Umuyobozi w’akarere ka Nyamasheke Kamali Aime Fabien nawe avuga ko hakiri ibyiringiro ko abantu bazageraho bakabohoka bagatanga amakuru.

Ati “Ntabwo navuga ngo amakuru ntakibonetse kubera ko hari abantu na n’ubu bakiri kuduha amakuru. Tugize Imana twayagenderaho tukamenya ko hakiri abantu bagitabye ahantu runaka tukabakuramo tukabashyingura mu cyubahiro.”

Kugeza ubu hamaze kumenyekana abari abakozi b’uru ruganda 25 bazize Jenoside baguye mu mbago z’uruganda rw’icyayi rwa Gisakura. Bivugwa ko muri Nyungwe no mu mirima y’icyayi haba harimo imibiri myinshi y’abazize Jenoside itaramenyekana.

Umuyobozi w’akarere ka Nyamasheke Kamali Aime Fabien avuga ko hakiri icyizere cyo kubona imibiri itaraboneka hamwe no gukomeza gutanga amakuru

Abanyeshuri biga uburezi barishimira impinduka zigiye kuba guhera umwaka utaha

Izi mpinduka zirimo kuba abitegura kuba abarezi bose bazajya bahabwa Buruse itishyurwa ariko na bo bagasabwa kugira igihe mu kuzamura uburezi, batanga umusanzu wo kwigisha.

Irénée Ndayambaje uyobora Ikigo gishinzwe Guteza Imbere Uburezi (REB) yasobanuriye bihagije abanyeshuri bo muri TTC Mururu yo mu Karere ka Rusizi izo mpinduka zirimo ko abanyeshuri biga mu mashuri yisumbuye bitegura kuzaba abarimu cyangwa abarezi mu mashuri abanza ndetse n’ay’incuke bazajya bishyurirwa na Leta kimwe cya kabiri cy’amafaranga y’ishuri.

Kubera ubumenyi n’ubushobozi Leta izaba yatanze kuri aba banyeshuri bazaba bageze ku rwego rwo kuba abarimu, na yo ibasaba ko nyuma yo kurangiza amashuri yisumbuye bazajya batanga umusanzu wo kwigisha nibura imyaka itatu, nibayirangiza abifuza gukomeza kaminuza bahabwe buruse zitari inguzanyo, bityo na bo bigishe nibura indi imyaka itanu, bahabwe indi buruse nk’iyo yo kwiga icyiciro cya gatatu cya kaminuza.

Irénée Ndayambaje avuga ko umunyeshuri uzatera umugongo uburezi kandi yarishyuriwe azishyuzwa ibyo Leta yamutanzeho

Ubu buryo bwo gufasha abiga uburezi Leta yabushyizemo imbaraga mu rwego rwo kuzahura ireme ry’uburezi.

Irénée Ndayambaje uyobora REB ati “Hari harimo icyuho ariko ahanini byaterwaga n’uko nta banyeshuri b’abahanga baganaga aya mashuri nderabarezi kubera ko batahabwaga amahirwe yo gukomeza kaminuza ariko ubu bagiye guhabwa ayo mahirwe ndetse n’imishahara mwabonye ko yiyongereye, hari n’ibindi bizabafasha gukomeza kuvugurura imibereho yabo.”

Nta n’umwe muri aba bazafashwa kwiga uburezi ku nguzanyo ya Leta itishyurwa uzigera ajya gukora ahandi atarigisha imyaka itatu cyangwa itanu bitewe n’icyiciro azaba arangije kuko n’uwabigerageza ngo azajya ahita yishyuzwa ibyo Leta yamutanzeho.

Ndayambaje akomeza agira ati “Umuntu uzarangiza tuvuge wenda icyiciro cya kabiri cya kaminuza akavuga ati ‘uburezi mbuteye umugongo’ nta kundi byagenda na we tuzamwishyuza ibyo twamutanzeho. Ni byiza ko niba turi kugufasha ngo wige nawe ugomba gutanga ibyo wahawe mu gihe cy’imyaka itatu cyangwa itanu.”

Ku ruhande rw’abiga uburezi bishimiye cyane izi mpinduka cyane ko mbere bafatwaga nk’abantu basuzuguritse ndetse bakitwa n’amazina atajyanye n’umwuga wabo, bagatanga urugero bavuga ko bazaba baciye ukubiri n’izina ‘Gakweto’.

Abarezi baravuga ko bagifite imbogamizi mu myigishirize kubera kutagira imfashanyigisho

Nyiranjamahoro Esperence ati “Twe twumvaga ko iyo wize ubwarimu uba uri Gakweto ariko nitubona ayo mahirwe bizadufasha kubona akandi kazi gasumbye ako nyuma yo gushyira mu bikorwa ibyo dusabwa.”

Nubwo abarimu basabwa gutanga uburezi bufite ireme, basobanura ko bisa n’aho bikigoranye kuko nta bitabo byo kwifashisha bafite, aho kugeza ubu ngo bishakishiriza ku giti cyabo. Abo barezi basaba ko babona imfashanyigisho n’integanyanyigisho zihagije.

Ni byo uwitwa Bugenimana Scholastique yagarutseho ati “Ujya kubona ukabona basohoye ibintu bidafite imfashanyigisho. Ese nakwifashisha iki nta mfashanyigisho mfite kugira ngo mfashe umwana abashe kuzamuka neza? Kugeza ubu nkurikije ibyo badusaba ni ukwirwanaho gusa nibadushakire ibitabo.”

Kuri iki kibazo, ubuyobozi buvuga ko buri kugishyiramo imbaraga ku buryo mu gihe kitarambiranye na cyo kizaba gikemutse. Ubu mu Rwanda hari ibigo 16 by’amashuri bitegura abazaba abarimu mu mashuri y’inshuke n’abanza. Muri ubu bukangurambaga, byose bikazasurwa kugira ngo basobanurirwe izi mpinduka.

Guverineri Munyantwari Alphonse asaba abayobozi gukurikirana imihigo yo mu ngo z’abaturage

Ni nyuma y’imurikabikorwa ry’Akarere ka Nyamasheke aho mu baturage baryitabiriye bamwe bagaragaje ko bayifite ariko hakaba hari abandi batayifite kandi ari yo musingi w’imihigo y’akarere.

Adrien Habimana, umwe mu bitabiriye iri murikabikorwa avuga ko we imihigo y’umuryango ayifite ahereye ku by’ingenzi bidahambaye cyane ariko kandi bishobora kugoboka urugo igihe icyo ari cyo cyose.

Ati “mfite ikayi yanjye y’imihigo byaba ibyo nzakora ejo, ejobundi, uko nzatanga mituweli, uko nzarihira abana ku ishuri, ibyo tuzambara n’ibindi, ikindi kandi burya guhiga mu rugo bihera ku kantu gato, akarima k’imboga ukagenda uzamuka gutyo. Burya udafite imihigo y’urugo ntacyo wageraho.”

Abayobozi kuva ku rwego rw’umudugudu basabwe kumenya no gukurikirana imihigo abaturage bahiga kuko ari yo shingiro ry’iterambere

Ibi Habimana arabivuga mu gihe ku rundi ruhande mugenzi we Aphrodis Ngaboyisonga avuga ko nta mihigo afite kandi azi neza ko imihigo y’umuryango ari yo musingi w’iterambere ry’umuryango mu rugo. Icyakora ngo hamwe n’inama bagiriwe n’ubuyobozi yatashye yiyemeje guhiga hamwe na bagenzi be badafite imihigo.

Ati “Muri make ikintu nkuye hano ndagera imuhira mpite nshyira mu bikorwa iyo kaye y’imihigo. Nzorora, Nzatera insina za kijyambere, …inama bampaye zanyigishije kuko zizatuma ngira icyo nimarira.”

Kuba umuturage yaba adafite imihigo ndetse n’uyifite akaba atazi icyo yakora ngo ayese, ni ikibazo Umuyobozi w’Intara y’Iburengerazuba, Munyantwari Alphonse, yasanze gikwiye gukemurwa bihereye ku Mukuru w’Umudugudu, inzego zose zikegera umuturage zigakurikirana imihigo ye, yongeraho ko nibabikora neza hashobora kuziyongeraho agahimbazamusyi.

Ati “Abakuru b’Imidugudu mwe mwegereye abaturage ndagira ngo mbasabe guhagurukira imihigo ihindura imibereho y’ingo z’abaturage tuyikurikirane. Birashoboka ko ingo zigira isuku kandi nimubikora tuzabaha amagare mwasabye.”

Abaturage biyemeje gukorera ku mihigo baba abari babisanganywe n’abatari babisanganywe

Nyuma yo kumurikirwa ibibakorerwa bishingiye ku mihigo hamwe n’inama z’Umuyobozi w’Intara y’Iburengerazuba, aba baturage bavuga ko basanze hari uruhare rwabo batashyizemo ngo bafashe ubuyobozi kwesa imihigo. Abaganiriye na Kigali Today bahise bagaragaza uko bagiye guhiga cyane ko nta kintu kigoye kirimo.

Akarere ka Nyamasheke muri uyu mwaka w’imihigo wa 2018-2019 kahize imihigo 65 irimo 23 yo mu bukungu , 30 yo mu mibereho myiza na 12 yo mu miyoborere myiza. Ubuyobozi buvuga ko mu gihe hasigaye amezi atageze kuri abiri ngo uyu mwaka w’imihigo urangire, bageze hejuru ya 80%. Umwaka ushize bakaba bari ku mwanya wa 17/30, aka karere kandi kakaba karigeze kaza ku mwanya wa mbere muri 2008.

Bamwe muri aba bahinzi bavuga ko imvune bahura nazo ndetse n’ibyo bashora muri ubu buhizi bukorerwa ku butaka bwahujwe bidahuye n’umusaruro bakagombye kuba babona kuko ngo basanga bakorera mu gihombo kubera amafaranga bita inticya ntikize bagurirwaho n’uruganda rutunganya icyayi rwa Gatare.

Nkuriyeho elie ati “Reba guhinga umuhinzi ahabwa igihumbi ku munsi atangira saa moya agataha saa sita naho umusoromyi ikiro ni 40 iyo ukuyemo 1000 cy’umuhinzi na 40 wahaye umusoromyi kuri 80 ugasanga dusigaranye zeru nk’abahinzi bagihinze.”

Aba basobanura ko bakoresha ingufu nyinshi ku girango babashe kwita kuri iki gihingwa, ndetse rimwe narimwe bagashakisha andi mafaranga kuruhande yo guhemba ababafasha gukorera icyayi kuko abasha kukivamo ababana make ntabashe guhemba abakozi bose bacyitaho.

Mukabahire Mariyana ati “Ufata amafaranga y’icyayi ntakwire abakozi wakoresheje ukajya kugurisha ibijumba wahinze ku girango ubishyure kuko utinze gato bajya kukurenga mu buyobozi bakaguhana.”

UWIZEYIMANA Emmanuel, umunyamabanga nshingwabikorwa w’umurenge wa Karambi ntavuga rumwe n’aba baturage

Mbere ngobajyaga bahabwa amafaranga 160 ku kiro cy’ibibabi by’ibyicyayi nibura bikagira icyo bitanga, gusa ngo ntibamenye uko byagenze kuko bahise bayagabanyamo hafi kabiri; aha bakavuga ko aho kugabanuka ahubwo yari kwiyongera ku girango bihure n’imvune bakura muri ubu buhinzi.

Nyiranzabonimana Console ati “ku girango tubone amafaranga yatugirira akamaro nibura bayongera kikagera nko kuri 200 ku girango umusaruro ugire icyo utumarira.”

Ubuyobozi bw’umurenge ntibuvuga rumwe n’aba baturage kuri aya mafaranga make bahabwa aho busobanura ko ikibazo giterwa n’inguzanyo y’amafaranga saga miliyari imwe na miliyoni 700 yahawe koperative bakoreramo igihe batangiraga uyu mushinga wo guhinga icyayi akaba ariyo mpamvu biba ngombwa ko buri muhinzi akatwa amafaranga amafaranga kuri buri kiro ku ruganda; iyo ngo akaba ariyo ntandaro yo ituma amafaranga agera ku muhinzi ari make.

UWIZEYIMANA Emmanuel, umunyamabanga nshingwabikorwa w’umurenge wa Karambi ati “tugereranyije n’izindi nganda zimaze igihe za Gisakura usanga igiciro abaturage bacu bagurirwaho icyayi Atari kibi ahubwo ikibazo abahinzi bacu bafite ni umwenda wa BRD bafashe banjya gukora umushinga wo guhinga icyayi ku buryo kuri buri kiro umuhinzi yasoromye akatwa amafaranga 40 ku kiro ibyo rero ntibabyumva.”

Nubwo ubuyobozi buvuga butyo ariko; abahinzi bo bavuga ko atariko babibona kuko hari n’abatarahawe iyo nguzanyo bakatwa ayo mafaranga.

Ayinkamiye Esther ati “Hari abagurijwe mbere ibihumbi Magana ane ariko hari n’abandi barenga 100 batigeze bagurizwa ariko tukibaza impamvu natwe badukata ayo mafaranga angana kandi twe batarigeze batuguriza.”

Kuri iki ubuyobozi buvuga ko inguzanyo yahawe koperative itahawe umuntu ku giti cye; ibi bigatuma buri muhinzi wese yaba uwatangiye ubu buhinzi kera cyangwa uwinjiyemo vuba agerwaho n’izo ngaruka.

Icyayi kiza ku mwanya wa mbere mu bihingwa ngengabukungu u Rwanda rwohereza mu mahanga nk’isoko y’amadovize; mu mwaka wa 2018, imibare y’ikigo gishinzwe ibyoherezwa mu mahanga ibikomoka ku buhinzi, NAEB yagaragazaga ko icyayi kizinjiza arenga miliyoni 92 z’amadolari ya Amerika zivuye kuri 88 mu wari wabanje wa 2017.

Barasaba ko basobanurirwa byimbitse gahunda yo kuboneza urubyaro kugira ngo imyumvire yabo ihinduke

Ni muri urwo rwego Umuryango Imbuto foundation watangije igikorwa cy’ubukangurambaga muri aka karere bushishikariza ababyeyi kuboneza urubyaro.

Abenshi mu byabyeyi baganiriye na Kigali Today bavuga ko badasobanukiwe neza kuboneza urubyaro ku buryo bamwe basa n’aho aribwo babyumvise bwa mbere abandi bigasa n’ibibateye isoni.

Ku rundi ruhande ariko iyo ubabajije uburyo bazatunga abana bari kubyara ku bwinshi bibabera ihurizo rikomeye, bagasaba ubuyobozi kongera imbaraga mu kubacengezamo iyi gahunda kugira ngo bose bayumve kandi bayishyire mu bikorwa.

Umwe muri abo babyeyi witwa Mukandangira Nowela agira ati “Gahunda yo kuboneza urubyaro se namenya mvuga iki? Ntabyo nzi. Akenshi kutabikora hari ababa bifite kandi umuntu wifite agomba kubyara. Hari n’abandi batinya ingaruka bigira bakabyihorera. Turasaba ubuyobozi kutwegera bakabidusobanurira neza twese tukabyumva kimwe.”

Bamwe mu babyeyi b’i Rusizi ntibaritabira gahunda yo kuboneza urubyaro kubera impungenge babifiteho

Undi witwa Mukamazimpaka Odette yungamo ati “Impamvu abenshi bataboneza ni uko hari ababyara bafite ibyo kubaha ariko nyuma yaho iyo bimaze gushira abana barandagara ugasanga bakwiriye mu gasozi, ni bo usanga babaye inzererezi cyangwa ibirara.”

Jackson Vugayabagabo, Umukozi wa Imbuto Foundation mu ishami ry’ubuzima avuga ko ubu bukangurambaga bwa Baho Neza bwateguwe na Leta y’u Rwanda ibinyujije muri Minisiteri y’Ubuzima bugashyirwa mu bikorwa n’abafatanyabikorwa batandukanye harimo na Imbuto Foundation. Ubwo bukangurambaga buri kwibanda ku bice by’uturere tukiri inyuma muri gahunda yo kuboneza urubyaro. Vugayabagabo yizeza ko ubu bukangurambaga buzatanga umusaruro.

Jackson Vugayabagabo, umukozi wa Imbuto Foundation ahamya ko ubukangurambaga barimo buzatanga umusaruro

Ati “Turareba ibice bitagerwaho cyangwa bitarasobanukirwa na gahunda zo kuboneza urubyaro. Ubu turava i Rusizi, tujye muri Rutsiro hanyuma dusoreze i Gicumbi, kandi abaturage bari kubyumva.
Icyaburaga ni ukubasobanurira bihagije kugira ngo bagire imyumvire ihagije kuri iki kintu. Nyuma yo kubasobanurira, abatari bake bahise bitabira kuboneza urubyaro kandi turizera ko bizatanga umusaruro.”

Umuyobozi w’Akarere ka Rusizi wungirije ushinzwe imibereho myiza y’abaturage, Nsigaye Emmanuel, avuga ko nubwo imyumvire yo kuboneza urubyaro muri aka karere ikiri ikibazo, ngo hari icyizere ko hamwe no guhozaho mu bukangurambaga butandukanye bizagenda bihinduka.

Ati “Hamwe n’ubukangurambaga turi gukorana na Imbuto Foundation, ndetse n’ibikorwa tugiye gufatanyamo muri aka karere turizera ko bizatanga umusaruro ushimishije imibare y’ababoneza urubyaro igakomeza kwiyongera nubwo bigaragara ko hakiri ikibazo cy’imyumvire ikiri hasi.”

Umuyobozi w’Akarere ka Rusizi wungirije ushinzwe imibereho y’abaturage, Nsigaye Emmanuel, avuga ko imyumvire y’abaturage ikiri hasi

Muri ubwo bukangurambaga, ababyeyi bibutswa ko kutaboneza urubyaro bigira ingaruka nyinshi mu miryango zirimo kubaho nabi kubera kubyara abo badashoboye kurera, kurwara indwara zikomoka ku mirire mibi harimo kugwingira, gucikiza amashuri kw’abana, n’ibindi.

Ni muri urwo rwego umuryango nyarwanda ukangurirwa kumva neza iyi gahunda no kuyishyira mu bikorwa.

Kugeza ubu Akarere ka Rusizi kageze kuri 39%, muri gahunda yo kuboneza urubyaro.

Abafite ababo bashyinguwe mu rwibutso rwa Gashirabwoba barifuza ko rwashyirwa mu murage w’isi

Ibi babisabye ubwo uru rwibutso rwashyingurwagamo imibiri 15,629 y’abazize Jenoside yakorewe Abatutsi yimuwe mu nzibutso zo mu turere twa Rusizi na Nyamasheke, zishaje ndetse n’indi yakuwe aho yari yarashyinguwe mu ngo z’abaturage mu rwego rwo guhuza inzibutso kugira ngo zirusheho kwitabwaho mu buryo burambye.

Abarokotse Jenoside yakorewe Abatutsi bafite ababo bashyinguwe muri uru rwibutso bishimiye ko ababo bishwe muri Jenoside bagiye kuruhukira aheza cyane ko bahoraga bababazwa no guhora babimura bya hato na hato kubera inzibutso zishaje bari bashyinguyemo.

Icyakora na none basaba ko bakurikije amateka ya Jenoside muri aka gace ko uru rwibutso rwa Gashirabwoba rwashyirwa ku rutonde rw’umurage w’isi rwa UNESCO, nk’uko Kayisire Aristarque, uhagarariye imiryango y’abashyinguwe muri uru rwibutso abivuga.

Abantu benshi bitabiriye gushyingura mu cyubahiro imibiri y’abazize Jenoside ba Rusizi na Nyamasheke bashyinguwe mu rwibutso rwa Gashirabwoba

Yagize ati “Ndashimira abavandimwe turi kumwe muri iki gikorwa cyo guherekeza abacu bwa nyuma. Abashyinguye gake ubu ni ubwa kabiri kuko abenshi ubu bashyinguye bwa gatatu.”

Yakomeje ati “Muyobozi wa CNLG twagize amahirwe yo kubana namwe tuzi ko hari inzibutso enye mwasabiye kujya mu rwego rw’inzibutso ziri mu mutungo w’isi. Twabasabaga niba UNESCO itarahagaritse iyo gahunda ko mwadusabira natwe urwibutso rwacu rukajyamo, cyane ko ari n’amateka yadushimisha nk’abantu bakunze kwitwa ko turi ab’inyuma y’ishyamba.”

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr. Bizimana Jean Damascene, yavuze ko inzibutso zose zifite agaciro kangana, asobanura ko zose zitajya ku rutonde rw’umurage w’isi cyane ko n’izatanzwe harimo urwa Bisesero, Gisozi, Murambi na Nyamata na zo hagitegerejwe ko zemezwa na UNESCO.

Dr BIZIMANA avuga ko inzibutso zose zingana rwaba urwo ku rwego rw’isi n’urwo ku rwego rw’igihugu

Yagize ati “Inzibutso zose zifite agaciro kamwe, icyubahiro kimwe n’umurongo umwe. Kuvuga ngo zimwe zive ku rwego rw’akarere zijye ku rwego rw’Igihugu cyangwa ku rwego rw’isi, ni gahunda Leta yatangiye ku rwego rw’isi twasabiye inzibutso enye ni ukureka icyo kikabanza kigakemuka ntabwo rero twahita dushyiraho izindi ubu ariko inzibutso zose nongere mbisubiremo zifite agaciro kamwe hose mu gihugu.”

Visi Perezida w’Inteko Ishinga Amategeko Umutwe wa Sena, Harerimana Fatu, we yagarutse ku bahoze ari abategetsi bateguye bakanashyira mu bikorwa Jenoside yakorewe Abatutsi ariko bakagirwa abere n’inkiko mpuzamahanga, avuga ko u Rwanda rwo ruzakomeza kubakurikirana cyane ko iki cyaha kidasaza.

Ati “Ku ruhande rwacu nk’u Rwanda twanze kwemera icyemezo cyafashwe n’inkiko zo hanze cyo kurekura cyangwa kugira abere abakoze Jenoside bivuga ko tuzakomeza kubakurikirana, icyaha cya Jenoside ntigisaza.”

Urwibutso rwa Gashirabwoba rugizwe n’icyumba cy’inama, igice cyo kwibukiramo, icy’amateka ya Jenoside, igice kigaragaza amateka ya Jenoside y’abana, ibikoresho byifashishijwe mu gushyira mu bikorwa Jenoside ndetse n’ahagenewe ibitabo bivuga ku mateka ya Jenoside. Urwo rwibutso ruhuriweho n’uturere twa Rusizi na Nyamasheke kuko n’ubwo ruri mu Karere ka Nyamasheke, hari imibiri 1,309 yimuwe i Rusizi ijyanwa muri urwo rwibutso.

Abarokokeye i Gashyirabwoba bavuga inzira y’umusaraba banyuzemo

Abayobozi batandukanye bashyize indabo ku rwibutso

Amasanduku ajyanywe mu rwibutso

Amasanduku arimo imibiri

Hanacanwe urumuri rw’icyizere

Visi Perezida w’Inteko Ishinga Amategeko umutwe wa Sena, Harerimana Fatu, avuga ko bazakomeza gukurikirana abagizwe abere n’inkiko zo mu mahanga

Urwibutso rwa Gashirabwoba rwashyinguwemo imibiri 15,629 bo mu Karere ka Rusizi na Nyamasheke

Urwibutso rwa Jenoside yakorewe Abatutsi rwa Gashirabwoba rwuzuye runashyingurwamo

Abayobozi batandukanye bashyikirije abagore batishoboye inkunga

Iki gitekerezo gitangira byari biteganyijwe ko muri buri ntara hazafashwa abagore 100 aho buri wese muribo azajya ahabwa amafaranga Atari munsi y’ibihumbi 100 ariko intara y’uburengerazuba yo yiyemeje guha igishoro abarenga 500 kugira ngo babashe kwikura mu bukene.

Guverineri w’intara y’Uburengerazuba Munyantwari Alphonse, avuga ko abanyamuryango bishimiye iki gikorwa bituma bagishoramo imbaraga nyinshi bityo aho gufasha abagore 100 bafasha 517 ndetse yizeza ko iki gikorwa kitarangiriye aha ahubwo ko kizakomezareza no kubandi bagore bafite ubushobozi bwo gukora ariko bakazitirwa n’ubushobozi buke kuko batabasha kwibonera igishoro.

Ati “Ijana si umubare wo guhagarariraho navuga ko ari nk’izina ariko iki gitekerezo gitangira twari twavuze ko tutagomba kujya munsi y’abagore 100, bagomba guhabwa igishoro, kandi n’ibigenda neza iki gikorwa kizakomeza, si igikorwa gihagarara, none rero turizera ko n’abandi batishoboye kizabageraho.”

Havugimana Uwera Francine, komiseri w’umuryango wa FPR INKOTANYI ushinzwe iterambere ry’umugore ku rwego rw’igihugu, yasabye abagore bahawe inkunga kuzibyaza umusaruro

Ikigenderwaho ni uko uhabwa ubu bufasha agomba kuba atishoboye ariko kandi akaba ashoboye mu buryo bw’imikorere kuko aya mafaranga bahabwa baba bagomba kuyabyaza umusaruro ugaragara kuburyo mu munsi iri imbere bazagera ku rwego rwo kugana ibigo by’imari bahereye kuri iki gishoro bahawe cyane ko ari amafaranga bahawe batagomba kungukira.

Nyirabizimana Anastasie ni umwe mubahawe iyi nkunga avuga ko asanzwe ari umukene aho yari abeshejweho no kuzunguza ibihumbi 20 bikamwishyurira inzu y’ubukode ndetse akabona n’icyo kurya, kuba ahawe ibihumbi 100 ngo yiteguye kubibyaza umusaruro kuburyo mu gihe kiri imbere azaba avuye mu cyiciro cyambere cy’ubudehe abarirwamo kuri ubu.

Ati “ Ncuruza amakara nkoresheje ibihumbi biri hagati ya 15 na 20 ngakuramo ubukode n’ibiryo. Ubu icyo nteganya muri aya mafaranga ni uko nakora ibishoboka byose akagira aho ankura n’aho angeza nkava mu cyiciro cyambere ndetse nkabonamo n’itungo rito nkamera nk’abandi bishoboye.”

Nkiko Leah yungamo ati “Bakimara kumbwira ko bazantera inkunga numvise nishimye cyane. aya mafaranga azagira aho ankura n’aho angeza cyane ko mfite n’abana biga, ndizera ko mu gihe kiri imbere nzatanga ubuhamya mu bandi bagore mvuga ko hari aho navuye n’aho nageze nkareka gusabiriza.”

Havugimana Uwera Francine, komiseri w’umuryango wa FPR INKOTANYI ushinzwe iterambere ry’umugore ku rwego rw’igihugu, yasabye abanyamuryango gukurikirana imishinga iciriritse aba bagore bagiye gukora kugirango itazahura n’inkomyi amafaranga bahawe akaba yabapfira ubusa.

Ati “icyo dushaka ko kivamo n’impinduka y’ubuzima bw’abanyarwanda bakava mu bukene. turifuza kandi ko umwaka utaha nitugaruka aha tuzasanga ubuzima bwabo bwarahindutse tutongeye gutekereza kongera kubaremera bundi bushya.”

Abenshi muri aba bagore basabwe gukora imishinga bifuza kandi bumva bashoboye ariko ibyara inyungu. Ni muri urwo rwego abenshi mubo Kigali today yaganirije bavuze ko bagiye gukora ubucuruzi buciriritse. Mu gutangiza iki gikorwa ku mugaragaro hari haje abagore 100 bahagarariye bagenzi babo 517, muri aba bose nibura buri murenge muri iyi ntara uhagarariwe n’umugore umwe.buri mugore yahawe umuntu umusumbije ubushobozi n’ubumenyi uzajya akurikirana uko umushinga we ugenda akabitangira Raporo.

Bavuga ko babangamirwa no gusabwa kujya kwigurira imiti

Aba baturage basobanura ko batorohewe n’uko kutabona imiti kuko amafaranga yose baba bitwaje bayishyura ku bitaro bizeye ko bari bubone imiti, ariko bikarangira nta yo bahawe ahubwo bagatumwa kujya kuyigurira hanze. Ibi ngo bituma bagorwa no kubona amafaranga yo kugura indi miti, ibintu bituma bamwe bacika intege bagataha batavuwe .

Uwitwa Nyiraminani Francine yagize ati “Ku wa kane nagiye kwivuza ku kigo nderabuzima cya Nyakarenzo, bafata ibipimo, basanga ndwaye, banyandikira imiti, ngiye kuyifata barayibura ndetse hari n’akana gato nari mfite na ko bakandikira imiti irabura.”

Usibye abivuriza ku bigo nderabuzima hari n’abo twasanze ku bitaro bya Mibilizi, bavuga ko na bo babuze imiti. Ibitaro byabatumye kujya kuyishakira hanze, batanga andi mafaranga. Ku bwabo basobanura ko iyi serivisi bari guhabwa batayishimiye kuko itaborohereza nk’abantu bafite ubwishingizi mu kwivuza bwa Mituweli.

Undi muturage witwa Bayihiki Emmanuel yagize ati “Nta serivisi ziri hano none se niba nta miti ihari urumva byagenda gute? Maze kwishyura none banyohereje kujya kwigurira imiti i Kamembe. Ubu se bamariye iki ko amafaranga yose nayabahaye?”

Iki kibazo cy’ibura ry’imiti kinashimangirwa na bamwe mu bakozi b’ibi bitaro bahorana n’abarwayi umunsi ku wundi, aho bavuga ko nyuma yo kubura imiti mu bitaro, abarwayi badasubizwa amafaranga yabo ngo nibura babe ari yo baheraho bajya kugura imiti batahawe mu bitaro.

Umwe mu bavuganye na Kigali Today utashatse kuvuga amazina ye yagize ati “Umurwayi ava kwishyura yajya gufata imiti bakamubwira ngo ntayihari kandi umurwayi yamaze kwishyura akabirenganiramo kandi icyo kibazo kimaze igihe kirekire.”

Umuyobozi w’ibitaro bya Mibilizi, Dr. Nzaramba Théoneste, avuga ko iri bura ry’imiti ahanini ngo riterwa n’abaza kwivuza ntabwisungane bafite ndetse badafite n’ubushobozi bwo kwiyishyurira imiti bigatuma imiti ishira vuba mu bubiko bw’ibitaro.

Ati “Bibaho ko imiti yabura bitewe n’uko hari abantu baza kwivuza nta Mituweli bafite nta n’ubundi bushobozi bafite bigatuma hashobora kubura imiti.”

Ubuyobozi bw’Akarere ka Rusizi buvuga ko bwamaze kubonera umuti iki kibazo aho bwasabye Farumasi y’akarere guha imiti ishoboka ibi bitaro kabone n’ubwo bitakwishyura aho kugira ngo abaturage bahazaharire nk’uko bisobanurwa na Kayumba Ephrem, umuyobozi w’aka karere.

Ati “Ku bitaro habaye imiti mike si ukuvuga ko yashize, ahubwo hari ubwoko bumwe na bumwe butari buhari, ariko tukimara kubimenya ku karere twasabye ko imiti yose ikenewe bayibaha n’ubwo batakwishyura kandi turizera ko bitazongera.”

Si ubwa mbere abaturage bivuriza mu bitaro bya Mibilizi bataka ikibazo cyo kubura imiti kuko mu myaka ine ishize bongeye guhura n’ikibazo nk’iki cyane cyane abakoresha ubwisungane mu kwivuza bwa Mituweli.

Kudahemba bamwe mu bakozi b’ibi bitaro bya Mibilizi biri guteza ingaruka haba kuribo ndetse n’abarwayi babigana

Abaganga n’abakozi b’ibitaro bya Mibilizi bafite iki kibazo ni abagera kuri 67 basanzwe bahembwa n’ibitaro ubwabyo. Aba basobanura ko amezi abaye atatu nta cyitwa umushahara kandi ari wo bakesha ubuzima bwabo bwose.

Ni mu gihe bagenzi babo bandi bo bahembwa na Minisiteri y’Ubuzima n’abandi baterankunga; bo batarebwa n’iki kibazo kuko bo babonera amafaranga yabo igihe.

Umwe muri aba bakozi yagize ati “Urabona kujya kukazi buri munsi nta kintu winjiza ukamara amezi atatu kandi dufite abana mu mashuri, tugomba no kurya biragoye mbese ubuzima bwacu bwarahungabanye muri rusange nibadufashe gusohoka muri iki kibazo.”

Usibye umushahara w’ukwezi bakagombye kuba bahembwa n’ibitaro bya Mibilizi ubwabyo nkuko bigaragara mu masezerano bagiranye, hari n’andi mafaranga y’agahimbazamusyi atangwa na Ministeri y’Ubuzima buri gihembwe bita (PBF); ayo nayo aba bakozi baravuga ko bamaze ibihembwe bitandatu bihwanye n’umwaka n’igice batayaca iryera.

Uyu ati “icyo tutumva ni uburyo ibigo nderabuzima bikorera muri ibi bitaro babona amafaranga ya (PBF) twebwe ntituyabone. Hari amakuru avuga ko minisiteri y’ubuzima iyohereza agakoreshwa mu kugura amavuta y’imodoka n’indi mirimo y’ibitaro ugasanga ibyo byose ari twe tubigwamo.”

umuyobozi w’ibitaro bya Mibilizi Dr.Nzaramba Theoneste, avuga ko ibibazo bafite babigejeje kunzego zibishinzwe kandi ko bizeye ko bizakemuka

Ibyo byose biraza bikitura ku barwayi bivuriza muri ibi bitaro aho bavuga ko batari kwishimira serivisi bahabwa n’abashinzwe kubavura.

Nyirangwijabanzi Agathe ati “Navuye imuhira saa kenda z’ijoro ibyo mbabwira ni ukuri kugeza ubi sindavurwa ndimo kwibaza ukuntu ntaha byanyobeye.”

Ngerina Kabera yungamo ati “Nageze aha saa moya za mugitondo bampeye nomero ya cyenda ariko ntibarajyana mu isuzumiro kandi mfite umuvuduko ni ikibazo kuko ntabwo bari kutwakira ngo batuvure.”

Usibye kuba aba baganga basobanura ko bagerageza uko bashoboye ngo buzuze inshingano zabo zo kuvura abarwayi, kurundi ruhande bashimangira ko bisa n’ibibagoye cyane kuzuza ibyo akazi kabasaba cyane ko hari ibisaba imbaraga z’umubiri ari na yo mpamvu biri kugira ingaruka ku barwayi.

Uyu ati “Kuvura umurwayi utariye biragoye kuko iyo umaze kabiri utarya, bakwirukanye munzu mu mutwe byivanze usanga ari ikibazo gikomeye. Rimwe na rimwe umurwayi akahasiga ubuzima kuko ntambaraga zo kumwitaho uba ufite yewe hari nubwo umwakira ufite umujinya wo kudahembwa.”

Uku kudahembwa kw’abakozi bamwe b’ibitaro bya Mibirizi ngo biterwa n’amadeni asaga miriyoni Magana atatu ibi bitaro biberewemo harimo agomba kwishyurwa n’ikigo cy’ubwiteganyirize mu Rwanda (RSSB), icyakora umuyobozi w’ibi bitaro Dr.Nzaramba Theoneste, avuga ko iki kibazo cyagejejwe ku nzego zigishinzwe kandi ngo biteguye ko kizakemuka nubwo atavuga igihe kizakemukira.

Ati “Biragoye kuko kugeza ubu hari aho dutegereje amafaranga tutarabona ni icyo kibazo dufite ariko twakigejeje ku buyobozi bw’akarere na minisiteri y’ubuzima hari icyo ibiziho hari icyizere kirambye dufite ko bazabidufashamo.”

Iki kibazo cy’imyenda iberewemo ibitaro bya Mibilizi si ubwambere kivuzweho kuko ubwo abasenateri bazaga muri aka karere mu kwezi kwa gatatu uyu mwaka wa 2019, mu rwego rwo kureba uburyo bw’imitangire ya serivisi z’ubuzima zihagaze bakigejejweho icyo gihe biyemeza kugikorera ubuvugizi.

Aba baturage bari kuvoma amazi meza nyuma y’iminsi myinshi bakoresha amazi y’ikiyaga

Ishywa ni ikirwa, kikaba kamwe mu tugari tugize Umurenge wa Nkombo na wo w’ikirwa. Abahatuye bavuga ko amazi meza bayaherukaga mu myaka ibiri ishize akaba ari amazi babonaga bifashishije ipompo, ariko aza kwangirika ntiyasanwa ubu bakaba bari basigaye binywera ikiyaga cya Kivu.

Umuyoboro mushya batashye witwa ‘Inuma’ ureshya na kilometero eshatu watwaye miliyoni 45 z’amafaranga y’u Rwanda.

Amateka yahindutse kuri aba baturage bamurikiwe uruganda rutunganya amazi azagera ku ngo zose zituye aka kagari uko ari 457 zirimo abaturage basaga ibihumbi bitatu. Byari ibyishimo kuri aba baturage ubwo uru ruganda rwamurikwaga aha ku Ishywa.

Kibaganze Ernestine ati “Turashimira Imana tugashimira n’ubuyobozi bw’igihugu cyacu ubu twabonye amazi meza asukuye ntitukiri kurwaragurika nk’uko byahoze.”

Aba baturage babonye amazi meza bayanyotewe

Ni amazi akarere kegereje abaturage ku bufatanye n’umushinga Water Access Rwanda. Gatete Donatien, umukozi w’Akarere ka Rusizi ushinzwe ishami ry’ibikorwa remezo, imiturire n’ubutaka, yasabye aba baturage kutongera gusubira kuvoma ikiyaga.

Ati “Bahugukire gukoresha amazi meza bibagirwe gukoresha amazi y’ikiyaga cya Kivu icyakora birasaba kubigisha kuko hari abavuga ko amazi y’ikivu ko ari yo abaryohera, no kuba agurwa ubwabyo hari abashobora kubibona nk’imbogamizi.”

Aya mazi ageze kuri aba baturage atwaye amafaranga y’u Rwanda asaga miliyoni 40.

Ni mu gihe ikirwa cya Nkombo mu minsi yashize cyari hamwe mu hakunze kugaragara indwara ziterwa n’umwanda zirimo Kolera na macinya kubera amazi atari ahagije kuri iki kirwa.

Abaturage bagaragaza ibyishimo bidasanzwe byo kwegerezwa amazi meza

Akarere kakomeje guhangana n’iki kibazo kugeza aho kuri ubu iki kirwa cyose cya Nkombo gituwe n’abasaga ibihumbi 16 kimaze kugezwaho amazi meza igisigaye kikaba ari ubushobozi bwa buri muturage kuyageza iwe mu rugo.

Imibare igaragaza ko muri aka karere kose abaturage 68 ku ijana ari bo bamaze kugerwaho n’amazi meza.

Iri janisha n’ubwo rirenze icya kabiri ku ijana, haracyari imirenge y’icyaro nka Butare na Gikundamvura igifite ikibazo gikomeye cy’amazi ahagaragara abaturage bakivoma ibinamba n’abakora ibilometero bajya kuyashaka ku mavomo rusange na yo mbarwa.

Icyakora Umurenge wa Bweyeye na wo wari ufite iki kibazo, ubu hariyo umushinga wa Miliyoni 150 z’amafaranga y’u Rwanda witezweho kuzagikemura nibura kugeza kuri 90% nk’uko imibare itangwa n’ubuyobozi ibigaragaza.

Gatete Donatien, umukozi w’Akarere ka Rusizi ushinzwe ishami ry’ibikorwaremezo ,imiturire n’ubutaka yasabye aba baturage kutongera gusubira kuvoma ikiyaga

Abanyeshuri n’abayobozi bashyikirije inka abarokotse Jenoside batishoboye

Gashayija Alphonse, umwe mubarokotse Jenoside yakorewe Abatutsi worojwe inka y’inzungu, avuga ko inka yari afite ndetse n’indi mitungo babimusahuye muri Jenoside, ubuzima buza kumugora kugeza n’aho yumvaga nta cyizere afite cyo kubaho. Icyakora ubu noneho ngo arumva yongeye kwishima kuko hari abamuzirikanye bakamworoza.

Ati “Natangiye gutunga mu 1973, inka ziza gusahurwa muri Jenoside, zirashira nsigara aho mfite ibisigisigi by’ibikomere bya Jenoside, ngira no kuba umworo ntangira kwiheba none ku bw’amahirwe aba bana bampaye inka uko byasa kose ndumva ngize agatege kandi nshimiye ababikoze kuko bagiye kunsazisha neza.”

Sibomana Aimable na we wagabiwe, yagize ati “Birashimishije kubona iyi kaminuza y’u Rwanda iri mu Mudugudu wa Nyagatare batugirira icyizere cyo kudushumbusha kugira ngo twongere tworore tubone amata n’ifumbire. Iyi nka bampaye ni icyizere cyanjye cy’ubundi buzima buri imbere.”

Abanyeshuri n’abayobozi bashyikirije inka abarokotse Jenoside batishoboye

Amafaranga yaguze izi nka yavuye mu bushobozi bw’abanyeshuri ariko kaminuza ibongereraho, maze barazigura. Dan Mugabo na Bugingo Patience, bamwe muri aba banyeshuri, bemeza ko kuremera aba baturage ari ukubashumbusha na bo ngo bongere kugira igicaniro iwabo.

Dan Mugabo ati “Aba babyeyi tworoje barangana n’ababyeyi bacu twabuze kandi na bo hari abana babuze mu gihe cya Jenoside, ariko kuba twe turiho uyu munsi dusa nk’aho turi abana babo babuze. Tukishyira mu cyimbo cyabo ni yo mpamvu ibyo bari kubagezaho, twe turahari tuzajya tugerageza kubafasha uko dushoboye ari na yo mpamvu twifuje kuboroza.”

Rehema Uwamahoro, umuyobozi w’ishami rya Kaminuza rya Rusizi, avuga ko iki gikorwa atari gishya ahubwo ko bakomeje gukora ibi bikorwa kugira ngo kaminuza ikomeze kugirira umumaro abayituriye.

Ati “Tumaze kuremera abacitse ku icumu rya Jenoside yakorewe Abatutsi. Tubahaye inka ebyiri mu rwego rwo kugaragaza ko Kaminuza y’u Rwanda yifatanya n’abacitse ku icumu. Ni mu rwego kandi rwo kugaragaza uruhare rwacu mu iterambere ry’umurenge n’akarere dukoreramo akaba ari yo mpamvu twitabira ibikorwa nk’ibi kugira ngo dufatanye gukemura bimwe mu bibazo by’abaturage duturanye.”

Bamwe mu bagize uruhare mu koroza aba baturage

Umunyamabanga Nshingwabikorwa w’Umurenge wa Gihundwe, Uwamwiza Jeanne d’Arc we avuga ko iyi kaminuza imaze kuba umufatanyabikorwa mwiza muri gahunda zitandukanye ziteza imbere abaturage. Icyakora agaruka kuri izi nka zorojwe aba, yabasabye kutazipfusha ubusa kugira ngo na bo bazaremere abandi.

Ati “ Dufatanya n’Iyi kaminuza mu bikorwa by’inshi haba mu muganda baritabira cyane , uyu munsi nabwo murabona igikorwa cy’inyamibwa badukoreye cyo koroza abarokotse Jenoside, si ibi gusa badufashamo kuko iyi kaminuza ari umufatanyabikorwa ukomeye kandi bagaragaza ibikorwa.”

Kaminuza y’u Rwanda ishami rya Rusizi kugeza ubu ifite abanyeshuri 283 bari mu isami rimwe ry’ubucungamari.

Abasaga 200 bigira muri izi nyubako ni bo boroje aba baturage

Harabura akantu gato ngo uyu muhanda utandukane burundu

Tariki ya 11 Mata 2019, Kigali Today yatangaje inkuru ivuga ku iyangirika ry’uyu muhanda biturutse ku nkangu yari yabangamiye ubuzima bw’abatuye mu Murenge wa Gitambi n’ibindi bice bituranye na wo.

Icyo gihe abaturage bavugaga uburyo bagorwa no kugera aho bivuriza kuko kujya ku bitaro bya Mibilizi uvuye ku kigo nderabuzima cya Mashesha byasabaga gukuba kabiri urugendo rwahakorwaga mbere. Ibyo kandi ni na ko byari bimeze ku bajyana imyaka ku isoko.

Uwitwa Niyigena Daniel agira ati “Kujya i Kamembe mu mujyi, Mibilizi ku bitaro, Nyakarenzo, n’ahandi byatworoheraga, none aka kanya nk’uko nawe ubyirebera ntitworohewe! Turasaba ubuyobozi kutwoherereza imashini ikadukorera uyu muhanda natwe tugasigara dushyiraho amaboko yacu mu muganda.”

Icyo gihe ubuyobozi bw’akarere bwari bwavuze ko bugiye gusana ibishoboka kugira ngo ubuzima bukomeze. Umuyobozi w’Akarere ka Rusizi, Kayumba Euphrem yari yavuze ati “Ntabwo bitwara iminsi myinshi kuko muri iki gitondo navuganye n’umukozi ushinzwe kubaka imihanda ku buryo nk’ejo imirimo yo gukuramo ibitaka byaguyemo izaba yatangiye.”

Aba baturage bavuga ko bagorwa n’ingendo bakoresha amaguru mu gihe mbere bakoreshaga imodoka

Kuri iyi nshuro nyuma y’ibyumweru bibiri, umunyamakuru wa Kigali Today yongeye kunyura muri uyu muhanda asanga ibyo ubuyobozi bwemeye nta cyakozwe ahubwo umuhanda warushijeho kwangirika.

Abaturage baracyatabaza, nk’uko umwe muri bo witwa Iyamuremye Moise abigaragaza, ati “Ntacyo tutakoze rwose inteko y’abadepite icyuye igihe twayigejejeho iki kibazo cy’uyu muhanda batwizeza ko bazadukorera ubuvugizi ariko ntacyakozwe, yewe n’iyi nteko iriho barabizi kuko baje kwiyamamaza hano turakibabwira ariko aho kugira ngo gikemuke ahubwo birarushaho gusubira inyuma.”

Kuri iyi nshuro icyo umunyamakuru yakoze ni ugusubira ku biro by’akarere kongera kubaza umuyobozi w’akarere icyo batekereza kuri uyu muhanda, umuyobozi w’akarere avuga ko mu cyumweru kimwe uraba watangiye gukorwa.

Ati “Abakozi bacu bagiyeyo, bakora ingengo y’imirimo igomba gukorwa kugira ngo turebe ko hakorwa ubutabazi bwihuse kuri hariya hantu hangiritse cyane ku buryo imodoka ziva Gitambi zijya Bugarama cyangwa iziva Bugarama zijya Gitambi zibasha gutambuka. Ndizera ko iki cyumweru kiza gushira twabonye umurongo.”

Hamwe hatwawe n’inkangu mu gihe ahandi mu muhanda hagaragaramo ibibuye na byo byagiye bigwa mu muhanda bimanuwe n’inkangu

Nubwo umuyobozi w’akarere avuga ibi ariko, icyizere cyo kuwukora mu buryo burambye kirasa nk’aho nta gihari kuko umuhanda wangiritse bikabije kandi uretse izi nkangu ziwibasiye muri uku kwezi kumwe, abaturage bamaze imyaka myinshi bagaragaza ko ukwiriye gukorwa, ubuyobozi na bwo bukabizeza ko bubirimo ariko ntibikorwe.

Usibye uyu muhanda Mibilizi-Mashesha w’ibilometero bibarirwa muri 20 unanyura mu misozi ihanamye ukeneye gukorwa, i Rusizi hari indi mihanda ikeneye kwitabwaho harimo iyo mu Mujyi wa Rusizi.

Abatuye mu Murenge wa Butare muri ako karere, n’abakoresha umuhanda wa Gihundwe – Nkanka na bo ntibahwema gusaba kuva mu bwigunge baterwa n’imihanda itameze neza bifuza ko itunganywa ikabafasha guhahirana n’abo mu bindi bice.

Inkuru bijyanye:

Rusizi: Inkangu yahagaritse ingendo z’abakoresha umuhanda Mashesha - Mibilizi

Bamwe mu bakozi b’akarere ka Nyamasheke nibwo bwambere batembereye n’amaguru muri pariki ya nyungwe kandi bayituriye

Bamwe mu bakozi b’aka karere bavuga ko batunguwe n’abavuga ko muri iyi Pariki hari umutekano muke, kuko batembereye ibice byayo bitandukanye n’amaguru ari nako bahura n’abanyamahanga batandukanye bari mu bikorwa byabo byo gusura.

Aha ni ho bahera bamara impungenge ibihugu bimwe byagiye bikwirakwiza amakuru avuga ko iyi pariki ndetse nt’intara y’uburengerazuba iherereyemo hakwiye kwitonderwa, bakavuga ko ibyo bavuga ari ibihuha bityo bagashishikariza abifuza kuhakorera ingendo baba ba mukerarugendo n’abandi kuza batikandagira.

Uwitonze Alice ati “Njyewe sinemera ibyo bavuze, kuko nabonye ari amahoro kandi umuntu wese yahagenda uko abyumva.”

Mukeshimana Violette nawe ati “Nkuko mubibona dufite igice kinini cy’iyi Pariki gikora ku karere kacu ka Nyamasheke. ibyo rero bivugwa ngirango uwaba Atari hano yagira ngo ni ibindi, ariko twe tuhegereye tuzi neza ko ntakibazo gihari ari nayo mpamvu twahisemo kuhaza ndetse tukaba twabwira n’abadatuye hafi aha ko ntakibazo cy’umutekano gihari. ibyo bihuha ni ukubyamaganira kure.”

Iki kiraro gihanitse mu kirere kiri muri bimwe mubituma ba Mukerarugendo basura iyi Pariki

Mu butumwa butangwa n’ubuyobozi bw’aka karere ka Nyamasheke ni ubwo gukangurira Abanyarwanda n’abanyamahanga muri rusange kutagira impungenge izo ari zo zose kuko aka karere n’igihugu muri rusange hagendwa nkuko bisobanurwa n’umuyobozi w’aka karere Kamali Aime Fabien.

Ati ”Twabwira abaturage bose n’abanyamahanga ko muri Pariki ya Nyungwe n’akarere ka Nyamasheke yewe n’u Rwanda ari Nyabagendwa.”

Minisitiri w’ububanyi n’amahanga n’ubutwererane Dr Richard Sezibera, aherutse kubwira itangazamakuru ko ibihugu bibwira abaturage byabo amakuru atari ukuri bikwiye kubanza bikegera u Rwanda rukabiha amakuru yizewe.

Abasuye iyi Pariki bagize ibihe byiza

Bishimiye gukorera umunsi mukuru w’abakozi muri Nyungwe

Umuyobozi w’akarere ka Nyamasheke Kamali Aime Fabien amara abanyarawanda n’abanyamahanga impungenge kubirebana n’umutekano muri Nyungwe

Hari aho abantu bagera bakazamuka nk’abagenda ku musozi

Kambanda Fabien avuga uburyo barwanye ku barwayi bari batemaguwe kandi na bo barimo guhigwa

Ibi kandi basobanura ko babikoraga badafite ubwoba bwinshi na cyane ko bamwe mu bo bakoranaga bari bamaze kwicwa.

Umwe muri abo baganga bahigwaga witwa Kambanda Fabien asobanura ko bagenzi babo batahigwaga babatereranye ndetse bamwe bakajya gukorana n’interamwe. Icyakora kurokoka kwa bamwe muri aba bahungiraga mu bitaro ku ruhande rumwe ngo byagizwemo uruhare n’ababikira basigiye aba baganga b’Abatutsi imfunguzo z’ibitaro ndetse n’aho babikaga imiti kugira ngo nibibakundira bagire abo bafasha.

Yagize ati “Twari twarahungiye muri ‘chambre noire’ twabona habaye agahenge tugasohoka tukemera tukajya kureba abo bantu bakomeretse kugira ngo turebe ko hari n’uwo twarokoramo. Twabikoraga nta bwoba bwinshi dufite kuko twari dutegereje ko natwe tugomba gupfa ariko nibura tugize uwo dutabara.”

Umuyobozi w’ibitaro bya Mibilizi, Dr. Nzaramba Théoneste, avuga ko bibabaje kubona abagombaga kurengera ubuzima bw’abantu ari bo babutererana. Asobanura ko muri iki gihe bashishikariza abakozi b’ibitaro kugera ikirenge mu cya bagenzi babo b’Abatutsi bishwe batanga serivisi nziza.

Dr. Nzaramba Théoneste uyobora ibitaro bya Mibilizi asaba abakozi gukurikiza urugero rwa bagenzi babo bishwe, batanga serivisi nziza ku barwayi

Ati “Tuzakomeza gushishikariza abakozi b’ibitaro bya Mibilizi guhora bazirikana umurava bagenzi babo bazize Jenoside bagiraga, tunabizeza ko Jenoside itazongera kubaho ukundi.”

Umuyobozi w’Akarere ka Rusizi wungirije ushinzwe imibereho myiza y’abaturage, Nsigaye Emmanuel, yasabye buri wese kugira uruhare mu kurwanya abahakana n’abapfobya Jenoside yakorewe Abatutsi kuko yateguwe kandi igashyirwa mu bikorwa na Leta mbi yari ihari.

Ati “Ni uruhare rwacu twese kugira ngo dukomeze gufatanya kurwanya ingengabitekerezo ya Jenoside n’abayipfobya kuko Jenoside yateguwe kandi igashyirwa mu bikorwa na Leta.”

Abakozi 11 b’ibitaro bya Mibilizi, abaturanyi babyo bane, n’umurwayi umwe ni bo biciwe mu bitaro bya Mibilizi.

Umuyobozi w’akarere ka Rusizi wungirije ushinzwe imibereho myiza y’abaturage, Nsigaye Emmanuel, avuga ko bagomba kurwanya abapfobya Jenoside

Abaturage batandukanye bitabiriye umuhango wo kwibuka abiciwe mu bitaro bya Mibilizi

Uko bamwe bogera muri uyu mugezi ni nako abandi bari kuvomamo amazi yo gukoresha mu rugo

Ubwo Kigali today yageraga ku mugezi wa Rubyiro ku gice cyawo gihuriweho n’imirenge ya Bugarama na Gikundamvura mu karere ka Rusizi; yahasanze abana bari hagati y’imyaka 13 na 15 bari kwidumbaguza muri uyu mugezi.

Ni amazi asa nabi cyane ku buryo utamenya ko ari amazi y’umugezi utemba bitewe nuko haruguru abantu bari koga hepfo naho abandi bari kuvoma amazi y’ibirohwa ngo bajye kuyakoresha imirimo yo guteka no gusukura ibyombo utaretse no kunywa kubera amaburakindi.

Nyiransabimana Polina ati “naje kuvoma aya mazi niyo tunywa, niyo twoga ni nayo dutekesha kuko ntayandi mazi tugira hano.”

Nyirarukundo Francine ati “nta tiyo iba mu mudugudu wacu aya mazi ya Rubyiro ni yo adukujije kuko ariyo tunywa yonyine.”

Ku rundi ruhande aborozi b’inka n’andi matugo yorowe muri iyi mirenge, uyu mugezi niwo bakoresha bayashora hanyuma nabo bagahindukira bakaza gufata ayo kunywa n’indi mirimo yose muri rusange kubera ko ntahandi bavana andi meza.

Nyirabeza Marie Goretti ati “Ingurube, inka, ihene n’intama byose biraza tugasangira aya mazi. Tubifata nk’ibisanzwe kuko ntakundi twagira.”

Iki kibazo nticyoroheye abatuye iyi mirenge cyane cyane abana birirwa bayidumbaguzamo ndetse no kuyanywa.

Niyonsaba Clarisse ati ”Uyu mwana wanjye inzoka zaramwishe, usanga ubwana bwarwaraguritse kumpamvu z’aya nazi.”

Usibye abaturage baha mu Bugarama na Gikundamvura iki kibazo kinafitwe n’abaturage bo mumirenge ya Butare na Bweyeye; nabo bavoma umugezi wa Ruhwa utandukanya u Rwanda n’u Burundi.

Nyiranshuti Jacqueline ati “Abana bakura barwaragurika inzoka kubera amazi ya Ruhwa na Rubyiro bavoma umwana wanjye zaramwishe na Mibirizi bagezeyo ku mpamvu z’inzoka.’’

Aba baturage barasaba ubuyobozi kubafasha kubona amazi meza ku gira ngo batandukane n’indwara zihora zibibasira ziterwa no gukoresha amazi mabi.

Umuyobozi w’akarere ka Rusizi Kayumba Ephrem atanga amezi atatu ngo abaturage bazabe bari kubona amazi meza

Nyirantebuka Mariam ati “icyifuzo cyacu ni uko natwe twabona amatiyo mu mudugudu wacu tukareka kuvoma aya amazi y’ibiziba birirwa bameseramo ibyahi by’abana. Kubona koko unywa amazi iminyorogoto iri gusimbuka kugirango inyota itakwica, nyaboneka bayobozi nimudutabare.”

Ubuyobozi bw’akarere ka Rusizi, buvuga ko bwahagurukiye iki kibazo cyo kugezaho abaturage bose amazi meza aha bugasobanura ko mu gihe kitarenze amezi atatu aba batuye muri iyo mirenge bazaba babonye amazi meza, uyu ni Kayumba Ephrem umuyobozi w’akarere ka Rusizi.

Ati “Ntabwo ahantu hose twahagereza amazi icyarimwe, ariko by’umwihariko muri iyi mirenge wavugaga ya Gikundamvura, Bugarama, Bweyeye na Butare hari umushinga watangiwe uzasubiza ibi bibazo kuburyo tuzajya kurangiza amezi atatu ari imbere ibisubizo birimo kuboneka.”

Nubwo bimeze bityo, gahunda ya Guvernoma y’imyaka irindwi yo kuva mu mwaka w’2010 kugeza muw’2017 yateganyaga ko abaturage bose bazaba baramaze kugerwaho n’amazi meza.

Gusa iki cyifuzo nticyagezweho kugeza aho iri genamigambi ryimuriwe mu 2024. Imibare y’inzego za leta igaragaza ko umwaka ushize wa 2018 wasize nibura ikwirakwizwa ry’amazi meza mu gihugu riri ku gipimo kirenga 85%.

Ndahayo Eliezer wicaye hagati ugiye kuyobora ihuriro ry’abarobyi avuga uburyo bagiye kurandura ba Rushimusi mu kiyaga cya Kivu

Hari bamwe mu barobyi bavuga ko hari ikintu bakuye muri uyu mwuga n’ubwo bemeza ko bakabaye bararengejeho ariko bakazitirwa n’abakoresha nabi ikiyaga cya Kivu kubera bamwe muri bagenzi babo bataba mu makoperative bakomeza gutiza umurindi akajagari kabarizwa mu kiyaga.

Bigirimana Jean pierre ati “Hari abajya mu kiyaga kuroba batari mu makoperative kandi bitemewe, ibyo bitera akajagari kuko abakora gutyo batumva ibibazo by’abarobyi kandi ntibashobora no kubavugira akaba ariyo mpamvu abarobyi bahora hasi kuko abakora batyo bangiza umusaruro, cyane ko bakoresha n’imitego ya Kaningini itemewe mu kiyaga.”

Mukamwiza ni umugore ukora uburobyi agira ati ”Hari abantu bita ba Rushimusi bafite imitego itemewe baroba nabi ku buryo bangiza umusaruro mu kiyaga ugashiramo. Abo ntibaba bagenzwa n’akazi ku burobyi bw’umwuga ahubwo baba bashaka inyungu zabo bwite ibyo bigatuma bakora uko bishakiye abo nibo batuma tudatera imbere kuko baduteza akajagari.”

Abarobyi bo mu karere ka Nyamasheke bagiye guhangana naba Rushimusi bangiza umusaruro w’amafi n’isambaza

Kuri ubu, Umuyobozi w’iri huriro Ndahayo Eliezer ugiye kuyobora iri huriro muri manda ya kabiri ariko na we akaba agaragaza ko imikorere mibi ya bamwe mu banyamuryango b’amakoperative yakomeje kumuvangira ntiyuzuze inshingano ze avuga ko mu myaka itatu iri imbere ibibazo bivugwamo bizaba byabaye amateka ndetse bikazanashimangirwa n’ibikorwa byivugira. Ibi yabivuze amaze gutorerwa kuyobora indi manda ku buyobozi bw’iri huriro.

Ndahayo Eliezer ati “Rushimusi we tugiye guhangana nawe kandi azacika mu kiyaga cya kivu mu karere kacu, ikintu kiri kuduha icyizere n’intege zo kurandura burundu ba Rushimusi ni itegeko riri gutegurwa na minisiteri y’ubuhinzi n’ubworozi ryo guhana ba Rushimusi hakurikijwe itegeko ndetse n’igifungo kirahari kuko ejobundi nibwo baduhamagaye tujya gutanga ibitekerezo kuri iryo tegeko. Ikindi turizera ko imyaka itatu izarangira tumaze kuzuza inzu igezweho irihafi y’ikiyaga cya kivu nirwo rugendo tugiye gutangira nk’abarobyi bo mu karere ka Nyamasheke.”

Ihuriro ry’abarobyi mu karere ka Nyamasheke ririmo amakoperative atandatu arimo arimo abanyamuryango 215. Naho ba rushimusi bazwi bakigaragara aha mu kiyaga ku ruhande rw’akarere ka Nyamasheke barasaga 50.

Abanyeshuri ba IPRC Karongi bibutse bagenzi babo bazize Jenoside

Ni nyuma y’aho bamwe mu bari baturiye iki kigo bagaragarije ko hari abanyeshuri batatahaga bakoze Jenoside ariko bikaba bitazwi niba baba barabiryojwe.

Habyarimana Pierre, mu gihe cya Jenoside yigaga ku ishuri ryari APAPEG rituranye na ETO Kibuye. Ubwo yatangaga ubuhamya yavuze ko hari abanyeshuri bigaga muri ETO Kibuye batatahaga bagize uruhare muri Jenoside yakorewe Abatutsi mu bice bya Kibuye ndetse bagera no muri ETO Kibuye.

Habyarimana ati “Hari bamwe muri abo banyeshuri bari baranze gutaha bafatanyije n’interahamwe, hanyuma nibwo bazitungiraga agatoki aho Umututsi ari bakamwica.”

Kugeza ubu kandi abarokokeye hafi y’icyahoze ari ETO Kibuye ngo bababazwa n’uko nta butabera barahabwa ngo abo biganaga bagize uruhare muri Jenoside bahanwe.

Habyarimana akomeza agira ati “Abenshi muri bo ntibavuka aha bavukaga za Byumba n’ahandi ariko hari n’abayobozi bo muri icyo kigo bari bahari batanapfuye kandi babizi bashobora gutanga amakuru ku buryo abo bantu babazwa ibyo bakoze”.

Habyarimana Pierre watanze ubuhamya avuga ko hari abanyeshuri bakoze Jenoside

Nyuma y’imyaka 25 ishize Jenoside yakorewe Abatutsi ihagaritswe, ubuyobozi bwa IPRC Karongi kuri iyi nshuro bwatangaje ko bugiye gusubira mu mpapuro ndetse bunakorane n’izindi nzego amakuru y’abo banyeshuri amenyekane.

Dr. Nsabimana Ernest, umuyobozi wa IPRC yagize ati “Tugiye gusubira mu mpapuro, turebe abanyeshuri bari bari hariya dushakishe tumenye amakuru, yewe niba hari n’abafatanyije n’abicanyi ubu bari muri za gereza bose tuzabageraho.”
Ubuyobozi bw’Akarere ka Karongi na bwo buvuga ko bukomeje gukoresha inzira zose zishoboka ngo amakuru y’abagize uruhare muri Jenoside bose amenyekane, bugakomeza no gukangurira abantu kuyatanga.

Ni byo Ndayisaba François uyobora Karongi yasobanuye ati “Icy’ingenzi ni uko ighe cyose amakuru abonekeye,abantu barakurikiranwa kandi tugenda tuyabona bitewe n’uko imyumvire y’abayatanga igenda izamuka.”

Ndayisaba François umuyobozi w’Akarere ka Karongi avuga ko bagiye gushaka amakuru afatika

IPRC Karongi ivuga ko mu bushakashatsi yakoze ku bufatanye bwa IBUKA, CNLG, n’inzego z’ibanze ndetse n’abatangabuhamya ku giti cyabo, babashije kwemeza amazina 13 y’abari abakozi n’abanyeshuri bayo bazize Jenoside yakorewe Abatutsi mu 1994. IPRC kandi ivuga ko muri ubwo bushakashakashatsi haje kuboneka andi mazina 70 y’abanyeshuri b’Abatutsi bashobora kwiyongera kuri abo 13 ariko hakaba hagikomeje gushakishwa amakuru nyayo ku buryo amazina yabo na bo yakongerwa ku kimenyetso cy’urwibutso rwa IPRC Karongi.

Abanyeshuri ba IPRC Karongi n’abaturage baho bibutse abahoze ari abanyeshuri ba ETO Kibuye bishwe muri Jenoside yakorewe Abatutsi

Aba ni bamwe mu bana batewe inda bafite ibibazo bitandukanye

Uyu twise Munezero Claudette yabyaye ataruzuza imyaka y’ubukure kandi umuryango we ukennye cyane ndetse n’uwamuteye inda ntiyongeye kugaragara ukundi.

Uko iminsi yicuma ni ko ubuzima bwarushijeho gusharira haba mu kubona ibimutunga n’umwana we ndetse n’ibindi bikenerwa n’undi mubyeyi wese wibarutse.

Icyakora kwihanganira ibyo byarashobotse ariko noneho ikimugoye cyane ni ukubona ubwisungane mu kwivuza kuko uyu mwana atagira icyiciro cy’ubudehe abarizwamo kandi n’uwo babyaranye nta cyo amufasha.

Yagize ati “Umwana yararwaye mpamagara se ngo aze dufatanye kuvuza umwana arambwira ngo nirwarize njyenyine narahangayitse mfata amadeni yo kumuvuza ubu ndibaza amaherezo y’ubu buzima simbizi ubuse tuzabigenza gute koko?.”

Mugenzi we w’imyaka 15 yungamo ati “Njyewe ku kigo nderabuzima cya Kamembe bazi ko ndi umurwayi wo mu mutwe iyo umwana wanjye arwaye baravuga ngo muvurire umusazi atahe kubera ko najyanye umwana ku mugabo wanteye inda iwabo barambwira ngo umuhungu wabo ntajya atera inda.”

Aba bangavu bavuga ko bahitamo kujya kuvuza abana babo mu mavuriro yigenga (prive), ibintu na byo bavuga ko badafitiye ubushobozi, kandi ngo nta kindi gisubizo gihari uretse kuba bafashwa na leta.

Uyu ati “Abana ntabwo bavurwa iyo tubonye bikomeye tubavuza mu bitaro byigenga (Prive), ejobundi uwanjye yarwaye umusonga njya kwa muganga banca ibihumbi mirongo itatu umuzamu aramfasha arancikisha none iyo ngiye kuvuza umwana ku bitaro barambwira ngo nzabanze nishyure bya bihumbi mirongo itatu ntishyuye.”

Mu gihe bagaragaza ko ikibazo gituma batabona uko bavuza abana babo ari ibyiciro by’ubudehe badafite, umuyobozi w’akarere ka Rusizi wungirije ushinzwe imibereho myiza y’abaturage Nsigaye Emmanuel, avuga ko umukobwa ubyariye iwabo bishoboka ko umwana abyaye yamwandikisha mu muryango uwo mukobwa avukamo. Ni nayo nama agira abangaba.

Ati “Mu kwivuza nta mbogamizi irimo ikomeye niba hari umwana uvutse muri uwo muryango uwo muryango ugomba kwegera ubuyobozi bw’akagari ku girango bamufashe kongera uwo muntu kuri uwo muryango wari usanzweho hanyuma bagatangira kuvura umwana ntampamvu yo kurindira igihe umwana azabona Se.”

Ikibazo cy’aba bakobwa babyara bakiri bato gikomeje guhangayikisha umuryango nyarwanda dore ko abenshi baba banaturuka mu miryango itishoboye,hakiyongeraho kandi kuba abaturage muri rusange bakomeza kwiyongera abanyarwanda bakaba basabwa kubyara abo bashoboye kurera.

Akarere ka Rusizi kari mu turere dufite umubare wo hejuru w’abana baterwa inda dore ko raporo zigaragaza ko abasaga 500 buri mwaka baterwa inda zitateguwe.

Bicaye mu kibuga amasaha arenga atatu ku zuba ryinshi cyane

N’ibintu bitakiriwe neza n’ikipe y’abagore ba Rusizi kugeza ubwo banze kuva mu kibuga hakiyambazwa inzego z’ubuyobozi bw’akarere ndetse n’izumutekano bikananirana kugeza ubwo guverineri w’intara y’uburengerazuba yaje kwiyizira muri stade aba bagore bakabona kuva mu kibuga cyagombaga gukinirwamo na basaza babo.

Mu bigaragarira amaso aba bagore bari barakaye cyane, aho batatinyaga n’inzego z’umutekano nyuma yo guterwa mpaga batumva impamvu yayo kuko basobanuraga ko bakererewe ku mpamvu zitabaturutseho cyane ko ngo bohererejwe imodoka yo kubatwara amasaha yamaze kurenga, kandi n’abasifuzi bagombaga gusifura uyu mukino ngo nabo bakerewe.

Ibi bikaba byateye aba bakinnyi gukeka ko haba harimo ruswa, akaba ari byo byatumye bafata icyemezo cyo kwicara mu kibuga kuva saa yine n’igice za mu gitondo kugeza saa munani, banga kukivamo kubera kutumva impamvu batewe mpaga mu gihe nyamara basaza babo nabo bari bari kwitegura kugikiniraho.

Abakinnyi b’ikipe y’abagore ba Rwimbogo ntibiyumvisha impamvu batewe mpaga

Umwe mu bakinnyi yagize ati ”Turasaba uduhagarariye mu karere abasabe baze batwereke igihe batereye mpaga kuko nzi ko umukino nkuyu iyo wateguwe haba hari abayobozi hakagaragara gihamya z’ibyabaye kuko baduteye mpaga duhari.”

Ibi kandi byemezwa n’umwe mu ba motari witwa Hategekimana Calliope wazanye abasifuzi aho asobanura ko bagejeje aba basifuzi ku kibuga saa yine bahita bahahurira n’abakinnyi.

Ati ”Abasifuzi tubavanye mu mujyi tubazana hano kuri stade baje gusifura. twageze hano nka saa yine. ikipe ya Rwimbogo nayo ihita yinjira.”

Munyentwari Alphonse Guverineri w’intara y’uburengerazuba akihagera abakinnyi bahise bemera kuva mu kibuga aha akaba yavuze ko bagiye gukurikirana mu maguru mashya iby’iki kibazo kugira ngo niba hari abarenganye barenganurwe.

Ati “Twabyumvise mwabonye ko twaje ikibazo kigakemuka kubera ko no gukina byasaga n’ibyananiranye ndetse no kuva mu kibuga. iyi ni imikino y’imiyoborere myiza kandi ifite amategeko, nkurikije uko twabajije mpaga yatewe ikurikije amategeko kubera ko ikipe yakerereweho isaha ariko twakomeza gushaka amakuru ariko kandi hari n’amategeko ateganya ko iyo wumva warenganye ushobora kwandika bikigwa ukaba warenganurwa.”

Nepomuscene Harerimana komiseri muri iri rushanwa ku rwego rw’intara we avuga ko abayobozi b’uturere ku mpande zombi nibumvikana iyo mpaga yavanwaho.

Ati “Twarindiriye igihe kirekire kugira ngo turebe ko bakumvikana hanyuma bananiwe kumvikana icyagombaga gukorwa ntakindi ni Mpaga, ariko abayobozi b’uturere twombi nibo bafite gukemura iki kibazo mu biganza byabo baramutse babyumvikanyeho mpaga yavanwaho.”

Nyuma yo kwemera kuva mu kibuga hahise hakurikiraho umukino w’ikipe y’abagabo y’umurenge wa Muganza uhagarariye akarere ka Rusizi muri iri rushanwa yahuye n’ihagarariye akarere ka Ngororero birangira ikipe ihagarariye akarere ka Rusizi itsinze ibitego bitatu kuri kimwe.

Kapiteni w’ikipe asobanurira Guverineri n’umuyobozi w’akarere ko batumva impamvu batewe mpaga

Imbere y’abaturage benshi abafatanywe ibiyobyabwenge basabiwe gufungwa burundu

Abakurikiranyweho icyaha cyo gutunda no gucuruza ibi biyobyabwenge ni Habiyambere Bosco, Munezero Theogene na Nzeyimana vedaste bakomoka mu karere ka Nyamagabe mu ntara y’amajyepfo.

Aba bagabo uko ari batatu bafatanywe ibiro birindwi by’urumogi tariki ya 10 Mata 2019 bivugwa ko bari baruguze n’abakongomani, rukaba rwaragombaga gukomeza ngo rwambutswe ishyamba rya Nyungwe rugana Nyamagabe na Muhanga.

Kuri uyu wa kabiri tariki ya 23 Mata 2019, urukiko rwisumbuye rwa Rusizi nibwo rwaburanishije aba bagabo imbere y’abaturage b’akagari ka kamashangi mu murenge wa Kamembe mu rwego rwo gutanga urugero no ku bandi bagitekereza kubyijandikamo.

Abaregwa uko ari batatu bakimara kubazwa n’urukiko ko bemera icyaha ubushinjacyaha bubashinja bahise biyemerera ko bemera icyaha ariko bakagisabira imbabazi, bavuga ko batazongera kugikora.

Abacamanza banzuye ko urubanza ruzasomwa tariki ya karindwi gicurasi 2019

Habiyambere Bosco ati “Icyaha ndacyemera nkaba ngisabira imbabazi ku buryo ntazongera ku gikora.”

Nzeyimana yungamo ati “Nanjye ndacyemera nkaba ngisabira imbabazi mvuga ko ntazongera kugikora.”

Icyakora nyuma yo guhabwa umwanya urambuye wo kwisobanura bose bavuze ko urumogi bafatanwe baruhawe n’umukongomani kandi ngo ntiyigeze ababwira ko arirwo usibye kuba yarababwiye ko ari imari yunguka cyane nyuma yo kumuha ibihumbi mirongo itanu uyu ni umwe muribo.

Munezero Theogene Ati “Twasanze bizingiye mu myenda bahita babitwambika babinyambitse ntazi ibyo ari byo.”

aha niho ubushinjacyaha bubasabira gufungwa burundu n’ihazabu y’amafaranga y’u Rwanda miliyoni 20 kuko ngo ntibemera icyaha kuburyo budashidikanywaho nkuko bisobanurwa na Barajiginywa Diogene umushinjacyaha mu rukiko rw’isumbuye rwa Rusizi.

Umushinjacyaha yasabiye abafatanywe ibiyobyabwenge gufungwa burundu

Ati” Ntibemera icyaha ku buryo budashidikanywaho cyangwa busesuye tukaba twumva batagabanyirizwa ibihano byo gufungwa burundu n’ihazabu ya Miriyoni 20 z’amafaranga y’u Rwanda.”

Nyuma yo kubaburanisha, abaturage bari bakubise buzuye ikibuga cya Kamashangi bavuze ko kuburanisha ibyaha nk’ibi mu ruhame babikuramo isomo no ku wari kuzatekereza kubyijandikamo wese bitewe nuko basanze ibihano by’iki cyaha bikaze cyane.

Umuyobozi w’akarere ka Rusizi wungirije ushinzwe imibereho myiza y’abaturage Nsigaye Emmanuel arashimangira ko ubu ari ubutumwa ku bishora mu biyobyabwenge baba babizi cyangwa batabizi.

Urumogi bafatanywe rwahise rutwikirwa imbere y’abaturage

Ati “Biratanga ubutumwa haba muri babandi barunywa bihisha, ku barucuruza kuko hari n’ababikora bazi ko ari icyaha gihanishwa ibihano byoroheje.”

Mu gihe aba bagabo bategereje gusomerwa tariki ya karindwi Gicurasi 2019, ingingo ya 263 mu gitabo cy’amategeko ahana y’u Rwanda iteganya igifungo cya burundu n’ihazabu ya miliyoni 20 z’amafaranga y’u Rwanda nk’uko n’ubushinjacyaha bwabibasabiye.

Abarokokeye muri Cellule Kazinda bashima ubutwari bw’ababarokoye

Ni mu cyahoze ari cellule Kazinda , Segiteri Nyabintare Komini ya Bugarama. Ubu ni imidugudu ibiri ya Kazinda na Mugerero mu Kagari ka Gahungeri, Umurenge wa Gitambi.

Kampayana Vianney wari wungirije umuyobozi (Responsable) wa cellule Kazinda avuga ko bacyumva ko ahandi batangiye kwica, bo bahise bakoresha inama abaturage bababuza kubyijandikamo.

Ati “Ingamba ya mbere twafashe, bwarakeye mu gitondo dukoresha inama y’abaturage, turababwira tuti ‘ntimujye muri biriya bintu byo kwica Abatutsi kuko ari ibiremwa nkatwe’. Uwo munsi nibwo Interahamwe zaje abaturage bose barahaguruka bafata imipanga n’inkoni turababwira tuti ‘nimusubire iwanyu kandi nimudasubirayo biraba bibi kuko nta muntu mwica hano’. Bahise basubirayo turabashorera dusa nk’aho twigaragambije.”

Byagezeho na bo biyemeza gukora amabariyeri akumira abicanyi babaga baje kuhashakira Abatutsi bahahungiye ndetse n’abari basanzwe bahatuye.

Akomeza agira ati “Tugeze ku gasantere ka Kamukobe twashatse igiti dukora bariyeri yo kubazitira, umusaza umwe yiyemeza kujya ahirirwa igihe bagiye kuza akaduhuruza. Mbega twirwanyeho turwana ku bantu bose bari baduhungiyeho mu gihe cy’amezi abiri ukwa kane n’ukwa gatanu.”

Ubumwe bw’abaturage bo muri Cellule Kazinda bwatumye batijandika muri Jenoside yakorewe Abatutsi

Nsabimana Phocas ni umwe mu bahigwaga wari utuye muri ako gace. Ndayambaje Emmanuel we yumvise inkuru nziza ko nta mututsi urimo kuhicirwa, arahahungira. Aba bombi bemeza ko nta wigeze abatunga n’urutoki.

Nsabimana Phocas ati “Buriya nk’uko babikubwiye bashyizeho bariyeri, Interahamwe zigashaka kuyimena ngo zize kwica Abatutsi, aba bagabo bakabakumira.”

Ndayambaje Emmanuel yungamo ati “Njyewe nahungiyeyo ariko ibyo nahasanze nabonye birenze n’ibyo umubyeyi wajye yankorera kuko uyu mugabo yabwiye umugore we ati ‘mbere yo kugira ngo ungaburire unjye ubanza ugaburire Emmanuel’ ni byinshi yankoreye!”

Uwitwa Nsabimana Alias wagize uruhare mu guhisha abazaga bamuhungiyeho, na we avuga ko bakoze uko bashoboye bakarwana ku batutsi babahungiragaho.

Ati “Uwo nahishe nguyu turi kumwe namuhishe kuko icyo gihe byari bikomeye, mushyira mu nzu kandi si umwe gusa ni batatu twari tubanye neza kandi amacakubiri ntayo twari tuzi.”

Umunyamabanga Nshingwabikorwa w’Umurenge wa Gitambi, Iyakaremye Jean Pierre, ashima ubumwe bw’abo baturage

Abari batuye muri cellule Kazinda bavuga ko impamvu batagize umutima wa kinyamaswa nk’ahandi hose ari ukubera ko bari bunze ubumwe kuva na mbere butashoboraga kumenerwamo n’uwo ari we wese.

Ubumwe bwaranze aba baturage kandi bwemezwa n’Umunyamabanga Nshingwabikorwa w’Umurenge wa Gitambi, Iyakaremye Jean Pierre. Asobanura ko uku kudatsimburwa ku bumwe bw’abari batuye muri Kazinda binafite uruhare rukomeye mu kubaka ubumwe n’ubwiyunge bw’abatuye uyu murenge.

Icyakora n’ubwo bimeze bityo, muri uyu murenge, ubuyobozi buraburira abaturage kwirinda kumva impuha za bamwe mu bahavuka bari hanze y’igihugu bagikomeje guhembera ingengabitekerezo ya Jenoside.

Ni byo Umunyamabanga Nshingwabikorwa w’Akarere ka Rusizi, Mushimiyimana Ephrem, yagarutseho, ati “Abantu bari hanze inzira bakoresha ni imwe, ni ikoranabuhanga, bagashyiraho amagambo abeshya abaturage bababibamo amacakubiri. Icyo dusaba cyane urubyiruko ni ukumva inyigisho tubaha bakareka kumva ayo mateshwa kugira ngo tugire igihugu gitekanye.”

Cellule Kazinda yarokokeyemo Abatutsi basaga 70. Icyakora Umurenge wose wa Gitambi ubarurwamo Abatutsi 319 bahaguye.

Umunyamabanga Nshingwabikorwa w’Akarere ka Rusizi, Mushimiyimana Ephrem, asaba aba baturage kwirinda kumva amagambo y’abashaka gusubiza igihugu mu icuraburindi

Aba Motari bishimiye ko bagiye kubona (autorisation de transport)

Kubona (autorisation de transport) ku bamotari b’i Rusizi bavuga ko byari bimaze kubabiza ibyuya ku buryo bamwe bendaga kubivamo. Byabasabaga kunyura mu makoperative babarizwamo kugira ngo babone icyo cyangombwa, kigatinda ndetse ntikinaboneke rimwe na rimwe kandi muri uko gutinda akaba ari nako kwandikirwa n’inzego zishinzwe umutekano wo mu muhanda utaretse na RURA ubwayo.

Mu nkuru Kigali Today yakoze tariki Nduwimana Fidele aragira ati “RURA iyo ije hano itwandikira amafaranga arenze yayandi Police itwandikira hari abo bandikiye ibihumbi Magana atatu hari n’abandi bandikiwe Magana atatu na mirongo irindwi ubona bikabije mbese.”

Habyarimana Pierre yungamo ati “Ntabwo tuzi uburyo ikibazo cyo kubona (autorisation de transport) cyananiranye mu gihugu hose mu gihe hari ibindi birenze iby’abamotari bikemuka. Tugiye gusora umusoro kunyungu Leta ntiyawuhagaritse kuko tutari gukora ikigaragara cyo ni akarengane.”

Aba motari barishimira ko bagiye guca ukubiri n’amafaranga bahoraga bacibwa bazira kutagira kiriya cyangombwa

Nyuma y’aya marira y’abamotari bavuga ko bari bamazemo imyaka itari mike,batakambira ubuyobozi bwa RURA,ngo bubahe (autorisation de transport) ubu ibyishimo ni byose kuko buri wese agiye kujya ayibona bidatinze.

Kayigire Vincent ati “Abamotari uyu munsi turishimye kuko tugiye kujya mu muhanda tugakora akazi ntabibazo dufitanye n’abapolice, nkubu koperative y’abamotari nyoboye yari Imaze amezi icyenda itagira icyangombwa. Umu motari yabonaga umu police agahita ayoba umuhanda twari dufite ikibazo gikomeye ariko uyu munsi wa none baje kuduha (autorisation de transport) kandi nkurikije uburyo biri gukorwa bimeze neza.”

Urwego rw’Igihugu rushinzwe kugenzura imirimo ifitiye igihugu akamaro RURA rwatangaje ko buri wese azajya yisabira (autorisation) binyuze mu ikoranabuhanga akayihabwa nta wundi binyuzeho.Uyu ni Emmanuel Asaba KATABARWA uyobora ishami rishinzwe gutwara abantu n’ibintu muri RURA ubisobanura.

Ati “Mu byukuri hari hari ikibazo mu mikoranire ya Rura n’amakoperative. Ama Koperative nayo agakorana nabi n’abamotari rero twasanze dukwiye kwigerera ku mu motari cyangwa we akatugeraho tukamuha icyangombwa ntaw’undi muntu binyuzeho niyo mpamvu turi gukorana n’irembo mu rwego rwo gukoresha ikorana buhanga ku girango tugere hose kandi byihuse, umuntu araza agasaba agahita atahana (autorisation de transport) uwo munsi.”

Mu karere ka Rusizi kugeza ubu habarurwa abamotari bazwi barenga 1000 bakaba bibumbiye mukoperative agera kuri 6.(Autorisation de transport) ni icyangombwa bavuga ko cyari kuzatuma bava muri uyu mwuga bitewe n’uburyo bagorwaga no kukibona.

Abarokokeye Bweyeye bavuga uko imiterere yaho batuye yatumye hapfa benshi

Tariki ya 17 mata ni itariki itazibagirana mu mateka y’abatuye Bweyeye by’umwihariko abarokotse Jenoside yakorewe Abatutsi,ubwo abicanyi babasangaga mu rusengero rwa ADEPR bakicamo 36.

Ngendahimana Buregeya Ati “Twumvaga nta muntu wakwica abantu ku manywa ikindi kandi twari tubanye neza n’abaturage bose ninayo mpamvu abantu benshi bapfuye. ku cyumweru turi mu rusengero nibwo interahamwe zarugose zitangira kwica abantu, abajandarume nabo bari batwijeje ko bazaducungira umutekano ariko bigeze kuri uyu munsi twibuka barerura baritaza bareka interahamwe zica abantu.”

Kwicwa kw’Abatutsi muri uyu murenge byakomeje gutizwa umurindi n’imiterere yawo y’imisozi miremire dore ko igice kinini gituwe n’abaturage hafi 3/4 kizengurutswe n’imisozi kuko abicanyi muri Jenoside baje bakahagota biboroheye.

Umuyobozi w’akarere ka Rusizi wungirije ushinzwe imibereho myiza y’abaturage

Nyirampeta Savera Ati “Imiterere mibi ya hano iyi misozi urayibona irahanamye kandi ikikije uyu murenge, hirya ni ishyamba rya Nyungwe, hepfo ni ishyamba, haruguru naho ni uko ku mipaka iduhuza n’u Burundi naho interahamwe zari zagiye kuhagota iyo miterere nayo yatumye abantu benshi bicwa abarokotse ni abagiye bahishwa n’abantu bari bafite imitima myiza.”

N’ubwo iyo miterere yawo itigeze ihinduka bavuga ko icyo bifuza nyuma y’imyaka 25 ishize Jenoside ihagaritswe ari ugufashwa kubona imishinga y’iterambere ngo nabo bakomeze gufatanya n’abandi kubaka igihugu.

Ngendahimana akomeza agira ati Dusaba ko Leta yakomeza kudufasha mu buryo bw’inkunga bakaduha imishinga tukiteza imbere kugira ngo natwe tuzamukane n’abandi.”

Abarokotse Jenoside yakorewe Abatutsi barasaba koroherezwa ngo nabo iterambere ribagereho

Umuyobozi w’akarere ka rusizi wungirije ushinzwe imibereho myiza y’abaturage Nsigaye Emmanuel yavuze ko akarere kiteguye kubashyigikira mu mishinga bazaba bagaragaje bifuza gukora,iki kikazajyana no gusana inzu za bamwe muri bo zigaragara ko zamaze gusaza.

Ati “Icyambere tugiye kugenzura muri za nzu zubatswe mbere tukamenya izigomba kuvugururwa cyangwa kubakwa bundi bushya. Icyo tugiye kugikoraho tubatuze neza, naho ikirebana n’imishinga yo kubateza imbere twabagiriye inama yo kwishyira hamwe mu matsinda bagakora imishinga hanyuma bakayishyikiriza akarere tukareba uburyo yashyirwa mu bikorwa.”

Muri Jenoside yakorewe Abatutsi, umurenge wa Bweyeye wiciwemo abatutsi 62 ariko kimwe n’ahandi hose hari imibiri itaraboneka ngo ishyingurwe mu cyubahiro bakaba basaba abagize uruhare muri Jenoside kugaragaza aho bayijugunye.

Umuyobozi w’uruganda rwa Cimerwa afatanya na bagenzi be gucana urumuri rw’icyizere

Abatutsi bahoze bakora muri uru ruganda rwa CIMERWA ntibigeze bamenya ko inzu zabo zasizwe amarangi y’umutuku nk’ikimenyetso cya’abicanyi kugira ngo bazajye bamenya aho babashakira nk’uko Bapfakurera Jean, bitaga Muremure umwe mu barokokeye muri izi nzu za CIMERWA abivuga.

Ati “Inzu nyinshi twabagamo muri Cimerwa inyinshi zari zituwemo n’Abatutsi bari barazishyizeho ikimenyetso cy’irangi ritukura ku marembo. Ni abakozi bamwe babigizemo uruhare babitegetswe n’ubuyobozi bwa Cimerwa, bagamije kugira ngo interahamwe niziza kwica abantu zitazibeshya zikaba zajya mu rugo rw’Umuhutu kandi bagomba kwica Abatutsi.”

Bapfakurera kandi atunga agatoki Ndorimana Casimir wari umuyobozi ushinzwe umusaruro muri CIMERWA Kuri ubu ufungiye icyaha cya Jenoside warangaga ababaga bihishe batari bamenyekanye, uyu akaba yarabaye intandaro yo kwica benshi.

Ati ”Bagiye babasohora baranzwe n’abakozi bagenzi babo, biturutse k’uwari umuyobozi wa Cimerwa wari ushinzwe umusaruro witwa Ndorimana Casimir, niwe wagiye guhuruza interahamwe yitwaga Yusufu ngo ize yice Abatutsi bari bari hano.”

imyaka 25 irashize Jenoside yakorewe Abatutsi ihagaritswe, ariko Bapfakurera kimwe n’abandi barokokeye aha bavuga ko bafite amakuru ko abishe bavuze ko batazigera bagaragaza aho babajugunye imibi.

Ati ”Nasabye ubuyobozi bw’akarere ko badufasha nk’abo bantu bafunze ndetse n’abafunguwe bishe abacu bakaturangira aho babajugunye nibura tukajya tuhibukira kuko babishe ku itariki ya 16 babajyana ku itariki ya 17.”

Umuyobozi w’akarere ka Rusizi Kayumba Ephrem yahise aha umukoro imirenge itatu ya Bugarama, Muganza na Gitambi y’icyahoze ari komine Bugarama muri icyo gihe wo gushaka ayo makuru nibura ngo nihamenyekana ko bajugunywe mu mugezi wa Rubyiro cyangwa Rusizi hazashakwe uko hashyirwa ikimenyetso cy’urwibutso.

Ati ”Byanze bikunze ufashe abaturage bahariya ntihabura umwe cyangwa babiri bazi amakuru y’imvaho ari nayo mpamvu dusaba ko abantu batuye hariya bose bafatanya mu rwego rw’ubumwe n’ubwiyunge bakaganira kugirango turebe ko twamenya amakuru y’abiciwe muri Cimerwa.”

Abayobozi batandukanye bifatanyije n’abakozi b’uruganda kwibuka

Bhekizitha Wiseman Mthembu, ni umuyobozi mukuru w’uru ruganda, avuga ko CIMERWA izakomeza gutanga umusanzu wayo cyane cyane uwo gufata mu mugongo abarokotse Jenoside yakorewe Abatutsi by’umwihariko abafite ababo bahoze barukorera.

Ati ”Tuzakomeza gukorana no kwita kubacitse ku icumu rya Jenoside kugira ngo dukomeze kubaka u Rwanda rufite ubumwe no kuzahura iki gihugu.”

Mu mibiri isaga 400 ishyinguye mu rwibutso rwa Muganza hakabaye harimo n’iy’abaguye muri CIMERWA ariko abarokokeye muri uru ruganda bahamya ko irimo itarenze 1/3 cy’imibiri y’abatutsi 58 baguye muri uru ruganda.

Kayumva Ephrem Umuyobozi w’akarere ka Rusizi

Abahaburiye ababo baje kubibuka

Kankindi Sperata, mu gihe cya Jenoside yakorewe Abatutsi avuga ko yiciwe hafi umuryango wose ndetse n’umugabo we, dore ko ari bwo yari agishaka. Yatangiye guhungana uruhinja rw’icyumweru ari na yo mfura yabo umugabo yari amusigiye.

Mu guhungira mu bitaro bya Bushenge biri mu Karere ka Nyamasheke, uyu mubyeyi avuga ko yiboneye bamwe mu baganga bateraga umugongo Abatutsi babaga babigannye baje kwivuza ibikomere ndetse ngo na we ubwe atamazemo kabiri bamusohoye nabi n’urwo ruhinja rwe ngo abavire mu bitaro asange abo bitaga bene wabo mu bihuru.

Ati “Habayeho abaforomo bazima n’abandi bari bahindutse nk’inyamaswa. Uwitwa Philomène yangiriye impuhwe aravuga ati ‘nubwo utari mu bitaro ndagukorera ifishi kugira ngo ubone aho uryama n’uruhinja rwawe, ariko habonetse n’abandi baforomo barimo Mariya Mukambaraga, ba Mathilde abo, aho kugira ngo bafashe abantu kubaho ahubwo bajyaga kubahururiza bakaranga aho bihishe.”

Igishengura umutima w’uyu mubyeyi ngo ni uko kugeza ubu, imyaka 25 ishize hakiri bamwe mu bamuhemukiye bataratera intambwe ngo nibura bamusabe imbabazi. Muri bo harimo n’abari abaganga muri ibi bitaro ndetse akaba ngo adashobora kwibagirwa umwe mu barimu bakoranaga wayoboye igitero cyishe abo mu muryango.

Kankindi Sperata wiciwe umuryango we hafi ya wose avuga inzira y’umusaraba yanyuzemo kugira ngo arokoke

Akomeza agira ati “Hari nk’umuntu twagiye tuvuga kenshi witwa Mwambari yari umuntu ujijutse w’umwarimu abaturage baramwizeraga cyane, nuko yegeranya abahingwaga abizeza ko agiye kubashakira imfashanyo arangije azana igitero kirabagota kirabica. Twagiye tumuvuga mu gihe cyose twibutse tukanamwingingira gusaba imbabazi kuko imbabazi si izacu ni iz’Imana zitabayeho ntacyo twaba turi cyo igihe cyose azazira twe twiteguye kuzimuha.”

Mu kwibuka ku nshuro ya 25 Jenoside yakorewe Abatutsi mu bitaro bya Bushenge, umuyobozi wabyo CSP Oreste Tuganeyezu yavuze ko kuba abanyamwuga ndetse n’umutima wo gukunda abarwayi ari byo abaganga babuze muri icyo gihe ,none ngo mu byo bari gukora harimo gukomeza kubitoza abaganga bo muri iki gihe.

Ubuyobozi bw’Akarere ka Nyamasheke buvuga ko n’ubwo hari abakoze Jenoside bashobora gukomeza kwinangira, bitazabuza aka karere gukomeza ingamba n’inzira zose zo gushimangira ubumwe n’ubwiyunge bw’Abanyarwanda.

Kugeza ubu ubuyobozi bw’ibi bitaro buvuga ko butaramenya umubare nyawo w’ababiguyemo icyakora ngo hamaze kumenyekana abaganga 13 babikoragamo na 7 bo mu bigo nderabuzima bikorana n’ibi bitaro,abarwayi n’abarwaza bo nta makuru aramenyekana.

CSP Oreste Tuganeyezu avuga ko barimo kubaka bundi bushya abaganga n’abaforomo babereye u Rwanda

Abayobozi batandukanye bitabiriye umuhango wo kwibuka abahoze ari abakozi b’ibigo nderabuzima n’ibitaro bya Bushenge

Niyibizi Ntabyera Hubert, umuyobozi mukuru ushinzwe imirimo rusange mu Karere ka Nyamasheke avuga ko batazigera bacika intege mu gukomeza kunga Abanyarwanda

Abarokotse Jenoside bavuga ko hari ababo bataraboneka ngo babashyingure mu cyubahiro.

Bamwe mu barokotse Jenoside yakorewe Abatutsi bo mu Murenge wa Nkanka barimo Ruterana Thadée basobanura ko nyuma y’imyaka 25 Jenoside ihagaritswe hakiri abiyita abakirisito baza gusenga nyamara bitwikiriye ibyaha bya Jenoside birimo kwanga kugaragaza aho bajugunye imibiri y’Abatutsi bishe muri Jenoside.

Ruterana ati ”reka mbahe urugero turi mu nkiko gacaca umuntu yashyiraga ukuboko hejuru ati nsabye imbabazi tukazimuha uwo muntu twaherukanye muri gacaca ntashobora kunyegera, nanjye sinshobora kumwegera kandi duhurira mu rusengero none se ubwo twarababariranye? Aho ni ho hakiri ikibazo.”

Ibi ni bimwe mu bisubiza inyuma uyu musaza wiciwe abagera kuri 40 kugeza ubu bamwe akaba atarabona imibiri yabo ngo ishyingurwe mu cyubahiro. Honorable Depite Uwambaje Aimée Sandrine we yasabye abayobozi b’amadini n’amatorero kwegera abayoboke babo kugira ngo babashe kubohoka bavuge aho bajugunye imibiri y’abishwe muri Jenoside.

Abaturage bitabiriye umuhango wo gusoza icyumweru cyo kwibuka ku nshuro ya 25 Jenoside yakorewe Abatutsi

Depite Uwambaje Aimée Sandrine ati ”Birasaba ko abihaye Imana mudufasha mugashaka ubundi buryo bwo kwigisha kugira ngo abayoboke b’amatorero yanyu babohoke, bagaragaze iyo mibiri kandi nta nkurikizi zihari kuko iyo waranze aho imibiri yajugunywe uba uruhuye imitima y’abacitse ku icumu.”

Umuyobozi w’Akarere ka Rusizi, Kayumba Ephrem, yasabye abaturage gukomeza kwibuka muri iyi minsi 100 by’umwihariko bagakomeza kuba hafi y’abarokotse Jenoside yakorewe Abatutsi babafata mu mugongo.

Ati "Kwibuka twiyubaka bikwiye gukomeza ari na yo mpamvu muri ibi bihe dukwiye gukomeza kurangwa n’ibikorwa byiza bifata mu mugongo abarokotse Jenoside yakorewe Abatutsi n’ababakomokaho kandi bigaherekezwa n’imvugo nziza mu biganiro tugirana byose.”

Abarokotse Jenoside yakorewe Abatutsi bakomeza gusaba abagize uruhare muri Jenoside kugaragaza aho bashyize imibiri y’ababo bishwe muri Jenoside cyane ko nta n’inkurikizi yababaho baramutse bavuze aho bari. Ikindi abarokotse Jenoside bifuza ni ugushyira ikimenyetso kigaragaza amateka ya Jenoside ku kiyaga cya Kivu kuko na cyo cyatwaye imibiri myinshi y’Abatutsi bishwe muri Jenoside.

Depite Uwambaje Aimée Sandrine n’umuyobozi w’Akarere ka Rusizi bacana urumuri rw’icyizere

Abayobozi batandukanye bitabiriye umuhango wo kwibuka Jenoside yakorewe Abatutsi mu Murenge wa Nkanka

Inkangu zangije umuhanda bituma abaturage batabasha guhahirana

Imvura yangije byinshi mu minsi ishize ariko bigeze mu muhanda Cyapa – Mibilizi mu kagari ka Mashesha inkangu imanura ikibuye kinini cyiwitambikamo, none uretse kubona aho wakandagiza ikirenge na bwo wigengesereye cyane, ubundi buryo bwose bwo gutambuka ntibushoboka. Kujyana imyaka ku isoko ubu ni ingorabahizi ndetse hari n’aho izi nkangu zangije umuyoboro w’amazi.

Bandetse jean Baptiste yagize ati”naringiye kugura ingurube nkagura n’ibitoki aho bita ku cyingwa. Nari kujyana igari ryanjye ariko nashobewe urabona ko nabuze aho ndinyuza kubera ko umuhanda wapfuye.”

Niyigena Daniel nawe ati” kujya i Kamembe mu mujyi, Mibirizi, Nyakarenzo byatworoheraga none aka kanya nkuko nawe ubyirebera ntitworohewe turasaba ubuyobozi kutwoherereza imashini ikadukorera uyu muhanda natwe tugasigara dushyiraho amaboko yacu mu muganda.”

Ikigo nderabuzima cya Mashesha na cyo giherereye muri aka gace. Uyu muhanda ukaba ari wo rukumbi gikoresha cyohereza abarwayi ku bitaro bya Mibilizi cyatangiye kugorwa no kugezayo abarwayi nk’uko NDAGIJIMANA Gervais uyobora iki kigo nderabuzima abivuga.

Iri buye ryaguye mu muhanda rikumira ibinyabiziga bihanyura n’abagenzi

Ati ”Umuhanda warangiritse bikomeye kugira ngo tugeze abarwayi b’indembe ku bitaro bya Mibirizi biratugora cyane kubera ko bisaba ko tumuzungurukana agaca Cimerwa agahinguka Mushaka, akabona gushyika za Gashonga aho ibitaro byubatse. Kugenda no kugaruka ni ibirometero 88 murumva ko ari urugendo rufata amasaha menshi.”

Umuyobozi w’akarere ka Rusizi Kayumba Ephrem yari yatangaje ko kuri uyu wa kane tariki ya 11 Mata 2019 boherezamo imashini mu butabazi bwihuse.

Ati ”muri iki gitondo navuganye n’umukozi ushinzwe kubaka ibikorwa Remezo by’imihanda agiye kujyayo agaragaze igikenewe ku buryo nkeje imirimo yo kuvanamo biriya bitaka izaba yatangiye.”

Ariko ubwo twakoraga iyi nkuru mu masaha y’igicamunsi kuri uyu wa kane, Iyakaremye Jean Pierre, umunyamabanga Nshingwabikorwa w’umurenge wa Gitambi urimo iyi nkangu yatubwiye ko bari bagitegereje.

Ati ”akarere katwijeje ko bagiye kuhakora bohereje aba tekinisiye ubu ndabategereje ngo duhure barebe aho hantu hose hagize ibibazo hagire icyakorwa. gusa igisabwa ni ubuvugize kugira ngo byihutishwe.”

Iyi nkangu yibasiye uyu muhanda mu gihe n’ubundi abawukoresha bamaze imyaka isaga 10 basaba ko wakorwa, dore ko iyangirika ryawo ribangamiye ibigo nderabuzima 11 byo mu Mirenge ya Butare, Gikundamvura, Nyakabuye, Muganza na Bugarama byose byohereza abarwayi ku bitaro bya Mibirizi.

Kuri ubu bagenda n’amaguru ibyo bilometero hafi 20 bajya kwivuza cyangwa se mu bikorwa by’ubucuruzi.

Umwe mu barokotse Jenoside avuga ko ubu bafashijwe gukomeza kwiyubaka

Nzasabayezu Enock ubu uhagarariye Ibuka mu Murenge wa Kanjongo ibi bitaro biherereyemo avuga ko ibitaro bya Kibogora ari hamwe mu hantu hari hafitiwe icyizere cyo gutanga ubuzima, maze bituma umubare munini w’abahingwaga uhahungira.

Agira ati “Aho abakozi b’ibitaro basengera ubu, mu gisenge cyaho (muri plafond) ni ho abenshi bari bihishe bizeye kurokoka ariko kubera ko bagenzi babo bakoranaga batari babishimiye, ni bo babakuyemo barabica.”

Nyamara n’ubwo ibi bitaro bari babitezeho amakiriro, byaje kubabera ikinyuranyo. Nsengimana Emmanuel avuga ko yabikoragamo. Ikimushengura cyane ngo ni uburyo muri ibi bitaro harimo abaganga batahigwaga ariko ubushobozi bari bafite bakaba batarigeze babukoresha ngo barokore ubuzima bw’abahigwaga baba abaganga bagenzi babo, abarwayi ndetse n’abarwaza.

Ati “Mu bitaro ni ahantu haba utuguni twinshi twihishe ariko ababikoragamo batahigwaga ntibigeze bunga ubumwe ngo barebe aho bahisha abahigwaga, ndabagaya!”

Aba ni abakozi b’ibitaro bya kibogora mu muhango wo kwibuka abari abakozi babyo, abarwaza n’abarwayi babiguyemo

Ubuzima bw’abagiye ntibushobora kugaruka,ndetse ni ikimwaro ku baganga babigizemo uruhare kandi bari bashinzwe gutanga ubuzima. Dogiteri Kanyarukiko Sarathiel ,Umuyobozi mukuru w’ibi bitaro avuga ko icyo ibi bitaro birimo gukora ari ibikorwa by’urukundo ku barokotse Jenoside yakorewe Abatutsi.

Agira ati “Turabasura kandi tukagerageza gukomeza kubaba bugufi n’ubwo ari ikimwaro ku baganga bagombaga gutanga ubuzima ahubwo bakabushyira mu kaga.”

Nsengiyumva Emmanuel, umwe mu baharokokeye mu buryo bugoranye, yemeza ko koko ibi bitaro byakomeje kubaba hafi.

Ati “Abarokokeye hano ibitaro byadufashije kwiyubaka, abenshi ubu twarashatse n’abana bacu bari kwiga muri za kaminuza.”

Umuyobozi w’Akarere ka Nyamasheke wungirije ushinzwe imibereho myiza y’abaturage, Mukamana Claudette, yashimiye ibi bitaro imbaraga bishyira mu gukomeza gusana imitima y’abarokotse ariko kandi anasaba abaganga bo muri iki gihe gukora akazi kabo bazirikana gahunda ya Ndi Umunyarwanda.

Mukamana Claudette asaba abakozi b’ubu kurangwa n’ubumwe

Tariki 10 Mata 1994 ni itariki itazibagirana muri ibi bitaro kuko igitero cyishe Abatutsi bari bahungiye muri ibi bitaro ari bwo cyahageze kivuye mu bindi bice biherereye hafi y’ibyo bitaro.

Kugeza ubu ibitaro bya Kibogora byibuka abari abakozi babyo 30 barimo 15 bo ku bitaro na 15 bo ku bigo nderabuzima bikorana n’ibi bitaro. Icyakora umubare w’abarwayi n’abarwaza nturamenyekana uretse ko hari amakuru avuga ko baba barenga ijana.

Abayobozi batandukanye bitabiriye umuhango wo kwibuka

Kwibuka Jenoside kuri iyi nshuro ya 25,abayirokotse bongeye gusubiza amaso inyuma bibuka uburyo Jenoside muri aka karere yakoranywe ubunyamaswa kugeza n’aho abicanyi baryaga ibice bimwe by’imibiri y’Abatutsi birimo imitima n’inyama z’imibiri y’Abatutsi babaga bishwe.

Ndagijimana Laurent, Perezida wa Ibuka muri aka karere, yagize ati “Jenoside yagize ubukana bwihariye muri aka karere. Iyo twibutse ko hano mu Gatandara abantu bokeje inyama z’abantu bakazirya nibaza aho ubumuntu bwari buri. Iyo ugarutse kuri perefe Bagambiki mu Kadasomwa ahagarika abari bahungiye muri Sitade akajya kubashakira interahamwe zikabica,… hari ibyo umuntu atashyikira.”

Kubera imipaka ihuza aka karere n’ibihugu bya Congo n’u Burundi, Abatutsi bagerageje guhungira muri ibyo bihugu abicanyi na ho babakurikiranagayo. Uyu na we ni umwihariko wagarutsweho na Kayumba Sébastien, umwe mu barokokeye muri aka karere avuye muri Sitade ya Rusizi yahoze yitwa Kamarampaka.

Kayumba Sébastien yasobanuye uburyo interahamwe zabasanze no muri Congo zikabicirayo

Yagize ati “Abagerageje guhungira hano hakurya muri iki gihugu cy’abaturanyi cya Congo Interahamwe zabasanzeyo zirabica, hari abantu bo mu Gishoma barimo uwitwa Claude Kazige, babasanze i Nyangezi barabica. Na Nyabitimbo hari umudamu washoboye guhungana n’abana be bageze i Burundi bajya kubagarura babicira mu Rwanda.”

Yaba ari uyu Sébastien n’abandi bigaragara ko bagana mu zabukuru basaba ko amateka ya Jenoside muri Rusizi yakwandikwa hakiri kare bagihari ngo ejo atazabura uyavuga.

Akomeza agira ati “Twafatanya ayo mateka ajyanye na Jenoside yakorewe hano akandikwa, ndasaba buri wese ko aho bishoboka yafata amajwi n’amashusho bikabikwa ahantu hihariye kugira ngo aya mateka atazibagirana.”

Abaturage benshi bitabiriye kwibuka ku nshuro ya 25 Jenoside yakorewe Abatutsi

Umuyobozi w’Akarere ka Rusizi, Kayumba Ephrem, yavuze ko bigenze neza, iminsi 100 yo kwibuka yarangira amateka yose ya Jenoside yakorewe Abatutsi agiye ahagaragara.

Ati “Murabizi ko kugeza ubu hari imiryango yazimye ku buryo udashobora kumenya aho imibiri yabo yajugunywe kandi hirya no hino iri kugenda igaragara, nyamara ababigizemo uruhare batabitangiye amakuru. Turifuza ko muri iyi minsi ijana hagaragara impinduka amakuru ataramenyekanye akamenyekana.”

Uwari perefe wa Cyangugu, Bagambiki Emmanuel, ni we ufatwa nk’imbarutso y’iyicwa ry’Abatutsi basaga ibihumbi 25 baguye muri aka karere.

Umuyobozi w’Akarere ka Rusizi, Kayumba Ephrem, asaba abaturage kugaragaza amateka yose ataramenyekana kugira ngo abungabungwe

Gufata neza kawa byatumye bahabwa ibihembo

Buri wese muri abo bahinzi 20 yahawe inka y’inzungu n’Ikompanyi yitwa Dorman igura ikanohereza kawa mu mahanga. Batoranyijwe nk’abahinzi ba kawa babaye intangarugero kurusha abandi mu kuyitaho, bituma kawa y’i Nyamasheke iza muri eshanu za mbere mu buryohe mu gihugu cyose. Aba bahinzi bemeza ko kawa imaze guhindura ubuzima bwabo ndetse bikaba bigiye kuba byiza kurushaho nyuma yo guhabwa izi nka.

Umwe muri bo witwa Kankesha Bernadette ufite ibiti bya kawa bisaga 2000 yagize ati “Ikawa zampaye umusaruro cyane ngura ikibanza mpita nubaka inzu yo kubamo . Ayo nakuyemo uyu mwaka ushize naguzemo ikindi kibanza cy’ibihumbi magana atanu none dore bampaye n’inka, bizatuma umusaruro wiyongera cyane kuko nabonaga ifumbire y’imborera ari uko nyiguze ariko ubwo mbonye iyanjye bibaye byiza.”

Ukurikiyimfura Félicien yungamo ati “Ubuzima bwanjye bwose mbukesha ikawa n’abana banjye nzabashishikariza guhinga kawa kuko ikawa ugufasha kuguha amafaranga y’izabukuru umaze gusaza. Iyi nka bampaye na yo izamfasha n’umuryango wanjye guca bwaki mu rugo rwacu ndetse binamfashe kurushaho gukorera kawa yanjye kugira ngo ikomeze gutanga umusaruro mwinshi kuko mbonye ifumbire ihagije.”

Abahinzi ba kawa bavuze ko bagiye kurushaho kuzihinga no kuzitaho

Ubuyobozi bw’Akarere ka Nyamasheke buvuga ko n’ubwo kawa iri mu bihingwa bifatiye runini abatuye aka karere. Nyamasheke, ni ko karere ka mbere mu guhinga kawa nyinshi kandi nziza mu gihugu. Icyakora aka karere kavuga ko hamwe na hamwe kawa ikeneye gusazurwa dore ko ngo hari ibiti birengeje imyaka mirongo ine bigaragara ko bitagitanga umusaruro kubera gusaza.

Ntaganira Josué Michel, Umuyobozi w’aka karere wungirije ushinzwe ubukungu ni byo asobanura, ati “Haracyariho ibiti byinshi bya kawa bishaje mu Karere ka Nyamasheke. Hari ibirengeje imyaka 40, iyo itangiye gusaza gutyo bitanga umusaruro muke kandi utari mwiza. Iyo ni imbogamizi, ariko dufitanye gahunda na NAEB, yo kugenda tuvugurura ibiti bishaje tukabisazura. Ubu igiti kimwe gisigaye cyera ibiro biri hagati ya bibiri na bitatu kandi kigomba kwera hagati y’ibiro bine na bitanu.”

Ntaganira Josué Michel, umuyobozi w’akarere wungirije ushinzwe ubukungu avuga ko bagiye kuvugurura ubuhinzi bwa Kawa

Seminega Jean Bosco ukuriye Kompanyi ya Dorman mu Rwanda avuga ko guhemba aba bahinzi biri mu rwego rwo kubatera umwete wo kwita kuri kawa ariko kandi banarebera hamwe n’aka karere uburyo umusaruro wa kawa ku giti warushaho kwiyongera mu buryo bwose bushoboka.

Ati “Turi muri gahunda yo kureba ukuntu umusaruro ku giti wakwiyongera umuturage akabona inyongera ku mafaranga avana mu buhinzi bwa Kawa. Basanzwe batera ifumbire mvaruganda inshuro imwe kandi bagomba gutera inshuro ebyiri ku mwaka. Tuzagerageza gukorana n’abahinzi kugira ngo umusaruro wiyongere mu buryo bushoboka haba mu gukoresha ifumbire mvaruganda n’imborera.”

Amakuru ubuyobozi bw’aka karere butanga, agaragaza ko 40% bya kawa yoherezwa mu mahanga ituruka mu karere ka Nyamasheke. N’ubwo Nyamasheke ifite ibindi bihingwa byinshi, kawa yaho yihariye 40% by’ubukungu bw’aka karere. Ihinze ku buso bwa hegitari ibihumbi bisaga bitanu ikaba ihingwa n’imiryango ibihumbi 67. Muri Kawa 29 ziherutse kwegukana ibihembo mpuzamahanga by’uburyohe, iya Nyamasheke yaje ku mwanya wa gatanu, ubu bakaba bafite intego yo kuyigira iya mbere.

Buri wese mu bahinzi 20 ba kawa yahawe inka

Abakuriye kompanyi ya Dorman mu Rwanda bavuga ko bagiye gufasha abahinzi kurushaho kongera umusaruro wa kawa

Ubuyobozi bw’uruganda rwa Shagasha bwashyikirije ababyeyi irerero

Igice kinini cy’uyu Murenge wa Nkungu gihinzeho icyayi. Ibi bituma ababyeyi benshi bakibyukiramo, bakakimaramo umwanya munini. Abo babyeyi bavuga ko baburaga aho basiga abana babo, none babonye igisubizo cy’irerero cyangwa urugo mbonezamikurire y’abana bato bubakiwe n’uruganda rw’icyayi rwa Shagasha.

Musanabaganwa Seraphine yagize ati “Urabona ko twegereye iyi mirima y’icyayi, tubyukira mu kazi ko gusoroma icyayi ntitwibuke kureba aho dusize abana ariko kubera ko iri shuri ribonetse tuzajya dutaha duhurire mu rugo bavuye ku ishuri kandi dukore akazi dutuje kuko tuzaba tuzi neza ko abana bafite umutekano.”

Mugenzi we witwa Nyiranzabahimana Françoise yungamo ati “Ugendanye n’imiterere y’ahantu murabona ko duturanye n’imirima y’icyayi kandi murabizi ko ari byo bidutunze. Rero dukunze guhura n’ibibazo iyo tugiye kugisoroma ngo tukigurishe kuko twaburaga aho dusiga abana ariko iri shuri rije ari igisubizo kuri twe. gusa bibaye nk’ibyumba bitatu byarushaho kutubera byiza kuko murabona ko aha hari abana benshi.”

Abana bazajya basigara bitabwaho mu gihe ababyeyi bagiye gusoroma icyayi

Ni irerero ryuzuye ritwaye asaga miliyoni zirindwi n’igice z’amafaranga y’u Rwanda. Uruganda rwa Shagasha rwaryubatse ruvuga ko ari muri gahunda yo gukomeza imibanire myiza yarwo n’abaruturiye ari na ko ruvuga ko ruzakomeza ibikorwa nk’ibi by’iterambere mu baturage nk’uko bivugwa na Rugamba Innocent.

Ati “Dushimira cyane imikoranire iri hagati y’uruganda rwa Shagasha n’abaturage duturanye kuko iki cyayi ducuruza, baramutse batabonetse ngo baze babidufashemo ntabwo imirimo irimo twayishobora twenyine. Ni yo mpamvu natwe turushaho gushyiramo imbaraga kugira ngo tubungabunge iyo mikoranire. Nidukorana n’abantu bishimye n’ibyo dukora bizatera imbere ku mpande zose.”

Ubuyobozi bw’Akarere ka Rusizi buvuga ko hagikenewe imbaraga nyinshi kugira ngo mu midugudu yose hagere aya marerero, cyane ko kugeza ubu nta na kimwe cya kabiri cy’aya marerero gihari, icyakora na none bugashimira uruhare rw’abafatanyabikorwa barimo n’uru ruganda rwa Shagasha mu gukemura iki kibazo.

Nsigaye Emmanuel, umuyobozi w’Akarere ka Rusizi wungirije ushinzwe imibereho myiza y’abaturage avuga ko ibyumba akarere gafite hirya no hino mu karere bifasha abana, bikora nk’urugo mbonezamikurire (ECD) ari 132. Ngo biracyari bike ugereranyije n’imidugudu 596 igize akarere ka Rusizi. Intego ngo ni uko buri mudugudu ugomba kugira irerero.

Irererero ryatwaye asaga miliyoni zirindwi n’igice

Guverineri w’Intara y’Uburengerazuba asaba abaturage kujya batanga amakuru hakiri kare

Abaturage bo mu turere dukora kuri Pariki y’Igihugu ya Nyungwe mu Ntara y’Uburengerazuba, by’umwihariko uduhana imbibi n’igihugu cy’u Burundi, basabwe n’inzego z’ubuyobozi kutajenjeka ku birebana n’umutekano ahubwo bagafatanya n’inzego ziwushinzwe gukumira kugira ngo hatagira ubinjirana akaba yawuhungabanya anyuze muri ibyo bice.

Ibi ni ibyatangajwe n’ubuyobozi bw’Intara y’Uburengerazuba ku wa 02 Mata 2019, mu ruzinduko ubuyobozi bwayo bwagiriye mu Murenge wa Butare wo mu Karere ka Rusizi, umurenge uhana imbibi n’igihugu cy’u Burundi.

Abaturage bo mu tugari dutatu two mu Murenge wa Butare harimo aka Rwambogo gakora ku ishyamba rya Nyungwe no ku gihugu cy’u Burundi ni bo baganiriye n’ubuyobozi bw’Intara y’Uburengerazuba.

Ni mu gihe uyu Murenge wa Butare nta kibazo cy’abahungabanya umutekano w’abaturage baturutse hanze y’igihugu cyari cyagaragara.

Abayobozi ku Ntara y’Uburengerazuba bakanguriye abo baturage kugira ijisho ridahuga, hagamijwe gukumira uwo ari we wese wakoresha iri shyamba cyangwa igihugu cy’u Burundi agahungabanya umutekano nk’uko bisobanurwa na Munyantwari Alphonse, Guverineri w’Intara y’Uburengerazuba.

Ati “Umuntu wanyuze mu mudugudu agomba kumenyekana, buri muntu wese ucumbitse agomba kumenyekana. Ibyiza biraharanirwa, ntabwo byizana. Abashaka guhungabanya umutekano w’u Rwanda bo barahari ariko ntacyo bakora kuko nta na rimwe Abanyarwanda bashyize hamwe bigeze bakomwa n’uwa ariwe wese.”

Ubwo butumwa bumaze iminsi buhabwa abaturage b’Intara y’Uburengerazuba ndetse n’igice kimwe cy’Intara y’Amajyepfo. Muri ibi bice hamaze iminsi havugwa abashaka guhungabanya umutekano w’u Rwanda bahakoresheje.

Abaturage barasabwa kujya batanga amakuru ku gihe

Ubwo umunyamakuru wa Kigali Today yerekezaga muri uyu Murenge wa Butare, yamenye amakuru yaturutse mu Murenge wa Bweyeye bihana imbibi avuga ko hari abatu bitwaje intaro baje bagasahura amatungo n’imyaka by’abaturage baturutse mu gice cy’ishyamba rya Nyungwe ku ruhande rw’u Burundi.

Maj. Gen. Eric Murokore, umuyobozi w’inkeragutabara mu Ntara y’Uburengerazuba yagize icyo avuga kuri abo bantu.
Ati “Hari ingegera zijya ziza hariya mu ishyamba zikabundamo hanyuma zikitwikira ijoro zikaza gusahura imyaka yanyu, ihene, inkoko n’ibindi nimuzikumire murare amarondo.”

Major General Eric Murokore kandi yibukije abaturage ko ari bo bagomba gufata iya mbere mu kwicungira umutekano hanyuma inzego z’umutekano zikabunganira aho badashoboye.

Major General Eric Murokore yakomeza agira ati “Ntihazagire uza kugutesha umwanya. Aho muzajya mubona bikomeye mujye muhamagara inzego z’umutekano.”

Uru ruzinduko rukangurira abaturage kwicungira umutekano ruje mu gihe hashize ibyumweru bibiri inzego z’ubuyobozi zigendereye abaturage n’abayobozi bo mu Karere ka Nyamasheke aho zabasabaga gukaza umutekano, dore ko na ho hari haherutse kwinjirira abantu nk’abo na bo bifuzaga guhungabanya umutekano w’abaturage ariko bagateshwa n’ingabo z’igihugu.

Guverineri Munyantwari Alphonse (hagati) amara abaturage impungenge ku mutekano

Yagize ati “Abashaka guhungabanya umutekano banyuze muri iyi ntara reka mbabwire nkoresheje amagambo atatu gusa: Bahebe, Bahebure, Baziguruke kuko ibyo bitazashoboka kandi ntibizigera binashoboka.”

Ibi Guverineri Munyatwari yabivuze nyuma y’aho hari hashize iminsi muri iyi ntara hinjira abantu batazwi bitwaje intwaro bashaka guhungabanya umutekano w’u Rwanda. Guverineri Munyantwari yamaze abaturage impungenge, ababwira ko iyi ntara ifite umutekano wose.

Ati “Hari abantu bavugira ku maradiyo yo hanze abandi bagakoresha ibitangazamakuru byandika bati ‘intara yarafashwe, nta mutekano uyirimo’, ariko muri make icyo navuga iyi ntara ifite umutekano. ba mukerarugendo barayisura, abaturage bayituye barabizi, ntitwageza aya amasaha twicaye hano kandi tugiye kujya hirya no hino mu turere hatari umutekano.”

Abayobozi b’uturere tugize Intara y’Uburengerazuba na bo bitabiriye ikiganiro cyahuje intara n’abanyamakuru

Guverineri Munyantwari Alphonse yasabye abafite ibitekerezo byo guhungabanya umutekano w’u Rwanda kuva ibuzimu bakajya ibuntu kuko umunyarwanda wateshuka ariko akisubiraho igihugu kimwakira.

Ati” Turabizi turacyafite imitwe ya FDLR n’abandi bashaka guteza umutekano muke mu gihugu ariko uwinjiramo sinzi aho azanyura asubirayo. Abanyarwanda murabizi, muzi ingufu z’inzego z’umutekano, muzi ubushake bw’Abanyarwanda mu kwicungira umutekano. Ubwo ni bwo butumwa nabaha ahubwo nkababwira nti muve ibuzimu mujye ibuntu.”

Mu Murenge wa Karambi mu Karere ka Nyamasheke, ni ho haherutse kuvugwa abantu bitwaje intwaro babarirwa muri 80 bambutse ikiyaga cya Kivu mu ijoro ryo ku cyumweru tariki ya 18 werurwe 2019, bagerageza guhungabanya umutekano ariko ingabo z’u Rwanda zirahagoboka. Ni mu gihe mbere yaho na bwo abantu nk’abo bahungabanyije umutekano w’abagenzi muri pariki y’igihugu ya nyungwe. Ubuyobozi bumara abaturage impungenge, bubabwira ko ababigerageza ntacyo bateze kugeraho.

Aba ni bamwe mu bana bafashwe bataye amashuri

Umukwabu wo gushakisha aba bana no gufata ababakoresha watangiriye mu mugi wa Rusizi, ubuyobozi bw’akarere n’inzego z’umutekano bagenda bareba aho abo bana baherereye mu bice bitandukanye by’umugi.

Abenshi mu bana bahise baboneka ku ikubitiro basanzwe mu mirimo y’uburobyi, mu isoko bikorera imizigo, ubucuruzi ndetse n’abana bareba amafirimi mu tubari. Benshi muri aba bana bavuga ko bacikije amashuri bajya gushaka ubuzima ndetse ngo hari n’abatumwa n’ababyeyi babo.

Umwana w’imyaka 12 twaganiriye yagize ati”bamfashe naje gushaka imibereho ababyeyi nibo baba banyohereje barambwira ngo njye gushaka ibyo turarira.”

Mugenzi we nawe w’imyaka 13 yungamo ati” maze myaka ibiri nararetse ishuri narivuyemo kubera ubushobozi buke, ubu ncuruza isambusa abo nkorera bakampemba ibihumbi 7,000 ku kwezi.”

Bamwe mu bafatanywe abana bemera amakosa ariko ku rundi ruhande bakavuga ko ari ugufasha abana ngo badafite uko bagira.

Niragire Olivier yafatanywe umwana amujyanye kumufasha gucuruza ihene.

Mukayisenga Alphonsine yafatanywe abana babiri umwe yafatiwe mu mujyi ari gucuruza isambusa. Uyu mudamu we avuga ko yari abamaranye icyumweru mu nzu abe bajya kwiga ariko aba akirirwa abakoresha imirimo itandukanye.

Asobanura ko atazi aho baturutse akanavuga ko ari impuhwe yabagiriye kuko ngo bari babuze aho kuba.

Habiyaremye Frodouard Umukozi w’akarere ushinzwe ubugenzuzi bw’umurimo mu karere ka Rusizi hagati avuga ko bagiye guhana abafatanywe abana

Ati ”ese nimba narabagiriye impuhwe barajya kumfunga kubera ko natoye abana nkabagirira neza cyakora sinzi aho baturutse kuko sijya mbona umwanya wo kubaganiriza.”

Habiyaremye Frodouard Umukozi w’akarere ushinzwe ubugenzuzi bw’umurimo mu karere ka Rusizi yavuze ko uyu mukwabu uzakomeza ari na ko barushaho guhana bihanukiriye abazajya bagaragarwaho gukoresha abana imirimo itari iyabo.

Ati”uyu munsi hagaragaye imirimo y’ubwoko butatu ikoreshwa abana. Hamwe ni mu burobyi, ahandi ni hano mu isoko aho bagenda bikoreye imizigo y’abantu, hari abandi babakoresha mu rugo kubera ko babahemba make, duhereye uyu munsi aba bafashwe barahabwa ibihano bijyanye n’itegeko hari abahabwa igihano kirenze miriyoni y’amafaranga y’u Rwanda.”

Biteganyijwe ko uyu mukwabu uzagera mu mirenge yose kandi ukazahoraho mu gihe cyose abana bakigaragara mu mirimo itari iyabo kandi barataye amashuri.

Kuri uyu munsi wa mbere hakaba hafashwe abana babarirwa muri 30, abenshi bakaba ari abaturuka mu mirenge y’icyaro y’akarere ka Rusizi no mu karere ka Nyamasheke gaturanye na Rusizi bavuga ko baba baje gushakira imibereho mu mugi wa Rusizi.

Ahatungwa agatoki hakunze kugaragara bene aba bana ni mu kiyaga cya kivu,mu mirima y’icyayi mu mirima y’umuceri mu kibaya cya Bugarama, mu isoko riri rwagati mu mugi wa Rusizi utaretse no mu maresItora ndetse no mu ngo z’abagaragara ko bishoboye.

Aba ni bamwe mu baturage bagera kuri 300 bavuga ko batigeze babona ingurane y’imitungo yabo yangijwe n’umuyoboro w’amashanyarazi

Barengayabo Jonas na Ngendahimana Felix bo mu kagari ka Mashyuza muri uyu murenge wa Nyakabuye ni bamwe muri aba barenga 300 bangirijwe imyaka, ibiti by’imbuto ndetse n’inzu zagizweho ingaruka n’ikorwa ry’uyu muyoboro, bakabarirwa amafaranga y’ingurane ariko ntibishyurwe.

Barengayabo Jonas ati” iyo bamenye ko hari umuyobozi mukuru ugiye gusura umurenge wacu, ubuyobozi bw’umurenge budutumaho ngo abafitanye ikibazo na (REG), ngo bazaze bahurire ku murenge twagerayo tugatahira kwandikwa. Njyewe bandimo ibihumbi Magana arindwi na mirongo icyenda (790,000 Frw).”

Ngendahimana Felix yungamo ati” Njyewe bandimo miriyoni ebyiri n’ibihumbi Magana atatu na mirongo cyenda (2,390,000 Frw) hashize imyaka itatu twishyuza amaso yaheze mu kirere.”

Kugeza ubu hari inzu zikiri munsi y’insinga z’amashanyarazi kandi zarabaruwe, ubu bakaba barabuze ubwahava,ibintu bavuga ko bishobora gushyira ubuzima bwabo mu kaga,bakabura amafaranga n’ubuzima.

Barengayabo Jonas akomeza agira ati” dutuye munsi y’aya masinga ya (Haute volte tension), dufite impungenge zo kuba munsi y’umuriro ungana utyo 110 kv ni umuriro mwinshi cyane.”

Umuyobozi w’akarere ka Rusizi Kayumba Ephrem avuga ko bari gukora ubuvugizi muri REG

Icyifuzo cyabo ni ukwishyurwa imitungo yabo bakareka gukomeza gusiragira dore ko ngo batorohewe n’amatiki yoguhora bayirukaho.

Ntwari Joseph, umuyobozi wa (REG) ishami rya Rusizi avuga ko ababaruriwe bose bishyuwe ahubwo ngo aba bishyuza ni abacikanywe ngo bakaba bagiye kongera kubabarurira.

Ati”abaturage bose basinye ku ifishi babaruriwe n’abagenagaciro nyabo barishyuwe ariko mu kwezi kwa kane abagenagaciro bazagaruka bongere banyure mu bacikanywe cyangwa batabaruriwe bose babakorere amafishe tuzabishyure.”

N’ubwo uyu muyobozi avuga ko bose bishyuwe ariko Ngirabatware James, umunyamabanga Nshingwabikorwa w’umurenge wa Nyakabuye avuga ko aba basaga 300 batigeze bishyurwa.

Umuyobozi w’akarere ka Rusizi Kayumba Euphrem we avuga ko akarere kaganiriye na (REG), ngo bategereje ko bazaza bakareba iyo mitungo yangijwe ntiyishyurwe. ikindi kiriho gishya ni ukureba uko hashakwa ingengo y’imari kugira ngo bishyure abatuye munsi y’amashanyarazi mu rwego rwo kurengera ubuzima bwabo.

Ati ” Ikindi gihari mu rwego rwo kurengera amagara y’abantu ntabwo umuntu agomba gutura munsi y’imirongo migari y’amashanyarazi, ariko ntekereza ko uko umwaka wicuma hazajya harebwa abegereye uwo muriro kurusha abandi bimurwe.”

Mu gihe impande zose zirebwa n’iki kibazo zitagaragaza umubare nyawo w’amafaranga yo kwishyura aba baturage, mu kagari kamwe gusa ka Mashyuza abishyuza bavuga ko bafitiwe umwenda wa miliyoni zisaga 40 kandi ni ikibazo kiri mu tugari dutandatu twose.

Hakizimana Nathan yemerewe telefone igezweho nyuma yo gukangurira abaturage kubyuka ngo barwanye umwanzi

Babiri muri aba baturage bazahabwa telefoni ngendanwa zigezweho(smart phone) naho umukuru w’umudugudu wanagiye abyutsa abandi baturage ahabwe inka y’inzungu. Muri ibyo bihe kandi hari umuturage umwe wahasize ubuzima akaba yarasize umugore n’abana babiri. Umuryango we uzakomeza kwitabwaho n’Akarere ka Nyamasheke.

Minisitiri w’Ubutegetsi bw’Igihugu, Prof Shyaka Anastase yasabye abaturage bo mu Karere ka Nyamasheke kutarangazwa n’ibyo bumva by’abagamije kubatesha umwanya bashaka guhungabanya umutekano, ahubwo bagakomeza ibikorwa byabo bibateza imbere.

Muri aka karere, abantu batahise bamenyekana baherutse gushaka guhungabanya umutekano ariko bakomwa mu nkokora n’abaturage batanze amakuru ku gihe.

Tabaro Eliyazari umuyobozi w’umudugudu yagabiwe inka nyuma yo gutanga amakuru y’abari bagabye igitero

Mu Murenge wa Karambi ni ho abantu bitwaje intwaro babarirwa muri 80 bambutse ikiyaga cya Kivu mu ijoro ryo ku cyumweru tariki 18 Werurwe 2019, bagerageza guhungabanya umutekano, umuturage umwe arahagwa ubwo abo bagizi ba nabi bahanganaga n’ingabo z’u Rwanda zahise zihagoboka nyuma yo guhabwa amakuru n’abaturage.

Tabaro Eliyazari, umukuru w’Umudugudu wa Cyankuba mu Kagari ka Kagarama ahatungukiye aba bagizi ba nabi ndetse na Hakizimana Nathan ni bo babanje gutabaza. Hari mu ma saa kumi zo mu rukerera.

Tabaro yagize ati “Namaze kumenya amakuru saa kumi z’ijoro ko mu mudugudu nyobora hajemo abantu batahasanzwe kandi badasa n’ingabo z’igihugu mpita mbyuka, ariko mu gihe ntangiye kubyutsa abaturage mpita nkubitana n’abo bantu bavuye muri Congo banyambura telefone bambwira ko mbageza ahitwa mu Rusizi kuko ari ho barimo bajya. Bari bambaye gisivili bafite imbunda.”

Umuyobozi w’Inkeragutabara mu Ntara y’Uburengerazuba Maj. Gen. Eric Murokore yashimiye abaturage kuba baratangiye amakuru ku gihe

Hakizimana Nathan we yavuze ko aho atuye ari ho bahingukiye, ati “Nahise mfata indangururamajwi nshyiramo amabuye ntangira kubyutsa abaturage nti nimubyuke twatewe mwese abagabo nimuze tubatangire ku ishyamba tutayoberwa aho banyuze.”

Umuyobozi w’Inkeragutabara mu Ntara y’Uburengerazuba Maj. Gen. Eric Murokore yashimiye abaturage kuba baratangiye amakuru ku gihe ingabo z’u Rwanda zikahagoboka bagafatanya kurwanya abo bagizi ba nabi ,ariko kandi anahumuriza abatuye muri ako karere ko umutekano ari wose ndetse anongeraho ko abagerageje kuwuhungabanya ubu bari kwicuza.

Yagize ati “Muri Nyamasheke ejobundi mwumvise utubazo twahabaye abantu bakoresheje aya mazi binjira ku butaka bwacu, habayeho kurangara kw’amarondo cyane ko ikiyaga cyari gifunze, ndashimira abaturage ba Karambi bababujije kugira ibikorwa bibi bakora kugeza aho inzego z’umutekano zaziye bagafatanya na zo. Aho binjiriye rero n’aho bagiye ubu bari kubyicuza. Muhumure ingabo z’u Rwanda zirahari ibindi tubasaba ni ukugira ngo ntibazongere kubaca mu rihumye bakinjirira hariya.”

Minisitiri Shyaka yasabye abaturage gukomeza gukora ibibateza imbere ntibarangazwe n’abashaka kubasubiza inyuma

Minisitiri w’Ubutegetsi bw’Igihugu, Prof Shyaka Anastase, yashimiye abaturage b’Akarere ka Nyamasheke ku bw’uruhare rwabo mu kwicungira umutekano. Yabasabye gukomeza gukora ibibateza imbere ntibarangazwe n’abashaka kubasubiza inyuma.

Ati “Mwabyumvise abaturage ubwabo ni bo bavuze ko babanesheje ku buryo na bo ubwabo bivugira ko umutekano wabo urinzwe. Abanyarwanda bamaze kuzamura igipimo cy’imyumvire iri hejuru ni ibintu byiza twishimira mbese umusingi w’iterambere urahari ni yo mpamvu tuganira twagarutse cyane ku bintu byo kurwanya ubukene n’uburyo Abanyarwanda bigirira icyizere kuko umusingi uhari.”

Abaturage bo mu murenge wa Karambi bishimira uburyo ingabo zabagobotse zigahashya abanzi

Ikiraro gishya gihuza Rusizi na Bukavu cyatangiye gukoreshwa byagateganyo

Icyo kiraro gishya kitaruzura neza ngo cyatangiye gukoreshwa by’agateganyo kugira ngo ubucuruzi bwambukiranya imipaka burusheho koroha dore ko abacuruzi bavuga ko badindizwaga no kuba nta modoka zari zemerewe kukinyuraho.

Abakoresha uyu mupaka bari bamaze igihe binubira uburyo batemererwaga gukoresha iki kiraro gishya kandi imyaka itatu yari ishize cyuzuye ahubwo bagakomeza gukoresha ikihasanzwe bigaragara ko gishaje dore ko kimaze imyaka isaga 40. Ngo nta modoka irengeje toni eshatu yemererwaga kukinyuraho kubera uburyo cyari gishaje, ibyo bikadindiza ubucuruzi bwabo nk’uko babivuga.

Umwe muri bo witwa Manzi Dominique yagize ati “Turifuza ko iki kiraro gishya cyakwihutishwa bikava mu nzira akazi kagakomeza nk’ibisanzwe. Naho ubundi iki gishaje rwose ntikitworohereza kukinyuzaho imizigo, ubu noneho ntibishoboka ko wahanyuza imodoka ipakiye tozi zirenze eshatu.”

Murangira Erneste we yagize ati “Abacuruzi bacitse intege kuko umuzigo wemerewe kunyura kuri iki kiraro gishaje ni toni eshatu kandi umuzigo dutwara mu modoka urengeje toni eshatu. Niba umukongomani yaranguraga imifuka 80 ya Kawunga, ubu asabwa 20 gusa. Imodoka twaraziparitse kubera iki kiraro akazi karabuze ikindi kandi ntitwabasha kwikorera iyi mizigo ku mutwe tuyijyana muri Congo.”

Iki kiraro cyatangiye gukoreshwa by’agateganyo guhera kuri uyu wa gatanu tariki ya 22 Werurwe 2019 nyuma y’inama yahuje Akarere ka Rusizi, Umujyi wa Bukavu, n’Umuryango w’Ibihugu by’Ubumwe by’Iburayi watanze inkunga yo kucyubaka.

Kankindi Leoncie, umuyobozi wungirije w’Akarere ushinzwe ubukungu mu Karere ka Rusizi na Nziraboba Mudosa Buda, Umujyanama wa Guverineri ushinzwe ibibazo byo mu karere k’ibiyaga bigari ni byo basobanuye.

Kankindi Leoncie ati “Mu gukemura ibibazo by’abakora ubucuruzi bwambukiranya umupaka wa Rusizi ya mbere, hatekerejwe ko haba hakoreshwa iki kiraro gishya nubwo hari ibikinozwa. Murabona ko inzira zikiganaho zikirimo gukorwa twemeranyijwe ko cyaba gikoreshwa n’imodoka ziringaniye zitwara imizigo itarengeje toni 20 hanyuma ubucuruzi bwambukiranya umupaka bugakomeza neza. Nyuma mu gihe imirimo y’inzira zikiganaho izaba irangiye neza, n’amakamyo manini azatangira kuhanyura.”

Abayobozi ku mpande z’ibihugu byombi baganiriye ku mikoreshereze y’iki kiraro kimaze imyaka itatu gisa n’icyuzuye ariko kidakoreshwa

Nziraboba Mudosa Buda we yagize ati “Guverineri mpagarariye none aha twumvikanye ko bidasubirwaho iki kiraro kigomba gufungurwa guhera tariki ya 22 werurwe 2019.”

Iki kiraro gishya gifite metero 63. Cyubatswe ku nkunga y’Umuryango w’Ubumwe bw’Ibihugu by’i Burayi, gitwara abarirwa muri miliyoni eshatu n’ibihumbi 800 by’amayero.

Ibibazo by’imitungo y’abaturage yangijwe mu kucyubaka itarishyurwa ku ruhande rwa Congo ndetse n’umuhanda ukigeraho udakoze haba ku ruhande rwa Congo n’u Rwanda ni byo bibazo by’ingenzi byatumye gitinda gutangira gukoreshwa.

Icyakora ubuyobozi ku mapande zombi buvuga ko hatanzwe isoko ry’abagiye gukora uyu muhanda, ariko hagati aho kiraba kinyurwaho n’imodoka zitarengeje toni 20, n’ubwo ubuyobozi budatangaza igihe uyu muhanda uzaba wuzuriye neza.

Akigera mu Karere ka Nyamasheke, yakiriwe n’umuyobozi w’akarere aho yagaragaje uko ubuzima bw’akarere buhagaze. Umuyobozi w’akarere yagaragaje ko umutekano uhari usibye ibintu bike bigerageza kuwuhungabanya birimo urugomo ruturuka ku bantu bakoresha ibiyobyabwenge, amakimbirane mu ngo akunze kuvamo gukubita no gukomeretsa n’ibindi.

Nyuma yo kugaragarizwa ishusho y’umutekano muri rusange, umuyobozi w’inkeragutabara mu Ntara y’Uburengerazuba, Maj. Gen. Eric Murokore, yagarutse ku mutekano, ashimira abaturage uburyo bicungira umutekano ariko avuga ko hari abatishimira ibyo u Rwanda rumaze kugeraho. Yavuze ko mu cyumweru gishize hari abantu banyuze mu kiyaga cya Kivu binjira mu Rwanda bashaka guhungabanya umutekano nubwo ngo ibyo bifuzaga batabigezeho.

Maj. Gen. Murokore yavuze ko abo bantu binjiye mu Rwanda ariko ngo aho bari barimo kwicuza icyabazanye. Yavuze ko kwinjira byaboroheye ariko ngo gusohoka byarabakomereye. Yasabye abaturage gukomeza kuba maso mu gukumira no guhashya abanzi bashaka guhungabanya umutekano n’iterambere ry’u Rwanda. Yijeje abaturage ko umutekano w’u Rwanda urinzwe kandi nta muntu ushobora kuwuhungabanya. Yavuze kandi ko ababigerageza nta mbaraga bafite nk’izo ingabo z’u Rwanda zifite. Maj. Gen. Eric Murokore yavuze ko ntawe uzagerageza guhungabanya umutekano w’u Rwanda ngo atahe amahoro.

Ati "Ugerageza kudukora mu jisho tuzarikuramo."

Abayobozi b’inzego z’ibanze barimo ab’imidugudu, utugari n’ab’imirenge bijeje ubufatanye mu mutekano n’iterambere ry’akarere, bavuga ko bazakomeza kuba maso bakaza amarondo.

Minisitiri w’Ubutegetsi bw’Igihugu, Prof Shyaka Anastase, yatinze ku iterambere ry’abaturage abasaba kutarangazwa n’abifuza kubarangaza.

Yunze mu rya Maj. Gen. Eric Murokore, avuga ko “Abifuza guhungabanya umutekano w’u Rwanda bari mu buyobe”. Yashimiye abaturage uburyo bacunga umutekano abasaba gukomereza aho.

Umuvunyi mukuru Anastase Murekezi akemura ibibazo by’abaturage

Aha cyane cyane abaturage bashyira mu majwi urwego rw’abunzi. Ibi babivuze bahereye ku manza nyinshi baburanishwa n’urwo rwego ariko abantu bajijukiwe bakitambika irangizwa ry’izo manza bikarangira babuze uburenganzira bwabo kubera amanyanga biba biri gukorwamo.

Nambajimana Leonard na Nkurunziza Semforiani ni bamwe mu baturage bagejeje ku muvunyi akarengane bagiriwe n’abunzi mu Murenge wa Nyakarenzo ho mu Karere ka Rusizi.

Nambajimana Leonard yagize ati “Aha hari abantu bigize ibisambo bakaza bagashora abaturage mu manza babateranya. Ni ko kazi bakora rwose baratwokamye, iyo bamaze gutsinda imanza z’ibyo baburana bishyira hamwe bakagabura imitungo yacu rwose muzaturenganure.”

Umurongo w’abaturage bifuza ko bakemurirwa ibibazo n’umuvunyi

Niyigena Martine, umwunzi wari muri iki kiganiro yagaragaje ko hari igihe bafata imyanzuro ariko bamwe muri bo bagaca inyuma bakavangira abaturage. Ngo hari n’igihe iyo baciye urubanza bikaba ngombwa ko rukomeza mu nkiko, abunzi batamenya ibikurikiraho.

Ati “Urubanza rw’uyu mugabo Nkurunziza rwarangiye imyanzuro tuyifashe turayibaha bose ukuntu byaje guhinduka simbizi gusa numva ko ngo haje undi mwunzi aduca inyuma ajya iwe aramubwira ngo namuhe ya myanzuro ngo hari icyo bibagiwe gushyiraho ayimarana iminsi itatu, byaje kurangira bigeze mu rukiko ariko ibyakurikiyeho njyewe sinabimenye.”

Umuvunyi mukuru, Anastase Murekezi, wahereye mu gitondo bukarinda bwira acyumva ibibazo by’aba baturage yagaragaje akababaro yatewe no kuba abaturage barenganywa nimyanzuro y’inkiko bakabura uburenganzira bw’ibyo baburanye kubera abo yise ‘abanyamahugu babigize umwuga’. Murekezi avuga ko hakwiye gushakishwa indi nzira yo gufasha abaturage haba ku rwego rw’umuvunyi n’inzego z’ibanze.

Abaturage bavuga ko bakirenganywa kubera amahugu

Ati “Hari abantu bajijukiwe cyane bazi ibyo guhuguza ndetse bagiye bahuguza abaturage ku buryo bigaragara ko harimo ruswa, kuko ntibyumvikana kubona umuntu ajya mu bunzi, akajya mu rukiko rw’ibanze agenda atsinda mu buryo bw’amahugu, nta kundi wabisobanura uretse kuvuga ko ruswa iba yarakoreshejwe. Twasanze tugomba kubikurikirana umuturage warenganye akarenganurwa.”

Ibyinshi mu bibazo abaturage bagaragarije umuvunyi, ubuyobozi mu nzego z’ibanze bwagaragazaga ko ntacyo bwarenzaho ku byanyuze mu nkiko bikanzurwa. Avuga kuri iki kibazo, umuvunyi mukuru yavuze ko mu gihe bigaragara ko inzira y’amategeko ifunze, hakwiye gushakwa ubundi buryo ibibazo by’abaturage byakemukamo aho kugira ngo abayobozi bicare bagereke akaguru ku kandi nk’aho nta cyabaye.

Uru ni uruganda rw’ikawa rwaguye

Iyi mvura yaguye ahagana saa saba zishyira saa munani z’amanywa yari irimo umuyaga mwinshi, ari na wo watumye igira ubukana budasanzwe. Mu bakomeretse harimo abaturage 16 bajyanywe kuvurirwa mu bitaro bya Mibilizi abandi bababaye byoroheje bajyanwa ku bigo nderabuzima byo muri iyo mirenge.

Kuri iki cyumweru abakomeretse bari bagifite ihungabana rikomeye bakaba bari bakirimo gukurikiranwa n’abaganga. Batatu muri bo ni bo bakomeretse cyane.

Mu bindi byangiritse harimo inzu n’imisarani. Ingo 62 zasenywe n’iyo mvura ivanze n’umuyaga, abazibagamo bakaba bacumbikiwe n’abaturanyi. Hangiritse n’izindi nzu zisaga 162 ariko mu buryo budakabije.

Hegitari zisaga 900 z’imyaka na zo zangiritse. Iyo myaka irimo ibigori, imyumbati, Soya, urutoki n’ibindi.

Barasaba ubuyobozi kubagoboka

Iyi mvura kandi yasenye n’uruganda rw’ikawa ari na rwo rwakomerekeje abaturage benshi bari barimo kurukoramo.

Abaturage bahuye n’ibi biza barasaba ubuyobozi ko bwabafasha bukababonera amacumbi dore ko bo ngo nta bushobozi bafite bwo kwiyubakira.

Umuyobozi w’Akarere Ka Rusizi, Kayumba Ephrem, avuga ko ibiza nk’ibi biza bitunguranye ariko ngo bagiye kuvugana na Minisiteri ishinzwe ibikorwa by’Ubutabazi (MINEMA) kugira ngo barebe niba hari icyo yabafasha.

Naho ku birebana n’imyaka yangiritse Kayumba Ephrem avuga ko bagiye kwihutira gukangurira abahinzi gutera indi myaka kuko ngo bakiri mu gihe cy’ihinga.

Izo ni zimwe mu nzu zifite ibisenge byagurutse

Uyu ararizwa n’uko inzu ye yagwiriwe n’igiti arara hanze we n’umugabo we n’abana babiri

Igiti cyaguye hejuru y’inzu abantu barimo ariko ku bw’amahirwe ntihagira ugwamo

14 bakomeretse barwariye muri iki kigo nderabuzima cya Gikundamvura abandi boherezwa mu bitaro Bya Mibilizi

Toni zirenga 22 z’ibitumbwe bya kawa zangiritse

Imirima y’imyumbati na yo yangiritse

Inkuru bijyanye:

Rusizi: Abantu 14 bakomeretse biturutse ku mvura ivanze n’umuyaga

Abaturage batandukanye hamwe n’abayobozi ntibavuga rumwe ku birebana no kwigisha abana ibijyanye n’imyanya ndangagitsina cyane cyane kuyivuga mu mazina

Ni mu gihe bamwe basobanura ko kuvuga ibijyanye n’ibitsina mu mazina yabyo ari uguta umuco bakaba batabyumva kimwe n’abemeza ko ari imwe mu nzira zo kurandura iki kibazo.

Ibi bigarukwaho na bamwe mu baturage bavuga ko ari ngombwa kubwiza abana ukuri ibijyanye n’ubuzima bw’imyororokere kandi iby’ibitsina bikavugwa mu mazina yabyo aho kubihisha cyangwa kubitsinda, nyamara abana bakazabimenyera ahandi ari na yo ntandaro yo gushukwa bagaterwa inda zitateguwe.

Uwitwa Niyigarura Pelouse ashyigikiye ko bivugwa mu mazina. Yagize ati “Kuvuga ngo iri ni izuru, uyu ni umunwa, ariko wagera ku gitsina ugahisha izina ryacyo ntibyakagombye kuba ibanga kubwira umwana izina ry’igitsina kuko hari aho azagera bakabimubwira bashaka kumusambanya. Aho iterambere rigeze singombwa kubihisha abana rwose.”

Nyamara na none hari abandi bavuga ko imyanya ndangagitsina idakwiye kuvugwa mu mazina yayo, ngo yaba inavuzwe hakarebwa ikigero cy’imyaka ku babibwirwa ngo kuko babona ari ukurushaho gusunikira urubyiruko mu kubyishoramo hakiri kare.

Ni byo Nyirampakaniye Rosarie asobanura ati “Jye nshyigikiye ko imvugo y’Abanyarwanda ikomeza kuba imvugo yiyubashye. Umunyarwanda ntagomba kuvuga nk’umunyamusozi, nk’icyihebe cyangwa ibandi tugomba gukomera ku muco wacu, umuco hari ibyo udusaba kutavuga mu ruhame, dukunze kubyita ngo ni imyanya y’ibanga.”

Jovanis Giconco,umukozi ushinzwe ubuzima bw’imyororokere mu muryango Ihorere Munyarwanda asaba ababyeyi gutinyuka kwigisha abana iby’imyanya ndangagitsina

Jovanis Giconco, umukozi ushinzwe ubuzima bw’imyororokere mu muryango Ihorere Munyarwanda urimo gukora ubukangurambaga mu Karere ka Rusizi ku ngamba zo gukumira ikibazo cy’abangavu baterwa inda, avuga ko atari byo na mba guhisha urubyiruko ayo makuru kuko badashobora kwirinda ibyo batazi.

Ati “Umwana azamenya yirinda iki utabimubwiye? Njye numva igikwiye ari uko umwana amenya buri kintu cyose uko cyitwa, bizatuma amenya ingaruka mbi cyangwa nziza ziri muri icyo kintu. Nutabimubwira we azakora ubushakashatsi bwe kandi ntazabushaka mu bitabo ahubwo azabishyira mu bikorwa.

Kwigisha urubyiruko ibijyanye n’ubuzima bw’imyororokere birasa n’ibigifite urugendo ndetse bigasaba ko hashyirwamo imbaraga dore ko na bamwe mu rubyiruko bavuga ko kuvuga ibitsina mu mazina yabyo batabikozwa.

Umwe mu baganiriye na Kigali Today utashatse kuvuga amazina ye ati “Numva atari ngombwa cyane kubwira abana ibintu nk’ibyo mu mazina yabyo cyane ko atari n’umuco kuko bitavugitse neza. Mu kinyabupfura, ni amagambo adakwiye gukoreshwa ku bana bato. Urubyiruko rukuze bazi icyo bivuze n’icyo bisobanura nta mpamvu yo kwirirwa mubivuga mu mazina yabyo.”

Ingamba zo gukomeza kurwanya inda zitateguwe mu bangavu nizikomeza bishoboka ko zizahagarika ubwiyongere bw’izo nda, dore ko buri mwaka abangavu babarirwa hagati ya 400 na 500 ari bo babarurwa muri aka karere ko batwaye inda nk’uko bitangazwa n’ubuyobozi.

Byabaye ku wa gatandatu tariki 16 Werurwe 2019 ahagana saa munani z’amanywa.
Umunyamakuru Musabwa Ephrem wa Kigali Today uri i Rusizi aravuga ko mu bantu 14 bakomeretse, batatu muri bo barembye.

Imibare y’agateganyo igaragaza ko mu byangiritse harimo hegitari enye z’imyaka n’ibisenge birenga 20 by’inzu byagurutse.

Mu Murenge wa Gitambi muri ako Karere ka Rusizi na ho haguye imvura ivanze n’umuyaga ku wa 16 Werurwe 2019 isenya inzu 15, ikomeretsa n’umukecuru mu mutwe kubera igikuta cy’inzu cyamugwiriye, ajyanwa ku kigo nderabuzima cya Mashesha.
Iyo mvura yahitanye itungo rimwe, imihanda ijya ku kigo nderabuzima cya Mashesha na yo ifungwa n’inkangu.

Mu Karere ka Rusizi hari haherutse kugwa indi mvura yari ivanze n’umuyaga yaguye ku wa kane tariki 14 Werurwe 2019 yangiza ibintu bitandukanye birimo inzu zasakambutse n’ibikorwa remezo by’umuriro w’amashanyarazi.

Umuyobozi w’Akarere ka Rusizi, Kayumba Ephrem, avuga ko bari mu biganiro n’abaturage bigamije gukumira burundu ingengabitekerezo ya Jenoside

Hari abafatwa bagahanwa ariko hari n’ababikora rwihishwa ku buryo kubatahura bitoroha. Mu rwego rwo gukumira iyo ngengabitekerezo ya Jenoside, Akarere ka Rusizi kavuga ko kagiye gukora ubukangurambaga, aho abayobozi bagiye gutangira kuganiriza abaturage mu byiciro bitandukanye mbere yo gutangira kwibuka ku nshuro ya 25 Jenoside yakorewe Abatutsi.

Umuyobozi w’Akarere ka Rusizi, Kayumba Ephrem, avuga ko ubutumwa barimo guha abaturage muri iyi minsi nibabwumva neza, ahamya adashidikanya ko bashobora kurangiza iminsi 100 yo kwibuka nta ngengabitekerezo ya Jenoside igaragaye mu karere.

Ati “Gukumira ingengabitekerezo ya Jenoside ikunze kugaragara ku batarahigwaga, icya mbere ni ukubategura mu mitima yabo, bakigishwa bihagije kugeza aho bumva ko twese turi Abanyarwanda basangiye gupfa no gukira. Icyo gihe nibagera kuri urwo rwego bazumva ko na bo bagomba kwifatanya n’abababaye kandi bumve ko babafata mu mugongo aho kumva ko bakongera kubakomeretsa.”

Abayobozi batandukanye bahuriye mu nama itegura kwibuka ku nshuro ya 25 abazize Jenoside yakorewe Abatutsi

Bamwe mu bahagarariye inzego zitandukanye bavuga ko hakwiye gushyirwa imbaraga zidasanzwe mu myiteguro yo kwibuka, kugira ngo ibyifuzwa bizagerweho. Banenga n’abanga kwitabira ibiganiro bakifungirana mu ngo zabo, kimwe n’abanga gutanga ubuhamya bw’ibyo babonye mu gihe cya Jenoside.

Ni byo uwitwa Mugabo Dani asobanura ati “Ubushize ahantu nakoreraga hari abantu bakuru b’abasaza bahagurutsaga bakabasaba gutanga ubuhamya bw’ibyo bibuka babonye byabereye aho batuye muri Jenoside, ugasanga nta butumwa na buto yaha abantu, ahubwo bamwe bakavuga ko babyibagiwe, ugasanga nk’urubyiruko biduca intege kubera ko batadusangiza ku mateka ya Jenoside babonye. Ibi na byo tubifata nko gupfobya Jenoside.”

Kayigire Vincent, umuyobozi wa Ibuka mu Murenge wa Kamembe we yagize ati “Hano muri Kamembe imyaka tuhamaze si mike ariko ikintu kijyanye n’ubwitabire kiragorana, abantu bava gucuruza aho kugira ngo bajye mu biganiro bakajya mu ngo bakikingirana mu bipangu kandi bigakorwa n’abantu bakagombye kuba ari bo batanga urugero rwiza abandi bakabareberaho.”
Mu Karere ka Rusizi, muri 2018 hagaragaye ingero z’ingengabitekerezo enye, mu gihe muri 2017 hari habonetse 10. Ibi bigaragaza ko ingengabitekerezo igenda igabanuka, intego ikaba ari uko kuri iyi nshuro hatagaragara ingengabitekerezo n’imwe.

Abagore bo mu murenge wa Bugarama bavuga ko bahangayikishijwe n’ubuharike bukabije

Nyiramporayonzi Alphonsine ni umwe mu bagezweho n’ingaruka yatewe n’umugabo we wamushakiyeho undi mugore, aho arimo kurera abana batandatu wenyine kuko umugabo we bababyaranye nta na kimwe amufasha kubera ko ubushobozi bwose abonye abufashisha umugore yamuharitse na we bafitanye abana umunani.

Nyiramporayonzi agira ati ”None se yaguharitse wabigenza ute? Urabyakira nyine ukaguma mu rugo ugatuza n’abana. Dore nk’ubu dufitanye abana batandatu ariko ntashobora kumpahira kubera ko ahahira undi mugore yamparitse bafitanye abana umunani.”

Si uyu wenyine ufite iki kibazo kuko guharikwa bisa n’ibimaze kumenyerwa muri uyu murenge. Benshi mu baharikwa ngo banga kwirirwa bajya kubivuga mu buyobozi.

Nyirazaninka Zainabu ati ”Hano mu Bugarama nta mugabo utunga umugore umwe. Iyo mubyaranye imbyaro enye cyangwa eshanu ahita avuga ati ‘uyu ntabwo akiri umugore’ akigira gushaka undi mugore tugasigara duhangayikishijwe n’abana twabyaranye.”

Ku ruhande rw’abagabo, ntibahakana iki kibazo ariko bakagihirikira ku ihame ry’uburinganire bavuga ko ritumvikanye neza mu bagore aho ngo rituma babasuzugura bityo bigatuma abatari bake bananirwa kwihangana bakajya gushaka abandi bagore.

Munyengabe Modeste ati ”Hari ijambo ry’uburinganire ryumviswe nabi ku badamu, wamubwira uti ‘kuki unyuranya n’ibintu twumvikanye mu rugo?’ Ati ‘pima gato wirebere urabizi ko baduhaye uburenganzira’ umugabo utihangana ahita yigendera agaharika.”

Twagerageje gushaka uko imibare y’ubuharike ihagaze muri aka karere, ubuyobozi buvuga ko nta bushakashatsi birakorerwa. Icyakora bamwe mu banyamabanga nshingwabikorwa b’utugari two muri iki kibaya bavuga ko bakira ibibazo byishi bituruka ku buharike aho nko ku mwaka mu kagari ka Pera bakira ibibazo bibarirwa muri 50 by’ubuharike.

Bampire Gervais uyobora Akagari ka Pera ati ”Ku mwaka sinabura kwakira nk’ibibazo 50 bishingiye ku buharike, umugore akaza ati yarantaye ,ntahahira abana,... ni ikibazo kitoroshye.”

Nsigaye Emmanuel, umuyobozi w’Akarere ka Rusizi wungirije ushinzwe imibereho myiza y’abaturage avuga ko hari uburyo burimo gukoreshwa kugira ngo babone umuti urambye w’iki kibazo.

Yagize ati “Niba umugabo abengutse umukobwa akumva agomba kumuharika mu rugo agasenya urwari rwubatswe ntituzongera kubyemera, turi kubikoranaho n’abayobozi kuva ku rwego rw’umurenge kugeza ku midugudu. Aho bizajya bigaragara bazajya basubizwa aho bavuye bareke gusenya ingo zubatswe.”

Uretse kuba iki kibazo giteza amakimbirane n’imibereho mibi mu miryango, kinatuma n’ubwiyongere bw’abaturage bukomeza kuzamuka cyane.

Madame Jeannette Kagame yasabye abitabiriye uyu munsi mu murenge wa Kagano kwirinda amakimbirane, babifashijwemo n’ubuyobozi bw’inzego z’ibanze.

Yagize ati ”Ntidukwiye kumva ko umuryango utuye ahatari intambara ariwo muryango utekannye gusa. Umuryango utekannye ni uba ufite imibereho myiza muri rusange. Ni umuryango wateguwe kandi witeguye kubana neza, usobanukiwe ko umwana ari ishema ry’umuryango. Ni umuryango kandi uha agaciro ibiganiro hagati y’abawugize haba mu bijyanye n’ubukungu, imibereho myiza ndetse n’ibindi byemezo. ndizera ko ntanumwe utakwifuza kugira umuryango nk’uwo.”

Abagore bo mu karere ka Nyamasheke, bagaragarije madame Jeannette Kagame, ko bacyugarijwe n’ibibazo by’ubukene binatuma abana b’abakobwa bashukwa bagaterwa inda imburagihe, bagasaba ko bafashwa kwegerezwa ubushobozi binyujijwe mu mishinga itandukanye kugirenga bigobotore muri ibi bibazo.

Uwitwa Nyirangirimana yagize ati ”ikintu kituzitiye cyane ni ubukene ariko ufite ukuntu witeza imbere wakora ukagera kure. Ibyo bituma abana bagwingira abandi bakajya gushaka uko biga, abagabo bakabashuka bakabatera inda.”

Madame Jeannette Kagame yasabye abayobozi gushakira umuti iki kibazo mu bagira uruhare mu kuzibatera baba abo mu rungano rwabo ndetse n’abagabo babashuka.

Ati ”umwaka ushize ubwo twari turi mu gikorwa nk’iki mu karere ka Nyabihu hari ibyo twari twaganiriyeho. Ndagirango mbisubiremo kuberako urugendo rukiri rurerure umukoro wambere kwari ugushaka umuti w’ikibazo cy’abangavu baterwa inda, ingaruka bibagiraho haba mu gihe cyo kubyara no kurera b’abana babakomokaho. Mu gushaka umuti rero dukomeze gutekereza ku muzi w’iki kibazo duhereye kubantu babatera inda baba abo bangana cyangwa abagabo babashuka babaruta.”

Minisitiri w’uburinganire n’iterambere ry’umuryango Solina Nyirahabimana, nawe yagarutse kuri iki kibazo gisa n’igihatse ibindi mu bibangamiye umuryango nyarwanda kuri ubu.

Ati ”dufatanyirize hamwe abagore n’abagabo dukemure ibibazo biri mu muryango. Muri byo navuga gukumira no kurwanya itwita ry’abangavu no kubashora mu busambanyi, kurwanya imirire mibi n’igwingira riri mu bana bato tugafasha abagore kugera kuri za serivisi z’imari kugira ngo babashe kwiteza imbere.”

Umuyobozi w’akarere ka Nyamasheke Kamali Aime Fabien, yagaragaje ko ibibazo byugarije iterambere ry’umuryango muri aka karere aho abana basaga 400 b’abangavu bari munsi y’imyaka 20 batewe inda imburagihe.

Ingo zibana nabi mu makimbirane zikaba zigera kuri 663 ndetse n’ingo 1665 zibana zidasezeranye ibi byose bikaba ari inzitizi y’iterambere.

Insanganyamatsiko y’umunsi mpuzamahanga w’umugore y’uyu mwaka yagiraga iti ”Dufatanye urunana twubake umuryango utekanye.”

Depite Mporanyi arakangurira abana babyaye kuboneza urubyaro hagamijwe kudakomeza kongera ibibazo mu bindi

Ibi bivuzwe mu gihe umubare w’abangavu batwara inda ukomeje kuzamuka. Ibyo kuboneza urubyaro kandi bishyigikiwe na bamwe mu babyeyi bemeza ko uburyo buhari bwizewe bwo guhagarika iki kibazo ari uko aba bangavu baboneza urubyaro.

Mu karere ka Rusizi, ku mwaka abana babarirwa hagati ya 450 na 500 ni bo imibare igaragaza ko batwara inda kandi bakaziterwa ahanini n’abagabo bubatse.

Umushinga witwa “Baho neza“ ushyirwa mu bikorwa n’umuryango uharanira iterambere ry’ubuvuzi HDI (Health development initiative) ugaterwa inkunga na Minisiteri y’ubuzima ibinyujije mu mbuto Foundation, umaze kubona iki kibazo watangije gahunda yo kubakangurira kuboneza urubyaro.

Depite Mporanyi Theobald uri gukorana n’uyu mushinga nk’impuguke mu bijyanye n’ubuzima bw’imyororokere asaba uru rubyiruko ko mu gihe kwifata byaba byanze burundu, bakwiye kuyoboka gahunda zo kuboneza urubyaro nibura bakareka gukomeza guhangana no kurera abo badashoboye kurera utaretse no guteza ababyeyi babo ibibazo.

Ati ”aba bana turagirango tubashishikarize kuringaniza urubyaro kuko bo barabyaye. Biragaragara n’ubundi ko nibataringaniza ejo bazongera bakabyara. Ikindi badufashe bagaragaze abakoze ibyo byaha bahanwe nkuko amategeko abiteganya.”

Bamwe muri aba bana bavuga ko barangije kuboneza urubyaro bakimara kubyara kuko ngo batakomeza kwihanganira ingorane bahuye nazo bagitwite.

Umwana wabyaye akiri muto ufite imyaka 14, umaze ibyumweru bibiri gusa abyaye kandi bamubaze, yavuze ko Inda yayitewe n’umugabo w’umumotari ufite imyaka nka 40.

Uyu mwana wabyaye, avuga ko nyuma yo guhura n’ibibazo byinshi agitwite, akimara kubyara yahise asaba ko bamuringaniriza urubyaro “namaze kubyara mbasaba ko bagomba guhita bandinganiza urubyaro kugirango ntazongera kugwa mu bishuko nkaba nabyara undi mwana.”

Mugezi we nawe ufite imyaka 15 yungamo ati ”nubwo kuringaniza bikunda kugira ingaruka zigwa nabi bamwe kubera imiterere y’imibiri yabo, aho kugirango nkomeze kubyarira iwacu njyewe nahisemo kubikora ubu mfite agashinge ko mu kuboko k’imyaka itanu nishira nzashyiramo akandi.”

Ni ingingo yakiriwe neza n’ababyeyi b’aba bangavu bavuze ko mbere batabyumvaga ariko ko na bo ubu babona ari cyo gisubizo kirambye gihari.

Bahati Deo ati ”mfite umukobwa wanjye wabyariye mu rugo na mukuruwe yabyariye mu rugo. Ni ukuri pe ntabwo tworohewe n’iki kibazo. Nk’ababyeyi aho kugira ngo abana bakomeze kubyarira imuhira kandi ntabushobozi dufite baboneza urubyaro.”

Simbarikure Emmanuel yungamo ati ”umwana yatewe inda afite imyaka 16 ayiterwa n’umugabo mukuru. Ni ikibazo gihangayikishije ababyeyi benshi, ariko aho kugirango bakomeze kubyara bakiri bato baringaniza urubyaro aho kudushyiraho imizigo tudashoboye kwikorera.”

Ubuyobozi bw’akarere ka Rusizi bwo buvuga ko uyu mubare uzamuka bitewe n’uko aba bangavu n’imiryango yabo batitabira gutanga amakuru kuri bene aba bagabo ariko ngo ubuyobozi bugiye kubihagurukira.

Abana b’abangavu bari munsi y’imyaka 18 bakomeje guterwa inda zitifujwe bikagira ingaruka mbi ku bazitewe ndetse zishobora no kubakurikirana ubuzima bwabo bwose.

Itsinda rya Baho neza riri gukora ubu bukangurambaga na ryo rikaba rigaragaza ko rifite impungenge z’uburyo ubukungu igihugu gifite budahura n’uburumbuke bw’abaturage kuko bagenda barushaho kwiyongera.

ibyishimo byari byose ku maso ya Donath na Mukamuganga Monique nyuma yo gusubizwa uburenganzira bari bambuwe

Ni nyuma y’amezi abiri Kigali Today ibagejejeho inkuru ifite umutwe ugira uti ‘Nyamasheke: Amafaranga ibihumbi 15 yatumye ubukwe budataha’, aho Pasitori Ntakirutimana Samuel wa Paruwasi ya Mwito yanze gushyingira abageni kuko ngo bari bakererewe kubera imvura yaguye bakugama, ndetse bakabura amande y’amafaranga bari baciwe.

Nyuma yo kwishyingira kw’aba bageni byakomeje gukurura umwuka mubi mu bayoboke b’iyi paruwasi ya mwito ndetse bamwe bakavuga ko byabagoraga kumva ubutumwa butangwa na Pasitori wayo kubera ko yanze gushyingira abageni, kugeza aho bishyingiye.

Mu mpera z’iki cyumweru gishize tariki ya 23 Gashyantare 2019 nibwo aba bageni bongeye kuvugisha Kigali Today bavuga ko abanze kubasezeranya babasabye imbabazi, ndetse bakanabakorera ubukwe butangaje kuko ibyasabwaga byose itorero ryabyishatsemo.

Mu kiganiro Kigali Today, yagiranye n’aba bageni Sibomana Donath yagize ati”nejejwe n’ibyiza ndimo kuko ikibazo narimfite cy’ubukwe butagenze neza ubushize cyarangiye, kandi bikaba byakoranywe umutima w’urukundo.

Pasitori ari gushyingira abageni bari bavukijwe uburenganzira bwabo

Kugira ngo bigende neza itorero ryabigizemo uruhare rukomeye kuko n’ibi turi kunywa ni bo babiguze. Ibinyobwa byatanzwe n’itorero, ibiribwa bitangwa na Pasitori wagombaga kudushyingira.”

Umufasha we Mukamuganga Monique yungamo ati ”Ndi uwo muri uru rugo. Ni jye wari wateguye ubukwe ubushize biranga ariko uyu munsi Imana yashimye ko buba, kuko uko twabyifuzaga mu gihe cyashize ni ko byagenze kandi ubuyobozi bw’itorero bwagiye buza kudusaba imbabazi kenshi binyereka ko byari byabakoze ku mutima. Nkaba nshima n’ukuntu bose baje kwizihiza ubukwe bwacu.”

Bamwe mu baturage bari batashye ubukwe bw’ubushize bavuga ko bari barazinutswe ubutumwa butangwa n’uyu mu pasitori watumye abayoboke be bishyingira, icyakora kuba yisubiyeho agasaba imbabzi ndetse agafata n’icyemezo cyo kongera kubakorera ubukwe, ubu amahoro ngo arahinda.

Nyirandayambaje Pascasie ati ”Uwo munsi twarize amarira menshi turamubwira tuti ambika umugabo wawe impeta nawe akwambike indi mwitahire. Abantu benshi ntabwo twafashwaga kubera ayo makosa yari yakozwe n’itorero.”

Pasitori Ntakirutamana Samuel nyuma yo gutegekwa gushyingira aba bageni ni we wenyine utari wishimye muri ubu bukwe

Pasitori Ntakirutimana Samuel, wagize uruhare mu migendekere mibi y’ubu bukwe ubushize, avuga ko nyuma y’umwuka mubi wagumye gututumba muri paruwasi abereye umuyobozi, ngo yasanze hari amakosa yakozwe ku mpande zombi, bituma yegera abageni, basabana imbabazi nyuma yaho nk’itorero bagerekaho kumukorera ubukwe ku mutungo w’itorero.

Ati ”Twakomeje kuganira kuko byabaye ikibazo gikurura ubwumvikane buke hagati y’itorero n’uriya muyoboke kuko yavugaga ko bamuvukije uburenganzira bwe, twumvikana ko ku mpande zombi haba harabaye amakosa twemera kubabarirana, umukwe ababarira itorero kubera ko ryanze kumushyingira itorero na ryo rimubabarira ubukererwe ari na yo mpamvu itorero ryamuteye inkunga ubukwe buraba.”

Hari hashize igihe cy’amezi abiri ubukwe bwa Sibomana Donath na Mukamuganga Monique buburijwemo, bituma bishyingira ariko itorero ryabahanaguyeho icyo cyaha ribakorera ubukwe bwiza kubera uruhare ryari ryabigizemo rikanga kubashyingira.

Ubwo umunyamakuru yabasuraga mu rugo rwabo agahinda ari kose kubera kwangirwa gushyingirwa

Uyu ni Pasitori watumwe n’ubuyobozi bukuru bw’itorero muri ubu bukwe

Minisitiri w’uburinganire n’iterambere ry’umuryango Solina Nyirahabimana, arasaba abagize umuryango kujya bicara bakaganira ku muryango

Bimwe mu bibazo by’ingutu bihangayikishije abaturage bo muri aka karere, harimo iby’abagabo bubatse batera inda abana b’abakobwa, ibiyobyabwenge byatwaye imitima ya benshi ndetse no kubura umwanya wo gukurikirana ubuzima bw’imiryango.

Ibi byose bikaza kwitura ku buzima bw’abagize umuryango cyane cyane abana bikabakururira indwara ziturutse ku mirire mibi utaretse no guterwa inda ku bangavu kubera kubura uburere bwuzuye mu muryango.

Musabyemariya Odette ati ”Umubyeyi arafata inzira akajya gukorera urufaranga aho kugira ngo aruhahiremo abana, agahitira mu kabari abana bakajya kwirirwa batoragura amashashi. Urumva ko nta kuntu abo bana batagira imibereho mibi.”

Nyirashyirambere Alphonsine ati ”mwumvise ko umugabo agomba gutunga umugore umwe… ibyo kurarana n’umugore umwe ejo akararana n’undi biri kuduteza ibibazo bikomeye mu muryango.”

Nyiraneza Consolee yungamo ati ”noneho njyewe nukuri ndakubwira ko ahantu ntuye umukobwa wa muramukazi wajye yabyaye, ubu ubuzima bwe mbona ntakigenda. Undi nawe w’umuturanyi ayiterwa n’umugabo wubatse ubu ari hafi kubyara mbese ni ibibazo bikomeye.”

Ababyeyi bavuga ko hakwiye gukazwa ibihano kubagira uruhare rwo kwangiza umuryango nyarwanda

Ku rundi ruhande bamwe muri aba baturage basanga impamvu iki kibazo gikomeza gukaza umurego ari ibihano bisa n’aho bijenjetse ku babiteza cyane cyane abagabo batita ku nshingano zabo ahubwo bagakomeza kwiruka ku bangavu.

Mujawamariya Francine ati ”igituma babyitwaramo gutyo ni uko badahanwa. Ariko mubafunze byadufasha kuko abagabo n’abasore bazitera bagira ubwoba.”

Kuri ibi byose, Minisitiri w’uburinganire n’iterambere ry’umuryango Solina Nyirahabimana yasabye abagize umuryango gusubira ku isoko bagakurikiza indangagaciro nyarwanda bakagira umwanya wo kwicara bakaganira ku biteza umuryango imbere aho kuwureka ngo wandagarire mubitawuhesha agaciro.

Ati ”Igikomereye umuryango nyarwanda muri iyi minsi ni uko usanga abantu baradohotse ku ndangagaciro. Abagabo bamwe bajya kwangiza abana bato b’abakobwa ugasanga nabo bafashe iyambere mu gukora imibonano mpuzabitsina imburagihe mbese nta mwanya na muto wo kuganira ibyubaka umuryango. Icyakemura ibi bibazo ni ukwicara mukareba ibyabagirira umumaro bibateza imbere kugirango mutekane.”

Tariki ya 8 Werurwe buri mwaka u Rwanda rwizihiza umunsi mpuzamahanga w’umugore. Mu karere ka Nyamasheke ni ho uzizihirizwa kuri iyi nshuro ukazaba ufite insanganyamatsiko igira iti “dufatane urunana twubake umuryango utekanye”.

Mbere urubyiruko ngo rwasuzuguraga ubuhinzi bw’icyayi ariko muri iki gihe barabwitabiriye ku bwinshi kuko cyahawe agaciro

Nyuma y’umwaka umwe bahugurwa, abasaga 1500 barimo urubyiruko 600 bamaze kubona impamyabushobozi yo kwita kuri iki gihingwa babifashijwemo n’uruganda rw’icyayi rwa Shagasha.

Abenshi muri uru rubyiruko ni abarangije amashuri yisumbuye. Bavuga ko babonaga ababyeyi babo bahinga icyayi bakabafata nk’ababuze icyo bakora ngo kuko nta gaciro cyari gifite.

Umwe muri bo witwa Niyondamya Isaie yagize ati “Impamvu twabisuzuguraga ni uko wabonaga nta gaciro icyayi gifite. Umubyeyi wari ufite icyayi kugira ngo nibura abashe kwishyurira umwana umwe amafaranga y’ishuri byaramugoraga.”

Mugenzi we witwa Niyigena Jean de Dieu na we avuga ko mbere icyayi nta gaciro cyari gifite ati “Ikilo baduhaga amafaranga 30 ariko ubu kigeze ku ijana na mirongo..., urumva ko nta kibazo kuba umusore yagihinga ni na yo mpamvu tumaze umwaka wose twiga kugihinga.”

Bamaze umwaka bigishwa uko bahinga icyayi

Ubu noneho uru rubyiruko ruravuga ko iyi myumvire rumaze kuyihindura nyuma yo kubona ko icyayi gishobora gutunga umuntu ndetse kikanamukiza, ubu bakaba bavuga ko bari gufatanya n’ababyeyi babo kugihinga no kugisigasira haba mu bwiza ndetse no mu bwinshi.

Urwo rubyiruko ruvuga ko ubu icyayi bacyongereye agaciro ku buryo ntawe utakwifuza kugihinga.

Niyondamya ati “Ubu umuntu ufite icyayi umwana arajya mu ishuri umubyeyi akaba yafata n’inguzanyo muri Sacco akajya yishyura akoresheje icyayi. Njyewe papa ampaye umunani w’isambu nahafata nkahahinga icyayi.”

Urwo rubyiruko ni bamwe mu bantu 1581 biganjemo abarangije amashuri yisumbuye bari bamaze umwaka bahugurwa mu cyiswe ishuri ry’abahinzi mu murima, farmers Field school(FFS) babifashijwemo n’uruganda rwa Shagasha.

Abakuze bari bamaze igihe bahinga icyayi bishimira ko bagiye kunganirwa n’urubyiruko

Shyaka Ermenigilde, umuhuzabikorwa w’impuzamashyirahamwe y’amakoperative yabahinzi b’icyayi, FERWACOTHE, avuga ko kwinjiza urubyiruko mu buhinzi bw’icyayi bizatuma gikomeza kwitabwaho kinyamwuga kurushaho.

Ati “Tugira ikibazo abasore bacu iyo bamaze kwiga bose baba bumva bagomba kwirunkankira mu mujyi ariko aba bamaze guhugurwa bamenye ubwiza bw’icyayi uretse ko kirimo n’amafaranga, murabizi ko ama koperative yacu ni abasaza n’abakecuru gusa urumva ko tuzagira ababasimbura bafite imbaraga kandi babihugukiwe bizatuma kandi amahame ya koperative yihuta kubera ko azaba arimo abantu bumva vuba.”

Ni ku nshuro ya kane igikorwa cyo guhugura abahinzi no kubaha impamyabushobozi kiba, kuva iyi gahunda yatangira muri 2015 ikaba imaze kongerera ubumenyi mu buhinzi bw’icyayi abarenga ibihumbi bitanu.

Abaturage basaba ko ubufasha butajya butangwa hakurikijwe ibyiciro by’ubudehe

Minisiteri y’Ubutegetsi bw’Igihugu, Minaloc, irimo gukusanywa ibitekerezo by’abaturage bizagenderwaho mu kuvugurura ibi byiciro bimaze hafi imyaka itatu bishyizweho. Icyakora bamwe mu batuye mu Karere ka Rusizi basanga imyaka itanu ari yo ihagije kugira ngo umuntu abe agize aho ava n’aho agera.

Ni byo uwitwa Nsengiyumva Vincent yasobanuye ati “Imyaka itanu ishize birashoboka ko umuntu yaba agize aho yivana n’aho ageze, hari ukuntu umuntu yaba yarahinze imyaka akayigurisha akiteza imbere bityo akaba yazamuka mu yindi ntera.”

Ikindi aba baturage basaba ni uko ubufasha buhabwa abatishoboye butazajya bugendera ku cyiciro cy’ubudehe umuntu arimo kubera ko hari ababirenganiramo, bakifuza ko abakene bashakirwa ubundi buryo bajya bafashwamo bitarinze kunyuzwa mu byiciro.

Umuyobozi w’Akarere ka Rusizi, Kayumba Ephrem, we asaba abaturage kutarebera ibyiciro by’ubudehe mu ndorerwamo yo gufashwa gusa.

Umuyobozi w’Akarere ka Rusizi Kayumba Ephrem avuga ko abaturage batagomba kurebera ibyiciro by’ubudehe mu bufasha gusa

Ati “Bagomba kumva ko ibyiciro by’ubudehe bidufasha nk’ubuyobozi mu bijyanye no gukora igenamigambi rifasha mu gushyira mu bikorwa imishinga izamura imibereho y’abaturage kuko ikigenderewe ni uko umuturage wese yabona amahirwe yo kuba yabona iby’ibanze byatuma akora akiteza imbere kuruta uko yahora ategeye amaboko Leta.”

Ibyiciro bine by’ubudehe byari bisanzweho, Leta y’u Rwanda yabishyizeho kugira ngo hakorwe igenamigambi nyaryo ,abatishoboye babashe gufashwa gutera intambwe.

Intego nyamukuru yari iy’uko hatagira n’umwe uguma munsi y’umurongo w’ubukene ndetse buri wese agaharanira kuva mu cyiciro cyo hasi ajya mu cyisumbuyeho.

Icyakora muri iyi myaka itatu bimaze, abaturage ntibahwemye kugaragaza ko hari ababishyizwemo batabigizemo uruhare ndetse bakavuga ko byagiye bibagiraho ingaruka.

Baganiriye ku buryo bwo kwimakaza umuco wo gukunda iby’iwabo kurusha ibiva mu mahanga ya kure

Intumwa z’umuryango Panafrican Movement mu Rwanda ubwo zari mu Karere ka Rusizi zavuze ko nta kabuza igihe kimwe Afurika izaba imwe kandi ikigira.

Pasiteri Byamungu Lazaro unahagarariye impuzamatorero mu Karere ka Rusizi witabiriye ikiganiro intumwa za Panafrican Movement zagiranye n’abanyamuryango bayo bo mu Karere ka Rusizi yagaragaje ko u Rwanda rukataje mu kwishakamo ibisubizo ariko bikaba bibi ku bindi bihugu bigaragaza ko bitarumva iyi politiki.

Yagize ati "Ingamba zafashwe ni nziza ariko mbona abayoboye ibihugu ari bo bafite ikibazo kuko usanga hari aho bamwe babyemera kandi bakagerageza kubishyira mu bikorwa ariko ugasanga abandi batabyitayeho ndetse batanabishyigikiye ugasanga bagikomeje inzira y’ubukoroni yo kutigira. Urugero natanga ni nko guca imyenda ya Caguwa mbona mu Rwanda tugerageza ariko iyo urebye ibindi bihugu by’ibituranyi usanga nta na kimwe gikorwa."

Uwitwa Sibomana Aimé we yagize ati "Urebye aho ubona bigipfira ni uko abantu batarakunda cyane ibikorerwa mu Rwanda cyangwa cyangwa ibikorerwa muri Afurika. Icya mbere gikenewe ni uko tugomba kubishishikariza abandi buri wese akumva ko iby’iwabo ari byo bifite agaciro kurusha ibyaba bivuye ahandi i Burayi no muri Amerika."

Iki kibazo kimwe n’indi myumvire ya bamwe mu Banyafurika bahora bararikiye ubuzima bw’ i Burayi ni bimwe mu byo Gasore Séraphin, umwe mu ntumwa za Panafrican Movement yashingiyeho ubutumwa bw’uyu muryango bushingiye ku kubasaba gukomeza guhindura imyumvire abandi bakabigiraho.

Yagize ati "Imyumvire yo gukoresha iby’iwacu tukemera neza ko bishobora gukemura ibibazo nk’uko ibiturutse ahandi bibikemura ntirakwira mu bantu. Ntabwo ishema ry’umunyarwanda ari ukwambara ibyo abandi bamukuburiye ni na yo mpamvu twaje aha kugira ngo dushake ibisubizo by’ibibazo bihari."

Mu 1900 nibwo Umuryango Pan African Movement washinzwe hagamijwe kurandura akarengane n’ihohoterwa ryakorerwaga Abanyafurika. Mu Rwanda uyu muryango watangijwe mu mwaka wa 2013.

Mu kwezi kwa gatanu uyu mwaka wa 2019 ni bwo hazizihizwa Umunsi Nyafurika w’Ubwigenge (African Liberation Day) ukazabanzirizwa n’icyumweru cyahariwe uyu muryango.

Ibi byose ni ugukomeza kwereka Abanyafurika ko ubuzima bifuza mu bindi bihugu babushakiye iwabo na ho babubona bikaba bigenda bigaragarira mu ngero nka ’Made in Rwanda’, imwe mu nzira yo kwihesha agaciro u Rwanda rwahisemo ruteza imbere ibikorerwa mu Rwanda kugira ngo rudakomeza gukuburirwa n’amahanga.

Inkingi zizamanikwaho insinga z’amashanyarazi zamaze gushingwa

Ayo matara agiye gushyirwa muri pariki y’igihugu ya Nyungwe azajya amurikira abakoresha umuhanda uca rwagati muri iryo shyamba, akaba atari asanzwemo mu myaka yose iyi pariki imaze.

Iyo nkuru yakiranywe akanyamuneza n’abakoresha umuhanda Rusizi – Nyamagabe unyura muri iyi pariki ya Nyungwe, cyane cyane abatuye mu Murenge wa Bweyeye muri Rusizi, dore ko bo bafite umwihariko wo kuba muri Nyungwe ari ho gusa banyura bashaka kujya mu bindi bice by’igihugu.

Mu gihe cya nijoro ngo bagorwaga n’umwijima n’impungenge z’umutekano wabo, dore ko imodoka imaramo umwanya munini nibura isaha n’igice.

Abakoresha umuhanda Pindura -Bweyeye bakunze kunyura muri iri shyamba bishimiye iyo nkuru

Umwe muri bo witwa Ndayizeye Fidèle yagize ati “Ririya shyamba dukunda kurinyuramo tugiye i Nyamagabe, i Rusizi mu mujyi n’ i Kigali tugiye gushaka imibereho. Kuba bagiye gushyiramo amashanyarazi ni ibintu byiza cyane umumotari iyo atuvanye I Bweyeye bwije, moto ishobora gupfumuka akayihoma habona. ikindi tuzabasha kunyuramo nta nyamaswa twikanga cyangwa undi muntu wakugirira nabi kuko hari igihe tumanukamo n’amaguru.”

Mugenzi we witwa Ntwayingabo Felix we yagize ati “Nize i Kamembe hari igihe twanyuraga hariya mu ishyamba n’amaguru hatabona umuntu akagenda yikanga imbere n’inyuma ariko ubu noneho bigiye koroha kuko tuzajya tugenda tureba imbere n’inyuma ntacyo twikanga. Ikindi umuntu yakwishimira ntabwo Bweyeye yakundaga kugendwa ariko kubera ruriya rumuri bazajya bagira amatsiko yo kuhagera. Mpamya ko tuzisanga turi mu bandi kurusha uko turiho ubu.”

Ntwari Joseph, umuyobozi w’ikigo gishinzwe gukwirakwiza ingufu REG mu Karere ka Rusizi, yemeje ko bitarenze amezi abiri, uyu muhanda uzaba ucaniwe uhereye ku gice cya Rusizi ukageza aho ishyamba rirangirira i Nyamagabe ndetse no kuva ahitwa i Pindura rwagati muri Nyungwe werekeza mu Murenge wa Bweyeye.

Ntwari Joseph, umuyobozi w’ikigo gishinzwe gukwirakwiza ingufu REG mu karere ka Rusizi, ahamya ko bitarenze amezi abiri amatara yo ku muhanda azaba ageze muri Pariki ya Nyungwe

Ati “Kuhashyira amashanyarazi bizatuma habona ndetse n’itumanaho ryiyongere ku buryo bizateza imbere ubukungu bw’abatuye Bweyeye ndetse n’abandi bose bakoresha ririya shyamba rya Nyungwe. Nko mu gihe cy’amezi abiri amashanyarazi azaba yamaze kugeramo. Ubungubu amapoto yarangije gushingwa igisigaye ni ukugenda duhuza imiyoboro.”

Muri ishyamba rya Nyungwe ku muhanda wose Rusizi-Nyamagabe ndetse na Pindura - Bweyeye ahazacanirwa hareshya n’ibilometero 97.

Gukemura ikibazo cy’amatara ku muhanda wo muri Nyungwe ngo bizajyana no gukemura ikibazo cy’itumanaho, ndetse cyo cyanatangiye gukemuka hamwe nahamwe. Iccyo na cyo ngo cyari kibangamiye abahanyura kuko iyo umugenzi yinjiraga ishyamba rya Nyungwe, telefone yahitaga iva ku murongo.

Abagize Inama Njyanama bemeje ingengo y’imari ivuguruye

Ubuyobozi bw’Akarere ka Rusizi buvuga ko Amafaranga menshi yatumye iyi ngengo y’imari izamuka yaturutse ku kubasha kwinjiza neza imisoro n’amahoro nk’uko kari kabihize. Ni byo bisobanurwa n’Umuyobozi wungirije ushinzwe ubukungu mu Karere ka Rusizi, Kankindi Leoncie.

Yagize ati “Amafaranga yiyongereye hari azaturuka mu misoro n’amahoro. Ayo akarere gasanzwe gakura mu misoro n’amahoro byagiye bigaragara ko aziyongera ukurikije uko umujyi ugenda waguka. Igishoboka cyose cyatekerejweho kandi ntekereza ko n’ubundi bizakomeza kwiyongera nkurikije uko umujyi ugenda ukura.”

Perezida wa Njyanama yashyize umukono ku nyandiko yemeza ingengo y’imari y’akarere ivuguruye imbere y’umunyamategeko w’akarere

Mu gihe uyu muyobozi yishimira ko umuhigo wo gukusanya imisoro n’amahoro bakomeje kuwesa neza, Perezida w’inama Njyanama y’aka karere, Mvuyikongo Jean Claude, asaba ubuyobozi bwako kwiga izindi nzira zo kubonamo amafaranga bakazabasha kuzamura iyi ngengo y’imari.

Ati “Ntabwo tureba imisoro gusa tureba n’ibindi bikorwa akarere kakuramo amafaranga yakunganira ingengo y’imari. Hanatangiwe kuganirwa ku ngengo y’imari ya 2019 -2020, aho ni ho hazagaragarira ibindi bikorwa byunganira imisoro ikomoka mu karere.

Inama Njyanama y’Akarere ka Rusizi yemeje ingengo y’imari yako ivuguruye, iva kuri 17, 941, 832, 099 igera kuri 21, 614, 779, 559 bivuze ko hiyongereyeho 3, 672, 947, 460. Imishahara y’abarimu yiyongereyeho 10%, n’izamurwa mu ntera ntambike ku bakozi b’akarere ni bimwe mu bizatwara amafaranga menshi kuri aya yiyongereyeho.

Abayobozi b’inama njyanama y’Akarere ka Rusizi bayoboye inama jyanama yo kwemeza ingengo y’imari ivuguruye

Abahinzi barerekana uko umuceri wabo warwaye

Nyuma y’aho abaturage bahinga umuceri mu gishanga cya Kamiranzovu mu karere ka Nyamasheke bagaragarije ikigo cy’igihugu cy’ubuhinzi (RAB) ko muri iki gishanga hari igice cyacyo kitacyera neza nka mbere aho bakeka ko byaba biterwa na nyiramugengeri ishobora kuba iri hasi, RAB yamaze kubemerera ko igiye kohereza inzobere kugenzura ikiri kubitera ndetse no kugishakira umuti.

Aba bahinzi bavuga ko mu gihembwe cy’ihinga gishize umusaruro watubye ku buryo bugaragara cyane cyane ku bahinga muri zone ya Rurangazi muri iki gishanga. Rukeribuga Jacques avuga ko yezaga ibiro bibarirwa muri Magana atatu none ngo bishobora kuzagera mu ijana naho Mukamudenge Clothilde wezaga ibilo 400 ngo nibura azeza kimwe cya kabiri cyabyo gusa.

Ati” Umuceri warapfuye. Twari dusanzwe tweza tukabona umusaruro ariko twayobewe indwara yajemo iturutse hasi mu mizi. Igihe cyo kurabya imbuto ziruma... najyaga neza ibiro bisaga 400 ubu nineza byinshi nzasarura 200.”

Aba bahinzi bavuga ko mu kwezi kwa cumi k’umwaka ushize mu gihembwe cy’ihinga A, ari bwo bahinze ariko umusaruro ukaba muke cyane.

Abahinzi basobanurira abayobozi iby’uburwayi bwatangiye gufata umuceri bahinga mu gishanga cya Kamiranzovu

Icyo gihe ngo bahise biyambaza akarere na ko kabaha ishwagara yo gushyiramo bisa n’ibyoroha. Umwero wakurikiyeho uza wisumbuyeho ariko n’ubundi ikibazo nticyakemuka.

Ubwo Minisitiri w’Intebe yasuraga uturere twa Nyamasheke na Karongi mu ntangiriro z’icyumweru dusoza, iki kibazo ni kimwe mu byo abaturage bamugejejeho.

Rukeribuga Jacques ati” imiceri yacu yose yarapfuye ubu twarahombye cyane. Nezaga ibiro 350 ariko ubu nzeza ibiro 120. Dutekereza ko ikibazo ari ubutaka bubi... za nyiramugengeri zirazamuka n’amazi byakubitiraho n’ubushyuhe umuceri ugashya.”

Minisitiri w’intebe yahise agishinga RAB, umuyobozi mukuru wayo Dr Karangwa Patrick asubiza ko bagiye kohereza abashakashatsi vuba.

Ati” Itsinda ryacu ry’abashakashatsi rigiye kubikurikirana. Tugiye kureba ikibitera n’umuti ukenewe ngo ikibazo kirangire. Ntabwo dushobora kubareka gutyo ngo birangire.”

Igishanga cya Kamiranzovu gihingwaho umuceri ku buso bungana na hegitari 115 zose hamwe. Ahangana na hegitari imwe ni ho havugwa iki kibazo, gifitwe n’abaturage basaga 50. Muri rusange, abagera ku 1000 ni bo bagihingamo cyose kikaba gisarurwa mo toni 690 iyo cyeze neza ku isizeni imwe.

Minisitiri w’Intebe yaganiriye n’abigira kuba abarimu kuri bimwe mu byo babateganyiriza

Ibi babyijeje Minisitiri w’Intebe, Dr Ngirente Edouard, nyuma yo kubabwira imigambi bafitiwe yo kuzajya biga amashuri ya Kaminuza ku buntu, kugabanyirizwa amafaranga y’ishuri ndetse no kongererwa umushahara.

Ku wa 11 Gashyantare 2019, nibwo aba banyeshuri basuwe na Minisitiri w’intebe Dr Ngirente Edouard, ndetse n’abandi baminisitiri barimo abafite inshingano mu burezi. Minisitiri w’intebe yabwiye abitegura kuba abarimu ko Leta y’u Rwanda ishyize imbaraga ku burezi aho igiye gutangira gufasha umwarimu kwiteza imbere mu buryo butandukanye, burimo kuzajya bishyurirwa amashuri ya Kaminuza kugera ku rwego rw’icyiciro cya gatatu cya Kaminuza (Masters).

Yagize ati “Twemeje ko tugiye kongera imbaraga mu mashuri ya TTC tukongera imbaraga mu mashuri mujya kwigiraho kwigisha n’umushahara wa mwarimu twawongeyeho udufaranga turinganiye, nka Leta, uburezi tubushyizemo imbaraga nyinshi cyane.”

“Abana baziga muri TTC bagiye kuzajya bahabwa amahirwe yo kwiga kaminuza dushingiye ku manota aho muzajya mwigisha imyaka itatu mu mashuri abanza hanyuma mujye kwiga kaminuza ku busa bya bindi bita inguzanyo mwe ntimuzajya muyishyura mu gihe abandi bayishyura.”

Abanyeshuri biga muri za TTC, bavuga ko bagiye kongera ingufu mu myigire yabo kubera ibyiza Leta yabashyiriyeho

Twagirayenzu Emmanuel yiga mu Nderabarezi (TTC) i Rubengera aho atozwa kuzaba umwarimu. Avuga ko mbere basa n’aho bari baratereranywe kandi nyamara bari mu bantu b’ingenzi bakwiye gutekerezwaho, icyakora ubu icyizere bari bamaze iminsi baratakaje ngo cyongeye kugaruka.

Ati “Byaratubabazaga kuko twabonaga uburezi nta gaciro buhawe ariko tugendeye ku byo Minisitiri atubwiye biradushimishije cyane abenshi bumvaga ko kwiga uburezi atari byiza bitewe n’uko bahembwa make kandi bakaba batarigaga kaminuza. Amafaranga yongeweho aradushimishije cyane kuko tubikora tubikunze. Minisitiri atwijeje ko umuntu wiga uburezi azajya arihirwa na Kaminuza biradushimishije cyane.”

Mugenzi we witwa Uwizeyimana we yagize ati “Twakundaga kwibaza tuti niba mwarimu ari we wagejejeho abantu bose bakomeye ubumenyi kuki ari we uhabwa amafaranga make ugereranyije n’abandi? Ariko ubu twishimiye ko yongerewe agaciro.”

Bamwe mu banyeshuri biga uburezi bishimiye uburyo Leta irimo kugenda ibatekerezaho

Inama y’abaminisitiri yateranye tariki ya 28 Mutarama 2019, yemeje ko amashuri nderabarezi azajya aterwa inkunga zifasha abayigamo zirimo kugabanyirizwa amafaranga y’ishuri. Ikindi kandi ni uko nyuma yo kurangiza amashuri nderabarezi bazajya bakora imyaka itatu bahite bajya kwiga kaminuza batishyura hagendewe ku manota.
Abazajya barangiza bafite amanota meza bazajya bahabwa andi mahirwe yo gukomeza (Masters) mu gihe biyemeje gukomeza mu burezi ndetse n’umushahara ukiyongeraho 10%, ukwoyongera k’uwo mushahara bikazatangirana n’ukwezi kwa Werurwe 2019.

Abayobozi batandukanye bari kwiga ku bibazo abahinzi babatuye

Abo bahinzi bagaragaje ko mu gihe ubuyobozi bubasaba guhinga bagasagurira amasoko, bo nk’abahinzi babigeraho ariko nyamara umusaruro wabo ukabura isoko, ryanaboneka rikaboneka bitinze, umusaruro warangiritse cyangwa warataye agaciro.

Urugero ni ibiciro bavuga ko biri hasi barimo gutangiraho umuceri, aho ikilo cy’umuceri muremure ari amafaranga 275 n’amafaranga 255 ku muceri mugufi. Abo bahinzi bavuga ko ari make nubwo bemeye kuyafata kuko nta kundi bari kubigira. Icyakora na n’ubu ngo baracyafite toni 42 mu bubiko bwabo zitarabonerwa isoko.

Rukeribuga Jacques ati “Dufite ikibazo cy’uko duhinga umusaruro ukabura isoko tugahomba, ibiciro batubwira twumva biri hasi uko tubibara urabona gusarura ikaro (agace gato ko mu murima) ni ibihumbi umunani, gutera ibihumbi 10 guhinga ibihumbi umunani, gucunga inyoni zona ibihumbi 10, ifumbire ibihumbi umunani ugasanga umuhinzi nta kintu ari kubona. Turifuza isoko bakatuzamura umuhinzi akagira ikintu abona.”

Toni 42 z’umuceri ntizirabona isoko mu gihe barimo gusarura undi

Aba bahinzi bakomeza kuvuga ko abaza kurambagiza umuceri wabo bawunenga kubera ko ari mugufi, abahinzi na bo bagatunga agatoki ikigo cy’igihugu gishinzwe ubuhinzi kutabaha imbuto zijyanye n’igihe cyane ko bo basobanura ko batigeze babona imbuto ndende ngo bananirwe kuyihinga, bakifuza ko bajya bagezwaho imbuto zifuzwa ku isoko akaba ari zo bahinga.

Dr Karangwa Patrick, Umuyobozi mukuru w’ikigo cy’igihugu gishinzwe iterambere ry’ubuhinzi n’ubworozi (RAB) wari uhibereye yavuze ko ku kibazo cy’isoko nawe adahakana ko gihari.

Yagize ati “Ikibazo cy’amasoko y’umuceri kimaze iminsi inzego zikiganiraho ariko ubukana iki kibazo cyari gifite buragenda bugabanuka. Hashyizwemo imbaraga kugira ngo umuceri ugaburirwe abanyeshuri, ku buryo hagabanywa umuceri uturuka hanze, inganda zirimo kongera uwo zafataga. Aho izi mbaraga zishyiriwemo ubona ko ikibazo kigenda kigabanuka.”

Igishanga cya Kamiranzovu gihingwamo umuceri n’abantu 1000 ku buso bwa Hegitari 115

Naho ku birebana n’ikibazo cy’imbuto ndende yasubije ko barimo gutegura imbuto ku buryo mu bihe bitarambiranye bazabazanira imbuto nshya cyane ko mu moko y’umuceri uhingwa mu Rwanda agera kuri 37, abahinga igishanga cya Kamiranzovu hari amoko menshi badahinga kuko bahinga amoko abiri gusa.

Ati “Mu gihugu duhinga amoko y’umuceri 37 harimo 29 y’umuceri muremure andi 8 akaba umuceri mugufi ariko abahinga muri Kamiranzomvu bahinga abiri gusa ni yo bazi, gahunda turimo ni ukugira ngo amoko ari ahandi ataragera hariya na ho ahagere ku buryo hari amoko mashya tuzabazanira.”

Hegitari 115 ni zo aba bahinzi bo muri koperative Dufatanye Kagano babyaza umusaruro mu gishanga cya Kamiranzovu. Gihingwa n’abarenga 1000, bakaba bifuza ko nibura ikilo cy’umuceri cyajya ku mafaranga 295 kuko abawubagurira bagurisha ikilo kuri 700 nyamara kandi ngo bataba bavunitse cyane nk’abahinzi.
Muri izi ngendo Minisitiri w’Intebe yagiriye mu turere twa Karongi na Nyamasheke ku matariki ya 11 na 12 Gashyantare 2019, nta byinshi yatangaje byafatwa nk’imyanzuro, ahubwo icy’ingenzi kwabaga ari ugukusanya amakuru ashobora kuvamo imyanzuro izatangazwa mu minsi iri imbere.

Abahinzi mu gishanga cya Kamiranzovu barasarura umuceri mu gihe n’undi utarabona isoko

Ubucucike bw’abanyeshuri mu rwunge rw’amashuri rwa Kibuye bwatunguye abayobozi

Hamwe n’itsinda ry’abandi ba minisitiri n’abayobozi b’inzego zitandukanye, bashimye uburyo ireme ry’uburezi rihagaze muri rusange ariko kandi banasaba ubuyobozi bw’ibigo by’amashuri gukosora bimwe mu bitaranoga neza birimo ubucucike bw’abanyeshuri benshi, gutunganya ahabikwa n’ahategurirwa amafunguro y’abanyeshuri, n’ibindi.

Nubwo hamwe na hamwe yashimye uko uburezi buhagaze, hari n’aho yatunguwe n’ubucucike bw’abanyeshuri cyane cyane mu kigo cy’urwunge rw’amashuri rwa Kibuye aho usanga mu cyumba kimwe higamo abanyeshuri basaga 100. Ni ibintu byinubirwa n’abanyeshuri cyane kuko usibye kuba batiga neza kubera kubyigana ngo binabagiraho ingaruka mu mitsindire yabo.

Umwe muri abo banyeshuri witwa Umukunzi Nyenyeri yagize ati “Ikibazo dufite ni uko twiga tubyigana ntitubashe kumva neza kubera ubwinshi n’urusaku rw’abanyeshuri, rwose ntitwabasha gutsinda neza, hari igihe dufatanya intebe tukicara turi 10 cyangwa umunani ugasanga kubera ukuntu twazifatanyije ziguye hasi zikatuvuna tugacika ibisebe ducuranywa n’umwuka kubera ubwinshi. Turifuza ko baduha intebe n’ibindi byumba by’amashuri.”

Minisitiri w’intebe Dr Ngirente Edouard yatunguwe n’ubucucike bw’abanyeshuri

Mugenzi we witwa Niyigena Thomas we yagize ati “Turi benshi rwose kubera ko twigana turi abanyeshuri 124 tukicara turi 5, rwose ntiwabona n’uko wandika, ntiwakwiga neza kubera urusaku n’ubushyuhe.”

Uwiduhaye Consolée, umwarimu ku rwunge rw’amashuri rwa Kibuye, avuga ko kwigisha abanyeshuri bangana batyo bibagora cyane kuko kugira ngo isomo ryumvikane bisaba kwifashisha umunyafu barwana na bo kugira ngo baceceke. Ngo binatuma abenshi batumva amasomo bigatuma batsindwa.

Ati” kwigisha aba banyeshuri biratugora cyane kuko akenshi tuvamo twasaraye, inshuro nyinshi dukunda kwifashisha agakoni kuko kubabwirisha akanwa n’amaboko ngo ‘ceceka’ ntibishoboka kubera urusaku, kandi bituma badakurikira. Abakurikira ni ab’imbere gusa abandi ni barya batsindwa, turifuza ko mwadushakira ikindi cyumba n’intebe.”

Minisitiri w’Intebe, Dr. Edouard Ngirente, nta byinshi yavuze kuri iki kibazo gihangayikishije abanyeshuri ndetse kikabangamira n’ireme ry’uburezi muri rusange, cyane ko na we yari ashishikajwe no kumenya ayo makuru.

Abayobozi batandukanye baribaza icyakorwa ngo ubucucike bugabanuke mu mashuri

Dr Ndayambaje Irenée, umuyobozi w’ikigo cy’igihugu gishinzwe uburezi (REB) yasobanuye ko icyo kibazo kiri mu gihugu hose. Icyakora nubwo bikigoranye kugikemura, ngo hari ingamba zihari zo kukirandura burundu mu minsi iri imbere.

Ati “Ni ikibazo kiri n’ahandi hirya no hino mu gihugu ngira ngo muzi gahunda ikomeye ya minisiteri y’uburezi yo kubaka ibyumba by’amashuri hirya no hino, ni yo izagabanya iki kibazo kandi burya aho kugira ngo abana bagume mu ngo ikiruta ni uko baza mu mashuri tukabigisha kandi ndetse n’abarimu tugenda tubatoza uburyo bwihariye bwo gufasha abana mu gihe baba barenze igipimo tuba dufite mu burezi.”

Muri uru ruzinduko Minisitiri w’intebe yasuye ibigo 4 by’amashuri abanza n’ayisumbuye nyuma ya saa sita akaba yakomeje gusura n’ibindi bikorwa by’amajyambere biri muri aka karere byaba ibyuzuye n’ibigikomeje kubakwa.

Abakorera mu gakiriro ka Nyamasheke batewe impungenge no kutagira umurindankuba

Habimana Emmanuel ati ”Abantu bubatse agakiriro bari bakwiye kureba kuri iki kintu kuko n’ubwo bimeze bityo hano hagwa imvura ikadusangamo kuba ntamurindankuba ni ikintu giteye ubwoba.”

Akomeza agira ati “Umuntu ashobora kuba ari kubaza yakije Imashini, imvura iri kugwa amazi akagwamo ibyo bigatuma inkuba yamusatira byoroshye cyane. Numva ubuyobozi bwari bukwiye kureba bugashyiramo umurindankuba mu rwego rwo kurengera ubuzima bw’abantu bari hano.”

Kayiranga Fabien yungamo ati” nigeze mbitekerezaho igihe bavugaga ko ahantu hahurira abantu benshi haba hari umurindankuba ariko ndebye hirya no hino mu dukiriro runaka nsanga ntamurindankuba baba bafite kandi hirirwa abantu benshi bawushizeho byaba byiza kuko byadufasha natwe.”

Abakorera mu gakiriro ka Nyamasheke babangamiwe no kutagira imirindankuba

Kuri iki kibazo umuyobozi w’akarere ka Nyamasheke wungirije ushinzwe ubukungu Ntaganira Josue Michel, nawe avuga ko ubuzima bw’aba baturage buri mu kaga kuba bakoresha ibyuma bifite aho bihuriye no kuba byakurura inkuba, akavuga ko iki ari ikintu bagiye kwihutira kugirango hashyirwe imirindankuba.

Ati” Icyo tugiye gukora ni ukuganira nabo kugirango twige uburyo hashyirwaho imirindankuba, cyane ko ibyo bakora ibyinshi ari ibikurura iyo miyaga. Inkuba ishobora kuba yabateza ibibazo. Kuganira nabo hakaboneka imirindankuba ijya hariya ntabwo bizadutwara umwanya kugira ngo twizere ko umutekano w’abantu n’ibyabo ucunzwe neza.”

Usibye agakiriro gakorera aho ku Rwesero mu murenge wa Kagano hari n’isoko kuruhande rwako bivuga ko hateranira imbaga y’abaturage benshi naho hakaba hari hakwiye umurindankuba wafasha mu kwirinda ko haba impanuka iturutse ku nkuba ikaba yatwara ubuzima bw’abantu benshi ndetse no kwangirika kw’ibihakorerwa.

Iyi ni yo mbangukiragutabara bari bahawe n’abagiraneza bo mu gihugu cy’ubutaliyani

Bimwe mu bibazo bavuga ko bahura na byo ni abana n’ababyeyi bashobora kubura ubuzima mu gihe cyo kubyara kubera gutinda kugerwaho n’imbangukiragutabara iturutse ahandi kuko hari igihe bayitumaho ntiboneke kandi n’igihe ibonetse ikahagera umurwayi yarembye.

Umwe muri abo babyeyi witwa Nyirangirabagenzi Seraphine ati “Hari igihe ugira ibibazo utwite inda igakorogana ikavamo bagahamagara imbangukiragutabara ikabura ukirirwa aho uri kuva ikaza kuza wamaze kwangirika.”

Mugenzi we witwa Mukashema Mariya yunzemo ati “Ubushize hari ababyeyi batatu bari bagize ikibazo harimo uwari ufite inda agomba kubyara biba ngombwa ko ajya i Mibirizi bashatse imbangukiragutabara irabura ibi mvuga ni ukuri mbihagazeho ni ikibazo dufite kituremereye cyane.”

Abo babyeyi bavuga ibi mu mu gihe bari bamaze kwizera ko batazongera guhura n’ibibazo nk’ibyo kuko bari barahawe imbangukiragutabara n’abagiraneza bo mu Butaliyani ariko iyo modoka ikananirwa gukorera mu misozi ya Rwinzuki. Abari bayihawe basaba ko abayijyanye bayibaguraniramo indi.

Uzayisenga Justine ati “Imbangukiragutabara twari dufite barayijyanye ngo bazatuguranira ntibazana indi ariko mwatuvuganira bakazana iyo mbangukiragutabara.”

Ababyeyi bivuriza ku kigonderabuzima cya Rwinzuki bahangayikishijwe no kutagira imbangukiragutabara

Umuyobozi w’Akarere ka Rusizi, Kayumba Ephrem, avuga ko serivisi ishinzwe imicungire y’imbangukiragutabara muri Minisiteri y’Ubuzima mu Rwanda yajyanye iyo mbangukiragutabara nyuma yo kunanirwa gukorera mu misozi ya Nzahaha bitewe n’uburyo yari ikozemo. Icyakora Akarere ngo karateganya kuzabagenera indi mu ngengo y’imari y’umwaka utaha.

Ni byo Kayumba yasobanuye ati “Yari imodoka idakwiranye n’imihanda y’ino kubera ko yari ngufiya hafatwa icyemezo cy’uko SAMI icunga imbangukiragutabara iyitwara ariko bakazashakirwa indi. Rero ni cyo tugiye gukora. Ubu mu ntego y’akarere ni uko buri mwaka tuzajya tugura imbangukiragutabara ebyiri, bivuze ko nitubishyira mu ngengo y’imari, kiriya kigo na cyo kizitabwaho nk’icyigeze kuyitunga ubu kikaba ntayo gifite.”

Iyi mbangukiragutabara bayihawe ku wa 29 Nyakanga 2015, bayimarana iminsi mike bahita bayamburwa. Iyo mbangukiragutabara hamwe n’ibitanda byo kuryamaho ndetse na matora byazanye n’iyi mbangukiragutabara byose byari bifite agaciro ka miliyoni 32 z’amafaranga y’u Rwanda, babitewemo inkunga n’abagiraneza bo mu gihugu cy’u Butaliyani bagize ishyirahamwe rya Rotary Club.

Umunyamabanga nshingwabikorwa w’umurenge wa Bweyeye Habimana Emmanuel

Ni umuyoboro uzageza amazi meza ku batuye utugari twa Nyamuzi, Kiyabo na Gikungu, dutatu muri dutanu turi muri uyu murenge. Abatuye utu tugari bavuga ko kuhabona amazi meza byari ingume bitewe n’uko amatiyo yabahaga amazi ashaje kandi ari na makeya yewe ndetse ngo yanatangaga amazi mabi abateza uburwayi bw’inzoka n’indwara zo mu kanywa.

Niyitegeka Vestine ati ”Aho tuvoma ni kure cyane dukoresha isaha ngo tuhagere. Twari dukeneye kubona amazi meza nk’abandi hari igihe turwara inzoka za amibe, ugasanga umuntu yatubye inda kubera kunywa amazi mabi, amenyo nayo dukunda kuyarwara ugasanga yarandukiye rimwe kubera amazi mabi.”

Company yitwa ECOEF Ltd izubaka uyu muyoboro imaze kuwutangiza ku mugaragaro,a ba baturage bahise bagaragaza amarangamutima yabo y’uburyo bishimiye kuzagezwaho aya mazi dore ko bahise bemererwamo n’akazi.

Bitwayiki Yohani ati ”Ndabone Leta y’ubumwe itwitayeho abaturage ba Bweyeye tubyakiriye neza kuba bagiye kuduha amazi meza duhite dutandukana n’ikibazo cy’indwara zaterwaga n’amazi mabi.”

Kugeza ubu,akagari kamwe ka Kiyabo ni ko gusa kari gafite amazi nayo kandi adahagije.Umunyamabanga nshingwabikorwa w’umurenge wa Bweyeye Habimana Emmanuel yavuze ko mu gihe bakiri kwishakamo ibisubizo ngo bose abagereho,bashishikariza abaturage n’ibigo binyuranye gufata amazi y’imvura akajya akoreshwa no mu bindi.

Ati ”Ubu turi mu bukangurambaga ku bigo by’amashuri, insengero n’ abikorera ku buryo bagura ibigega byo gufata amazi y’imvura akajya abafasha gukora isuku rusange noneho uyu muyoboro ukajya utanga amazi yo kunywa n’ahandi hakenewe isuku y’ikirenga. Ikindi turakomeza dukomange mu baterankunga batandukanye, amasoko ari mu masambu yabo aturuka mu ishyamba rya nyungwe arusheho gutungwanywa bityo agere ku baturage bose.”

Biteganyijwe ko ibi bilometero 10 by’ uyu muyoboro w’amazi bizaba byuzuye neza bitarenze tariki ya 21 Nzeri uyu mwaka wa 2019 ukazuzura utwaye amafaranga y’u Rwanda Miliyoni 155 atanzwe n’ishami ry’umuryango w’abibumbye ryita ku bana UNICEF.

Ubuyobozi bw’uyu murenge buvuga ko utundi tugari twa Rasano na Murwa ari two tuzakurikiraho mu guhabwa amazi meza.

Bweyeye ni umwe mu mirenge ikigaragaramo ibibazo bituruka ku bikorwa- remezo bidahagije icyakora bigaragara ko biri mu nzira zo gukemuka dore ko nk’ubu igice kinini cyabonye amashanyarazi, n’umuhanda ujyayo uri gukorwa.

Abakozi b’inzego z’ibanze bavugwaho kwambura imirenge sacco bari kwandika amabaruwa biyemeza ko ukwa kabiri kurangira bamaze kwishyura

Mu karere ka Rusizi, abakozi basaga 30 ni bo bigaragara ko batishyuye imirenge SACCO inguzanyo z’amafaranga angana na Miliyoni 26 bafashe mu myaka itandukanye yabanzirije uyu turimo igihe cyo kwishyura kikarenga batarishyura.

Munama yabahuje n’Ubuyobozi bw’akarere ka Rusizi, 13 gusa muri aba bakozi bari bayitabiriye bagaragaje ko impamvu batishyuriye ku gihe ari ukubera imishinga bafatiye amafaranga yahombye kandi bakagaragaza ko imishahara yabo itabasha kuyishyura.

Nduhiyabandi Benjamin ati ”twagiye tugira imbogamizi z’ibihombo bitandukanye biturutse kuhantu umuntu akorera. Njye nari naguze Moto iza kumpombera iragapfa kubera ikibazo cy’imihanda mibi kuburyo ntanayigurishije amafaranga arenze ibihumbi 200 kugirango nkemure ikibazo cy’umwenda narimfite, mu byukuri igihe baduhaye cy’icyumweru kimwe ku girango ubone miriyoni ebyiri biragoye.”

Bamporiki Velens yungamo ati ”abentu benshi dufite icyo kibazo kuko kwesa uwo muhigo wo kwishyura uyu mwenda bitoroshye habayeho guhomba njyewe nakoraga ubucuruzi nkenga umutobe, inzoga y’u Rwagwa biza guhomba twiyemeje ko bitarenze tariki ya 12 z’uko kwezi tuzaba twishyuye.”

Ni impamvu ubuyobozi bw’aka karere bwagaragaje ko nta shingiro zifite ahubwo bagaragarizwa uburyo bakabaye bararangije kwishyura kera ndetse n’ingaruka byagize ku kuba batarishyuye ku gihe.

Kayumba Ephrem ati” sacco hari ikigero runaka igeraho cy’imyenda itishyurwa igasabwa guhagarika gutanga inguzanyo ku girango ibanze igaruze ari hanze icyo gihe birumvikana ko ikigo nka kiriya iyo kigeze aho kudatanga amadeni kandi dushishikariza abaturage kubigana ku gira ngo babone amafaranga y’igishoro birumvikana ko bigira ingaruka ku iterambera ry’abaturage muri rusange.”

Nyuma yaho hemejwe ko itariki ntarengwa yo kuba barangije kwishyura ari 15 Gashyantare(uku kwezi turimo) muri uyu mwaka wa 2019 bivuze ngo basigaranye iminsi 10 uhereye igihe uyu mwanzuro ufatiwe bikaba binahuye n’ibaruwa yo kuwa 01/02/2019 Utu turere twari duherutse kwandikirwa itanga igihe ntarengwa cy’itariki ya 15 y’ukwezi kwa 2 ngo ayo mafaranga abe yamaze kugaruzwa aho bitarakorwa ubuyobozi bugatanga Raporo yaho bigeze n’ibihano byafatiwe abatarishyura.

Kayumba Euphrem akomeza agira ati ”aya mafaranga ntibivuze ko bagomba kuyishyura bakoresheje umushahara wabo niba umuntu yishyuzwa miriyoni ebyiri ahembwa ibihumbi 100 ntabwo wavuga ngo azishyura ku mushahara bivuze ko bagomba gushaka ubundi buryo Atari ku mushahara, abantu batishyuye bose tugiye gutangira kubafatira ibihano ku rwego rw’ubutegetsi bashobora kwandikirwa bagawa kuburyo bagumye kwinangira ntibishyure bishobora kubagiraho izindi ngaruka zirenze ku gawa mu kazi.”

Aba bahawe iyi tariki mu gihe Minisiteri y’ubutegetsi bw’igihugu yo yari yasabye ko batarenza tariki ya 31 Ukuboza 2018. Nyuma y’iyi tariki ni bwo kandi iyi ministere yasohoye urutonde rw’uturere tugenda biguru ntege mu kugaruza aya mafaranga ari two Kamonyi , Ruhango, Rusizi,Musanze,na Karongi kuko tutagejeje no 10% by’ayagombaga ku garuka.

Iki kibazo cy’abanze kwishyura za SACCO cyanatinzweho mu nama y’umushyikirano iheruka aho umukuru w’igihugu yavuze ko aya mafaranga yatwawe n’abayobozi agomba kugaruka byanze bikunze.

Ahagana saa kumi n’imwe za mu gitondo zo kuri uyu wa gatanu tariki 01 Gashyantare 2019, imodoka ya RITCO ufite numero RAD 249 K yavaga i kigali yerekeza Rusizi yageze mu murenge wa Gihundwe ikora impanuka umuntu umwe yitaba Imana abandi benshi bagera kuri 30 barakomereka ariko bidakabije.

Ababonye iyi mpanuka bavuze ko yatewe n’imodoka ya Fuso yibye umuhanda maze umushoferi wa RITCO akayihunga, maze kubera n’urume rwo mu byatsi, ihita inyerera iragwa.

Turacyabakurikiranira iby’iyi mpanuka

Aba babyeyi bavuga ko urugendo rurerure bakora bajya ku kigo nderabuzima cya Nkombo rubagiraho ingaruka bakifuza imbangukiragutabara

Uretse n’imbangukiragutabara (ambulance), kuri iki kirwa giherereye rwagati mu kiyaga cya Kivu nta n’indi modoka ihagera. Abaturage biganjemo ababyeyi bavuga ko bahangayikira mu nzira bajya kubyara dore ko abenshi baba baturutse mu tugari twitaruye ikigo nderabuzima.

Bamwe bavuga ko bakora urugendo rw’amasaha abiri n’amaguru icyo gihe iyo hagize utungurwa n’inda hakaba ubwo biba ngombwa ko abyarira mu nzira ataragera ku kigo nderabuzima.

Umwe mu bahatuye witwa Cyiza Patrick yagize ati “Hano ku Nkombo kuva i Bugumira kugera ku kigo nderabuzima i Nyawenya ku kigo nderabuzima ni ikibazo gikomeye rwose nta ngobyi, nta modoka, nta moto, ababyeyi bahagirira ibibazo cyane kubera gutinda muri izo nzira zose.”

Niyibizi Emmanuel yungamo ati “Ababyeyi batwite iyo bagiye ku kigo nderabuzima bamwe tubatwara mu maboko bakagerayo barushye, umwana akavuka yarushye. Uvuye hano mu Kagari ka Kamagimbo kugera ku kigo nderabuzima umurwayi agenda amasaha abiri bigatuma arushaho kuremba kubera kuruha, turifuza ko baduha imbangukiragutabara mu Murenge wa Nkombo kugira ngo idufashe.”

Abatuye ku kirwa cya nkombo bijejwe imbangukira gutabara mu ngengo y’imari y’umwaka utaha wa 2019-2020

Abo babyeyi bavuga ko iyo hari ubyariye mu nzira ,ubuyobozi bwirengagiza ko nta mbangukiragutabara ihari maze bukabaca amafaranga.

Nyiranziza Seraphine ati” ni ibibazo cyane tugenda ku maguru wagera mu nzira inda ikagufata ukabyarira mu nzira bakaguca amafaranga twabuze imbangukiragutabara.”

Aba babyeyi kandi ntibatinya no kuvuga ko bafite impungenge ko bashobora guhitanwa n’inda cyangwa hagapfa umwana uvuka muri icyo gihe baba bakiri mu nzira.

Ntawigira Francine ati” iyo tugiye ku bitaro kubera ukuntu tugenda n’amaguru hari ubwo abana badupfira mu maguru kubera kubura ikitujyana hari abava kure rwose abana bagapfa. Turifuza ko baduha ingobyi yo kudutwara kugira ngo natwe tujye tugerayo twihuse.”

Abagize amahirwe bashobora kubona ingobyi ya Kinyarwanda ariko bakavuga ko muri iki gihe itakigezweho ndetse bakanemeza ko nta kinini yafasha umugore uri ku gise, bakifuza ko babona ingobyi ya kijyambere.

Ubwo bagaragarizaga iki kibazo Perezida wa Sena y’u Rwanda, Bernard Makuza, ntiyakivuzeho byinshi kuko yasanze n’Akarere ka Rusizi kabifite mu ngengo y’imari y’umwaka utaha wa 2019/2020 aho yabasezeranyije gukomeza gutunganya imihanda neza .

Ati “Ni ikintu cyumvikana, ikigomba gukorwa muri iyi minsi ni ugukomeza gutunganya imihanda cyane cyane iva mu tugari igana kuri icyo kigo nderabuzima. Naho ubundi kuba haratekerejwe ko iyo ngobyi y’abarwayi yaboneka biri mu igenamigambi ry’ejobundi ku rwego rw’akarere.”

Ababyeyi batuye ku kirwa cya Nkombo barifuza imbangukira gutabara kugira ngo batahane abana bazima

Umurenge wa Nkombo utuwe n’abaturage basaga ibihumbi 18 ukaba ugizwe n’utugari dutanu ari two Ishwa, Kamagimbo, Rwenja, Bigoga na Bugarura. Abakomererwa no kugera kwa muganga cyane ni abo mu tugari dutatu ari two Ishwa, Kamagimbo na Rwenja.

Aba baturage bose nta handi bashobora kwivuriza uretse kuri iki kigo nderabuzima cya Nkombo dore ko muri utu tugari twose akagari ka Ishywa ari ko konyine gafite ivuriro (poste de santé) ryunganira iki kigo nderabuzima.

Ikibazo cyo kwivuriza ku Nkombo kandi ubukana bwacyo burushaho kugaragara iyo hagize nk’uwoherezwa ku bitaro by’akarere i Gihundwe aho agomba gutega ubwato na bwo bukagera ku muhanda ujya ku bitaro nyuma y’amasaha atari make. Ububi bw’umuhanda w’ibilometero 13 uva ahitwa Busekanka mu murenge wa Nkanka werekeza ku bitaro i Gihundwe.

Ubu bushakashatsi bugaragaza ko 47.1% by’abaturage bose bari mu bukene naho abari mu bukene bukabije bakaba 21.6%.

Abatuye muri iyi ntara bavuga ko intara yabo igizwe n’igice kinini gikorerwaho ubuhinzi ariko ngo bukorwa nabi bigatuma bahingira amaramuko gusa bagasaba ko ubu buhinzi bwakorwa kinyamwuga kandi bukunganirwa n’imirimo idashingiye ku buhinzi ibyara inyungu.

Hamenyimana Athanas ati ”duhindure imihingire twihaze mu biribwa kuko nta biryo dufite turibeshya ngo twahinze ngo dufite amahegitari kumbe ntakivamo ntabiryo dufite, twese dufatanye duhinge ibiryo bigaragara abaturage babashe guhaga.”

Hari abandi na none bavuga ko iyi ntara ikennye ibikorwa remezo ngo ku buryo n’umusaruro muke uboneka utabona uko ugera ku isoko byoroshye.

Kayigire Aime ati ”mutubereye abavugizi tukabona isoko n’umuhanda ibintu byagende neza tukamera nk’abandi ni icyo kintu kitugoye.”

Abandi na bo ntibatinya kuvuga ko iyi ntara ikiri hasi muri gahunda yo kuboneza urubyaro ugasanga bafite imiryango yagutse kandi badashoboye kuyitunga.

Nyirabambanza Clementine ati ”aho mbona ikibazo gikomeye cyane ni imiryango dufite nkabona rero imbaraga nyinshi zikwiye kujya mu kuboneza urubyaro bikajyamo imbaraga zihagije twagombye kuba nibura umuntu umwe atunga babiri cyangwa batatu none turacyari kuri 5 byumvikene ko hari n’abatunga 10 sinzi icyo twakora kuboneza urubyaro bigahabwa umurongo.”

Ikiyaga cya Kivu gikora hafi kuri buri gace nayo yakabaye amahirwe yatuma abatuye uburengerazuba bakungahara ariko si ko bimeze. bamwe mu baturage bavuga ko batazi impamvu yabyo.

Guverineri w’intara y’uburengerazuba Munyantwari Alphonse avuga ko bibabaje kubona iyi ntara ari yo yagira abakene benshi mu gihe ifite amahirwe izindi ntara zidafite arimo icyo kiyaga, ubutaka bunini,amashyamba n’ibindi.asobanura ko ibi ndetse n’ibikorwa remezo bigenda byiyongera ari byo bagiye guheraho bigobotora iyi ngoyi y’ubukene.

Ati ”kubwanjye ntabwo intara y’uburengerazuba ariyo ikwiye kugira ubukene bwihariye, dufite amahirwe ndetse amwe utasanga ahandi. Uyu muhanda batarawukora ngo uve Rusizi ugere Rubavu icyo gihe uturere twacu twari turi mu bwigunge bukomeye. Turizera ko mu minsi iri imbere muri iyi ntara ubukene buyirimo buzagenda bugabanuka mu buryo bwihuse kurushaho.”

Abasesenguzi benshi batungurwa no kubona iyi ntara ari iya mbere mu bukene nyamara hari ikiyaga cya Kivu gitanga isambaza no ku bindi bice by’igihugu.

ikibaya cya Bugarama mu karere ka Rusizi cyeramo amatoni menshi y’umuceri n’uruganda rwa CIMERWA ruhari. Ni intara ifite imipaka myinshi yakabaye yoroshya ubucuruzi bwambukiranya imipaka,inganda z’icyayi mu turere hafi ya twose ,hari igice kinini cya pariki y’igihugu ya Nyungwe yinjiza mesnshi mu bukerarugendo ndetse n’amakoro yo ku Gisenyi atubura umusaruro w’ubuhinzi, ariko muri iyi ntara ni ho hari akarere ka Nyamasheke gakennye kurusha utundi mu gihugu,umwanya kamaze kuzaho inshuro ebyri zikurikiranya mu bushakashatsi nk’ubu.

Nyamasheke iza ku isonga mu bukene muri iyi ntara, igakurikirwa na Karongi hagakurikiraho Rutsiro, Ngororero ikaza ku mwanya wa Kane ,ku mwanya wa gatanu hakaza Nyabihu, Rubavu ikaza ku mwanya wa gatandatu naho Rusizi ikaba ri yo ifite abakene bake muri iyi ntara ikanaba ku mwanya wa munani mu gihugu hose.Mu ntara zose Uburengerazuba buza ku isonga mu bukene ku ijanisha rya 47.1%, Amajyaruguru aza ku mwanya wa kabiri n’ijanisha rya 42.3%,Amajyepfo n’aya gatatu kuri 41%,uburasirazuba ni ubwa kane na 37.4% hagaheruka umujyi wa Kigali ufite abakene bangana na 13.9%

Abatwara abagenzi kuri moto ntibumva impamvu bahatirwa kujya muri koperative basanzwe bafite izabo

Iyi koperative yatangiye umushinga wo kubaka inzu y’amagorofa ane imu mwaka 2012, uza kudindizwa n’ubushobozi inanirwa kuyuzuza kugeza n’aho yafashe umwenda muri GT bank nawo wabananiye kwishyura.

Uku kunanirwa kwishyura umwenda wa Miriyoni 167 COMORU ibereyemo Banki ndetse bigaca abamotari bamwe intege bakava muri iyo koperative, niko kwavuyemo igitekerezo cyo kwiyambaza bagenzi babo babarizwa muyandi ma koperative babasaba kujya batanga amafaranga 300 ku munsi ahwanye na 40% by’imigabane y’iyi nzu bakayatanga mu gihe cy’imyaka ine bityo nabo bakaba abanyamigabane.

Dusabeyezu Erneste umuyobozi w’ihuriro ry’amakoperative y’abamotari mu karere ka Rusizi agaragaza uko batekereje kwishyura uyu mwenda bafatanyije na bagenzi babo.

Ati ”twarateranye tubyigaho n’abayobozi b’amakoperative tumenya ingano yayo mafaranga n’uburyo agomba kwishyurwa bitabangamiye amakoperative babarizwamo twemeza ko buri mu motari azajya yishyura amafaranga 300 yo kugura umugabane kuri iriya nzu ari nabyo twaje kubatangariza uyu munsi.”

Biyemeje gutera inkunga COMORU aho kubasaba kuyijyamo

Iki gitekerezo bagenzi babo ntibagikozwa aho bavuga ko nabo bafite koperative zabo bashaka guteza imbere icyakora ngo bakwigomwa bakabatera inkunga aho ku girango babatererane nka bagenzi babo bakora umwuga umwe wo gutwara abagenzi kuri Moto.

Nduwimana Fidele ati “icyo twumva twakunganira COMORU ku ideni irimo ni uko aho kugira ngo badutegeke kugura imigabane ku gahato icyo twabafasha buri mumotari nibura yatanga amafaranga 2000 cyangwa 3000 yo kubatera inkunga bitewe n’urwego batubonamo.”

Habyarimana Pierre yungamo ati ”mu by’ukuri niba hari ikintu kitubabaje ni ukuntu koperative igomba kwishyurira iyindi twebwe dufite koperative mu Bugarama twagujije miriyoni 10 none bari kutubwira ngo tujye kwishyurira COMORU!

Turayishyura iki yagurishije inzu ikishyura banki? Nibatubabarire rwose niba hari n’abariye amafaranga bishyure. Kuva natangira ikimotari sindafata ibihumbi 100 none bari kunyishyuza ibihumbi 177 mu myaka ine... ntaho nayakura pe.”

Uku gukomeza kwakwa amafaranga bya hato na hato byatumye bamwe mubagize COMORU nabo bacika intege bamwe batangira kuyivamo aho isigaranye abanyamuryango 200 muri 432 bari bayigize.

Umuyobozi w’akarere ka Rusizi Kayumba Ephrem avuga ko hazabaho ibindi biganiro bagamije kumvisha abamotari akamaro ko kugura imigabane muri COMORU

Umwe utashatse ko amazina ye atangazwa asobanura ko amaze gukuramo ake karenge nyuma yo gutanga agera mu bihumbi 700 yose agasobanura ko atazi aho yarigitiye.

Ati ”reba uwari ashinzwe ubugenzuzi yaragiye ubu ntiyibereye Kigali! Ahubwo muzatera abantu agahinda mutume bazajya batwara moto barira ubu dufite agahinda gakomeye pe. Ku rwanjye ruhande narananiwe natanze imisanzu imyaka irindwi namanitse amaboko ubuyobozi buzakore icyo bushaka.”

Kuri iki kibazo umuyobozi w’akarere ka Rusizi Kayumba Ephrem we avuga ko uku kutumva kimwe ibyo kugura imigabane muri koperative COMORU, Atari agahato icyakora ngo bigomba kongera kuganirwaho mu zindi nzira bakumva ko nta kindi kigamijwe Atari iterambere ryabo.

Ati “kubera ko kugeza ubu abantu batabyumva kimwe njye numva dukwiye kugira ibindi biganiro ku rwego rw’amakoperative kuko gushora imari ni uburenganzira bw’umuntu ntitwenda kubumvisha kumigeri. Muri abantu bajijutse ku buryo ntekereza ko igikorwa cyo kwifatanya tukagira iterambere dusangiye byafasha buri wese.”

Mu gihe iyi koperative COMORU ikirwana no gushaka uko yishyura umwenda wa banki ungana na miriyoni 167 nazo zishobora kwiyongera haracyabura nibura andi agera kuri miriyoni 40 ku girango iyi nyubako ibaraje inshinga yuzure.

Iyi nzu aho igeze imaze kujyaho miriyoni 231 Gusa kuri aya mafaranga abanyamuryango ba COMORU bavuga ko hari ayanyerejwe n’abari bashinzwe imicungire yayo bagasaba ko mbere yo kugira andi basabwa bagomba kubanza gukurikiranywa.

Guverineri Munyantwari Alphonse asaba abayobozi b’inzego z’ibanze gukura iki kibazo

Ingabire Joyeux uyobora umurenge wa Mururu mu karere ka Rusizi, avuga ko bafite imanza zigera kuri 60 zirebwa n’abagera kuri 200 bose batarishyura imitungo basahuye, arasobanura uko iki kibazo gihagaze muri uyu murenge abereye umuyobozi.

Ati ”dufite imanza Gacaca 26 zitararangira ariko murizo 35 ziri munzira zo kurangira hari izindi ebyiri z’inkiko zisanzwe nazo zitararangira neza tukagira imanza zirindwi zaciwe n’urukiki rw’abunzi nazo zitararangira ariko turabizeza ko dukora iyo bwabaga kugirango izo manza zirangire.”

Ni ikibazo gikomeza kuba agatereranzamba mu turere dutandukanye kuko kuva inkiko za Gacaca zajyaho mu mwaka wa 2002 hashize imyaka irenga 15 zisojwe ariko hakaba hakiri imanza nyinshi zitararangizwa gushyirwa mu bikorwa.

Imbogamizi Nyamukuru ziza ku isonga zituma iki kibazo kitarangira, harimo ubukene bw’abasabwa kwishyura imitungo basahuye, amadosiye y’abishyuzwa adasobanutse neza, ndetse n’abatarigeze bagaruka mu gihugu kandi nta n’imitungo yabo izwi baba barasize ngo yifashishwe mu kwishyura.

Bamwe mubasabwa kwishyura bavuga ko batabona ibyo bishyura

Gusa ku kirebana n’ubukene cyo ntikivugwaho rumwe hagati y’abakabaye bishyurwa n’abagomba kubishyura.

Katabarwa Jean ati ”ndishyuzwa miriyoni n’ibihumbi Magana abiri ariko bigitangira naraje ndemera ndamfukama mbasaba imbabazi mbabwira ko ntayabona. ejo bundi abana baraterana batanga isambu nabahaye nishyura ibihumbi 400 ariko ntahandi nakura ayandi.”

Mariya nawe ati ”ndishyuzwa miriyoni arengaho sinzi umubare wayo natangiye kubasaba imbabazi kuva kera. nibangirire impuhwe nukuri bampe imbabazi uwashatse nabi nyine ntakundi byagenda aramutswa n’abakwe.”

Kuruhande rw’abagomba kwishyurwa bangirijwe imitungo ntibumva imbabazi aba babasaba kuko ngo basanga ari iza nyirarubeshwa kuko nta narimwe bari babasanga mu rugo bazanywe no gusaba imbabazi ngo bazihabwe cyangwa bazibime.

Mukankurunziza Anonciatha ati ”ntawe ushobora kuva iwe ngo aze akubwire mu by’ukuri ngo ibyo unsaba aho bigeze ntaho nabikura. Tubifata nk’aho batazi ko bakoze icyaha babona abayobozi nkamwe mwaje bakabereka ko bazi ko bakoze icyaha.

Ntabwo uziyunga n’umuntu udashobora kukwegera njyewe sinzava iwanjye ngo ngende ku muntu undimo ibihumbi 400 ngo mubwire ngo narinje kugushaka ngo nkubabarire.”

Munyantwari Alphonse Guverineri w’intara y’uburengerazuba we arasaba abayobozi b’inzego z’ibanze gushaka uko bahuza abafite ibibazo nk’ibi maze izi manza zikava munzira kuko zimaze igihe kinini zigarukwaho.

Ati” abafite kwishyura bafite ubushobozi n’ibishyure abatabufite nabwo bigaragare ariko twibirambika ni igikorwa tugomba gukura mu nzira kikarangira imyaka 25 ni myinshi cyane nahandi hose mu ntara turaza kubigenza gutyo bya by’ibyiciro mwashyizemo bake badashobora kwishyura mubahuze basabe imbabazi niba ari abababarirwa bababarirwe.”

Inkiko gacaca mu Rwanda zashimiwe cyane umusanzu zatanze ku ubutabera bwunga abanyarwanda nyuma ya Jenoside yakorewe abatutsi muw’1994 hafi miliyoni 2 mu gihe gito; twagerageje gushaka imibere y’abasabwa kwishyura imitungo basahuye cyangwa bangije yo mu karere ka Rusizi ntiyaboneka icyakora umwaka ushize bose bageraga kuri 900.
Musabwa Euphrem

Abahinzi ntibanyuzwe n’amafaranga 295 inganda zizabaguriraho umuceri

Icyakora abahinzi ubwabo baravuga ko bacyemejwe ku ngufu kuko ngo batari bafite ahandi ho kujyana umuceri.

Kwemeranywa ku giciro cy’ikilo cy’umuceri udatonoye byabanje kunanirana hagati y’abahagarariye abahinzi bawo n’abanyenganda ziwutonora. Abahinzi bashakaga amafaranga 310 ku kilo mu gihe ba nyiri inganda bari barahiye ko batarenza 290 na bwo bisa no kugirira impuhwe abahinzi.

Izi mpaka zarangiye nta cyo zigezeho ariko nyuma y’iminsi umunani impande zombi zongera guhura maze hemezwa 295. Kuri iyi nshuro, abahinzi bari bahibereye bavuze ko batanyuzwe.

Umuhinzi witwa Mukankusi Odette ati “ni 320frw mwari mukwiye kuduha byibura ariya 20 akaba aya koperative noneho 300 akaba ay’umuturage akazabona n’ayo yishyura asubira mu gishanga, n’abana bakabona amafaranga y’ishuri! Umva ayo mafaranga ni makeya twararenganye njye mbona ko nta gaciro twebwe abahinzi baduha.”

Nubwo bemeye kugurirwa umuceri wabo ariko ntibanyuzwe n’igiciro inganda zizawujyaniraho

Aba bahinzi hari ibyo bashingiraho bavuga ko ari make harimo kuba ari bo bagura ifumbire, imirimo yose baba bawukozeho mbere yo gusarurwa, yewe n’igihe cy’isarurwa.

Uwitwa Ndagijimana Theobard we yagize ati “Ifumbire batugurishaga 360 yagiye kuri 560 none umuceri watewe ifumbire ihenze gutyo ngo usubire inyuma ubuse turagana hehe koko?”

Kuri ibyo kandi aba bahinzi bemeza ko inganda ziwutonora gusa ntizigire ikindi ziwukoraho hanyuma zikawugurisha uhenze ngo zikanarenzaho kugurisha ibishishwa byawo, ibi byose bikajya mu mifuka ya ba nyiri inganda.

Ibyo aba bahinzi baburana birasa n’aho nta giteganyije guhindukaho. Umuyobzi w’Akarere ka Rusizi, Kayumba Euphrem, yari ahari maze yemeza ko nta gihombo kirimo nk’uko bo babyibwira kuko ngo Leta iba yabitekerezejo.

Ati “Nta gihombo bazahura na cyo kuko kugena kiriya giciro habaho ubushishozi bw’ababishinzwe nka Minisiteri y’Ubuhinzi n’Ubworozi ndetse na Minisiteri y’Inganda n’Ubucuruzi bakagena n’inyungu ku buryo umuhinzi atahura n’igihombo.”

Abahagarariye ihuriro ry’amakoperative y’abahinzi b’umuceri bo ngo bagiye kureba uko umuhinzi yarushaho kunguka na ho abanyenganda kuri iyi nshuro, nta cyo bavugishije itangazamakuru.

Icyakora izi mpaka zitangira bwa mbere bavugaga ko na 290 kwaba ari ukugirira abahinzi impuhwe.

Harimo gusuzumwa impamvu y’inkongi za hato na hato muri iri shuri

Bamwe mu banyeshuri bararaga muri aya macumbi bavuga ko batazi ikirimo gutera inkongi z’umuriro muri iki kigo, kuko no ku cyumweru tariki 20 Mutarama 2019 hari ibindi bikoresho byahiriye mu kindi cyumba.

Abo banyeshuri bavuga ko izi nkongi zabasize iheruheru aho ibikoresho byabo byose byahiye.

Ni byo umwe muri bo witwa Ishimwe Queen asobanura ati “Ejobundi ku cyumweru hari habaye impanuka hashya ‘Dortoir’ imwe none ubu ‘Dortoir’ nyinshi zahiye.
Njyewe ndi mu bo ubushize dortoir zitari zahiye ariko ubu iyo ndaramo yahiye ibikoresho by’ingenzi byahiye turi kwibaza unburyo biri bugende byaducanze pe! Nk’abanyeshuri ikibazo dufite amakaye yo mumyaka ishize yahiye nk’abantu bari mu wa gatandatu turi kwibaza uburyo tuzategura ikizamini cya Leta, n’amarangamuntu yahiye.”

Kayirangwa Solange yungamo ati “sinzi uko nabivuga. Ku cyumweru byarahiye ariko hashya bike none ibyo twari dusigaranye byose byahiye ntaho dusigariye bamwe bahahamutse abandi bari kwa muganga, amasabune yahiye, ibikapu, matera ni byinshi turasaba ubufasha pe kuko kubona ibikoresho hashize icyumweru kimwe ababyeyi babiguze amafaranga yose bari bamaze kuyamara sinzi uko tuzabyifatamo niba ari ukwicara simbizi.”

Uwihoreye Boas, umuyobozi w’ishuri ryisumbuye rya Kibogora avuga ko bataramenya neza ikiri gutera iyi nkongi y’umuriro icyakora ngo barakeka ko ari amashanyarazi mu gihe iperereza ryimbitse rigikomeje. Kugeza ubu hifashishijwe ibyumba by’amasengesho n’andi mazu abiri yari ahari ku gira ngo abanyeshuri babone aho barara.

Ati “turacyarimo gushakisha ngo turebe ikibitera turakomeza uburinzi kandi dukomeze gushaka amakuru y’imbitse kugira ngo tumenye nyirizina igitera ibi bintu. ikijyanye n’ibibaranga turabakorera ubuvugizi kimwe n’ibikoresho turakorana n’ababyeyi n’ubuyobozi ndetse n’itorero kugira ngo turebe uburyo twafasha abanyeshuri ku ira ngo ubuzima bukomeze.”

Ishuri ryibasiwe n’inkongi inshuro ebyiri mu gihe gito

Ubuyobozi bw’Akarere ka Nyamasheke buvuga ko icyihutirwa kigiye gukorwa ari ukuba hafi y’abanyeshuri kugira ngo amasomo akomeze, no kubona aho baryama ndetse no kubarura ibyabo byahiriyemo. Naho kubyateje impanuka ngo haracyashakishwa ikibyihishe inyuma.

Kamali Aimé Fabien, Umuyobozi w’Akarere.ati”Icyo tugiye gufasha ni ukuba hafi y’abana kugira ngo bakomeze amasomo yabo, ikindi turimo gufatanya n’ubuyobozi bw’ishuri kugira ngo abana baryamaga muri ibyo byumba bitatu babone aho barara ariko tunamenye ibintu byabo byahiriyemo turebe icyakorwa cy’ihuse.

Harakekwa ko byatwitswe n’amashanyarazi ariko nyuma yo kuvugana na REG batugaragarije ko atari umuriro icyakora n’insinga z’amashanyarazi ntizari ziri mu buryo butunganye. Ariko turaza gushyiraho izindi nzego z’ibizobereyemo barebe niba ntayindi mpamvu.”

Uku gushya kw’inzu zicumbikiye abakobwa mu ishuri rya Kibogora byatumye ubuyobozi bw’akarere buhagurukira gukora isuzuma mu bigo byose bicumbikira abanyeshuri kugira ngo barebe niba uburyo bwakoreshejwe bashyiramo amashanyarazi bwujuje ubuziranenge.

Urubyiruko ntiruvuga rumwe n’ababyeyi kuri gahunda yo kuboneza urubyaro

Uru rubyiruko ruvuga ko kubyara batarageza ku myaka y’ubukure kandi badafite amikoro bibangamira ejo hazaza habo bikanadindiza igenamigambi ry’Igihugu bikanateza ubukene mu miryango.

Uwitwa Ntegerejumukiza Elina ati ”Aho kugira ngo ntware inda idateganijwe kandi byananiye kwifata, nagenda nkaringaniza urubyaro.”

Niwemwungeri Diane nawe agira ati ”Ntabwo bikwiye kandi bigira n’ingaruka mbi ariko nanone ibibi birarutana, aho kugira ngo umuntu abyare abana bazajya mu muhanda, atazabasha kwishyurira amashuri, yaboneza urubyaro.”

Umuforomo mu kigo cy’urubyiruko cya Rusizi, Queen Chantal nawe ashyigikira uru rubyuruko avuga ko kuboneza urubyaro biruta kwishyiraho umuzigo wo kubyara abana badashoboye kurera.

Ati” Umukobwa watwaye inda atateguye bimugiraho ingaruka zikomeye zirimo kwitakariza icyizere, abenshi bahagarika kwiga, njyewe mbona ibyiza aho kugira ngo bacikwe batware inda baboneza urubyaro.”

Ku rundi ruhande, abenshi mu babyeyi baramagana ko abana babo baboneza urubyaro kabone n’ubwo baba bari mu gihe cyo gushinga urugo.

Basanga ari umuco mubi wo gukangurira abana gukora imibonano mpuzabitsina batarageza igihe cyo kuzuza izo nshingano.

Uwitwa Maniraho Thadée agira ati”hari ibyo tutemeranywa nko kuringaniza ku muntu ukiri umukobwa, numva ari nko kurengera kuko usibye kuba ari icyaha sinabishyigikira kuko mbona ari uburere buke tuba dutoza abana bacu”.

“Urumva ari iki nakongera kubwira umwana yamaze kumenya amabanga y’urugo akiri muto, sinumva ko n’igihe yabona umugabo bagira urugo rurambye.”

Undi mubyeyi witwa Kamariza Assoumpta yungamo ati ”urambwira umwana ngo naboneze urubyaro atarashinga urugo, atarabona umugabo, njye numva ari ukubashyigikira ngo bajye mu ngeso mbi z’ubusambanyi”.

Aba babyeyi bakomeza bamagana urubyiruko rushyigikira ko hatorwa itegeko rirwemerera kuringaniza urubyaro, kuko ngo nabo babyirutse bafite imibiri nk’iyabo ariko bakihangana kugeza igihe cyo gushyingirwa.

Ubuyobozi bw’akarere ka Rusizi nabwo bushyigikiye ababyeyi, aho busaba urubyiruko kwirinda gutekereza ibyo kuboneza urubyaro.

Umuyobozi w’aka karere, Kayumba Ephrem yaganirije urubyiruko ati ”Uringaniza urubyaro kubera ko wemerewe kubyara, mwe ntimukwiye kuba mutekereza ibyo kuko ntabwo ari urugamba rubareba.”

Tariki 22 Ugushyingo 2018, Minisitiri w’Intebe Edward Ngirente, yatangarije abasenateri ko hari guhindurwa Itegeko ryakumiraga abangavu n’ingimbi kuri serivisi zo kuboneza urubyaro, nyuma yo kugaragara kw’abatwara inda zidateganijwe benshi”.

Guverineri w’intara y’uburengerazuba Munyantwari Alphonse

Aba baturage basobanura ko hashize hafi imyaka itanu babaruriwe imitungo yabo yangijwe bakizezwa ko bazishyurwa ariko ubu ngo amaso yaheze mu kirere aha bakifuza ko ubuyobozi bwabafasha kubona amafaranga yabo bakareka gukomeza gusiragira.

Izimukwiye Colombe yagize ati “twari dufite ibishyimbo, insina, imyumbati hari hari n’ibiti by’avoka, gereveriya ndetse na kawa byose barabitema na nu’yu munsi iyo bishibutse baraza bakabitema. Njyewe amafaranga bambariye ni ibihumbi 115 naranayasinyiye ariko ndategereza ndaheba uyu ni umwaka wa gatanu.”

Zigamakwemera Dionise yungamo ati ”bakagombye kudushakira uburyo twabona aya mafaranga kubera ko ibyacu byarangijwe kandi ku mugaragaro bagiye batwaka ibyangombwa byose twabibaza bakatubwira ko biri hafi none twararambiwe kandi ntabundi bushobozi difite.”

Ntwari Joseph umuyobozi w’ikigo cy’igihugu gishinzwe ingufu (REG) ishami rya Rusizi, avuga ko ibibazo by’ingurane z’abaturage ku mitungo yabo bitajya bipfa kurangira kuko hari n’ababigiramo amarangamutima bifuza ko nabo bahabwa ingurane bitari ngombwa cyakora ngo abagifite ibibazo babizana bigasuzumwa kugirango bikemuke.

Bamwe mu baturage bo mu murenge wa Nzahaha baravuga ko REG yangije ibyabo yarangiza ntibishyure

Ati” twari twahaye ingurane abaturage bose ariko nk’uko bigenda ahantu hari ibikorwaremezo, ugenda ubona abandi bantu baza bakavuga ngo baracikanywe ngo babaruye bagiye mu murima n’ibindi. Bisaba ko abantu bafite ibyo bibazo babizana kuko ntabwo ikibazo cy’ingurane kijya kirangira iyo ahantu hari igikorwaremezo runaka ni uguhozaho tukabyigaho tukabafasha kugira ngo bikemuke.”

Guverineri w’intara y’Uburengerazuba Munyantwari Alphonse ubwo yasuraga abaturage b’uyu murenge wa Nzahaha yabijeje ko agiye kucyikurikiranira.

Ati “ibibazo bijyanye no guhabwa ingurane ku bintu byangijwe n’ibikorwa remezo turabifite byinshi ariko birimo birakurikiranwa. Ndaza gukurikirana ndebe aho biriya bigeze nabo dukore ku buryo ikibazo cyabo gikemuka.”

Ni kenshi abaturage bakunze guhura n’ikibazo nk’iki cyo kwangirizwa imitungo yabo, bakizezwa ko bazahabwa ingurane bidatinze ariko bikarangira bakoze izindi ngendo batangaho n’amafaranga menshi ku bayobozi, ngo babahe ibyabo kandi nyamara bari barabyumvikanyeho mbere.

Minisitiri w’ubutegetsi bw’igihugu Prof shyaka Anastase afungura ku mugaragaro urusengero

Ibi yabivugiye mu Karere ka Rusizi ku wa 20 Mutarama 2019, ubwo yifatanyaga n’abayoboke b’itorero ry’Abangilikani gutaha ku mugaragaro urusengero biyuzurije rutwaye asaga miliyoni 250.

Nyuma yo kwiyuzuriza urusengero rugezweho no kurutaha ku mugaragaro, abasengera mu itorero ry’Abangilikani bo muri Diocèse ya Cyangugu mu Karere ka Rusizi bavuze ko kwiyubakira urusengero nk’uru biri muri gahunda yo guhesha Imana icyubahiro.

Iyi ni yo Cathedral ya Cyangugu ya Anglican yatashwe

Bavuze ko imbaraga bakoresheje barwubaka bazakomeza kuzikoresha mu gufatanya na Leta kurandura ibibazo biri hirya no hino mu miryango itandukanye.

Nyiramunezero Yvone wabigarutseho yagize ati “Nyuma yo kubaka iyi ngoro y’Imana tugiye gufata inzira dukore ubukangurambaga mu banyarwanda bakure amaboko mu mifuka bakore twiteze imbere.”

Minisitiri w’Ubutegetsi bw’Igihugu Prof Shyaka Anastase asaba abayoboke kwishakamo ibisubizo bikemura ibibazo bafite

Ubwo yifatanyaga na bo mu gutaha ku mugaragaro uru rusengero, Minisitiri w’Ubutegetsi bw’Igihugu Professor Shyaka Anastase yabanje kubagezaho ubutumwa bw’umukuru w’igihugu bugira buti “Mugire roho nzima mu mibiri mizima”.

Nubwo yashimiye aba bakirisitu kubera ukwishakamo ibisubizo bakiyubakira urusengero, Minisitiri Shyaka yabibukije ko muri rusange amadini n’amatorero afite uruhare runini mu iterambere ry’abaturage ariko ngo amadini ntasimbura uruhare rw’umuturage agomba kugira mu kwiteza imbere.

Ati” amatorero n’amadini ni abafatanyabikorwa ndetse beza ariko ntibasimbura uruhare rwa ba nyir’ubwite ubwo rero nk’abaturage turabanza dushyiremo imbaraga mu kwiteza imbere kandi n’ibyo dufite tumenye uko tubibungabunga tubibyaze umusaruro.”

Abashumba bakuru b’itorero Anglican hamwe n’abayobozi b’inzego za Leta batashye urusengero rushya

Nyiriri icyubahiro Musenyeri wa Diocese ya Cyangugu, Bishop Rusengo Nathan Amooti avuga ko nyuma y’uru rusengero ubu igikurikiyeho ari kwagura ibikorwa hirya no hino, ubu hakaba hakurikiyeho kubaka ishuri rikuru muri aka Karere mu minsi iri imbere.

“Ati twamaze gukora umushinga, twawushyize muri WDA, dutegereje ko badusubiza. Twashatse gushyira imbaraga mu karere dutuyemo, twibanda ku mahoteli.

Urwo rusengero rwari rumaze imyaka ine rwubakwa. Rwubatswe mu buryo bugezweho bw’inyubako igerekeranye. Rumaze kujyaho miliyoni 220frw muri 250frw rugomba kuzuzura neza rutwaye ubariyemo n’imikingo iri mu mpande zarwo zose igomba gushyigikizwa amabuye.

Muri aya yose, abaterankunga batanze 40%, ayandi atangwa n’abakirisitu. Uru rusengero barumuritse nyuma y’amasaha make na none bamuritse ibyumba by’amashuri 11 iri torero ryubatse mu Murenge wa Nkombo.

Abayobozi batandukanye bitabiriye umuhango wo gutaha urusengero

Abayoboke batandukanye bari bahimbawe mu gusingiza Imana yabahaye urusengero

Minisitiri w’ubutegetsi bw’igihugu Prof shyaka Anastase afungura urusengero

Izi nzu zimaze imyaka ibiri zaruzuye ariko nta kintu gikorerwamo

Ni inzu 2 zubatse mu buryo bwa ‘four in one’ aho inzu enye ziba zubatse muri imwe, bivuze ko zose hamwe ari umunani, zikaba zishobora guturwamo n’imiryango 8.

Ziri mu Mudugdu wa Murangi muri metero nke cyane uvuye ku biro by’Umurenge wa Kamembe. Zimaze imyaka 2 zuzuye neza ariko kuva akarere kazuzuza ntacyo zirakoreshwa.

Umuturage witwa Uzabakiriho Jean ati “Izi nzu zuzuye zikaba zidatahwa zubakiwe iki? Ni ibinyugunyugu, ni ibikubakuba, ni iki? Ese ni inyoni? Abagize uruhare mu kuzubaka bazadusobanurire twebwe abaturage b’Umudugudu wa Murangi icyo izi nzu zari zigenewe.”

Inzu zitangiye kwangirika kubera kudaturwamo

Mugenzi we witwa Gashumba Aimé, na we avuga kuri izi nzu, yagize ati “Nazikozeho umuganda bajya kuzubaka ariko dutegereza inyungu iki gikorwa kizatanga turaheba. Ngatekereza nti ese uriya mushinga ujya gutegurwa bari babanje gutekereza icyo hariya hantu hazakoreshwa?”

Ubuyobozi bw’Akarere ka Rusizi busobanura ko ari inzu zubatswe mu buryo bwo gufasha abafite amikoro aciriritse kubona amacumbi, amafaranga yo kuzubaka akaba yaratanzwe n’Ikigo cy’Igihugu gishinzwe Imyubakire (Rwanda Housing Authority).

Kuba zimaze imyaka ibiri ntacyo zikoreshwa, abaturage bavuga ko bibabaje ndetse ngo bahora bikanga ko zizaba indiri y’abajura. Bifuza ko nibura zahabwa abakene badafite aho kuba, cyangwa zigakoreshwa nk’ivuriro.

Umuyobozi w’Akarere ka Rusizi, Kayumba Ephrem, avuga ko bagiye kuzituzamo abatishoboye

Ni byo uwitwa Kayiranga Emmanuel asobanura ati “Nibura iyo bazifashisha abatishoboye kuko amafaranga yazubatse ni menshi, ntihabura nibura abantu 50 badafite aho kuba baba bazibamo, none dore uducurama ni two twibereyemo, basi nibashyiremo ikigo nderabuzima.”

Umuyobozi w’Akarere ka Rusizi, Kayumba Euphrem, avuga ko icyizere cyo kubona abazikodesha cyangwa abazigura, dore ko ari cyo bari bazubakiye kimaze kuyoyoka, ubu ngo zikaba zigiye guhabwa abatishoboye aho kugira ngo zikomeze gupfa ubusa, dore ko zinagendaho amafaranga ya buri gihe yo kuzitaho no kuzicungira umutekano.

Ati “Birumvikana ko iyo inzu yuzuye ikaba idatuwemo ishobora kwangirika ariko icya mbere ni uko duhora tuzitaho, ariko tugiye kuzituzamo abatishoboye kuko twamaze kuganira na Rwanda Housing Authority yatanze inkunga yo kuzubaka, hasigaye kujya mu nyandiko noneho tugahita dushyiramo abantu kuko bamaze gutoranywa, barahari.”

Izi nzu zuzuye zitwaye akayabo k’amafaranga y’u Rwanda asaga gato miliyoni 243 n’ibihumbi 666 ubariyemo n’ikibanza zubatsemo.

Si zo zonyine Akarere kubatse zikabura icyo zimara kuko hari na ‘guest house’ ya Nkombo yuzuye ariko ikaba imaze imyaka irindwi idakorerwamo.

Ishuri rya Bugumira ryatashywe ku mugaragaro

Ni nyuma y’aho itorero ry’Abangilikani mu Rwanda rihubakiye ibindi byumba by’amashuri 11 bishya bikaba byitezweho koroshya urugendo abana bakoraga rw’ibilometero bisaga bitanu bajya kwiga kure y’aho batuye.

Ibyo byuma by’amashuri byubatswe ku kigo cy’amashuri cya Bugumira mu Kagari ka Kamagimbo, ahari hasanzwe gusa ibyumba bibiri by’amashuri na byo bishaje.

Ibyo byumba bibiri byigirwagamo n’abo mu mashuri y’incuke basaga 400 abandi bagakora ibilometero bisaga bitanu bajya gushakisha aho biga mu tundi tugari kuri iki kirwa.

Bimwe mu byumba 11 by’amashuri Umurenge wa Nkombo wungutse

Bamwe muri abo bana batungiraga umunyamakuru wa Kigali Today agatoki, bamwereka ishuri riri hakurya bigagaho, bakavuga ko byabagoraga.

Uwitwa Niyitanga Tresor yagize ati “Hari abantu bavaga iriya kure kure bakajya kwiga bambutse ikiyaga bakoze urugendo rw’iminota 30 n’amaguru!”

Ababyeyi b’aba bana bemeza ko muri aka gace hari hakenewe ishuri ukurikije ibibazo abana babo bagiriraga mu nzira cyane cyane abo mu mashuri y’incuke n’abatangira umwaka wa mbere w’amashuri abanza.

Ishuri rya Bugumira ryubakiwe ibyo byumba 11 ryahise ryitwa ’EAR Bugumira Foundation School’.

Kayumba Ephrem uyobora Akarere ka Rusizi avuga ko ni biba ngombwa bazongeraho ibindi byumba

Nyuma yo guhabwa ibyo byumba ku mugaragaro, umuturage wo ku Nkombo witwa Ndisanga Jean Claude yagize ati “Turabyishimiye kuko abana b’imyaka itanu cyangwa ine ntabwo bageraga aho abandi bigira kubera ko ari kure cyane, bategerezaga igihe bazuzuriza imyaka irindwi bakabona kujya kwiga.”

Nubwo ibyo byumba byubatswe, hari abavuga ko bikiri bike, ko hakenewe kubakwa andi mashuri. Babihera ku kuba hari aho mu ishuri rimwe usangamo abana basaga 60 mu gihe nyamara ngo batakabaye barenga 40.

Umuyobozi w’Akarere ka Rusizi, Kayumba Euphrem, yavuze ko bagiye kubanza kwicaza abana muri ibi byumba bishya bungutse hanyuma bakazareba ahagikenewe andi mashuri bakabona gutekereza kuyongera.

Ababyeyi bakiranye ubwuzu iri shuri

Ku kirwa cya Nkombo kugeza ubu hari amashuri yisumbuye atatu, abanza ane n’ay’incuke atanu. EAR Bugumira Foundation School ribaye ishuri rya kabiri ryubatswe n’itorero ry’Abangilikani.

Ryuzuye ritwaye miliyoni 130 z’amafaranga y’u Rwanda rikazatangira kwigirwamo umwaka utaha. Iryo shuri rifite ubushobozi bwo kwakira abanyeshuri 560.

Aya ni amatoni y’umuceri ashobora kwangirikira mu bubiko mu gihe atabona uyagura

Amafaranga 20 y’ikinyuranyo ni yo yatumye batumvikana, aho abahinzi bashaka kwishyurwa amafaranga 310 ku kiro, mu gihe ba nyir’izi nganda ngo batarenza 290 na bwo basobanura ko ari nko kugirira impuhwe abahinzi.

Muri izi mpaka, ba nyir’inganda bari bahibereye naho abahinzi baravugirwa n’abahagarariye amakoperative yabo muri iki kibaya.

Mukasine Drocella ni umwe mu bahagarariye abahinzi ati ”umuhinzi aba afite icyizere ko igiciro yaguriweho n’ubutaha yakigurirwaho cyangwa bikazamuka. Yego birashoboka ko mwatubwira ngo cyagabanutse ariko kuvuga ngo cyagabanutseho amafaranga 24 byibura mutavuga ngo wenda murakuraho 10 natwe tukagira aho dufatira, ariko gutsimbarara ngo ni 290 wanjya mu mibare ugasanga ni 24 ari kuvaho, murumva twabyemera? Nimureke gutsimbarara kuri icyo giciro namwe.”

Mu gihembwe gishize, ikiro cy’uyu muceri udatonoye cyari amafarnaga 314. Ba nyir’inganda bati “byadutuye mu gihombo, ntidushobora kongera kuwugura kuri ayo mafaranga”.

Ndagijimana Laurent uhagarariye inganda z’umuceri zikorera muri iki kibaya cya Bugarama ati “kugura umuceri udatonoye ku mafaranga arenze 290 bishyira uruganda mu gihombo.”

“Ntabwo wagabanya ifaranga rimwe cyangwa ane cyangwa angahe nta kintu ushyingiyeho utabanje kujya kureba uko isoko rimeze kuko nitwe tuririho. Twasanze amafaranga 310 ari menshi… ntabwo inganda zashobora gukora ubwo bucuruzi ngo zibeho.”

Ni impaka byarangiye nta cyo zigezeho dore ko nta giciro cyemejwe. Umuyobozi w’akarere ka Rusizi Kayumba Euphrem yavuze ko ubwumvikane nibukomeza kubura buri ruhande rufite uburenganzira bwo gushaka amasoko ahandi.

Ati ”niba aba bari hano batabashije kumvikana igikurikiraho ni uko bashobora kujya kugura umusaruro ahandi bakaza bakawutunganya, kimwe n’uko abahinzi bahano bafite uburenganzira bwo kugurisha n’undi uwariwe wese utunganya umusaruro. Isoko rirafunguye nibaramuka batumvikanye buri wese afite uburenganzira bwo kugurisha umusaruro we aho ashaka hose.”

Muri iki kibaya cya Bugarama hari inganda enye zigomba kugura umusaruro wose w’umuceri uhwanye na toni 7900 zeze muri iki gihembwe utabariyemo izindi zitazwi umubare abahinzi bavuga ko ziri mu bubiko bw’amakoperative yabo.

Haribazwa niba mu gihe izi nganda zitawubagurira hashobora kuzaboneka izo hanze ya Rusizi zabasha kuziba icyo cyuho, mu gihe zitaboneka na bwo hakibazwa uko abahinzi babyifatamo.

Kayumba Ephrem umuyobozi w’Akarere ka Rusizi asanga ikibazo cy’abarobyi n’abacuruza isambaza gikwiye kurangira burundu

Ni nyuma y’uko hashize amezi atatu hagaragara ikibazo cy’ubwumvikane buke bushingiye ku biciro hagati y’abarobyi b’isambaza mu kiyaga cya Kivu, n’umushoramari ari we ‘Projet Pêche’ ndetse n’abacuruzi bazo ku ruhande rw’Akarere ka Rusizi.

Izi mpande eshatu zose ziritana ba mwana ariko abacuruzi n’abarobyi bagasobanura ko ahanini ikibazo bafite bagiterwa na Projet Pêche kuko ngo igurira abaroba isambaza ku giciro gito yo igahita izigurisha abacuruzi b’amakoperative ku giciro kiri hejuru ibi bigatuma umuguzi wa nyuma na we azibona zimuhenze.

Uwitwa Ngendahayo Thomas ati” icyo abarobyi bakeneye kugeza uyu munsi ni ukugurirwa isambaza ku giciro cyiza. Rwiyemezamirimo aze tuvugane igiciro isambaza zagurwaho, tubirangije ibindi byose byakwikora.”

Abarobyi basaba ko Projet Pêche yazamura igiciro ibaguriraho isambaza

Abacuruza isambaza na bo basobanura ko imikorere ya Projet Pêche yatumye ubucuruzi bwabo buhungabana kuko abarobyi bashora umusaruro muri Repubulika ya Demokarasi ya Congo, undi bakawugurisha mu buryo bwa magendu, aho babona amafaranga menshi. Abarobyi n’abacuruzi b’isambaza basaba umushoramari guhindura imikorere ifasha buri wese kunguka nk’uko uwitwa Nyirahabimana Christine abisobanura.

Ati “Mu minsi yashize mu masezerano twari dufitanye na Projet Pêche, ntabwo abarobyi bazanaga umusaruro kuri uwo mushinga ahubwo bawujyanaga muri Congo, abandi bakawugurishiriza mu bihuru, ariko umushoramari akoze amasezerano neza akubahirizwa twakorana neza kuko natwe twaba tubifitemo inyungu.”

Hakizimana Madjaliwa uhagarariye Projet Pêche yavuze ko bagiye gushyira mu bikorwa ibyifuzo by’abarobyi n’abacuruzi b’isambaza kugira ngo hanozwe imikoranire ntawe ubangamiye inyungu za mugenzi we.

Ati “Ikintu nemereye abarobyi ni uko ngiye guhindura ikipe yose yakiraga umusaruro yagiranaga ibibazo n’abarobyi baduha umusaruro, bariya badamu bose batavuga rumwe ngiye kubavanaho, ibintu bibabangamiye byose twumvikanye ko tubivanaho tugakorana neza nta kibazo dufitanye n’abarobyi.”

Bamwe mu bacuruzi b’isambaza bavuga ko Projet Pêche ari yo yabateje ikibazo

Mu myanzuro yavuye mu nama yahuje ubuyobozi bw’Akarere ka Rusizi n’abagira uruhare mu kuroba no gucuruza isambaza harimo uvuga ko abacuruzi b’isambaza bo mu Karere ka Rusizi bagiye kujya bazigurira ahabugenewe hatari ku ihuriro ry’abarobyi riri mu gasanteri ko mu Budike mu Murenge wa Gihundwe nk’uko byari bisanzwe kandi ku giciro cyumvikanyweho n’impande zose kandi ntawe uhenzwe.

Kayumba Euphrem, umuyobozi w’Akarere ka Rusizi ati “Twumvikanye ko izi mbogamizi zakurwaho n’uko Projet Pêche igomba kwegera abarobyi ikabumva kuko ari bo bakiriya bafite ikindi bakumvikana ku giciro ku buryo umurobyi adahendwa. Ikindi Projet Pêche ntigomba gucururiza aho yafatiye umusaruro, igomba kuwujyana ahabugenewe, abacuruzi bakaza kuwuhagurira kandi ntigomba gushaka inyungu z’umurengera kuko icyo tureba ni uko umuturage wese agomba kubona isambaza ku giciro kimworoheye. Nibabyubahiriza ntituzongera kumva induru.”

Kugira ngo isambaza zigere ku muguzi wa nyuma, zibanza guca mu nzira ndende aho Projet Pêche yaziguriraga umurobyi ku mafaranga 1800 ku kilo igahita izigurisha ako kanya ku mucuruzi ku mafaranga 2100 naho abaryi bazo bakazibona ku mafaranga 3500 ku kilo kimwe. Icyo kinyuranyo mu biciro kikaba ari na cyo gitera ibibazo bikunze kuvugwa mu bucuruzi bw’isambaza.
Mu yindi myanzuro harimo ko Nyuma y’iyi nama, biteganyijwe ko uruhande rutazubahiriza ibyayivuyemo ruzajya rucibwa amande y’ibihumbi ijana.

Nsengumuremyi Jacques perezida wa koperative avuga ko bateye imbere kurusha mbere bacyangiza Nyungwe

Mu buhamya bw’abaturage b’iyi mirenge bahuriye kuri iyi pariki y’igihugu ya Nyungwe, agashami kayo ka Cyamudongo humvikanamo ukuntu ubuzima bwabo bwose bwari bushingiye ku kwinjira muri iri shyamba mu bikorwa binyuranye kandi mu buryo bunyuranyije n’amategeko.

Umwe muri bo witwa Gahunga Anicet agira ati “Njyewe ubwanjye sinavuga ngo nishe inyamaswa 10 cyangwa zingahe, nishe nyinshi twicaga impongo, isha impondo, inkoto, cyakora inyamaswa ntigeze nkozaho icumu ni izi basura kuko zitakundaga gusohoka twari twarabigize umwuga kuko inyamaswa ntiyakurikirwa n’abantu 10 n’imbwa zirenga 20 ngo iyo nyamaswa izazivemo.”

Bishyize hamwe muri Koperative bashaka ubundi buryo bwo kubaho

Nyuma yo kwigishwa ibyiza byo gufata neza pariki, aba baturage bahinduye imyumvire maze bareka kuyangiza, ahubwo batangira gutekereza uko bayibyaza umusaruro mu buryo bwemewe n’amategeko.

Ni muri ubwo buryo bahise bakora koperative yitwa Cyamudongo Tourism Promotion Cooperative. Ku rwinjiriro rw’iyi pariki, abagize iyo koperative bahubatse inzu zo kwakiriramo abashyitsi ku buryo uje gusura Cyamudongo ashobora kuhafatira ifunguro ndetse akaba yanabagurira bimwe mu bikoresho bya kinyarwanda ba mukerarugendo bakunda. Muri byo harimo amashusho y’inyamswa babumba ziba ziganje mu ishyamba rya Cyamudongo.

Nsengumuremyi Jacques, perezida w’iyi koperative ati “Buri kwezi dufata amafaranga yinjiye 30% ndetse tukajya gusobanurira ba mukerarugendo ibyo dukora tukababyinira amafaranga abonetsemo tukayagabanya abanyamuryango bacu. Ubu nta munyamuryango ufite ikibazo kinini kimuhangayikishije.”

Undi munyamuryango witwa Mukandekezi Adrienne avuga ko ubu yorojwe ingurube ivuye muri iyo koperative, ikaba ibyaye gatatu.

Ati “Urabona ahantu tumaze kwigurira, dushyize hasi buri wese ntiyabura ibihumbi magana inani, iyi pariki ya Cyamudongo yatugejeje kuri byinshi byiza.”

Ibi ni bimwe mu byo bakora bakabigurirwa na ba mukerarugendo

Sindayiheba Aphrodis Umunyamabanga nshingwabikorwa w’umurenge wa Nkungu ari na wo murenge ufite igice kinini cya Cyamudongo asaba iyi koperative gukomeza kwigisha n’abandi baturage bashobora kuba batarahindura imyumvire.

Ati” Ikijyanye n’ubuhigi muri pariki cyo kimaze kurangira ariko hari abagitekereza gucana inkwi bakuye muri pariki, kugaburira inka ibyatsi bakuye muri Pariki, utwo ni two turi kurwana na two tubikangurira aba banyamuryango kugira ngo babibwire bagenzi babo kuko bidakumiriwe byabyara ibyo twavuyemo.”

Koperative Cyamudongo Tourism Promotion yatangiye muri 2009 igizwe n’abanyamuryango 60 harimo abagabo 20 n’abagore 40.

Abahinzi b’icyayi barasaba ko bafashwa kubona imbuto yacyo ngo bahinge cyinshi

Habiyambere Theogene ni umwe muri aba bahinzi bemeza ko ingemwe z’icyayi bazibuze ngo bongere ubuso bagihingaho dore ko ngo ubwabo batashobora kuzitunganyiriza, bagasaba uruganda rwa Gisakura bagemurira icyayi kubafasha kubona ingemwe zacyo.

Ati ”urabona abaturage dufite ubutaka dushaka guhingaho icyayi ariko ikibazo uruganda nirwo ruhumbika ingemwe ntabandi bazihumbika usibye uruganda kuko guhumbika birahenda... bisaba ingufu nyinshi; ifumbire mvaruganda, umukozi uhoraho kandi icyahumbitswe kijya guterwa hashize umwaka urumva ntamuturage wabishobora bisaba ingufu za Leta”.

Ntawiha Ruth yungamo ati ”ndi umuhinzi ufite hegitari imwe na are 84 ariko impamvu ntari kongera ubuso ni ikibazo cy’ingemwe nyakubahwa muyobozi muturwaneho imirima yacu ikeneye ingemwe.”

Umuyobozi w’uruganda rwa Gisakura Mungwakuzwe Yves yizeza abahinzi ko umwaka utaha aribwo bazabona imbuto

Baravuga ko uku gutinda gutera ikindi cyayi byabateye igihombo kuko basabwe guhinga imirima inshuro zirenze imwe basubiramo none amezi atanu arashize batarabona ingemwe.

Nkunzamahanga Jonas ati ” Iyo bavuga bati ntambuto tuzabona ubu ibijumba biba byareze cyangwa imyumbati none hapfuye ubusa.”

Umuyobozi w’uruganda rwa Gisakura Mungwakuzwe Yves arizeza aba bahinzi ko nyuma y’umwaka umwe uhereye ubu ,ingemwe ziri gutegurwa zizaba zigeze igihe cyo kugemuurwa ariko kandi ngo uruganda rukazanabigisha uburyo bwo kuzitegurira.

Ati ”turimo gutegura ingemwe muri uyu mwaka dufite ingemwe zisaga miriyoni esheshatu. Tugiye gushyiramo imbaraga mu ntangiriro z’uyu mwaka dutangirane nawo kugirango tuzakemure icyo kibazo. Urugemwe rw’icyayi rutegurwa amazi 12 ikindi ni uko tugiye kubigisha uko bategura ingemwe kugira ngo bajye bateganya uburyo bazajya bazibona ku giti cyabo.”

Ubuyobozi bw’uru ruganda rutangaza ko ruri gutegura ingemwe zigeze kuri miliyoni esheshatu zose zikazahabwa abahinzi mu kubafasha kongera ubuso bw’iki igihingwa kiri kuri hegitari 1333.

Ingemwe zikenewe zigera ku bihumbi 700, zizajya k’ubuso busaga hegitari 50, nk’uko umuyobozi w’uruganda rwa Gisakura yabitangarije Kigali Today.

Uyu muyobozi kandi yavuze ko abahinzi bashobora guhinga ibindi bihingwa bimara igihe gito mu murima, ku butaka bwabo, mu gihe bagitegereje ko ingemwe ziboneka.

Abaganga barita ku wigize nk’umurwayi wa Ebola

Ku bitaro bya Gihundwe, ni hamwe mu habereye icyo gikorwa. Abaganga n’abandi bafite aho bahuriye na serivisi z’ubuzima babanje gutegurwa nk’abagiye kwakira umurwayi wa Ebola ari na ko banyuzwa muri buri cyiciro cyose gikurikizwa mu gufasha umurwayi, byose bakabikora birinda ko na bo bashobora kwanduzwa na we mu gihe yaba arwaye.

Dr. Ndimubanzi Patrick, Umunyamabanga wa Leta ushinzwe ubuzima rusange n’ubuvuzi bw’ibanze.

yagize ati ”Ibi turabikora kugira ngo turusheho gukangurira abaturage kumenya icyo bagomba gukora, kumenyereza abaganga uko bagomba kubyifatamo, kandi turushaho kwitegura, nubwo nta Ebola dufite icyambere ni ukwirinda.”

“Kwirinda ni ugukaraba kenshi, iyo ubonye umuntu ufite ibimenyetso bya Ebola, ufite umuriro akava amaraso wirinda kumukoraho ugahita utumiza abaganga ariko ugakomeza kugira isuku ukaraba n’isabune.”

Dr. Ndimubanzi Patrick avuga ko u Rwanda rwiteguye guhangana na Ebola mu gihe yakwaduka

Bamwe mu batuye mu Karere ka Rusizi nka kamwe mu dushobora kwibasirwa na Ebola bavuga ko bafite ubumenyi kuri Ebola ariko hakaba abandi batayisobanukiwe neza, bagasaba ko barushaho guhabwa ubumenyi bw’ibanze kuri Ebola.

Ministeri y’Ubuzima ivuga ko gahunda ihari ari iyo gukomeza guhugura ku buryo buri bitaro byo mu Rwanda bizaba bifite abaganga bahawe ubwo bumenyi.

Amahugurwa nk’ayo amaze guhabwa abaganga n’abakozi bo mu rwego rw’ubuzima basaga 80 bahuguwe banashyikirizwa ibikoresho byabugenewe mu bitaro bitatu ari byo: Gisenyi muri Rubavu na Gihundwe muri Rusizi (uturere twombi dufite imipaka ikora kuri RDC), ndetse n’ibitaro bya Kanombe mu mujyi wa Kigali ahateguriwe kuba hafashirizwa abakoresheje inzira y’ikirere bashobora kugaragaraho Ebola.

Abaganga bambara imyenda yabugenewe ituma batanduzwa n’umurwayi wa Ebola

Mu Karere ka Rubavu mu Murenge wa Rugerero ho hanashyinzwe ibitaro byihariye byavura ababa bagaragayeho Ebola.

Hari kandi ahantu hagera kuri 17 hasuzumirwa abinjira mu gihugu baturutse muri Repubulika iharanira Demukarasi ya Kongo nk’igihugu kivugwamo Ebola.

Iyo imvura iguye abarirema bajya gushaka ahandi bugama

Ni isoko rigaragara ko ryari kwitwa irya kijyambere ariko uko rihagaze ubu biratandukanye. Iyo imvura iguye muri iri soko, abaje kugurisha no guhaha bose bajya gushaka ahandi bugama kuko riva hafi ya ryose.

Nizeyimana Claude ati” Isoko ryacu rirava cyane birenze, iyo imvura iguye abantu bose b’abacuruzi barazinga bakajya gushaka aho babika ibintu, urumva duhita duhomba kuko nta mukiriya ushobora kuza mu biziba.”

Iri soko ntirifite ibikorwa remezo by’ibanze cyane cyane amashanyarazi, hakaniyongeraho no kutagira ububiko bw’ibyo bacuruza. Buri gihe uko batashye barabyikorera bakabitahana. Inzugi zaryo zose nta ziriho , imiryango yaryo nay o irarangaye.

Iri soko rya Kijyambere abarirema bifuza ko ryakingwa, rigahabwa umuriro ndetse rikarangwa n’isuku

Uwitwa Mukeshimana Celestin uricururizamo ati “Amasoko ya Kamembe tujya tuyatunda, abacuruzi iyo batashye babika ibintu byabo bakazagaruka babisanga ariko iri soko ntibyashoboka kuko ntirinakingwa.”

Muri iri soko hagaragara imyanya ipfa ubusa yakabaye ikorerwamo n’abantu ariko batinya kuhaza kubera kwanga kunyagirwa ahubwo bagahitamo kujya kudandaza ibicuruzwa byabo hanze y’isoko.

Isuku y’iri soko na yo irakemangwa kubera ko risa n’iridafashwe neza. Abarema iryo soko bamaze imyaka myinshi bagaragaza iki kibazo, ari na ko batanga imisoro n’amafaranga y’isuku buri gihe uko ryaremye, bagatekereza ko ayo mafaranga yakoreshwa mu kuriteza imbere, nyamara ntihagire igikorwa.

Isoko rya Gishoma rifatiye runini abarirema bo mu Rwanda no muri Congo

Umuyobozi w’Akarere ka Rusizi Kayumba Euphrem yabwiye Kigali Today ko ibyo bibazo bagiye kubikemura mbere y’uko uyu mwaka w’ingengo y’imari urangira.

Ati “Iki kibazo twarakimenyeshejwe ndetse twaranahasuye nk’ubuyobozi bw’Akarere twemeza ko tuzagerageza kureba amafaranga yo gushyiramo amashanyarazi ndetse n’aho hava tukahasana kugira ngo bakore mu mudendezo, ndetse harangwe n’isuku.”

Isoko rya Gishoma riri muri metero zitarenze 100 uvuye ku biro by’Umurenge wa Rwimbogo riherereyemo rikaba rifatiye runini abaturage b’Akarere ka Rusizi hafi ya bose ndetse n’abanyamahanga cyane cyane abava muri Repubulika iharanira Demokarasi ya Congo.

Aba bahinzi ngo bamaze imyaka irenga 30 bahinga icyayi ariko batazi uko kiryoha

Ni abahinzi bibumbiye mu makoperative abiri ariyo coopthe vigi na Coopthe Mwaga.

Benshi babyirutse basanga imiryango yabo ihinga icyayi na bo bakomerezaho. Mu myaka isaga 30 benshi bamaze bagihinga, amafaranga yacyo barayazi ariko ngo iby’uburyohe bwacyo babyumva nk’abandi bose batanagihinga.

Nkunzamahanga Jonas ati ”ni ukubona ngisoroma gusa ntabwo ndagisomaho iyo twumva ku masoko mpuza mahanga ngo icyayi cy’u Rwanda cyabaye cyiza kiraryoshye ariko njye munyarwanda ugihinga ugikorera isuku nkaba ntaragisomaho birambabaza.”

Bakomeza kuvuga ko mu minsi ya kera bajyaga bagisekura mu isekuru ngo nibura na bo bumve uko icyanga cyacyo kimera. Ariko nabyo basanze ngo nta mumaro.

Habiyambere Theogene ati ”ku girango twumve uburyohe bwacyo twaragisoromaga tukagisekura tukanika cyamara kuma tukagiteka nkakurya bashyira amayani mu icyayi ariko twasanze ari ukwangiza turabireka.”

Ntawiha Rusi watejwe imbere n’ubuhinzi bw’icyayi nawe yasabye ko bashyirirwaho aho bazajya bakigurira

Aba bahinzi barashaka ko bashyirirwaho uburyo buboroheye bwo kugura icyayi cyo kunywa cyane ko ngo aribo baba banakivunikiye.

Habiyambere akomeza agira ati ”nubwo kiduha ku mafaranga ariko dukwiye no kukinywa wowe waba ufite inka ukifuza ko abandi bahora banywa amata y’inka yawe wowe utazi uko ameze bazaduhe isoko ryacu abahinzi tujye tubona ku cyayi cyacu twahinze.”

Yves Mungwakuzwe umuyobozi w’uruganda rwa Gisakura yahise yizeza ko aba bahinzi bagiye kujya bakibonera mu makoperative guhera mu ntangiriro z’umwaka wa 2019.

Ati ”nibyo ibyo bavuga ni ukuri mu gihe tumaranye iki kibazo bagiye bakingezaho ariko mu kugishakira umuti niyambaje inama y’ubuyobozi yacu twumvikana ko abaturage twabagezaho icyayi bakakibona mu makoperative iwabo bizadufasha no kuzamura ubwiza bw’icyayi bumva n’impamvu kandi turatangirana nabyo uyu mwaka.”

Aba bahinzi b’icyayi bakorana n’uruganda rwa Gisakura baragera ku 1937 bakaba ari na bo basaba koroherwa no kubona icyayi cyane cyane numero ya mbere ngo bumve uko imera.

Bavuga ko babikwiriye kuko nko Ku muhigo w’umusaruro bari biyemeje kwinjiza muri uyu mwaka wa 2018 barengejeho 2% aho bageze kuri 102% ndetse bakaba biyemeje kuzarenzaho akandi 7% umwaka utaha wa 2019, kubera uburyo bari kugenda bagura ubuhinzi bw’icyayi bahinga cyinshi.

Yves Mungwakuzwe umuyobozi w’uruganda rwa Gisakura yijeje abahinzi b’icyayi ko bagiye gutangira kukibona guhera muri uku kwezi kwa mbere

Icyakora mu kurushaho kubereka ko bazirikana imvune yabo,ubuyobozi bw’uru ruganda bwashimiye abahinzi bose bunabafasha gusoza umwaka wa 2018 hakaba hanahembwe indashyikirwa muri bo bahawe inka 5,ihene 28 na telephone 12.

Kugeza ubu icyayi kigemurwa mu ruganda rwa Gisakura kirahingwa kuri hegitari 1333.Ni uruganda rutunganya toni 40 z’amababi ku munsi ari na yo avamo icyayi cyoherezwa mu mahanga.

Abanyeshuri bari gutozwa bo mu karere ka Rusizi bari gushyiraho morale

Aba basore n’inkumi barangije amashuri yisumbuye baravuga ko bazi neza icyo bagiye kumara ku rugerero mu mezi atandatu yose cyane cyane ngo imboni bamaze kuyitera ibibazo bibangamiye imibereho myiza y’ abaturage.

Njamahoro Daniel ati ”hari aho unyura ugasanga hari abaturage badafite ingarani, ubwiherero, uturima tw’igikoni, bafite isuku nkeya, imirire mibi n’ibindi. Tuzabasha kuba abakangurambaga b’ibyo byose tubabwire ibyiza byabyo tunabafashe kubigeraho.”

Umutoniwase Aline yungamo ati ”Tuzitangira igihugu tubafasha guhindura imyumvire ndetse tunabaha n’ingero z’ibyo bagomba gukora kugira ngo bikemurire ibibazo bibugarije.”

Baravuga kandi ko kubera ukuntu bamaze gusobanukirwa n’indangagaciro yo kwigira n’ubunyarwanda, aya mezi yose bazayamara bemye, badatekereza agahimbazamusyi bakorera igihugu na bo bikorera.

Abatoza bari gutoza n’abayobozi

Umutoniwase akomeza agira ati ”Njyewe nkurikije ukuntu nakunze indangagaciro yo gukunda igihugu nta gahimbazamusyi nshaka ahubwo ngomba gutanga imbaraga zanjye nk’urubyiruko kugira ngo igihugu gitere imbere.”

Umuyobozi w’Akarere ka Rusizi, Kayumba Ephrem, avuga ko iyi migambi y’uru rubyiruko Akarere kari kayiteze kandi ngo kizeye neza ko itazabura kubyara umusaruro. Icyakora uyu muyobozi asaba uru rubyiruko gukomeza kurangwa n’indangagaciro zose ziranga umunyarwanda nyawe.

Ati ”Nta gushidikanya ko mu mezi atandatu bazamara batozwa bazadufasha gukemura byinshi cyane ibibazo by’abaturage batishoboye bakibana n’amatungo mu nzu, kunoza isuku, kubaka ubwiherero,... rero ni amaboko afite imbaraga azadufasha gucogoza ibyo bibazo.”

Akomeza agira ati ”icyo tubifuzaho cyane ni ukugira umutima wo kumva ko ari Abanyarwanda kandi bagomba gusigasira indangagaciro ziranga umunyarwanda nyawe harimo uko gufashanya n’ibindi.”

Mbere y’uko aya mezi atandatu y’urugerero atangira, mu gihugu hose abasore n’inkumi barangije icyiciro cya kabiri cy’amashuri yisumbuye bakabakaba ibihumbi 54 barabanza gutozwa indangagaciro na kirazira by’umuco nyarwanda hagamijwe guteza imbere igihugu no kuzamura imibereho myiza y’umuryango nyarwanda.

Mu Karere ka Rusizi, abagera ku 2549 ni bo barimo gutorezwa ku masite ane bakaba ari na bo bazakomereza ku rugerero mu midugudu yabo iri mu mirenge 18 yose igize Akarere ka Rusizi.

Nyandwi, umwuzukuruza wa Ndagano uzi amateka menshi ku byaranze u Bukunzi

Nyirandakunze yari umugore w’umutware wategekaga u Bukunzi witwaga Ndagano Ruhagata na we akaba yari umuvubyi w’imvura akanamenya kugenzura imihindagurikire y’ikirere.

Bahitiriye uyu mugore bitewe n’uko ngo yari yarajujubije umugabo we akamuganza, kuba igishegabo kwe bituma ari we umenyekana kurusha umugabo we maze ahita yitirirwa ako gace kose ndetse n’ishyamba rihita rimwitirirwa (Nyirandakunze).

U Bukunzi bwayoborwaga na Ndagano, umugabo wa Nyirandakunze, ni mu cyahoze ari Perefegitura ya CYANGUGU ibumbatiye Komini ya Karengera na Nyakabuye (ubu ni mu Mirenge ya Nkungu, Nyakabuye, Gitambi na Nyakarenzo mu Karere ka Rusizi ndetse n’uwa Karengera mu Karere ka Nyamasheke).

Aya mateka ya Nyirandakunze tuyakesha Umusaza witwa Nyandwi Christophe, w’imyaka 66 uvuga ko ari umwuzukuruza wa Ndagano.
Nyandwi Christophe ahamya ko Ndagano yari umuvubyi koko.

Ati” Ndagano yayoboye Ubukunzi abihawe na Musinga, yajyaga kwa Musinga i nyanza, yagerayo imvura akayivuba ikagwa yamara kugwa Musinga akamuha inka nziza zikaza ziguranywe imvura kubera ko yaguye.”

Ndagano yari yarashakanye n’umugore witwa Nyirandakunze. Icyakora nubwo yari umutware,ntibyabujije uwo mugore we kumuganza maze anamubuza amahwemo kugeza ubwo amugambaniye aramwicisha kugira ngo akunde yiyitirire ndetse agire ijambo muri ako gace kose. Uko ni na ko byaje kugenda, aramwivugana ndetse ngo anakurikizaho n’abandi bantu, atangira kumenyekana gutyo n’i bwami baramumenya.

Umusaza Nyandwi usobanura aya mateka ati ”Nyirandakunze yaje gushaka uburyo yiyicira umugabo, amuha uburozi, apfa avuga ko yishwe na Nyirandakunze ariko atuma kwa Musinga ngo azamuhorere. Nyirandakunze yahise akomerezaho kwica abantu ndetse afashwa n’umukwe we umutekano urabura abaturage bamwe bahita bajya i bwami i Nyanza kujya kuvuga ko umugore yamaze abantu.”

Ndagano wari n’umuvubyi amaze gupfa, byababaje ibwami cyane, maze umwami Musinga wari uganje yohereza abazungu ngo baze kumurebera icyo gishegabo. Bahageze Nyirandakunze yabahungiye mu ishyamba rigihari na magingo aya bamukurikiramo ndetse barimutsindamo ari na ko kurimwitirira.

Ku munsi wakabaye uw’ibyishimo, akababaro kari kose ku bageni

Gusezerana imbere y’Imana byari biteganyijwe ku I saa munani ariko ntibabasha kubahiriza amasaha kubera ko imvura yaguye ndetse bakabura imodoka bakahagenda n’amaguru, kugeza ubwo Pasiteri Pasiteri Ntakirutimana Samuel abasabye gutega moto kugirango bubahirize amasaha.

Ubwo bageraga ku rusengero, umujyanama w’urusengero yababwiye ko bagomba kwishyura amane y’ibihumbi 15 by’ubukererwe bitaba ibyo ubukwe ntibube.

Abageni n’ababaherekeje bagerageje ibishoboka byose, harimo gusaba imbabazi Pasiteri, kwishakamo ayo mafaranga ariko byose biranga, pasiteri afata icyemezo cyo gukinga urusengero abageni baritahira n’abari batashye ubukwe basubira iyo bari baturutse bumiwe.

Kugeza ubu aba bageni bavuga ko bahuye n’ibibazo bitoroshye byo guhomba kubera ko ibyo bari bateguriye abashyitsi mu bukwe bitabagezeho, kuko abantu bahise bataha ubukwe butarangiye, ibi byose bakavuga ko Pasiteri Ntakirutimana ariwe wabiteye.

Abageni mu rugo rwa bo n’akababaro kenshi ko kuvutswa ibirori bari bamaze igihe bategura

Sibomana Donath ariwe mukwe agira ati ” Twagendaga tuvugana amakuru y’ikibazo twahuye nacyo cyo kubura Imodoka n’imvura yaguye tugeze shangazi tuvuye gusaba ati mufate moto, mpageze umujyanama ati pasiteri yavuze ko nudatanga ibihumbi 15 utaribushyingirwe mbaza Pasiteri nti ‘uramfasha iki?’ arambwira ati ibyo bakubwiye niba utabikoze singushingira birangira akinze urusengero turataha.”

Mukamuganga Monique wari witeguye gushyingirwa, yagize ati ”Byarambabaje cyane usibye ko kwihangana ari byiza... icyanteye agahinda gakabije ni uko hari abari biyemeje kuzatwishyurira ayo mafaranga ariko Pasiteri agakinga urusengero akigendera.”

Bamwe mu baturage bari batashye ubukwe bavuga ko baguye mu kantu babonye Pasiteri yanze gushingira abayoboke be, bakavuga ko yari kwihangana nk’umukozi w’Imana akabasezeranya kuko impamvu zatumye bakererwa zumvikanaga.

Mukasibo Seraphine wari watashye ubu bukwe bwapfuye yagize ati ”umuntu ntiyagukorera ubugome bungana gutya ngo ubyibagirwe ... Ese hari ikitihanganirwa kibaho? naravuze nti ese kuba ari Pasiteri yararambitsweho ibiganza ntiyagombaga kwihangana? Abantu bose imitima yabo yarashegeshwe kubera iki kintu Pasiteri yadukoreye.”

Twagerageje kuvugisha Pasiteri Ntakirutimana Samuel wo mu itorero Methodiste Libre Paruwasi ya Mwito ntiyabasha kwitaba telefone ye igendanwa, ariko umubwiriza waryo muri Conference ya Kinyaga Pasiteri Habiyambere Celestin avuga ko yagerageje gukosora amakosa mugenzi we yakoze akabwira undi mu pasiteri ngo ajye kubashyingirira mu rugo rwabo kuko bwari bwamaze kwira ariko abageni bakabyanga.

Ati ”Ntabwo dushingira abantu kubera amafaranga.. ntabwo iyo mihango igurwa pasiteri naramuvugishije mubwira ko yari koroshya ibintu. Njye nk’umuyobozi nagerageje kwirengagiza amakosa yakozwe ku mpande zombie, nohereza undi muntu ngo abashingire mbisabye umukwe arabyanga ngo bwamaze kwira.”

Aba bageni bahise bitahira mu rugo rw’umusore bakabana nk’umugore n’umugabo, bavuga ko ubu bafite ihurizo rikomeye, kuko bibaza niba bazafatwa nk’abashyingiwe cyangwa se bazafatirwa ibihano nk’abishyingiye.

Abatuye Umurenge wa Nyabitekeri bavuga ko aka gasoko bakoresha ari amaburakindi

Akarere ka Nyamasheke ni kamwe mu turere tudakunze kwibasirwa n’inzara kuko ubutaka bwaho bwera. Ariko abaturage bavuga ko umusaruro ubapfira ubusa kuko udashobora kugera ku isoko.

Urugero ni urw’abatuye mu Murenge wa Nyabitekeri ubarirwa mu mirenge y’icyaro, bavuga ko beza imyaka bakabaye bashora mu masoko ariko ngo imyinshi ikabapfira ubusa.

Ntimugura Vedaste, umwe muri abo baturage avuga ko nta bashoramari bahagera kubera kutagira umuhanda, ndetse nta n’isoko ngo na bo ubwabo bahahirane hagati yabo.

Agira ati “Icya mbere cyatumye tutagira isoko ni uko nta muhanda tugira, nta kinyabiziga na kimwe cyagera ino kije gupakira imyaka keretse abavuye kure baje kugura duke bajyana kurya.”

Ibyo bibatera guhora mu bukene bitewe n’uko ibyakagombye kubateza imbere bitabona amasoko, nk’uko byemezwa na Byiringiro Jacques.

Umunyamabanga nshingwabikorwa w’Umurenge wa Nyabitekeri Twagirayezu Zacharie

Ati “Iyo imyumbati yeze hano ikilo tukigurisha 100Frw, kugira ngo umuntu abone Mituweli hano biba bikomeye.”

Umunyamabanga nshingwabikorwa w’Umurenge wa Nyabitekeri, Twagirayezu Zacharie, avuga ko ubuyobozi bw’akarere buzi icyo kibazo ariko bari mu ngamba zo kugikemura n’ubwo nta gihe gitangwa bizaba byakemukiye.

Ati “Umuyobozi w’akarere yakiganiriyeho nya Minisitiri wareberaga akarere ka Nyamasheke kandi hari icyizere batanze ko mu gihe cya vuba uyu muhanda ushobora gukorwa. N’ikibazo cy’isoko twakigejeje ku karere dutegereje ko mu ngengo y’Imari ya 2019-2020 bashobora kuryubaka.”

Ikibazo cyo kutagira ibikorwa Remezo birimo imihanda n’amasoko, bifasha abaturage kubona aho bashora umusaruro, ni bimwe mu byagarutsweho mu bushakashatsi buherutse gushyirwa ahagaragara n’Ikigo cy’Igihgu cy’Ibarurishamibare (NISR).

Ubwo bushakashatsi bugaragaza ko Akarere ka Nyamasheke gafata umwanya wa mbere mu kugira abaturage bakennye kurusha abandi mu gihugu. Uwo mwanya kawumazeho imyaka ibiri yikurikiranya.

Aba-DASSO bagaragaje ibibazo byo kuba batabarirwa mu bakozi ba Leta ndetse no kuba nta mapeti bafite

Ni nyuma yo kugaragariza ababakuriye ku rwego rw’igihugu ko bibangamiye imikorere yabo n’iterambere ryabo muri rusange.

Ubwo aba bagize DASSO basurwaga n’ababakuriye ku rwego rw’igihugu babagararagarije uruhare rwabo mu iterambere ry’abatuye Rusizi mu myaka isaga ine uru rwego rutangiye kuhakorera.

Banagaragaza ibyifuzo byabo birimo guhabwa inyenyeri cyangwa amapeti bibaranga ndetse no gufatwa nk’abakozi ba leta aho gukorera kuri kontaro.

Sekanyambo Eusebert ni umuhuzabikorwa wa DASSO mu karere ka Rusizi, avuga ko babitangiye.

Agira ati “Icyifuzo cyambere twabasabye ni ugusaba ko twagirwa abakozi ba Leta ntidukomeze kwitwa aba “Sous contrat” kubera ko hari inyungu tutabona nk’abakozi nko gufata inguzanyo y’igihe kirekire kubera ko Banki idashobora ku kwizera.”

Akomeza agira ati “Ikindi twasabye ni uko baduha inyenyeri zituranga nk’abashinzwe urwego rw’umutekano zari ziri mu itegeko ritugenga ariko baza gusanga hari akantu bibeshyeho bazisubizaho twasabye ko baziduha ariko batwijeje ko zihari zizasohokana n’itegeko rishya.”

Ubuyobozi bwabemereye kubakorera ubuvugizi

Ushinzwe imibereho myiza y’aba DASSO ku rwego rw’igihugu bwana Alexis Kayihura yirinze kwemera cyangwa ngo agire icyo ahakana kuri ibyo byifuzo, ahubwo ababwira ko bahishiwe itegeko riri kubyigaho rizasohoka mu minsi iri imbere ririmo igisubizo cya byombi.

Ati” Ntabwo nahagarara ngo mbabwire ngo muzaba aba Sous statut ariko nkuko iri kuvugururwa bari kuyigaho muri minisiteri ku gira ngo yongere inonosorwe neza simpamya ko bazongera kuvuga ngo hari ibindi bazavugurura kubera ko hari ibyo bibagiwe ariko bishobora kuba biri mu nzira nziza.”

Akomeza agira ati” hari ikindi mwavuze kijyanye no guhabwa inyenyeri z’ibaranga inyenyeri ibaranga yambere ni ikinyabufura, gukorera umuturage no kubahiriza inshingano hanyuma izo kurutugu nazo muzazibona, zirahari zarateguwe ariko nazo zizasohokana niyo statut.”

Kugeza ubu mu Karere ka Rusizi abagize DASSO abagabo 120 n’abagore 17 bosee bakaba 137. Mu bindi bemeranyijweho ni ugukomeza gukaza ingamba z’umutekano ariko bakanashyiraho akarusho muri iyi minsi mikuru.

Aba ni abana batangiye Karate bakiri bato

Mu gihe bamwe mu babyeyi bakunze kuvuga ko umukino nk’uyu ushobora gutuma umwana yishora mu ngeso mbi za Kibandi yitwaje igipfunsi n’umugeri aba yarize, bamwe muri aba babyeyi ahubwo karate bayibonyemo umuti ku myitwarire itari myiza y’abana babo.

Marie Chantal Fitina ni umwe mubafite umwana wari wahindutse cyane. agira ati ”Njye mfite abana batatu biga uyu mukino hano ariko uwo nenda kuvugaho ni uwitwa Igiraneza wavukanye imico nabonaga itari myiza”

“Yari wa mwana wakundaga gushotora bagenzi be ntatinye umukuru ntatinye umuto uwo ahuye nawe agakubita akahuranya, turahana dushyiraho inama za Kibyeyi, inkoni biranga ariko aho uyu mukino uziye dushyiramo uwo mwana ubu ni umwana wahindutse. Umusaruro batwizeje twarawubonye”.

Ababyeyi n’abana bishimira uburyo Karate yatumye barushaho kugira imyitwarire myiza no kugaragaza impano zabo

Rugamba Nziza Chris na Umurisa Vanessa bafite hagati y’imyaka 10 na 12 Bazi gutera igipfunsi, kandi bamaze umwaka umwe batangiye guhabwa aya masomo basobanura ko yabafashije guhindura byinshi bitandukanye mu buzima bwabo harimo ku gira ikinyabufura, gukorera ku gihe n’ibindi.

Nziza Chris ati” Mfite umukandara w’umuhondo bituma nongera ikinyabufura nkagorora umubiri nkanakorera ku gihe kandi nsigaye nubaha ababyeyi n’abandi kurusha uko byari bimeze kera.”

Umurisa Vanessa yungamo ati ”kuba nkina Karate ni ingenzi cyane kuri njyewe kuko byagabanyije ikinyabufura gikeya nagiraga narasuzuguraga cyane ariko muri iyi minsi nsigaye numvira”.

Sibomana Haruna na Nizeyimana Eric basanzwe batoza aba bana bavuga ko intego yabo ari ukwigisha abana bato uyu mukino kugira ngo bifashe abana uburyo bagomba kwitwara ndetse banategurira igihugu abakinnyi beza ba karate b’ejo hazaza.

Bamara impungenge ababyeyi batinyisha abana babo karate ahubwo bakabasaba kuyibakundisha bakabitandukanya n’ibyo benshi bibwira ko ari umukino wa Kibandi cyangwa ibirara.

Sibomana Haruna ati ”Karate nk’abantu bayikinnye idufasha mu myitwarire, kwirinda urugomo n’ibindi. Tuyigisha abana bakiri bato kugira ngo bamenye uko bagomba kwitwara mu buzima busanzwe. Urebye nk’ibi byateye by’indwara zitandura... bituma babyirinda bakiri bato, ikindi kandi twabikoreye ni ukugirango ikipe y’Igihugu ya Karate izajye ibona ahantu ikura abakinnyi b’urubyiruko rushoboye uyu mukino mpuzamahanga”,

Abazobereye Karete bemeza ko ari imwe mu mikino ngororamubiri ishobora gufasha abayikora kwirinda indwara zitandura ziterwa no kudakora siporo ariko kandi waba uyizi ukaba wiyizeyeho ubwirinzi ku cyashaka kukugirira nabi.

Uru rusengero Rwakira abasaga 1500

Yemeza ko aho hashobora gushyira ubuzima bwabo mu kaga cyane ko hari n’abashobora kubihishamo bakaba babagirira nabi.

Usibye n’ibyo gucika ku muco wo gusengera mu bihuru ahatazwi n’inzego z’ubuyobozi, ngo bizafasha kurushaho korohereza inzego z’umutekano gucunga umutekano w’Abanyarwanda n’Igihugu muri rusange.

Yabitangaje ubwo batahaga ku mugaragaro urusengero aba kirisitu ba Paruwasi Kamembe biyujurije.

Ayagize ati “Iyo habonetse urusengero abakirisitu bakwiye gucika kuri uwo muco wo gusengera ahantu hatazwi. Ni byiza rero ko abantu bava muri ayo mashyamba kuko n’abari mu bihuru ntiwamenya niba aba naba bari gusenga cyangwa ari abanzi kugira ngo tworohereze n’inzego z’umutekano.”

Uru rusengero rwatashwe ni urusengero runini rurimbishijwe cyane rushobora kwakira abasaga 1500, ,Rwuzuye rubatwaye akayabo ka miliyoni 499 zisaga bakaba banarutashye ku mugaragaro.

Abenshi muri aba bayoboke baremeza ko basobanukiwe ko bakwiye kurusengeramo, aho kurusiga bakajya mu mashyamba ku misozi no mu manga kuhasengera amasengesho bita ay’ubutayu.

Kankindi Budensiyana ati “Iyo bagiyeyo bahurirayo n’abandi bakabayobya, bakabahanurira ibitaribyo bakabayobya bakabaca mu nsengero zabo.”

umuvugizi wa ADEPR Rev Karuranga Ephrem afungura ku mugaragaro urusengero inyubako y’urusengero rwa ADEPR Paruwasi ya Kamembe

Niyonzima Ferdinant yungamo ati “Aha uhasengeye wihannye ibyaha wasubizwa utiriwe ujya ahandi ahariho hose kandi tuziko mu butayu ushobora kuhahurira n’ingorane nyinshi.

“Abantu bamwe bajyayo ugasanga bashobora kuhakorera n’ibyaha, ushobora kuhahurira n’inzoka cyangwa ukahahurira n’abajura bakagukomeretsa cyangwa bakakwambura.”

N’ubwo hari aba kirisitu bemezanya n’umuvugizi ko badakwiye guta urusengero nk’uru ngo banjye gushakira Imana ahateye impungenge, hari n’abahamya ko hari abandi bagifite imyumvire yo kujya gusengera mu butayu,aba ngo barigana Yesu wabusengeyemo.

Ntigurirwa Aime yemera ko aho bita mu butayu ari ho bakirizwa kurenza mu nsengero.

Ati “Mu butayu umwuka wera yakujyanyeyo wajyayo. Biterwa no kwemera ku muntu no kwizera kwe ndetse n’uburemere bw’ikibazo cye akavuga ko mpora nsengera ntibyasubijwe reka njye gushakira Imana ahandi nkuko Yesu yasengeye mu butayu akamara amajoro amajoro 40 n’iminsi 40.”

Urusengero rwa paruwasi Kamembe ya ADEPR rwuzuye rutwaye asaga miliyoni 499Frw

Abemera amasengesho yo mu butayu bahamya ko hasubirizwa ibyifuzo byananiranye, ariko na none bakaburirwa ko hashobora gushyira ubuzima bwabo mu kaga dore ko ahenshi haba hitaruye ingo, nta n’igikorwa remezo na kimwe kiharangwa cyagoboka uwahahurira n’ibibazo.

Habiyaremye Pierre Celestin gitifu w’intara asaba akarere kureba aho ikibazo kiri bakagikemura

Kubyara abo badashoboye kurera, biza ku isonga mu bibahza hasi, aho abageze kuri 38,9% bfite iki kibazo, ndetse n’ibikorwaremezo bikiri mbarwa muri aka karere cyane cyane imihanda itorohereza abaturage kugeza umusaruro ku isoko.

Aka karere kamaze imyaka ibiri yikurikiranya ari ko kabanziriza utundi twose mu kugira abakene benshi mu gihugu.

Ni mu bushakashatsi bwakozwe n’ikigo cy’igihgu cy’ibarurishamibare, Kamana Roger, umukozi wacyo ushinzwe ishyirwa mu bikorwa ry’ubushakashatsi ku mibereho y’ingo mu Rwanda agaragaza bimwe mu bizahaza aka karere.

Ati ”mu baturage dufite ba Nyamasheke turebye urugo rumwe rufite abantu batanu, usanga bane muri bo batunzwe n’umuntu umwe abandi ntabushobozi".

Akomeza agira ati “Hari igihe tugeza ibikorwa remezo ku baturage ariko ntitumenye n’iba bikoreshwa cyangwa bidakoreshwa ... muri Nyamasheke 15% bavuga ko ivomero ry’amazi meza ribegereye ariko 38,5% bakavuga ko ayo mazi adakora.”

Abajyanama b’akarere hamwe n’abafatanyabikorwa batanga ibitekerezo

Uretse ibyagendeweho muri ubwo bushakashatsi, aba baturage bavuga ko aka karere gafite ibibazo byinshi ariko bihatswe cyane cyane no kutagira ibikorwa remezo ndetse na gahunda yo kuboneza urubyaro ikiri hasi aho biyemerera ko muri aka karere ari hamwe mu babyara abana benshi badashoboye kurera.

Rivuzwenayo Alphonse ati ”papa yadusize turi abana 10 najye maze kubyara abana 15 kandi nabo bari kubyara urumva kakarima yadusigiye kazadutunga?”

Nzayiramya Augustin yungamo ati ”ndi ku kubwira ko mfite abana batandatu ku myaka 36, ubwo bukungu bwaboneka gute n’abo bana ntari kubasha kubagaburira tuzahora muri bwa bukene cyakora ubu natangiye kuboneza urubyaro ariko nakangutse amazi yarenze inzira.”

Abafatanyabikorwa batandukanye muri aka karere ntibiyumvisha iby’ubu bushakashatsi bakagaragaza ko hari byinshi byakorwa bagendeye ku mahirwe ari I Nyamasheke ubukene bukaranduka.

Kayitare Yves ati ”ugereranyije hano dufite ikirere cyiza imvura tuyibura gake. Nyamasheke ikiyaga kiratuzenguruka kandi kirimo amafi, indugu n’isambaza hari inganda nyinshi za kawa… sinzi ikibura ngo abantu basezerere ubukene abayobozi n’ibadufashe.”

Ubuyobozi bw’aka karere buvuga ko hari ikibazo cy’abakabaye bazamura akarere bamara gutera imbere bakimukira ahandi.

Icyakora iyo mpamvu yonyine ntihagije mu gusobanura ubu bukene busa n’ubwabaye karande I Nyamasheke iyo ikaba ari yo mpamvu umunyamabanga nshingwabikorwa w’intara y’uburengerazuba Habiyaremye Pierre Celestin yabasigiye umukoro wo gushyiraho itsinda rito rizacukumbura imizi y’iki kibazo.

Ati ”icyo nasaba ubuyobozi bw’akarere ni uko bicara bagashyiraho itsinda ririmo abakozi b’akarere na njyanama. Bavuge bati twasanze hari ibikorwa bitanu cyangwa umunani byazana impinduka mu mibereho y’ubukungu noneho inama njyanama ijye ikurikirana mu nshingano zayo ivuge iti aho turi kuganisha akarere niho twumvikanye.”

Ubushakashatsi ku mibereho rusange y’ingo bugaragaza ko intara y’uburengerazuba ari yo iza ku isonga mu kugira abakene benshi, nako akarere ka Nyamasheke muri iyi ntara kakaba akambere mu kugira benshi mu gihugu hose.

Imibare igaragaza ko mu baturage 100, 41 muri bo baba ari abakene naho 21 ku ijana bakaba babaye mu bukene bukabije.

Ni kuncuro ya 5 ubu bushakashatsi bukozwe mu Rwanda.
Ubu bushakashatsi bukozwe ku nshuro ya gatanu, bukorwa buri myaka itatu. Ubu buheruka bukaba bwaratangiye mu kwezi 10 mu mwaka wa 2017 bushyirwa ahagaragara tariki 6 ukuboza 2018.

Abana iyo bize bakiri bato batangira guhishura impano zibarimo

Babivugira ko biri muri gahunda ya Leta y’u Rwanda ko abana bose babona uburezi kandi ku buntu, nk’uko bitangazwa n’uwitwa Mukashema Beatrice.

Agira ati “Twabonaga amafaranga avuye ku rutoki none rwishwe na Kirabiranya, n’ibijumba byarabuze isoko kandi ari ho umuntu yagakuye udufaranga!”

Habimana Innocent we avuga ko abana b’incuke kuri ubu batiga neza kubera kubura 1.000Frw yagenwe nk’igihembo cya mwalimu basabwa buri kwezi.

Ati” urugero ino bakorera 700Frw (baca inshuro) noneho wareba ugasanga n’ibibatunga uwo munsi bitari buze kuvamo none urumva umwana yakwiga amashuri y’incuke gute yabuze nayo kurya.”

Uwimana Vedaste we yemeza ko iyo babuze ayo mafaranga iyo umwana ageze ku ishuri baramugarura akamara igihe mu rugo kugeza igihe ababyeyi be bazayabonera bakamusubizayo, ibintu ababyeyi babona ko bibandindiriza abana.

Ati “Twifuza ko abana bajya kwiga koko ariko ikibazo ni uko umutangiza wamara igihe kikagera bakakwaka igihumbi ntacyo ufite umwana bakamusubiza imuhira ntibihangane ngo bategereze ukibone.”

Ababyeyi bavuga ko amafaranga 1000 bakwa atuma batitabira kujyana abana ku ishuri

Nyiravuguziga Julienne umwe mu barimu ntiyemeranywa n’ababyeyi bavuga ko umwana ubuze amafaranga bamusohora.

Ati “Umwana atanga 500Frw ku kwezi ariko ugasanga imyumvire y’ababyeyi ikiri hasi cyane. Leta itwizeza ibitangaza ibitangaza ko haba none cyangwa ejo bari kutuzirikana ko igihe kitari iki dushobora kuzabona umushahara dukwiye.”

Umuryango w’abakorerabushake ugamije kurandura ubukene VSO uri mu bukangurambaga bwo gukangurira ababyeyi kuzajyana abana babo mu mashuri y’incuke, uvuga ko mu myaka ibiri umaze uhakorera wavumbuye ko n’ubwo hari umubare munini w’abakene ariko ko ikibazo nyamukuru gihari ari uguhora bumva ko ari abakene gusa.

Mu bana 18.175, abagera ku 8.063 nibo gusa biga

Claude Gilbert Kamba uyobora VSO mu Karere ka Nyamasheke avuga ko bakangurira abaturage kumva ko umwana wabo ari cyo gishoro cya mbere.

Ati “Ikintu mbasaba tureke kwirengagiza turi bazima dushobora kuva mu bukene tukohereza abana bacu kwiga ni igishoro cya mbere ushobora guha umwana bikaba umunezero wawe n’igihugu.”

Kugeza ubu, uretse hamwe na hamwe mu bigo byigenga, abarimu bigisha mu mashuri y’incuke bagenerwa igihembo n’ababyeyi. Biba ikibazo iyo ababyeyi batabikoze haba ku bwende cyangwa ubukene.

Umuyobozi w’Akarere ka Nyamasheke wungirije ushinzwe imibereho myiza y’abaturage, Mukamana Claudette, avuga ko kugeza ubu ku rwego rw’akarere ikiri gukorwa ari ubuvugizi.

Ati “Ni ikibazo gikomeye kandi kizwi n’inzego zitandukanye ku buryo ngirango Leta nayo iri kwiga uburyo yakemura iki kibazo cy’aba barimu.”

1/2 cy’abana bo mu Karere ka Nyamasheke bakabaye biga mu mashuri y’incuke ntibiga, kuko inzego z’uburezi zigaragaza ko mu bana 1.8175 abagera ku 8.063 ari bo gusa biga.

Aba ni bamwe mu bana b’abahoze ari abarwanyi ba FDLR batahutse

Kuba iyi miryango yarabibwemo amacakubiri no kwigishwa kwanga igihugu cyabo ibi nibyo Mukantabana Seraphine, umuyobozi wa komisiyo yo gusezerera no gusubiza mu buzima busanzwe abari abasirikare aheraho asaba kwirinda kuba ikiraro cy’uwariwe wese wakwifuza kubameneramo ashaka guhungabanya umutekano w’abanyarwanda n’Igihugu muri rusange.

Ati ”umwihariko bafite babaga mu mashyamba, ntabwo bize, abana babo ntibize birumvikana ko ibyo abagabo babo bari barimo nibyo byari bibarimo. Bapakiwemo igihe kirekire kwanga igihugu cyabo mu buryo bukabije icyo twakoze hano ni ukwisanga mu gihugu cyabo kandi bakigishwa gukunda igihugu no kwirinda kuba ibiraro by’abashobora guhungabanya umutekano”.

Iyi miryango y’abahoze ari abarwanyi ba FDLR, iginzwe n’abagore 159 n’abana 485, icyo ihurizaho ni ukwishimira kongera kugaruka mu gihugu cyabo ndetse bakakirwa neza bitandukanye n’ibyo bumvaga naho kubijyanye no kuba hari uwashaka kubakoresha mubihungabanya umutekano ngo ntaho yabanyura kuko bakeneye umutekano.

Ibyishimo byabarenze bamwe bagera aho gufata bagenzi babo ngo badakora impanuka

Ayinkamiye Beata ati ”ntabwo nakora icyaha cyo gucumbikira umuntu uje kumena amaraso ni nacyo cyatumye naragiye mubashyize intwaro hasi bashakaga amahoro, umuntu ufite umugambi nkuwo sinamucumbikira ahubwo namumenyesha umuyobozi hakiri kare”.

Mukarubayiza Odethe yungamo ati ”ibyo byo ntamuntu wabyongera sinabijyamo kuko n’ubundi nari maze iminsi nifuza gutaha kubera umutekano muke nkabura uko mbigeraho kuko nari narayobeye mu mashyamba ya Congo narabuze aho nanyura”.

Gerard Ntibibaza bitaga Mambo yavuye muri FDLR ari LT Col, arahamya ko muri Congo hakiri abashaka guhungabanya umutekano bo muri FDLR.

Mukantabana Seraphine asaba abasubijwe mu buzima busanzwe kuzirinda gukorana n’abashaka guhungabanya umutekano w’igihugu

Avuga ko umusaruro wambere yagezeho mu myaka ine amaze avuye muri aba barwanyi ari umutekano ndetse n’akazi muri Leta aha akangurira bagenzi be bakiri Congo kurambika intwaro hasi bakagarura mu gihugu cyabo.

Ati ”kuvuga ko bahari sinabihakana bakagombye kugaruka mu gihugu bakaza kucyubaka nkuko natwe twabigenje, igihe cyose batarakigeramo bagifite intwaro ni ukuvuga ko bagifite umugambi wo guhungabanya umutekano w’igihugu, umusanzu wambere natanga ni ukubigisha buri wese akumva ko yarambika intwaro hasi akaza gufatanya n’abandi kubaka igihugu cyatubyaye”.

Bisanzuye ku bayobozi bafatanya nabo kwishima

Kuva abarwanyi ba FDLR batangiye gutahuka abarenga ibihumbi 12 nibo bamaze kugera mu Rwanda kuri iyi ncuro hakaba hasubijwe mu buzima busanzwe abagore n’abana babo basaga 1,044 barimo 644 bari bacumbikiwe mu nkambi ya Nyarushishi mu karere ka Rusizi.

Hari kandi abandi basaga 400 bari bari mu karere ka Nyanza bose bakaba bari bamaze iminsi 21 muri izo nkambi, bahabwa amahugurwa mu rwego rwo kubafasha gusubira mu buzima busanzwe nyuma yo kuva Kisangani muri Congo, mu kwezi kwa 11 uyu mwaka wa 2018.

Ngo barambiwe no guhora bitwa amazina batishimira

Aba baturage bavuga ko babanje kwishimira ko izina ry’abatwa bitwaga ubu ryavuyeho ndetse ko n’uhirahiye kubiyenzaho akarivuga bumva bamushyikiriza inzego zibishinzwe.

Mukabayizere Esther ati ”iry’Abatwa ryashyizweho iherezo n’ubwo barivuga ariko babikora biherereye ariko hagize urivuga numva nuguhita mwegereza umuyobozi... agatinyuka ati dore umutwa? byanditse he ese? bindiho?”

N’ubwo batacyitwa abatwa ariko, n’ubundi ngo byabaye nko guhungira ubwayi mu kigunda kuko n’ubundi kwitwa nanone abasigajwe inyuma n’amateka ngo ntaho bitaniye, ngo naryo ngo rirabasebya.

Mukarukaka Agnes ati ”ubundi gusigazwa inyuma n’amateka bivuga iki? Bidutera ipfunwe... uzi gutambuka ku muhanda ati dore uwasigajwe inyuma n’amateka?”

Bavuga ko bamaze kuvumbura ko hari abitwikira izina ryabo bakajya kurihahisha.

Sinumvayabo Garan ati ”Hari abaza kutuganiriza tugasanga ibyifuzo tumuhaye n’ibitekerezo hari inyungu ze abifitemo, niba ari umushinga ategura ku giti cye ukaba wacishwa muri iyo turufu tukanamutegereza ngo azagaruka tugaheba ni benshi baza aho dutuye ibivuzwe ntibikorwe.”

Umushumba wa Diocese ya Gikongoro na Cyangugu Musenyeri hakizimana Celestin na we avuga ko kwitwa aya mazina kuri aba banyarwanda bishobora kubagiraho ingaruka cyane cyane ku mishinga kiliziya iba yabateguriye.

Ati ”iyo ugiye gukora umushinga uravuga uti uyu mushinga ureba abasaza n’abakecuru cyangwa abana ariko kuri aba, ni ikibazo gihari kigomba kubonerwa igisubizo bakitwa izina bihitiyemo ritabatera ipfunywe kugira ngo tubakure mu cyiciro barimo tubajyane mukindi.”

Umushumba wa Diocese ya Gikongoro na Cyangugu Musenyeri hakizimana Celestin avuga ko bakwiye kwitwa izina bashaka bumva ritabateye ipfunywe

Umunyamabanga Nshingwabikorwa w’akarere ka Rusizi Mushimiyimana Euphrem avuga ko ababyumva nabi ari bo babigira ikibazo.

Ati ”iyo gahunda ijyaho yaratekerejwe abantu bose bagiye babuzwa uburenganzira bagasigazwa inyuma abo bose bararebwa. Ahubwo ni uko abantu bashobora kubyumva nabi bakabifata ko ari izina rigiye kwitirirwa itsinda ry’abantu ibyo sibyo ndetse n’abafite iyo myumvire bayihindura rireba abantu bose bagiye babuzwa uburenganzira.”

nyuma y’ibisobanuro by’uyu muyobozi bamwe bagaragaje ukutanyurwa.
Simparikubwabo Augustin ati” nonese ntibizashira bizaguma gutyo turi abasigajwe inyuma n’amateka kugera ku iherezo ryacu? Dukeneye ko ayo mazina batwita ashyirwaho iherezo tukitwa abanyarwanda kimwe n’abandi.”

Aba banyarwanda bavuga ko benshi muri bo bagiye baguma mubukene kubera kwitwa bene ayo mazina yanafatwaga nk’igitutsi. Bavuga ko amazina nk’ Abatwa; abasangwabutaka; abasigajwe inyuma n’amateka; ababumbyi; abayovu n’andi bahabwaga kubera umwuga wo kubumba inkono yabatesheje agaciro.

Nzeyimana Jean Nepomscene arisabira kuva mu cyiciro cya kabiri cy’ubudehe

Uyu muturage yari mu cyiciro cya mbere cy’ubudehe kuva mu mwaka wa 2011 aza kujya mu cya 2 muri 2014.

Avuga ko yatangiye kuzamuka kuva aho gahunda ya Made in Rwanda yatangiriye gushyirwa mu bikorwa, aho asobanura ko yazamuwe cyane n’ubuvumvu akora mu gutunganya ubuki bwa Kinyarwanda, ibishashara bitagiraga agaciro we akabibyaza undi musaruro wo gukora amavuta yo kwisiga.

Ati ”ku kwezi njyewe ninjiza 50,000 ubwo ayo ni ayo nizigamira namaze gukuraho ayo nkoresha mu rugo ibyo bituruka kuri ubu buki no kuri ibi bishahara dukoramo amavuta aya mavuta arakunzwe cyane ino iwacu i Nyamasheke”

Nzeyimana yaje kwishyira hamwe na bagenzi be b’abavumvu maze bakora koperative yitwa Impashyi Shangi aza kugura inzu ya miliyoni mu cyaro aho atuye arinabwo abaturage bamusabiye kujya mu ciciro cya kabiri cy’ubudehe none nawe ngo asanga urwego agezeho yiteza imbere adakwiye kuguma muri icyo cyiciro aha agasaba ko yashyirwa mu ciciro cya gatatu ndetse akagira uruhare mu gufasha abatishoboye.

Akomeza agira ati ”ubungubu ndifuza kujya mu cicyiro cya gatatu. ntabwo nifuza kuguma muri iki cya kabiri ndifuza kuzajya ntera inkunga ababa muri ibyo byiciro”.

Bimwe mubyo Nzeyimana ashingiraho avuga ko akwiye kujya mu cyiciro cya gatatu ni imitungo amaze kwibikaho harimo Inzu ya miriyoni, inka ikamwa, imirima n’ubworozi bw’inzuki ndetse na Koperative abamo n’ibindi.

Habyarimana Jovith uyobora ishami rishinzwe guteza imbere ishoramari n’umurimo mu karere ka Nyamasheke, akangurira abaturage guhindura imyumvire yo kwibanda mu mirimo y’ubuhinzi gusa cyane ko biteguye kujya babafasha bityo bagashobora guhangana n’ubukene buvugwa muri aka karere.

Ati ”hari ishami ryashyizweho rishinzwe guteza imbere ishoramari n’umurimo abantu ntibagume gutekereza gusa ko babeshwaho n’ubuhinzi dutekereze ko twabeshwaho n’ibindi kandi tukabona amafaranga menshi bityo nabwabukene tukaburandura twese dushyize hamwe icyo basabwa ni ukunoza ibyo bakora.”

Inshuro ebyiri zikurikiranya, akarere ka Nyamasheke kamaze kuza ku mwanya wa mbere mu dufite abaturage benshi bakennye. Birashoboka ko iyi gahunda ya made in Rwanda yafasha benshi kuzamuka iramutse ishyizwemo imbaraga zidasanzwe mu kurushaho kunoza ibyo bakora.

Abahinzi b’inyanya ngo babuze isoko mu gihe abandi bavuga ko babuze ibyo bagurisha kubera isoko rihari

Mu gihe hari abahinzi bavuga ko bahangayikishijwe n’ubunini bw’iri soko, hari bagenzi babo babiburiye isoko. Ubuyobozi bw’aka karere ntibwemeranwa na bo kimwe n’abandi baturage baho ahubwo bukavuga ko isoko ry’abanyekongo ribabana rinini ku buryo bibagora kurihaza.

Aba bahinzi basobanura ko umusaruro w’ibihingwa by’imyumbati n’inyaya byeze cyane bituma abaguzi baba bake bityo bigatuma babitangira amafaranga make kugira ngo bitabapfira ubusa.

Mbarushimana Samuel ati ”twagezaga muri iki gihe ikiro cy’imyumbati kigura amafaranga 250 none ubu kiri kugura 140. Imyumbati yareze cyane isoko rijya hasi cyane ukaba wahinga hegitari ebyiri ukaba utagurisha ngo ukuremo inka mudukorere ubuvugizi kuko n’ubundi izaba myinshi.”

Abanyekongo bagura imyaka ari benshi bakayambukana iwabo ku bwinshi

Nyamara na none ibi bitandukanye n’ibyo abandi baturage nabo bo muri aka karere bavuga ko ahubwo guhaza isoko ry’abakonyekongo bitaborohera na mba kugeza n’aho aba banyekongo binjiye mu mirima bakagura imyaka itarera.

Nshizirungu Elie yungamo ati ”inyanya iyo zeze nkubu akadobo kagura 1000 kubera ko ntasoko rihamye dufite.”
Umuyobozi w’akarere ka Rusizi Kayumba Euphrem yatangajwe n’abavuga ko babuze ababagurira umusaruro ahubwo avuga ko bashobora kuba bashaka isoko nabi, icyakora abizeza kubibafashamo.

Ati” sinzi ahantu bashakiye isoko kuko ahubwo ikibazo dufite hano Rusizi, ni icy’uko tutabasha guhaza isoko dufite hari isoko ry’abanyarusizi ubwabo ariko tukagira n’isoko ry’abakongomani tutabasha guhaza”.

Kayumba Ephrem uyobora akarere ka Rusizi

Akomeza agira ati “Mu minsi ishize ikibazo nakiraga ahanini cyari icyo kuvuga ngo turongera umusaruro gute kugira ngo tubashe guhaza isoko.”

Muri rusange, ni gake wakumva umuturage w’i Rusizi avuga ko yabuze umugurira umusaruro we bitewe n’isoko ryagutse ry’abatuye umugi wa Bukavu muri Repubulika Iharanira demokarasi ya Congo ahubwo bamwe mu basesengura iby’iri soko basanga mu gihe byakomeza gutya, ntihagire ingamba zifatwa zo kongera umusaruro cyangwa kugabanya igitutu cy’iri soko, bishobora kuzateza ikibazo cy’ibura ry’iribwa muri aka karere mu minsi iri imbere.

Ikibaya cya Bugarama nicyo gihingwamo umuceri mwinshi kurusha ibindi mugihugu

Aba bahinzi bavuga ko iki gihembwe cy’ihinga cyaranzwe no kubura ifumbire cyane cyane ko bayihabwa muri gahunda ya ’Nkunganire Muhinzi’ ariko ubu bakavuga ko yagabanutse cyane, ku buryo bibateye impungenge z’uko umusaruro uzarumba.

Irihose Josue ati ”umuceri wabaye umuhondo wari ugeze igihe cyo kurabya bisaba agafumbire ko gushyiramo kugirango urabye none ifumbire twarayibuze.”

Kangabe Aline ati ”icyo kibazo twakibwiye agoronome aravuga ngo ku karere babahakaniye ko ntayindi fumbire babohereza ngo yarabuze, tujya ku bantu bayigurisha ku giti cyabo nabo ngo ni 650 ku kiro ubwo ukabona ayo mafaranga ntayo wakuramo.”

Kayumba Euphrem umuyobozi w’akarere ka Rusizi yavuze ko akarere kagiye kwihutira kubonana n’abo iyi gahunda y’ifumbire ireba bose harimo n’ikigo cy’igihugu gishinzwe ubuhinzi RAB.

Ati ”turaza gukorana n’ababishinzwe ku girango turebe uko ikibazo giteye n’inzira twagikemuramo dufatanyije na RAB, turaza gukora mu buryo bwihuse turebe igisubizo dushobora kuba twatanga.”

Hagati aho mu gihe bigaragara ko iki kibazo umuti wacyo ukiri mu nzira, aba baturage barabona ko umusaruro wabo ushobora kuzaba mucye ku buryo bugaragara".

Niyonsaba Aime yungamo ati ”Umusaruro ntawo abantu bose barahombye, hari n’abari kubagara bwambere hari n’abari kubagara bwa kabiri ukareba noneho wawundi we wahinze nyuma... uwo we Mana yajye azataha pe. Nibadukorere ubuvugizi n’ukuri ifumbire iboneke.”

Ikibaya cya Bugarama gifatwa nk’ikigega cy’ibiryo cyane cyane umuceri haba mu Rwanda ndetse n’ibihugu bihana imbibe kikaba gihingwaho umuceri ku buso bwa hegitari zirenga 1,300.

Amakoperative agikoreramo avuga ko nihatagira igikorwa, batazabasha gusarura toni 7,500 bari bakuyemo mu gihembwe gishize kandi nabwo bavugaga ko atari umusaruro ushimishije.

Abimuwe mu manegeka bahangayikishijwe no kubura aho bahinga

Bavuga ko ubwo bukene babuterwa no kuba badafite aho guhinga kuva bagezwa muri uyu mudugudu.

Yirirwahandi Elie, umwe mu baturage bagizwe n’imiryango 175, batujwe muri uyu mudugudu guhera mu 2007, avuga ko ubuhinzi ari bwo bubatunze nta handi bakura amaramuko.

Agira ati “Nta hantu hahagije dufite duhinga. Baratubaruye ngo baduhe ahantu duhinga ariko ntaho twigeze tubona.”

Ngendakumana Marcelline avuga ko kuri ubu ngo batunzwe no kujya guca inshuro bagahingira abandi, bakabaho byo gushaka amaramuko mu gihe ngo bakabaye bahinga ibyabo bagasarura none barataka inzara.

Ati “Tubayeho gutyo iyo ugiye kudeya (guhingira abandi) ukabona icyo kurya ni uko. Niba ukoreye nka 500Frw akaba ariyo murya, iyo bukeye inzara iragaruka.”

Umuyobozi w’akarere wungirije ushinzwe ubukungu Kankindi Leoncie

Umuyobozi w’Akarere ka Rusizi wungirije ushinzwe ubukungu Kankindi Leoncie, asaba aba baturage gusubira aho bari batuye bakagurisha amasambu bahafite naho abatari bayafite ngo bazashakirwa aho guhinga mu masambu ya leta.

Ati” Abenshi bafite aho bavuye n’ubwo hari mu manegeka ariko hashobora guhingwa. Kuri bamwe bigaragara ko aho bavuye ari kure yaho bari ubu, bashobora ku gurisha bagashaka ubutaka aho begereye bwo guhinga.

“Abadafite n’amba batishoboye hari inkunga y’ingoboka ku bindi akarere gakomeza gushakisha ubutaka bwa leta bwahingwa ariko aho butari bafashwa muri ubwo buryo.”

Abaturage batsimbarara ko ibyo kugurisha bisa n’ibitoroshye kubera imiterere y’aho hantu bari batuye, bikaba bitoroshye kubona abaguzi.

Niyonkuru ateruwe na madame Jeannette Kagame hamwe n’abandi bana

Video y’uyu mwana avuga umuvugo yahise ijya ku mbuga za whatsapp n’izindi z’abantu benshi yamamara mu minsi itarenga ibiri, bituma Kigali Today tubasurira uyu mwana. Umunyamakuru wacu yamusanze ku karere ka Nyamasheke maze baraganira byinshi hamwe n’umubyeyi we.

Niyonkuru Fabrice ni umwana uvuka mu mudugudu wa Nyagashinge, akagari ka Mubumbano, Umurenge wa Kagano mu karere ka Nyamasheke mu ntara y’u Burengerazuba. Ku babyeyi be Byukusenge Vestine na Nzabihimana Alfred bombi b’abahinzi akaba ari umwana wa kabiri muri batatu babyaranye.

Uyu Vestine avugako umugabo wakabaye ari se atamwemera ngo nta n’ubwo yigeze amwiyandikishaho ku buryo nyina ari we wenyine wishakaho buri kimwe cyo gutunga uyu mwana.

WATCH: Fabrice Niyonkuru from Nyamasheke district recites a poem during the Children's End of Year Party hosted by First Lady, Jeannette Kagame at @UrugwiroVillage . pic.twitter.com/t9mnWTA4Bf

— The New Times (Rwanda) (@NewTimesRwanda) December 10, 2018

Niyonkuru na Nyina umubyara asubiye mu karere avukamo

Uko ari abana batatu bavukana, uwakabaye yitwa se yemeramo umwe gusa ndetse se na nyina baratandukanye umwe akomeza ubwe buzima icyakora Niyonkuru abana na nyina mu rundi rugo yashatsemo.

Niyonkuru ubu yiga mu mwaka wa kane w’amashuri abanza ku ishuri Mutagatifu Catherine-Nyamasheke.

Nyina avuga ko ari umwana uhora asoma ibitabo.Yatangiye ibyo kugerageza guhimba imivugo afite imyaka 6 cyane cyane agahimba uturirimbo iyo yumvaga ko Perezida wa Repubulika yasuye akarere kabo, ariko nyina wamukurikiraniraga hafi akabona ari iby’ubwana ntabihe agaciro ndetse rimwe na rimwe akamucyaha.

Ati ”yabitangiye afite imyaka 6 yakumva ngo Perezida yaje agashaka kujyayo ngo nawe afite akaririmo yamuririmbira nkabona ari ibintu by’ubwana simbihe agaciro, bitewe n’ubuzima nabonaga mbayemo nkavuga nti uyu arahinguka ku karere ngo agiye kuririmbira Perezida? Ndamwihorera mera nk’umuzimirije impano muri iyo myaka ye.”

Mu birori yajemo i Kigali yari anezerewe akina na bagenzi

Impano ya Fabrice yamenyekanye bwa mbere mu matora y’umukuru w’igihugu, ubwo Nyakubahwa Perezida wa repubulika yiyamamarizaga kuyobora igihugu mu matora, umwaka ushize.

#NiyonkuruFabrice, an eminent artist at such a young age. Thanks to whoever took this video! @Rachelmugabo pic.twitter.com/FIFPf8mW0e

— Jean Noel Mugabo (@jnmugabo) December 11, 2018

Amashusho(Video) ya mbere y’uyu mwana icyo gihe yagaragaye uwo mwana ahagaze ku muhanda avuga umuvugo, awutura Perezida.

Yagiraga ati “Ndavuga wa musaza, simvuga ka gasaza, ndavuga wa musaza waduhaye imihanda, amashuri amashanyarazi,…tora Paul Kagame”.

Iyo video yahise itangira gukwirakwira ku mbuga nkoranyambaga nka Whatsapp, Instagram na Twtter.

Kuva icyo gihe abantu batangiye gushaka kumenya uyu mwana uwo ari we

Kuri iyi nshuro, mbere yo kujya i Kigali guhura na Madamu wa Perezida wa Repubulika tariki 09 Ukuboza 2018, Fabrice ngo yabanje guhimba umuvugo we nk’uko bisanzwe aza kubwira nyina ngo amuhe urupapuro yandikaho kandi ngo amuherekeze ku karere ajye kuwereka abayobozi.

Ahabwa impano na madame Jeannette Kagame

Nyina yaje kubimwemerera anamugurira urupapuro rwo kwandikaho birangiye bajya kukarere maze umuyobozi w’akarere wungirije ushinzwe imibereho myiza aramwumva amwemerera ko bazajyana I Kigali.

Igihe cyarageze baragenda ageze yo ashimisha madamu Jeannette Kagame n’abandi bari aho.

Icyakora Umubyeyi wa Niyonkuru avuga ko ubu buhanzi busa nk’aho bwamusubije inyuma gake mu masomo kuko arangiza umwaka wa kane w’amashuri abanza, yabonye umwanya wa kabiri n’amanota 78,7% icyakora ngo mbere yabaga uwa mbere gusa.

Niyonkuru ahimba indirimbo n’imivugo icyakora byose biracyari mu mpapuro nta na kimwe kiratunganywa.

Niyonkuru uvuga ko yashimishijwe cyane no kuba yaraganiriye na madamu wa Perezida wa Repubulika ndetse akanamuterura mu birori yateguye byo kwifuriza abana noheri nziza n’umwaka mushya muhire.

Niyonkuru kugeza ubu utarahitamo neza icyo aziga nagera hejuru, avuga ko inzozi ze ari ukuzaba Visi perezida wa Repubulika namara kwiga. Icyakora ngo ababazwa n’uko se na nyina batumvikana ndetse na se atamwemera akaba abona ibyo byazaba imbogamizi ku myigire ye.

Abajijwe icyo azaba narangiza amashuri yagize ati “Umuyobozi ushinzwe intebe mu biro bya Perezida cyangwa visi perezida kuko ariyo ntego mfite”.

Umuyobozi w’akarere ka Nyamasheke wungirije ushinzwe imibereho myiza y’abaturage Madamu Mukamana Claudette yavuze ko bagiye kumuhuza n’abandi bahanzi bamaze gutera imbere kugira ngo impano ye izamuke.

Icyakora uyu muyobozi akaba yanongeyeho ko bagiye kwihutira gukemura ibibazo by’amakimbirane agaragara hagati y’ababyeyi be kugira ngo atazagira ingaruka ku mpano ye.

Ati “icyambere tugomba kumufasha ni ukumuhuza n’abandi bahanzi babimenyereye bazi n’uburyo bikorwamo”.

Akomeza agira ati “iwabo hari ibibazo bitandukanye by’imibereho bishobora gutuma impano ye igwingira ari nayo mpamvu akarere kagiye kureba icyo kabikoraho”.

Bamwe mu bafite ubumuga bahinduye imyumvire ubu batunze imiryango yabo

Mu karere ka Nyamasheke, abafite ubumuga baravuga ko nyuma yo guhindura imyumvire y’uko bagomba gufashwa ibintu byose, ubu bamaze kwiteza imbere binyuze mu kwibumbira mu makoperative no gutinyuka gukora imirimo bumvaga ko batakora.

Bagororuwanga Joel se w’aba bana, atuye mu murenge wa Kagano. Abana be bane bavukanye ubumuga bwo kutavuga no kutabona barabukurana kugeza magingo aya aho umuto muri bo ari hejuru y’imyaka 10.

Avuga ko kwita kuri aba bana byabanje kumugora dore ko byamusabaga kubitaho bose kandi nta n’umwe muri bo ubasha kugira icyo yimarira kubera ubu bumuga.

Nyuma yaho, umwe muri bo witwa Niyodusenga Anita yabonye uburyo bwo kwiga ubudozi mu kigo cy’imyuga gifasha abafite ubumuga cya Ngwinonawe Ntendezi kiri mu murenge wa Ruharambuga mu karere ka Nyamasheke.

Amahirwe yaje kumusekera, ubwo yajyaga muri imwe mu makoperative yitwa TTCM maze binyuze muri World vision ku nkunga ya ambassade ya Suede mu Rwanda baterwa inkunga bagura ibikorwa.

Kuri ubu umuryango wa Bagororuwanga uvuga ko babasha gukorera muri iyi koperative nibura 50,000 by’amafaranga y’u Rwanda mukwezi kandi bakidodera imyenda bambara batagombye kuyigura.

Bagororuwanga agira ati "N’iyi shati nambaye ni uyu wayidoze, kandi amfasha no kubonera umuryango wacu ibiwutunga"

Mu myaka itatu ishize aba baterankunga bakorera mu karere ka Nyamasheke barashima imikoranire yabo n’inzego zinyuranye mu Rwanda bakaba bizeza ko bizakomeza kugenda neza no mu cyiciro gikurikiyeho cy’indi myaka cumi n’itanu bagiye kuhakorera.

Guverineri w’intara y’uburengerazuba Munyantwali Alphonse, ashingiye ku rugero rwa Bagororuwanga n’umuryango we, asaba n’abandi baturage gukora, buri wese agaharanira kugira icyo yigezaho atishingikirije ku nkunga.

Ati"uyu mushinga ntuzabafasha mwese. Abo utazageraho murasabwa kurebera ku bagize aho bagera namwe mukiteza imbere"

Muri iyi myaka 3 Core project yafashije aba baturage guhanga imirimo 9406, amatsinda yo kubitsa no kugurizabya 1518, koperative 92 z’urubyiruko n’abagore, miliyoni zisaga 400 zagurijwe abaturage bagaragaje imishinga yabo, ibi byose bikaba kwari ugufasha aba baturage guhanga imirimo idashingiye ku buhinzi.

Abatuye ku kirwa cya Mushungu biruhukije nyuma yo guhabwa ubwato bushya buzajya bubafasha kunoza ingendo

Ikirwa cya Mushungu kimwe mu birwa umunani biri mu kiyaga cya kivu ku ruhande rwa Nyamasheke.

Ni cyo cyari gisigaye mu kutagira ubwato bubafasha kwambuka, ugereranije n’ibindi kuko abagituye bari bagikoresha ubwato bw’ingashyo.

Ababyeyi bajya kubyarira hakurya, kimwe n’abarema amasoko yaho babaye aba mbere mu kwishimira ubu bwato, nk’uko uwitwa Nyaminani Claire abitangaza

Agira ati “Mu minsi yashize twari mu bwato bushaje buriyubika ku bwamahirwe turoga ibintu turabita tugera mu rugo Amahoro.

“Izo mbogamizi turizera ko zizagabanuka. Ttuzajya tujya kwa muganga ku gihe. Buzaba nk’imbangukiragutabara izajya idufasha mu rugendo.”

Abaturage n’abayobozi bagendeye muri ubu bwato bagerageza kureba imikorere yabwo

Abanyeshuri baba kuri iki kitwa barangije amashuri abanza, nabo bibazaga uko bazakomeza ay’isumbuye.

Mbonyimana Joel ni umwe mu banyeshuri umunani gusa babashije gukomeza mu gihe bari 29. Abandi babivuyemo kubera uko kugorwa no kwambuka.

Ati “Bamwe bacikaga amashuri bakigira kwirobera andi bakagira ubute bwo guhora Babura uko bambuka ishuri bakarireka.”

Umunyamabanga nshingwabikorwa w’agateganyo w’Akarere ka Nyamasheke Niyibizi Ntabyera Hubert, yabasabye kubufata neza kugira ngo buzaveho n’ubundi bakomeze biteze imbere.

Ati “Icyo tubasaba ni uko babukoresha neza bakumva ko ari umutungo wabo bakabubyaza umusaruro, bugafasha abana kujya ku ishuri, bugafasha ababyeyi kujya kwa muganga akarusho mu bihe biri imbere bakabubyaza ubundi.”

Aba baturage bavuga ko impanuka bahuraga nazo kubera mu kiyaga amato ashaje zigiye kugabanuka

Ubwato aba baturage bahawe ni bushya kandi bwa moteri bukaba bufite agaciro ka miliyoni 5Frw.

Bwazanye n’imyambaro 35 ikingira impanuka mu mazi ndetse na litilo 100 za lisansi y’ubuntu. Lisansi izajya ibukoresha izajya iva mu mafaranga abaturage bazajya bishyura.

Umunyamabanga nshingwabikorwa w’agateganyo w’Akarere ka Nyamasheke Niyibizi Ntabyera Hubert

Abakora uburobyi mu kiyaga cya Kivu barataka guhembwa intica n’ikize

Aba barobyi baganiriye na Kigali Today ahagana ku mugoroba wo ku wa 05 Ukuboza 2018, umwijima umaze gufata ku nkombe z’ikiyaga cya Kivu mu karere ka Rusizi, bakora kuva mu masaha ya saa kumi n’ebyiri bagakesha ijoro ryose bari kuroba ku geza mu gitondo.

Benshi muri bo bibasaba gusiga imiryango yabo mu gihe cy’iminsi 23 n’ibura cyangwa ukwezi bakakimara bataragera i muhira bitewe n’aho amakipe bakoreramo yerekeje cyane ko iki kiyaga ari kinini.

Aba barobyi basobanura ko bakorera ba nyir’amato aroba ari yo bita amakipe; abo bakabahemba amafaranga ari hagati ya 7.000Frw na 8.000Frw, mu gihe kingana n’iminsi 23.

Umwe muri bo utashatse kuvuga izina rye kubera gutinya ko yakwirukanwa mu kazi, yagize ati “Igihembo usanga ari gike cyane iyo urebye iminsi 22 cyangwa 23 ibihumbi umunani aba ari amafaranga make cyane mu gihe ku ijoro rimwe ushobora kuroba injanga zagura nk’ibihumbi ijana.”

Mugenzi we yungamo ati “Tuva imisozi batubwiye ngo ni ibihumbi umunani turi bukorere, byabihumbi umunani ejo bakakubwira ngo habonetse bitanu kandi bazi ko ufite urugo n’abana bose bakeneye mituweli n’ibibatunga, ugutegeka agukubita aryamye ni ukubura icyo dukora naho ubundi aka kazi ntawakihanganira.”

Umuyobozi w’Akarere ka Rusizi, Kayumba Ephrem

Aba barobyi bifuza ko inzego z’ubuyobozi zabafasha iki gihembo cy’inticya ntikize kikiyongera.

Undi ati “Icyo twifuza nuko nibura bajya baduha ibihumbi 20Frw niba hari ukuntu ubuyobozi bwadufasha bwadufasha gukemura iki kibazo rwose.”

Abagize ihuriro ry’amakoperative akora uburobyi mu kiyaga cya Kivu mu karere ka Rusizi bo ariko, basanga igihembo abarobyi bahabwa gihagije, nk’uko Nzeyimana Jean Claude ubahagarariye abivuga.

Ati ”Iigendana n’uko mu mazi hahagaze iyo ntamusaruro wabonetse turongera tugahura tukavuga ngo ese umukozi yahembwa angahe ariko mbona tugerageza kubishyira ku murongo ayo babona tubona ari ayo ahagije.”

Mu gihe izi mpande zombi zitavuga rumwe ku gihembo cyakabaye gihabwa umurobyi, umuyobozi w’akarere ka Rusizi Kayumba Ephrem, aravuga ko iki kibazo kitarabageraho cyakora ngo biteguye kubafasha bakaba bakumvikana mu gihe baba bakibagejejeho.

Ati “Ntabwo turashikirizwa icyo kibazo ariko mu gihe bazakidushyikiriza twiteguye kuba twabafasha tukabahuza n’abakoresha babo tukareba niba ibyo bakora bijyanye n’umushahara bahabwa ariko ahanini bishingira ku bwumvikane bagiranye n’uwabahaye akazi.”

Mu karere ka Rusizi habarurwa amakoperative y’uburobyi agera kuri arindwi akaba ahuza banyiri amakipe arinabo bicara bagashyiraho igiciro cy’amafaranga umurobyi agomba gutanga bo nkabakora aka kazi batabigizemo uruhare ibintu abarobyi bavuga ko ari akarengane kuribo.

Bamwe mu bigisha amashuri y’incuke baravuga ko igihe kigeze ngo nabo bagenerwe umushahara

Nyiravuguziga Julienne ni umurezi ku ishuri ribanza rya Ruheru B mu Murenge wa Kanjongo, avuga ko, nk’abandi bakozi bose na we ngo abyuka mu gitondo akajya ku kazi kwigisha abana b’incuke. Ni akazi yishimira kuko yumva ari ugutanga umusanzu we mu kubaka igihugu ariko avuga ko ababazwa n’uko ukwezi gushira ntabone umushahara nk’abandi.

Ati: “ikintu cya mbere kibangamiye umwarimu mu ishuri ry’incuke ni umushahara, kuko mu myaka itatu maze uretse ukwezi kwa kabiri ku mwaka wa 2017 nakiriye amafaranga 15,000 gusa ... abaduhemba ari bo babyeyi nta bushobozi bafite.”

Bamwe mu bahize abandi ku kwita ku bana b’incuke bahembwe amagare

Abo barimu bavuga ko icyo bakora ari ugutanga amaraso gusa,impamvu ngo ni uko nta mushahara w’abarimu bo mu mashuri y’incuke wagenwe kuko ngo bahembwa n’ababyeyi bigishiriza abana kandi ngo abenshi muri abo ntibabikozwa.

Nyiravuguziga akomeza agira ati: ”umwana atanga amafaranga 500 ku kwezi ariko ugasanga imyumvire y’ababyeyi ikiri hasi cyane batabyumva, icyakora leta ihora itwizeza ibitangaza ko igihe kizagera natwe ikatwibuka tukabaho neza.”

Bamwe mu barezi n’abayobozi ba VSO batera igiti

Kuba hari ababyeyi batabyumva bituma batanajyana babo mu ishuri ry’incuke. Imibare igaragaza ko mu bana 18175 bagombye kuba biga mu mashuri y’incuke higamo 8063 gusa.

Umuryango "Voluntary Service Overseas" (VSO), w’abakorerabushake ugamije kurandura ubukene umaze imyaka 20 ukorera mu Rwanda, uvuga ko icyo kibazo mu bibazo bikomeye wakozeho, gushishikariza ababyeyi kujyana abana b’incuke mu ishuri, icyakora ngo hari impinduka zigenda zigaragara.

Kamba Claude Gilbert, ni umuyobozi w’uwo muryango mu Karere ka Nyamasheke.

Aragira ati: ” Dutangira kubona abarimu bita kuri aba bana byari bigoye cyane, ariko ubu hari icyizere n’ababyeyi batangiye guhindura imyumvire. Turizera ko igihe kizagera ibibazo by’abarimu bigisha amashuri y’incuke bikagabanuka.”

Umuyobozi w’Akarere ka Nyamasheke wungirije ushinzwe, imibereho myiza y’abaturage Mukamana Claudette avuga ko ubuyobozi bukomeje gukora ubuvugizi.

Ati” Icyo dukora ni ubukangurambaga ku babyeyi kugira ngo n’utwo dufaranga bemera badutange. Ni ikibazo kizwi n’inzego zitandukanye ku buryo Leta nayo iri kwiga uburyo yakemura ikibazo cy’aba barimu kuko baba barize kimwe n’abandi, bakiga bishyura amafaranga y’ishuri ariko bajya kwigisha ugasanga nta kintu bagenerwa uretse kuvuga ngo ababyeyi babiteho.”

Umuryango VSO wahisemo kwizihiza isabukuru y’imyaka 20 umaze mu Rwanda wifatanya n’abo barimu, uhemba 51 muri bo babaye indashyikirwa ubaha amagare n’ibitenge ndetse abakorerabushake bawo batera ibiti biribwa n’iby’umutako ku rwunge rw’amashuri rwa Mutagatifu Nicolas.

Mu iserukiramuco "Global Citizen Festival" ryaberaga mu gihugu cy’Afurika y’Epfo kuri iki cyumweru tariki 2 Ukuboza 2018, abayobozi b’ibihugu bitandukanye basabwe kuzamura ingengo y’imari igenerwa uburezi , ikagera nibura kuri 20%. u Rwanda rwo rukaba rumaze imyaka rugeze kuri icyo kigero.

Abarangije muri Kibogora Polytechnic mu biroro byo kwishimira kurangiza amasomo

Maniraguha Jean Claude urangije mu ishami ry’ibaruramari n’icungamutungo, avuga ko amaso ye ayerekeje ku kwihangira umurimo agisohoka muri iyi kaminuza.

Ati” Njyewe nahereye kera ntekereza ubucuruzi… nzi ko hari inzego nyinshi leta yateguye zishobora gutuma umuntu abona igishoro akihangira umurimo najye nizeye kuzakora muri ubwo buryo nkihangira umurimo.”

Nyiraruvugo Brigitte, nawe urangije muri iri shuri agira ati: ”Ndarangije ngiye gukora kugira ngo ndebe ko nakwiteza imbere ndashingiye ku byo gutegereza akazi ka Leta... hari igihe utegereza nyamara nabarangije mbere yawe bakiri abashomeri, ariko nintangira kwikorera mpereye kuri duke mfite ngashinga iduka nzajya kumara imyaka nkiyo maze niga ngeze kure wawundi ushaka akazi wenda atarakabona.”

Abarangije muri Kibogora Polytechnic, bahize kutazaba umuzigo kuri Leta

arakomeza ati: ”Hari bagenzi bajye bandi barangije mbere ubu badafite icyo bakora, nzabegere mbereke uko tuzishyira hamwe tugakora ishyirahamwe maze tujye tworora inkoko tugurishe amagi twiteze imbere.”

Dr. Marie Christine Gasingirwa ushinzwe kugenzura ubumenyi mu kigo cy’igihugu gishinzwe amashuri makuru na za kaminuza yasabye n’abandi barangije muri iyi kaminuza gukemura mbere na mbere ibibazo bicyugarije abaturage bo muri aka gace ishuri rherereyemo kugira ngo rikomeze kuba igisubizo koko.

AtiL ”Iki ni igisubizo cyo ku girango bazamure aka gace … igituma iyi kaminuza iri aha ni ukugirango ishake ibisubizo by’ibibazo byugarije abaturage bahaturiye mbere y’ibindi.”

Dr. Marie Christine Gasingirwa ushinzwe kugenzura ubumenyi mu kigo cy’igihugu gishinzwe amashuri makuru na za kaminuza

Ishuri rikuru rya Kibogora Polytechnic rimaze imyaka 6 rikorera mu karere ka Nyamasheke, rikaba rimaze kugeza ku isoko ry’umurimo abarirangijemo bagera ku 1200 bibumbiye mu mashami 4 ari yo ubuforomo n’ububyaza, ibaruramari n’icungamutungo, Iyobokamana, n’uburezi.

Kuri iyi nshuro harangijemo 300. iri shuri na Kaminuza y’u Rwanda akaba ari zo kaminuza zonyine ziri mu karere ka Nyamasheke na Rusizi.

Ba gitifu bavuga ko ibya raporo zihabanye n’ukuri ari uburangare butuma batanga ibyo batagenzure ukuri kwabyo

Muri gahunda igamije kurandura ibibazo bibangamiye abaturage, yerekanye ko hakiri abaturage 315 bakirwaye amavunja mu gihe raporo zavugaga ko nta n’umwe ukiyafite, gusa ngo benshi muri aba biganjemo abarwaye indwara zo mumutwe.

Byaragaye kandi ko imiryango ibana n’amatungo ikiri 2952 mu gihe imirenge yari yatanze raporo ko hasigaye 415 yonyine. Ubwiherero butujuje ibisabwa raporo zavuguga ko hasigaye 55 nyamara itsinda rigaragaza ko hasigaye 3612 harimo igera kuri 178 igomba gusenywa ikubakwa bundi bushya.

Ku bijyanye n’ ingo zitari zifite ubwiherero namba inzego z’ibanze zatanze paporo ko 1348 yari ihari yubatswe yose, ubugenzuzi bugaragaza ingo hakiri 1011 zitabufite.

Umuyobozi w’akarere ka Rusizi yihanangiriza bamwe muri ba gitifu batanga raporo zitari ukuri

Hategekimana Claver uyobora umurenge wa Nyakarenzo avuga ko ibi biterwa no guhabwa za raporo n’abo bakuriye ntibazisuzume, bigatuma nabo batanga raporo zirimo amakosa. Agira ati: “usanga icyo kibazo cyo kubeshya amaraporo ahanini giturura kuri za nzego zitanga raporo maze abazihawe ntirusubire inyuma ngo bagenzure niba ibyo bahawe ari ukuri.”

Vincent de Paul Nsengiyumva uyobora umurenge wa Kamembe yungamo ati: ”Nibyo koko hari ibyo tuba twaragiye dutanga abantu batagenzuye neza.”
kayumba Ephrem, umuyobozi w’akarere ka Rusizi, avuga ko umunyamabanga nshingwabikorwa akwiye kugera ku muturage ubwe akareba uko abayeho aho kubibwirwa.

Ati:”Gitifu agomba kwitegereza akareba imibereho y’abaturage ayoboye... akareba niba koko batakirarana n’amatungo n’ibindi. Hari byinshi bakoze ariko hari n’ibindi bisigaye bagomba gukora kandi bikarangira.”

Uyu muyobozi avuga ko iki kibazo cya raporo zihabanye n’ukuri kigomba gucika kandi mumaguru mashya, haherewe mu gukora k’uburyo abanyamabanga nshingwabikorwa b’imirenge barushaho kwegera abo bayoboye.

Akanyamuneza kari kose ku baturage bahawe amatungo magufi

Abahawe ingurube ni imiryango 20 yo mu murenge wa Nkanka na 20 yo muri Nkombo, bose bakavuga ko zigiye kubafasha kwikura mu bukene kuko zije bazikeneye.

Nabunzinya Venantie wo ku kirwa cya Nkombo yagize ati: “iri tungo ndarishyimye rwose Imana izabahe umugisha nzajya nkuraho mituweri, nta kibazo rwose izangeza kuri byinshi.”

Mugenzi we witwa Joseph Habiyambere wo ku kirwa cya Nkanka yungamo ati” narinkeneye itungo ndaribonye kuva nabaho sinigeze norora itungo none ndaribonye ndashimira ingabo z’u Rwanda zarimpaye.”

Mukamana Esperance, umuyobozi w’ishami ry’imibereho myiza mu karere ka Rusizi yasabye aba baturage kuzifata neza zikazabateza imbere, aboneraho no gushimira brigade ya 201 iyobowe na Colonel Gakuba James gu gikorwa cyiza bakoze.

yagize ati: “Bashyikirijwe amatungo meza ya kijyambere icyo tubashishikariza ni ukuyafata neza ku girango azororoke abashe kubabyarira umusaruro abakure mu bukene nkuko byitezwe ntibumve ko ari ubunani na noheri tubahaye.”

Bakimara kuzishyikira, bamwe muri aba baturage bahize ko batazazihererana bonyine, ahubwo ko nabo bazoroza bagenzi babo bakennye.

Izi ngurube zose uko ari 40 zifite agaciro ka 1,200,000 Rfw aba baturage bakaba bazihawe nyuma y’aho umwaka ushize brigade ya 408 na yo igejeje amazi meza mu murenge wa Nkanka.

Aba ni abaturage bafite inka mu isoko bifuza ko ryakubakwa ku gira ngo bibakize igihombo

Isoko rya Rugari rirema buri wa gatatu na buri wa gatanu ni mpuzamahanga kuko rihuza Abanyarwanda n’ Abanyekongo baturuka ku Ijwi, bivuze ko amafaranga aricururizwamo atubutse; nyamara ntiryubakiye, ntirifite amazi, nta n’umuriro rifite.

Abarema iri soko bavuga ko babangamirwa cyane n’ibihe by’imvura n’izuba bibasimburanaho, ndetse no kutagira ibikorwaremezo by’ibanze k’uburyo iyo babikeneye bitabaza iby’abaturiye iri soko.

Simbarikure Egide umwe mubarema iri soko agira ati" twe turifuza ko batwubakira isoko ku buryo inka zidasohoka ngo zize kutwonera... tuzi ko imisoro yubaka amasoko, igakora imihanda n’ibindi ariko twebwe ntabwo biratugeraho”

Mugenzi we Kayibanda Pacifique yunga murye agira ati" inka zirona maze abashinzwe umutekano bakaguca nk’ibihumbi bitanu."

N’ubwo hashize imyaka igera kuri itanu abarema iri soko bizezwa umuti urambye, kugeza ubu bakomeje gutaka igihombo cya hato na hato.

Ntigurirwa Bosco agira ati" Nk’ubu ugiye hariya hepfo wasanga abantu bose bavuye mu isoko baje kugama hano, inka zasigaye zonyine mu isoko."

Niyonsenga Theogene nawe ati “Urabona ko imvura yaguye hakanyerera, kandi iyo hanyereye umukongomani utugurira inka adukata amafaranga yo kugeza inka ku kiyaga angana n’ 10,000. Bakwiye kutwubakira isoko bakadukura muri iki gihombo."

Ubuyobozi bw’akarere ka Nyamasheke bwatangarije Kigali Today ko abarema iri soko bazaba bafite isoko ryubakiye bitarenze umwaka wa 2019.

Kamali Aime Fabien umuyobozi w’akarere ka Nyamasheke, agira ati" Rwiyemezamirimo uzubaka isoko yamaze kumenyekana... icyo bagiye gukora ni ukwihutisha inyubako”.

Yongeraho ko iki ari igikorwa kiri mu mihigo y’akarere k’uburyo umwaka utaha isoko rya Rugari rizaba rifite aho kuruhukira, aho kurira, aho bashobora kuryama n’ibindi."

Rugari ni ryo soko rinini ry’amatungo riri muri ibi bice kdi rikorerwamo ubucuruzi burimo amafaranga menshi. Iki nicyo gituma abarirema bavuga ko batumva uburyo ritarubakirwa ngo rijyanishwe n’igihe.

Inzobere mu gusuzuma abarwaye amenyo bari gufasha abaturage baturiye uruganda rwa CIMERWA

Bamwe mu baturiye uru ruganda ruherereye mu Karere ka Rusizi, basuzumwe bavuga ko basanze umubare munini ufite uburwayi bw’amenyo, bagasaba abaganga babasuzumye ko babamenyera ikibitera bakakirinda.

Serubabaza Eliyazari ati” Igitera ubu burwayi bwamenyo ntitukizi keretse muganga abidusobanuriye. Ujya kumva ukumva birizanye amenyo akavungagurika cyangwa se agacukuka.”

Bashimira CIMERWA yabazaniye izi nzobere zibagira inama ku burwayi bw’amenyo kuko nibura nyuma yo kumenya uko barwaye ngo birabaha uburyo bwo kwivuza no gufata ingamba zo kwirinda ubu burwayi.

Nyirangirimana Marina ati” Icyo bimfashije nuko menye uko uburwayi buhagaze nkamenya nuko ngomba no kwivuza ndetse n’uburyo ngomba kwitwararika kugira ngo ntazongera kurwara.”

Umurwayi bari gusanga arwaye amenyo byoroheje bari kumwohereza ku ivuriro rimwegereye, abo basanze bikabije bakagirwa inama yo kujya i Kigali mu bitaro by’izi nzobere bya WIWO Specialized Hospital.

Mubibasiwe n’indwara zamenyo harimo n’abana bato

Nduwayo Fidele ukuriye ishami ryo kumenyekanisha ibikorwa muri ibi bitaro avuga ko bene abo bashobora koroherezwa, bakavurwa ku giciro gito.

Ati”Ubundi indwara z’amenyo akenshi ziterwa n’umwanda wo mu kanywa, bushobora guterwa no kudakoresha uburoso mu gihe ukora isuku y’amenyo cyangwa guhora ukoresha uburoso bushaje.

Abo twasuzumye tubohereza ku bitaro bibegereye bakavurwa ku buntu kandi iyo badusanze ku bitaro byacu i kigali tubatangira 50% mu mafaranga batanga yo kwivuza.”

Umuyobozi w’akarere ka Rusizi Kayumba Euphrem agira inama abatuye aka karere kugirira amenyo yabo isuku, kugira ngo bakomeze imirimo yo kwiteza imbere bafite ubuzima buzira umuze.

Ati” Abanyarwanda ba hano Rusizi nabo bafite ikibazo cy’amenyo. Wabonye umubare w’abantu baje kwisuzumisha uko bangana sibake ariko icyo twabwira abaturage ni uko bagomba kugira isuku y’amenyo iyo ubabara ahariho hose ku mubiri birumvikana ko binagira ingaruka ku musaruro umuntu agomba gutanga.”

Iki gikorwa cyakozwe ku bufatanye na CIMERWA

Mu minsi 2 izi nzobere zizamara muri aka karere, barateganya gusuzuma abantu hagati ya 200 na 300 ari na ko bakomeza ubukangurambaga n’inama ku isuku y’amenyo.

Abaturage bagirwa inama yo gusukura amenyo nibura nyuma ya buri gihe bamaze gufata amafunguro kandi bakabikora mu buryo buhoraho.

Nsabimana wafatanywe iryo buye yita zahabu yavuze ko yatangiye gukora akazi ko guteka umutwe afite imyaka 12

Abo batekamutwe bafashwe mu gihe biteguraga kumwaka miliyoni 10Frw nk’ikiguzi. Bafashwe ku bufatanye bw’inzego z’umutekano n’abaturage.

Abo batekamutwe kandi ngo bari bamaze imyaka irenga itatu bambura abaturage, babashukisha ibibuye babumbye, bavuga ko ari zahabu zasizwe n’Abakoloni bataburuye mu butaka.

Abafashwe barimo uwari utwaye icyo kibuye yitaga zahabu, uwari ushinzwe guhuza abo batekamutwe n’abakiliya ndetse n’umumotari wari ubazanye aho bagombaga guhurira n’umuzungu. Abandi babiri baburiwe irengero, kugeza ubu baracyashakishwa.

Ikibuye bafatanywe kibumbye muri “Bloc Ciment” bakagishukisha abantu bavuga ko ari zahabu.

Akimara gufatwa Nsabimana Louis Pacifique yavuze ko abisanzwemo kuva ku myaka 12 kandi ko ari akazi kamutunze kugeza ubu.

Agira ati “Aka ni akazi nk’akandi kose njyewe nakuyemo amafaranga menshi, ni yo antunze. Njyewe ndi umusore umeze neza aka ni akazi ngura ipantaro nziza nkarya neza. Kino kibuye bari kumpa miliyoni 10Frw, maze kugurisha ibindi 4 na kino cya gatanu.”

Ngiryo ibuye abo bita abameni bashukisha abaturage bakabatwara amafaranga

Nzayiramya Fabien, umuturage wo mu Murenge wa Giheke kimwe na bagenzi be basobanura, ko abo bantu babazengereje babasahura utwabo babashutse.

Ati “Hari nabo bajya bategera mu nzira. Hari uwo batwaye miliyoni 2Frw, (uwayamutwaye) turamufata tumugejeje kuri Polisi habura gihamya, ariko amafaranga yari yayoherereje mugenzi we arayirukankana, abo baba baraducitse.”

Ibrahim Ndagijimana ushinzwe gusemurira uwo Munya-Tturukiya wari uje kugura iyo mari, avuga ko ibikorwa nk’ibyo bishobora gutuma abagenderera u Rwanda n’abarushoramo imari bashobora kurutera icyizere.

Ati “Abantu turi kumwe ni abanyamahaga baba barashoye imari yabo mu gihugu bazi neza ko kirimo umutekano. Iyo umutesheje umwanya agaturuka i Kigali akirirwa mu bintu nk’ibi, bituma batera igihugu cyacu icyizere kubera abantu bake barimo abo nakwita abatekemutwe.”

Abo bagabo bahise bajyanwa kuri sitasiyo ya Polisi y’u Rwanda ishami rya Rusizi. Itegeko rigena ko icyaha kibahamye bahanishwa igifungo kiri hagati y’imyaka ibiri n’imyaka itatu ndetse n’ihazabu ry’amafaranga ari hagati ya miliyoni 3Frw na miliyoni 5Frw.

Yafashwe hakoreshejwe imbaraga nyinshi, aho yashakishijwe umwanya munini yihishe mu mirima y’ibyayi

Umuvugizi wa Polisi y’u Rwanda mu Ntara y’u Burengerazuba CIP Innocent Gasasira, yavuze ko bakurikiranyweho icyaha cy’ubwambuzi bushukana, ariko aboneraho n’umwanya wo kwibutsa abantu kujya bashishoza umuntu ubahamagariye ibyitwa imari

Ati “Icyo tuvuga cyane dukangurira bamwe mu baturage bemera gushukwa, urabona, kugira ngo umuntu aguhamagare ngo afite imari kuri telefone mutaziranye ukiruka ukajya kureba iyo mari. Wagombye no gutera intabwe ukamenya uwo muntu uwo ari we.”

Ikibazo cy’abatekamutwe bazwi nk’"Abameni" si ubwa mbere kivuzwe muri ako karere, cyiganje mu mirenge ya Nyakarenzo na Nkungu.

Uumuyobozi w’akarere ka Rusizi asaba abaturage kwitondera ababashuka

Ni mu gihe bamwe mu batuye muri ako karere bavuga ko bagihamagarwa n’abiyita abakomisiyoneri babashuka ko babafasha kubona izo serivisi.

Nyirahirwa Beatrice ari mu bavuga ko hari abiyitirira abakozi b’akarere bakaka amafaranga abifuza serivisi z’ubutaka batabisobankiwe, babizeza babakemurira ibibazo.

Agira ati ”Abo bakomisiyoneri baba bahari ariko baba bameze nk’abatekamutwe. Hari umuturage bayariye (amafaranga) biyitirira abakozi b’akarere.”

Umuyoboziw’Akarere ka Rusizi Kayumba Euphrem, yaburiye abaturage ko uko uyu mujyi ukomeza kwiyongera ari nako abashaka indonke bakomeza kwiyongera.

Ati “Abayobozi turahari, turi ababo bagomba kudusanga igihe icyaricyo cyose na serivisi tutabashije kubaha ako kanya tukabasobanurira impamvu nicyo bisaba kugira ngo bayibone.

“Ni ukubatoza ku gira ngo bibonemo ko bagomba kuvugana n’ubuyobozi kuruta uko baca kuwundi muntu udafite aho ahurira na serivisi za Leta.”

Abaturage basaba ko icyumweru cyahariwe serivisi y’ubutaka cyaba kenshi gashoboka

Muri rusange abatuye aka karere bavuga ko muri serivisi z’ubutaka habayemo impinduka nyinshi nziza ugereranyije na mbere. Icyakora bakavuga ko zirushijeho kunoga, akarere kabo karushaho kubaryohera.

Mukarurangwa Francine Ati “bigomba kugumaho kubera ko mu giturage hari abantu baheranywe n’ibibazo by’ibyangombwa by’ubutaka, bigatuma babandi bagenda bashaka amafaranga bakuriramo kurya abaturage amafaranga.”

Ntiharamenyekana umubare nyawo w’abasaba abaturage amafaranga ngo babafashe kubabonera ibyo bakeneye muri serivisi z’ubutaka, ariko ubuyobozi bw’akarere ka Rusizi buvuga ko hari abari gushakishwa ababyihishe inyuma.

Iyo myanzuro iri mu yafatiwe mu cyumweru cyahariwe ubutaka Akarere ka Rusizi kamazemo iminsi.

Abaturage baje gushaka ibyangombwa by’ubutaka

Umujyi wa Rusizi wari usanzwe ufite igishushanyo mbonera abaturage batibonagamo

Abafite amikoro make muri aka karere bari bategereje kwimurwa nk’uko igishushanyo mbonera cyabanje cyabiteganyaga.

Abatuye muri uyu mujyi kandi banakunze kugaragaza ko iki gishushanyo mbonera kitabahaga amahirwe yo kugerageza kwiteza imbere, nk’uko uwitwa Ntigurirwa Leon abivuga.

Agira ati “Ntabwo ba rubanda rugufi bashobora gukurikiza igishushanyo mbonera niboneye ngo babishobore. Umujyi waba uwabakire gusa, kandi nabo ntibashobora kubaka ubutaka bwose buhari ngo baburangize.”

Nyuma yo kujya inama n’abaturage no kuganira n’impuguke, kuri ubu igishushanyo mbonera cyari gisanzweho kigiye kongera kuvugururwa, kugira ngo n’aba batacyibonagamo ntibahezwe.

Impuguke mu gukora ibishushanyo mbonera zo muri Singapore nizo ziyambajwe mu gusubiramo igishushanyo mbonera cy’Umujyi wa Rusizi abaturage bose bazibonamo

Kankindi Leoncie, umuyobozi w’aka karere wungirije ushinzwe ubukungu avuga ko icyo gishushanyo cyagennye uburyo bwose abantu bazahabwa amahirwe yo kuguma kuri gakondo zabo.

Ati “Uyu munsi nutishoboye hari uburyo ari butekerezweho kuri cyagishushanyo mbonera agume gutura kuri ya gakondo ye ya Kamembe, gihundwe n’ahandi ariko bijyanye n’ubushobozi afite.

“Niba uyu munsi hari udashoboye kubaka inzu y’ubucuruzi azegera ushoboye kuyubaka bavange imigabane bagire igikorwa bahuriraho.”

Abaturage bakiranye iyi nkuru ibyishimo kuko hari abari bafite ubutaka ariko amikoro atabemerera kubwubakaho, nk’uko byari bimeze k’uwitwa Nyiransabimana Aimee.

Ati “Njyewe mfite uburenganzira bwo kubaka maranye imyaka ibiri ariko igishushanyo baramutse bagisubiyemo nshobora kwihangana nkarya ideni nkubaka inzu iciriritse ariko itageretse nk’uko babidusabaga mbere.”

Biteganyijwe ko ivugururwa ry’igishushanyo mbonera cy’imiturire n’imikoreshereze y’ubutaka, rizamara amezi 18. Rizakorwa n’impuguke zo muri Singapore.

Izo mpuguke ni zo zahawe isoko na Leta y’u Rwanda, ryo gukora ibishushanyo mbonera by’imijyi yose yunganira Kigali uko ari itandatu irimo n’uwa Rusizi.

Abayobozi batandukanye zeretswe uko igishushanyo mbonera cy’Umujyi wa Rusizi kizaba giteye

Abaturage bemeza ko ibintu byahindutse kuva aho basigaye bagishwa inama ku byo akarere kagomba kwibandaho

Nsengumuremyi Gallican avuga ko byahinduye imyumvire yo kumva ko ari ibya leta bo bitabareba. Bavuga ko babonaga ibintu bibituye hejuru, nta ruhare na mba babigizemo.

Agira ati “Kudutekerereza ibizadukorerwa ntabwo twabihaga agaciro twabonaga ari nk’ibintu bituguye hejuru cyane cyane ko byazaga atari byo byihutirwa kurenza ibyo abaturage bifuzaga.”

Abo baturage bashima ko basigaye bagishwa inama y’ibyo baba bagiye gukorerwa na bo bakabigiramo uruhare. Bakavuga ko babona ibyo ari byo bizihutisha iterambere ry’ako karere kugeza ubu kabarirwa mu dufite umubare munini w’abaturage bakennye.

Hakizimana Anselme ati “Ubu barakora ibintu babanje kutugisha inama nk’abaturage tukabitangaho n’ibitekerezo mpise ntekereza ko hari aho igihugu kiva naho kigana abana bacu bazakurira ahantu heza.”

Umuyobozi w’Akarere ka Nyamasheke Kamali Aimee Fabien, avuga ko bageragezaga kumenyesha abaturage ibibakorerwa ariko bigakorwa gake ari yo mpamvu ubu bahisemo no gukoresha imbuga nkoranyambaga zose ndetse n’itangazamakuru cyane.

Ati “Umwaka ushize byarakozwe ariko ntibyakozwe neza cyane nk’uko uyu mwaka twabikoze, amatangazo yanyuze mu nsengero, kuri Radio, za WhatsApp, ku buryo hirya no hino batanga ibitekerezo kugira ngo bidufashe gukora igenamigambi rinoze.”

Si ubwa mbere abaturage bagaragaza ko gukorerwa ibintu bo batagizemo uruhare bibagiraho ingaruka mbi, aho usanga babahaye ikintu runaka nyamara atari cyo bakeneye cyane cyane mu bikorwa remezo.

Amwe mu mazu yubakishije rukarakara mu mu dugudu wa Kibangira

Iyo miryango yo mu Murenge wa Bugarama yari yatujwe mu mudugudu wa Kibangira nawo uherereye muri muri uwo murenge mu 2012. Bari bakuwe ku nkengero z’umugezi wa Cyagara kuko wuzuraga ukabasenyera.

Mu mudugudu wa batujwe mu nzu 14 nazo ariko zamaze gutwarwa n’umuyaga, none ubu ntibafite aho biking imvura.

Ubuyobozi buvuga ko bwamaze kubonera amacumbi imiryango ine gusa muri 12, ariko indi umunani isigaye icumbikiwe mu bikoni by’abaturanyi.

Umwe mu bacumbikiwe witwa Nzeyimana Zakayo ufite umuryango w’abantu batanu, binagaragara ko batanishoboye, baba mu gikoni na cyo gito cyane umuturanyi wabo yabatije.

Agira ati “Aha ndacumbitse kandi harimo n’indi miryango itatu.”

Kankindi Agnes nawe avuga ko bagiye kumara imyaka ibiri bacumbitse mu gikoni cy’umuturanyi. Ati “Mu kwa kabiri ndaba nujuje imyaka ibiri ndi hano, mpararana n’umugabo n’abana kuri matora imwe.”

Baba ari aba bacumbikiwe, baba ari ababacumbikiye bavuga ko nta bwinyagamburiro bafite, kandi ngo n’isuku na yo iri mu bibagoye cyane.

Barifuza ko nibura aba baturage nabo babona amazu nkaya

Habimana Jean Bosco avuga ko bifuza ko aba basenyewe babona inzu zabo. Ati “Imvura iragwa hakandavura nkabura n’uko nahanyuza umukoropesho kuba hato.”

Nsigaye Emmanuel, umuyobozi w’aka karere wungirije ushinzwe imibereho myiza avuga, nawe asa n’utabaha ikizere kuko ngo gahunda ihari yo kububakira itari vuba.

Ati “Dusigaje imiryango igera ku munani tutarabasha gutuza izindi nzu tuzuzuza, ni bariya tuzaheraho kuko buri mwaka twubaka inzu.”

Izo nzu avuga ko zirimo kubakwa, zo bazabkisha ibikoresho biramba ariko n’abagituye mu zubakishije inkakara basaba ko zasimbuzwa, bitewe ko ngo ari mu mpinga y’umusozi ku buryo igihe icyo ari cyo cyose zahirima.

Ubucucike bw’abana mu ishuri ku kirwa cya Nkombo butuma bamwe babura uko biga bagata amashuri

Bavuga ko ireme ry’uburezi kuri iki kirwa rishobora gukomwa mu nkokora n’ubucucike bukabije mu mashuri bukanatuma abana benshi bishora mu mirimo y’uburobyi mu kiyaga cya Kivu.

Ubusanzwe Minisiteri y;uburezi ivuga ko umubare ntarengwa w’abana bagomba kwiga mu ishuri rimwe utagomba kurenga 30, ariko ku Nkombo bakaba bagera kuri 50 mu ishuri rimwe.

Abo bana bigaragara ko bakiri bato, baba buzuye mu nkengero za Kivu bashakisha amafi n’isambaza bifashishije indobani, mu masaha bakabaye bari kwiga.

Umwe muri bo agira ati “Nta handi ducungiye muri iki kivu mbega ni wo murima wacu, kuroba tuba twarabimenyereye. Mu cyumweru nshobora kujyayo nka kabiri.”

Ndayambaje Davide, umuyobozi w’ishuri rya Nkombo Foundation School, yemeza ko ikibazo cy’abana babura aho bigira. Avuga ko ibyo byatewe n’uko leta yashyizeho umubare ntarengwa abanyeshuri batagomba kurenza mu ishuri.

Agira ati “Ubu mu kwezi z’Ukuboza tuzandika abana tuzatangirana nabo mu kwa Mbere. Hari abana benshi baza mu kwa Mbere tukanga kubandika, kuko badashobora kubona aho bigira ibyumba by’amashuri biba byamaze kuzura.”

Hari umubare ntarengwa w’abanyeshuri ikigo kiba kitemerewe kurenza mu ishuri rimwe, abasigaye bagashaka ibindi bigo

Mu rugendo aherutse kugirira muri aka karere akagera no ku kirwa cya Nkombo, umunyamabanga wa leta muri Minisiteri y’Uburezi (MINEDUC) Dr Isaac Munyakazi yahise abizeza umuti kuri ki kibazo.

Ati “Muri gahunda yo korohereza abana gukora ingendo ndende no kugabanya ubucucike mu mashuri, aha naho tuzahongera ibyumba by’amashuri bizatuma abana biga neza.”

Kutagira amashuri ahagije ni ikibazo gikomeje kutorohera abaturage ba Nkombo bavuga ko mu myaka 20 ishize ubuzima bwabo bwahindutse bukaba bwiza.

Iri ni isoko rya Rugali rihurirwamo Abakongomani n’Abanyarwanda

Hari hashize ukwezi kumwe Kigali Today itangaje ikibazo cy’abo bakongomani baturuka mu bice bya Biraya, bavugaga ko babujijwe kuza kugura inka muri iryo soko.

Birando Katongo umwe muri abo Bakongomani yavugaga ko batasobanuriwe impamvu bakumiriwe, ariko bagatunga agatoki urwego rushinzwe abinjira n’abasohoka muri ako karere.

Agira ati “Urwego rw’abinjira n’abasohoka mu Rwanda niba bafite ikibazo ntibanatubwira impamvu ituma badufungira isoko! ntitukirya inyama. Bahora batubwira ngo bazadufungurira amaso yaheze mu kirere.”

Ku ruhande rw’u Rwanda naho ikibazo ku bacuruzi b’inyama z’inka cyari gitangiye gutera impungenge aborozi b’inka zibagwa, nk’uko uwitwa Nzanywayimana Pascal yabivuze.

Ati “Uyu munsi nahombye ibihumbi 100Frw mu nka eshatu. Birasaba ko Leta y’u Rwanda ikomorera Abakongomani bakagaruka ijana ku ijana.”

Aho Kigali Today isubiriyeyo kuri uyu wa Kane tariki 8 Ugushyingo 2018, yasanze Abakongomani bongeye kwemererwa kuza kugura inka muri iryo soko.

Abanyarwanda n’Abakongomani bavuga ko bishimiye ko bongeye guhahirana

Abakongomani n’Abanyarwanda bose bishimiye icyo cyemezo bemeza ko ubucuruzi bwongeye kumera neza nyuma y’ukwezi bwari butangiye kuzahara.

Uwitwa Nyiramana Julienne ati “Ubu inka zacu twazanye mu isoko ziri kubona amafaranga. Nibareke Abakongomani baze ni bo batugurira amatungo.”

Umuryango uharanira kubaka amahoro arambye mu karere k’ibiyaga bigari "La benevolencia" ni wo wagize uruhare mu gukemura icyo kibazo, ihuza abayobozi b’ibihugu byombi, nk’uko Pasiteri King Ngoma umukozi w’uwo muryango yabitangaje.

Kamali Aime Fabien ubuyobozi w’Akarere ka Nyamasheke, asobanura ko hari Abakongomani bakoreshaga inzira zitemewe baza kugura inka mu Rwanda.

Ati “Bashakaga guca mu inzira zitari zo, ariko nibaze bace ku mupaka bisanzwe.”

Yavuze ko ubundi amabwiriza agena ko umucuruzi uje kugura inka anyura ku mupaka, ariko inka yaguze ikanyuzwa mu nzira y’amazi.

Isoko ry’inka rya Rugali risanzwe rihahirwamo n’Abakongomani, kuko 2/3 by’inka zigurishirizwamo zigurwa n’Abakongomani.

Ku munsi isoko ryaremye rishobora kugurishirizwamo inka zisaga 700 zaturutse mu turere ari two Nyamasheke, Karongi na Rusizi.

Minisitiri Prof Shyaka yerekwa ibikorwa bitandukanye muri Rusizi

Minisitiri Shyaka yasuye ako karere kuri uyu wa Kabiri tariki 6 Ugushyingo 2018, mu rwego rwo kureba aho iterambere muri ako karere rihagaze.

Nubwo yatunguwe n’ukuntu abayobozi bamuhaye imibare ibusanye kandi idahuye n’ukuri guhari, yavuze ko ako karere gafite amahirwe atarimo kubyazwa umusaruro kandi bikagira ingaruka ku baturage.

Minisitiri Shyaka wagaragaje ubuhanga mu gusesengura imibare yahabwaga n’abayobozi ku bijyanye n’ubukene mu baturage, yavuze ko bigaragaza ko abo bayobozi badakora bashaka umusaruro ahubwo baba bashaka kwikiza ubuyobozi bubakuriye.

Urugero ni umunyamabanga nshingwabikorwa w’Akarere ka Rusizi, Mushimiyimana Ephrem, wamugaragarije ko abaturage bagera kuri 35% muri ako karere bafite ubukene bakeneye gukorerwa ubuvugizi.

Yagize ati “Kugeza ubu dufite 35% by’abantu bafite ubukene. Mu by’ukuri twakagombye kuba turi munsi yaho, tukagira abaturage bari mu bukene bukabije bangana na 15,8%.”

Ariko Prof Shyaka agendeye ku bisobanuro yahawe n’imibare yabwiwe yahise akora ijanisha ryihuse, asanga abaturage bakennye batari kuri 35% ahubwo bari kuri 40%.

Minisitiri Shyaka yasabye abayobozi kwirinda gukora bahushura

Yanababajije ku mubare w’abaturage badafite ubwiherero maze ubuyobozi bw’akarere bumuha imibare igaragaza ko abaturage badafite ubwiherero bagera ku 1.000, ariko nyuma y’akanya gato bahita basubiramo basanga ahubwo 800.

Ati “Inzego z’ibanze dufite umuco wo gukora ibintu duhushura kuko ntabwo wagira (imisarani) 1000 ngo ukore n’usubiramo ubone 800. Harimo guhushura mu kubara no mu kuzana ibisubizo.”

Visi Perezida w’Inama Njyanama y’Akarere ka Rusizi, Rutagarama Eugene, yavuze ko hari ibibazo by’ubuyobozi bikwiye gukemurwa n’uko hazanwa abayobozi badakomoka muri ako gace, bitewe n’uko harimo abahakomoka bagira imico y’uburiganya.

Minisitiri Prof Shyaka yatemberejwe mu bice bitandukanye byo muri ako karere, areba ibikorwaremezo harimo umupaka wa Rusizi ya I, isoko ryambukiranya imipaka, ikiraro gihuza u Rwanda na Repubulika iharanira Demokarasi ya Congo, anagera ku mupaka wa Rusizi ya II.

Yavuze ko ibikorwa yasuye byonyine bihagije kugira ngo ako karere gakora ku mipaka itanu ihuza u Rwanda na Congo ndetse n’u Burundi bibe byakwinjiza amafaranga.

Abayobozi basabwe gukora uko bashoboye bagakura abaturage mu bukene

Dr Munyakazi Isaac avuga ko guhugura barimu ari kimwe mu bizazamura urwego rw’ireme ry’uburezi

Aba barimu bari guhugurwa n’ umushinga w’Abongereza wita ku burezi (BLF)Building Learnig Foundation, ku ngunga y’Ikigega Cy’Abongereza cya DFID.

Josephine Mukankusi yigisha ku ishuri nderabarezi rya Mururu (TTC Mururu). Ni umwe mu barimu bo mu karere ka Rusizi bashima ko amahugurwa bahawe n’uyu mushinga, kuko azabafasha guha amasomo afite ireme abanyeshuri babo, ari nabo barimu b’ejo.

Ati” Turimo gutozwa uburyo bwiza bwo kwigisha icyongereza, kandi hari ibikoresho bitanga baduhaye ndetse hari n’ibitabo ku buryo bizajya bifasha abarimu kwigisha abanyeshuri bitabagoye.”

Ndayisabye Wellars yungamo ati” Aba bana bigira kuba abarezi bagomba kuba bazi neza imyigishirize igezweho kugira ngo bazavemo abarimu beza ejo. Ibyo tugomba kuba natwe tubifitemo ubumenyi buhagije kugira ngo dutegure abarimu bejo neza.”

Abarimu bahuguwe bahize ko bagiye kugaragaza impinduka mu burezi nyuma y’aya mahugurwa

Byumwihariko, mu mashuri abanza kuva mu mwaka wa mbere kugeza mu wa gatatu barahugurwa cyane cyane ku rurimi rw’Icyongereza n’imibare, kugira ngo batange umusingi nyawo ku bana bava mu mashuri abanza.

Silas Bahigansenga Umuyobozi w’ibikorwa muri uyu mushinga uri gutanga aya mahugurwa, avuga ko aya mahugurwa azatuma hatongera kubaho abayobozi b’ibigo bumva ko ari abo kuyobora gusa ntibafashe abarimu.

Ati” Icyongereza ni kimwe mu kiraje inshinga Leta hamwe natwe abafatanyabikorwa kuko ni ururimi rutangirwamo amasomo duhamya neza ko gufasha abarimu kurunoza bizabafasha no gushobora kurutangamo amasomo.”

Abanyeshuri bafite icyizere cy’uko imyigishirize mishya izazamura ireme ry’uburezi

Ubwo yari mu karere ka Rusizi, Umunyamabanga wa Leta muri Minisiteri y’Uburezi Dr Isaac Munyakazi yavuze ko iyi minisiteri ishaka impinduka zihuse mu burezi, ku buryo izi mpinduka zishobora no kugira ingaruka zaba nziza cyangwa mbi ku barimu n’abayobozi b’ibigo by’amashuri

Ati” Niba duhuguye umuntu bikagaragara ko yari umwarimu ariko imikorere ye ikagaragaza ko ashobora kuba umuyobozi w’ishuri, kuri,we twumva twamuha ayo mahirwe kandi bigatanga urugero no ku bandi.

Ariko na wa muyobozi w’ishuri twahuguye ntahinduke arutwa na wa mwarimu ushobora kuzamurwa agahabwa izo nshingano kandi akazikora neza.”

Dr Isaac Munyakazi, Guverineri Munyantwari Alphonse n’ababaherekeje bajya gusura ibikorwa by’uburezi ku Nkombo

Hirya no hino ireme ry’uburezi byakunze kuvugwa ko ridindizwa n’ubumenyi buke bwa bamwe mu barezi.

Ni muri urwo rwego Dr Munyakazi akomereje uruzinduko muri aka karere, aho kuri uyu wa 05 ugushyingo 2018, aherekejwe na Guverineri w’Intara y’Uburengerazub Munyentwari Alphonse, basuye abaturage bo mu Murenge wa Nkombo.

Uru ruzinduko rukaba rwarakozwe mu Rwego rwo gusoza ubukangurambaga bwo gukangurira abantu gusoma, ndetse no gukurikirana aho ibikorwa byo kongerera ubushobozi abarimu bigisha imibare n’ikinyarwanda bigeze.

Beretswe aho urwego rw’imyigishirize y’imibare n’Ikinyarwanda muri uyu murenge ruhagaze

Aganira na Kigali Today ku butumwa yageneye abanye Nkombo Dr Munyakazi yagize ati" Nabakanguriye kwitabira gahunda za leta zirimo amahirwe igihugu cyabageneye, bakohereza abana babo mu mashuri, banirinda imirimo iyariyo yose bakoresha abana batarageza imyaka.

Nabakanguriye kandi no kohereza abana babo kwimenyereza gusoma mu masomero twabashyiriyeho,nasaba abafatanyabikorwa twajyanye gufasha uyu murenge by’umwihariko kugira ngo Ireme ry’uburezi twubaka ahandi n’aha ntihazibagirane."

Nyuma yo gusura ibikorwa by’uburezi muri aka gace ka Nkombo yabakanguriye kubyaza umusaruro amahirwe bahawe bohereza abana ku ishuri bakanabarinda imirimo itabagenewe

Min Shyaka Anastase ari ku mupaka wa Rusizi ya mbere

Uruzinduko rwe yahereye Ku mupaka wa Rusizi ya mbere uhuza ako Karere n’Umujyi wa Bukavu muri Repubulika iharanira Demokarasi ya Congo, akaba yeretswe bimwe mu bikorwa bikenewe Kuri uwo mupaka, birimo kuwagura kuko aho abakozi bashinzwe abinjira n’abasohoka bakorera ari hato kandi hatajyanye n’igihe.

Kuri uwo mupaka Min Shyaka yanasuye imishinga y’abikorera irimo isoko mpuzamahanga ryubatswe ku bufatanye na Leta .

Bimwe mu bibazo yagaragarijwe kuri iryo soko harimo kuba ryaruzuye ariko rikaba ritabona abarikoreramo, mu gihe ba nyiraryo bafashe inguzanyo yo kuryubaka ubu bakaba bakeneye kuyishyura.

Kugeza ubu, banyira ryo bavuga ko aho bakorera hagera kuri 30% gusa y’isoko ryose, bagasaba ko Leta yagira uruhare mu gukangurira abantu kuriyoboka, ngo barikoreremo.

Inkuru irambuye irabageraho mu kanya

Bamwe mu bana bagaragara mu bikorwa by’uburobyi mu kiyaga cya Kivu

Mu barobyi bakorera muri icyo Kiyaga, harimo abana benshi bari hagati y’imyaka 12 na 15, bakoreshwa mu burobyi bw’isambaza n’amafi.

Benshi muri abo bana ni ababa barataye ishuri, abandi bakaba bataranarikandagiyemo.

Umwe muri bo utatangajwe amazina kuko atarageza imyaka y’ubukure, avuga ko ababyeyi babo ari bo babasaba kujya kuroba kugira ngo babafashe gutunga imiryango.

Umwe ati “Natangiye kuroba mfite imyaka icyenda ubu mfite 14. Hari igihe iwacu ari bo (ababyeyi) bantuma cyangwa nkibwiriza nkajya kuroba.”

Undi we avuga ko akazi ko kuroba bagatangira kabagoye ariko bakageramo bakamenyera ku buryo baba bumva batakavamo.

Ati “Tujyamo buri munsi buri munsi. Igihe kiragera tukamenyera kandi ntibyashoboka ko twabireka kuko muri iki Kivu ari ho dushakira imibereho.”

Abo bana Kigali Today yasanze baroba mu Kiyaga cya Kivu

Ababyeyi ndetse n’abarobyi bo batera utwatsi ibyo abo bana bavuga, bakavuga ko abajyayo baba barananiranye ndetse badashaka no kujya ku ishuri, nk’uko bitangazwa n’uwitwa Nyiraminani Josephine.

Ati “Hari igihe bariya bana tubabwira ngo bajye ku ishuri bakanga, kubera ko bamaze gukora ku mafaranga, bakumva batabireka.”

Kayumba Euphrem, umuyobozi w’Akarere ka Rusizi, ntiyemera ko hari abana bakoreshwa mu burobyi mu Kivu ngo kuko hakorwa igenzura rihoraho.

Ati “Kuva i Kivu cyafungura ejo bundi twakoze igenzura dusanga ibyo barabyitwararitse, ariko bivuze ko tugomba guhora dukora igenzura kugira ngo tumenye ko batabirenzeho.”

Muri ako karere, umubare munini w’abana bata ishuri bahita bigira mu burobyi bw’isambaza mu kiyaga cya Kivu.Abandi bana bata ishuri, bo bajya gukora mu mirima y’Icyayi.

Ubuyobozi bw’Akarere ka Rusizi buvuga ko buticaye gusa, kuko bukomeza gushakisha ahagaragara abana batiga hose, kugira ngo basubizwe mu ishuri.

Nubwo ubuyobozi bw’akarere buvuga ko nta bana bakiroba mu Kivu, nyamara unyuze ku nkengero z’icyo kiyaga abona abana baroba

Kubera gucunga neza ikiyaga umusaruro w’isambaza wariyongereye

Hashize iminsi abarobyi bo mu Karere ka Nyamasheke beguriwe ububasha bwo gucunga ikiyaga cya Kivu kivuye mu maboko y’itsinda rya KISENYA (Kivu security Nyamasheke).

Simbarikure Emmanuel umwe muri abo barobyi, avuga ko mbere wasangaga ngo iryo tsinda nta cyo rikora ngo rikumire ba rushimusi bakoreshaga imitego itemewe, ibyo bigahora bidindiza umusaruro w’ibikomoka mu kiyaga.

Agira ati “Bacungaga ikiyaga bashyiramo imitego itemewe ariko ubu dusigaye twicungira ikiyaga nk’abarobyi, turwanya iyo mitego itemewe, bigatuma umusaruro wiyongera.”

“Njye namaze amezi abiri ntarabona nibura ibiro 10 by’isambaza ariko ubu nabonye ibiro bigera kuri 50.”

Umusaruro wabaye mwinshi ku mbuga y’ubwanikiro bw’isambaza

Ndahayo Eliezer, umuyobozi wa koperative y’abarobyi yo mu Karere ka Nyamasheke, avuga ko bari barambiwe gukorera ubusa kuko abenshi bacyuraga ibiro bitarenze bitanu ku munsi.

Ati “Twagiriwe inama n’akarere ndetse n’abashinzwe umutekano bitewe n’akajagari kari kari mu kiyaga. Baradufashije cyane kugira ngo ba rushimusi barwanywe.”

Niyibizi Ntabyera Hubert, umunyamabanga nshingwabikorwa w’agateganyo w’Akarere ka Nyamasheke, avuga ko byari bikwiye kongera imbaraga mu kuwanya ba rushimusi mu kiyaga cya Kivu, kugira ngo gikomeze gitange umusaruro.

Ati “Gucunga ikiyaga si ibintu byoroshye. Ni kinini rwose nabo turabashimira barakoze. Ari ukurwanya izo za magendu, kaningini n’ibiyobyabwenge. Ariko hari inenge twababonyeho turavuga tuti ese dusubijemo abarobyi ntibyaba byiza kurushaho ni cyo twabashyiriyeho.”

Kugeza ubu, ikiyaga cya Kivu kiri mu by’ibanze bitunze abatuye mu Ntara y’Uburengerazuba. Ariko haracyagaragara imbogamizi ko hakiri ibidindiza uburobyi birimo cyane cyane imitego itemewe yanze gucika, nka kaningini n’ibingumbi byangiza isambaza zikiri nto.

Abarobyi bifuza ko ari bo bazajya bahora bicungira ikiyaga kubera ko babikora neza umusaruro ukiyongera

Uburobyi bukorwa n’abagabo bo ku Nkombo ni bwo butunze ingo nyinshi

Mu Kiyaga cya Kivu rwagati ari na ho hari ikirwa cya Nkombo giherereye mu Karere ka Rusizi, ni ho Kigali Today yahuriye n’abaturage kuri uyu wa Kane tariki 01 Ugushyingo 2018.

Mukeshimana Chantal umwe mu bagore benshi batuye kuri icyo kirwa, bahangayikishijwe n’ibyo abagabo babo baba bakora mu gihe kingana n’ukwezi bamara baroba mu Kiyaga cya Kivu. Yemeza ko nta kabuza abagabo bibera mu busambanyi bitwaje akazi kabaheranye.

Agira ati “Ikitubabaza ni ukuntu ducunga ibintu byabo neza, ariko bo bakandarika ibyacu. Ibyo bintu bidutera agahinda cyane. Ntabwo abagabo ba hano bagira kwihangana.”

Nyiramwiza Noella avuga ko iyo abagabo babo batahutse baza bitwaje uduhendabana, ku buryo umugore n’iyo yaba yamenye ko bamuciye inyuma ahita abyibagirwa.

Ati “Abagore tuba tumeze nk’abana iyo agiye kuza aravuga ngo reka nshake akantu ko kumupfuka ku maso, yahagera yakuzaniye igitenge umujinya wari ufite ugahita ushyira. Yaba yazanye Sida, yaba atayifite ibyo ntiwongera kubyibuka ngo mube mwanjya kwipimisha.”

Abagabo nabo ntibabihakana, gusa n’ubwo ntawubyemera mu izina rye ariko bemeza ko kwihanganira igihe bamara mu mazi bibananira, nk’uko uwitwa Tuyizere Jean Claude abyiyemerera.

Ati “Nkajye w’umugabo sinagenda ngo ndangize ukwezi nsize umugore mu rugo ntacyo nkora.”

Mu kazi kabo ka buri munsi, abo bagabo bakora uburobyi, bashobora kuva ku Nkombo baroba bakagera no mu bindi bice byo hirya ya Nkombo. Ibyo bituma ikibazo cyo gucana inyuma gikomera kurusha uko abagore babo babikeka.

Singirankabo Jean yemeza ko aho amazi y’ikiyaga akora hose ngo bahasiga abana.

Ati “Urebye abana benshi bari i Nyamasheke wasanga ari ababyarwa n’abagabo bo ku Nkombo. Usibye na Nyamasheke no muri Congo abagore benshi bahari ni abagabo b’ino bababyarira.”

Umuyobozi w’Akarere ka Rusizi Kayumba Ephrem yihanangiriza abagabo bose bafite ingeso yo guharika no kubyara abana hirya no hino, kuko ngo ari intandaro yo kubyara abana b’inzererezi.

Ati “Ntibyumvikana ukuntu umuntu ava hano afite umugore yagera i Nyamasheke akarongora undi, yagera i Karongi akabona undi. Bigira ingaruka ku mibanire y’umuryango abana bavutse gutyo usanga n’iwabo nta bushobozi bafite.

“Tukaba dushishikariza abaturage bacu kwirinda izo ngeso mbi, umugabo akajya ashaka umugore umwe, n’umugore agashaka umugabo umwe.”

Si ubwa mbere muri ako karere havugwa ibibazo by’ubuharike n’ubushoreke, bikavugwa ko cyane cyane babyanduzwa n’abaturanyi bo muri Repubulika iharanira demokarasi ya Congo.

Bamwe mu bifuza gusaba imbabazi barasaba bagenzi babo nabo kubohoka

Mukamuhashyi Esperence, akaba umwe mu barinzi b’igihango mu karere ka Nyamasheke, yemeza ko hari bamwe mu bafungiye ibyaha bya Jenoside bakijijisha imiryango yabo ko batazi icyo bafungiye.

Agira ati “Niba twifuza ko ingengabitekerezo iranduka n’imizi yayo wowe ugahora ubwira umwana ngo ‘iso arafunze afungishijwe na Mukamuhashyi Esperence. Nta wundi umuhejeje hariya.’ Umwana yakubaza ati ‘ese byatewe n’iki?’ ati ‘tuza mvanaho induru’”

Nyamara Ayabagabo Emmanuel imwe mu bafungiye muri gereza ya Rusizi kubera uruhare yagize muri Jenoside, avuga ko nyuma yo kwemera icyaha no kugisabira imbabazi bakikiranura n’abo bahemukiye ari bwo amahoro yatashye mu mitima yabo.

Ati “Iyo umaze gusaba imbabazi rwose umuryango wawe uranezerwa maze gusaba imbabazi. Madamu yaje aha ataha anezerewe yishimye mu gihe gito aragaruka arongera anzanira ingemu, ukabona rwose byaragize icyo bigarura mu miryango.”

Mukamuhashyi, umurinzi w’igihango avuga ko hari abafungiye Jenoside babeshya abo mu miryango yabo ko batazi icyo bazira

Mugenzi we bafunganye witwa Musabyimana Domitien avuga ko imyaka yose yamaze muri gereza atarasaba imbabazi atigeze agira Amahoro. Ariko aho gahunda ya “Ndi umunyarwanda” iziye bakamwigisha yahise amenya icyo akwiye gukora ngo abone Amahoro.

Ati “Ndasaba icyo mwankorera ni uko mwanzageza n’aho nakoreye icyaha mukampa umwanya nk’uyu kuko hari abo ntakicyibuka nahemukiye nabo nkabasaba imbabazi.”

Padiri Nzamwita Eric uyobora Paruwasi ya Ntendezi akaba n’umufashamyimvire kuri gahunda y’ubumwe n’ubwiyunge, asanga uwakoze Jenoside akwiye no gusaba imbabazi umukomokaho cyangwa uwo bashakanye aho guhora abajijisha avuga ko afungiye akarengane.

Ati “Saba imbabazi umuryango wawe ubabwire uti ‘narabakoshereje icyaha nakoze cyabasize icyashya mu mateka y’ubuzima bwanyu ariko mbasabye imbabazi.’”

Abafungiye icyaha cya Jenoside barasabwa gusaba imbabazi abo bahekuye ku gira ngo bafatanye kubaka Umunyarwanda muzima

Nyuma y’imyaka 24 Jenoside ihagaritswe, umuryango AVEGA ubumbiye hamwe abapfakazi ba Jenoside n’abakoze Jenoside bataratera intambwe ngo basabe imbabazi kandi abazitanga biteguye.

Kambogo Costasie hagarariye AVEGA mu karere ka Nyamasheke, yabitangaje ubwo uyu muryango wasuraga abafungiye muri gereza ya Rusizi bakomoka i Nyamasheke.

Ati “Ikibabaje ni ukutamenya gusaba imbabazi ngo uve mu bikwicaje hano ujye kubaka umuryango nyarwanda. Twebwe abantu biciwe twamaze kwiyakira turabasaba namwe kugira iki gikorwa icyanyu mwishyire mu mwanya w’abantu mwahekuye.”

Padiri Nzamwita asaba abafungiye icyaha cya Jenoside gusaba imbabazi abo mu miryango yabo

Abenshi mu bagororwa bafungiye muri Gereza ya Rusizi bavuga ko “Ndi Umunyarwanda” igitangira, batabyumvaga ariko uko bakomeza gusobanurirwa ubu abagera kuri 300 mu 1.594 bafungiye muri gereza ya Rusizi bifuza gusaba imbabazi abo bahemukiye.

Kambogo hagarariye AVEGA mu karere ka Nyamasheke avuga ko biteguye gusaba imbabazi ariko bakabura abo baziha

Aho Guest House ya Nkombo yubatswe hateye abashoramari impungenge

Abajyanama b’ubuzima bibumbiye mu ihuriro ry’amakoperative yo mu karere ka Rusizi, bafashe umwanzuro wo guhagarika kubaka Guest House ya Nkombo, kubera gutinya ibihombo ishobora kuzabateza.

Mu ntangiriro z’uyu mwaka ni bwo iryo huriro ry’amakoperative i beguriwe inzu ya Guest house ya Nkombo ngo bayikoreremo imirimo ibabyarira inyungu. Ariko nyamara y’amezi 10 imiryango y’iyi nzu iracyafunze.

Abo bashoramari bavuga ko baje kwikanga igihombo, nyuma yo gusuzuma bagasanga icyo bahakorera cyose byagorana kubona umukiliya bitewe n’uko kuhagera bitoroshye.

Umwe muri bo utashatse gutangaza amazina ye avuga ko basanze abantu bambuka bakajya ku nkombo bagiye kwidagadurirayo ari bake cyane.

Agira ati “Tumaze kubona uburyo bwo kujya ku nkombo ku baturage bajya kunywerayo cyangwa kuharara bigoye, tubona nta musaruro dushobora kubonayo twaricyaye nka komite nyobozi tubyigaho tubona dushobora kugwa mu gihombo kandi n’umuhanda ugerayo ntukoze.”

Abanyamuryango 1.677 ni bo bibumbiye mu makoperative 18 ari mu mirenge yose 18 y’Akarere ka Rusizi.

Theoneste Niyibizi umwe muri abo banyamuryango asaba ko ahubwo ubuyobozi bwabafasha kubyaza umusaruro miliyoni hafi 30Frw bari bamaze gukusanya.

Ati “Akarere ka Rusizi gafite imishinga myinshi yo kuzamura umujyi mu byo dutekereza hari amasoko abaturage bacuruza banyagirwa tugatekereza ko twakubaka isoko. Hari imisarani rusange mu Mujyi wa Rusizi akarere karamutse kaduhaye ubutaka twareba icyo dukora kitaduhombya.”

Kugeza ubu Akarere ka Rusizi ni ko gahanzwe amaso mu gukemura ikibazo cy’iyi Guest House ya Nkombo yuzuye itwaye amafaranga y’u Rwanda asaga miliyoni 300Frw, ariko mu myaka irindwi imaze yubatswe ibarwa nk’igihombo gikomeye ku karere kuko nta cyo iratangira kwinjiza.

Kayumba Ephrem umuyobozi w’akarere avuga ko igisubizo bagiye kugishakira mu guteza cyamunara inyubako zagombaga gukorerwamo n’iyo Guest House.

Ati “Twatangiye inzira zo kumenya agaciro kayo mu kwezi kumwe bazaba baduhaye raporo kugira ngo tuyigurishe muri cyamunara ku girango yegurirwe n’abacuruzi.”

Ikibazo nkinki ntikiri kuri Guest House ya Nkombo gusa kuko hari n’amazu yubatswe mu Kagari ka kamurera mu murenge wa kamembe, ubuyobozi buvuga ko zubakiwe gukodeshwa ariko na yo zabuze abakiriya ndetse zimwe zatangiye kwangirika.

Umuhuzabikorwa w’umushinga RSSP mu Karere ka Nyamasheke Batamuriza Dorothée

Umushinga RSSP wa Minisiteri y’Ubuhinzi ni umwe mu mishinga yabafashije, kuko watangiye bahinga uko bishakiye bigatuma umusaruro wabo uba ari muke.

Aba bahinzi bavuga ko mbere bahinganga uruvangitirane rw’imyaka kandi bagahinga ahantu batuhira.

Uwitwa Munderere Jonathan avuga ko ibyo ngo byakubitiragaho n’uko bahingaga ahantu hatari amaterase y’indinganire ku buryo imvura yagwaga ikabikushumura.

Agira ati “Twahingaga tuvangitiranyije imyaka kandi ku gasi. Agafumbire dushyizemo tunyanyagiza imvura yagwa igatwara, wahinga ibigori ntibirenge metero ebyiri.”

Mugenzi we Hitimana Ezekiel atanga urugero rw’uko mbere kugira ngo bafate amazi bahingamo umuceri bayakotezaga urwiri n’amabuye ariko imvura yagwa ikkabisandaza.

Abahinzi babonye umusaruro basigarana ikibazo cyo kubona isoko

Ngo ariko aho umushinga RSSP uhagereye, waberetse uko bakwiye kuwuvomerera neza ntutwarwe n’amazi, abahinga mu materasi na bo berekwa uko abyazwa umusaruro.

Ati “Amaterasi yareze dukuramo umusaruro mwiza muri site ntitwabura toni 40 cyangwa 50.”

Mushinga RSSP urangije akazi kawo ariko abahinzi bemeza ko urwego bagezeho ubu nta kibazo cy’ubumenyi buke bazongera guhura nacyo.

Umuhuzabikorwa w’umushinga RSSP mu Karere ka Nyamasheke, Batamuriza Dorothée, yemeza ko akarere kazakomeza kubaba hafi.

Ati “Ntabwo twabacukije kuko Leta ntaho yagiye murabibona ko akarere dufatanya mwabonye RAB ko ihari bazakomeza gukorana n’inzego zisanzwe z’ubuyobozi.”

N’ubwo bushimira ko ikibazo cyo kwihaza mu biribwa gisa n’igikemutse ariko baracyahangayikishijwe n’icyo kuba bashobora kutazabona isoko ry’umusaruro wabo.

RSSP ni umushinga ugamije guteza imbere amajyambere y’icyaro. Mu myaka itandatu wari umaze ukorera muri Nyamasheke mu gishanga cya Kamiranzovu n’icya Kirimbi, hatunganyijwe amaterasi kuri Hegitari zigera ku 1.187.

Wanafashije abaturage bubaka n’ingomero eshanu zo kuhira umuceri, ububiko bw’umuceri bubiri n’ubwanikiro bwawo bune.

Iyo uburobyi buhagaze ubuzima ku Banyenkombo buba ihurizo

Ubusanzwe buri mwaka, ikiyaga cya Kivu ku ruhande rw’u Rwanda gifungwa amezi abiri kugira ngo umusaruro w’ibikomoka mu mazi birimo wiyongere.

Ubuyobozi buvuga ko bubikora ku nyungu z’abaturage ariko abaturage bo ku kirwa cya Nkombo bo si ko babibona.
Bemeza ko ikivu ari wo murima wabo wonyine, bityo kugifunga bikaba kubahagarikira akazi n’ubuzima muri rusange, nk’uko bitangazwa n’umwe muri bo witwa Mukareta Colethe

Agira ati “Hari igihe tuburara. Ni ukuri nta murima tugira isambu yacu ni ikivu.”

Maombi Julienne we avuga ko iryo funga rishobora gutuma hari abishora mu ngeso mbi zirimo n’ubusambanyi kugira ngo imibereho idahagarara.

Ati “Iyo bafunze ikivu yewe n’umuntu utarasambana hari igihe umuntu amubwira ngo ngwino nguhe 500Frw kubera inzara igatuma ujya gusambana kandi utari usanzwe ubikora. Wareba ukuntu abana bifashe ukavuga uti uwakora icyaha ariko abana bakabona icyo barya.”

Aba baturage bifuza ko bakomorerwa, bagakomeza bakaroba, kuko batekereza amafi n’isambaza birimo bidateze gushira, nk’uko uwitwa Uwamahoro Noella abivuga.

Ati “Mfite imyaka 55 ko batafungaga i Kvu kera ntitwabagaho? Narategaga tukarya zike tubonye tukanyurwa nazo ariko ubu ukuntu bafunga i Kivu kandi nta handi twerekera.”

Umukozi w’Umurenge wa Nkombo Umuhire Neophites, wavuze mu izina ry’umunyamabanga nshingabikorwa, yemeje ko guha agahenge amafi n’isambaza bitazahagarara. Yasabye abaturage kugira umuco wo kujya bizigamira ibibatunga mu gihe ikivu cyaba gifunze.

Ati “Iyo i Kivu gifunze ubuzima burahinduka, abenshi bajya gushakisha ariko burya ibintu byose biba bisaba kuzigama. Ni byo duhora tubakangurira ariko abenshi usanga batabishoboye.”

N’ubwo abaturage binubiraga kuba barafungiwe amezi abiri, amezi abiri yo yari ashize. Byari biteganyijwe ko gifungurwa kuri iki Cyumweru tariki 21 Ukwakira 2018, kugira ngo bakomeze akazi kabo.

Abaturage batuye ikirwa cya Nkombo bagera ku bihumbi 18 bose usanga batunzwe n’uburobyi.

Bamwe mu babyeyi bahamya bagiye gukora iyo bwabaga ngo bahindure imyumvire y’urubyiruko rwabo

Iyo ngesso igaragara mu Karere ka Nyamasheke, gahana imbibe na Repubulika iharanaira Demokarasi ya Congo (RDC).

Byatangiye kumenyekana nyuma y’aho ababyeyi bo mu mirenge itandukanye igize ako karere baherutse kugaragaza ko babangamiwe n’imico abasore n’inkumi bagenda badukana igasiga ibasahuye.

Kugeza magingo aya ababyeyi bo mu murenge wa Nyabitekereri, umwe mu mirenge yakunze kurangwamo ibi bibazo, basobanura ko izi ngeso abasore n’inkumi badukanye zigenda zifata indi ntera.

Bantubino Vedaste, umwe mu babyeyi babyiruye muri uwo murenge, avuga ko ntako batagira urubyiruko rwabo ngo babicikeho ariko bikanga.

Agira ati “Iyo umukobwa amaze kwemerera umusore ko afite ibintu, umusore nawe aza akurikiye bya bintu ariko biturutse ku mukobwa. Nyamukobwa akabwira nyina ati mawe rero nyabuneka munkorere ibi nibi nabonye umusore.

Akomeza ati “Nyamugore agahita abwira umugabo we ati umwana yabonye umugabo iyo umusore ahageze ntakindi gikorwa bahita bamuzimana inkoko.”

Umunyamabanga nshingwabikorwa w’Intara y’Uburengerazuba Habiyaremye Pierre Celestin

Avuga ko iyo umusore abonye yakiriwe neza ubugira kabiri ahita atangira gusaba umukobwa amafaranga, umukobwa nawe bitewe n’ibyo amaze gutangaho umuhungu akemera kuyashaka.

Migambi Gabriel we avuga ko hari n’ababyeyi batiza umurindi iyo ngeso, kuko batabishyigikiye ababikora bacika intege.

Ati “Intege nkeya nitwe ababyeyi tuzifite. Dushyize mu gaciro ba nyina twabazanye ntabyo baduhaye, tubyara abo bana twagombye kwicaraza abo bana mu muryango tukababwira ko igihe kizagera bakabona abagabo.”

Ubwo hizihizwaga umunsi mpuzamahanga w’umugore wo mu cyaro tariki 18 Ukwakira 2018, umunyamabanga nshingwabikorwa w’Intara y’Uburengerazuba Habiyaremye Pierre Celestin, yasabye ababyeyi guhindura imyumvire.

Ati “Ku bijanye n’isake, kugura abagabo n’ibindi ni imyumvire igomba guhinduka kandi ntibisaba umunsi umwe ariko uko ugenda uganira n’abaturage bagenda babyumva.

“Iyo uguze umugabo igikurikiraho n’uko iyo y’amafaranga ashize aramwirukana akongera agashaka undi ufite andi, bivuze ngo bibafiteho ingaruka.”

Uyu muco wagiye ugaragara mu mirenge ya Nyabitekeri, Shangi, Karambi na Cyato. Abahatuye bakavuga ko babikomora mu baturanyi babo bomuri Congo.

Ababyeyi basabwe guhindura imyumvire ku gira ngo imico mibi abana babo badukanye icike

Abaturage bavuga ko gutera ibiti bizatuma batongera kwibasira ishyamba rya Cyamudongo

Mu Rwanda harabarurwa amashyamba kimeza agera ku ijana kandi akeneye kubungwabungwa kuko ashobora kuzimira.

Abaturage bagasabwa kwirinda kuyinjiramo bashaka gutema ibiti cyangwa kuyangiza kuko afite uko nayo arengera ubuzima bwabo, cyane cyane mu gufata umwuka bahumeka cyangwa kuzana imvura.

Babisabwe na Minisiteri y’Ubutaka n’Amashyamba (MINILAF) ubwo yifatanyaga nabo gutera ibiti mu mirima yabo bizabafasha kubona igiti hafi yabo badafashe inzira ngo bajye kwangiza amashyamba, tariki 12 Ukwakira 2018.

Aba baturage bavuga ko kugeza ubu hakigaragara abaturage baca mu rihumye abashinzwe kurinda ayo mashyamba bakajya gutemamo ibiti.

Niyonteze Joseph umwe muri abo baturage avua ko abenshi baza gutemamo ibiti byo gutwika amakara n’izo gucanisha mu guteka.

Ati “Nta mwaka washira badafashwe. None se abajyana amakara Kamembe ubona ko bayakura he! Hari abagenda bakagura ibiti bibiri bakibiraho ibindi.”

Abayobozi batandukanye bifatanyije n’abaturage gutera ibiti mu mirima yabo

Sinayobye Theopfile we yungamo ati “Muri ririya shyamba abangiza baragaragara ariko si benshi. Iyo bafashwe baraganirizwa bakava aho babyumvise kuko kwangiza ibidukikije atari byiza.”

Ku rundi ruhande abaturage basobanura ko igikorwa cyo kubafasha gutera ibiti bivangwa n’imyaka mu mirima yabo bizabarinda kongera kwibasira amashyamba ya Cyimeza.

Niyonizeye Beni avuga ko nta warenga ku biti bye ngo ajye gutema ishyamba rya Cyamudongo baturiye.

Ati “Nitugira amahirwe bigakura ibintu byo kujya gutashya mu ishyamba rya Cyamudongo bizavaho tujye dutema ibiti biri mu mirima yacu.”

Bagiye guca ukubiri no kwangiza ishyamba rya Cyamudongo kubera gutera ibiti

Umunyamabanga uhoraho muri MINILAF, Musabyimana Jean Claude, yabwiye abaturiye amashyamba ya Cyimeza kwibagirwa ibyo gutema ibiti mu mashyamba ya kimeza.

Ati “Amashyamba cyimeza arakomwe ntawe ufite uburenganzira bwo kugira igiti akuramo. Gahunda ihari ni uko tugabanya ibiti bipfa ubusa ndetse n’ibiti byangizwa dukoresha ubundi buryo bwo guteka butari inkwi, mu mijyi tubashishikariza gukoresha Gazi mu cyaro tukabasaba gukoresha Biogaz.”

Ibiti biterwa mu murima bivanzwe n’imyaka, usibye kuba bifasha abaturage kwirinda kwangiza amashyamba baturiye ngo binafata ubutaka ntibutwarwe n’isuri.

Umunyamabanga uhoraho muri MINILAF Musabyimana Jean Claude

Abayobozi batandukanye bafatanyije n’abaturage gutera icyayi

Icyari cyateye umujinya abo bahinzi, ngo ni ukuntu abayobozi b’amakoperative babarizwamo babayoboraga nabi ndetse bakanyereza imitungo yabo harimo n’amafaranga yavaga mu cyayi cyabo .

Nambajimana Simeon, umwe muri abo bahinzi ati ” Abatuyoboraga bahugiraga mu kwirira inyungu zacu bikaduca intege, bikanatudindiza cyane mu kazi.”

Nyuma y’ibibazo byinshi byavugwaga mu buhinzi bw’icyayi, nddetse abenshi bakaba bari barateye ishyamba aho bagikuye, kuri ubu ubuhamya buhari ni uko byakemutse nyuma y’uko ubuyobozi bw’amakoperative yabo buhindutse.

Ngerageza Batega agira ati” Nari nararetse guhinga icyayi, aho nagiteraga mpatera ishyamba, ariko ubu nongeye kurandura ishyamba ntera icyayi ubu basigaye bampa ku dufaranga nanjye ndi kwiteza imbere.”

Abahinzi b’icyayi bishimira ko gisigaye kibateza imbere

Karamaga Francois umuyobozi w’impuzamahuriro y’abahinzi b’icyayi mu Rwanda , avuga ko uruhare bagize mu guca akarengane abahinzi b’icyayi bahuraga nako ngo rwatumye abahinzi b’icyayi bongera kwigirira icyizere, bongera kuyoboka icyo gihingwa .

Ati” Ubungubu twashyizeho uburyo umuhinzi wese agomba kumenya amafaranga agomba guhembwa buri kwezi, ayo akatwa y’ ifumbire n’ayo twayumvikanyeho. Mbega ubu bisigaye bigenda neza byose twarabihinduye abahinzi barabyishimiye.”

Kugeza ubu mu Rwanda hari abahinzi b’icyayi babarirwa mu bihumbi 43. Muri bo, abagera ku bihumbi 11 bakaba ari abo mu turere twa Rusizi na Nyamasheke.

Igihingwa ngengabukungu cy’icyayi ni kimwe mu byinjiza amafaranga menshi mu gihugu.

Karamaga Francois umuyobozi w’impuzamahuriro y’abahinzi b’icyayi mu Rwanda avuga ko bagize uruhare mu guca ibyatumaga abahinzi binubira guhinga icyay

Mu mezi umunani ashize icyayi cyinjije miliyoni 67 z’Amadolari, intego ni uko ayo madolari agomba kwiyongera cyane, kuko bateganya gukomeza kuzamura umusaruro w’icyayi haba mu bwiza no mu bwinshi.

Bitabiriye gutera icyayi bashishikaye

Celestin Mutuyimana umukozi w’umuryango Hope and Home Family for children asaba ubuyobozi n’abafite ibigo guhindura imyumvire

Nyiraneza Rachère ni umwe mu babyeyi banenga bagenzi babo guha akato abana bavukana ubumuga. Avuga ko atiyumvisha ukuntu umubyeyi muzima watwise amezi icyenda umwana, yumva ko hari uwamumurerera kumurusha.

Ati” Mfite umwana ufite ubumuga namurera neza kimwe n’abandi, ndetse ni we nakwitaho cyane kurusha umuzima kuko we hari ibyo afite byihariye byatuma yitabwaho.”

Bigirimana Samuel nawe ati” Ababyeyi bohereza abana mu bigo bibarera banga ko babatesha umutwe kubera ubumuga, bagahugira mu bindi.”

Umuryango Hope and Home Family for Children uravuga ko ugihangayikishijwe na bene aba babyeyi ndetse ukanavuga ko ibigo bibakira bidakwiye gukomeza kwishimira kuba bibafite, kuko icyiza ari uko barererwa mu miryango.

Uyu muryango kandi uranasaba inzego z’ibanze kugira icyo zikora kuri iki kibazo nk’uko Celestin Mutuyimana, umuhuzabikorwa w’uyu muryango abivuga.

Ati” Ndabwira abafite ibigo birera abana bafite ubumuga ko atari cyo gisubizo gusa, cyane ko ntahantu haba heza gute ngo harushe umuryango umuntu arererwamo akabona ibikwiriye.“

Abayobozi b’inzego z’ibanze barasabwa kugira icyo bahindura mu myumvire y’ababyeyi bafite abana bavukanye ubumuga

Akomeza agira ati” Dukwiye kugira ibigo byigisha abana bafite ubumuga, ariko nyuma y’amasomo bagasubira mu miryango.”

Umuryango Hope and Home Family for children uvuga ko wizeye neza ko iyi myumvire bamwe mu babyeyi bafite yo kubaha akato izageraho igahinduka.

Ibi ngo birashingira ku ntambwe igenda iterwa mu kugaragariza isi yose ko umuntu uvukanye ubumuga na we ari umuntu nk’abandi mu nzego zose z’ubuzima.

Umupaka uzwi nka Petite Barriere wa Rubavu uri mu yizahuzwa

Byakozwe mu rwego rwo kurushaho koroshya imigenderanire n’imihahiranire hagati y’ibihugu byombi.

Imipaka yahujwe ni uwa Rusizi ya mbere uhuza Akarere ka Rusizi n’Umujyi wa Bukavu, uwa La Cornishe n’uwa Grande Barriere bihuza Akarere ka Rubavu n’umujyi wa Goma, zahujwe ku mugaragaro kuri uyu wa Kabiri tariki 2 Ukwakira 2018.

Ku mipaka ya La Corniche na Grande Barriere, nk’uko bikubiye mu nyandiko impande zombi zashyizeho umukono kuri uyu wa kabiri tariki ya 02 Ukwakira 2018, bemezanyije ko bitarenze uyu mwaka wa 2018, igomba kuba yatangiye gukora amasaha 24/24.

Gusa ku mupaka wa Rusizi ya Mbere haracyari imbogamizi ziterwa n’ibikorwa remezo bitarahagera, birimo inyubako zo gukoreramo n’ibindi bijyana nazo.

Impande zombi zirinze kuvuga igihe runaka ibyo bizaba byarangiriye ku gira ngo uyu mupaka nawo utangire gukora amasaha 24, nk’uko byatangajwe na Hilaire Kasusa Kikobya, Visi Guverineri wa Kivu y’Amajyepfo.

Yagize ati “Hari inyandiko ihuriweho n’impande zombi bamaze gushyiraho umukono, iyo rero ikaba ikubiyemo ibyamaze gukorwa kugeza kuri uyu munsi wa none. Gusa mu gihe gito inyubako nazo ziraba zahageze.”

Abayobozi bashinzwe abinjira n’abasohoka ku mpande z’ibihugu byombi bemezanyijwe ku bikorwa byo guhuza imipaka no kongera amasaha y’akazi

Abaturage bishimiye icyo cyemezo bavuga ko n’ubwo hajya hagaragara umwuka mubi hagati y’ibihugu byombi, ariko abaturage hagati yabo nta kibazo bafitanye.

Kitumaine Munyole uba ku ruhande rwa Congo yagize ati “Twebwe n’abaturage yaba twe Abanyekongo nta kibazo duditanye n’Abanyarwanda kandi no kuruhande rw’u Rwanda nta kibazo abaturanyi bacu badufiteho.

“Ni yo mpamvu duhora dusaba ngo badufungurire imipaka niba hari n’ibibazo bihari abayobozi bakuru bo munzego zo hejuru nibo babizi.”

Uretse iki cyifuzo cyo kongera amasaha serivise z’imipaka abaturage b’ibihugu byombi bahora batura abayobozi hagati y’ibihugu byombi, u Rwanda na Repuburika iharanira demokarasi ya Congo byanumvikanye guhuza servisi za gasutamo ku mupaka wa Rusizi ya Kabiri.

Nkunzurwanda Jean Pierre, uyobora ishami rishinzwe ububanyi n’amahanga mu kigo gishinzwe abinjira n’abasohoka mu Rwada, yavuze ko bemeranyijweho no guhuza serivisi za gasutamo ku mupaka wa Rusizi ya Kabiri.

Ati “Inkunga yo kubaka umupaka yarabonetse igisigaye gutangira bifite ibindi bigomba kubanza birimo gushaka ubutaka buzubakwaho uwo mupaka uhujwe.”

Imibare itangwa n’inzego zishinzwe abinjira n’abasohoka igaragaza ko ku mupaka wa Rusizi ya Kabiri ukoreshwa n’abantu babarirwa hagati y’ibihumbi bitandatu n’umunani ku munsi.

Abenshi ngo ni abakora ubucuruzi buciriritse, bwambukiranya imipaka biganjemo abagore.

Abaturage barishimira ko bacitse ku kuvoma ibiroha

Ni imiyoboro 2 mu karere ka Rusizi n’itandatu mu karere ka Nyamasheke yose ifite uburebure bw’ibirometero 236.

Nahayo Theobard avuga ko imyaka yari ibaye myinshi bakoresha amazi yanduye nayo akabona umugabo agasiba undi, ariko ubu ngo batangiye kubibona nk’amateka

Ati” Urebye imisozi twazamukaga ntamugore wajyaga kuvoma kuri iyo misozi, umugabo niwe wagendaga akajya kuyazamura uwari koherezayo umugore n’ikivomesho yari kugitayo akagaruka ntamazi.”

Mukakarisa Esperence yungamo ati” Kuba baraduhaye amazi biratworoheye, kuko twamaraga iminota 40 twagiye kuvoma tugasanga imirimo imwe yapfuye ariko twararuhutse n’abanyeshuri biraborohereza ku girango bajye ku ishuri.”

Ubuyobozi bw’uturere twa Rusizi na Nyamasheke buvuga ko intego ari uko abatuye utu turere bose bagerwaho n’amazi meza, aha akaba ari ho bahera bashimira Cooperation Suisse mu kubafasha kwesa uyu muhigo.

Nsigaye Emmanuel umuyobozi w’akarere wungirije ushinzwe imibereho myiza y’abaturage.

Yagize ati” Abaturage nta mazi meza bari bafite ndetse n’ibikorwa Remezo byari biri muri iyi mirenge yagejejweho amazi, birimo nk’ibigo nderabuzima, amashuri n’ibindi.
Byari ibibazo bikomeye ku barwayi kubona amazi niyo mpamvu dushima Cooperation Suisse yabidufashijemo.”

Abashinzwe gucunga iyi miyoboro bagaragaza uburyo ikora neza

Hagati aho Perer Lindenmann, umuyobzi ushinzwe guhuza ibikorwa wa Cooperation Suisse, mu karere k’ibiyaga bigari, yasabye ubuyobozi bw’utu turere n’abaturage kubungabunga ibi bikorwa kugira ngo bibagirire akamaro.

Yanavuze ko ibikorwa nk’ibi uyu mushinga wakoreraga mu Rwanda birangiye, bakaba bakomereje muri Repubulika iharanira Demokarasi ya Congo.

Ati” Icyo tubasaba ni ugukomeza gucunga ibi bikorwa bikagirira aba baturage akamaro nibura ku geza mu myaka 40 cyangwa 50 bigakomeza gufasha abaturage batuye hano.”

Perer Lindenmann, umuyobzi ushinzwe guhuza ibikorwa by’umushinga Suisse Contact mu karere k’ibiyaga bigari, yasabye ubuyobozi bw’utu turere n’abaturage kubungabunga ibi bikorwa

Ku rundi ruhande hari abaturage bagaragaza ko n’ubwo aya mavomo yabegerejwe, hari ba rwiyemezamirimo bayacunga

Uwimanikunda Christine ati” RURA itubwira ko tugomba kuvoma amazi ku mafaranga umunani ku ijerakani ariko rwiyemezamirimo ikatwishyuza amafaranga 25. Iyaba bari badushyize ku mafaranga umunani ayo yajya aboneka.”

Kuri iki kibazo, Ing Hakizimana Emmanuel umukozi wa Minisiteri y’ibikorwa remezo, asaba ko ibi byakosorwa ndetse akagaragaza ibiciro nyabyo ku bishyuza amazi. Naho ku bo atarageraho na mba, avuga ko nibura muri 2024 amazi meza azaba agera ku bantu bose.

Kugeza ubu, ijanisha rigaragaza ko mu karere ka Nyamasheke abagerwaho n’amazi meza bageze kuri 80%, mu gihe mu karere ka Rusizi bageze kuri 70%.

Iyi miyoboro Cooperation Suisse yubakiye utu turere guhera muri 2013, yuzuye itwaye Miliyari enye n’igice z’amafaranga y’u Rwanda.

Bamwe mu baturage bashyikirizwa inyemezabwishyu y’ubwisungane mu kwivuza

Babivuze ubwo bishyuriraga ubwisungane mu kwivuza abaturage 400 babarurwa mu cyiciro cya kabiri cy’ubudehe, batoranijwe muri ako Karere.

Abahawe ubwo bwisungane mu kwivuza bashimiye abo baganga ku nkunga babateye, bavuga ko iyo batabagira batari buzabashe kubwigondera kubera ubukene.

Nyirabwimana Aurelie ufite abana 6 yagize ati’’ Maze imyaka 5 ndwaje umusaza narabuze aho nerekeza, iyo ntagira aba bagira neza sinari kuzayibona pe.”

Yabaragiye Andre ufite abana 10 yungamo na we ati “Ntunzwe no guhingira rubanda nabona icyo kurya bikaba bihagije. Nta na hato nari nizeye kuzakura mituweri pe.”

Dr Nshizirungu Placide uyobora ibitaro bya Gihundwe avuga ko iyo nkunga yaturutse ku gutekereza ko kuba umuganga gusa bidahagije ngo ube umuntu ukenewe na sosiyete Nyarwanda.

Ati “Tuzakomeza gukora ibi bikorwa kuko twumva ko ubuzima bw’abantu tuvura butureba ibihe byose”.

Nyuma yo gushyikirizwa inyemezabwishyu zibaha uruhushya rwo kwivuza uyu mwaka wose, ibyishimo byatashye muri iyo miryango bakaba bizeye ubuvuzi bw’umwaka wose.

Umuyobozi w’ibitaro bya Gihundwe Dr Nshizirungu Placide, ashyikiriza abatishoboye ubwisungane mu kwivuza

Imirenge ya Kamembe na Gihundwe abo baturage batuyemo nayo yashimiye ibyo bitaro, ivuga ko ibyo bigiye gufasha abaturage bari barabuze amikoro ndetse ngo birazamura ikigereranyo bagezeho batanga mituweri.

Bwana Ndabananiye Jean Bosco ati “ Aba bafatanyabikorwa baragenda badufasha kuzamura ijanisha ry’abafite ubwisungane mu kwivuza, turabashimiye cyane”.

Kugeza ubu, imibare itangwa n’abashinzwe mituweri mu Karere ka Rusizi igaragaza ko abamaze kwishyura ubwisungane mu kwivuza bageze ku kigereranyo cya 70,1%.

Ubuyobozi bw’ako karere buvuga ko gakomeje ingamba zose zizatuma kesa uwo muhigo 100%.

Ibi nibyo byumba bitatu by’uburezi bw’incuke byatashwe

Basobanura ko kutagira amashuri y’uburezi bw’incuke byatumaga hari abana bakuriramo kuba inzererezi, bagatandukana n’imiryango yabo bakajya bakigira mu mijyi.

Bashyirahamwe Samuel umwe muri abo babyeyi agira Ati “Imbogamizi zari zihari ni uko aba bana bavagamo abatatana, imirimo yo murugo bakayita ntumenye iyo bagiye ukajya kumva ukumva bageze ibunyanaka kubashaka ngo ubagarure bikagorana hari n’abababuze iri shuri rizaca ubuzererezi ku buryo ntamwana uzajya aducika.”

Umurerwa Alice we avuga ko iryo shuri bazajya barikuriramo, bakanahabwa uburere buboneye ku buryo bazajya gutangira amashuri abanza nta kibazo cy’uburere bafite.

Ati “Ya myaka yo gutangira ishuri yageraga (umwana) yaramaze kuba ikirara adashaka kuva ko ishuri ari ingirakamaro, kubera ko yagiye hariya atora umuneke, atora intoryi bazanye mu isoko, bigatuma akuriramo kwanga ishuri kubera ko atafashe uburere bw’ishuri akiri umwana.”

Pasiteri Rukema Ezechel, umukozi w’umuryango Help Child Rwanda ushinzwe gahunda y’ubukungu mu rubyiruko, yakanguriye ababyeyi kubyaza aya mahirwe babonye umusaruro bajyana abana kuri iri shuri bubakiwe kugira ngo batazavuswa uburenganzira bwabo bakaba baba inzererezi.

Ati “Icyo duteze ku babyeyi ni ukugira ngo abo bana n’ubundi batazavuswa uburenganzira bwabo bwo kwiga babitewe nuko ababyeyi babo batabashije kubajyana kuri iri shuri ryabonetse.”

Abayobozi batandukanye bataha ku mugaragaro ibyumba by’amashuri

Ibi byumba bitatu by’amashuri y’uburezi bw’incuke bijyana n’ubwiherero butandatu, ububiko bw’ibikoresho by’ishuri n’ibiro by’abarimu byuzeye bitwaye asaga miliyoni 23Frw. Byubatswe n’umuryango nyafurika w’ivugabutumwa (AEE) ku nkunga y’umuryango w’abaholandi (World Servants).

Uyu ni umuceri w’abahinzi ugiye guhombera mu bubiko

Abo bahinzi bibumbiye muri koperative Duhuzimbaraga, bavuga ko uwo mushoramari yari yarabijeje kugura umusaruro wabo wose akanawutunganya ariko aho umusaruro wereye baramubura.

Umusaruro bari basanzwe beza ngo wagurwaga n’abashoramari baturutse muri Bugarama na Muhanga kandi bakabagurira neza.

Nyuma haje umushoramari muri ako karere ahubaka uruganda anabizeza kubabera umuguzi mukuru. Gusa ibyishimo bari batangiranye ntibyamaze kabiri kuko ku isarura riheruka yananiwe kugura na toni n’imwe none ngo ubu bafite toni zisaga 400 zaheze mu bubiko.

Segatarama Emmanuel umwe muri abo bahinzi avuga ko bamwe babuze uko bishyura inguzanyo bari barafashe mu ma banki mu gihe abandi babuze ayo bishyura abahinzi babahingira mu mirima.

Agira ati “Hari abakerewe guhinga kubera ko babuze icyo bahemba ababakorera, hari abafite abana ku mashuri babuze uko bajyayo kubera amafaranga yabuze, hari n’uwari kwishyura banki ubu banki iri kubara amafaranga yayo ntihagarara.”

Iyo nzu yuzuye umuceri w’abahinzi wabuze abaguzi

Nsengimana Jonatha, uhagarariye urwo rugandarwari rwijeje abahinzi kubagurira, avuga ko impamvu bataguriye aba bahinzi ari uko ngo abahinzi bifuje amafaranga menshi ku giciro cy’umuceri.

Ati “Twari twaragize imbogamizi y’uko batuzamuye ku biciro binyuranyije n’ibya Minisiteri y’Ubucuruzi n’Inganda n’iy’Ubuhinzi. Sinavuga ngo tuzarangiza kwugura igihe iki niki ariko bizihuta ukurikije igiciro baduhaye mbere.”

Ikibazo cyaba bahinzi bagituye Minisitiri w’ubucuruzi n’inganda Munyeshyaka Vincent nawe abizeza ko agiye kubashakira undi mushoramari uzagura uwo musaruro bidatinze.

Ati “Tugiye kureba abandi bagura umuceri bagurire abaturage. Tugiye kubikoraho mu minsi mike ku buryo twaba tubaboneye ubagurira uriya muceri ungana na toni zisaga 400 basigaranye.”

Bishimiye ko bagiye gushakirwa igisubizo ku musaruro wabo

Muri Miliyoni 100Frw zirenga umushoramari Macumi Edison nyir’uruganda, yagombaga kubaha ku musarruo wabo, yari yabahaye miliyoni 17Frw.

Koperative y’abo bahinzi ifite abanyamuryango 2006 beza toni ziri hagati ya 500 na 475 ku gihembwe kimwe, bakazihinga kuri hegitari 156 zigize icyo gishanga cya Kirimbi.

Minisitiri w’inganda n’ubucuruzi Munyeshyaka na Minisitir w’ubuhinzi n’ubworozi Geraldine Mukeshimana bizeje abahinzi kubashakira undi mushoramari

Abaturage bavuga ko umushoramari yabazaniye uruganda rubabera ikibazo aho kuba igisubizo

Abaturage n’abayobozi basobanurirwa amahame ya demokarasi

Babishingira ku kuba hari ibitekerezo n’ibibazo batanga ntibihabwe agaciro n’izinzego, bakabifata nko gupfukirana ibitekerezo byabo ntibigire aho bigera.

Aba baturage bakomeza gusobanura ko u Rwanda rufite inzira nziza ya demokarasi ariko bakanenga uburyo inzego z’ibanze ziyishyira mu bikorwa, kuko hari aho babangamira abaturage ntibatume bagaragaza ibitekerezo byabo.

Urugero ni uyu muturage watinye kwivuga amazina hato ngo ataza guhutazwa n’ubuyobozi kubera ko yabatanzeho amakuru, agira ati “Hari igihe ujya kuvuga nk’ikibazo imbere y’ubuyobozi bakakubaza ikibazo ugiye kuvuga bakumva kitabajyamo bakagusubizayo. Ntabwo iyo ari demokarasi.”

Sirikare Jean Damascene ni umwe mu baturage bo muri aka karere, nawe avuga ko abaturage badashobora kubona ko bafite demokarasi, mu gihe hakiri abayobozi bo mu nzego z’ibanze bakibatsikamira ntibagaragaze ibibazo babatura.

Ati “Niyo mpamvu iyo hagize umuyobozibi wo ku rwego rw’igihugu uza usanga abaturage batonze umurongo ku karere.”

Senateri Mushinzimana Apolinaire asaba abayobozi gufasha abaturage kubahiriza amahame ya demokarasi

Senateri Mushinzimana Apolinaire avuga ko muri demokarasi umuturage akwiye kugira ijambo. Yibukije abayobozi b’inzego z’ibanze ko ari inshingano mu guha abaturage serivisi nziza .

Ati “Demokarasi isaba ko umuturage ari we ugira ijambo.”

Si ubwa mbere abaturage basaba ko bahabwa ijambo na serivisi nziza ndetse akenshi bikagarukwaho n’inzego nkuru z’ubuyobozi, ariko abaturage bakinubira ko n’iyo hari umuyobozi batunze agatoki usanga nta myanzuro afatirwa ku buryo byabera n’abandi urugero.

Amazu babamo yazahajwe no gusaza bangirwa kuyasana

Ibyo kandi ngo birabahangayikisha cyane kuko inzu batuyemo babujijwe kuzisana cyangwa se ngo babe bakubaka bundi bushya, ibyo rero ngo bikaba bishobora kubagiraho ingaruka mbi.

Inzu abo baturage batuyemo bigaragara ko zishaje cyane, ndetse bamwe ntibatinya kuvuga ko zishobora kubagwaho bitewe n’uko zishaje, aho zimwe zashegeshwe n’imitingito ikomeye yagiye yibasira ako karere mu bihe bitandukanye.

Ikibazo gikomeye kandi kibabaza abo baturage si uko bananiwe gusana cyangwa kubaka inzu zigezweho nk’abandi, ahubwo ngo bazitiwe n’ubuyobozi bwababujije kugira icyo bakora kuri ubwo butaka bababwira ko bagiye kubaha ingurane ariko umwaka urahita undi ugahita ntacyo bababwira.

Ntibabuze ubushobozi bow gusana ngo bimwe uburenganzira

Ngiruwonsaga Esai ati” Hano harimo abantu bafite ubushobozi bwo kuba bakwiyubakira amazu ajyanye n’igihe, niba badashaka kuduha ingurane ngo twimuke nibaduhe ibyangombwa twubake tuve mu manegeka.”

Abo baturage bavuga ko gushyira ubutaka bwabo mu gice cyagenewe kwagurirwamo imbago z’ikibuga cy’indege, ari cyo cyatumye babuzwa kugira ibyo bakorera kuri ubwo butaka kandi bukiri ubwabo.

Ngo hakozwe n’igenagaciro ku mitungo yabo inshuro nyinshi kugira ngo bimurwe, ariko ibyo bigahera mu mpapuro gusa, ngo iriheruka ryabaye muri 2003.

Havugimana Eric ati” Baje kutubarira muri 2003, batujyana ku kibuga dusinyira amafaranga, ariko biza kurangira amasezerano y’ubugure arangiye. Twandikiye Minisitiri w’ibikorwaremezo i Kigali kugeza magingo aya twicaye nta gisubizo tugira.”

Nyirabizimana Mariya yungamo ati” Kuduha amafaranga byaranze kuduha uburenganzira ku masambu yacu nabyo biranga twarashobewe.”

Aba baturage bababazwa no kwimwa uburenganzira ku butaka bafitiye ibyangombwa

Uwanyirigira Jeannette na we uri mu bafite ikibazo agira ati” Hari umuntu uza akabona hari ibibanza byiza byo kugura nyuma akamenya ko turi mu mbago z’ikibuga ashobora gutanga amafaranga ye bikazarangira ahombye akigendera.

Iwacu mu minota 10 uba ugeze kuri kaburimbo ariko nta moto yahagera nta modoka, mbese ni ibibazo turi mu bwigunge.”

Nubwo umuyobozi w’Akarere ka Rusizi Kayumba Ephrem adatanga igihe nyacyo icyo kibazo kizakemukira yizeza abo baturage ko kigiye kuvugutirwa umuti.

Ati” Imbago z’ikibuga cy’indege twavuganaga n’ikigo kibishinzwe batubwira ko bagiye kuzisubiramo kuko mbere bari bafashe ahantu hanini. Nibamara kugaragaza aho bakeneye ibyangombwa by’ubutaka bw’abaturage tuzabihindura kugira ngo bamenye ko aha hantu bafite uburenganzira bwo kuhakoresha.

Aho bazahitamo kwagurira ikibuka cy’ indexed twumvikanye ko abahatuye bagomba guhita babishyura imitungo yabo ku girango bamenye ikindi bakora.”

Mu gihe ubuyobozi bukiri muri izo gahunda; abaturage basaba ko nibura bwabareka buri wese agasana uko ubushobozi bwe bungana abafite ubushobozi nabo bagahabwa uburenganzira bwo kubaka.

Ubu busabe ngo bishoboka babuhabwa bidatinze, ngo kuko bitabaye ibyo amazu barimo ubu ashobora kuzabagwira, mu gihe haramuka habaye undi mutingito, ngo dore ko aka gace gakunze kwibasirwa n’imitingito.

Igishanga cya Bugarama

Icyo gishanga bagihingagamo umuceri ariko guhera mu 2011 hagenda hakorwa isaranganya ry’iyo mirima.

Gusa hari abatarabyishimiye bitewe n’uko byakozwe ngo kuko hari abambuwe iyo bari bafite, mu gihe abandi bagiye bahabwa bahabwaga ibipande byinshi.

Abo baturage babisobanura bavuga ko ubuyobozi bwagiye bufata abaturage bari bafite iyo mirima igabanyije muri buroke (Block), bukayambura abafite boroke nyinyi bukaziha abatari bafite n’imwe.

Ikibazo cyabaye ni uko ngo bakemuye ikibazo kimwe ariko bagateza ikindi, kuko uwari ufite boroke nyinshi yazambuwe zose zigahabwa undi.

Uzayisenga Enatha umwe mu bari bafite umurima ariko akaza kuwamburwa wose ugahabwa undi, yitangaho urugero rw’akarengane kakozwe mu isaranganya.

Agira ati ”Iyo mbonye (uwo bahaye umurima wanjye) ahinga buroke ebyiri mu murima wanjye birambabaza, ku buryo njya gusaba umuceri kandi ndeba umuntu uhahinga.”

Abatari bake bari bafite imirima mu kibaya cya Bugarama baravuga ko bayambuwe igahabwa abishoboye

Boroke imwe imwe itanga umusaruro w’umuceri uvamo 75Frw ku gihembwe, amafaranga abaturage bemeza ko ku muntu ufite boroke ebyiri bimworohera kwihuta mu iterambere.

Aba baturage kandi ngo bafite amakuru ko hari abayobozi bagiye bigabanya iyo mirima, kuko hari aho usanga umuturage umwe afite boroke nyinshi ukibaza uko yazibonye mu gihe hari abadafite n’imwe.

Ngizwenayo Fidel ati ”Hari umunku bakubwira bati iyi mirima ni iy’umupolisi cyangwa umuyobozi runaka wibera mu Ruhengeri cyangwa wibera i Kigali ariko ikajya ihingwa. Niba babahingishiriza simbizi. Baba bayifite ariko ntibagaragare.”

Guverineri Munyantwari avuga ko bagiye gufatanya n’akarere gukemura iki kibazo

Guverineri w’Intara y’Uburengerazuba Munyantwali Alphonse avuga ko intara igiye gufatanya n’akarere kugira ngo barenganure aba baturage.

Ati “Turaza kubifatanya n’ubuyobozi bw’akarere ariko bikwiye ko umuntu wari ufitemo ubutaka ari bwo bumutunze mu gusaranganya, ntabwo akwiye kuba ari we wasigara.”

N’ubwo nta mibare ihamye y’abafite iki kibazo,Kugeza ubu ba nyir’ubwite ari bo baturage bemeza ko barenga ibihumbi 10 bakaba batuye mu mirenge igera kuri 4 yose ikora imwe mu yigize kibaya cya Bugarama.

Abakozi bane banditse basezera ku kazi kubera gukekwaho kurya ruswa no kwangisha abaturage ubuyobozi

Abo bayobozi begujwe barimo umuyobozi w’akagali, uw’umudugudu, uw’umutekano ndetse n’ushinzwe imiturire mu murenge wa Gihundwe mu karere ka Rusizi.

Iyi ikaba iri muri gahunda z’uyu muyobozi zo kurwana urugamba rwo guhashya ruswa muri aka Karere, aho avuga ko n’atayihashya burundu azegura agaharira ababishoboye.

Muri uyu Murenge wa Gihundwe, ngo hagaragaye ibimenyetso byerekana amakosa agaragara mu myubakire, aho hari abatanga ruswa ya 50,000Frw bakubaka nta byangombwa bafite cyangwa se bakubaka mu Kajagari.

Ababikora batatanze iyo ruswa ngo ujya kubona ukabona barasenyewe, abayitanze bo ntibasenyerwe kandi bose bari mu makosa bikaba ikimenyetso gifatika cy’iyo ruswa itangwa mu nzego z’ibanze.

Aha niho umuyobozi w’Akarere Kayumba Ephrem, yahereye ahagurutsa bamwe mubavugwaho ayo makosa mu nama yabahuje ku gicamunsi cyo kuri uyu wa 11 Nzeli 2018, abasaba kwegura kuko ngo bigaragara ko bariye ruswa.

Meya Kayumba abwira abakozi ko atazihanganira abarenganya abaturage

Meya Kayumba Ephrem abeguza yagize ati” Mugende mwandike mwegure mwese uko muri bane, kuko ntabwo nshobora kurebera umuntu wica abaturage.”

Abaturage banyuzwe n’iki cyemezo cyafashwe n’umuyobozi w’Akarere, ngo kuko bari bamaze iminsi bararembejwe na ruswa, bakwa n’abayobozi b’inzego zibanze cyane abakora mu tugari n’imidugudu.

Uwase Francine yagize ati” Nkumuyobozi w’umudugudu wubaka akagusenyera kandi hari bagenzi bawe bubatse bakuzuza inzu zabo ntawubakomye, ubwo hari ikindi aba agushakaho kitari ruswa?”

Bamwe mu bayobozi beguye mu ruhame na bo bahamya ko bagize intege nkeya mu mirimo bashinzwe nubwo batemera ko bariye ruswa.

Kwizera Jean Claude wayoboraga akagari ka Gatsibo ati” Niba narimaze kwerekwa ko hari aho nagize intege nkeya nk’umuyobozi ntampamvu nari gukomeza kugundira kandi hari abandi baza bagakora ibinsumbije.”

Bane basezeye akazi imbere ya bagenzi babo kubera imikorere mibi

Habiyaremye Theodore wayoboraga umudugudu wa Karushaririza yungamo ati” Njyewe nemeye kwandika nsezera kubera ko hari aho twarangaye, ndavuga ngo ibyiza nuko twaharira bagenzi bacu na bo bakagira akabo bashyiraho.”

Gusa ariko nubwo amakosa y’imyubakire agenda aboneka mu mujyi wa Rusizi ngo hari aho biterwa nuko igishushanyo mbonera cy’umujyi kitaragera hose.
Aha ngo ni ho hava urwaho rwo kumvikana hagati y’abayobozi n’abaturage bakubaka mu buryo bunyuranyije n’amategeko aha bagasaba ko igishushanyo cyagera hose.

Abakongomani baza guhaha byinshi kandi bakabitwara ku mugongo

Bavuga ko imyaka irimo nk’ibishyimbo, imyumbati, ifu, ibitoki n’imboga ndetse n’inyama ari byo bihenze kurusha ibindi, nyamara ari byo byakabaye bihendutse kuko baba barabihunitse.

Uwamariya Odette umwe mu baturage batuye i Rusizi, avuga ko ikiro cya buri kintu muri iyo myaka kigeze kuri 500Frw. Yemeza ko uko guhenda gushobora kuba guterwa n’abaguzi baturuka i Bukavu muri Congo.

Agira ati “Usanga Abakongomani ari bo tubona batuma ibintu bisa n’aho bigira igiciro kinini, kubera ko baza ari benshi. Abarangurira hano mu isoko ni benshi, baza kurangura ibijumba n’imboga n’isombe.”

Hari n’abakeka ko icyo kibazo gituruka ku mibanire iri hagati y’u Rwanda n’u Burundi bigatuma ibiciro birushaho kuzamuka, kuko nta bicuruzwa bikemererwa guturuka mu Burundi ngo byambukire mu Rwanda bikomeze i Bukavu.

Uwitwa Nyiragaju Christine ati “Abakongomani bajyaga guhahira i Burundi none ibiryo by’i Burundi byagumye iwabo ntibikijya i Bukavu. Basigaye baza guhahira hano gusa.”

Abacuruzi b’i Rusizi bavuga ko Abakongomani babagurira byinshi kandi ku giciro cyiza

Abacuruzi bo muri Rusizi bo barabyinira ku rukoma, kuko babyungukiramo bitewe n’ibiciro biri hejuru bagurirwaho n’abaturutse muri Congo, nk’uko byemezwa n’umucuruzi witwa Nyabyenda Diogene.

Ati “Ni bo badufasha ahanini, none se twabizana tukanabyigurira? Bariya baturuka i Bukavu ni abakiriya ni nabo tuba dukeneye.”

Mugenzi we witwa Mutesi Ella yungamo ati “Ni bo baduhahira, iyo bataduhahiye ibintu byose birahomba. Abanyarwanda nta mafaranga bakigira. Umunyarwanda ahaha ibiro bitatu ariko Umukongomani aza ashaka ibiro 100.”

Ibyifuzo by’abaturage batuye muri Rusizi, by’uko hagenwa ibiciro rusange bidahendesha abaturage, ubuyobozi bw’Akarere ka Rusizi ntibubyemera.

Ubuyobozi bw’ako karere Kayumba Ephrem avuga ibiciro ku biribwa biterwa n’isoko rihari. Ati “Iyo abagura babaye benshi icyo gihe igiciro kirazamuka. Iyo kizamutse hasigara ubushobozi bwo kuvuga ngo ‘ese ba bantu bose bagura byabagezeho?’, kuko uko bajya ku isoko bose ntabwo banganya ubushobozi.”

Ariko yongeraho ko kugira ngo icyo kibazo gikemuke, ubuyobozi buzakora ibishoboka byose ibicuruzwa bijyanwa ku isoko bikiyongera.

abaturage barasaba ubuyobozi kubagoboka bakababonera aho kuba

Iyo mvura yaguye ku mugoroba wo kuri uyu wa Gatatu tariki 5 Nzeri 2018, yatumye bamwe bajya gucumbikisha ku nshuti abandi barara mu matongo.

Nyirabukeye Marigarita umwe muri abo basenyewe, avuga ko abatuye muri uwo murenge benshi usanga batishoboye.

Agira ati “Ivura yarakubye umuyaga uraza uratigisa uzamura ibiti n’amabati byose urajyana ujya kujugunya iriya mu misozi. Amabati twayabuze, ubu ndi hanze, nta kundi uku nyine mpagaze niko ndi, nta n’uburyo mfite bwo guhita nubaka.”

Abaturage bahangayikishijwe no kubura aho barambika umusaya kubera ibiza byabasenyeye

Ukwitegetse Marie we avuga ko inzu bayigumyemo n’ubwo yasakambutse, ati “Iri joro sinaharaye ariko ubu ndi buharere kubera ko n’ubundi kujya ngenda mbugana abana ni ikibazo.”

Aba baturage basaba leta ubufasha bushoboka bwose, cyane cyane bagafashwa kubakirwa izindi nzu.

Nsabimana Theogene, umunyamabanga nshingwabikorwa w’Umurenge wa Muganza, avuga ko bari batangiye gushakira abaturage ubufasha bw’ibanze nk’amabati ariko ntabizeza igihe bizabagereraho.

Ati “Tugiye kubakorera ubuvugizi ikizaboneka tuzakibagezaho. Ntabyo kuvuga ngo ni ejo cyangwa ejo bundi.”

Ayo mazu yasenywe n’ibiza n’ubundi bigaragara ko yari asanzwe adafatika.

Iyo nzu ni imwe mu zasakambuwe n’inkubi y’umuyaga

Guhagarara k’ubwo bwato byasubije inyuma abatuye ku kirwa cya Nkombo

Mbere ubwato bugikora bishyuraga ibihumbi 3.000Frw kuva ku Nkombo kugera ku Gisenyi ubu bishyura arenga ibihumbi 8.000Frw.

Ubwo bwato bwatanzwe na Perezida Paul Kagame hagamijwe kubafasha koroshya imigenderanire no guhahirana n’ibindi bice by’igihugu.

Ubuyobozi bukuru bw’igihugu bwashoye arenga miliyoni 180Frw kugira ngo hagurwe ubwato buzafasha abaturage bo ku Nkombo mu kwiteza imbere, kuko icyo kirwa ni cyo cyabarurwagaho abakene cyane kurusha abandi.

Mu 2012, ni bwo ubwo bwato bwatangiye gukora ingendo za Rusizi-Karongi-Rutsiro-Rubavu ariko bukavugwamo imikorere idahwitse yabutezaga igihombo. Kugeza ubu hashize amezi agera kuri arindwi bwarahagaze butagikora.

Umuyobozi w’Akarere ka Rusizi, Kayumba Ephrem avuga ko umuhanda mushya uzwi nka Kivu Belt, unyura Rusizi-Karongi-Rutsiro-Rubavu na wo wagize ingaruka mu tuguma ubwo bwato buhomba.

Ati ”Aho umuhanda wa Kivu Belt wuzuriye, wagabanije ibiciro by’amatike bituma ubwo bwato bubura akakiriya. Ariko ubu ingamba zihari, turashaka kubwegurira abikorera kugira ngo bubyazwe inyungu.”

Ikindi ababugendagamo binubiraga ni uko butihutaga, kuko kuva i Rusizi werekeza i Rubavu bwatwaraga amasaha arenga icyenda, bigatuma abafite gahunda zihuta babyinubira.

Ikindi ngo ni uko bwakoreshaga amavuta menshi ku rugendo rumwe, aho bwakoreshaga ibihumbi birenga 450Frw.

Muri Nyakanga 2018, abakozi ba Minisiteri y’Ibikorwaremezo (MININFRA) basuye icyo kirwa bizeza ko bagiye kubashakira ubwa kabiri buzajya bufatanya n’ubwo bwa mbere ariko nta kigeze gikorwa.

Uwihanganye Jean de Dieu umunyamabanga wa Leta ushinzwe gutwara abantu n’ibintu muri iyo Minisiteri, yavuze ko babonye umutekinisiye ukomeye ukora ubwato, uzaba aje kubaka ubwato bwa kabiri.

Uwo akazaba ari nawe uzabakorera inyigo y’icyo bakorera ubwo bwato butagishoboye isoko ry’ubwikorezi.

Ati “mu mpera z’ukwezi kwa munani tuzaba twabonye igisubizo cy’ubwato bwa Nkombo.”

Gusa, ukwezi kwa Munani kwavugwaga kwarangiye nta gisubizo kiraboneka kuri icyo kibazo.

Urubyiruko rutoye bwa mbere rurishimira ko rwagize uruhare rwo kwitorera abadepite

Abiganjemo abanyeshuri babitangaje mu gitondo cyo kuri uyu wa Mbere tariki 3 Nzeri 2018, ubwo bitabiraga amatora bwa mbere kuko ari bwo bari bacyuzuza imyaka ibemerera gutora.

Furaha Azera umwe muri bo, yavuze ko n’ubwo manda iheruka abatowe bayoboye neza, ariko nabo bumvaga bafite ubushake bwo kugira uruhare mu itorwa ry’abadepite b’iyi manda.

Yagize ati “Numvaga mfite amatsiko ngo menye ukuntu bigenda. byahoraga bimbabaza cyane bitewe n’uko numvaga gutora Perezida n’izindi nzego habamo uruhare rwanjye byanshimishije ko kubagiye kujyaho nagize uruhare muri icyo gikorwa.”

Uwineza Jospine we yungamo ati “Hari nk’igihe batoraga ndi murugo nkumva nshaka kujyayo basi ngo nirebere. Nabaga numva imyaka yaratinze kugera ngo najye ntore.”

Furaha Azera wari wararambiwe no kugeza imyaka yo gutora arashyize abigeraho

Icyifuzo cy’uru rubyiruko nuko abadepite bazatorwa bazabafasha kuborohereza, kugira ngo bazige kaminuza kuko ibyiciro by’ubudehe bamwe bashyizwemo bibabangamira bigatuma batabona ubushobozi bwo kwirihira kaminuza, nk’uko Uwizera Liliane abivuga.

Ati “Numva badufasha bakatworohereza ku bijyanye n’imyigire ya Kaminuza. Hari igihe abana barangiza nka segonderi ariko bitewe n’ibyiciro by’ubudehe babashyizemo umwana ntabashe kujya kwiga.”

Urubyiruko rusaba ko abadepite bazatorwa bazabafasha kuborohereza kwiga kaminuza

Nyirabizimana Seraphine umuyobozi w’amatora mu Murenge wa Gihundwe, avuga ko batunguwe no kubona hari urubyiruko rwaje rwitwaje irangamuntu ruje gutora rutarageza igihe.

Ati “Byantunguye kubonamo n’abana bafite imyaka 16 akumva ko kuba afite irangamuntu yabaye umuntu mukuru wakwitorera abayobozi babereye u Rwanda, kugira ngo ubibasobanurire basubireyo byabaye urugamba ariko twabasobanuriye barabyumva.”

Komisiyo y’igihugu y’amatora (NEC) igena ko Umunyarwanda wemerewe gutora ari ufite kuva ku myaka 18 kuzamura. Abitabiriye itora batarageza igihe basobanuriwe ko bagomba gutegereza imyaka yabo ikagera.

Abakandida-depite ba FPR basabwe ko nibatorwa bazakorera ubuvugizi abatuye mu Bweyeye bakabona abaganga b’inzobere bahoraho

Abo baturage bavuga ko iyo hagize urwara indwara isaba kubonana n’abaganga b’inzobere, Ikigo nderabuzima kimwohereza ku bitaro bya Gihundwe biherereye ku birometero hafi 100.

Hategekimana Vianney yagize ati “Bisaba ko umuntu abona ibihumbi icumi nibura, kugira ngo ahagurutse ambulansi,iyo abibuze ashobora gupfa”.

Kabagwira Seraphine yungamo ati “Usanga indwara zaraheranye abantu bakabura uko bazivuza kubera kubura uko babonana n’inzobere z’abaganga kandi no kugera aho bari bihenze”.

Kugeza ubu,ibikorwa byo gusana umuhanda ugera muri uwo murenge watangiye gusanwa, ukaba witezweho kuzagabanya ibibazo byugarije abawutuye, cyane cyane ikibazo cy’ubuvuzi.

Icyo kibazo cyavugiwe mu bikorwa byo kwamamaza Abakandida ba FPR-Inkotanyi bifuza kuzahagararira abaturage mu nteko ishinga amategeko byabareye muri uwo murenge kuri uyu wa gatatu.

Uzabakiriho Felix, umuhuzabikorwa muri gahunda yo kwamamaza abakandida ba FPR-Inkotanyi, yabwiye abo baturage ko icyo kibazo ndetse n’ibindi bafite byose bizigwaho muri manda nshya y’Abadepite, bigakemuka.

Ati”Kuba bafite ikigo nderabuzima ni intambwe ya mbere.Uyu muhanda watangiye gusanwa, uzarushaho korohereza baturage kugera ku bitaro, ubwo rero n’ibindi basabye ni ibintu bizaganirwaho”.

Abatuye mu Murenge wa Bweyeye bifuza kuzabona abaganga b’inzobere bahoraho

Bweyeye ni umurenge w’Akarere ka Rusizi, uherereye mu gice cy’icyaro, ndetse abahatuye bemeza ko icyaro cyaho gitandukanye cyane n’ahandi hose.Ni umurenge uzengurutswe na pariki ya Nyungwe.

Kugera muri uwo murenge uvuye ku muhanda wa Kaburimbo hagati mu pariki ya Nyungwe, bisaba nibura ibirometero 98.Gusa ngo umuhanda numara gukorwa bizorohereza abo baturage.

Abakandida ba FPR Inkotanyi bari kwiyamamariza i Rusizi bahawe umukoro wo gukura abaturage mu bwingunge

Ubwigunge abatuye iyi mirenge bavuga ni ukutagira imihanda ibahuza n’indi mirenge ku buryo kuva aho bayuye ku gera ku karere kabo ka Rusizi bakoresha ibihumbi 12Frw bateze moto, kuko nta bindi binyabiziga bitwara abagenzi bihagera kubera kutagira imihanda.

Uretse n’ibyo Ntamazi meza bagira, amashanyarazi no kwivuza ngo bakora urugendo rurerure, kuko kugera ku bitaro bikuru bya Mibirizi na Gihundwe iyo bahohereje umurwayi ngo bagenda hafi umunsi wose.

Ngizwenabagabo Ephrem yagize ati “Kugira ngo tuve hano tugera Kamembe dukoresha amatiki ari hejuru. Tukaba twifuza ko ibikorwa byo byo gukora umuhanda ko byakwihutishwa.”

simbarikure Philemon yungamo ati “Mu byo twabasaba icyambere ni ukwegera abaturage kuko iyo ubegereye ubasha no kumenya ibibazo bafite, igikurikira harimo amazi badukoreye ubuvugizi imihanda nayo bakayitugezaho n’amavuriro ku girango tugere ku buzima buzira umuze.”

Ibyishimo byari byose ku banyamuryango ba FPR

Mushinzimana Ephrem, umuyobozi uhagarariye umuryango wa FPR-Inkotanyi muri iyi mirenge avuga ko ibi bibazo babizi ndetse ngo batangiye kubikoraho, aho babizeza ko uyu mwaka utazarangira umuhanda ubahuza n’ibindi bice by’igihugu utararangira gukorwa ndets n’ibindi bigakurikiraho.

Ati “Hariya hantu hari gahunda ziteganyijwe ndetse zaranatangiye. Uriya muhanda uzamuka ugaca Gikundamvura, ugaca Butare ukagenda ukagera na Bweyeye rwose nta mwaka ushira udakozwe.”

Akomeza agira ati “Harimo haranatekerezwa kubegereza gahunda z’ubuvuzi abaturage bo muri kiriya gice iyo barembye babohereza ku bitaro bya Gihundwe cyangwa Mibirizi.”

Ntibyoroshye ku baturage batuye muri iyi mirenge gukora ingendo zijya mu tundi turere tw’igihugu ndetse yewe ngo hari n’abageza muzabukuru bataragera aho akarere kabo kari.

N’ubwo imvura yari nyinshi ntibyabujije abanyamuryango ba FPR kwitabira kwamamaza abakandida babo

Dusabimana Consolée , Imana imuhe iruhuko ridashira

Dusabinema w’imyaka 53 y’amavuko yari umubyeyi wubatse ufite abana batatu. Yayoboraga ikigo Nderabuzima cya Kibingo mu Murenge wa Gihango mu karere ka Rutsiro.

Uyu mugore wiyamamamazaga mu nzego z’abagore ngo yitabye Imana mu ijoro ryo kuri uyu wa mbere, azize urupfu rutunguranye nk’uko byatangajwe n’umuhugu we Niyigaba Pacifique.

Yagize ati" Nta bundi burwayi budasanzwe yari afite, yari yiriranywe n’abandi mu rugo bigeze nimugoroba ashaka kujya kwiyuhagira, agiye kujyayo yumva ingufu zimubanye nkeya, atangira kumererwa nabi, kugeza aho biba ngombwa ko duhamagara ambulance iraza imutwara ku bitaro bya Murunda."

Yakomeje agira ati" Ageze ku bitaro bya Murunda ahagana mu ma saa mbiri z’ijoro, umuganga wamwakiriye yasanze yamaze gushiramo umwuka."

Uyu mubyeyi ngo yari aherutse kugira ikibazo cy’umutwe ubwo biyamamarizaga i Nyamasheke ku Cyumweru tariki ya 19 Kanama 2018.

Icyo gihe ngo bahise bamujyana kwa Muganga mu bitaro bikuru bya Gihundwe, ariko bamubwira ko nta kibazo kinini afite bamuha n’uburenganzira bwo gukomeza kwiyamamaza.

Biteganijwe ko uyu Dusabinema Consolee wari umukandida depite mu myanya y’abagore mu Burengerazuba ashyingurwa kuri uyu wa kabiri, ahitwa mu Gisiza mu karere ka Rutsiro.

Aba baturage bavuga ko imipaka ibahuza n’ibi bihugu ifunga saa yine z’ijoro (22hoo), mu gihe mu bihugu nk’ibi biri guhatanira kwihuta mu iterambere bakangurirwa gukora amasaha 24/24, ariko iri fungwa ry’uyu mupaka rya kare rikaba ritabibafashamo.

Nyiramwiza Francine agira ati” Iyo amasaha yegereje usanga tuba twiruka kandi tunikoreye ibicuruzwa byacu twasaguye, kugira ngo tudasanga badufungiyeho. Hari n’igihe utinda ufite abakiriya ugasanga ku mupaka bafunze ukajya gushaka icumbi.”

Nyiramwiza avuga ko icyo gihe ngo iyo watse icumbi urara ukubiri n’umuryango, bityo bikagorana kwemeza umugabo ko ikibazo ari umupaka wagufungiyeho, kuko we aba yumva wirariye mu ngeso mbi.

Nowela Esther wo muri Congo agira ati” Buri munsi bituzanira ibibazo imuhira. Iyo twagize ikibazo cyo gutinda bakadufungiraho umupaka, usanga n.ababyeyi badukekera kurara mu ngeso mbi, twahinguka imuhira bikaba induru.”

Usibye kuba iki kibazo giteza ibihombo abacuruzi n’amakimbirane mu miryango, imiryango itegamiye kuri leta yo muri aka karere yo isanga iki kibazo cy’imipaka kinarenga ku bucuruzi kigakora no ku mibanire n’ubusabane hagati y’abaturage bo muri ibi bihugu. Aha igasaba abayobozi b’ibihugu kumvikana no gushyiraho politiki zihuza abaturage.

Mukankubito Emerance, ahagarariye urugaga rw’imiryango itegamiye kuri leta mu karere ka Rusizi agira ati” Icyo dusaba abayobozi icya mbere ni imibanire myiza. Abayobozi nibabanze babane neza bo ubwabo, kuko iyo babanye neza n’abaturage babana neza.”

Senyenzi Francois ashinzwe abinjira n’abasohoka mu karere ka Rusizi yizeza abakoresha imipaka ko bagiye kongera amasaha imipaka igakora amasaha 24/24 bahereye ku mupaka wa Rusizi ya mbere.

Ku yindi mipaka ngo birashoboka ko nayo yazakurikiraho cyakora nta gihe gifatika bizatangirira.

Yagize ati” Icyo nakwizeza abantu ni uko umupaka wa Rusizi ya mbere hariho ibiganiro biri hagati y’ubuyobozi bw’abijira n’abasohoka bw’u Rwanda ndetse na Congo ko uyu mupaka ugomba gukora amasaha 24/24.

Indi mipaka nayo bishoboka ko nayo izakurikiraho ariko ntabwo nabyizeza byo kuko ntabiganiro biratangira.”

Senyenzi Francois ashinzwe abinjira n’abasohoka mu karere ka Rusizi yizeza aba koresha imipaka ko bazongera amasaha

Imibare itangwa n’inzego zishinzwe abinjira n’abasohoka mu Rwanda igaragaza ko abantu babarirwa hagati y’ibihumbi 25 na 26 aribo banyura kuri iyi mipaka ku munsi.

kugeza ubu umupaka wa Rusizi ya mbere niwo ukoresha abantu benshi babarirwa ku bihumbi 10 barenga ku munsi; naho uwa Ruhwa uhuza u Rwanda n’u Burundi basaba ibihumbi 3;

Ni yo mpamvu aba bacuruzi kimwe n’abagenzi bakoresha iyi mipaka umunsi ku wundi, bifuza ko ubuyobozi bwabafasha igakora amasaha 24/24, kugira ngo bakire ibibazo bibateza mu buryo bumwe cyangwa ubundi.

Rusizi abaturage barashinja abayobozi kuba bakibaka ruswa ngo babakemurire ibibazo

Aba baturage bavuga ko hari inzego zimwe na zimwe bamaze kumenyera ko bibwiriza bakayitanga nta n’uyibasabye, ahandi bakaba babizi neza ko mbere yo kwaka serivise bagomba gutegura akantu ko gutanga niba bumva bayikeneye.

Uwase Francine yagize ati” Nk’Abayobozi b’ibidugudu aho bava bakagera, utabahaye ruswa mu gihe ukeneye kubaka nta cyangombwa wabona. Uramutse ugerageje kubaka utabahaye akantu ntimwumvikana kandi ntawakwerurira ko ashaka ruswa bose baba bashaka ko umuntu yibwiriza.”

Sinayitutse Ephrem nawe ati” Ruswa uretse ko bayitanga mu ibanga ariko biragoye kuba wajya gusaba serivisi ntakantu utanze bitewe n’uburemere bw’ikibazo wifuza ko cyakemuka.

nkajye nkora akazi ko kubaka hari igihe umuntu aguha akazi ugakora babahemba waba utibwirize ngo ugire akantu umuha akagukuramo akazana umushya wowe ukavamo.”

Aba baturage basobanura ko iyi ruswa ivugwa ahanini ikunze kugaragara mu nzego z’ibanze guhera mu midugudu kuzamura, gusa ubuyobozi bw’Akarere ka Rusizi ntibwemezanya n’ibyo abaturage bavuga.

Umuyobozi w’akarere ka Rusizi Kayumba Ephrem avuga ko bagiye guhindura serivisi zituma abaturage bababona uko batari

Umuyobozi w’Akarere ka Rusizi Kayumba Ephrem, avuga ko yemeranya nuko hari hamwe na hamwe muri izi nzego serivisi zikigenda buhoro bigatuma abaturage babyinubira, ariko ahakana ko nta ruswa izigaragaramo.

Agira ati” Iyo udahaye umuturage serivisi ku gihe ashobora gutekereza ko uri kumusaba ruswa kandi wenda nta niyo utekereza kumusaba bitewe gusa nuko utarangije inshingano zawe ku gihe.”

Akomeza agira ati” Njyewe ntawe urampamagara ngo ambwire ngo Meya umukozi wawe yansabye ruswa. Rero ibi abaturage bavuga umuntu ntiyabishingiraho ngo ahamye ko koko ruswa ihari.”

Uyu muyobozi avuga ko ubu Akarere kari muri gahunda yo kunoza imitangire ya Serivise cyane cyane muri izo nzego bakekera ruswa, kugira ngo imyumvire y’Abaturage ihinduke.

Mu minsi yashize umuryango urwanya ruswa n’akarengane (Transparency international Rwanda) wakoze ubushakashatsi mu mujyi wa Kigali n’uturere twatoranyijwe twunganira uyu mujyi uko ari dutandatu.

Ubu bushakashatsi bugaragaza ko Akarere ka Rusizi ariko kaza ku mwanya wa mbere mu kwaka ruswa abaturage, kugira ngo babashe kubona serivise.

Zimwe mu nkoko zororwa n’urubyiruko rwa Bugarama zahonotse icyo cyorezo. Hatagize igikorwa ngo zirashira zose mu gihe gito

Mu gihe kingana n’ibyumweru bibiri iyo ndwara yibasira inkoko igaragaye, abanyamuryango ba Koperative yitwa Tworore Bugarama ngo bari bafite inkoko zirenga 2300, ariko ubu basigaranye 200.

Indi Koperative yo mu Murenge wa Muganza uhana imbibi na Bugarama, nabo bavuga ko bamaze gupfusha inkoko 400 mu zirenga 1000 bari boroye.

Nsanzimana Jean Pierre ubarizwa muri koperative Tworore Bugarama agira ati” Twagiye kubona tubona inkoko 60 zapfuye mu gitondo. Duhamagara veterineri ahageze na we akubitwa n’inkuba.”

Umukiza Chantal wo muri koperative y’urubyiruko rwa Muganza avuga ko icyo cyorezo kimaze kubahombya hafi Miliyoni eshatu z’amafaranga y’u Rwanda, zingana n’agaciro k’inkoko zapfuye.

Abo borozi bakaba bavuga ko icyo ari icyorezo kibateye ubwoba, bakaba batabaza inzego zibishinzwe kugira ngo zibafashe, inkoko zabo zitarashira bagasubira mu bukene.

Dr. Fabrice Ndayisenga umukozi w’ikigo cya Leta RAB, gishinzwe ubuhinzi n’ubworozi akaba anakurikiranira hafi iyo mishinga y’urubyiruko yorora izo nkoko mu Ntara y’Uburengerazuba, ntiyemeranya n’abaturage bavuga ko icyo ari icyorezo kibasiye izo nkoko.

Uwo mukozi wa RAB, avuga ko iyo ari indwara isanzwe yibasira inkoko yitwa Gumbolo iterwa no kudakingira inkoko uko bikwiye.

Ati” Iyi ni indwara iterwa no kudakingiza inkoko, ntabwo ari icyorezo nk’uko aba baturage babivuga. Bagize uburangare bwo gukingiza izi nkoko, ni yo mpamvu ziri gupfa umusubizo”

uru ni rumwe mu rubyiruko rworojwe izo nkoko ruhangayikishijwe n’ikibazo cy’indwara yazibasiye

Nubwo inzego zishinzwe ubworozi zishinja abo borozi uburangare mu gukingiza inkoko zabo, bo si ko babibona kuko ngo nta rukingo na rumwe batubahirije, cyane ko bafatanyaga n’abashinzwe ubworozi mu mirenge yabo buri munsi.

Kwizera Gedeon ati” Nubwo bashaka guhakana ko hari icyorezo bakabyita uburangare mu gukingiza ntabwo twemeranya na bo, kuko ntibanatubwira urwo rukingo twasimbutse urwo ari rwo rutuma inkoko zipfa kuri ubu buryo. Twe inkingo zose dufite ku ngengabihe twarazikingije.”

Abo baturage barasaba ko Minisiteri y’Ubuhinzi n’Ubworozi yahagurukira icyo kibazo mu maguru mashya bagatabarwa, inkoko zitarabashiraho bagasubira mu bukene kandi bari baratangiye kwiteza imbere.

Iri soko ngo ni irya kijyambere ariko nta muriro rifite

Aba baturage basobanura ko iyo iyo bwije abajura batangira kugendagenda mu isoko kuko baba bazi ko hatabona.

Bavuga ko bwira bagifite abakiriya benshi, ku buryo bitaborohera gutandukanya umukiriya n’umujura. Aho hakaba ari ho ngo ibicuruzwa byabo byibirwa.

Nyirahasabwa Jeannette avuga ko ubujura butibasira abacuruzi gusa, kuko hari n’abakiriya babigenderamo bakibwa mu gihe bahaha.

Agira ati “Batwubakiye isoko, urabona ko rihenze, barangije batubwira ko bazashyiramo umuriro none ntawurimo.”

Ntakirutimana Gaspard umunyamabanga nshingwabikorwa w’Umurenge wa Mubuga, avuga ko imyaka ibaye 18 iryo soko ryubatswe ariko kuva icyo gihe nta mashanyarazi yigeze arigeramo.

Avuga ko amatara yo ku muhanda yabamurikiraga akaza gupfa, gusa ngo bari muri gahunda yo kongera kuyakora akajya abafasha.

Ati “Umutekinisiye yari hano ku wa kane, yatubwiye ko mu cyumweru gitaha azagaruka kugira ngo umuriro wo ku muhanda wongere uboneke.”

Abo baturage bavuga ko kutagira amatara muri iryo soko ari ukubarangarana k’ubuyobozi, kuko batumva ukuntu amapoto ajyana amashanyarazi ari iruhande rw’isoko ariko bakabura umuriro.

Abacuruzi b’isambaza bavuga ko babangamiwe nuko ibicuruzwa byabo bihumanwa n’umwanda uva mu misarani

Uwo munuko hari ubwo utuma bamwe bafunga imiryango y’aho bakorera kubera isuku nke irangwa muri iyo misarani, nk’uko byemezwa na Ntakirutimana Emmanuel umwe mu bahakorera.

Agira ati “Imisarani iri mu isoko rwagati,iyo bazitinduruye usanga isoko ryangiritse cyane,hari umunuko ukabije cyane ku buryo zatera abantu uburwayi.”

Habiyaremye Jean Paul we yongeraho ko amasazi aturuka kuri iyo misarani ajya no ku biribwa bacuruza, ku buryo bahangayikishwa n’ingaruka byazatera.

Ati “Imisarani iyo yuzuye isazi zirazamuka zikaza hano kuri izi sambaza zikajya no mu ibagiro.”

Iyo niyo misarani yubatse ku muhanda hafi y’isoko

Umunyamabanga nshingwabikorwa w’Umurenge wa Mubuga, avuga ko umwanda uri muri iyo misarani,uterwa n’uko baba batakoze isuku kubera ikibazo cy’amazi amaze iminsi yarabuze. Yizeza ko icyo kibazo kigiye gukemuka ariko kuyihakura ngo byo ntibishoboka ubu.

Ati “Ni ukubakurikirana kugira ngo isuku ihite ihaboneka,ariko aho imisarani iri mu kibanza bw’isoko, abahakorera bashakirwa ahandi bajya hategereye imisarani.”

Bamwe mu bana bavuga ko batereranwa n’ababyeyi

Tariki 16 Kamena 2018,abana bo muri ako karere bizihije umunsi w’umwana w’Umunyafurika.Abana bagaragaje ko bazi neza imvune ababayeyi babo bagira babashakira imibereho,ariko bakabasaba no kubuka kubaha uburere bukwiriye.

Yagize ati “Ntibaduha umwanya ngo tuganire,baba bagomba kutwegera nk’ababyeyi bakatugira inama y’uko tugomba kwitwara. Hari igihe uba ukeneye umubyeyi ushaka kumubaza nk’umukoro,wamubura bigatuma utabimenya.Twabasaba kwisubiraho.”

Undi mwana witwa Niyonsenga Aime yunzemo ati “Hari igihe umwana ashobora kunanira ababyeyi ari bo babigizemo uruhare urugero,gutinda gutaha kw’ababyeyi, umwana yamubaza ikintu,ati ndananiwe agahita yiryamira,ati uzambaze ejo, ejo nabwo bikamera gutyo.”

Nyirakanyana Marie Gorethe ni umubyeyi ufite abana barindwi, yemeza ko ibyo abana bavuga ari byo,ariko aho bigaragara usanga hari ikibazo cy’ubwumvikane buke hagati y’ababyeyi bombi.

Ati “Icyo nshishikariza ababyeyi n’ukugira uruhare runini mu kuganira n’abana niyo yaba n’amasaha abiri baba bamaze kuganira n’umwana icyo akeneye akaba yakimuha.”

Abana bo mu Karere ka Nyamasheke bizihije umunsi mpuzamahanga w’umwana w’Umunyafurika

Umuyobozi w’Akarere ka Nyamasheke wungirije ushinzwe imibereho y’abaturage Mukamana Claudette, yemeza ko abana batereranwa n’ababyeyi babo, bibahungabaniriza ubuzima bw’ejo hazaza.

Ati “Hari aho ukibibona ku babyeyi,bakabyuka bagenda bagataha abana baryamye ibyo biracyahari,biragaragara kandi bibangamira abana. Umwana iyo atabona umubyeyi hari icyo ahungabanaho mu bwonko.”

Abagore bavuga ko bakibangamiwe n’igishoro gito mu iterambere ryabo

Aka karere kimwe n’utundi turere dukora ku mipaka n’ibihugu byegeranye n’u Rwanda, gakunze kugaragaramo ubucuruzi buciriritse kandi bwinjiriza abaturage.

Ariko iryo faranga si ko rigera ku bagore bose batuye muri aka karere kubera umuco nyarwanda wakomeje guheza umugore mu myaka yashize.

Murekakure Felicite, umwe muri aba bagore waganiriye na Kigali Today avuga ko abagore baho bakitinya ariko no kuba nta gishoro babona na byo bikabazahaza.

Agira ati “Harimo kwitinya n’imyumvire ikiri hasi cyane n’ubushobozi bwacu, twebwe bagize imbaraga badutera mu buryo bufatika bw’igishoro babandi bakora bwabucuruzi bakabukora mu buryo bw’umwuga byadufasha kuko turacyafite igishoro gikeya.”

Yolanda Murekatete, umuyobozi w’umuryango Action for Women Foundation, avuga ko bagiye gufasha abagore

Umuyobozi w’akarere ka Nyamasheke Kamali Aime Fabien, avuga ko abagore bo muri Nyamasheke kandi bakigowe n’ibibazo byo kutumvikana mu ngo bitabaha amahwemo ngo babashe gutekereza.

Ati “Hari umugabo wumva ko yakagombye kuba akiri hejuru ariko hari n’umugore wumva ko yazamuka agahita yiruka cyane, niyo mpamvu kwigisha ari uguhozaho ku gira ngo bahindure imyumvire batanyuranyije n’umuco nyarwanda.”

Yolanda Murekatete, umuyobozi w’umuryango Action for Women Foundation, avuga ko bagiye gufasha abagore guhindura imyumvire no kutitinya bityo bakinjira mu bikorwa binini aho guhora mu dushinga duto tudafite aho tubakura naho tubageza mu iterambere.

Ati “Icyo twaje gusanga harimo kwitinya akumva ko biriya abagabo aribo babikora umudamu uramutse umuhaye komande ukamubwira uti ndashaka ruriya rugi urunkorere ibyo ni ibintu bishoboka kandi akabikora neza.”

Uyu mushinga uzibanda mu cyiciro cyambere n’icya kabiri cy’ubudehe hagamijwe kubazamura mu bushobozi, kuko aribo bakigaragara ko bakiri hasi cyane .

ku ikubitiro bakazatangirana n’abagore 150 bo mu Murenge wa Kagano ukorera mu Mujyi wa Kigali mu Karere ka Gasabo no mu Karere ka Nyamasheke.

Col Frank Mutembe avuga ko abitwikiriye ijoro bakarasa abantu byanze bikunze bazafatwa bakabiryozwa

Abo basore ni Ngirimana Claude wanahise yitaba Imana muri iryo joro, Nzeyimana Abdou wari wakomeretse bikomeye na we akaba yamaze kwitaba Imana kuri uyu wa mbere.

Abo basore ngo barasiwe mu muhanda wa kaburimbo rwagati ugana ku mupaka wa Ruhwa. Kugeza ubu abakoze ubwo bugizi bwa nabi ntibaramenyekana ariko inzego z’umutekano zatangiye iperereza ryo kubashakisha.

Col Frank Mutembe, umuyobozi wungirije w’ingabo za Brigade ya 408 ikorera mu turere twa Rusizi na Nyamasheke, yahumurije abaturage ababwira ko umutekano uhari.

Yabizeje kandi ko abo bagizi ba nabi nta kabuza baza gufatwa ku bufatanye bw’inzego z’umutekano n’abaturage, n’ubwo atishimiye urwego rwo gutanga amakuru abaturage bariho.

Yagize ati” Umutekano w’igihugu cyacu umeze neza, kuba umuntu umwe yakwitwikira ijoro akica umuntu birashoboka ariko tuzabafata icyo ndakibijeje.
Turabasaba ubufatanye , ndagira ngo mbizeze ko dufatanije,aba bantu tugomba kubashaka tukababona ikintu cya mbere ni ugutanga amakuru.”

Kankindi Leoncie uyobora Akarere ka Rusizi by’agateganyo avuga ko bakeka ko hari abaturage babyihishe inyuma

Umuyobozi w’Akarere ka Rusizi w’agateganyo Kankindi Leoncie , avuga ko ikibazo cy’abo bagizi ba nabi kiri gushakirwa mu baturage ubwabo, kuko bikekwa ko aribo baba babyihishe inyuma. Aha ngo bakaba bari mu iperereza kugira ngo bafatwe.

Yagize ati” Ibyabanje mbere byari bifitanye isano n’ibihugu duturanye by’ u Burundi na Congo ariko aho bigeze,turabona ko ari abantu bashobora kuba bari hano. Bishoboke ko ari abantu bari hano batunze imbunda, barimo gushakishwa.”

Si ubwa mbere ubugizi bwa nabi nk’ubwo bubaye muri uwo murenge,kuko mu kwezi kwa Kanama 2016 mu Kagari ka Ryankana barashe umugabo ariko Imana ikinga ukuboko.

Mu mudugudu wa Kabuga,n’ubundi muri uwo Murenge mu mwaka wa 2017 harashwe abanyerondo hapfa umugabo umwe n’umwana, harashwe kandi abantu bari bari mu kabari 7 barakomereka umwe yitaba Imana.

Abaturage bavuga ko bagiye gufatanya n’inzego z’umutekano kugira ngo abihishe inyuma y’ubwo bugizi bwa nabi bafatwe

Abaturage bo muri uwo Murenge wa Bugarama bavuga ko ibyo byo kurasa abantu bimaze gukabya muri ako gace, bagasaba ko umutekano wakazwa ndetse n’abakekwaho kubyihisha inyuma bagafatwa bakabiryozwa bityo bikabera abandi urugero.

Mu kiganiro umunyamakuru wa kigali Today yagiranye n’Umunyamabanga Nshingwabikorwa w’umurenge wa Bugarama Ntivuguruzwa Gervais yemeje aya makuru avuga ko bakiri gushakisha ababa bakoze aya mahano.

Yagize ati” Niko bimeze turacyari gukurikirana hari umuntu umwe wahise apfa turacyari gukurikirana ngo tumenye niba ntabandi baba bakomeretse cyangwa bahungabanye n’ababikoze cyane cyane kubatangatanga ngo turebe ko twabafata.”

Abarashwe ni Ngirimana Claude wanahise yitaba Imana naho Nzeyimana Abdou we akaba yakomeretse cyane aho yahise akorerwa ubutabazi bwihuse akoherezwa mu bitaro bya Mibirizi.

Uyu murenge wa Bugarama ni umwe mu mirenge ikunze kwibasirwa cyane n’abahungabanya umutekano w’abaturage ariko akenshi usanga bakunze guturuka mu gihugu cy’abaturanyi cy’u Burundi babifashijwemo na bamwe mu banyarwanda bahatuye nkuko byagaragaye umwaka ushize.

Abatuye muri aka gace basabwe gucika ku rugomo n’ingeso mbi z’ubusambanyi zituma bicana

Abo bagore ni Nyirabukara Francine w’imyaka 28 wateye icyuma mu gatuza Benimana Epiphanie w’imyaka 38 ahita apfa.

Bapfuye umugabo witwa Kanjyambere Innocent, mu ijoro ryo Ku wa 20 rishyira ku wa 21 Gicurasi.

Kajyambere ngo yacaga inyuma Nyirabukara Francine akajya kwa Benimana. Nyirabukara ngo yarabimenye agahora yiyama Benimana ariko ntacike ntabicikeho.

Abaturage batuye muri uwo mudugudu bavuga ko uhoramo amakimbirane aturuka ku busambanyi. Abagore n’abagabo baho bashijanya ubusambanyi.

Mukabahizi Olive, avuga ko batakekaga ko byageza ku bwicanyi. Ariko akemeza ko abo bagore bombi bahoranaga amakimbirane, ku buryo Nyirabukara yahoraga abwira Benimana ko azamwica.

Yagize ati "Nyirabukara ajya kwica mugenzi we muri iri joro yamubwiye ngo nari naragushatse ndakubura none uyu munsi ni njye nawe. Akuramo icyuma aba arakimuteye.“

Umuvugizi w’Urwego rw’Igihugu rw’Ubugenzacyaha (RIB), SS Mbabazi Modeste, yavuze ko Nyirabukara na Kajyambere bafungiye kuri sitasiyo ya Polisi ya Kamembe.

Yavuze ko iperereza rigikomeje ariko bakaba bakurikiranyweho icyaha cy’ubwicanyi.

Minisitiri w’ibikorwa remezo n’uw’Ubucuruzi n’inganda basobanurirwa uko uruganda rukora

Minisitiri Munyeshyaka yemera ko mu Rwanda hamaze iminsi hari ikibazo cya sima ariko akizeza ko kitazamara ibyumweru bibiri kitarakemuka.

Agira ati Yagize ati” Sima ya Cimerwa ntirenza 8700Frw,ituruka hanze nayo ntirenza 9000Frw. Ari umucuruzi utwumva turamusaba kudahenda abaturage n’umuturage utwumva turamubwira ngo niba ahenzwe natubwire.”

Minisitiri Mushyeshyaka yavuze ko MINICOM imaze guhana abacuruzi barenga 25 bose bazira ko bagiye buriza ibiciro mu buryo butemewe.

Hari hashize hafi amezi atatu uruganda rukora Sima rwa Cimerwa rwo mu Karere ka Rusizi rutanga umusaruro utabasha guhaza isoko rwagemuriraga.

Byatewe n’imirimo yo kurusana yatumye ruhagarara igihe gito, ariko na nyuma yo gusubukura imirimo ntirurabasha guhaza isoko rwari rufite.

Abaturage baracyahendwa kuri sima kubera ingaruka zo gusana uruganda rwa Cimerwa

Bamwe mu bacuruzi babyuririyeho batangira guhenda abaturage, ku buryo bamwe mu bari baratangiye ibikorwa byo kubaka byagiye bidindira.

Simbarikure Theogene umwe mu baturage ukenera sima avuga ko hari aho ibiciro bya sima byagiye bigera mu bihumbi 15Frw. Ati “Ubu isima hari aho igura ibihumbi 15Frw, 13Frw kandi bavuga ko yabonetse.”

N’ubwo kuri ubu uruganda rwatangiye gukora,ntirurabasha gutanga umusaruro nk’uwo rwatanganga, kuko ubu rusohora toni 650 ku munsi, ari nayo mpamvu sima ikiri nkeya ku isoko. Gusa bizeza ko mu byumweru bibiri ruzaba rwongeye gutanga toni 1.300 ku munsi.

Uruganda rwa Cimerwa rwiharira 55% bya sima ikoreshwa mu Rwanda mu gihe izo hanze zisigarana 45%.

Kuva mu kwezi kwa gatatu nibwo uruganda rwa cimerwa rwatangiye gusanwa

Ambukiranya imipaka bahamya ko amahoro ari kugenda agerwaho

Ni mu gihe mu minsi yashize kuvuga Ikinyarwanda muri iki gihugu byafatwaga nka Kirazira ndetse bamwe bakaba babizira. Ibi ngo bikaba byarabangamiraga abaturage b’ibihugu byombi mu buryo bw’ubuhahirane kuko hari abagorwaga no kuvuga indimi zo mu kindi gihugu.

Karikumutima Daniel, umwe mu bakora ubucuruzi bwambukiranya imipaka aganira na Kigali Today yagize ati” Hari igihe cyabayeho kuvuga Ikinyarwanda muri Conge byarabaye icyaha, ariko ubu byarahindutse nta pfunwe bikidutera kubera umubano wacu na Congo wifashe neza.”

Cyiruza Baremba nawe ni umucuruzi w’umukongomanikazi yagize ati” Ubu umunyarwanda avuze Ikinyarwanda muri Congo ntakibazo kubera ko abantu babaye bamwe. Ku bwanjye ibi bizamfasha kuko dukorana n’Abanyarwanda kandi tugakorana neza mu bufatanye, ayo niyo mahoro.”

Bamwe mu rubyiruko rwo muri ibi bihugu bashimangira ko amahoro ari kugenda atera intambwe muri ibi bihugu kuko ngo ntawe ushobora kubona mugenzi we agiye guhohoterwa mu gihugu cyabo ngo abirebere.

Dushimimana Valense ati” Muri ibi biganiro hari ubwo haba harimo Abakongomani n’Abarundi uwo muntu ashobora kuba yandengera mu gihe hari ushatse kundenganya ndi muri icyo gihugu nkuko nawe ari mu Rwanda habaye hari ugiye kumuhungabanya najye namurengera.”

Nyembo Pascar w’umunyekongo yungamo ati” kera aba congomani twageraga mu Rwanda ntitwisanzure neza ariko kuri none turahagera tukaganira neza bakatwumva ubu twavuga ngo turi mu muryango umwe ntavangura ry’ururimi cyangwa ubwoko turishyimye cyane.”

Urubyiruko ruvuga ko ntawugiterwa ipfunwe no kuvuga ururimi rwe yinjiye mu gihugu baturanye

Pasiteri King Ngoma, umukozi w’umuryango La Benevolency, avuga ko ibiganiro byo gushakira amahoro akarere k’ibiyaga bigari bimaze gutanga umusaruro ugaragara mu kugarura amahoro mu ri utu duce.

Mu myaka itatu ishize byari ikibazo mu buhahirane hagati ya Congo n’u Rwanda kubera ihohoterwa rimwe na rimwe ryakorerwaga abanyarwanda muri Congo, ariko ubu ngo byamaze gukemuka ubu umubano uratengamaye kandi n’ubuhahirane burushaho kumera neza.

Abaturage bamurikirwa rimwe mu mavomero y’amazi bahawe n’ingabo z’igihugu

Ingabo za batayo ya 99 ikorera mu turere twa Rusizi na Nyamasheke ni zo zafatanyije n’abaturage bo muri uyu murenge mu kubaka uwo muyoboro.

Abaturage bo mu tugari twa Higiro na Mwezi, bavuga ko baruhutse kunywa amazi y’ibiroha banakuraga kure.

Habiyambere Anaclet ati” Twavomaga ahantu habi bikadutwara n’urugendo rurerure none mutugejejeho amazi. Turashimira Leta y’ubumwe n’Ingabo z’Igihugu mukomeje kutubungabungira ubuzima n’umutekano.”

Abaturage bagezwaho amazi bahawe n’ingabo z’u Rwanda

Col Frank Mutembe , umuyobozi wungirije w’ingabo za Brigade ya 408 ikorera mu turere twa Rusizi na Nyamasheke, yabwiye aba baturage ko ingabo z’u Rwanda zizakomeza gutanga umusanzu mu bikorwa biteza imbere abaturage.

Yagize ati” Ubu turi mu bikorwa byo gufatanya n’abaturage kwiteza imbere ntabwo turi za ngabo zicara mu bigo ngo zitegereze ko bazigaburira.”

Col Frank MUTEMBE , umuyobozi wungirije w’ingabo za brigade ya 408 abwira abaturage ko bazakomeza kubaba hafi mu iterambere

Kuba hari ibindi bice bitarageramo amazi, umuyobozi w’Akarere ka Nyamasheke kamali Aimee Fabien, avugako batazagarukira ku muyoboro bubakiwe n’ingabo gusa,.

Yagize ati” Igisigaye ni uko tuzakomerezaho kwagura uyu muyoboro, abo amazi atarageraho abagereho.”

Muri miliyoni 18 z’amafaranga zagiye kuri uyu muyoboro harimo miliyoni 10 zatanzwe n’Ingabo z’u Rwanda, hakaniyongeraho inzu yubakiwe umukecuru w’incike utishoboye wabaga mu nzu ishaje.

Ingabo zimurikira abaturage amazi zabahaye

CIMERWA iri gutunganya ibyuma bizayifasha gutanga umusaruro ushimishije nyuma yo kumara igihe idakora sima

Buguru Davide ni umwe mubamaze Iminsi mu mirimo y’ubwubatsi ariko kubera ikibazo cy’ibura rya sima ibyo yakoraga ngo byabaye ipfabusa.

Yagize ati” Abantu benshi twari dufite gahunda kubaka, isima twarayibuze n’abatangiye ama Fondasiyo imvura yarabyangije. Iyo tubajije abacuruzi nabo batubwira ko nabo bahebye batayiheruka.”

Sinzabakwira Leonard yungamo ati” Tumaze igihe hafi amezi abiri nta sima dufite. Batubwiye ko uruganda rwari rwagize ikibazo nyuma yaho batwizeza ko gikemuka vuba , ariko twarategereje amaso ahera mu kirere.”

Kurundi ruhande abaturage bavuga ko ibura rya Sima ryahungabanyije imibereho yabo kuko ariho bakuraga ikibatunga n’imiryango yabo.

Furaha Eugene ati” Aha tuhacungira akazi, umuntu iyo aguze agasima turakikorera kugira ngo tubone ikidutunga. Natwe ubu ni ugutoragura impande n’impande ingaruka ni iyi nzara dufite muri ikigihe.”

Umuyobozi w’uruganda rwa CIMERWA Bhekizitha w . Mthembu, avuga ko kubura kwa Sima byatewe na bimwe mu byuma by’uruganda byari byangiritse biba ngombwa ko babanza kubisimbuza ibindi.

Akomeza kuvuga ko bagerageje kwihutisha imirimo kuburyo akazi kari gukorwa mu mezi 5 kakozwe iminsi 26 gusa aha akaba yizeza abakiriya babo ko hagati y’ibyumweru bibiri na bitatu sima izaba yongeye kuboneka kubayifuza bose.

Yagize ati” kubera bya byumweru bibiri cyangwa bitatu twamaze turi gusana, hari ama komande menshi dukeneye gukura munzira tukaba twihaye ibyumweru bibiri cyangwa bitatu bizajya kurangira tuzineza ko isima ahantu hose yahageze.”

Umuyobozi w’uruganda rwa CIMERWA Bhekizitha w . Mthembu avuga ko uruganda rwongeye gukora

Gusimbuza ibi byuma by’uruganda rwa CIMERWAbyari byangiritse birangiye bitwaye asaga miliyoni 3 z’amadorali y’amerika. Cyakora ngo bizatuma umusaruro babonaga wiyongeraho 30% .

Nubwo sima yari yabaye nkeya ku isoko uru ruganda rwihanangirije abacuruzi bazamura ibiciro bya sima uko bishakiye aho rusobanura ko uzabifatirwamo azahagarikwa mu bucuruzi bwa sima.

Kongera aya masaha ngo bizabafashakurushaho gucengerwa n’ibyo biga, bityo bakazasoza abmashuri bafite ubumenyi bujyanye n’icyerekezo cy’igihugu cyo kwihangira imirimo badategereje akazi muri Leta.

Aba banyeshuri basobanura ko amasomo yo gushyira mu bikorwa ibyo biga mu makaye (Practices) ahabwa amasaha abiri gusa mu cyumweru, mu gihe ayo biga mu makaye bandika ahabwa amasaha arindwi.

Aha basaba ko amasaha yo gushyira mu ngiro ibyo baba bize yakongerwa igihe kuko abafasha cyane kurushaho gucungerwa n’ ibyo biga, bikazabafasha kwihangira imirimo nyuma yo kurangiza ishuri.

Mugiraneza Jean Claude yagize ati” Twize iby’amashanyarazi, twiga ibyo gukora amasabune n’ubundi bumenyingiro butandukanye, ariko kubera ko tutabona umwanya uhagije wo kubishyira mu ngiro, ndamutse mbonye akazi muri Leta byangora kugakora neza, kandi ntanakabonye kwihangira imirimo ntubyanyorohera."

Kanyabigega Deo, umwe mu babyeyi bize hambere avuga ko mu gihe cyabo bigaga buzuza amakaye bagafata mu mutwe cyane ariko batazi kuba bashyira mu bikorwa ibyo biga.

Ashima imyigire y’ubu kuko umwana ashobora kurangiza amashuri akaba yabasha kwirwanaho yihangira umurimo, ariko agasaba ko abana bahabwa umwanya uhagije wo kubinononsora.

Ati” Twabonye ibintu byo kwihangira imirimo biradushishikaza cyane. Ni ibintu bifite akamaro kuko umwana ntabwo ava ku ishuri ngo abure icyo amara cyangwa ategereze ko hari uzamuha akazi kuko baba baramuremyemo kwihangira umurimo.”

Tuyishime Valense, umuyobozi w’urwunge rw’amashuri rwa Gihundwe, avuga ko bagiye gushyira imbaraga mu bumenyi ngiro

Tuyishime Valense, Umuyobozi w’urwunge rw’amashuri rwa Gihundwe, avuga ko iki kibazo koko bagifite, akemeza ko bagiye gushyira ingufu mu masomo y’ubumenyingiro haba mu kongera igihe cyo gushyira mu bikorwa ibyo abanyeshuri biga mu makaye ndetse no kongera ibikoresho bibafasha mu gushyira mu bikorwa ibyo biga.

Kugeza ubu abanyeshuri biga mu mashami atandukanye muri uru rwunge babasha kuba bakwikorera isabune, gushyira amashanyarazi munzu, gukora umuti wica udusimba twangiza imyaka y’abaturage nka nkongwa n’ibindi.

Hibutswe n’abajugunwe mu kiyaga cya Kivu baburiwe irengero

Babitangaje kuri uyu wa gatatu tariki 25 Mata 2018, ubwo hibukwaga abanyeshuri n’abarimu bishwe muri Jenoside yakorewe Abatutsi 1994.

Abanyeshuri bibutse ni abiga mu ishuri rikuru ry’ubumenyingiro IPRC Karongi, bibutse abigaga mu ishuri rya Nyamushaba ry’ubuhinzi n’ubworozi.

Mukagasana Esther, umwe mu bari baje kwibuka yagize ati “Iyo ushyinguye umuntu uraruhuka, kuko njyewe jyampura n’umuntu namubaza nti ‘uri uwahe mbabona asa n’abantu bacu ngakomeza kumukurikirana’.

Mukagasana avuga ko kutabona abe ngo abashyingure bituma ahora yibwira ko bakiriho

Uhora wumva ko uko warokotse nawe yaba yararokotse, kudashyingura ni ikintu kibi cyane gituma n’abantu badakira.”

Yungamo ati “Hari imiryango myinshi itarashoboye gushyingura ababo hari abo barohaga mu kiyaga cya kivu bakazika ntibongere kugaruka. Icyo twasaba ni uko abazi aho imibiri iri bajya bayiturangira ariko iyo tuzabura burundu tuzabyihanganira kuko ntakundi byagenda.”

Abanyeshuri bubuka abarimu na bagenzi babo bishwe bazira Jenoside yakorewe Abatutsi

Guverineri w’Intara y’uburengerazuba Munyantwari Alphonse, avuga ko bazakomeza gukangurira ababa bazi aho imibiri y’abantu iri kubohoka bakayigaragaza cyane ko mu gihe nabo batayigaragaje ntamahoro bashobora kugira mu mutima.

Ati “Hari imibiri yabishwe muri jenoside yakorewe abatutsi itaraboneka kandi hashobora kuba hari abazi aho iherereye ntibahavuge. Ni yo mpamvu dukomeza kubibutsa ko nabo bafite inshingano zo gutanga ayo makuru.”

Abarokokeye mu kigo cy’ishuri rya Nyamushaba basabye kandi ko hashyirwa ikimenyetso cy’amateka ya Jenoside, haba ku nkengero z’ikiyaga cya kivu bajugunyagamo abantu cyangwa kuri iryo shuri hakandikwa amazina no kuhashyira amafoto y’abahaguye.

Bibutse abazize Jenoside yakorewe Abatutsi

Ingabo z’ifasha abaturage kububakira amazu

Akarere ka Rusizi kari mu kakunze kuza mu majwi yo kuba gafite abaturage batagira iby’ibanze birimo ubwiherero no gutura mu mazu mabi.

Perezida Kagame nawe yari aherutse no kwihanangiriza abayobozi bayobora uturere nk’utu twasigaye inyuma mu isuku.

Icyo kibazo kiri mu byahagurukije ingabo zatangiye ibikorwa by’iterambere mu baturage mu gihe cy’amezi atatu ari imbere. Ubuyobozi bw’aka karere na bwo bukaba bwemeza ko ibi bibazo bigiye gukemuka kuva ingabo zahigereye.

Mu Murenge wa Nzahaha ni ho ibi bikorwa byatangirijwe ku rwego rw’Akarere, aho abasirikare bagera ku 100, bafatanyije n’abaturage kubaka inzu esheshatu z’abaturage babaga mu nzu zimeze nka Nyakatsi.

Abaturage bishimiye gufatanya n’ingabo zabo kurwanya kirabiranya yenda kubamaraho urutoki

Mukarukaka Yolitte, umwe mu baturage bubakiwe inzu, yavuze ko ingabo z’igihugu zahinduye isura abaturage babonagamo umusirikare.

Yagize ati “Kera twabonaga umusirikari ukwagwa ruhabo, none ubu twarabashyingiye. Njyewe maze gushyingira batatu, urahura n’umusirikare akakuganiriza akakubaza uko umeze.”

Mwerekande Richard we yungamo ati “Nari ndi munzu imeze nka Nyakatsi. Iyi nzu izatuma niteza imbere ndyama ngasinzira ngatekereza neza nkagira aho nigeza.”

Brigadier General Hodari Johnson Umuyobozi w’ingabo za brigade ya 408 zikorera mu turere twa Rusizi na Nyamasheke, yavuze ko ibyo bikorwa ari ugukomeza umubano ingabo zifitanye n’abaturage no gufatanya gukomeza kwiteza imbere.

Ati “Inyigisho tubona nk’intwaro ikomeye ni ukubana neza n’abaturage dushinzwe.Tubereyeho kurinda abaturage n’ibyabo.”

Brigadier General Hodari Johnson, avuga ko bazakomeza kunoza imibanire yabo n’abaturage

Umuyobozi w’Akarere ka Rusizi Halerimana Frederic yavuze ko ingabo ziri gukora zihuse, buryo asanga ibibazo bizaba byarangiranye na Gicurasi, noneho akarere kagasigara gahanganye n’ibisaba kwitonda.

Ingabo ziteganya kubaka ubwiherero 1926, ibiraro 387, inzu 437, zinakomeze kurwanywa indwara za kirabiranya na tsindika zibasira insina kuko kugeza ubu zimaze gutunganya hegitari zirindwi.

Ingo mu gikorwa cyo gufasha abaturage kwiteza imbere

Abarokokeye muri uru rusengero bavuga ko iyo barugezemo bikanga interahamwe nk’uko byari bimeze muri Jenoside

Bamwe muri aba baturage basobanura ko uru rusengero bakirusengeramo ariko ngo baba barikurangiza umuhango w’idini kuko iyo bari mu materaniro, aho kugirango bakurikire inyigisho ahubwo ngo bahita babona ukuntu interahamwe zarwinjiyemo zigatemagura abantu bari gusenga Imana ngo ibakize.

Rusanganwa Dieudonne ati” Hari umugabo wavukaga Nyagahinga yarari gutera indirimombo yo mubadive ya 86 baramurashe aragwa. Ruriya rusengero rwaguyemo abantu hagati y’ibihumbi 5000 na 6000, umuntu ajyayo nka rimwe mu mezi atatu cyangwa ane ngenda, kandi ndenda nta mutima wo gusenga mfite.”

Kayinamura Come yungamo ati” Nk’uko twumvise n’ahandi adivantisite bo ku mugonero babikoze natwe turasaba ko ruriya rusengero rwagirwa urwubutso. Amateka y’uru rusengero aramutse atanditswe ngo abana bazayamenye twaba duhombye.”

Depite Kankera Marie Josee, avuga ko bagiye gutekereza ku icyifuzo cy’abarokokeye mucyahoze ari Rwamatamu

Depite Kankera Marie Josee, avuga ko icyifuzo cy’abarokokeye muri uru rusengero kigiye gutekerezwaho cyane ko biramutse binakozwe atariho hambere byaba bibaye.

Yagize ati” Birumvikana iyo ugeze ahantu wagiriye akaga ntabwo byakunda ko ayo mashusho y’ibyo wahakorewe atabura kugaruka. kuba urusengero rwahindurwamo urwibutso cyangwa hagashyirwa ikimenyetso numva ari ikintu cyakomeza kuganirwaho bakareba buryo ki abantu babikora.”

Kuri iyi ncuro ya 24 hibukwa Jenoside yakorewe Abatutsi, hashyinguwe imibiri 336 harimo 308 yimuwe aho yarishyinguye mu ngo z’abaturage na 28 yagiye iboneka mu mirima y’abaturage. Kugeza ubu urwibutso rwa Rwamatamu rukaba rushyinguwemo imibiri 66.450 yabazize Jenoside yakorewe Abatutsi.

Hanashyinguwe n’imibiri yatoraguwe hirya no hino mu ngo z’abaturage

Abakozi b’uruganda rwa CIMERWA bibuka abishwe muri Jenoside yakorewe Abatutsi barukoragamo

Ubuyobozi bwa CIMERWA bwabitangarije mu muhango wo Kwibuka abari abakozi bayo basaga 80, bishwe muri Jenoside yakorewe Abatutsi mu 1994.

Bugunya John umuyobozi muri uru ruganda ushinzwe Imari avuga ko bazibanda ku bana basoza amashuri ntibabashe guhita babona akazi, mu rwego rwo kubarinda ubushomeri banabafasha kwiteza imbere no kwiyubaka bababera aho ababyeyi babo batari.

Ati” Nk’ikigo twiyemeje ko tuzakora ibishoboka byose kugira ngo dufashe abarokotse Jenoside yakorewe Abatutsi bakomoka ku babyeyi bakoraga muri iki kigo.”

Bugunya John umuyobozi ushinzwe Imari muri Cimerwa avuga ko bagiye kujya baha akazi abana barokotse jenoside badafite imirimo

Bamwe mu babyeyi barokokeye muri uru ruganda nabo bashimira cyane ibikorwa uru ruganda rubafashamo birimo kububakira amazu.

Bapfakurera Jean ati” CIMERWA ndayishima ubwayo ko yakomeje gufata abacitse ku icumu mu mugongo cyane ko hari abana yubakiye.“

Bamwe mu babyeyi barokokeye muri Cimerwa bashima ibikorwa ibafasha mu gukomeza kwiyubaka

Umuyobozi w’Akarere ka Rusizi Harerimana Frederic, yashimiye ubuyobozi b’uru ruganda ku bufatanye bagirana n’Akarere mu kwita ku mibereho cyane cyane y’Abacitse ku icumu rya Jenoside yakorewe Abatutsi.

Usibye gutanga akazi ku bana bakomoka ku babyeyi bakoreye CIMERWA bishwe muri Jenoside yakorewe Abatutsi, uru ruganda rumaze no kubakira amazu ane ajyanye n’igihe abarokotse jenoside batagiraga aho kuba.

Umuyobozi w’akarere ka Rusizi Harerimana Frederic asaba abandi bafatanyabikorwa kugera ikirenge mucya CIMERWA

Umuyobozi w’Akarere ka Rusizi (wambaye ikoti ry’ubururu) asuhuzanya n’umuyobozi wa komini Mabayi

Uyu mupolisi wasubijwe iwabo, yari yafashwe tariki 13 Mata 2018, agerageza gusubira mu gihugu cyabo mu buryo bwa Rwihishwa.

Uyu mugabo w’imyaka 36 avuga ko yageze mu Rwanda nyuma yo gusinda akarohama mu mugezi wa Ruhwa, ariko mu kwirwanaho agashiduka ahingutse mu Rwanda. Aho ni naho yahise atabwa muri yombi bamusangana n’Icyuma.

Yagize ati “Ku wa gatanu niriwe ntembera ngeze ahitwa imiremera cya nsanga ahari imiryango bampa agacupa ndakanwa.”

Amaze gusinda ni bwo yatashye ngo aza kubona inzira ayiciyemo ashiduka aguye mu mugezi. Ati “Sinzi ukuntu nakubise akaboko mfata ibyatsi mba nshitse ku butaka bw’u Rwanda ngeze ku kiraro cya Ruhwa niho bamfashe nari nasinze Vraiment.”

Umuyobozi w’Akarere ka Rusizi agiye gushyikiriza Abarundi umupolisi wabo

Umuyobozi w’Akarere ka Rusizi Harelimana Frederic, avuga ko nyuma yo gusesengura bagasanga uyu mu polisi ntayindi migambi yo guhungabanya umutekano yari afite, bahisemo kumusubiza mu gihugu cye.

Ati “Twagize amakenga yo kumenya ngo uwo muntu ni nde, kuki afite icyuma turamufata n’inzego z’umutekano. Turanashima ko abaturage bari bamaze gutanga amakuru.”

Umuyobozi wa Komine Mabayi Amstanteri Bapharwuzuye Pascal na mugenzi we uyobora komine Cibitoki ntibigeze bagira icyo batangaza ku mu polisi wabo wayobeye mu Rwanda.

Abapolisi baherekeje Umurundi wafatiwe mu Rwanda

Abafanyabikorwa b’Akarere ka Rusizi basaba ko bajya bagezwaho igenamigambi ry’ibikorwa by’Akarere bitaragezwa ku rwego rw’igihugu

Aba bafatanya bikorwa ngo ntibahabwa umwanya wo gutanga ibitekerezo n’ubugororangingo, mbere y’uko ibiteganywa gukorerwa abaturage muri aka karere bigezwa mu nzego nkuru z’igihugu.

Ibi babivugiye mu nama yabahuje n’ubuyobozi bw’akarere, aho ubuyobozi bwabagaragarizaga gahunda y’igenamigambi y’imyaka itandatu y’iterambere ry’akarere, nka bamwe bagira uruhare rukomeye mu bikorwa biteza akarere imbere.

Aba bafatanyabikorwa basobanura ko kudatwara ibitekerezo byabo mu igenamigambi bidindiza akarere n’abaturage muri rusange kuko baba batazi ibibakorerwa ngo babitangeho ibitekerezo.

Ndayisabye Adalbert, yagize ati” Mfashe urugero muri iki kiganiro cya gahunda y’igenamigambi y’imyaka 6 iri imbere twaje dusa n’abatangiye gutanga ibitekerezo kandi twaragombye kuba twarabitanze mbere bitarajya muri Minisiteri y’Imari n’igenamigambi.”

Karuhije Theoneste yungamo ati” Ubundi bakagombye kujya bakora igenamigambi mbere bakaritwohereza tukaritekerezaho, noneho mu nama tujemo tugahuza byabitekerezo, noneho tugakora igenamigambi ririmo ibitekerezo koko bivuye mu baturage.”

Akomeza agira ati” Iyo bigeze muri Minisiteri y’imari itangira gushyiramo ingengo y’imari. Icyo gihe iyo igitekerezo kije nyuma nibwira ko hari igihe kidashobora kwemerwa ugasanga kiratakaye kandi wenda gifitiye abaturage akamaro. Ingaruka bigira nuko ibigerwaho biba bitavuye mu baturage.”

Umuyobozi w’akarere ka Rusizi avuga ko hakiri umwanya wo gutanga ibitekerezo mu igenamigambi

Umuyobozi w’Akarere ka Rusizi Harelimana Frederic, avuga ko kuba barajyanye igenamigambi ry’agateganyo muri Minisiteri y’imari n’igenamigambi, bitavuze ko bataritangaho ibitekerezo, kuko riba ritaremezwa n’inama njyanama, agasobanura ko hakiri umwanya wo gutanga ibitekerezo.”

Ati” Kuba Inama Njyanama itaremeza iri Genamigambi bivuga ko tuba tugifite ubwinyagamburiro bwo kugira icyo twakongeramo.”

Akomeza agira ati” Impamvu twaryohereje muri Minecofin ni ukugira ngo na yo irebe ibitekerezo byacu, nabo bagire ibindi bishya bashyiramo bitewe n’icyerekezo cy’igihugu cyangwa se umurongo mugari mpuzamahanga cyangwa mu karere turimo.”

Muri iri genamigambi ry’imyaka 6 iri imbere ry’Akarere ka Rusizi ryiganjemo ibikorwa remezo bijyanye no kunoza igishushanyo mbonera cy’Umujyi wa Rusizi nk’umwe mu mijyi 6 izunganira umujyi wa Kigali.

Abayobozi barasabwa kugira ijisho ridahuga kubirebana n’umutekano muri ibi bihe byo kwibuka

Ibi babisabwa cyane muri ibi bihe byo kwibuka Jenoside yakorewe Abatutsi cyane ko ibi bihugu bigicumbikiye abanzi basize bahekuye u Rwanda.

Umuyobozi w’akarere ka Rusizi Harelimana Frederic, yavuze ko muri ibyo bihugu hashobora kuba harimo abanzi baba bashaka uko bahungabanya umutekano w’abaturage n’igihugu muri rusange.

Yagize ati “Mu byukuri umutekano w’igihugu cyacu urarinzwe nk’uburyo tutavuga ngo hari igitero twiteguye ntawabigerageza, ariko icyo tuvuga n’ibabanzi b’igihugu cyacu batishimira ibyo tumaze kugeraho.”

Yabitangarije mu nama y’umutekano yaguye y’aka karere yabaye tariki 09 Mata 2018, aho yavuze ko umuturage agomba kuba ijisho rya mugenzi we n’iry’ubuyobozi.

Umuyobozi w’Akarere ka Rusizi asaba abayobozi gucunga umutekano bitandukanye n’uko byari bisanzwe

Sibomana Aimabre umunyamabanga nshingwabikorwa w’Akagali ka Mpinga, yavuze ko mu myaka yashize abantu bavaga mu Burundi bakaza guhungabanya umutekano w’abaturage. Ariko ngo kuva aho bafatiye ingamba zo kwicungira umutekano ibikorwa bihungabanya byarashize.

Ati “Mu myaka yashize bagendaga baza bava mu bihugu duturanye nk’u Burundi bakaza bagahungabanya umutekano hano hantu mu mudugudu 11 muri 13 yose ikora ku Burundi.”

Ni kenshi abantu batazwi bagiye baturuka mu Burundi bakagerageza guhungabanya umutekano w’abaturage muri Rusizi. Imirenge yakunze kwibasirwa cyane ni ihana imbibi n’iki gihugu, ariko inzego z’umutekano zikaburizamo iyo migambi mibi.

Umuyobozi w’Akarere ka Rusizi asaba abayobozi gutinyura abaturage gutanga amakuru y’ahantu haba kariri imibiri idashyunguye mu cyubahiro

Ibi ngo bigaraza ko hari bamwe mu baturage bo muri aka Karere bagitsimbaraye ku guhisha ahajugunywe iyo mibiri nk’uko bitangazwa na bamwe mu banyamabanga Nshingwabikorwa b’imirenge iyi mibiri yagaragayemo.

Icyo bashingiraho bakeka ko iyi mibiri yaba ari iy’abishwe muri Jenoside yakorewe Abatutsi, ngo ni uburyo basanga iyi mibiri imeze, ndetse n’uburyo ba nyiri ubutaka iyi mibiri isangwamo baba banga ko hari abantu icyo babakorera mu masambu.

Sindayiheba Aphrodis, Umunyamabanga Nshingwabikorwa w’Umurenge wa Bweyeye yagize ati” Mu murenge wacu abaturage bakora imirimo ya VUP basanze umubiri mu isambu y’uwitwa Nikozivuze Charles, wahoze ari umuyobozi kera, akaba yaranafungiwe Jenoside.”

Akomeza agira ati” Bwa mbere abaturage bageze mu isambu ye, Sindayiheba ababwira ko bitari ngombwa ko bamugerera mu isambu ko aribuze kuyikoreramo we ubwe.”

Uwakoreshaga abo baturage ngo yagize amakenga ababwira ababwira kujya kuhakorera, bahageze bahasanga umubiri wari utabye nko muri santimetero 30.

Akomeza agira ati” Uwakoreshaga abo bantu agira amakenga abwira abakozi ngo bajyemo bakore batangiye guhinga, basangamo umubiri warushyinguye mu buryo bugaragara ko yahajugunywe.

Ati” Ibyo byose ngo iyo ubihuza n’ahantu hatigeze haba irimbi ubona ikintu kidasanzwe, cy’uko hashobora kuba hari amakuru uwo musaza yadukinze wenda, tukazareba niba ari umwe mubazize Jenoside yakorewe Abatutsi.”

Habimana Emmanuel, Umunyamabanga Nshingwabikorwa w’Umurenge wa Gitambi na we, avuga ko mu Murenge ayobora bamaze gusanga imibiri ibiri mu mirima y’abaturage.

Ati” Ibi biradutera ipfunwe kuba abaturage bacu bagifite imibiri iri mu masambu yabo badashaka kwerekana ngo ishyingurwe mu cyubahiro. Dufite urugamba drukomeye nk’ubuyobozi rwo gukura iyi myumvire mu baturage.”

Abayobozi barasabwa gutinyura abaturage ku girango bavuge aho imibiri y’abantu batashyinguwe mucyubahiro iri

Umuyobozi w’akarere ka Rusizi Harelimana Frederic, asaba abayobozi kurushaho gutinyura abaturage ku girango batange amakuru y’ahantu haba hakiri imibiri idashyinguye mu cyubahiro.

Ati” Tumaze kubona ingero eshatu mu mirenge itandukanye aho abantu bavuga ko bariho bahinga bakabona umubiri. Iyo tubihuje n’ibihe turimo turibaza tuti ‘ese ntiwasanga hari abaturage bagifite amakuru y’ahantu haba harashyinguwe abantu ariko bakaba batayatanga?”

Akomeza agira ati” Ni byiza ko abaturage tubaha ayo makuru ariko tukanabatinyura kugira ngo niba hari uzi amakuru y’ahashyinguwe umuntu badufashe gushyingura mu cyubahiro uwo mubiri waba wagaragaye aho ariho hose.”

Iyi mibiri yagaragaye mu mirenge ya Gitambi, Bweyeye na Muganza.

Bibutse kuncuro ya 24 Jenoside yakorewe Abatutsi

Iki kibazo ni kimwe mu bihangayikishije na Guverinoma y’u Rwanda, kuko mu turere twinshi twa’Amajyepfo y’u Rwanda hagiye hagaragara Abarundi bari barahahungiye bagiye bijandika muri Jenoside.

Icyo kibazo cyagaragaye mu Karere ka Ruhango na Nyanza, kandi bose nta n’umwe wafashwe ngo ashyikirizwe ubutabera.

Iki kibazo cyongeye kuzamurwa n’abatuye mu Burengerazuba, cyane cyane mu bice bya Muganza, Nyakabuye, Bugarama na Mibilizi.

Abaturage bitabiriye ku bwinshi kwibuka ku nshuro ya 24

Mu buhamya bwa Michel Nzigiyimana ,umwe mu barokokeye mu Murenge wa Muganza ahari hacumbitse impunzi z’Abarundi, yavuze ko interahamwe yitwa yusufu Munyakazi yari iyoboye izindi ari mu batije umurindi iyicwa ry’Abatutsi bo muri uyu murenge.

Yagize ati “ Abarundi bagize uruhare mu kwica abantu mu cyahoze ari Komine Bugarama ndetse n’ahandi henshi cyane ku buryo bavuye ino bajya no ku Kibuye, Mibirizi bajya ishangi. Ni bo batoje abantu kwica vuba doreko bageze ino muri 93.

“Baje bafite umugambi wo kwica Abatutsi kuko bavugaga ko ari bo bishe uwahoze ari Perezida wabo.”

Nzigiyimana warokotse Jenoside asaba ko abarundi bishe Abatutsi bakurikiranwa n’ubutabera aho bari

Umuyobozi w’akarere ka Rusizi Harelimana Frederic yasabye Abanyarwanda gukomeza gutanga amakuru kuri Barundi bijanditse muri Jenoside, kugira ngo bakurikiranwe.

Ati “Aha twicaye mu gihe cya Jenoside hari inkambi y’impunzi. Uruhare rw’izo mpunzi z’abarundi muri Jenoside narwo tugomba kongera kubitekerezaho kugira ngo tuzirikane ko Jenoside ari icyaha ndengamipaka.

“Aho bari hose tugakomeza gutanga amakuru ku girango abo bose bakomeze bashakishwe kuko icyaha cya Jenoside kidasaza.”

Umuyobozi w’Akarere ka Rusizi Harelimana Frederic asaba ko Abanyarwanda bakwiye gutanga amakuru ku barundi bakoze Jenoside kugira ngo bakurikiranwe

Munyantwali Alphonse, Guverineri w’intara y’Uburengerazuba yavuze ko u Rwanda ruzakomeza guharanira ko abakoze ibyaha bya Jenoside yakorewe Abatutsi bakikidegembya mu bihugu bitandukanye bakurikiranwa bakabihanirwa.

Ati “Ni byo Leta y’u Rwanda ikomeza kubwira amahanga. Niba umuntu utamwohereje ngo acibwe urubanza akurikiranwe mu Rwanda, wowe mucire urubanza aho uri. Ni icyo twese dusaba hakaba ubufatanye mu butabera ntanubwo tuzareka gukomeza kubikurikirana.”

Urwibutso rwa Genocide rwa Muganza rwonyine rushyinguyemo imibiri 242. Ariko abarokokeye mu kibaya cya Bugarama bavuga ko hari indi mibiri itaramenyekanye yajugunywe mu migezi ya Rusizi na Rubyiro.

Impunzi z’abarundi zivugwa mu kwijandika muri Jenoside yakorewe Abatutsi zageze mu kibaya cya Bugarama mu 1993 ziza gusubira iwabo nyuma ya Jenoside.

Abayobozi barimo Guverineri w’Intara y’Uburengerazuba bacana urumuri rw’icyizere

Ubu ni bimwe mu buryo bukoreshwa mu gufunga abagabo, bitandukanye n’uko bamwe babitekereza

Iyi mvumvira ishimangira ko abagabo batarasobanurirwa byimbitse uko kuboneza urubyaro mu bagabo bikorwa.

Abagabo baganiriye na Kigali Today bemeza ko batekereza ko kuboneza urubyaro ari ibinru bigamije kwangiza ubugabo bwabo.

Bamwe mu bagore bo muri Rusizi bavuga ko abagabo babo badakozwa gahunda zo kuboneza urubyaro, ngo bitabaviramo kunanirwa gutera akabariro.

Benshi muri aba bagore ni abahamya ko ubwinshi bw’abagize imiryango yabo butajyanye n’imitungo bafite. Ngo hari n’abangira abagore babo kuringaniza urubyaro, bigatuma hari ababikora rwihishwa.

Abagabo benshi muri aka karere kakoreshwa inama zibafasha guhindura imyumvire

Urugero uwitwa Habarugira Emmanuel avuga, rugaragaza neza ko imyumvire yabo ikiri hasi kuri iki kibazo.

Agira ati “Ufashe nk’urugero nk’isekurume y’ihene barayikona kugira ngo yoye kubyara, biba byarangiye kwimya. Umuntu w’umugabo yafatiraho urugero akabitekereza ati ‘iriya sekurume y’ihene kuko bayikona bakayibuza uburenganzira bwo kubyara bwo kurira mbega indi hene. Nawe ukareba ‘uti umuntu w’umugabo bangize kuriya nazasubira kurira uburiri se.’”

Mugenzi we witwa Habanabashaka Fabien, we avuga ko asanga abagabo baringaniza imbyaro bahita bahinduka imfungwa z’abagabo.

Ati “Nkanjye ntabwo ndabyumva by’uko abagabo baringaniza urubyaro tubona ari imfungwa z’abagore. Kenshi na kenshi tubona ari bo byagenewe, twebwe tubona bitaratugenewe. Ni yo mpmvu abagabo tutarabyumva.”

Umuyobozi w’Akarere ka Rusizi Harerimana Frederic, avuga ko bakomeje ubukangurambaga mu bigo by’amashuri bwo kuboneza urubyaro

Mukantibaziyaremye Emeranie umwe mu bagore bo muri aka karere, avuga ko kutaboneza urubyaro bigira ingaruko ku muryango kuko birangira hari abagabo bataye ingo zabo.

Ati “Iyo [umugabo] amaze kubona urugo rwuzuye abana ahita aguta akigendera ibibazo bikaba ibyawe n’abana bawe.”

Umuyobozi w’Akarere ka Rusizi Harerimana Frederic, avuga ko n’ubwo hari abatarabyumva ariko ubukangurambaga butigeze buhagarara kandi bukaba bukorwa buhereye mu rubyiruko.

Ati “Turashaka guhindura. Hari igihe tubwira kuboneza urubyaro ababyeyi bamaze gutambuka uwo murongo ariko ntitubwire rwa rubyiruko ruri mu mashuri.

“Ubu turagira ngo tugere mu bigo by’amashuri abana tubakangurire hakiri kare, wenda nabo baraza kudufasha ababyeyi babo babereka ibibazo bashobora kuba bafite mu muryango bitewe no kuba bafite uburyo babyaye abana barenze ubusobozi bwabo.”

Kugeza ubu Akarere ka Rusizi ni ko kanyuma muri gahunda yo kuboneza urubyaro, aho kakiri kuri 35%.

Nyuma yo gucibwa ukuguru yizezwa ko agiye kurushaho kumererwa neza byamuviriyemo kubura uko ajya ku ishuri kubera kubura insimburangingo

Ngendahayo ukomoka mu Murenge wa Mururu mu Karere ka Rusizi, yavukanye akaguru karemaye, ariko nta kibazo bwari bumutwaye. Yabashaga kwijyana ku ishuri akoresheje imbago imwe akanafasha iwabo imwe mu mirimo itavunanye.

Nyina witwa Mukamugema Josianne avuga ko byaje guhinduka aho bamubagiye ako kaguru bakagasimbuza insimburangingo, byakozwe n’umushinga wakoreraga mu kigo cy’abamugaye cya Gahini.

Agira ati “Ageze mu wa Gatanu ubanza habonetse ubufasha umwana baramujyana i Gahini akaguru baza kugacamo bamuha insimburangingo ariko ikagenda isaza. Ubwa mbere yagize ikibazo ntanga ibihumbi birenga 22Frw barayifunga, ubwa kabiri ngurisha itungo nyikoresha ku bihumbi bisaga 46Frw.”

Ngendahayo atangiye kwiga amashuri yisumbuye iyo nsimburangingo yaje kuvunika bikomeye. Bayijyanye ku bitaro bya Gihumndwe ngo bayisane ibihumbi bisaga 284Frw babaciye ngo ikorwe barabibura.

Mu 2014 agitangira umwaka wa mbere w’amashuri yisumbuye yaje kureka ishuri kubera kubura insimburangingo. Ubumuga nabwo batangiye kumukomerera, kuko umushinga wamuhaye iyo nsimburangingo nawo wahise urangira akabura uwamukurikirana.

Ubuyobozi bwemera ko bwamurangaranye, kuko iki kibazo bakimenye bakagikorera ubuvugizi kuri serivisi zishinzwe abafite ubumuga ariko ntibamusubize, nk’uko umunyamabanga nshingwabikorwa w’umurenge wa Mururu Iyakaremye Jean Pierre abitangaza.

Ati “Turacyategereje igisubizo, kuko biragaragara ubushobozi bw’ababyeyi ntibashobora kubona insimbura ngingo icyo numva twakora ni ukongera kwibutsa hashize nkumwaka dutanze iki kibazo.”

Umuyobozi w’Akarere ka Rusizi wungirije ushinzwe imibereho myiza y’abaturage Nsigaye Emmanuel, we avuga ko batari bakizi ariko akemeza ko kuva bakimenye bagiye gukorana n’umurenge kugira ngo asubizwe ku ishuri.

Ati “Turakorana n’ubuyobozi bw’umurenge tumenye amakuru arambuye kuri uwo mwana turamufasha abashe gukomeza amasomo ye.”

Bamwe mu babyeyi bavuga ko ubukene ari bwo butuma habaho imirire mibi mu bana

Muri aka karere harabarurwa abana bagera kuri 546 bugarijwe n’imirire mibi, ku buryo bibatera indwara zituruka ku mirire mibi zirimo na Bwaki.

Ababyeyi bavuga ko imirire mibi imereye abana babo nabi, ku buryo nabo batazi uko babyifatamo kandi nta bushobozi bafite.

Umwe muri bo witwa Nyirahabimana Aline agira ati “Abenshi Babura uko babigenza muri make nta bushobozi nonese umwana w’imyaka itanu ari gupima ibiro 10 ubwo ntaba afite imirire mibi uranamubona no ku isura ukuntu aba ameze.”

Nyirarubungo Rachel we avuga ko bwaki iri gukwira mu bana benshi kandi ubuyobozi bukaba bubizi n’ubwo nta gifatika buri kubikoraho.

Ati “Leta iri kutwirukaho ubutitsa ati ‘niki kiri gutuma murwaza bwaki.’ Ejobundi gitifu yaraje arobanuramo bamwe barwaje bwaki arababwira ngo nibashake uko bahereza abana amata ariko bwaki pe yatongoye.”

Inzego z’ibanze ziranengwa kujenjeka mu kibazo cyo kurwanya Bwaki

Umuyobozi w’Akarere ka Nyamasheke wungirije ushinzwe imibereho myiza y’abaturage Mukamana Claudette, ntahakana ko icyo kibazo gihari akemeza ko akarere nako gakeneye ubufasha mu kukirandura.

Abafatanyabikorwa ba mbere biyambaza ni umushinga wa USAID Twiyubake kugira ngo babafashe guhangana n’iki kibazo.

Ati” Icyo tubasaba cyane turagira ngo badufashe cyane mu kijyanye no kurwanya imirire mibi. Icyo ndakibasaba cyane kubera ko iyo tugaragaye mu turere twa mbere dufite imirire mibi aba ari ikibazo gikomeye.”

Umushinga USAID Twiyubake ugamije kwita ku bana babayeho nabi mu Karere ka Nyamasheke.

Umuyobozi w’Akarere ka Nyamasheke w’ungirije ushinzwe imibereho y’abaturage Mukamana

Dr Karangwa Innocent, umukozi wa Caritas Rwanda uyobora unayobora uwo, we ntiyemera ko imirire mibi iterwa no kutabora ibiryo gusa, kuko hari n’ubwo biba bihari ariko batazi kubitunganya.

Ati “Kuba Nyamasheke hari urwego ruri hejuru rw’imirire mibi ntabwo biterwa n’uko ntabiryo bihari hano hari ikivu babona isambaza, ushobora guhinga imbuto zikera cyangwa imboga.

“Icyo turi gutoza abantu binyuze mu ishuri ry’abahinzi mu murima ni uguhinga zamboga, guhinga imbuto, kumenya kubitegura, kugira ngo yandyo ishobore kuba yuzuye babana bareke kugwingira bakure neza.”

USAID Twiyubake yageze muri Nyamasheke mu 2016, imaze kugira abagenerwabikorwa bagizwe n’imiryango 9261.

Intumwa ya Papa Mgr Andrzej Jozwowicz ni we watanze ubutumwa bwa Papa bufata mu mugongo umuryango w’Abagatolika mu Rwanda

Uyu muhango wabaye kuri uyu wa Gatanu, wari witabiriwe n’imbaga y’abantu basaga 5000 barimo, abihaye Imana baturutse hirya no hino mu Rwanda no mu mahanga, abayobozi mu nzego za Leta n’izigenga, abayobozi b’ingabo na Polisi ndetse n’abakirisitu muri rusange baturutse mu yandi matorero.

Muri ubwo butumwa bwoherejwe na Papa Fransisco, intumwa ye yagize iti” Nyuma y’uko Nyirubutungane Papa Francisco amenye inkuru yurupfu rwa Nyiricyubahiro Mgr Bimenyimana Yohani Damascene, yifatanyije e n’umuryango wa Nyakwigendera hamwe n’abakirisito bose ba Diyosezi gatolika ya Cyangugu bakuwemo umushumba wabo wari ukiri muto.”

Yakomeje agira ati” Papa Fransisco yanasabiye uyu mushumba kwakirwa mu bwami bw’ijuru kubera ubudahemuka yakomeje kugaragaza mu murimo w’Imana anasabira, anaha umugisha wihariye abepisikopi bose bo mu Rwanda abakirisitu ba Diyosezi ya Cyangugu, umuryango wa Nyakwigendera, ndetse n’ abantu bose bifatanyije na Musenyeri mu burwayi bwe”.

Isanduku y’umubiri wa Nyakwigendera Musenyeri Bimenyimana

Nyakwigendera Musenyeri Bimenyimana Jean Damascene yitabye Imana ku itariki 11 Werurwe 2018, azize uburwayi bwa Kanseri bwamufasha mu mwaka wa 2016.

Uyu munsi yashyinguweho ni bwo yujuje imyaka 21 ahawe inkoni y’ubushumba. Yashimiwe ibigwi asize birimo kubaka paruwasi umunani.

Munyentwari Alphonnse wari uhagarariye ubuyobozi bwa Leta yashimangiye ko Mgr Bimenyimana bigaragara koko ko yari umugaragu w’Imana n’uwa Kiziya, asaba abakirisitu bitabiriye uyu muhangogusigarana ibigwi bye ndetse no kumwigiraho, kugira ngo ibyo yatoze bizasakazwe muri benshi.

Yaherekejwe n’Abapadiri bari batwaye Isanduku ye

Abasenyeri bitabiriye umuhango wo guherekeza mugenzi wabo

Abihaye Imana ni bo benshi bari muri uyu muhango

Musenyeri Rukamba Philippe yavuze ibigwi Mgr Bimenyimana

Abihaye Imana baturutse hirya no hino ku isi baje gutabara

Ababyeyi ba Musenyeri Bimenyimana

Abo mu muryango wa Musenyeri Bimenyimana bamuvuga ibigwi

Urubyiruko rwiga muri diyoseze ya Cyangugu yayoboraga rwaje kumuherekeza

Bose bahize kuzamufatiraho urugero bakora nk’uko yakoraga

Musenyeri Bimenyimana (ibumoso) na Musenyeri Misago bose bitabye Imana mu kwezi kwa Werurwe

Musenyeri Bimenyimana abaye uwihayimana wa kabiri witabye Imana mu kwezi kwa Werurwe, nyuma y’imyaka itandatu Augustin Misago wahoze ayobora Diyosezi ya Gikongoro nawe wapfuye tariki 12 Werurwe 2012.

Musenyeri Phillip Rukamba, Perezida w’Inama y’Abepisikopi mu Rwanda yemeje ko gushyingurwa kuzaba kuri uyu wa Gatanu. Yagize ati “Imihango no gushyingura Musenyeri Bimenyimana bizabera kuri Katedarali ya Cyangugu Isaa Yine za mugitondo.”

Mu bo bakuranye barimo Musenyeri Smargade Mbonyintege uyobora Diyosezi ya Kabgayi yabwiye Kigali Today ko urupfu rwa Musenyeri Bimenyimana ari igihombo ku mateka ya Kiliziya Gatolika mu Rwanda.

Ati “Muzi akiri muto nk’umuntu wicishaga bugufi, utarakundaga Imana gusa ahubwo agakunda n’umurimo. Umurimo we wagaragariraga mu gutoza abakiri bato mu idini.”

Umunyamakuru wa Kigali Today ukorera mu Karere ka Rusizi yatangaje ko imyiteguro yo gushyingura Bimenyimana irimbanyije kuri Katedarali ya Cyangugu aho yari asanzwe akorera.

Mgr Bimenyimana azashyingurwa muri Katedarali ya Cyangugu aho yari asanzwe akorera.

Biteganyijwe ko abapidiri n’abasenyeri bose bakorera mu gihugu bazitabira umuhango wo guherekeza uzabera muri Katedarali ya Cyangugu akaba ari naho azashyingurwa, nk’uko imigenzo ya Kiliziya Gatolika ibigena.

Musenyeri Bimenyimana wari ufite imyaka 65, yabanaga na kanseri ariko ntawari ubizi kugeza yitabye Imana aguye mu bitaro bya Gisirikare bya Kanombe, biherereye muri Diyosezi nkuru ya Kigali.

Ku myaka igera kuri 38 yari amaze mu murimo wo kubwiriza ijambo ry’Imana, Musenyeri Bimenyimana yanabayemo umwarimu mu mashuri. Yahawe ubupadili mu 1980 afite imyaka 27, agirwa musenyeri mu 1997.

Abasenyeri bashyingurwa imbere mu kiriziya

Imva ye yatangiye gucukurwa

Abagororwa muri Gereza ya Rusizi babangamiwe n’ubucucike

Gereza ya Rusizi isanzwe ifite ubushobozi bwo kwakira abafungwa 2.600, yari ifungiyemo abarengaho 48. Nyuma yo kwimura Gereza za Kimironko na Nyamagabe, hoherejweyo abagororwa bandi 600.

Uko kwiyongera ku mibare bakagera ku 3.248 ntibyashimishije abahafungiye, bemeza ko iyo mibare ikomeza kwiyongera umunsi ku wundi, nk’uko bitangazwa n’uhagarariye abafungwa, Nsengumuremyi Diogene.

Agira ati “Hari n’umubare mu nini w’abinjira muri gereza buri munsi baje gufungwa (bakatiwe n’inkiko) usanga baruta cyane abasohoka, kuri iki kibazo dutegereje twihanganye.”

Nsengumuremyi Diogene uhagarariye abagororwa

Umuyobozi wa gereza ya Rusizi Senior Superitendent Gérard Habimana, nawe yemeza ko iki kibazo kigaragara cyane mu gihe cyo kuryama, kuko ahagenewe abantu babiri hasigaye haryama abantu batatu.

Ati “Ubucucike bushobora kuzagabanuka Gereza ya Mageragere niyuzura babandi ba Gasabo bazabasubiza Mageragere, babandi bavuye Nyamagabe gereza yaguye bari kuyubaka n’iyuzura nabo bazabajyana i Huye.”

Minitri w’ubutabera Johnston Busingye, avuga ko umuti urambye w’iki kibazo atari ukubaka amagereza yo gufungiramo abantu. Yemeza ko abafunguwe bajya bigishwa bihagije icyatuma batongera gufatirwa mu makosa yo gufungwa.

Ati “Ubucucike bwagabanuka mu buryo bubiri, icyambere ni ukubaka amagereza ahantu hose kuri buri mu dugudu, akagali n’umurenge n’ahandi hose, ibyo ntabwo byashoboka. ,

“Amagereza si amashuri, si amavuriro, si amazi. Gufata amafaranga menshi nawe ari ayawe ntiwahitamo kuyubakamo amagereza wayubakamo ibindi bikorwa bifitiye Abanyarwanda akamaro.”

Minisitiri w’Ubutabera, Johnston Busingye

Nubwo ubucucike buri hejuru muri iyi gereza ya Rusizi kubera impamvu bo mu zindi gereza bimuriwemo, ku rwego rw’igihugu si ko bimeza kuko imibare igenda igabanuka.

RCS itangaza ko mu 1996 mu gihugu hose abagororwa ngo bageraga ku bihumbi 200, ariko kuri ubu harabarurwa ibihumbi 60 gusa.

Izi Mpunzi z’Abarundi zinjiye mu Rwanda zisaga 3000

Izi mpunzi zari zikambitse mu nkambi ya Kamanyola iherereye mu Majyepfo ya Repubulika iharanira Demokarasi ya Congo.

Mu gihe zari zihamaze, ntizigeze zumvikana n’ubuyobozi bwa Congo, ku buryo no muri Nzeri abasirikare ba Leta ya Congo barashemo abagera kuri 18, nyuma y’imvururu zari zishyamiranyije impande zombi.

VOA yatangaje ko izi mpunzi zafashe icyemezo cyo kuva muri Congo zikaza mu Rwanda, nyuma y’aho zakekaga ko Leta ya Congo ishaka kuzirukana ikazisubiza i Burundi.

Bakigera ku mupaka uhuza Rusizi na RDC

Izi mpunzi ngo ntizishobora gusubira i Burundi kuko zahavuye zihunze ubuyobozi bwa Pierre Nkurunziza, zikaba zifite impungenge ko gusubira yo bitazigwa amahoro.

Ubuyobozi bwatangarije Kigali Today ko batunguwe no kubona aba baturage binjira mu Rwanda ariko yizeza ko akarere kagiye kuba kabajyanye mu nkambi ya Nyarushishi, mu gihe bagishaka igikorwa.

Baje bitwaje n’amatungo yabo

Ubuyobozi bw’Akarere bubaye bubajyanye mu Nkambi ya Nyarushishi

Kwicara muri batanu ku ntebe bigora cyane abanyeshuri kwandika

Aba banyeshuri basobanura ko mu gihe cy’amasomo bashyuhirana cyane ndetse bigatuma banandika nabi, kuko hari abarinda kwandikira ku mavi.

Ibi kandi ngo bifite ingaruka ku ireme ry’uburezi, ngo kuko usanga muri aya mashuri higanjemo gukoperana kuko abanyeshuri baba bahekeranye mu ishuri, bigatuma abarimu batabasha kubakurikirana neza, nk’uko Sezigoma Eric wigisha muri iri shuri abivuga.

Tuyizere Patrice wiga muri iri shuri yagize ati” Twicara ku ntebe turi abanyeshuri batandatu, bane batanu gutyo, intebe ntazo batubwira ko bari kuzikora twarategereje twarahebye.”

Abanyeshuri barihangana bakiga ariko batorohewe

Ndikubwimana Sabe yungamo ati” Twarwaye imigongo tukiri bato kubera uburyo twihinahina twandika, ubushyuhe bwo sinakubwira bwaraturembeje, umuhumuro mubi mu ishuri nabyo ni uko, tumerewe nabi rwose dukeneye gutabarwa.”

Umuyobozi w’iri shuri avuga ko iki kibazo koko gihari, ariko ngo cyatejwe n’akarere kabubakiye amashuri, ariko ntikabahe intebe zo kuyashyiramo.

Ati” Ubusanzwe iyo akarere kubatse amashuri kagomba gutanga n’intebe. Aha katwubakiwe amashuri atatu ntikaduha intebe zo gushyiramo bituma abana babura aho bicara.”

Ubu ngo bari kuganira n’ubuyobozi bw’Akarere ka Nyamasheke kugira ngo bubafashe kubona intebe ngo kuko ishuri ubwaryo ritabasha kuzibona.

Gukurikirana abanyeshuri bangana gutya ni ikibazo ku barezi

Uyu muyobozi avuga ko mu mashuri abanza afite abanyeshuri basaga 887, naho abiga mu mashuri yisumbuye y’uburezi bw’ibanze bw’imyaka 9 na 12 bagera kuri 365.

Aba banyeshuri ngo nubwo ibyumba bigiramo bishaje, bavuga ko babyihanganira ariko bakifuza ko ubuyobozi bwabaha nibura intebe zihagije.

Sinabajije Alphonse umuyobozi ushinzwe Uburezi mu karere ka Nyamasheke avuga ko icyo kibazo cy’intebe kizakemuka vuba kuko Minisiteri y’uburezi yabemereye intebe ibihumbi 17 zizatangwa vuba muri iyi ngengo y’imari mu gihugu hose.

Uburobyi bukorerwa ku nkengero z’i Kivu bukunze kugaragaramo ukutumvikana

Aya makoperative yo yemeza ko bemerewe ku gurisha umusaruro wabo k’uwo ari we wese ubifitiye uburenganzira.

Leta yeguriye uyu mushinga ibikorwa byayo byo kuroba amafi n’isambaza mu Kivu mu 2009. Aho ni ho abarobyi bahera babvuga ko abayobozi bawo babigenderaho kugira ngo babapfyinagaze.

Ugirasebuja Remy uhagarariye imwe muri koperative y’abarobyi ikorera muri iki kiyaga, avuga ko batigeze banga kubaha umusaruro ariko bakaba batabafata nka kamara kuko n’undi uje kubagurira bamugurisha.

Abarobyi ntibavuga rumwe na "Projet Peche" yifuza ko bayigemurira umusaruro wose

Agira ati “Ntabwo turi abacuruzi twebwe turi abarobyi. Ubundi hakabayeho abarobyi barobera Projet Peche, n’abacuruzi bandi bafite ibyangombwa byemewe nabo bakaza bakatugurira umusaruro.

Dufite uburenganzira bwo kugurisha umusaruro wacu aho dushaka kuko ni twe tubifitemo inyugu.”

Umuyobozi wungirije wa Projet Peche mu turere twa Rusizi na Nyamasheke, Sendashonga Jean Nepomscene, yemeza ko Leta yabahaye uburenganzira bwo kugura no kugurisha umusaruro wose uvuye muri iki kiyaga.

Ati “Projet Peche igurwa yahawe inshingano zo kugura, kuroba no kurengera ibidukikije ku gira ngo amafi ari mu Kivu yororoke. Imaze kugura izo nshingano yahawe na Leta ntabwo abarobyi bazubahirije kandi twe dukeneye ko uwitwa umurobyi ayoboka kuri Projet Peche.”

Ubuyobozi bw’Akarere ka Rusizi bwangiye uyu mushinga ikifuzo cyo kwigarurira isoko

Umuyobozi w’Akarere ka Rusizi wungirije ushinzwe ubukungu n’iterambere Kankindi Leoncie, avuga ko kuba uyu mushinga wareguriwe abikorera ntaho bihuriye no kwiharira isoko, kuko ubucuruzi bw’amafi n’isambaza mu Kivu bifunguye kuri buri wese.

Ati “Twarabahuje tubasobanurira ko isoko ryagutse. Ntabwo nk’ubuyobozi, dushobora gutegeka ngo umusaruro wose n’uhabwe kompanyi imwe mu gihe abari ku isoko ari benshi kandi bose bakeneye kubaho no gukora.”

Kuva mu 2009 umushinga “Projet Peche” yeguriwe abikorera uvuye mu maboko ya Leta, muri gahunda yo kwegurira abikorera imishinga imwe n’imwe ya Leta.

Aho uyu mushinga ugiriye mu maboko y’abikorera wasanze ku isoko andi makoperative arindwi y’abarobyi bitangira guhangana.

Ba Marayika murinzi barifuza ko abana bakuye mu bigo by’imfubyi babegukana ku buryo bwa burundu

Ibi ngo bigamije gukura aba bana mu gihirahiro cyo kumva ko badafite ababyeyi no guhezwa ku mitungo y’ababarera bazwi ku izina rya Marayika murinzi.

Aba babyeyi bavuga ko aba bana baba baremeye kubakira mu miryango kuko babafata nk’abana babo, bakaba bifuza ko bandikwa kugira ngo bagire uburenganzira bungana n’ubwabandi bana cyane cyane ku mitungo y’ababyeyi babarera.

Umubyeyi Niyonzima Thomas yagize ati” Nabaye mu buzima butari bwiza cyane, nugarijwe n’ubukene no kwiga mfashwa, bituma njye ngira umutwaro wo kumva ko mbonye umuntu ubabaye namufasha”.

Arongera ati” Umwana nakiriye mufasha nk’uko mfasha uwanjye, mu bushobozi nzaba mfite bwose yaba na Kaminuza nzamurihira.”

Ingabire Aline ni umwe mu bana barererwa mu muryango avuga ko akiri mu kigo imibereho ye yasaga n’imufunze kuko atabashaga kwisanzura ariko kuva aho agereye mu muryango umurera, ngo yarabohotse ndetse avuga ko yiteguye ko abamurera bazamubera ababyeyi ba burundu.

Ati” Nkiba mu kigo cya Rusayo sinabashaga kuba nakwigurira umwenda mwiza cyangwa gutunga telefoni nshaka, ariko mu muryango ho bagerageza kubinkorera byose.

Uyu muryango mbamo nta kibazo cyawo ndawishimiye mbafata nk’ababyeyi banjye, mbese ntanakimwe nabura bahari bagerageza kumfasha.”

Mutuyimana Celestin aravuga ko kwegurirwa abana ku buryo bwa burundu bitangwa n’urukiko

Nubwo ba Marayika murinzi bafata abana bakabarera nk’ababo ndetse bakaba bifuza kubegukana burundu hari ibyo basabwa kubahiriza kugira ngo bagirwe ababo.

Celestin Mutuyimana, umukozi w’umuryango Hope and homes for children yagize ati” kugira ngo umwana yitwe uwawe utaramubyaye bisaba ko ukora inyandiko isaba ko uwo mwana yaba uwawe mu buryo bwa burundu.

Nyuma y’iyo nyandiko wuzuza ibyangombwa byose bisabwa n’amategeko ugafata izo mpapuro ukazijyana mu rukiko rw’ibanze kugira ngo habeho ikirego, urukiko rukaba ari rwo rwemeza ko uwo mwana abaye uwawe burundu.”

Iki kiraho gihuza Rusizi na RDC kirimo n’imyobo kuburyo giteye impungenge abakinyuramo

Iki kiraro kimaze imyaka isaga 40 cyubatswe. Iyo ukigezeho ubona ko kimaze gusaza kuko yaba imbaho n’ibyuma bikigize bishaje cyane.

Ikiraro ubwacyo iyo ukinyuraho ubonaho imyobo myinshi yatewe no kuvaho kw’imbaho. Kinyurwaho n’abasaga ibihumbi 25 ku munsi biganjemo abakoresha ibinyabiziga.

Abakinyuraho bemeza ko basigaye bagira ubwoba kuko kigaragaza ibimenyetso by’uko isaha iyo ari yo yose cyatera impanuka, nk’uko umwe muri bo witwa Basire Mulu uturuka muri Congo abivuga.

Agira ati "Imodoka zacu zirimo gutobokera kuri iki kiraro kubera ukuntu gishaje. Abakongomani ndetse n’abanyarwanda ni cyo banyuraho bajya gushaka ubuzima muri ibi bihugu byombi, ni mudukorere ubuvugizi gisanwe.”

Uyu Munyekongo anavuga ko ugusaza kw’iki kiraro kuri kubahombya kuko ibicuruzwa batwaraga mu mamodoka yabo byagabanyijwe, kubera kutizera ubuziranenge bw’iki kiraro.

Iki kiraro kirimo ibinogo bishobora gutuma hanyuzemo ikintu kiremereye cyateza impamuka

Ati "Imodoka ya Hirigisi ntwaramo ibicuruzwa yatwaraga mbere toni eshanu, ariko nasabwe kuzigabanya zikaba eshatu kubera ikiraro cyangiritse bikantera igihombo.”

Hari ikiraro gishya cyubatswe kimaze imyaka itatu cyuzuye ariko kidakoreshwa

Hari ikiraro gishya cyubatswe ku nkunga yatanzwe n’Umunyango wunze Ubumwe w’u Burayi. Icyo kiraro nacyo gihuza u Rwanda na RDC ariko mu myaka itatu kimaze cyuzuye ntikirakoreshwa.

Abaturage bo muri aka gace bibaza impamvu batemererwa kugikoresha, mu gihe bigaragara ko igisanzwe gikoreshwa gishaje, kandi kibangamiye ubuhahirane bw’ibihugu byombi.

Iki ni ikiraro gishya kimaze imyaka 3 cyuzuye ariko kidakoreshwa

Umuyobozi w’Akarere ka Rusizi Harelimana Frederic, yabwiye Kigali Today ko gukoresha iki kiraro byadindijwe n’ubuyobozi bwa RDC butaratunganya ibikorwa remezo ku ruhande rwa Congo kugira ngo iki kiraro gikoreshwe.

Ati ”Iki kiraro gishya kuba kitaratangira gukoreshwa kandi cyaruzuye ni uko hari imihanda igishamikiyeho hakurya muri congo itaratunganywa, hakaba hari n’ibindi bikorwa remezo bigomba kunozwa neza kuri urwo ruhande, kugira ngo ikiraro gikoreshwe.”

Akomeza agira ati” Amakuru abayobozi bo muri Congo baduhaye n’uko ukwezi kwa gatatu kuzarangira iyo mirimo bayisoje, kuburyo ukwezi kwa kane abantu bazatangira kugikoresha.”

Icyakora ngo hagiye kubanza gusanwa igishaje cyaherukaga gusanwa muri 2013, kugira ngo abaturage babe ari cyo bakoresha mu gihe bategereje kwemererwa gukoresha igishya.

ku ruhande rw’u Rwanda ngo kimeze neza ariko uruhande rwa Congo rwaradindiye

Avuga ko bemeranyije n’ubuyobozi bwo muri Congo, kugira ngo hihutishwe isanwa ku mpande zombi kuko ntibyatungana buri wese atabigize ibye.

Harelimana yemeje ko mu gihe kitarenze icyumweru kimwe imirimo yo gusana iki kiraro ku mpande zombi izaba yatangiye.

One Sop Border Post ya Ruhwa ihuza u Rwanda n’u Burundi ubu ikorerwamo n’Abarundi gusa

Mu Rwanda iyo mipaka ihuriweho n’ibihugu byombi yatangiye gushyirwaho hirya no hino, aho ku itariki ya 24 Nyakanga 2014, umupaka wa Ruhwa uherereye mu Karere ka Rusizi na wo wuzuye, ugatangira gukorerwamo n’Abanyarwanda ndetse n’Abarundi.

Mu mwaka wa 2016 ubwo habaga ibibazo by’umutekano muke mu gihugu cy’u Burundi Abanyarwanda bagatangira kwibasirwa muri ako kavuyo, byabaye ngombwa ko ku itariki ya 15 Ugushyingo 2016 Abanyarwanda bava ku nyubako z’uyu mupaka wa Ruhwa, bagaruka gukorera aho bakoreraga mbere.

Mugarura Joseph ushinzwe abinjira n’abasohoka Ku ruhande rw’u Rwanda avuga ko babonye Abarundi batangiye kwica amategeko agenga umupaka, babona ko babangamirwa bahitamo kugaruka aho bakoreraga mbere.

Ati” Abarundi bari barimo gushyira Camera aho bakorera ndetse hakaza n’imodoka za gisirikare zifite intwaro z’intambara kandi mu masezerano agenga imipaka bitemewe, tubona bibangamye tugaruka aho twahoze mbere.”

Ni muri urwo rwego kuri uyu wa 20 Gashyantare 2018, Abadepite b’Umuryango wa Afurika y’Uburasirazuba (EALA) basuye uyu mupaka, kugira ngo barebe uburyo bahuza impande zombi Abanyarwanda bagasubira gukorera muri One stop Border Post.

Muri uru ruzinduko aba badepite baganiriye n’impande zombi, barebera hamwe ibibazo bihari n’uburyo byakemuka, banzura ko bagiye gukora imyanzuro izagezwa ku ba minisitiri b’Umuryango wa Afurika y’Uburasirazuba, kugira ngo bishakirwe umuti umupaka wongere kuba umwe.

Abadepite bo muri EALA basuye One Sop Border Post ya Ruhwa

Depite Fatuma Ndangiza wari muri uru ruzinduko yagize ati” Twashakaga gucukumbura ibibazo uko biteye, nyuma icyo dukora nk’inteko, ni ukujya inama tukareba icyakorwa kugira ngo dukureho inzitizi zose zituma uyu mupaka udasubirana”.

Byashimangiwe na Depite Muhia Wanjiku wari uhagarariye iri tsinda, wavuze ko nyuma y’ibiganiro bagiranye n’impande zombi basanze ibibazo bihari bidakomeye, hari ikizere ko bizaganirwaho bigakemuka.

Ati” Turabigeza kuri komite ishinzwe kurwanya amakimbirane muri EALA, kandi nizeye ko ijana ku ijana iki kibazo kizacyemuka”.

Iki kibazo ngo gikemutse vuba abaturage bakwiruhutsa

Bamwe mu baturage bakoresha uyu mupaka wa Ruhwa, bavuga ko bagikorera hamwe serivisi zihutaga, ariko ubu bakaba badindizwa no gutinda mu mayira bava ku mupaka umwe bajya ku wundi.

Nkurikiye Yusufu waganiriye na Kigalitoday yagize ati” Iyi One Stop Border post niyongera gukora tuzaba turuhutse izi ngendo zitugeze habi, zo kuva ku mupaka umwe tujya ku wundi”.

Abanyamuryango ba Koperative Gisuma Coffee batewe impungenge n’uko koperative yabo ishobora gusenyuka kubera amafaranga bambuwe n’umushoramari HIDDEN WEALTH

Aba bahinzi ba Kawa basobanura ko uyu rwiyemezamirimo yabaguriye kawa zabo mu mwaka wa 2016, bagirana amasezerano y’uko azabishyura nyuma y’icyumweru kimwe gusa, none hashize imyaka ibiri amaso yaraheze mu kirere.

Banavuga ko banyuze ku buyobozi buhagarariye amakoperative mu Karere ka Rusizi ngo bubakorere ubuvugizi bishyurwe, ariko bikarangira ntacyo ubuyobozi bwabo bubamariye.

Ibi ngo byabagizeho ingaruka zikomeye bihungabanya imibereho yabo, kuburyo ibigo by’imari byenda guteza ibyabo cyamunara kubera kubura aho bakura amafaranga yo kwishyura amadeni babifashemo.

Abandi bavuga ko kutishyurwa n’uyu Rwiyemezamirimo, byabahungabanyije mu bukungu bikanahungabanya n’imiryango yabo, aho abana bahise bacikiriza amashuri ndetse no kubona ubwisungane mu buvuzi bikaba ari ikibazo.

Uyu mushoramari yabishyuye make abasezeranya ko nyuma y’icyumweru abaha andi barategereza baraheba

Nsengiyumva Jean Pierre yagize ati” Ingaruka zo ni nyinshi urebye. Nari ndimo umwenda wa Banki rwiyemezamirimo atwambuye binanira kuwishyura, ku buryo byanteje ubukene bukabije amatungo mu rugo ndagurisha ariko biranga sinabasha kwishyura ngo ndangize iryo deni.”

Muguru Gilbert na we agira ati” Turasaba ko Leta yadufasha ikatwishyuriza uwo muntu kugira ngo, abantu dufite amadeni ya banki twishyure. Ubu banki ikomeza kuduca inyungu bishobora kuzarangira n’ibyacu bitejwe cyamunara kubera ko twabuze ubwishyu.”

Kigali Today yifuje kuvugana n’uyu Rwiyemezamirimo Habiyambere Giome uvugwaho ubwambuzi, igerageza kumuhamagara kuri telefoni, ariko inshuri zigera ku 10 yamuhamagaye rimwe yarasonaga ntiyitabe ubundi ikaba itari ku murongo.

Umuyobozi w’akarere ka Rusizi wungirije ushinzwe ubukungu Kankindi Leoncie, avuga ko batari bazi iki kibazo ariko ngo bagiye kwegera aba bahinzi kugira ngo bumve uko giteye bagikurikirane.

Yagize ati Ati “Abo bahinzi ntabwo bigeze begera ubuyobozi kugirango icyo kibazo gishakirwe ibisubizo, ikindi tugira itsinda rishinzwe amakawa rikora inama buri gihembwe rikareba ibibazo byose biri muri urwo rwego. Numva icyo twakora twabegera tukamenya uko icyo kibazo kimeze kigashakirwa igisubizo.”

Koperative Gisuma Coffee igizwe n’abanyamuryango 180 harimo abagabo 112 n’abagore 78, batangiye iyi koperative muri 2009 muri Gashyantare.

Mukangweshi Evelinne avuga ko yaharitswe n’umugabo we abagore 17

Kuva umugabo wa Mukangweshi Evelinne, utuye mu Murenge wa Cyato yamuta, amaze kuzenguruka mu bagore 17 abaharika. Mukangweshi avuga ko ari ibintu abaturanyi be bose bazi, kandi ko umugabo we ntacyo bimubwiye.

Agira ati “Umugabo wanjye twashakanye kera twabyaranye abana icyenda. Nyuma yanjye yazanye abagore 17 bose bose basohorera mu byanjye.”

Avuga ko amakuru atanga ari ukuri yahagararaho, akaba yanakwemera kugufungirwa basanze aharabika umugabo we. Gusa icyo sicyo kimuhangayikishije, ahubwo imitungo yashakanye n’umugabo yose abo bagore bakaba barayigabanyije.

Kimwe na bagenzi be, Mukangweshi yemeza ko iki kibazo giterwa n’abagabo babaye bake, bityo abagore benshi badafite abagabo ariko bafite amafaranga bagakora ibishoboka byose kugira ngo bigarurire abagabo babandi.

Cyato abagore bahangayikishijwe n’ikibazo cy’ubuharike

Umwe muri aba bagore avuga ko hari abagore baba bishakira abagabo bubatse, kugira ngo basenye ingo babane nabo.

Ati “Abagabo barabuze! Iteka ufite amafaranga ayaha umugabo akamujyana utayafite. Niyo mpamvu umugore uyafite nawe yayatanga akagumana n’umugabo we. Ariko iyo ntayo ufite arakwirukana ati ‘Subira iwanyu ujye kuyazana’ ukanakubitwa bikomeye cyabe.”

Nubwo abagabo batabyemera iki kibazo, ariko usanga ubihakana nawe abaturanyi bamuhera akato ku karubanda ko afite umwe cyangwa babiri.

Umwe mu baganiriye na Kigali Today utarashatse ko amazina ye atangazwa, mu bisobanuro atanga yemera ko afite undi ariko ko yemera uwo bashakanye gusa. Ati “Mfite umugore mukuru. Nonese navuga ngo mfite babiri batari mu gitabo bombi mfite babiri bose tubyaranye!”

Umuyobozi w’Akarere ka Nyamasheke wungirije ushinzwe ubukungu, Ntaganira Josue Michael avuga ko bari gukora ubukanguramabaga bwo guca ubuharike

Umuyobozi w’akarere ka Nyamasheke wungirije ushinzwe ubukungu, Ntaganira Josue Michael, avuga ko imyumvire iracyari hasi ku baturage. Ariko yizeza ko batangiye ubukangurambaga bwo kuganiriza abaturage ku gira ngo birinde ubuharike kuko busenya imiryango.

Ati “Ubusanzwe yaba ubuharike cyangwa inshoreke itegeko rirabibuza ntabwo ryemera ko umuntu azana inshoreke cyangwa aharika uwo bashakanye.”

Ubuyobozi bw’Akarere ka Nyamasheke ntubutangaza imibare y’uko ubuharika buhagaze muri aka karere.

Akanyamuneza ni kose ku bahinzi b’icyayi bo mu Murenge wa Macuba, Karambi na Kanjongo

Aba bahinzi ngo bakoraga urugendo rw’ibirometero bisaga 68 bagana ku ruganda rwa Gisovu ruherereye mu karere ka Karongi, bakagerayo hafi kimwe cya kabiri cy’icyayi bagemuye cyangiritse bikabatera igihombo kinshi cyane.

Ukurikiyimfura Elier, Umuyobozi wa Koperative COTHEGA y’abahinzi b’icyayi bo muri iyi mirenge, avuga ko bahombye amafaranga arenga miliyoni 80 kuva batangira guhinga icyayi kugeza aho baboneye uruganda.

Ati “Kuva muri 2010 kugeza mu Ugushyingo 2017 twahombye hafi toni 280 z’icyayi zifite agaciro ka miliyoni 80Frw. Uyu munsi dufite amahirwe atangaje kuko uruganda rusa n’urwubatse hagati mu mirima y’icyayi, icyo gihombo ntikizasubira ukundi.”

Hehe n’igihombo nyuma y’uko uru ruganda rwatangiye gutunganya icyayi

Umuyobozi w’Akarere ka Nyamasheke wungirije ushinzwe ubukungu, Ntaganira Josue Michael, avuga ko nyuma y’uko urunda rutangiye gukora, bagiye gutangira gutunganya n’imihanda igana mu mirima y’ibyayi by’abaturage, kugira ngo babone uko bageza umusaruro neza ku ruganda.

Ati “Ni ibyishimo kandi n’izindi mbaraga zihawe abahinzi b’icyayi kugira ngo kirusheho kubabyarira umusaruro wisumbuye.”

Uru ruganda rwatangiye kubakwa mu mwaka wa 2016 rwuzuye rutwaye amadorari y’amerika angana na miliyoni 12.3, asaga Miliyari 10 z’amanyarwanda, rukaba rarubatswe na Rwanda Mountain Tea Company. Mu gihe cy’ukwezi rumaze rutangiye gukora, rumaze gutunganya toni zirenga ijana.

Uru ruganda rwubatswe na Rwanda Mountain Tea Company

Mu mirenge itandukanye yo muri Rusizi hagaragaye abaturage bahinga urumogi

Byatangarijwe mu nama y’umutekano yaguye y’ako karere yabaye ku itariki ya 09 Mutarama 2018.

Urwo rumogi rwagaragaye mu mirima imwe y’abaturage bo mu mirenge ya Nkanka, Gitambi na Gihundwe.

Abanyamabanga nshingwabikorwa b’iyo mirenge bahamya ko usibye kuba bamwe mu baturage baruhinga, rusigaye runacuruzwa n’abageze mu za bukuru; nk’uko umunyamabanga nshingwabikorwa w’umurenge wa Nkanka Uwambaje Aimee Sandrine abivuga.

Agira ati “Hari umuturage bari baratugaragarije, tugeze iwe tubonayo ibintu bidasanzwe njyewe nakekaga ko ari imyumbati, baravuga ngo ni urumogi turebye igiti cya mbere dusanga ni urumogi icya kabiri ni urumogi dusanga umurima wose yawutambagije urumogi.”

Nubwo abayobozi b’imirenge bahamagarirwa kurwanya urwo rumogi, bamwe muri bo bavuga ko bataruzi kuburyo basabye kubanza kurwerekwa kugira ngo nibarubona mu mirima barurandure.

Umuyobozi w’Akarere ka Rusizi, Harelimana Frederic avuga ko bagiye kugenzura imirima itandukanye y’abaturage bareba niba nta rumogi bahinga kugira ngo barurandure.

Agira ati “Twemeje ko tugiye kugera mu miryango yabo (y’abaturage) tukareba imirima y’aho batuye, tukareba ‘ese nta rumugi baba bahinga! Mu mirima ikikije ingo zabo tugiye kubikora mu buryo buhoraho dufatanyije n’abaturage.”

Abanyarusizi bavuga ko ikibazo cy’ibiyobyabwenge kibahangayikishije cyane. Bavuga ko bamwe babyishoramo bagakora ibikorwa bihungabanya umutekano birimo kurwana no kwiba.

Abo baturage bavuga ko abafatiwe mu bikorwa byo kubicuruza cyangwa kubinywa bakwiye kujya bahanwa by’intangarugero; nkuko uwitwa Ndatabaye Joseph abisobanura.

Agira ati “Ibiyobyabwenge biraduhangayikishije kuko uwabinyoye adashobora kugira umurongo muzima. Biteza n’umutekano muke nka bano baba bari kwiba ku muhanda baba banyoye ibiyobyabwenge.”

Aba baturage ni abo mu Murenge wa Butare, bavuga ko bari mu bwigunge kubera umuhanda ubahuza n’indi mirenge wangiritse

Barasaba Ubuyobozi bw’Akarere ndetse n’Intara y’Iburengerazuba muri rusange ko bwabafasha uyu muhanda ugakorwa, ngo kuko basa n’ababa mu bwigunge ndetse n’ubuhahirane bwagabanutse hagati y’umurenge wabo n’indi mirenge baturanye.

Karangwa Alphonse utuye muri aka gace agira ati "Aha nta modoka ikihagera tujya gutegera i Nyakabuye tuvuye Butare, kandi kuhagera ubanza gukora urugendo rw’amasaha arindwi n’amaguru. Ni ikibazo gikomeye cyane twaburiye umuti Leta ikwiye kudufasha.”

Nyirasafari Francoise yungamo, asobanura ko ikibazo cy’umuhanda gituma bakena kuko ibyo beza bitabasha ku gera ku isoko. Yifuza ko ubuyobozi bwabafasha bukabakorera umuhanda ku gira ngo bave mu bwigunge.

Ati "Umurenge wacu ni icyaro kubi, turi mu bwigunge. Hari n’ubwo bavuga ko ku masoko ibiciro byakwiyongera, ariko tubona ntakuntu byazamuka n’ ibyo tweza bitabasha kugera ku isoko. Nibadukorere umuhanda.”

Umuyobozi w’Akarere ka Rusizi Harerimana Frederic, avuga ko nubwo bafite gahunda yo gukora uyu muhanda ngo si ibya none cyangwa ejo ngo kuko batarabona ubushobozi. Cyakora ngo baratanga icyizere cy’uko ubushobozi nibuboneka uzakorwa.

Yagize ati” Ntabwo none aha turibubwire abaturage ngo umuhanda turawukora uyu munsi cyangwa ejo. Ahubwo icyo tubabwira ni uko umuhanda uri muri gahunda z’akarere natwe turawubona nk’umuhanda ukenewe uvana umurenge mu bwigunge ukarushaho kuvana umusaruro w’ibyo baba bahinze bikagera ku isoko.”urasaba amafaranga bitewe n’imiterere yawo turacyashaka ubushobozi nibuboneka tuzawukora.”

Uyu muhanda uhuza Umurenge wa Butare n’indi mirenge ngo ufite ibirometero bisaga 20, ni kimwe mu bi korwa abatuye uyu murenge bifuje ko bakorerwa kurusha ibindi kugira ngo bave mu bwigunge.

Umuyobozi w’Akarere ka Rusizi Harerimana Frederic, avuga ko bari kuganira n’ibindi bigo by’imari ku gira ngo bijye gukorerayo

Abatuye mu tugari twa Nyamihanda na Rwambogo ni bamwe mu bavuga ko bakora urugendo rw’amasaha atanu kugira ngo bagere kuri Sacco ya Butare. Uwifite we ategega moto akishyura 8.000Frw kugenda no kugaruka.

Ngirumukiza Viateur ubitsa muri iyi Sacco avuga ko byatumye bamwe batangira gucika integer ku buryo hari abatakiyibitsamo, bigatuma bayakoresha mu buryo batateguye.

Agira ati “Abenshi ntibitabira gukoresha Banki bitewe n’uko iri kure biba ngombwa ko tuyibikira mu bundi buryo busanzwe kubera ari kure.”

Aba baturage kuvuga ko bakabaye bifashisha ibigo by’imari bikabaha inguzanyo na bo bakiteza imbere, ariko kuko bibahenda kugera ku murenge sacco barabyihorera.

Umuyobozi w’akarere ka Rusizi Harerimana Frederic, avuga ko akarere kari kuganira na banki z’ubucuruzi ngo barebe uko bajyanayo ibigo by’imari byunganira sacco nubwo bitoroshye.

Ati “No kuba ntayindi banki ihari nabyo ni ikibazo. Ariko turimo turaganira n’izi banki z’ubucuruzi ku gira ngo turebe niba batahakorera.”

Umurenge wa Butare ni umwe muri 18 igize Akarere ka Rusizi. Igice kinini cyawo kigizwe n’imisozi ku buryo bigora cyane abawutuye kugenderana ubwabo.

Aya mashuri yubakiwe abanyeshuri bo mu murenge wa Nzahaha azatuma batongera gukora urugendo rurerure bajya kwiga

Babitangaje ubwo muri ako kagari hatahwaga ibyumba bitanu by’amashuri, ku itariki ya 12 Ukuboza 2017.

Ibyo byumba bitanu bije bisanga ibidi 13 bishya byubatswe mbere n’ibindi bitandatu byasanwe. Byubatswe n’abaterankunga barimo Hands Around the World, RSVP n’itorero ry’ADPR, byose byuzura bitwaye miliyoni 108RWf.

Abanyeshuri bo mu Kagari ka Kigenge bavuga ko mbere ibyo byumba by’amashuri bitarubakwa bakoraga urugendo rw’amasaha abiri bajya kwiga ku Rwunge rw’Amashuri rwa Nzahaha.

Abo banyeshuri bahamya ko urwo rugendo rwatumaga badakurikirana amasomo neza ariko ubu ngo bishimiye ko batazongera gukora urwo rugendo; nkuko umwe muri abo banyeshuri witwa Ihorahabona Jean Marie Vianney abivuga.

Agira ati “Tujya kwiga Nzahaha dukoresha isaha ebyiri kugenda no kugaruka. Hari bagenzi banjye bagiye bakomereka kubera kugongwa n’amagare n’imodoka. Uretse ko n’amasaha tugendamo ariyo twagakwiriye gusubiramo amasomo, urumva gutsinda biragoye.”

Mugenzi we witwa Irakoze Ariette agira ati “Turishimye kuva ikigo bakitwegereje! Nk’ubu amaguru yaturyaga none tubonye amashuri hafi ahubwo bongereho n’andi kuburyo twese dutangira kwigira hano.”

Ibyumba by’amashuri bizatangira kwigirwamo mu mwaka w’amashuri 2018

Ababyeyi bavuga ko bari bafite ikibazo gikomeye cy’abana babo bajyaga kwiga kure. Ibyo ngo byatumye bakusanya umusanzu kugira ngo bubake amashuri hafi; nkuko Hakizimfura Felicien abivuga.

Agira ati “Twari dufite ishyaka ryo kubona abana bacu biga hafi kuko hari abana bagongwaga mu muhanda kubera guturuka kure, imvura ibanyagira, twumva ko natwe tugomba kugira uruhare mu kubaka amashuri, dukusanya miliyoni 1.5RWf.”

Kageruka Benjamin, ushinzwe ireme ry’uburezi mu kigo cy’igihugu gishinzwe uburezi (REB) avuga ko Leta ifite gahunda yo kwegereza abana bose amashuri.

Agira ati “Mu bihugu byateye imbere ariho icyerekezo cy’u Rwanda kigana, umwana yiga ibyiciro by’amashuri adakoze ingendo kuko bituma abana bose bajya mu ishuri bakiga.”