Hari bamwe baba batakiyibuka cyangwa batayizi. Niyo mpamvu Kigali Today yabakusanyirije imwe muri iyo myambarire yakanyujijeho yamamajwe cyane n’ibyamamare byo muri muzika na filime byo muri Amerika.

Mampa (Hip-huggers or Bell Bottoms)

Amapantalo ya Mampa aba arekuye hasi atandukanye n’amapantalo y’amacupa

Mampa ni amapantalo yambarwa n’abagabo n’abagore. Uyibwirwa ni uko amaguru yayo arekuye hasi uturutse ku mavi.

Aya mapantalo yagezweho cyane mu myaka ya 2000, afite inkomoko muri Amerika (USA). Yadozwe n’uwitwa Irene Kasmer mu 1957.

Guhera muri uwo mwaka yarakunzwe yambarwa n’abantu batandukanye. Mu Rwanda yamamaye cyane kubera ko abayambaraga babaga bashaka kwigana bimwe mu byamamare byayambaraga babonaga muri filime cyangwa muri video z’indirimbo.

Poches Bombées (Cargo pants or Cargo trousers)

Amapantalo ya Poches Bombées mu gihe cya kera yaduka yambarwaga n’abasirikare

Poshe Bombe (Poches Bombées) ni amapantalo yagezweho mu Rwanda cyane cyane mu rubyiruko mu myaka yatambutse kuburyo utabaga ayambaye yumvaga atarimbye.

Ni amapantalo arekuye, afite imifuka ku mpande, ku maguru munsi y’amavi. Ayo mapantalo akenshi aba adoze mu ibara rimwe rya kaki, ikigina cyangwa se ibara rya gisilikari.

Kuba agira imifuka ku ruhande si umurimbo kuko mu mwaka wa 1938 wari umwambaro wa gisilikare. Icyo gihe yambarwana n’abasilikare b’igihugu cy’Ubwongereza. Iyo mifuka y’ayo mapantalo yabafashaga gutwara intwaro nyinshi.

Nyuma nibwo yaje kwamamara agera no muri Amerika, naho atangira yambarwana n’Abasilikare, agera no mu basivili cyane cyane ibyamamare, yamamara ku isi gutyo.

Pocket Down (Saggy Pants, Sagging )

Kwambara Pocket Down ngo bifite inkomoko muri gereza zo muri Amerika

Pocket Down ni uburyo bw’imyambarira y’amapantalo cyangwa amakabutura, bwagezweho mu Rwanda mu myaka ya 2000.

Mu gihe ubusanzwe amapantalo cyangwa amakabutura yambarirwa mu rukenyerero, abambara “Pocket Down” bayambarira ku kibuno cyangwa munsi yacyo kuburyo umwambaro w’imbere bambaye ugaragara.

Ubwo buryo bw’imyambarire bwamamajwe cyane n’abaririmbyi b’injyana ya Hip Hop bo muri Amerika mu myaka ya 1990. Nyuma yaho yaje gusakara mu rubyiruko bayambara mu rwego rwo kugaragaza ubwigenge.

Hari amwe mu makuru avuga ko iyo myambarire yaturutse muri gereza zo muri Amerika aho bamwe mu bagororwa batemererwa kwambara umukandara noneho kubera ko amapantalo bambaraga atabakwiraga bigatuma amanuka.

Bandana (A bandana)

Agatambaro ka Bandana gafite inkomoko mu Buhinde

Bandana ni agatambaro ka mpande enye, gafite amabara yiganjemo umutuku umweru n’umukara. Kambarwa mu mutwe nk’uteze igitambaro cyangwa kakambarwa ku mufuka. Ariko abakambara barabanza bakakazingazinga uko babyifuzwa.

Ako gatambaro kagezweho mu Rwanda, kambarwa cyane cyane n’urubyiruko. Kamamaye mu Rwanda cyane kubera kubona ibyamamare muri filime cyangwa mu video z’indirimbo bikambaye.

Tupac ni umwe mu baraperi bakundaga kwambara Bandana

Bandana ifite inkomoko mu Buhinde. Nyuma yaje kujya yambarwa cyane n’amatsinda y’ubujura cyangwa abagizi ba nabi (Gangs). Amabara ya Bandana aba afite ubusobanuro bitewe n’itsinda rya “Gangs” umuntu uyambaye abarizwamo.

Bling-bling

Jay Z na Kanye West bambaye Bling Bling mu ijosi

Bling Bling ni uburyo bw’imyambarire bwo kwambara cyangwa kugendana ibintu bishahagirana nk’isaha, imikufi cyangwa telefone.

Iyo myambarire cyangwa imvugo yamajwe cyane n’abaraperi bo muri Amerika bakundaga kwambara imikufi cyangwa bakambara ibintu mu menyo bishashagirana bikoze muri zahabu cyangwa muri "Diamond".

Mu Rwanda naho urubyiruko rwakundaga kureba indirimbo z’abo baraperi rwadukana iyo mvugo bakigana kwambara nkabo.

Ikiremba: (Keffiyeh, Shemagh )

Ikiremba gifite inkomoko mu Burasirazuba bwo hagati (Middle East)

Ikiremba ni igitambaro kiboshye mu budodo gifite inkomoko mu bihugu byo mu Burasirazuba bwo hagati, muri Aziya. Abaturage baho bacyambara ku mutwe mu rwego rwo kwirinda imirasire y’izuba, ivumbi n’umucanga.

Ikiremba cyaje kwamamara cyane ubwo abasilikare barimo abo muri Amerika no mu Bwongereza batangiraga kucyambara mu ntambara zabereye mu bihugu nka Iraq na Afghanistan. Bacyambaraga mu rwego rwo kwirinda umucanga mu maso.

Ibyamamare byo muri Amerika byamamaje Ikiremba cyane. Aha ni Jermaine Dupri na Chris Brown bacyambaye

Nyuma cyaje kwamamara mu rubyiruko no mu bindi byamamare ari nako cyaje kwamamara mu Rwanda mu myaka yashize, cyambarwa mu ijosi.

Bonjour Paris (Ascot cap)

Ingofero za Bonjour Paris zagezweho cyane mu Rwanda mu myaka yatambutse

Bonjour Paris ni ubwoko w’ingofero bujya kumera nk’ubw’ingofero zifite urukinga ariko urukinga zifite rutandukanye n’izindi kuko rwo rufatanye n’igice cyose cy’ingofero nyirizina.

Mu myaka yatambutse zagezweho cyane mu Rwanda zambarwa n’abantu batandukanye k’ubw’umurimbo. Zifite inkomoko mu bihugu by’Uburayi n’Amerika. Muri ibyo bihugu zatangiye kugaragara mu myaka ya 1900.

Mukondo out (Midriff)

Rihanna yambaye Mukondo Out

Mukondo out ni uburyo bw’imyambarire y’abakobwa cyangwa abagore, aho bambara ipantalo cyangwa ijipo ngufi mu rukenyerero n’agapira cyangwa agashati kagufi kuburyo umukondo wabo ugenda ugaragara.

Iyo myambarire ifite inkomoko mu bihugu by’Uburayi n’Amerika mu kinyejana cya 15. Ariko yaje kwamamara cyane ku isi guhera mu myaka ya 1990, yamamajwe n’umuririmbyi Madona.

Nyuma yaje no kwamamara mu Rwanda yambarwa na rumwe mu rubyiruko rwo mu mijyi.

Mugongo Wazi (Backless)

Beyonce yambaye Mugongo Wazi

Mugongo Wazi ni uburyo bw’imyambarire y’abakobwa cyangwa abagore, aho baba bambaye amakanzu y’ibirori agaragaza umugongo wabo wose.

Iyi myambarire yatangiye kugaragara mu bihugu by’Uburayi n’Amerika mu kinyejana cya 13.

Na nyuma yaho yakunze kwambarwa cyane n’ibyamamare byitabiriye ibirori bikomeye. Ni nako yaje kwamamara mu Rwanda, bakayambara bagendeye kuri ibyo byamamare.

Aha gafotozi Austin Mann yafotoye imirima y’icyayi mu Ntara y’Amajyepfo

Iryo geragezwa ryakoze na gafotozi kabuhariwe w’Umunyamerika witwa Austin Mann. Uyu azwi ho kuzenguruka ibihugu bitandukanye byo ku isi afata amafoto.

By’umwihariko ariko azwiho kugerageza camera z’amatelefone ya iPhone. Abikora buri uko hasohotse nimero nshya yazo.

Ku itariki ya 07 Nzeli 2016, ni bwo iPhone 7 na iPhone 7 Plus zashyizwe ahagaragara, n’uruganda ruzikora rwa Apple.

Nyuma yuko zigiye hanze, gafotozi Austin Mann nabwo ntiyazuyaje. Yahise azifata aza mu Rwanda gufata amafoto azifashishije, agerageza camera zazo. Areba niba koko zafata amafoto abereye ijisho.

Yifashishije izo telefone zombi, yafotoye mu ishyamba rya Nyungwe, Ingagi zo mu birunga, ubwato mu kiyaga cya Kivu n’imirima y’icyayi iri mu Ntara y’Amajyepfo.

Yifashishije camera ya iPhone 7 yafotoye ingagi zo mu Birunga

Uyu gafotozi avuga ko yahisemo kugeragereza camera ya iPhone 7 mu Rwanda kuko ruzwiho kuba ari igihugu cy’imisozi 1000. Ibyo ngo bikaba byaramufashije gufata amafoto mu buryo yifuza, agendeye kuri izo “camera” z’izo telefone.

Tim Cook, umuyobozi w’uruganda rwa Apple, yishimiye ayo mafoto yafatiwe mu Rwanda, ayasangiza abamukurikira ku rubuga rwa Twitter.

Umuyobozi w’uruganda rwa Apple rwakoze iPhone 7 yishimiye ayo mafoto, ayasangiza abamukurikira kuri Twitter

Ayo mafoto yafotoye yose agaragara ku ruguga rwe rwa Interineti, http://austinmann.com ndetse no ku rubuga rwa http://www.nationalgeographic.com.

Yanafotoye ikirunga cya Sabyinyo. Aha ni mu Kinigi muri Musanze

Kugira ngo abashe gufata ayo mafoto mu buryo yifuza, yafashijwe n’abantu batandukanye mu Rwanda barimo ikompanyi y’indege ya Akagera Aviation yamufashije gufotora ari mu kirere.

Andi mafoto yafotowe mu Rwanda hifashishijwe iPhone 7

Austin Mann yafotoye iyi foto mu Kiyaga cya Kivu

Abahanzi n’ibyamamare bahangisjije kwambara amapantaro acikaguritse,“Déchiré”. Aba ni Urban Boys.

Urubyiruko n’ibyamamare bitandukanye mu Rwanda n’ahandi ku isi, ni bo baharaye kwambara ayo mapantaro usanga acitse ku mavi, ku bibero, ku mirundi n’ahandi. Aza mu mabara atandukanye arimo ubururu, umukara n’umweru.

Umuririmbyi w’Umunyarwanda, Christopher, agira ati “Bigezweho kwambara imyenda icitse kandi burya ndi uw’ubu! Utabyumva nyine yaba ari uko atari uw’ubu…ntabwo nzi ahantu byavuye ariko ntabwo bisa nabi! Bisa neza ku buryo nanjye byanteye kwifuza kubyambara.”

Ubusanzwe ayo mapantaro acikaguritse yatangiye kugaragara mu myaka ya 1970. Icyo gihe amakoboyi yambarwaga n’abantu bakora imirimo y’ingufu, mu bihugu nka Leta Zunze Ubumwe z’Amerika.

Nubwo bambara “Déchiré”, abenshi ngo ntibaba bazi inkomoko yazo.

Kubera kuyambara kenshi n’ubukene bwo kubura amafaranga yo kugura ayandi, byatumaga ba nyirayo bakomeza kuyambara kugeza igihe abacikiyeho.

Ibitangazamakuru nka GQ na Vogue byanditse ko muri iyo myaka, muri Amerika, imyambaro yatangaga ubutumwa bitewe n’uyambaye. Ni iyo mpamvu ngo hari abifashishije kwambara amapantaro acitse bagaragaza ibyiyumviro byabo kuri politiki n’iyobokama.

Hagaragaye amatsinda y’abantu cyane cyane ay’urubyiruko yambaraga amakoboyi aciye ku mavi n’ahandi. Ni bo ubwabo ngo bayiciraga, bigumura ku matwara yari ari mu gihugu icyo gihe.

Muri iyo myaka kandi, ngo abaririmbyi b’ibyamamare mu njyana yari igezweho yitwa Rock and Roll na bo batangiye kwambara “Déchiré”.

Beyonce na we akunda kwambara “Déchiré”.

Kubera uburyo ibyo byamamara byari bikunzwe, ngo abakora ibijyanye n’imideli n’imyambarire ni bwo batangiye gukora amapantalo y’amakoboyi acikaguritse kuko babonaga akunzwe.

Uko imyaka yashiraga ni na ko ayo mapantalo yakwirakwiraga henshi. Ibyamamare ndetse n’urubyiruko rutangira kuyagura ku isoko, abenshi mu bayambara bashaka kwigana ibyamamare bakunda.

Amakoboyi ya “Déchiré” yakomeje kwigarurira imitima ya benshi ku buryo ngo nko mu myaka ya 2010, yafashwe nk’ikimenyetso cyo kwambara neza. Maze inganda zikomeza kuyakora, asakara henshi ku isi.

Uyu Dwayne Johnson ni we winjiza menshi ku isi mu bakinnyi ba filime.

Igitangazamakuru Forbes kivuga ko uyu Munyamerika, Dwayne uzwi cyane ku izina rya “The Rock” yinjije miliyoni 64.5$, zibarirwa muri miliyari 50FRW. Yayinjije guhera muri Kamena 2015 kugeza muri Kamena 2016.

Iyi mari ayikesha gukina muri filime zakunzwe nka “Fast & Furious”, “San Andreas”, “Central Intelligence” akinanamo na Kevin Hart, muri filime y’uruhererekane yitwa “Ballers” ndetse n’andi mafaranga yahembwe akina filime zitarasohoka nka “Baywatch” na “Fast 8”.

Mu mwaka wa 2014-2015, yari yaje ku mwanya wa 11 mu bakinnyi ba Filime binjije amafaranga menshi. Yari yinjije miliyoni 31$, zibarirwa muri miliyari 24FRW.

Jackie Chan ku mwanya wa kabiri mu kwinjiza iritubutse muri filime.

Ku mwanya wa kabiri haza Umushinwa, Jackie Chan, winjije miliyoni 61$, zibarirwa muri miliyari 48FRw. Yinjije ayo mafaranga abikesha filime zitandukanye yakinnye zakunzwe mu Bushinwa n’ahandi ku isi.

Ku mwanya wa gatatu haza umukinnyi Matt Damon, winjije miliyoni 55$, zibarirwa muri miliyari 44FRw. Yiynjije abikesha filime yakinnyemo yakunzwe zirimo iyitwa “The Martian” n’iyitwa “Jason Bourne”.

Hakurikiraho Tom Cruise winjije miliyoni 53$, zibarirwa muri miliyari 42FRW. Johnny Depp ni we uza ku mwanya wa gatanu n’imari ingana na miliyoni 48$, zibarirwa muri miliyari 38FRW.

Ku mwanya wa gatandu haza Ben Affleck winjijije miliyoni 43$, zibarirwa muri miliyari 34FRw, agakurikirwa na Vin Diesel winjije miliyoni 35$, zibarirwa muri miliyari 28FRW.

Vin Diesel aza ku mwanya wa karindwi mu binjiza menshi muri filime.

Ku mwanya wa munani haza Shah Rukh Khan, umukinnyi wa filime wo mu Buhinde. Yinjije ziliyoni 33$, zibarirwa muri miliyari 26FRW. Asangiye umwanya na Robert Downey Jr, wo muri Amerika.

Ku mwanya wa 10 haza Akshay Kumar winjije miliyoni 31.5$, zibarirwa muri Miliyari 25FRW, umwanya asangiye na Brad Pitt.

Jennifer Lopez na Casper Smart batandukanye nyuma y’imyaka 5 bakundana.

Lopez ufite imyaka 47 y’amavuko, yakundanye na Casper, ufite imyaka 29 y’amavuko, guhera mu mwaka wa 2011. Muri 2014 bashatse gutandukana ariko ntibabikora.

Igitangazamakuru Dail Mail dukesha iyi nkuru, cyanditse ko bidasubirwaho noneho, aba bombi bamaze gutandukana ku buryo ngo ubu ari inshuti zisanzwe.

Lopez yatangiye gukundana na Casper, wari umubyinnyi we, nyuma y’igihe gito atandukanye n’uwari umugabo we Marc Anthony. Aba bombi bari barashyingiranwe mu mwaka wa 2004. Muri 2008, bibarutse impanga, Max na Emme.

Lopez ni umwe mu byamamare bimaze gutandukana n’abagabo benshi, bamwe muri bo baramaze no gushyingiranwa, babana nk’umugabo n’umugore.

Mu bo bashyingiranwe, amaze gutandukana n’abagabo batatu. Usibye Marc batandukanye muri 2011, mbere ye yari yatandukanye na Cris Judd, umubyinnyi ukomeye wo muri Amerika. Bashyingiranwe muri 2001 batandukana nyuma y’umwaka umwe babanye.

Mu bagabo Jennifer Lopez yakundanye na bo harimo P Diddy.

Umugabo wa mbere Lopez yashyingiranwe na we ni umunya-Cuba witwa Ojani Noa. Bakoze ubukwe mu mwaka wa 1997, batandukana nyuma y’umwaka umwe gusa babanye.

Abandi bagabo Lopez yakundanye na bo ariko batarashyingiranwe ni Sean Combs uzwi cyane ku izina rya P Diddy, umunyemari w’umuraperi wo muri Amerika. Batangiye iby’urukundo mu mwaka wa 1999 nyuma y’umwaka umwe baratandukana.

Hari kandi umukinnyi wa filime wo muri Amerika witwa Ben Affleck. Aba bombi batangiye gukundana mu mwaka wa 2002. Banakinanye muri Filime yitwa Gigli, yasohotse muri 2003.

Muri Nzeli 2003, ni bwo biteguraga gukora ubukwe ariko ntibyashoboka kuko Ben yahise abihagarika ibirori bitaratangira, yiyama itangazamakuru ryabikabirije. Aba bombi batandukanye mu mwaka wa 2004.

Jennifer Lopez akina muri Shades of Blue ari umupolisi.

Uretse gushyira hanze indirimbo nka “Ain’t Your Mama”, kuri ubu Jennifer Lopez ahugiye mu gukina filime y’uruhererekane (TV Series) yitwa “Shades of Blue”, aho aba akina ari umupolisi.

Abamotari bo muri Burera baratakamba kubera kudahabwa "Authorization" kandi barazishyuriye.

Iyo “Authorisation” itangwa n’Ikigo cy’u Rwanda kigenzura imirimo imwe n’imwe ifitiye igihugu akamaro (RURA). Amabwiriza mashya yacyo agena ko abamotari bashaka ibyo byangombwa babinyuza mu makoperative yabo, bakabyakira hamwe.

Abamotari bavuga ko babyubahirije ku buryo ngo hari n’abamaze igihe kigera ku mwaka bishyuye bategereje bagaheba. Harimo ngo n’abishyuye “Authorisation” y’imyaka ibiri igura ibihumbi 25FRW.

Bose bahawe inyemezabwishyu ariko ngo iyo ntiyemerwa na Polisi. Uyerekanye, Polisi ntibura kumuca ibihumbi 10FRW, bicibwa utagira “Athorisation”.

Ibyo ngo bituma bamwe mu bamotari bakora bihishahisha kandi bakagombye gukora mu mucyo bakiteza imbere; nkuko Nduhungirehe Augustin, Perezida wa Koperative y’Abamotari bakorera muri Santere ya Kidaho (COTAMOKIBU), abisobanura.

Agira ati “Baratwandikira! Mbese ubu byatubereye ikibazo! Umuntu yagira ati ‘wenda ngiye kwiteza imbere, ngiye kugura akamoto, yaba nta ‘authorisation’ afite ugasanga nyine byagumye kumubera ikibazo.”

Polisi yo ivuga ko ibyo ikora ari ugukurikiza amategeko kuko utwara abagenzi kuri moto wese agomba kuba afite icyangombwa kibimwemerera.

Mu mategeko yayo, RURA yo ivuga ko koperative y’abamotari itaruzuza abamotari 100 idahabwa “Authorisation”, hagamijwe guca akajagari mu makoperative.

Abamotari bo muri Burera bavuga ko ibyo bibabangamiye kuko nta koperative bafite irimo abamotari 100. Abafite “Authorisation” ngo bisunze andi makoperative yo muri Musanze n’ahandi, yabujuje.

Tariki ya 23 Kanama 2016, ubwo Ubuyobozi bw’Akarere ka Burera, ingabo na Polisi bikorera muri ako karere, bagiranaga ibiganiro n’abatwara abagenzi ku binyabiziga, abamotari bagejeje icyo kibazo ku muyobozi w’ako karere, Uwambajemariya Florence.

Bamusabye ko yabakorera ubuvugizi ku buyobozi bwa RURA bityo ubwo buyobozi bukaba bwagirana inama n’abo bamotari, icyo kibazo kigakemuka.

Uwambajemariya yabemereye kubamutumikira, agira ati “Tugiye kugikurikirana ku buryo bwimbitse…bitarenze ku wa gatanu nimugoroba (tariki 26 Kanama 2016) uzaduhamagare wumve icyo tuzaba twagezeho.”

Zimwe muri moto zafashwe zikoreye ibiyobyabwenge.

Byagarutsweho kuri uyu wa 23 Kanama 2016, ubwo Ubuyobozi bw’Akarere ka Burera bufatanyije n’ingabo na Polisi muri ako karere, bwaganiraga n’abatwara abagenzi kuri moto, ku magare ndetse no mu modoka, babakangurira kurwanya iboyobyabwenge biteza umutekano muke.

Muri ibyo biganiro, hagaragajwe ko moto n’ibindi binyabiziga biza ku isonga mu kwikorera ibiyobyabwenge bituruka muri Uganda, birimo kanyanga n’izindi nzoga ziza mu mashashi, bikajya gucuruzwa hirya no hino mu Rwanda.

Izo moto ngo zitunda ibyo biyobyabwenge zibikuye ku Mupaka wa Cyanika, uhuza u Rwanda na Uganda, zikanyura mu muhanda Cyanika-Musanze. Zigenda cyane cyane mu masaha y’ijoro, zigendera ku muvuduko uri hejuru.

Bamwe mu bamotari bakorera hafi y’umupaka wa Cyanika, bashinjwa kuba ari bo bikorera ibyo biyobyabwenge bakanashinjwa kudatanga amakuru byibitse ngo ababyikorera bafatwe n’abashinzwe umutekano.

Abamotari bakorera muri ako gace bo bavuga ko moto zikunze kwikorera ibiyobyabwenge, zikanyura muri uwo muhanda, ari izikorera mu Mujyi wa Musanze na Rubavu.

Nduhungirehe Augustin, uyoboye abamotari bakorera muri Santere ya Kidaho, avuga ko muri bo na ho harimo abatari inyangamugayo, bishora mu biyobyabwenge.

Abamotari, abanyonzi n’abatwara abagenzi mu modoka muri Burera basabwa gutanga amakuru kugira ngo abatwara ibiyobyabwenge bafatwe.

Cyakora ngo bakora ibishoboka byose bagatanga amakuru ku buryo hari moto zifatwa zikoreye ibiyobyabwenge, nubwo ngo atazi neza umubare w’izimaze gufatwa.

Agira ati “Ntabwo twavuga ngo turafata moto ariko mu buryo bwo kugira ngo duhanahane amakuru tuba twafashe amapuraki, twayababwira (abashinzwe umutekano) rimwe bakayasanga ku iseta aho akorera bakayafata kugira ngo turebe ko biriya bintu byarushaho kugabanuka.”

Umuyobozi w’Akarere ka Burera, Uwambajemariya Florence, asaba abamotari gukomeza gutanga amakuru kugira ngo abatwara ibiyobyabwenge kuri moto, no ku bindi binyabiziga, bacike intege maze babivemo burundu.

Moto ifashwe yikoreye ibiyobyabwenge, nyirayo arafatwa agahanwa hakurikijwe amategeko, kanyanga ikamenwa, moto ikazatezwa cyamunara.

Abitabiriye iri sengesho bamanikaga akaboko basaba Yezu ngo atahe mu mitima yabo abakize.

Icyo gitambo cya Misa cy’isengesho ry’Impuhwe z’Imana, cyatuwe ku wa Gatandatu tariki ya 20 Kanama 2016, muri Paruwasi ya Butete iri mu Murenge wa Cyanika mu Karere ka Burera.

Cyari cyitabiriwe n’abantu babarirwa mu 5000, baturutse hirya no hino mu Ntara y’Amajyaruguru ndetse no muri Uganda. Bari buzuye ku kibuga cya Paruwasi ya Butete, bamwe bicaye, abandi bahagaze, bose bategereje ko Yezu abakiza.

Abo bantu b’ingeri zitandukanye barimo abahungu n’abakobwa, abagabo n’abagore, abana ndetse n’abandi bigaragara ko bakuze cyane, bamwe baharaye abandi bo bazinduka kare, bagenda amasaha arenze abiri n’amaguru bajya muri iyo Misa ikirizwamo abarwayi.

Hano Padiri Ubald yari arimo asengera abarwayi ngo bakire.

Nyuma ya Misa n’isengesho ry’Impuhwe z’Imana ryaranzwe no gusenga, gusabira abarwayi n’abababaye no gushengerera Yezu uri mu isakaramentu ry’Ukarisitiya, Padiri Ubald yatangarije abari aho ko hari abantu bakize indwara zitandukanye zirimo ubumuga butandukanye, kanseri, ubugumba, maze abasaba kujya imbere gutanga ubuhamya.

Yavuze umwe mu barwayi wakize uburemba (ubumuga bwo kutagira ubushake na buke bwo gukora imibonano mpuzabitsina), akaba yari amaze igihe abana n’umugore, abantu bazi ko umugore atabyara, batazi ko ahubwo umugabo ari we ufite ikibazo. Uwo mugabo yumvise ari we wakize maze aza gutanga ubuhamya imbere.

Yagize ati “Kubera ko navugaga ngo umugore wanjye ntabwo abyara! Ariko numvise bavuze, numva ibyishimo biraje mbese ndatigise!” Padiri Ubald yahise amubaza niba ari we wakize uburemba, maze umugabo asubiza agira ati “Ni njyewe!”

Uwitwa Mukundufite Emmanuel, na we yatanze ubuhamya avuga ukuntu yakize imvune yo mu ivi ry’ibumoso, yari yaranze gukira, atabasha guhina ukuguru maze yerekana ko ryakize aragahina.

Padiri Ubald yazengurukije isakaramentu ry’Ukaristiya mu bakristu ngo bakire Yezu mu mitima yabo.

Yagize ati “Nari mfite ukuguru kw’ibumoso kwari kwarananiye ntaho ntari narivuje! Ivi ryari ryaravunitse ryarananiranye none rirakize… (ararizunguza abyerekana).”

Hari n’abandi batandukanye batanze ubuhamya barimo ababyeyi bari barwaye amabere, batabashaga konsa, abandi babohotse imitima bababarira ababagiriye nabi ndetse na bo basaba imbabazi.

Uko Padiri Ubald yasengeye abarwayi bagakira

Ku i saa yine za mu gitindo ni bwo igitambo cya Misa nyirizina cyatangiye. Kirangiye, ni bwo hatangiye Isengesho ry’Impuhwe z’Imana maze Padiri Ubald asaba abari bateraniye aho bose kwicara, bakakira Yezu Kristu mu mitima yabo, bityo akabakiza indwara bafite zitandukanye.

Yababwiye ko hari abakiriye mu gitambo cya Misa ariko ko hari n’abandi bari bukire muri iryo sengesho ry’Impuhwe z’Imana.

Uyu yerekanaga ko yakize amabere. Mbere ngo ntiyabashaka kuyakoraho kubera imisonga yabagamo.

Yagize ati “Dukomeje rero kugira ngo abantu barusheho gukira ari benshi. Ngiye kubafasha gukingura inzugi z’Imitima yacu, abantu bikingiranamo bityo bigatuma Yezu adashobora kutugenderera.”

Akimara kuvuga ibyo, bamwe batangiye gusakuza, bavuza induru, asaba abashinzwe umutekano kubajyana kure kugira ngo batarangaza abandi. Ati “Abashinzwe umutekano babajyane kure, babajyane kure boye kuza kuturangaza! Dore ubwo Shitani ni uko itangiye gukora rero!”

Yakomeje gusaba abari aho gukingura imitima yabo Yezu akayitahamo. Kugira ngo bigerweho yabasabye kwemera, bagashimira ibyo Imana yabahaye byose, bakagira umutima ubabarira ababagiriye nabi bose, na bo ubwabo bagasaba imbabazi abo bagiriye nabi ndetse bakanafata ingamba ko babaye abantu bashya, bagambiriye gukora icyiza.

Yakomeje abasaba kwirukana Shitani mu mitika yabo bakemera Yezu. Kuko ngo Shitani ni yo ituma abantu bagira ibibazo bitandukanye birimo n’indwara.

Abakize batonze umurongo batanga ubuhamya.

Yagize ati “Buri wese avuge ati ‘Shitani ituma nsambana mu izina rya Kristu ndakwirukanye subira mu muriro! Shitani imbohera mu businzi…’, buri wese afite iye, reba iyawe hanyuma na yo uyirukane.”

Bakomeje gusenga, baririmba maze Padri Ubald atangira gusabira buri murwayi wese ngo Yezu amukize. Mu ijwi riranguruye yagize ati “Yezu wowe muganga w’abaganga, wowe uvuga ijambo rimwe gusa icyo ushatse kigahita kiba, kiza abarwayi ba SIDA, kiza za kanseri, kiza za diyabete, kiza imitima, hagurutsa ibimuga, uhumure impumyi Nyagasani Yezu…”

Yakomeje asabira abagore batabyara kubyara, asabira ingo zibanye nabi kugarukamo amahoro ndetse anasabira abana bato batabasha kwisengera.

Yasabye abakize gukomeza gutanga ubuhamya aho batuye

Nyuma y’ibyo, Padiri Ubald yahise afata Isakaramentu ry’Ukaristiya, riri mu cyuma cyabugenewe gikoze nk’umusaraba, arizengurutsa mu bari bateraniye aho bose, ari ko baririmba, banakoma amashyi, maze abantu batangira kugaragaza ko bakize.

Bose bari bategereje kugerwaho n’impuhwe z’Imana.

Ubwo yahise agaruka kuri aritari avuga abakize bose, na bo batanga ubuhamya, maze isengesho ararisoza.

Yasabye ko nyuma yo gutaha, abakize bazajya batanga ubuhamya ubuhamya mu maparuwasi yabo. Abashidikanya na bo yababwiye ko mu minsi iri imbere bazabona ibitangaza.

Yagize ati “Ubu rero Yezu asigaye ahangaha, mu Kiliziya, muri za Kiliziya z’iwanyu aho mwaturutse arimo, igihe muzajya mujya mu misa, mukamuhabwa neza, azajya abakiza, igihe muzajya mumushengerera azajya abakiza. Abandi mushidikanya gatoya hari ibyo muzagenda mubona ejo, mugasanga byakize koko.”

Abari bateraniye aho batashye bagaragaza ibyishimo mu maso, bavuga ko ibibereye aho ari ibitangaza batari basanzwe babona kuko ari ubwa mbere Padri Ubald aturiye igitambo cya Misa mu Karere ka Burera.

Mu gace k’amakoro itaka nk’iri ntiwarihasanga. Iri rirunze aha ni iryo baguze rivuye mu tundi duce.

Ako gace ni agaherereye munsi y’ikirunga cya Muhabura, cyane cyane mu mirenge ya Cyanika, Rugarama na Gahunga. Ubutaka bwaho bugizwe n’amakoro gusa. Ubwo bahingaho nabwo bunegetse hejuru y’amakoro.

Abasore batuye muri ako gace bavuga ko ibyo bibagiraho ingaruka mbi igihe bagiye kubaka inzu yo kuzashakiramo umugore. Itaka ryo kubumba abatafari ya rukarakara bubakisha ngo rituruka mu yindi mirenge.

Kubakisha rukarakara ni byo bihendutse ariko abatuye mu makoro bavuga ko bibahenda kuko kubona itaka ryo kuyabumbamo ari ikibazo.

Hanezerwabake Théogène avuga ko bisaba imodoka ya FUSO kugira ngo iryikorere, irizanire urikene. Bitewe n’intera iri bugende, itaka ryuzuye FUSO rigura ari hagati y’ibihumbi 25FRw na 40Frw.

Hanezerwabake ahamya ko inzu y’amabati nka 20 ishobora kuzura itwaye itaka ryuzuye FUSO nk’eshanu. Muri rusange ngo inzu nk’iyo mu cyaro yuzura itwaye nka Miliyoni 1FRw. Kandi ngo si buri musore wo mu cyaro wayabona.

Agira ati “Nkubu tuba turi ku muhanda turi abanyonzi, buri munsi dukorera 1000Frw. Uri nk’umusore ukagira nk’imyaka 30 ntafashe ku bihumbi 200 (FRw) ubwo kubaka byaturuka he!?”

Ubutaka bwo mu munsi y’ikirunga cya Muhabura bugizwe n’amakoro. Ubwo bahingwaho nabwo bunegetse hejuru y’amakoro.

Mugenzi we witwa Turatsinze Théogène, avuga ko kubura amafaranga yo kugura itaka bituma hari bamwe mu basore badashaka abagore kubera ko ngo n’abakobwa b’iyo ntibakunze kwemera kubana n’abasore batarubaka inzu.

Agira ati “Ariko iyo ushyize akazu kawe hariya (umukobwa) arakubona akavuga ati ‘ari kugerageza ariko utifite nyine nawe uri kubyumva ni za nduru.”

Abasore babashije kubaka inzu bavuga ko babishoboye babitewe no kwizigamira mu bimina, bishyira hamwe mu matsinda yo kubitsa no kugirizanya. Amafaranga bashyize hamwe akaba ariyo bagurizamo ugiye gukora umushinga runaka.

Mbarushimana Aphrodice avuga ko ikimina yari arimo ari cyo cyatumye yubaka inzu y’amabati icyenda, arayuzuza.

Yatangaga 3000FRw buri cyumweru. Iyo nzu yatwaye ibihumbi 300FRw kuko ngo iciriritse. Niho ahera asaba n’abandi basore bashaka kubaka, kwizigamira kugira ngo bazabigereho.

Inzu imwe muri aya ifite agaciko ka Miliyoni 2FRw hatabariwemo imiganda yakozwe n’abaturage.

Abo baturaghe ni abagize imiryango umunani yo mu murenge wa Cyanika, batujwe mu mazu umunani bubakiye ku nkunga y’ubuyobozi bw’Akarere ka Burera n’ikigo cy’u Rwanda gishinzwe guteza imbere imiturire (RHA).

Ni amazu afite ibyumba bitatu n’uruganiriro. Arimo isima kandi asakaje amabati anakingishijwe inzugi z’imbaho. Afite kandi ubwiherero, igikoni n’ikigega gifata amazi. Abayatujwemo bahawe igitanda n’imifariso byo kuryamaho.

Gakecuru Mansiyana, yicaye imbere y’inzu ye. Akenyeye igitenge ndetse anateze igitambaro mu mutwe. Agaragaza ibyishimo avuga ukuntu we n’umuryango we batuye munzu ifite isuku, yubatse neza, mu gihe ngo mbere biberaga mu mukungu, barihebye.

Aya mazu bubakiwe afite igikoni, ubwiherero n’ikigega gifata amazi.

Agira ati “Ntabwo yari yubatse neza, umuntu mbese yaturukaga nk’iriya akareba uko twicaye, akareba uko turyamye. Nta n’icyo kwiyorosa, ari ukwikumbagarira mu mucucu. Abayobozi barahageze babona ndi mu mwobo, umugira neza tubona aratumanuye atugejeje aha.”

Mugenzi we Nyirahabiyaremye Doroteya avuga ko inzu yabanagamo n’umuryango we yababuzaga umutekano. Ariko yishimira ko ubu babahaye inzu bakaba baryama nta kibabuza amahoro.

Ati “Iyo nabagamo yari isumbwa n’ikiraro! Nagera no muri iyo nzu nkanyagirwa! N’utwo mpashye nkatunyagirirwamo! Nkabura icyo kwiyorosa. Ariko aho ngereye hano merewe neza, bampaye n’ubiriri bwo kuryamaho! Nubwo narya duke ariko nkaryama aheza.”

Abatujwe muri aya mazu bishimira ko basigaye baba ahantu heza nyuma yo kuva aho bita "mu mwobo."

Iyi miryango yatujwe muri ayo mazu guhera muri Nyakanga 2016. Abubakiwe ayo mazu ni imiryango itishoboye yabaga mu nzu zishaje, zatumaga barushaho kugira imibereho mibi.

Dusingizimana Albert, ushinzwe imibereho myiza mu Murenge wa Cyanika, avuga ko inzu imwe ifite agaciro ka miliyoni 2FRw, hatabariwemo imiganda yakozwe n’abaturage. Akomeza avuga ko nyuma yo kubatuza muri ayo mazu bakomeza kubafasha kugira ngo bave mu bukene.

Ikindi ngo ni uko muri uwo murenge hari indi miryango ibarirwa muri 20 nayo bateganya kubakira amazu bityo nayo ikava mu mazu ashaje ituyemo.

Umuririmbyi wo mu Majyaruguru, Frank Kay, avuga ko amikoro azitira iterambere ryabo.

Ngo bashyira hanze indirimo zitandukanye ariko ugasanga zitarenga Intara y’Amajyaruguru ngo zisakare mu Rwanda hose bityo na bo bamenyekane.

Iyo uganira n’aba baririmbyi bakubwira ko kutagira amafaranga ndetse no kubura abamenyekanisha indirimbo zabo (promoters) ari byo bituma batarenga umutaru ngo bagere mu Mujyi wa Kigali aho bavuga ko hari amafaranga, aturuka mu biraka byo kuririmba bihaba.

Uwita Frank Kay avuga gukora indirimbo nziza yaba ku majwi, mu mashusho ndetse no kuyimenyekanisha ahantu hatandukanye bishobora gutwara agera muri miliyoni 4FRW.

Akomeza avuga ko atari buri muririmbyi wo mu Ntara y’Amajyaruguru wabona ayo mafaranga. Ibyo ngo bigatuma impano zipfukiranwa.

Avuga ko ariko habonetse abaterankunga ndetse n’abandi bantu bateza imbere impano n’abahanzi, abaririmbyi bo mu Majyaruguru na bo batera imbere.

Agira ati “Ntabwo dufite abantu badutera inkunga bahagije…iyaba habagaho uburyo bwo kutumenyekanisha buhagije, tukagira abantu badutera inkunga, twabona izindi mpano zikomeye, tukarushanwa, umuziki ugashyuha ukanatugaburira.”

Umuririmbyi The Bless, na we wo mu Majyaruguru, avuga ko banahura n’imbogamizi zo kubona uko bamenyekanishi ibihangano byabo.

Mugenzi we witwa The Bless yungamo avuga ko abamenyekanisha indirimbo z’abahanzi mu Ntara y’Amajyaruguru bakiri bake. Muri iyo ntara hari Radio ebyiri gusa. Izo ngo ni zo abaririmbyi bo muri iyo Ntara batazwi umubare, baba batezeho kumenyekana.

Ahamya ko habonetse ubundi buryo bwo kumenyekanisha abaririmbyi bo muri iyo ntara, barushaho gutera imbere, ntibahere ku ivuko gusa.

Mu mwaka wa 2013 mu Ntara y’Amajyaruguru hari hatangijwe ibihembo byitwa REMO Awards, bigamije guteza imbere abahanzi bo muri iyo Ntara no kubashishikariza gukora ibihangano by’umwimerere.

Abaririmbyi bakibibona byarabashimishije cyane bizeye ko nabo babonye ikizatuma bamenyekena mu Rwanda. Ariko kuva icyo gihe kugeza ubu ntibyongeye gutangwa, bituma abahanzi bacika intege.

Uwineza Patrick, wabiteguraga, avuga ko bitongeye gutangwa kubera ko ngo nta mafaranga yo kubitegura afite bitewe n’abaterankunga bari barayamwemereye, bisubiye.

Yamburiwe muri Uganda ataha amaramasa atageze iyo yajyaga.

Uyu mukobwa ufite imyaka 16 y’amavuko, tudatangaje amazina kubera ko ataragira imyaka y’ubukure, ubwo tariki ya 10 Kanama 2016 twamusangaga ku Murenge wa Cyanika muri Burera, aho yari acumbikiwe, yavuze ko yahagejejwe ku mugoroba wo ku itariki ya 09 Kanama 2016, azanwe n’abaturage bamubonye asaba icumbi.

Yicaye ku ntebe, akenyeye igitenge, yifashe mapfubyi, avuga ko yamburiwe muri Uganda ibihumbi 10FRW by’urugendo rwari kumugeza ahatuye ababyeyi be i Masaka. Yari ashyiriye nyina indangamuntu yasize mu Rwanda.

Uyu mukobwa avuga ko hashize imyaka (atazi umubare) ababyeyi be bagiye kuba muri Uganda, we agasigarana na nyirakuru.

Ahamya ko mu gitondo cyo ku itariki ya 09 Kamana 2016, ari bwo yavuye iwabo mu Murenge wa Kivumu, i Rutsiro, atega imodoka imugeza i Musanze, ahava agana ku mupaka wa Cyanika uhuza u Rwanda na Uganda. Akihagera ntiyemerewe kwambuka kuko nta Ndangamuntu afite.

Ntiyahise asubira iwabo ahubwo yanyuze inzira zitazwi ku mupaka, bita panya, abona ageze muri Uganda ahitwa mu Ngagi, hafi y’umupaka. Avuga ko yateze Boda Boda (Moto) imugeza i Kisoro aho yagombaga gutegera imodoka imugeza i Masaka.

Umumotari ngo yamwatse ayo mafaranga ibihumbi icumi ngo ajye kumuvunjishiriza mu mashilingi ya Uganda, ayamuhaye ngo ategereza ko agaruka araheba.

Agira ati “Boda Boda arambwira ngo reka ajye kuvunjisha! Boda Boda iragenda ndayitegereza ndayibura noneho mpita nongera ndambuka…Nararize!”

Akomeza avuga ko yabonye atakomeza urugendo n’amaguru, abitekerereza umupolisi wo muri Uganda ukora ku mupaka, na we amushyikiriza abapolisi bo mu Rwanda, bahita bamugarura.

Ubuyobozi bw’Umurenge wa Cyanika bwamucumbikiye, bwamuhaye amafaranga y’urugendo asubira iwabo.

Dusingizimana Albert, ushinzwe imibereho myiza muri uwo murenge, avuga ko bakunze gucumbikira abantu nk’abo barimo abafatiwe ku mupaka bashaka kwambuka mu buryo butemewe n’amategeko bwacya bakabaha itike bagataha.

Buri Burera ufashwe ahinga amasaka ahagenewe ibindi bihingwa acibwa 10,000FRW.

Mu gitondo cyo ku wa gatatu tariki ya 10 Kanama 2016, abagore batatu babibaga amasaka mu mirima iri mu murenge wa Cyanika, babujijwe gukomeza guhinga kuko ngo bari barimo guhinga amasaka ahagenewe guhingwa ibigori.

Ubwo umunyamakuru wa Kigali Today yageraga ku Biro by’Umurenge wa Cyanika, yahasanze abo bagore bicaye bari konsa abana, bagifite n’uburimiro.

Bamutangarije ko ushinzwe umuhinzi muri uwo murenge ari we wabazanye aho kugira ngo bacibwe amande y’uko barenze ku mategeko. Mbere ngo hari n’abandi bafashwe bacibwa amande 10.000FRw.

Abo bagore bavuga ko kubuzwa guhinga amasaka bakanacibwa amande ari akarengane kuko ngo aho bari barimo kuyabiba bari basanzwe bayahahinga. Bumva ngo nta tegeko bishe kuko n’indi mirima begeranye ahinzemo; nk’uko Nyirabaritonda Florence abivuga.

Agira ati “Jye ni akarengane ndi kubona! None nk’ubu aho narindi kubiba bose bahabibye! Ntabwo ari twebwe gusa twahabibye!”

Aba bagore bakomeza bavuga ko amasaka afite agaciro kurusha ibigori basabwa guhinga. Ahavuye umufuka w’ibiro 100 by’amasaka ngo hashobora kuva nk’ibiro 50 by’ibigori.

Ikindi ngo iyo amasaka yeze, ikiro kimwe kigura 250FRw mu gihe ngo iyo ari ibigori byeze, ikiro kigura 100FRw.

Ubuyobozi bw’Akarere ka Burera buvuga ko muri ako karere hatoranyijwe guhingwa ibirayi, ibigori, ibishyimbo n’ingano. Ibyo ngo bigomba guhingwa ku buso bunini ku ma site atandukanye kuko ngo ni byo bitanga umusaruro, abaturage bakihaza bagasagurira n’amasoko.

Habumuremyi Evariste, Umuyobozi Wungirije w’Akarere ka Burera ushinzwe Iterambere ry’Ubukungu, avuga ko ibindi bihingwa nk’amasaka n’ibijumba, bihingwa ku bundi buso busigaye.

Ufashwe abihinga aho bitagenewe, yaragiriwe inama mbere akinangira, arahagarikwa agacibwa amande 10.000FRW nk’uko byemejwe n’Inama Njyanama y’ako karere.

Agira ati “Ni ibwirizwa rya Njyanama rigomba gushyirwa mu bikorwa…ubundi ntabwo twimiriza imbere amande, amande aza ari bwo buryo bwa nyuma.”

Uwineza Patrick (wo hagati) n’Umutoni Francine, bo muri "REMO Awards" bashyikiriza Guverineri Bosenibamwe Aime igihembo bari bageneye Perezida Kagame muri ibyo birori.

Hashize imyaka itatu ibyo bihembo bidatangwa kandi ubwo byatangwaga ku nshuro ya mbere, muri 2013, haratangajwe ko ari ngarukamwaka.

Ibihembo bya “REMO Awards” icyo gihe byahawe abahanzi bitwaye neza kurusha abandi ndetse n’abandi bafite aho bahuriye n’iterambere rya muzika mu Ntara y’Amajyaruguru. Byari bifite intego yo guteza imbere abahanzi bo muri iyo Ntara.

Nubwo hatanzwe ibikombe gusa nk’ikimenyetso, ababihawe bavuga ko byatumye barushaho kumenyekana, bongera umuhate mu buhanzi bwabo ndetse batangira no gukorera amafaranga mu buryo butari busanzweho.

Byari byitabiriwe n’abantu benshi ubona babikunze.

Gusa ariko, bavuga ko kuba hashize imyaka itatu ibyo bihembo bidatangwa byabaciye integer ku buryo ngo uburyo bari batangiye gushishikarira gukora bwayoyotse.

Umuririmbyi The Bless agira ati “…ndi mu bantu batwaye igikombe! Uko cyaba kiri kose ni igikombe! Ariko iyi saha tuvugana ntabwo bikiba! Kuba bitakiba byanga bikunda byatumye tugira intege nke cyane!”

Umuririmbyi Frank Kay we yungamo ati “Hari ishyaka byaduteraga…ugahora wumva ko uri mu muziki kuko wari uzi neza ko uri gukora akazi kazaguha inyungu. Iyo ukora akazi kadafite inyungu ntabwo ugakora cyane.”

Umuririmbyi "The Bless", umwe mu bahembwe icyo gihe, avuga ko kuba byarahagaze byabaciye intege.

Uwineza Patrick, watangije REMO Awards, avuga ko kuba ibyo bihembo bitagitangwa ari uko amafaranga yo kubitegura yabuze ndetse n’abari baramwemereye kumutera inkunga bakaba barisubiye.

Uwineza avuga ko gutegura itangwa rya REMO Awards ku nshuro ya mbere, byatwaye miliyoni 5FRw. Muri ayo mafaranga yose abaterankunga bari bamwemereye kumuha agera kuri miliyoni 4FRw.

Ayo mafaranga ngo ntayo bamuhaye, biba ngombwa ko aguza binatuma afata umwanzuro wo wo kubihagarika kuko we ubwe nta mafaranga afite.

Agira ati “Twabikoze rimwe dusanga nyine uburyo bwo kubikora kugira ngo bibe bibereye iyo nyito, binajyane n’igikorwa nyir’izina, ubushobozi bukenerwa ntabwo dufite.”

Byari byiswe ibihembo bibimburira ibindi none ni na byo byabaye ibya nyuma.

Ku Iriba rya Buhanga cyangwa ry’Umwami, ahabaye Gihanga Ngomijana.

Batangaje kuri uyu wa 02 Kanama 2016, ubwo ku munsi wa kabiri w’iryo serukiramuco riri kubera mu Rwanda, ryageraga mu Karere ka Musanze, ahari ibintu bitandukanye biranga amateka y’u Rwanda rwo hambere.

Kuri uwo munsi mbere ya saa sita abantu batandukanye bitabiriye FESPAD, batemberejwe ahitwa Buhanga ECO PARK ho mu Murenge wa Nkotsi, ahabaye Umwami mukuru w’u Rwanda, Gihanga Ngomijana. Aho kandi ni na ho abami bose b’u Rwanda banyuraga bagiye kwimikwa.

Beretswe inzira abami banyuragamo mbere yo kwimikwa banerekwa ku “Iriba ry’Umwami” cyangwa irya Buhanga, aho umwami Gihanga yavomye.

Nyuma yo gusura aho hantu abitabiriye FESPAD, barimo Abanyarwanda, abo muri Senegal ndetse n’abo muri Repubulika Iharanira Demokarasi ya Kongo, bakoze umutambagiro (Carnaval) aho bagendaga biyereka mu nzira bagaragaza umuco.

FESPAD ngo ituma barushaho kumenya Umuco Nyarwanda bakamenya n’imico yo mu bindi bihugu by’Afurika.

Abantu batandukanye bitabiriye iryo serukiramico bavuga ko rituma barushaho kumenya byinshi mu biranga umuco w’u Rwanda ndetse n’uw’ibindi bihugu byo muri Afurika, ku buryo barigereranya n’ishuri ry’umuco; nkuko Kamali Jean Bosco wo mu Karere ka Gakenke, abisobanura.

Agira ati “Niba twahuriye hamwe, Abakongomani bakaza, ibihuggu bitandukanye, ni ukuvuga ngo tugaragaza umuco wacu na bo bakagaragaza umuco w’iwabo, tukagira icyo tubakuraho, na bo bakagira icyo badukuraho.”

Akomeza atanga icyifuzo ko ahubwo mu gihe FESPAD ibera mu Rwanda yagera mu turerere twinshi two mu Rwanda kugira ngo n’abandi baturage babone ibyo byiza kandi banarusheho kumenya byinshi mu Mucyo Nyarwanda.

Batemberejwe aho Umwami Gihanga yabaye. Aha ni ku irembo ryaho.

Muri uyu mwaka, FESPAD iri kubera mu turere tune duhagarariye intara ari two Musanze, Kayonza, Rusizi ndetse na Nyanza.

Ni ku nshuro ya cyenda iri kubera mu Rwanda. Iba nyuma y’imyaka ibiri, ikitabirwa n’ibihugu byo muri Afurika u Rwanda ruba rwatumiye. Yashyizweho n’Umuryango w’Afurika Yunze Ubumwe mu 1998 ku busabe bw’u Rwanda.

Abitabiriye FESPAD bari batangiye kwinjira muri Buhanga ECO Park, igaragaza aho umwami Gihanga Ngomijana yatuye.

Aha hantu ndangamateka (ECO PARK) kandi ni na ho abami b’u Rwanda bimikirwaga.

Bahageze, basobanuriwe uko abami bazaga kwimikwa, bakajya mu buvumo bakoga ndetse bakanajya aho batekaga (bicaraga) baganira na Rubanda. Beretswe kandi ku “Iriba ry’Umwami” cyangwa irya Buhanga, aho umwami Gihanga yavomye.

Nyuma yo gusura aho hantu mu gitondo cyo kuri uyu wa Kabiri, saa cyenda z’igicamunsi hatangiye umutambagiro (carnival), abitabiriye FESPAD bagenda biyereka bagaragaza umuco.

Iri serukiramuco ryitabiriwe n’abahanzi baturutse muri Senegal ndetse na Repubulika iharanira Demokrasi ya Congo.

Mbere yo kwima ingoma, ngo umwami yabanzaga kujya muri ubu buvumo akiyuhagira, akabona kwimikwa.

Igiti cy’inyabutatu kiri muri Buhanga Eco Park.

Ku Iriba rya Buhanga cyangwa ry’Umwami, ahabaye Gihanga Ngomijana.

Iki ni ikitabashwa (ibyobyi bahekagamo umwami).

Iyo umwami yamaraga kwimikwa, yahitaga yicara hano avugana na rubanda.

hakurikiyeho umutambagiro. Abo ni abo muri Senegal.

Polisi y’u Rwanda ni yo yacungiye umutekano abari mu mutambagiro.

Uyu mwana afite imyaka 13. Kuva saa mbili za mugitondo kugeza mu ma saa munani ubwo twahuraga yari amaze kwikorera amabuye 40 atagira n’icyo akoza ku munwa.

Babivuga mu gihe amategeko arengera umwana yo avuga ko bitemewe gukoresha imirimo ivunanye umwana utarageza ku myaka 18 y’amavuko.

Hirya no hino mu Karere ka Burera hagaragara abana batandukanye, batarageza kuri iyo myaka, bakoreshwa imirimo ivunanye irimo kwikorera amabuye n’amatafari, ariko ugasanga ababyeyi babo ntacyo bibabwiye kandi ubuyobozi buhora bubakangurira kutavunisha abana.

Ni mu ma saa saba z’amanywa. Umwana w’umuhungu ufite imyaka 13 y’amavuko yikoreye amabuye abiri y’amakoro: rimwe ripima nk’ibiro bitanu. Yabize ibyuya mu maso ndetse arahumeka cyane. Bigaragara ko ananiwe.

Ayo mabuye ari kuyatunda ayavana aho arunze ayajyana ahari kubakwa inzu y’umuturage mu Murenge wa Cyanika. Hari intera ibarirwa muri metero 500. Kuva mu gitondo ngo amaze gutunda amabuye 40.

Uyu mwana, tudatangaje izina rye kubera ko ataragira imyaka y’ubukure, uvuga ko kuva mu gitondo nta kintu arashyira munda, yemeza ko akora ako kazi kugira ngo abone amafaranga yo gufasha ababyeyi be.

Agira ati “Ni ukugira ngo mbone amafaranga, nzaguramo amakaye tugitangira…tuba tugira ngo dushake amafaranga, ntiturushye ababyeyi cyane. Tuba tuvunika ariko ntabwo ari cyane.”

Si uyu mwana wenyine uri kwikorera amabuye kuko hari n’abandi bari gufatanya b’abahungu n’abakobwa, babarirwa muri 20, bahawe ikiraka cyo kuyikorera. Bigaragara ko harimo ndetse n’abari munsi y’imyaka 10 y’amavuko.

Ababyeyi batuye hafi y’aho abo bana bari gutunda amabuye ntacyo bibabwiye, ndetse harimo n’abari gufatanya n’abo bana gutunda amabuye. Abo bana bo bakanemeza ko baje gutunda ayo mabuye ababyeyi babo babizi.

Bamwe mu babyeyi bahamya ko imirimo nk’iyo babona ntacyo itwaye abana kuko ngo ituma batanebwa ahubwo bagakorera amafaranga.

Usanga bamwe nakora imirimo nk’iyi bambaye imyambaro y’ishuri.

Mporera Christophe, umusaza uri mu kigero cy’imyaka 60 y’amavuko, agira ati “Aba bana bari mu kiruhuko. None bari gushakamo agasente, mbese amafaranga.”

Si uyu wenyine ubyumva gutyo nubwo abandi baterura ngo babivuge, hari abahamya ko gukoresha umwana akiri muto ari bwo akura azi kwitabira umurimo.

Imirimo ivunanye ituma abana bata ishuri

Gusa ariko, hari abandi babyeyi bagaragaza ko bacengewe n’uburenganzira bw’umwana, bahamya ko umuntu ukoresha umwana imirimo ivunanye ntaho bitaniye no kuvuga ko atamubyaye kandi yaramubyaye; nk’uko umubyeyi utashatse kwivuga izina, abisobanura.

Agira ati “Nonese umukoreye ibintu bimuvunnye akameneka umutima, akameneka ibitugu! Ese ubwo wavuga ngo uramureze! Niba warabyaye ni ukuvuga ngo rera umwana! Niba ageze mu myaka 15, 20, wa mwana na we azaba ari kumenya ubwenge agire icyo yimarira.”

Amategeko arengera umwana ahamya ko umwana utarageza ku myaka 18 atagomba gukoreshwa imirimo ivunanye kuko ibangamira ubuzima bwe, igatuma adakura neza ndetse ikanamubuza kwiga.

Ikindi ni uko n’itegeko ry’u Rwanda rigenga umurimo ryo mu mwaka wa 1999 rivuga ko abana bari munsi y’imyaka 18 badashobora na rimwe gukoreshwa mu gikorwa cyunguka icyo ari cyo cyose, kereka gusa Leta ibitangiye uruhushya rwihariye.

Hari amategeko ahana abavunisha abana

Abenshi mu bana bata ishuri mu karere ka Burera baba bagiye mu mirimo nk’iyo, yinjiza amafaranga. Bamwe bajya ku mupaka wa Cyanika koza amapine y’amakamyo aba ahaparitse ndetse no kumesera abashoferi bayo abandi bo bakambukiriza forode abacuruzi.

Hari n’aho usanga imirimo nk’iyi bayikorana n’abantu bakuru.

Maniriho Leonard, umwe mu baturage, we avuga ko abana bameze gutyo baba barananiye n’ababyeyi, ku buryo ngo batanakozwa ibyo kwiga. Hitabazwa ubuyobozi ariko bamwe mu bana bakanangira.

Agira ati “Abana b’iki gihe basigaye bananira ababyeyi! Yaba atangiye guteka amandazi (ngo abone amafaranga) wenda mu kiruhuko, wamusubiza ku ishuri ntabikozwe. Noneho abayobozi b’inzego z’ibanze, umubyeyi yajya kubiyambaza, wa mwana baba bari kumukurikirana ngo asubire ku ishuri, akajya yirirwa aho mu Ngagi (muri Uganda)”.

Dusingizimana Albert, ushinzwe Imibereho Myiza mu Murenge wa Cyanika, avuga ko mu nama zitandukanye bakomeza kwigisha ababyeyi n’abana kuko kuvunisha abana muri ako gace ngo byabaye nk’umuco kuva cyera, bibwira ko ari ugutuma bakomera.

Agira ati “Ababyeyi turababwira tuti ‘umwana ntiyakwiye kwikorera amabuye angana atyo…’ buhoro buhoro tuzajya dukomeza kubabwira, turababwira, wenda bazageraho babyumve.”

Mu mategeko arengera umwana mu Rwanda hazamo amurinda gukoreshwa imirimo ivunanye kuburyo uyarenzeho abihanirwa.

Ingingo ya 218 yo mu gitabo cy’amategeko ahana ibyaha mu Rwanda, ivuga ko gukoresha umwana imirimo ivunanye, kumutoteza cyangwa kumujujubya, bihanishwa igifungo kuva ku mezi atandatu, kugeza ku myaka ibiri. Hakiyongeraho ihazabu y’ibihumbi 100FRw kugeza ku bihumbi 300Frw.

Inkoko ngo si izo gutanga amagi n’inyama gusa ngo zanagabanya Malaria ku isi.

Ubwo bushakashatsi bwasohotse mu kinyamakuru cyandika ku ndwara ya Malariya cyitwa Malaria Journal, bugaragaza ko ubwo buryo bukoreshwejwe neza bwatuma abantu bo ku isi babarirwa muri Miliyari 3.2 barokoka ibyago byo kwibasirwa na Malariya.

Abahanga bo muri Kaminuza yo muri Sweden yitwa “Swedish University of Agricultural Sciences” n’abo muri Kaminuza yo muri Ethiopia yitwa Addis Ababa University, nibo bakoze ubwo bushakashatsi.

Mu kubugerageza, hifashishijwe abakorerabushake. Mu cyumba hajyagamo umukorerabushake umwe, ufite imyaka iri hagati ya 27 na 36, akaryama mu nzitiramibu idateyemo umuti, bagashyiraho akuma gafata imibu mu rwego rwo kureba umubare w’imibu iri muri icyo cyumba.

Mu byumba bimwe bashyizemo inkoko ahandi ntibazishyiramo. Abashakashatsi ngo baje kubona imibu micye cyane mu cyumba kirimo inkoko kubera impumuro yayo ituruka mu mababa yayo. Mu gihe ngo abaryamye mu nzitiramibu gusa basanze imibu yuzuyemo.

Dail Mail yanditse iyi nkuru itangaza ko ngo ubu bushakashatsi butanga icyizere cyo kwirukana imibu no kwirinda indwara zikwirakwizwa nayo cyane cyane Malariya.

Abo bashakashatsi bavuga ko mu gihe imibu ihitamo kuruma abantu, ngo yanaruma inka, ihene cyangwa intama mu gihe zihari. Ariko ngo ntiyaruma inkoko kuburyo ngo yanga no kuguruka ahantu ziri.

Imibu ngo ikoresha uburyo bwayo bwo kwihumuriza ikamenya gutandukanya ibyo yaruma n’ibyo itaruma.

Rickard Ignell, ukuriye ubwo bushakashatsi, avuga ko abatuye muri Afurika yo munsi y’Ubutayu bwa Sahara, bazengerejwe na Malaria igihe kirekire. N’imibu nayo kandi ngo iri kugenda irushaho guhangana n’imiti iyica.

Agira ati “Ni yo mpamvu dukeneye gushaka ubundi buryo bwo guhangana nayo. Mu bushakashatsi bwacu twabashije kumenya umwuka n’ahantu hashobora kwirukana imibu itera Malaria bityo tukayibuza kuba yahura n’abantu.”

Aba bahinzi bahinga muri icyo gishanga, giherereye mu murenge wa Nemba, bavuga ko basanzwe bahingamo ibirayi n’ibigori. Iyo kimwe muri ibyo bihingwa bisaruwe ngo bahitaga bahingamo imboga z’amashu.

Abahinga muri iki gishanga cya Ndongozi bavuga ko baretse kugihingamo imboga kuko zeraga zikabura isoko

Ariko ubu ngo si ko bimeze kuko bazihingaga, zigatanga umusaruro mwinshi, bagakuraho izo kurya izindi bakabura isoko bazigurishaho, zikaborera mu murima cyangwa aho bazirunze bashaka abaguzi.

Mbonigaba Phocus, ukuriye imwe mu makoperative ahinga mu gishanga cya Ndongozi, avuga ko zaboraga zikabatera igihombo maze guhera mu mwaka wa 2015, bafata umwanzuro wo kutongera kuzihinga mu gihe isoko ryazo rirambye ritaraboneka.

Akomeza avuga ko iyo babaga bejeje amashu, ishu rimwe ryaguraga amafaranga ari hagati ya 20FRw na 30FRw, mu gace batuyemo. Ariko ubu ishuri rimwe rigura 200FRw.

Agira ati “Ikintu cy’isoko usanga ari cyo kitugora! Ino ahangaha ubu uruboga rw’amashu kurubona biragoye kubera ko twazihingaga nyine zikaborera ku muhanda! Zirabora kandi tuba twarazishoyemo n’ubundi imbaraga noneho bigatuma dusa nkaho twivumbuye kongera kuzihinga.”

Jean de Dieu Nizeyimbabazi, umuyobozi w’ubuhinzi n’umutungo kamere mu karere ka Burera, avuga ko icyo kibazo cy’imboga zibura isoko kigiye gukemuka.

Ahamya ko ubuyobozi bw’Akarere ka Burera bufatanyije n’Ikigo cy’u Rwanda gishinzwe kohereza mu mahanga ibikomoka ku buhinzi mu Rwanda (NAEB) bari gushyiraho gahunda y’uko umuhinzi azajya ahinga imboga ze afite umuguzi azazigurishaho igihe zeze.

Agira ati “Tukaba tuzi ngo dukeneye toni z’imboga izi, iz’imiteja , twabashyira. Ibi bizakemura iki kibazo aho abaturage babihingiraga rimwe, bikabora.”

Ibishanga byo mu Karere ka Burera bihingwamo ibihingwa bitandukanye, bigatanga umusaruro ujya ku masomo atandukanye yo mu Rwanda. Baramutse bahagaritse kubihingamo imboga byumvikana ko zabura ku isoko kandi zikenewe mu buzima bwa muntu.

Abahinzi bitabaje kuhira imyaka yabo kugira ngo bahangane n’amapfa.

Abahinzi batangiye iyo gahunda ni abahinga mu bishanga. Ibishanga byo muri Burera ubu bihinzemo ibirayi. Batangiye kubyuhira muri Nyakanga 2016, biteganyijwe kwera muri Kanama.

Abahinga mu gishanga cya Ndongozi kiri mu Murenge wa Nemba, bavuga ko bahinze ibirayi nk’uko bisanzwe. Ariko ngo batunguwe no kubona izuba ry’impeshyi ritangira kuva kare muri Gicurasi kandi ryajyaga riva muri Kamena.

Mbonigaba Phocus ukuriye imwe mu makoperative ahinga muri icyo gishanga, avuga ko babonye ibirayi bidakura neza, bisunga ubuyobozi kugira ngo bubafashe. Ubuyobozi bwabakoreye ubuvugizi muri Minisiteri y’Ubuhinzi n’Ubworozi (MINAGRI), babaha imashini zivomerera.

Agira ati “Iyo dutunguwe n’ikirere izuba rikava kare, ubwo nyine tugira ikibazo cy’inzara. Kandi aka karere kacu ni kamwe mu turere tugaburira igihugu. Ni ukuvuga ngo iyo dutunguwe n’ikirere, igihugu na cyo kirahahombera.”

Umuhinzi Mbonigaba avuga ko kuhira bizatuma bagira ibihembwe bitatu byo guhinga.

Akomeza avuga ko kuba barabonye imashini zivomerera, batazongera gutungurwa n’imihindagurikire y’ikirere.

Bavuga ko bagiye kongera ibihembwe byo guhinga bibe bitatu kuko ngo no mu gihe cy’izuba bazajya bahinga, mu gihe bari basanzwe bahinga mu bihembwe bibiri gusa kubera kwikanga izuba.

Mbonigaba akomeza avuga ko imashini ebyiri zuhira bahawe zidahagije, agasaba ko bahabwa izindi kugira ngo igishanga cyose kijye cyuhirirwa rimwe aho kugenda bimura izo bafite.

Nizeyimbabazi Jean de Dieu, Umuyobozi w’ishami ry’ubuhinzi n’umutungo kamere mu Karere ka Burera, avuga ko ari yo bagitangira, bakaba baratanze nke mu rwego rwo kureshya abahinzi.

Agira ati “Ni ukugira ngo abaturage babirebereho, nibabona ubwiza bwabyo na bo ubwabo bashoremo imari.”

Batangiye kuhira ibi birayi muri uku kwezi kwa Nyakanga 2016.

Akomeza avuga ko MINAGRI yunganira abahinzi kubona ibyo bikoresho bivomerera. Bivuze ko niba umuhinzi akoze umushinga wo kuhira ufite agaciro ka Miliyoni imwe y’amafaranga y’u Rwanda, atanga ½ cyayo MINAGRI ikamutangira asigaye.

Nizeyimbabazi avuga ko ku ikubirito imashini zuhira 25 bazihaye amakoperative arindwi, ahinga ku buso bungana na Hegitari 1300.

Abageni n’ababaherekeje buzuye umuhanda ibinyabiziga bibura uko bitambuka.

Uwo munyonzi, utuye mu Murenge wa Cyanika, yitwa Mbonyinshuti Jean Bosco. Ku wa kabiri tariki ya 19 Nayakanga 2016, ni bwo yasezeranye imbere y’Imana n’umugore we witwa Murekatete Seraphine.

Ubwo bavaga mu rusengero, nta modoka zigomba kubatwara zari zihari kuko ngo ntazo bari bakeneye.

Bahisemo kugenda n’amaguru umuhanda wose, bashagawe n’abanyonzi bari ku magare atatseho indabo n’ibyatsi, n’abandi bantu bagenda baririmba banabyina, harimo n’abavuza ifirimbi na Vuvuzela.

Banyuze mu muhanda wa kaburimbo Cyanika-Musanze, barawuzura, bawugendamo ahantu hareshya nk’ibilometero bibiri, mbere yuko bagenda mu muhanda w’igitaka ugana ahabera ibirori. Aho banyuraga hose abantu batandukanye basohokaga mu nzu, bakajya kwihera amaso.

Aba bageni bagenze n’amaguru ibilometero bigera muri bitanu.

Imodoka zanyuraga muri uwo muhanda, zibaturutse inyuma, zagabanyaga umuvuduko zikabakurikira, naho izituruka imbere zirababererekera ngo batambuke. Zimwe zikabavugiriza amahoni ngo batange inzira ariko bikaba iby’ubusa.

Gusa ariko, Polisi y’u Rwanda ikorera mu muhanda yahageze, isaba abageni n’ababaherekeje kunyura ku ruhande rw’umuhanda kugira ngo badateza impanuka ndetse banareke imodoka ziganjemo izitwara abagenzi, zitambuke.

Ni umuco umenyerewe i Burera

Mu Karere ka Burera ni umuco umenyerewe ko abageni bagenda n’amaguru baherekejwe n’imbaga y’abantu baririmba banabyina, nk’uko Mbonyinshuti abihamya. Avuga ko we n’umugorw we bahisemo kugenda n’amaguru kugira ngo ibirori byabo birusheho kuryoha.

Agira ati “Nahisemo kugenda n’amaguru kugira ngo ikirori cyanjye kigende neza. Iyo nshaka nari gutega imodoka! Byongera ‘courage’ nyinshi cyane, ‘appetit’ mbese!”

Byabaye ngombwa ko hitabazwa Polisi yo mu muhanda.

Kuva ku rusengero aho basezeraniye, kugera mu rugo rwabo ahabereye ibirori, bagenze ibilometero birenga bitatu.

Nubwo umuco w’abageni bagenda n’abaguru, umenyerewe mu karere ka Burera, iyo uwashyingiwe ari umunyonzi cyangwa umumotari biba bidasanzwe kuko usanga amagare n’moto byatatswe indabo, bizenguruka mu muhanda bivuza amahoni n’inzogera.

Ntibarikure Ascension, umwe mu banyonzi baherekeje Mbonyinshuti, avuga ko iyo umunyonzi yakoresheje ubukwe, bagenzi be bagomba kumushyigikira byimazeyo haba mu kumutera inkunga y’amafaranga ndetse no kumuherekeza kugeza ubukwe burangiye.

Ntibarikure ahamya ko Mbonyinshuti wakoze ubukwe ari muri Koperative yabo, igizwe n’abanyonzi babarirwa muri 50. Buri munyonzi yatanze 500FRW yo kumushyigikira.

Agira ati “Tumutera inkunga tugafata amafaranga, tugashyira mu ibahasha, nk’umuyobozi wacu akavuga ijambo…turamuherekeza tukamugeza mu rusengero, nyine bamara gukora imihango, tukongera tukamuzana mu rugo, tukishimana na we ubukwe bwarangira tugataha.

(Kugenda) N’amaguru ni byo byiza, tugenda twiyereka hano mu muhanda, abantu bose babireba. Nabo bavuge bati ‘uko bakoreye uriya nanjye babinkorere.”

Babikora ngo banagamije guca umuco wo kwishyingira

Abanyaburera batandukanye bemera umuco w’abageni bagenda n’amaguru, bavuga ko uwo muco ari mwiza kuko unarwanya indi mico yo kwishyingira ndetse no gukocora bigaragara ahenshi mu Karere ka Burera.

Uku ni ko abanyonzi bataka amagare yabo ngo batere ingabo mu bitugu mugenzi wabo uba yabaye umugabo.

Hanyurwimfura Felicien, umwe muri abo baturage, avuga ko umuntu wasezeranye imbere y’amategeko ndetse n’imbere y’Imana bagomba kumushyigikira, bakamuririmbira bakanamubyinira.

Agira ati “Buriya hasezerana bake muri twe! Ni yo mpamvu twe twishimye kugira ngo n’abarimo na bo tubashishikarize gusezerana…benshi barakocora (kwishyingira), bikarangira, ntagire anasezeranaho na rimwe.”

Umukobwa witwa Uwera Francine, na we ahamya ko uwo muco wo guherekeza abageni, bagenda n’amaguru, babaririmbira ari mwiza kuko ngo ubatera ishyaka nk’abakobwa, na bo bagaharanira kuzakorerwa ibyo birori ku manywa aho kugenda nijoro bishyingiye.

Agira ati “Nkatwe nk’abakobwa nyine twakabiharaniye, tukagira ishyaka ryo kwiteza imbere natwe tukagera kuri ibyo byiza, bakadushyingira ku manywa nyine ntitugende nijoro.”

Nubwo uwo muco ugikorwa mu Karere ka Burera, ntubuza ko hakigaragara abishyingira. Haboneka bamwe mu bakobwa bishyingira bataranageza ku myaka 21 y’amavuko. Akenshi ngo babikora kubera ko ngo mu cyaro umukobwa ugize imyaka 20 baba bumva yashaje.

Hari n’abandi bishyingira babitewe n’ubukene, bumva ko ngo nibashaka umugabo bazikenura, abandi bo ngo bakishyingira kubera amakimbirane mu miryango yabo.

Uwo muhanda uri gukorwa ni uwa Base-Kirambo-Butaro-Cyanika ureshya n’ibirometo 64. Usanzwe ari uw’ibitaka. Muri iki gihe iyo uwunyuzemo ubona hari impunduka kubera ko urimo ibimashini bitengagura imisozi, biwagura kugira ngo uzashyirwemo kaburimbo.

Uyu muhanda uri gukorwa ni Perezida Kagame wawemereye Abanyaburera

Perezida Kagame yebemereye uwo muhanda mu ntangiriro z’umwaka wa 2010, ubwo yafunguraga ibitaro bya Butaro maze umuturage akamugezaho icyifuzo cyuko bagezwaho umuhanda wa kaburimbo.

Uwo muhanda uzuzura utwaye Miliyari 71Frw, uzafasha abantu batandukanye cyane cyane abarwaye kanseri bajya kwivuriza mu Bitaro bya Butaro. Ubusanzwe bajyayo, bakagenda mu modoka zibateragura hejuru kubera umuhanda w’ibitaka, bikaba byabaviramo kurushaho kuremba.

Abanyaburera batandukanye bavuga ko uwo muhanda uzatuma barushaho gutera imbere. Kuko uzaborohereza ingendo bityo bakore ubucuruzi biboroheye.

Maniriho Emmanuel avuga ko ubusanzwe umuhanda w’ibitaka ubadindiza kuko bazinduka bagiye nko kurangura, bakabura imodoka zibatwara. Banazibona, zikabagezayo zatinze kuburyo ngo hari igihe barara nzira. Iyo kaburimbo niboneka ibyo ngo ntibizongera kubaho.

Mahoro Evode we ahamya ko iyo kaburimbo izatuma barushaho gusilimuka. Agira ati “Kaburimbo ndabona ije twabaho nk’abasilimu kurushaho hari igihe turwara za ‘grippe (kubera umukungugu).”

Nubwo uwo muhanda uri gukorwa, watangiriye ku gice kimwe gusa cya Butaro-Base. Guverineri w’Intara y’Amajyaruguru, Bisenibamwe Aimé, nawe avuga ko ubwo yasuraga uwo muhanda, tariki 13 Nyakanga 2016, yasanze koko ibikorwa byo kuwukora bigenda gahoro, kubera ngo ibikoresho bike.

Avuga ko ariko abawukora bamwijeje ko bitarenze ukwezi kwa Nzeli 2016 bongera ibikoresho, umuhanda ugatangira gukorwa no ku gice cya Kidaho-Butaro.

Agira ati “Batubwiye ko imashini zimwe na zimwe ziri mu nzira bitarenze ukwezi kwa cyenda, nkuko babitwemereye, izo mashini zose zizaba zaje ku buryo kubaka uwo muhanda noneho bizahera ku mpande zombi.”

Umuhanda Base-Kirambo-Butaro-Kidaho wagombaga gutangira gukorwa muri 2012 ariko ntibyashobotse kuko ngo hari hagikorwa inyigigo yawo.

Urebeye hejuru ni uko igishushanyo mbonera kigaragaza uko izaba imeze.

Iyi kaminuza izaba yitwa University of Global Health Equity (UGHE), irimo kubakwa mu Murenge wa Butaro ku musozi uteganye n’Ibitaro bya Butaro bizwiho kuzura kanseri.

Ubuyobozi bw’iyo kaminuza buvuga ko ibikorwa byo gusiza ikibanza bizamara amezi ane ubundi bagatangira kubaka. Mu myaka ibiri ngo inyubako zose zizaba zuzuye ubundi iyo kaminuza itangire kwakira abanyeshuri.

Ni kaminuza izaba iri ku rwego mpuzamahanga kuko izatanga ubumenyi buhanitse mu by’ubuvuzi bw’abantu bikazatuma ireme ry’ubuvuzi rirusaho kuzamuka haba muri Afurika ndetse no ku isi muri rusange.

Iyi kaminuza irubakwa ku bufatanye bwa Leta y’u Rwanda, Kaminuza ikomeye yo muri Amerika yitwa Harvard ndetse n’umushinga wo muri Amerika witwa Partners In Health: Inshuti Mu Buzima.

Izubakwa mu byiciro kuko hakenewe Hegitari 100 z’ubutaka zigomba kubakwaho ibikorwa byose by’iyo kaminuza ariko ntibarazibona zose.

Mu cyiciro cya mbere habanje kuboneka Hegitari 35. Kuri izo Hegitari ziri gusizwa ni ho hazaba hari icyizaro cy’ishuri, amashuri, amacumbi n’izindi nyubako. Abari bahatuye bose babarirwa mu miryango 99 bahawe ingurane,barimuka. Ubutaka n’ibindi bikorwa by’abo baturage byari bihari byishyuwe Miliyari 1.300Frw.

Batangiye gusiza ikibanza.

Icyiciro cya kabiri kigizwe n’ubutaka buzubakwaho izindi nyubako, nabwo bungana na Hegitari 35, buzashakwa mu mwaka wa 2016-2017. Abahatuye nabo bazimurwa, bahabwe ingurane ingana na Miliyari 1.500Frw. Hegitari 30 zizaba zisigaye nazo zizashakwa nyuma.

Iyi kaminuza mpuzamahanga y’ubuvuzi izuzura itwaye Miliyoni 150$, abarirwa muri Miliyari zirenga 100Frw.

Kaminuza ngo yatangiye kubazanira ubukire

Abaturage bo mu Karere ka Burera cyane cyane abo mu Murenge wa Butaro bahamya ko, usibye kuba iyo kaminuza igiye gutuma abana babo babona aho bigira hafi, ngo izabazanira n’ubukire kuko izabagurira umusaruro w’imyaka itandukanye beza.

Uku ni ko izaba isa imbere.

Bamwe mu baturage bimuwe bo bavuga ko batangiye kubona inyungu zayo. Mahoro Evode, uri mu kigero cy’imyaka 25, avuga ko ubutaka yahawe n’ababyeyi be, bamuhaye ingurane yabwo, yimukira ahandi.

Amafaranga y’ingurane yahawe, adashaka kuvuga umubare wayo, avuga ko yatumye abasha kubaka inzu ifite agaciro ka Miliyoni 3.5Frw. Yaguzemo inka y’inzungu ifite agaciro k’ibihumbi 300Frw ndetse anagura imirima itandatu. Ibyo byose ngo ntiyari kubigeraho vuba iyo atimurwa.

Agira ati “Iyi kaminuza batuzaniye n’ingurane twahawe, jye byaranshimishije kandi byaranyunguye 100%...nta byiza biruta ibyongibyo jye ndabishima. Ahubwo kaminuza yarakoze iraza.”

Nubwo ariko hari abaturage bimuwe bavuga ko batangiye kubona ibyiza by’iyo kaminuza, ngo hari n’abandi bahawe ingurane z’amafaranga, babona ari menshi, batangira kuyakoresha ibitabyara inyungu nko kuyanywera gusa.

Budigiri Lazare, umwe mu baturage, ahamya ko ibyo byatewe n’imyumvire yabo iri hasi itaratumye bamenya gukora igenamigambi hakiri kare ngo bategure imishinga bazayashoramo.

Aka gosozi kose kazajyaho inyubako z’iyo kaminuza.

Budigiri aha niho ahera asaba ubuyobozi kuba hafi abaturage kugira ngo amafaranga azahabwa abazimurwa ahandi, atazabapfira ubusa nkuko byagenze kuri bamwe bimuwe mbere.

Agira ati “Inama nziza ni zo dushaka z’abayobozi. Ntacyo twakwikorera ubwacu bwite! Inama nyinshi buri igihe…kugira ngo (amafaranga) atazadupfira ubusa. Ntabwo twese duhuje gahunda. Ntabwo duhuje imico!”

Hafashwe ingamba kugira abaturage batazatindahara

Umuyobozi w’akarere ka Burera, Uwambajemariya Florence, avuga ko bafashe ingamba nyuma yo kubona ko hari bamwe mu baturage bimuwe bagapfusha ubusa amafaranga y’ingurane bahawe.

Uwambajemairiya akomeza avuga ko abazimurwa mu kindi cyiciro bazabanza kwerekwa aho batura kandi bafashwe kubyaza umusaruro amafaranga bahawe, bibumbira mu makoperative: biryo bakore imishinga ibyara inyungu, izabafasha kugira iterambere rirambye.

Ikindi ngo ni uko abimuwe bari mu ba mbere bazajya bahabwa akazi mu bikorwa byo kubaka iyo kaminuza.

Ubuyobozi bw’Intara y’Amajyaruguru nabwo bwaje gufasha Akarere ka Burera kugira ngo abaturage bimuwe ndetse n’abazimurwa aho iyo kaminuza izubakwa, bazarusheho kugira iterambere aho kugwa mu bukene kuberayo.

Ubwo tariki ya 13 Nyakanga 2016, Guverineri w’Intara y’Amajyaruguru, Bisenibamwe Aimé, yasuraga abaturage bo mu murenge wa Butaro, yasabye ubuyobozi bw’akarere ka Burera kwegera abaturage, babereka ibyiza by’iyo kaminuza n’uburyo bagomba kuyibyaza umusaruro.

Uku ni ko izaba isa imbere.

Guverineri Bosenibamwe ariko asaba by’umwihariko abaturage bimuwe ndetse n’abazimurwa, gutekereza bugari, bagakora imishinga itandukanye irimo kubaka amacumbi kuko ubusanzwe ntayahari.

Agira ati “Twabasabye ko batekereza kubaka amacumbi aciriritse, acumbikirwamo abakozi bazajya bakora muri kaminuza ndetse n’abakora ku bitaro (bya Butaro) n’abandi bose bagenda i Butaro. Twabasabye ko bashyiraho amaduka aciriritse….kugira amafaranga yose azaze ashyira mu bikorwa imishinga bateganyije.”

Twahirwa Anaclet, umwe mu baturage bimuwe, avuga ko inama bagenda bahabwa n’abayozi bazazikurikiza kugira ngo batazagwa mu bukene.

Agira ati “Twamaze kwitegura, twabonye ubutaka, tubona n’aho kubaka. Turashaka noneho kugira ngo twubake ahandi ho kubyaza umusaruro, tuvuge nko mu bucuruzi.”

Iyo kaminuza y’ubuvuzi iri kubakwa ahantu h’icyaro. Umuhanda uhagera ni ibitaka gusa kuburyo kuhagera bigoye. Ariko kuri ubu hatangiye ibikorwa byo gushyira kaburimbo muri uwo muhanda.

Dr Turata ahamya ko imibare y’urubyiruko rukoresha ibiyobyabwenge irushaho kwiyongera.

Dr Turate Innocent, Umuyobozi Mukuru ushinzwe Kurwanya no Gukumira icyorezo cya SIDA n’izindi ndwara zirimo n’izo mu mutwe, muri RBC, avuga ko iyo mibare yagaragajwe mu bushakashatsi bwakozwe mu mwaka wa 2012.

Tariki ya 14 Nyakanga 2016, ubwo Dr Turate yari yitabiriye umuhango wo kurwanya ibiyobyabwenge wabereye mu Karere ka Burera, yavuze ko urubyiruko runywa ibiyobyabwenge rurushaho kwiyongera banagendeye ku mibare itangwa n’ibigo byo mu Rwanda bivura abasabitswe n’ibiyobyabwenge.

Muri 2009, Ibitaro bya Ndera byakiriye abasabitswe n’ibiyobyabwenge 440. Ariko muri 2015 byakiriye 1400. Ubwo muri 2015, ikigo kivura abasabitswe n’ibiyobyabwenge cy’i Huye cyatangiraga gukora, cyakiriye abarwayi 56. Ariko muri 2016 kimaze kwakira abarenga 200.

Akomeza avuga ko iyo bakoze isesengura basanga igituma urubyiruko rurushaho kwishora mu biyobyabwenge, ari ababyeyi bamwe badohotse ku guha uburere abana babo. Akaba ari yo mpamvu basabwa kugaruka mu murongo bagafatanya n’ubuyobozi kurinda ejo hazaza h’u Rwanda.

Agira ati “Tugomba gushyira imbaraga nyinshi mu burere duha abana bacu. Kugira ngo umuntu ahinduke ni urugendo rurerure rusaba yuko abanza kumenya ko ibyo bintu bibaho, ubundi akamenya yuko bimureba nyuma noneho agatangira gutekereza ingamba yafata kugira ngo akumire kunywa ibiyobyabwenge.”

Kwangiriza ibiyobyabwenge mu ruhame ni mu bumwe mu buryo bwo kubirwanya ngo bicike.

Urubyiruko rutandukanye ruhamya ko hari bagenzi barwo banywa ibiyobyabwenge babitewe ahanini n’ababyeyi babo babicuruza. Ariko ngo rugerageza kubirwanya rutunga agatoki ahari ababicuruza, bagatabwa muri yombi.

Polisi y’u Rwanda ivuga ko uko urubyiruko rurushaho kwishora mu biyobyabwenge ari na ko ibyaha birushaho kwiyongera kuko ngo 80% y’ibyaha byose biboneka mu Rwanda biterwa n’ibiyobyabwenge.

Muri ibyo byaha harimo gukubita no gukomeretsa, gufata ku ngufu ndetse n’ihohotera iryo ri ryo ryose.

Nk’uko igitangazamakuru Forbes kibigaragaza, ku turonde ngarukamwaka rw’ibyamamare 100 byinjije amafaranga menshi muri uwo mwaka, Beyonce na Jay Z bombi hamwe binjije imari ingana n’Amadolari y’Amerika Miliyoni 107.5, abarirwa muri Miliyari 83FRw.

Beyonce na Jay Z ni byo byamamare bikundana byinjije amafaranga menshi

Beyonce wenyine yinjije Amadolari angana na Miliyoni 54, abarirwa muri Miliyari 42FRw, bituma aza ku mwanya wa 34 kuri urwo rutonde rusange. Naho Jay Z yinjije Amadolari angana na Miliyoni 53.5, abarirwa muri Miliyari 41FRw. Kuri urwo rutonde aza ku mwanya wa 36.

Iyi mari yose bayikuye cyane cyane mu muziki biturutse ku muzingo (Album) w’indirimbo za Beyonce, witwa “Lemonade” wagurishijwe cyane ndetse n’ibitaramo, yakoze hirya no hino ku isi, byitwa “Formation World Tour”.

Andi mafaranga bayakuye mu bucuruzi bw’ibinyobwa bya Jay Z byitwa “Armand de Brignac” na D’Ussé ndetse no mu ikompanyi ikora ibijyanye n’imyidagaduro yitwa Roc Nation.

Muri 2014-2015 ibyamamare bikundana byari byaje ku isonga mu kwinjiza amafaranga menshi ni Taylor Swift na Calvin Harris. Ariko ubu baratandukanye.

Muri rusange, urutonde rw’ibyamamare 100 byinjije amafaranga menshi rwasohotse tariki ya 11 Nyakanga 2016, rugaragaza ko Taylor Swift ari we uza ku isonga. Yinjije Amadolari angana na Miliyoni 170, abarirwa muri Miliyari 132FRw.

Ayo mafaranga yose yayakuye mu bintu bitandukanye birimo cyane cyane ibitaramo yakoze hirya no hino ku isi byitwa “1989 World Tour”.

Muri rusange Taylor Swift ni we uza ku isonga mu kwinjiza amafaranga menshi

Ku mwanya wa kabiri hari itsinda ry’Abaririmbyi ryo mu Bwongereza ryitwa “One Direction”. Ryinjije Amadolari angana na Miliyoni 110, abarirwa muri miliyari 85FRw.

Ibindi byamare biri kuri urwo rutonde harimo umunyarwenya Kevin Hart uri ku mwanya wa gatandatu. Yinjije Amadolari Miliyoni 87.5, abarirwa muri Miliyari 68FRw.

Hazaho kandi umuririmbyi Rihanna uri ku mwanya wa 13 n’Amadolari Miliyoni 75, abarirwa muri Miliyari 58FRw.

Imodoka zikoresha umuhanda Cyanika-Musanze zikatira ibinogo biwurimo zikanyura ku ruhande.

Uwo muhanda ni umwe mu mihanda ikoreshwa cyane mu Rwanda, kuko unyurwamo n’ibinyabiziga bitandukanye birimo amakamyo yikoreye ibicuruzwa, aturuka ku cyambu cya Mombasa n’ahandi ajya hirya no hino mu Rwanda, muri Kongo n’i Burundi.

Uwo muhanda wa kaburimbo bigaragara ko ukuze cyane, kuko ibice byinshi biwugize byacitsemo ibinogo kuburyo iyo imvura iguye birekamo amazi.

Ibinyabiziga bitandukanye bihanyura byigengesereye kugira ngo bitangirika cyangwa se bikaba byakora impanuka. Binyura ku ruhande bikatira ibyo binogo, kuburyo ababirimo nabo bagenda badatekanye kubera ko bigenda bibateragura hejuru.

Ibice byinshi bigize umuhanda Cyanika-Musanze byacitsemo ibinogo bagashyiramo ibitaka ngo hapfe kuba nayabagendwa.

Ibyo binogo ngo ni byo nyirabayaza w’impanuka zitandukanye zikunze kuba mu muhanda Cyanika-Musanze kuko ibinyabiziga birabikatira, bikajya mu mukono utari uwabyo, bikagongana n’ibindi.

Niyibizi Jean Claude, utwara abagenzi ku igare, avuga ko nta kwezi gushize ikamyo igonze umunyonzi kubera gukatira ibinogo agahita ahura na yo.

Agira ati “Hari umuhungu bagonze nawe ahita apfa, muri iyi minsi yashize, kubera gutakira igisimu (ikinogo) gutyo.”

No mu mpera za 2013, muri santere yitwa “Ku Rukiko”, iri mu murenge wa Rugarama, ikamyo ya FUSO ipakiye umunyu, yakatiye ibinogo ihita igonga “Taxi Twegerane” yari iperitse ku ruhande maze zose zigwa munsi y’umuhanda, umuntu umwe ahasiga ubuzima abandi umunani barakomereka.

Umuhanda Musanze-Cyanika ukoreshwa n’ibinyabiziga bitandukanye birimo n’amakamyo yikoreye ibicuruzwa.

Uyu muhanda ni muto mu bugari

Abakoresha umuhanda Cyanika-Musanze, ureshya n’ibilometero 25, bavuga ko usibye kuba waracitsemo ibinogo, ari na muto mu bugari. Nta hagenewe kugenda abanyamaguru hahari ndetse nta n’ahagenewe guparika imodoka hahari.

Ibyo bituma imodoka, cyane cyane izitwara abagenzi, ziparika aho zibonye zifata abagenzi. Ibyo ngo bibangamira abashoferi kubera ko ngo iyo Polisi ibabonye ibandikira ibaziza guparika nabi; nkuko umushoferi wa Twegerane witwa Nzabarinda Pierre, abisobanura.

Ati “Twebwe ikintu twasaba ubuyobozi…ni uko wenda nibura bwagerageza bukadushakira ahantu twajya duhagarara, nibura imodoka ikabona aho yihengeka. Kuko biratubangamira iyo dushaka abagenzi, umugenzi nawe aguhagarikira ahatemewe.”

Ibice byinshi bigize umuhanda Cyanika-Musanze byacitsemo ibinogo bagashyiramo ibitaka ngo hapfe kuba nayabagendwa.

Ikindi ni uko abanyamaguru nabo ugasanga bagendera mu muhanda rwagati, ahagenewe ibinyabiziga, rimwe na rimwe bikabagonga, bakahasiga ubuzima cyangwa bagakomereka.

Abakoresha uwo muhanda basaba ko wakorwa bundi bushya, ukagurwa, bityo bakajya bawunyuramo batekanye. Ibyo ngo byanatuma impanuka za hato na hato zigabanuka.

Niyibizi agira ati “Urabona umuhanda warapfuye, ntabwo bashyiramo ingufu kugira ngo bawukore, twakwifuza ko bawukora ibisimu bikavamo, umuhanda bagasa n’abawagura, tukagira uko tubona uko tujya dukatira imodoka.”

Si ubwa mbere abakoresha umuhanda Musanze-Cyanika basabye ko wakorwa. Ubuyobozi bukababwira ko hari gahunda yo kuwukora ariko bagategereza bagaheba.

Mu ntangiriro za 2014 nibwo abawukoresha batangiraga kugira icyizere ko noneho ugiye gukorwa. Bagize icyizere nyuma yo kubona abantu bari kuwukorera inyigo, bawushyiraho imbago ndetse banagaragaza aho wagiye wangirika.

Umuhanda Cyanika-Musanze washyizweho imbag0. Amazu atari muri metero 20 yashyizweho ibimenyetso kuburyo nutangira kubakwa ba nyirayo bazimuka.

Icyo gihe Ikigo cy’u Rwanda gishinzwe iterambere ry’ubwikorezi (RTDA) cyatangaje ko iyo nyigo nirangira, uwo muhanda uzahita utangira gukorwa bitarenze uwo mwaka.

Ariko mu mpera za 2014, RTDA yatangaje ko utagikozwe kubera ko ngo umuterankunga ari we Banki Nyafurika itsura Amajyambere (AfDB) wagombaga gutanga amafaranga yo kuwusana yabihagaritse. Bahise ngo bashakisha undi.

Inyigo yo gukora uwo muhanda yo yarakomeje. Yarangiranye n’ukwezi kwa Kamena 2016. Kugeza ubu abawukoresha barakibaza igihe uzakorerwa.

Haracyashakishwa amafaranga yo kuwukora

Guverineri w’Intara y’Amajyaruguru, Bosenibamwe Aimé, mu kiganiro yagiranye n’abanyamakuru mu cyumweru gishize, yavuze ko uwo muhanda uzakorwa hagendewe ku nyigo y’umuhanda muremure witwa Cyanika-Musanze-Vunga-Ngororero, ufite ibilometero 79.

Bivuze uko uwo muhanda uzakorerwa rimwe aho gukora igice cya Cyanika-Musanze gusa. Akomeza avuga ariko Leta y’u Rwanda igishakisha amafaranga yo kuwukora.

Ati “Guverinoma y’u Rwanda irimo irashakisha amafaranga. Ntabwo batanga igihe amafaranga azabonekera kuko baracyavugana. Ariko ni umuhanda ugomba gukorwa byihutirwa. Dushonje duhishiwe twese, umuhanda uzakorwa.”

Akomeza avuga ko ibyo byanemejwe mu nama y’umushyikirano yo mu 2015. Ariko ngo mbere yuko ukorwa wose, hari gahunda yo gusana aho wagiye wangirika. Ibyo ngo bizakorwa bidatinze hifashishijwe sosiyete y’ubwubatsi yitwa NPD-COTRACO.

Umuhanda Cyanika-Musanze unyura mu turere twa Burera na Musanze. Uhuza u Rwanda na Uganda, unyuze ku mupaka wa Cyanika.

Uwo muhanda Cyanika-Musanze-Vunga-Ngororero, nukorwa, uzaba ufite metero indwi z’ubugari, unafite ahagenda abanyamaguru. Biteganyijwe ko uzuzura utwaye abarirwa muri miliyari 60Frw.

Iyi ni yo hotel ya mbere yubatswe ku Kiyaga cya Burera.

Iyi iherereye ahitwa mu Gitare, mu Murenge wa Kagogo, ku nkombe z’Ikiyaga cya Burera. Iyo ugeze aho yubatse ubona inyubako zayo zaruzuye ndetse no hanze mu busitari hakoze neza.

Habumuremyi Evariste, Umuyobozi Wungirije w’Akarere ka Burera ushinzwe Ubukungu, atangaza ko iyo Hoteli yuzuye. Hasigaye gushyiramo ibikoresho igatangira gukora.

Agira ati “Yaruzuye! Igice cya mbere cyari icyo kuyubaka ikuzura, ubwo igikurikiraho ni ugushyiramo ibikoresho, muri iyi ngengo y’imari (2016-2017), ni byo tugiye gukurikizaho.” Gusa ariko ntavuga igihe ibyo bikoresho bizashyirirwamo igatangira gukora.

Ubusanzwe akarere ntigakora ibijyanye n’ubucuruzi, Ubuyobozi bw’Akarere ka Burera buhamya ko bazayegurira abikorera, bakayishoramo imari, bakaba ari bo bayikoreramo.

Burera Beach Resort Hotel ifite n’icyuma cyiza kizajya cyakira inama zitandukanye.

Akarere ka Burera ngo kayubatse kugira ngo gatinyure abandi bikorera bahafite ibibanza bityo na bo batangire kubyubaka.

Abikorera bo muri ako karere bahamya ko biteguye gukorera muri “Burera Beach Resort Hotel” kuko ngo batangiye no gukusanya amafaranga; nk’uko Nizeyimana Evariste, uhagarariye abikorera bo mu kaKrere ka Burera, abisobanura.

Agira ati “Abikorera turashaka kuyegukana, akarere tukagakodesha cyangwa se tugatanga imigabane, Hoteli tukayegukana ikaba iyacu nk’abikorera ba Burera. Amafaranga ari muri twe nta handi!”

Abaturage bo mu karere ka Burera bavuga ko iyo Hoteli izabakura mu bukene. Bahamya ko ubwo yubakwaga yabahaye akazi bakikenura.

Yubatse ku nkengero z’ikiyaga cya Burera neza.

Hagumimana Cyprien, umwe muri abo baturage, avuga ko usibye kubaha akazi, bizeye ko izajya ibagurira, ku giciro cyiza, umusaruro w’imyaka itandukanye beza irimo ibirayi, ibishyimbo, n’ibitoki ubusanzwe bagurishaga bahenzwe.

“Burera Beach Resort Hotel” izuzura neza itwaye abarirwa muri miliyoni 500Frw. Yubatswe kugira ngo ijye yakira abakerarugendo basura ibyiza nyaburanga biri mu Karere ka Burera

Abanyabushongo barizezwa ko 2016 uzasiga bimuriwe muri aya mazu.

Ikirwa cya Bushongo kiri mu Kiyaga cya Burera rwagati, mu Murenge wa Rugarama, mu Karere ka Burera. Gituwe n’imiryango 76.

Kuri icyo kirwa ntihari ivuriro, umuyoboro w’amazi meza, amashanyarazi, isoko, n’amashuri, uretse abanza, na yo y’ibyumba bitatu gusa. Ibyo abagituye bakenera buri munsi babikura hakurya y’ikiyaga, bakoresheje ubwato bw’ingashya.

Ubuyobozi bw’Akarere ka Burera bufatanyije n’Ikigo cy’u Rwanda gishinzwe kurengera ibidukikije (REMA), bafashe umwanzuro wo kwimurira abo baturage hakurya y’ikiyaga aho bazegerezwa ibikorwa remezo kuko ngo kubigeza kuri Bushongo bigoye. Kubimura byari biteganyijwe ko bizatwara abarirwa muri miliyoni 500FRW.

Muri 2014, ni bwo babwiye Abanyabushongo ko bagiye kububakira amazu 76 hakurya y’ikiyaga, bazimurirwamo. Batangiye kuyubaka muri Nzeli 2015, bababwira ko ngo mu mezi atandatu gusa azaba yuzuye, bakimukiramo.

Buri muryango ufite igice cy’inzu gifite ibyumba bitatu n’uruganiriro, igikoni n’ubwiherero.

Abanyabushongo bahamya ko bakibibabwira, babyishimiye. Ariko kuri ubu bavuga ko amezi atandatu babwiwe yageze, akanarenga, bagategereza kwimurwa bagaheba. Amazu bazimurirwamo ntaruzura.

Mpariyimana Vincent, umwe muri abo baturage, avuga ko batinze kubimura bagakomeza kwibera mu bibazo bari basanganwe kandi bari bizeye ko bagiye kubivamo.

Ngo nk’abanyeshuri biga mu mashuri y’uburezi bw’ibanze bw’imyaka 12 (12YBE), bajya kwiga bambutse ikiyaga buri munsi, bakoresheje igihe kigera ku isaha bari mu kiyaga. Na bwo babanje gutegereza ubwato, hakaba igihe babubura.

Mu rwego rwo kwirinda ibyo byose bamwe ngo bahitamo gucumbika hakurya y’ikiyaga. Agira ati “Twumva baradutindiye! Nkanjye mfite abana biga, (umwe) aracumbitse ariko turi hano (twarimutse) ntabwo yacumbika! N’isoko riri kure.”

Imiryango 76 ituye kuri iki Kirwa cya Bushongo yijejwe kwimurwa ariko igihe cyararenze.

Uwambajemariya Florence, Umuyobozi w’Akarere ka Burera, yizeza Abanyabushongo ko uyu mwaka wa 2016 uzasiga baramaze kwimurwa. Hari ibyo ngo bagitunganya kuri ayo mazu byatumye batinda.

Agira ati “Ni imirimo ya nyuma iri kurangira, nirangira tuzahita tubimura. Hari gukorwa ibijyanye na ‘Biogaz’ n’ubwiherero.”

Buri muryango ngo uzahabwa inka ebyiri za kijyambere. Ubundi Ikirwa cya Bushongo, bagishakire umushoramari, uzakibagurira.

Ubuyobozi bw’Akarere ka Burera buhamya ko mu mezi atandatu intore z’abanyeshuri barangije ayisumbuye, zimaze ku rugerero, zagize uruhare rukomeye mu gutuma abanyeshuri benshi, bo mu mirenge itandukanye, basubira ku ntebe y’ishuri.

Intore z’abarangije amashuri yisumbuye zafashije benshi gusubira mu ishuri

Urugero rwo hafi ni urw’umurenge wa Cyanika. Uwo murenge uturiye umupaka uhuza u Rwanda na Uganda. Abenshi mu bana bata ishuri birirwa kuri uwo mupaka ndetse no mu dusantere dutandukanye bakorera amafaranga, ntibabe bagikozwa ibyo kwiga.

Ariko kubera intore z’abanyeshuri barangije ayisumbuye, byatumye abari barataye ishuri babarirwa muri 550 bo mu mashuri abanza ndetse na 13 bo mu mashuri yisumbuye basubira kwiga.

Izo ntore zivuga ko icya mbere zakoze kugira ngo abo banyeshuri bose basubire ku ishuri ari ukujya mu ngo z’abaturage zirimo abana bataye ishuri, bakaganiriza ababyeyi n’abana babereka ibyiza byo kwiga.

Kuba Bapfakurera yarize akarangiza ayisumbuye afite umugore n’abana byabaye ubuhamya busuza benshi mu ishuri.

Ngo bitanzeho n’ingero berekana ko muri iki gihe kwiga, bakajijuka, bakamenya kuvuga indimi bizabafasha mu mirimo itandukanye bazakora hirya no hino.

Bapfakurera Jean Leonard ufite imyaka 37 y’amavuko, ufite umugore n’abana batanu, avuga ko hari benshi yafashije gusubira mu ishuri, nyuma yo kubabwira uko yize akuze, kandi atunze n’umuryango. Yize ibijyanye n’ubumenyamuntu (HEG).

Agira ati “Ni bo banampaye ubuhamya ko kubona umuntu ungana nanjye najya kwiga bituma na bo basubira mu ishuri. Harimo nk’umuturage wari warataye ishuri yiga muri segonderi ariko ubungubu ageze mu mwaka wa gatandatu, ari njyewe umwigishije ibyiza byo kwiga.”

Izo ntore zikomeza zivuga ko mu rugo bageragamo bagasanga ababyeyi ari bo batumye umwana wabo ava mu ishuri, babibwiraga ubuyobozi bugakurikirana ababyeyi, bukabahwiturira gusubiza umwana wabo ku ishuri.

Bamwe mu Badepite bo muri EALA babwiye Abanyaburera ko kwambukana abana badafite ibyangombwa bidakwiriye.

Ibi byatangajwe tariki ya 20 Kamena 2016, ubwo abadepite bahagarariye u Rwanda mu Nteko Inshinga Amategeko y’Umuryango wa Afurika y’Iburasirazuba (EALA) baganiraga n’abaturage bo mu Karere ka Burera baturiye umupaka wa Cyanika, uhuza u Rwanda na Uganda.

Muri ibyo biganiro, abagore bagaragaje ko bafite ikibazo cyo kutemererwa kwambuka uwo mupaka bahetse abana b’impinja cyangwa n’abandi bana batarageza ku myaka 16 yemewe, yo gufata indangamuntu.

Basabwa kwaka ibyangombwa by’abo bana ariko ngo kubibona biragora kuko bibafata iminsi yo kunyura mu nzego z’ubuyobozi zitandukanye, bigatuma gahunda bari bafite muri Uganda zipfa.

Ayingeneye Frida, umwe muri abo bagore, yavuze ko abantu baturiye umupaka basabwa kwambuka kenshi bajya muri Uganda kuko bafiteyo inshuti n’abavandimwe kandi bakaba banajyayo gukora imirimo itandukanye ibinjiriza amafaranga, asaba ko bakoroherezwa kuko gusiga abana na byo bibahangayikisha.

Depite Bazivamo Christophe yaganiraga n’Abanyaburera basabaga ubuvugizi ku bijyanye no kwambutsa umupaka abana bakiri bato.

Agira ati “Mwatworohereza rero wenda umwana niba yambukanye na nyina, wenda umuntu agasiga yanditse akavuga ko amugarura ariko bikatworohera.”

Depite Nyirahabineza Valerie, umwe mu bahagarariye u Rwanda muri EALA, yabwiye Abanyaburera ko nta buvugizi bakorera ibyo korohereza ababyeyi kwambuka umupaka bafite abana nta byangomba byabo bafite.

Yakomeje avuga ko kwambutsa umupaka abana biramutse byorohejwe, byatiza umurindi icuruzwa ry’abantu kandi ubuyobozi bugomba kurirwanya byimazeyo.

Yagize ati “Ushobora kugira gutya ukamuheka ari uwawe cyangwa se ukamufata ukamwiba ahantu ukamujyana atari uwawe, umugemuye, ugiye kumugurisha. Ni ngombwa ko ugira ibyo byangombwa bigaragaza ngo uyu mwana agiye he? Bizwi nande? Uburenganzira wabukuye hehe? [Ni] Mu rwego rwo gukumira icuruzwa ry’abantu.”

Depite Nyirahabineza Valerie yavuze ko kwambutsa abana umupaka byorohejwe, byatiza umurindi icuruzwa ry’abantu.

Kugira ngo umwana utarageza igihe cyo gufata ibyangombwa yemererwe kwambuka umupaka, bisaba kuba afite icyangombwa cy’ababyeyi be bombi kigaragaraza ko ari uwabo kandi bigaca no mu nzego za Leta, nko muri Minisiteri y’Ubutabera, kugira ngo zibyemeze.

Abaturage bareba aho urwo ruhinja rwari rwatawe.

Uwo mwana w’umuhungu yabonetse mu bishyimbo bihinze munsi y’urugo rw’umuturage, utuye hafi ya Santere ya Nyagahinga. Uwahamutaye yari yamurengejeho ibitaka ariko ibice bimwe by’umubiri we bigaragara hejuru.

Ruhanika Gaspard, umuturage wabonye urwo ruhinja bwa mbere, avuga ko mu ma saa kumi n’ebyiri za mu gitondo, kuri uyu wa gatanu tariki ya 16 Kamena 2016, yabonye amaraso mu nzira, agira ngo ni umuntu bahiciye.

Akiyabona yahiye afatanya n’abandi baturage batuye aho, bashakisha mu bishyimbo bihahinze ngo bareba uwo muntu baba bahiciye. Ngo baje kugwa kuri urwo ruhinja rwapfuye. Ayo maraso ngo yari ay’uwaruhabyariye.

Agira ati “Tuba tubonye utuguru n’agatwe, n’akaboko ubwo duhita duhamagara ubuyobozi bw’inzego z’ibanze.”

Ubwo twakoraga iyi nkuru uwabyaye uwo mwana akahamuta yari ataraboneka. Gusa ariko ubuyobozi bw’Umurenge wa Cyanika, bufatanyije n’inzego z’umutekano, bahise bakoresha inama abaturage babasaba ubufatanye mu gushaka uwamutaye.

Ababyeyi bari bumiwe bishwe n’agahinda.

Abaturage banditse ku dupapuro abo bakeka. Abo bagaragaje bose bahita bajyanwa kwa muganga gupimwa ngo hamenyekane uwaba yabyaye urwo ruhinja cyakora na byo ntibyagira icyo bigeraho kuko muri abo basanzemo bane batwite n’abandi nta kibazo bafite.

Ubuyobozi bw’umurenge ariko bwavuze ko hari umukobwa wari uherutse kujya kuburegera ko hari umusore wamuteye inda akamwanga, buvuga ko bugiye gukurikirana ngo burebe niba ari we waba yakuyemo inda.

Abaturage bo mu Kagari ka Nyagahinga bari baje kureba aho uwo mwana yatawe, wabonaga bijimye mu maso, abandi bifashe mapfubyi bigaragara ko bahungabanye. Bibazaga umuntu waba wakoze ibyo kuko ngo mu gace batuyemo ntibyari bimenyerewe.

Umugore wari uhetse umwana utashatse gutangaza izina rye yagize ati “ (uwakoze ibi) Nyine ni umurozi!..Imana ikamuha nk’uyu, akamubyara, akaza kumutabika mu bishingiriro by’umuntu kandi ingumba iri kuririra hariya, utarasama n’inda ngo ivemo!”

Uwataye urwo ruhinja namenyekana azafatwa ashyikirizwe inzego zibishinzwe ahanwe hakurikijwe amategeko.

Ubwato bwa Birwa I bufite ubushobozi bwo gutwara abantu 40 icyarimwe.

Abatuye kuri icyo kirwa, kiri mu kiyaga cya Burera, mu Murenge wa Kinoni, batangaza ibi mu gihe hashize umwaka n’igice RDF ibahaye ubwato bwa moteri kugira ngo bujye bubafasha mu ngendo zabo mu kiyaga. Mbere bakoreshaga ubwato bw’ingashya.

Ku nkombe z’ikiyaga cya Burera, ni saa moya za mu gitondo, ku wa Kabiri, tariki ya 14 Kamena 2016. Ubwato busizeho irangi ry’icyatsi, umuhondo n’ubururu bunasakaye, bugeze ku mwaro aho bwambukiriza abantu.

Abo buzanye biganjemo abanyeshuri bagiye kwiga mu mashuri yisumbuye ari hakurya y’icyo kiyaga. Ku kirwa cya Birwa I hari amashuri abanza gusa.

Hahirwusenga Xavier, wiga mu mwaka wa gatatu, ari mu ba mbere bavuye mu bwato. Aravuga ko kuva aho baboneye ubwo bwato bwa moteri asigaye yiga neza agatsinda.

Agira ati “Mbere twarakererwaga tukagera ku ishuri amasomo yatangiye, bikaba ngombwa ko dusiba rimwe na rimwe ariko ubu dusigaye tugera ku ishuri mbere y’igihe.” Ati “Mbere nabonaga nk’amanota 45% ariko ubu nsigaye ngira nka 86%.”

Ubwo bwato bufasha n’abanyeshuri bo mu mashuri yisumbuye biga hakurya y’ikirwa.

Akomeza avuga ko bagikoresha ubwato bw’ingashya, bahuraga n’ingorane bikabadindiza mu myigire yabo. Usibye kuba butarihutaga, ngo hari n’igihe mu kiyaga hazagamo umuyaga mwinshi, ubwato barimo bukarohama bagakizwa no koga ariko amakaye bigiramo akangirika.

Yungamo avuga ko hari n’igihe babaga bagiye kwiga bagaruka bagiye gutaha, bagasanga mu kiyaga harimo umuyaga mwinshi bakabura ubwato bukabiriraho.

Agira ati “Rimwe na rimwe tukava hano nijoro twagera mu rugo tukabura igihe cyo gusubira mu masomo, none ubu dusigaye tugera mu rugo mbere y’amasaha, noneho tugasubiramo amasomo bitatugoye.”

Musabyimana Divine, wiga mu mwaka wa kabiri, avuga ko mbere batarahabwa ubwo bwato bwa moteri, abanyeshuri b’abakobwa bari barahagorewe. Akenshi ngo ni bo basibaga cyangwa bakava mu ishuri kubera kubura ubwato bubatwara.

Mu gitondo cya kare ubwato bwa Birwa I butwara abanyeshuri bajya kwiga.

Agira ati “Nk’abakobwa ntabwo twari tuzi gushaka inzira ngo dushake ubwato bwo kugendamo. Abahungu ni bo bakundaga kubona ubwato bakajya ku ishuri ubwato bukabatwara, abakobwa akenshi tugasiba, ariko ubungubu dufite isaha duhagurukiraho, tukagera ku ishuri ku gihe.”

Abarimu n’abaforomo basigaye bakora akazi uko bikwiye

Si abanyeshuri gusa ubwato bwa Birwa I bufasha. Hari n’abarimu batuye hakurya y’ikiyaga bajya kwigisha ku mashuri abanza ari kuri icyo kirwa.

Ntibazirikana Jean Felix, umuyobozi w’ikigo cy’amashuri abanza cya Birwa I, avuga ko ubwo bwato bwa moteri butuma bagera ku kigo byihuse, amasomo agatangirira ku gihe, mu gihe ngo mbere batindaga mu kiyaga amasomo agatangira igihe cyagenwe kirenzeho nk’isaha.

Ku kirwa cya Birwa I hari Ivuriro rito (Poste de Santé). Abahatuye ni ho babanza kwivuriza mbere yo kujyanwa ku kigo nderabuzima, kiri hakurya y’ikiyaga.

Kalisa Anastase, umwe mu baforomo bavura kuri iryo vuriro, avuga ko ubwato bwa moteri bubafasha cyane mu gihe babonye umurwayi urembye.

Agira ati “Iyo arembye twifashisha abakuriye ubu bwato noneho ubwato bukadufasha kugira ngo umurwayi agree ku kigo nderabuzima kare.”

Mbere bakoreshaga ubwato bw’ingashya.

Mbere hagikoreshwa ubwato bw’ingashya, ngo umurwayi yararembaga bagatinda mu nzira, bakagera ku kigo nderabuzima yarembye cyane. Ababyeyi bagiye kubyara ngo ni bo bahazahariraga cyane ku buryo ngo hari igihe banabyariraga mu nzira.

Abatuye hakurya y’ikiyaga na bo bahamya ko ubwo bwato bwatumye ikirwa cya Birwa I kiba nyabagendwa. Mbere ngo hari abatinyaga kujyayo, batinya kugenda mu bwato bw’ingashya.

Hakizuwera Leonard ukora akazi ko gusiga amarangi mu mashuri ari kuri icyo kirwa, avuga ko yabashije kujya gukora ako kazi kubera ko hari ubwo bwato. Iyo butahaba ngo yari kukareka.

Agira ati “Ubu ndakora nta mpungenge! Ariko mbere twarahatinyaga! Kuko nubwo habaga hari akazi, umuntu yatinyaga kujyayo. Ubu rwose turi guhahirayo tugakora, tugataha n’abo mu rugo bagasigara umutima uri hamwe.

Bashimira Ingabo z’u Rwanda

Muri rusange, abatuye ku kirwa cya Birwa I bashimira Ingabo z’u Rwanda zabahaye ubwato bwa moteri kuko bubakemurira ibibazo bitandukanye bahuraga na byo. Bubarinda impanuka za hato na hato zaterwaga n’umuyaga bita Shegesha, wibasira cyane ubwato bw’ingashya.

RDF ni yo yahaye ubu bwato abaturage ba Birwa I.

Ikindi ngo ni uko kujya guhaha, guhinga ndetse no gutabarana bitakibagora kuko babikora bwangu kubera ubwo bwato bwaborohereje ingendo. Bavuga ko ubwo bwato bwabakuye mu bwigunge.

Umugaba Mukuru w’ingabo z’u Rwanda, Gen Patrick Nyamvumba, ni we washyikirije abaturage bo kuri Birwa I ubwo bwato, mu ntangiriro z’Ukuboza 2014. Yavuze ko ikibazo abo baturage bari bafite, bakimenye babisomye mu kinyamakuru cyo mu Rwanda, The New Times.

Ubwato bwa Birwa I bwuzuye butwaye amafaranga y’u Rwanda miliyoni eshatu n’ibihumbi 950. Bufite ubushobozi bwo gutwara abantu 40 icyarimwe.

Abaturage bamaze kubuhabwa, bose bahise batangiza Koperative yitwa “Ndi Umunyarwanda”. Kugeza ubu ni yo ibucunga. Iyo bugize ikibazo, ni yo ibukoresha bukongera bugakora.

Musabyimana Divine avuga ko batarabona ubwato bwa moteri, abanyeshuri b’abakobwa bahoraga basiba.

Tuyisenge Jean Berchmans, Umuyobozi wa Koperative "Ndi Umunyarwanda" icunga ubwo bwato, avuga ko ababyeyi bafite abana bajya kwiga hakurya y’ikiyaga ndetse n’abandi baturage bo kuri Birwa I, batanga 1000Frw ku kwezi kugira ngo haboneke lisansi ijya muri ubwo bwato.

Bunakorera amafaranga

Tuyisenge akomeza avuga ko kuva ku wa Mbere kugeza ku wa Gatanu, butwara abanyeshuri, mu gitondo bagiye kwiga na nimugoroba batashye. Bugatwara kandi abarimu, abaforomo, abayobozi bagiye gusura abaturage ndetse n’abandi baturage bagiye muri gahunda za Leta zitandukanye.

Avuga ko bukorera n’amafaranga hirya no hino mu kiyaga. Agira ati “Hari umunsi umwe ku wa Gatatu tubujyana muri ‘business’ bukajya gushaka amafaranga ku isoko riba ryaremye rya Rugarama.”

Akomeza avuga ko ayo mafaranga bakorera, bakuramo amwe akiyongera ku yo abaturage batanga kuko hari igihe aba make, bamwe bayabuze. Ayo mafaranga yose babona bayashyira kuri konti iri muri SACCO.

Kuva batangira kubukoresha bumaze gutwara ibihumbi 466Frw ya Lisansi n’ay’ibyangombwa bibwemerera gukorera mu kiyaga cya Burera, angana n’ibihumbi 277Frw.

Perezida wa Koperative "Ndi Umunyarwanda" icunga ubwo bwato avuga ko bateganya gukoresha ubundi bwato buzajya bubinjiriza amafaranga.

Tuyisenge avuga ko bamaze kwizigamira ibihumbi 200Frw. Ngo barateganya gukoresha ubundi bwato bushya bubinjiriza amafaranga gusa, bityo barusheho gutera imbere.

Ikirwa cya Birwa I ni kimwe mu birwa bitatu biri mu kiyaga cya Burera. Gituwe n’abaturage babarirwa muri 423, bari mu miryango 74. Icyo kirwa cyatangiye guturwa mu mwaka wa 1764. Uwagituyeho bwa mbere yitwa Bucocori abahatuye ubu ngo ni abamukomokaho.

Ababibonye biba bavuga ko kuri uyu wa 06 Kamena 2916, mu ma saa kumi n’ebyiri za mu gitondo, imbogo eshatu zavuye muri Pariki y’Ibirunga mu gice kiri ku kirunga cya Muhabura, zirwana zijya mu baturage bo mu Murenge wa Rugarama, ebyiri zisubirayo, imwe irahaguma.

Iyo mbogo ikimara gukomeretsa umuturage no bwo bahise bayica.

Yahise ngo yirara mu baturage iteza umutekano muke, isingira umuturage witwa Manirakiza Fidèle, imutera ihembe, iramujugunya arakomereka, bahita bamujyana mu Kigo Nderabuzima cya Rugarama, nyuma bamujyana ku Bitaro bya Ruhengeri.

Nyirakamanzi Marie Chantal, Umunyamabanga Nshingwabikorwa w’Umurenge wa Rugarama by’agateganyo, avuga ko kuri ubu uwo wakomeretse nta kibazo kindi afite.

Agira ati “(Imbogo) Yikoreye umuntu ku mahembe iramujugunya, yakomeretse mu rushyi rw’akaboko, niho yamuteye ihambe. Nta kibazo afite…ni ihembe yamukubise ku rushyi rw’akaboko, kubera yanamujugunye yari yakomeretse inyuma mu ijosi, ubwo ni ibyo bagiye gutunganya.”

Iyo mbogo imaze gukomeretsa umuturage, abaturage ngo bahise bayitangatanga barayica, birwanaho.

Ibyo bikimara kuba ubuyobozi bw’umurenge n’ubw’Ikigo cy’u Rwanda gishinzwe Iterambere (RDB) bwahise buhagera, buhumuriza abaturage.

Umuturage yakomerekeje.

Abaturage basabwe ko mu gihe babonye inyamaswa yavuye muri Pariki bazajya bavuza amadebe n’amajerekani kugira ngo igire ubwoba isubire muri Pariki aho kuyica. Abakozi ba RDB bahise batwara iyo mbogo yishwe n’abaturage.

Si ubwa mbere imbogo iva muri Pariki y’Ibirunga igakomeretsa umuturage. Muri Kamena 2013, na bwo imbogo yavuye muri Pariki ijya mu baturage bo mu Murenge wa Cyanika, batangira kuyikomera, isingira umwe, imuterera mu kirere, arakomeraka bikomeye.

Mu rwego rwo gukumira inyamaswa ziva muri Pariki y’Ibirunga zijya mu baturage, ubuyobozi bw’iyo Pariki bwashyizeho urukuta rw’amabuye inyuma yarwo banahacukura umusingi.

Izo ziza mu baturage ngo ni iziba zarusimbutse. Gusa ariko ngo iyo zangirije abaturage, hakurikizwa itegeko, hakishyurwa ibyangijwe.

Uyu ni Nkanika Jean Marie Vianney, Umunyamabanga Nshingwabikorwa w’umurenge wa Ruhunde, bivugwa ko yahagaritswe ku kazi.

Amakuru dufite aravuga ko abo banyamabanga nshingwabikorwa ari Munyarubibi Jean Pierre wayoboraga Umurenge wa Nemba na Nkanika Jean Marie Vianney wayoboraga Umurenge wa Ruhunde.

Ku wa Kabiri, tariki ya 31 Gicurasi 2016, ni bwo hatangiye kumenyekana amakuru y’ihagarikwa ku kazi ry’aba bayobozi bombi. Mu byo bashinjwa ngo harimo n’uburiganya muri gahunda ya Girinka.

Hari amakuru avuga ko Nkanika akiyobora Umurenge wa Cyanika, (mbere y’uko yimurirwa mu Murenge wa Ruhunde), hari inka za Girinka yiyanditseho akazigira ize kandi zari zigenewe abaturage.

Kuri Munyarubibi we, ngo hari inka za za Girinka yagiye agurisha ubwo yari akiyobora Umurenge wa Gatebe (mbere y’uko yimurirwa mu Murenge wa Nemba) akavuga ko kwari ukugira ngo haboneke amafaranga yo gushyira mu kigega Agaciro Development Fund.

Aya makuru aravuga ko hari n’abandi bantu batandukanye bo mu Karere ka Burera bakigenzurwa, bagaragaweho imikorere mibi muri gahunda ya Girinka Munyarwanda.

Twagerageje kuvugana n’ubuyobozi bw’Akarere ka Burera, guhera ku muyobozi w’akarere n’abamwungirije bombi ariko inshuro zose twagerageje, ntibyadukundiye.

Mu Karere ka Burera, hamaze iminsi hakorwa igenzura ryimbitse muri gahunda ya Girinka, harebwa niba ishyirwa mu bikorwa uko bikwiye.

Inyigo yakozwe n’Ikigo cy’u Rwanda gishinzwe Iterambere ry’Ubwikorezi (RTDA) igaragaza ko iyo gasutamo izwi nka “One Stop Border Post”, izaba igizwe n’inyubako ikoreramo serivisi zitandukanye zo ku mupaka, amacumbi y’abakora ku mupaka na “Parking” y’amakamyo n’ibindi binyabiziga.

Kuri uyu mupaka wa Cyanika niho hagiye kubakwa Gasutamo ihuriwe n’u Rwanda na Uganda.

Kuri ubu, haracyakorwa inyigo harebwa uburyo iyo gasutamo yakubakwa. Gusa ngo n’ayo mafaranga agomba kuyubaka ntaraboneka yose.

Kuri uyu wa Gatatu, tariki 25 Gicurasi 2016, ubwo mu Karere ka Burera haberaga inama yo kureba aho kubaka iyo gasutamo bigeze, hafashwe umwanzuro ko igomba kubakwa bidatinze hifashishijwe miliyoni 750Frw zabaye zibonetse Akarere ka Burera gafite, andi akazaza nyuma.

Bosenibamwe Aimé, Guverineri w’Intara y’Amajyaruguru, wari uyoboye iyo nama, avuga ko mu kwezi kwa Nyakanga 2016 imirimo yo kubaka “One Stop Border Post” ya Cyanika, ishobora gutangira.

Inzu ya gasutamo isanzwe ku mupaka wa Cyanika irashaje kandi ni nto.

Agira ati “Ni yo mpamvu twemeje ko mu mpera z’ukwezi kwa gatandatu (Kamena 2016) byose bizakorwa ku buryo mu by’ukuri, imirimo (yo kubaka) ishobora gutangira mu kwezi kwa karindwi (2016).”

Iyo mirimo ngo ishobora gutangirana n’ivugururwa ry’amazu ya gasutamo asanzwe ku mupaka wa Cyanika, bigaragara ko ari mato kandi ashaje.

Nubwo ariko inyubako za “One Stop Border Post” ku mupaka wa Cyanika zitarubakwa, imikorere y’iyo gahunda yo yatangiye gushyirwa mu bikorwa.

Iyo gahunda itarajyaho abakoresha uwo mupaka bahagararaga kabiri, ku ruhande rw’u Rwanda ndetse n’urwa Uganda, berekana ibyangombwa. Aho igiriyeho, bahagarara rimwe gusa kuko abakozi ba gasutamo b’ibihugu byombi bakorera mu nzu imwe.

Munyankusi Jean Damascene uhagarariye abikorera mu Ntara y’Amajyaruguru, avuga ko iyo gahunda izateza imbere ubucuruzi, nyuma y’aho bayisabiye muri 2013.

Ati “Mu gihe wari kumara ahantu amasaha abiri, ukahamara iminota itanu cyangwa 10 urumva ko ubwabyo birihutisha bya bicuruzwa umaze kurangura, ubigejeje ku isoko, ugasanga umukiliya agihari.”

Uru rubyiruko rutangaza ibi mu gihe ubushakashatsi, bwakozwe na Komisiyo y’u Rwanda yo Kurwanya Jenoside, bugaragaza ko kuri ubu ingengabitekerezo ya Jenoside yiganje cyane mu rubyiruko ndetse no kuri zimwe mu mbuga zigaragara kuri interineti.

Urubyiruko rwo mu karere ka Burera ubwo rwari ruri mu rugendo rwo kwibuka urubyiruko rwazize Jenoside yakorewe Abatutsi.

Ntawashidikanya ko mu Rwanda urubyiruko ari rwo rukoresha kenshi interineti, rwifashishije telefone zigendanwa zigezweho cyangwa se rujya mu nzu zicuruza interineti zizwi nka “Cyber Café”.

Iyo rukoresha iyo interineri, rusoma amakuru ku mbuga zitandukanye cyane cyane ku mbuga nkoranyambaga nka Facebook na Twitter.

Urubyiruko rutandukanye ruhamya ko kuri izo mbuga ariho rusoma amwe mu makuru y’ibinyoma yandikwa ku Rwanda, yiganjemo ingengabitekerezo ya Jenoside.

Niyo mpamvu urubyiruko rwo mu karere ka Burera rwiyemeje gukoresha interineti rujya kuri izo mbuga, runyomoza bene ayo makuru, rugaragaza ukuri; nkuko Habumuremyi Telesphore, umwe muri urwo rubyiruko, abisobanura.

Depite Semasaka asaba urubyiruko guharanira gukora icyiza.

Avuga ko we iyo gahunda yari yarayitangiye ariko ngo azakomeza gufatanya n’urundi rubyiruko mu kurwanya ingengabitekerezo ya Jenoside binyuze kuri interneti.

Agira ati “Ni uko nkoresha nyomoza mvuga ngo: twebwe turi Abanyarwanda kuko iturufu y’ubwoko yarashaje…ubu urubyiruko ruriho kurangamira kwiga kubaho neza.”

Ubwo ku itariki ya 21 Gicurasi 2016, mu karere ka Burera bibukaga ku nshuro ya 22 urubyiruko rwazize Jenoside yakorewe abatutsi, abayobozi batandukanye babwiye urubyiruko ko ari rwo mbaraga z’igihugu. Akaba ari narwo ruzavamo abayobozi mu gihe kizaza.

Niyo mpamvu ngo rugomba guharanira gukora icyiza, ururi mu mashuri rukiga rushyizeho umwete, rukima amatwi abarushuka rurwanya ingengabitekerezo ya Jenoside; nkuko Depite Semasaka Gabriel abirusaba.

Agira ati “Rubyiruko rero mwitonde, mwige, mwigire ku byiza abeza muri bakuru banyu babigisha. Mwigira ku byiza abeza muri bakuru banyu bakora mubareba. Mwigire ku byiza namwe mubona bizabagirira akamaro.”

Nk’uko iyi nzu iriho umurindankuba, ngo ni ngombwa ko n’ibigo by’amashuri na byo biyigira.

Akarere ka Burera kagizwe ahanini n’imisozi miremire. Mu gihe cy’imvura, hakunze kugaragara imirabyo, hakanakubita inkuba ku buryo rimwe na rimwe zikubita abantu, bamwe bakahasiga ubizima.

Ubuyobozi bw’Akarere ka Burera buvuga ko hatarumvikana inkuba yakubise ku kigo cy’amashuri ariko mu rwego rwo kwirinda icyo cyiza ku bigo by’amashuri ndetse n’ahandi hantu hateranira abantu benshi, ngo hagomba gushyirwa imirindankuba.

Umuyobozi w’Akarere ka Burera, Uwambajemariya Florence, avuga ko abayobozi b’ibigo by’amashuri bakwiriye kwibuka ko bayobora abantu benshi, bagatekereza kugura imirindankuba kugira ngo hatazagira inkuba zibibasira.

Agira ati “Nyabuneka muba muri imbere y’abantu benshi, muba mufite urugo runini n’icy’imirindankuba gitekerezweho.”

Akomeza avuga ko batekereza kugura iyo mirindankuba bagendeye ku mafaranga Leta y’u Rwanda igenera ibigo by’amashuri azwi nka “Capitation Grant”.

Ayo mafaranga ahabwa ibigo by’amashuri kugira ngo abifashe gukemura ibibazo bimwe na bimwe birimo kugura ibikoresho ibyo bigo biba bikeneye. Buri kigo kigenerwa ayo mafaranga bitewe n’umubare w’abanyeshuri gifite. Umunyeshuri umwe agenerwa 3500Frw ku mwaka.

Nsengimana Thomas, Umuyobozi w’Ishuri Ribanza rya Bushenya riri mu Murenge wa Bungwe, avuga ko ibigo by’amashuri ubwabyo bitakwigondera imirindankuba kuko ihenze.

Ahamya ko iyo babasaba kugura, uwa make ugura ibihumbi 300Frw. Ariko ngo hari n’igera mu bihumbi 800Frw.

Agira ati “Ni amafaranga menshi utayateganyije mu ngengo y’imari y’umwaka, ntabwo ari ikintu cyoroshye wahita ugura kubera ko ikirere cyahindutse. Iyo urebye ibiba bikeneye mu mwaka wose, ntabwo guhita ugura ikintu cy’ibihumbi 300 (Frw) byakorohera rwose.”

Si ubwa mbere ubuyobozi bw’Akarere ka Burera busaba abayobozi b’ibigo by’amashuri ndetse n’abayobozi b’ahandi hantu hahurira abantu benshi kugura imirindankuba ariko ugasanga abo bisabwa batabishyira mu bikorwa.

Ubu buyobozi bwashyize imbaraga mu gusubiza abana ku ishuri nyuma yaho ubuyobozi bukuru bw’u Rwanda bugaragaje ko bubabajwe cyane n’abana bata ishuri, bugaheraho busaba ubuyobozi bw’inzego z’ibanze gukemura icyo kibazo.

Ababyeyi bibutswa ko abana bafite uburenganzira bwo kwiga.

Musabwa Eumene, umuyobozi w’uburezi mu Karere, avuga ko habayeho ubufatanye bw’ubuyobozi, inzego z’umutekano ndetse n’abaturage kugira ngo abo bana bose bamenyekane.

Avuga ko ikibanze cyakozwe ari ukuganiriza ababyeyi b’abana, bababwira ko umwana wese afite uburenganzira bwo kwiga.

Agira ati “Twanababwiye ko mu gihe utajyanye umwana wawe ku ishuri uzajya uhanwa n’itegeko kuko hari itegeko ry’uko umwana agomba kwiga.

Iyo urebye mu burenganzira bw’umwana, umwana agomba kwiga. Iyo atize rero umubyeyi agomba guhanishwa n’iryo tegeko.”

Yongeraho avuga ko abo bana bataye ishuri basigaye, hakozwe urutonde rwabo kuburyo ngo kuri ubu bari gushakisha aho baherereye kugira ngo nabo bagarurwe.

Bamwe mu bana bo muri aka karere ishuri bagaragara cyane cyane ku mupaka wa Cyanika, uhuza u Rwanda na Uganda, bari gukorera amafaranga, bikorera ibicuruzwa babyambutsa uwo mupaka mu buryo butemewe.

Abanyaburera batandukanye bavuga ko igitera abana kuva mu ishuri ari irari ry’amafaranga, ubukene no kuba hari bamwe mu bana bananiranye badakozwa ibyo kwiga.

Nsengimana Thomas, umuyobozi w’ikigo cy’amashiri abanza cya Bushenya kiri mu murenge wa Bungwe, we ahamya ko ababyeyi bagira uruhare runini mu gutuma abana bata ishuri.

Ati “Impamvu ikomeye turayibona ku muryango umwana arererwamo. Aho ababyeyi batamuhwitura ngo aze ku ishuri cyangwa se bakamushyira mu yindi mirimo ibyara amafaranga.”

Kugira ngo abo bana basubiye mu ishuri batazongera kurivamo, abayobozi b’ibigo by’amashuri n’abarimu basabwa kubaba hafi kandi bakajya batanga raporo buri cyumweru y’uko byifashe.

Ibi bishyimbo bimwe bikungahaye ku butare bishingirirwa. Abaturage batandukanye muri ako karere barabihinga kuburyo nko mu murenge wa Cyanika gusa hari hegitari 15 bihinzeho, byatangiye kuzana imiteja.

Ibishyimbo bikungahaye ku butare ngo ni byiza kubivanga n’ibindi biribwa bifite intungamubiri.

Shiragahinda Augustin, umaze imyaka ine abihinga, avuga ko kwita ibyo bishyimbo “Kiryumukwe” ari icyubahiro babihaye nkuko mu muryango Nyarwanda umukwe ari umuntu ukomeye.

Shiragahinda akomeza avuga ko kubiha icyubahiro babitewe n’uko bitanga umusaruro mwinshi, bigatanga amafaranga menshi kandi bikaryoha kurusha ibindi bisanzwe.

Ahamya ko kuri hegitari imwe yezaho toni zigera kuri ebyiri n’igice. Mu gihe ngo ibisanzwe yasaruragaho ibiro 800 gusa. Ibyo bishyimbo bya “Kiryumukwe” kandi ngo ku isoko bigura 600Frw mu gihe ibindi bisanzwe biba bigura 300Frw.

Ibishyimbo bikungahaye ku butare kubirya ni byiza kuko bituma amaraso atembera neza mu mubiri.

Shiragahinda avuga ko ku mwero wabyo agurisha toni n’igice yabyo akabona ibihumbi 900Frw. Yungamo avuga ko kuva yabihinga abasha kurihira abana be batatu biga mu mashuri yisumbuye. Ku gihembwe kimwe ngo abatangaho amafaranga agera ku bihumbi 300.

Akomeza avuga ko muri rusange ibishyimo bya “Kiryumukwe” byatumye akungahara. Agira ati “Abana mu mashuri makuru nkabatangira ‘minerval ku buryo butangoye, nkabatangira mitiweri, bakambara neza, mbese mu rugo harakeye.”

Shiragahinda Augustin avuga ko mu myaka ine amaze ahinga ibi bishyimbo yakungahaye.

Ibyo bishyimbo bikungahaye ku butare abaturage babihabwa n’ikigo cy’u Rwanda cy’ubuhinzi n’ubworozi (RAB) ku bufatanye n’umushinga witwa Harvest Plus n’umuryango w’Abanyamerika witwa USAID.

Tariki ya 13 Gicurasi 2016, ubwo abakozi b’iyo mishinga basuraga abahinzi b’ibyo bishyimbo, mu murenge wa Cyanika, batemberejwe aho ibyo bishyimbo bihinze kandi banabagaburira bimwe mu byo basaruye.

Malik Haidara, umukozi wa USAID, ukurikiranira hafi umushinga w’ibyo bishyimbo, yasabye abahinzi kubirya cyane aho kubugirisha gusa kuko bikungahaye ku ntungamubiri zituma amaraso atembera neza mu mubiri.

RAB nayo yizeza abahinzi ko abo bitarageraho nabo bizabageraho bidatinze binyuze mu batubuzi b’imbuto yabyo.

Akarere ka Burera kagizwe n’imirenge 17 kandi yose ni ko irimo aborozi b’inka zitanga umukamo. Nyamara si ko bose babona aho bagurisha amata kuko hari ikusanyirizo ry’amata rimwe gusa rizwi, riri mu Murenge wa Cyanika.

Ikaragiro rya Burera riratunganye ariko ntiribona amata yo gukoresha.

Iryo kusanyirizo ry’amata rikusanya amata y’aborozi bo mu mirenge itandatu ihegereye, buri mworozi bamuha 180Frw kuri litiro. Abandi bategereye iryo kusanyirizo babura aho bayagurisha, bikayagabanyiriza agaciro ku buryo hari igihe bagurisha litiro imwe ku 100Frw.

Amata ahurizwa kuri iryo kusanyirizo ni na yo ikaragiro ry’amata rya Burera rigura rikayakoramo “Fromage”, Ikivuguto n’amavuta y’inka.

Ubuyobozi bw’ikaragiro buvuga ko ayo mata ari make cyane ku buryo ngo atagera no ku cya kabiri cy’ayo rigomba kwakira, angana na litiro 6000 ku munsi.

Nizeyimbabazi Jean de Dieu, Umuyobozi ushinzwe ibikorwa by’ubuhinzi n’ubworozi, amashyamba n’umutungo kamere mu Karere ka Burera, avuga ko ikizakemura icyo kibazo ari ugushyira amakusanyirizo y’amata hafi y’aborozi.

Kugeza amata ku ikaragiro biba bigoye. Abenshi bakoresha amagare.

Avuga ko ayo makusanyirizo azorohereza aborozi bakabona aho bagurisha amata, bityo na ba nyir’ayo makusanyirizo bakagirana amasezerano n’iryo karagiro rikayabagurira.

Agira ati “Byibura muri santere iyo ari yo yose yegereye abaturage, hamwe umuturage ashobora kubyuka akajya kugura umunyu, habeho ahagurishirizwa amata hazwi, hujuje ibyangombwa.”

Ubwo ikaragiro ry’amata rya Burera ryafungurwaga ku mugaragaro, tariki ya 24 Gashyantare 2016, aborozi bagaragaje ko ikindi gituma iryo karagiro ribura amata ari uko nta modoka ihari yo gukusanya amata y’aborozi ngo iyageze ku ikaragiro.

Aborozi bavuze ko uburyo basanzwe bakoresha ari ukwikorera ku mutwe cyangwa gutwara ibicuba by’amata ku magare. Ibyo ngo bituma hadakusanywa amata menshi kandi n’ageze ku ikaragiro amwe aba yangiritse kubera gutinda mu nzira.

Minisitiri w’Ubucuruzi n’Inganda, Francois Kanimba, wari witabiriye uwo muhango, yahise abemerera imodoka yabugenewe izabafasha mu ikusanya ry’amata, cyakora kugeza mu ntangiriro z’iyi Gicurasi, ntibarayibona.

Abikorera batangaza ibyo ni bamwe mu bahinzi b’ibirayi n’abatubura imbuto zabyo babigize umwuga. Uyu murimo bakora ubunjiriza amafaranga atari make kuko ibirayi batubura banahinga babigurisha hirya no hino mu Rwanda no hanze yarwo.

Nibishaka ahamya ko yatangiye kwiga indimi kugira ngo agabanye amafaranga yahaga umusemuzi.

Gusa bahamya ko kuba batazi indimi z’Icyongereza, Igifaransa n’Igiswahili bibadindiza, bagatakaza mafaranga atari ngombwa kuburyo ngo serivisi bakagombye gukemura mu masaha make ishobora kumara iminsi.

Nibishaka Thadée, utuye mu Murenge wa Gahunga, wagize umwuga ibyo gutubura imbuto y’ibirayi, avuga ko hari igihe Abagande n’Abanyekongo baza kumugurira imbuto ntibabashe kumvikana akitabaza umusemuzi.

Agira ati “Indimi hari igihe zitubangamiye! Icyo gihe rero nk’iyo bavuga Igifaransa gusa (cyangwa Icyongereza) njye ntakizi bishaka kugira ngo ngire umukozi cyangwa mbanze nkodeshe umuntu unsobanurira.”

Akomeza avuga ko uwo muntu aba yahaye akazi ko kumusemurira amuhemba amafaranga atari munsi 5000Frw ku munsi. Ahamya ko kubera iyo mpamvu yatangiye kwiga indimi cyane cyane Icyongereza.

Uhagarariye abikorera mu karere ka Burera avuga ko bagerageza kwiga indimi batembera mu bihugu bituranye n’u Rwanda.

Abo bikorera bakomeza bavuga ko usanga bakorana n’ibigo bitandukanye bibatera inkunga cyangwa bibungura ubumenyi ariko ngo ugasanga biboherereza ubutumwa butandukanye buri mu Cyongereza.

Icyo gihe nabwo ngo barinda gushaka umuntu ubikura mu cyongereza akabishyira mu Kinyarwanda, bakamuhemba, mu gihe ari bo bakabyikoreye, ntibatakaze umwanya n’amafaranga.

Urugaga rw’abikorera mu Rwanda (PSF) ruhora rusaba abikorera kwiga indimi kugira ngo babashe gucuruza mu mahanga bisanzuye.

Nizeyimana Evariste, Perezida wa PSF mu karere ka Burera, avuga ko abo muri ako karere bagerageza kwiga indimi, nk’icyongereza, batembera muri bihugu bimwe bituranye n’u Rwanda.
Gusa ngo baranateganya kujya bajya mu bigo byigisha ikoranabuhanga kwiyungura ubumenyi.

Agira ati “Umuntu wenda akwiye no kumenya no gukoresha mudasobwa. Ntujye muri ‘Café Internet’ ngo ujyane n’umuntu ngo mfungurira ndebe amakuru.”

Komisiyio ya Sena y’u Rwanda y’Iterambere ry’Ubukungu n’Imari ivuga ko amateka ya Rukara rwa Bishingwe afitiye u Rwanda akamaro ku buryo yanakwinjiza amafaranga aramutse yanditswe kandi n’aho Rukara yari atuye hakabungabungwa ku buryo abakerarugendo bajya kuhasura.

Senateri Prof. Chrisologue Karangwa asaba ko amateka ya Rukara rwa Bishingwe yakwandikwa.

Rukara rwa Bishingwe, ukomoka mu Gahunga k’Abarashi ho mu Murenge wa Gahunga azwiho kuba yarishe umuzungu, yanze ko amusuzugura bikarangira na we bamumanitse, bakamwica.

Ubwo iyo Komisiyo ya Sena yasuraga Akarere ka Burera tariki ya 20 Mata 2016, yavuze ko abantu batandukanye bumva Rukara rwa Bishingwe ariko batazi neza amateka ye kandi bari bakwiye kuyamenya.

Aba basenateri bavuga ko mu kwandika ayo mateka hakwifashishwa umugabo Ndagijimana Yuvenali, umwuzukuru wa Rukara.

Senateri Prof Karangwa Chrisologue, umwe mu bagize iyo Komisiyo, avuga ko uwo mugabo arimo gusaza. Ngo ni byiza ko ayo mateka bayamuvomamo atarasaza. Agira ati “Afite amateka y’umuryango we ariko ntabwo turayamuvanamo.”

Ndagijimana Yuvenali, umwuzukuru wa Rukara rwa Bishingwe, yifuza ko aho Rukara yavukiye hajya ishusho ye cyangwa ikindi kimenyetso kihagaragaza.

Akomeza avuga ko ayo mateka yakwandikwa mu bitabo ndetse no ku dupapuro twabugenewe (Depliants) ku buryo abasura Akarere ka Burera bajya badutwara bakadusoma bakayamenya byimbitse.

Agira ati “Mukaba mwambwira muti ‘mu Gahunga kwa Rukara rwa Bishingwe mu magambo make dore icyahabereye’. Nava na hano ku karere njya kuhareba nkagenda niteguye.”

Ndagijimana we yifuza ko ku muhanda Gahunga-Kinigi, ujya aho Rukara rwa Bishingwe avuka, hashyirwa ishusho ye cyangwa ikindi kimenyetso kibigaragaraza.

Agira ati “Kubera ko twe tubitekereza nta mikoro dufite yo kubikora, twagombye guhabwa nk’ishusho iri hafi y’umuryango we, ugahabwa nk’inzu (y’amateka ya Rukara).”

Umuyobozi w’Akarere ka Burera, Uwambajemariya Florence, avuga ko bafite gahunda yo gutunganya ahantu h’amateka hari muri ako karere, bandika n’amateka yaho.

Usibye kwa Rukara hari kandi kwa Basebya ba Nyirantwari mu gishanga cya Rugezi ndetse no mu Bivumu bya Butaro.

Itsinda ry’abasenateri batatu bagize Komisiyio ya Sena y’Iterambere ry’Ubukungu n’Imari ryabisabye ubwo ryakoreraga uruzinduko muri ako karere tariki ya 20 Mata 2016, bagiye kureba aho iterambere ry’ubukerarugendo rigeze muri ako karere.

Hotel Montana Vista n’imwe mu mahoteli y’ubukerarugendo. Yubatse muri Santire ya Kidaho.

Mu biganiro bagiranye n’Ubuyobozi bw’Akarere ka Burera n’abafite aho bahurira n’ubukerarugendo, hagaragajwe ko muri ako karere hari amahoteli abiri yakira ba mukerarugendo ndetse n’indi imwe irimo kubakwa ku Kiyaga cya Burera.

Ba nyir’ayo mahoteli berekanye uburyo bakira ba mukerarugendo ku buryo hari abagaragaje ko mu gihe bafite abakiliya benshi, kurara muri hoteli yabo ijoro rimwe hishyurwa amafaranga y’u Rwanda abarirwa mu bihumbi 700.

Abasenateri ntabwo bemeranyije n’abo ba rwiyemezamirimo kubera icyo giciro gihanitse, giheza Abanyarwanda kandi ngo ari bo bagakwiye kurara muri ayo mahoteli kugira ngo bakunde iby’iwabo kandi banabikundishe n’abandi.

Abo basenateri babwiye abanyamahoteli kwibuka icyiciro cy’Abanyarwanda, babagabanyiriza ibiciro, kuko ari bo soko rinini bafite. Abo banyamahanga bizera ngo bashobora kutaza bitewe n’impamvu runaka zitunguranye.

Hotel Virunga Safari Volcano Lodge, yitegeye ibiyaga bya Burera na Ruhondo ndetse n’ibirungo, yakira ba mukerarugendo.

Senateri Muhongayire Jackline, wari ukuriye iryo tsinda ry’abasenateri, yagize ati “Ntibumve ko ubukerarugendo ari ubw’abanyamahanga! Bakongera bakicira bakiga uburyo bakorohereza Abanyarwanda, igihe yasuye ibikorwa nk’aha ko ashobora na we kurara nk’aha igihe runaka, bitabangamiye ubucuruzi bwabo.”

Emmanuel Ahishakiye, Umukozi wa Hoteli Virunga Safari Volcano Lodge, avuga ko banyamahoteli na bo bemera ibyo abasenateri babasaba bakavuga ko basanzwe barashyizeho ibiciro by’Abanyarwanda ariko ngo abo bakira ni mbarwa.

Agira ati “Abanyarwanda baraza ariko ntabwo ari benshi. Urabizi mu muco wacu w’Abanyarwanda ntabwo ibintu byo gusura bitubamo. Nuza aba aje gusura ariko ntarare.”

Iyi ni Hotel Beach Resort irimo kubakwa ku Kiyaga cya Burera kugira ngo na yo izajye yakira ba mukerarugendo bagana Akarere ka Burera.

U Rwanda rufite gahunda y’imyaka irindwi yo kongera Abanyarwanda bitabira ubukerarugendo ku kigero cya 30%. Mu kongera uwo mu bare, ngo hifashishwa iyamamazwa ry’ibyiza nyaburanga, babikundisha Abanyarwanda, banabashishikariza kubisura.

Amahoteli y’ubukerarugenda ahanini akunze kuba yubatswe ahantu hari ibikorwa by’ubukerarundo ku buryo ba mukerarugendo ari ho baruhukira iyo bahagiye.

Ayo mahoteri agira serivisi zisanzwe za hoteli hakiyongeraho amakarita arangira ba mukerarugendo aho bahagana ndetse n’amwe mu mashusho (amafato) n’amakuru y’ibiharangwa.

Iyo mvura yaguye mu ma saa munani kugeza mu ma saa kumi, ku wa kabiri tariki ya 19 Mata 2016.

Aho ababyeyi babyarira naho hari ibyondo n’amazi.

Yateje umuvu mwinshi mu murenge wa Ruhunde, umugezi wa Nyamagana utandukanya Akarere ka Burera na ka Rulindo uruzura maze utwara umwana w’umuhungu wigaga mu mwaka wa kabiri w’amashuri abanza, wari wagiye kureba ayo mazi.

Ahibasiwe cyane n’uwo muvu ni mu Murenge wa Rugarama, uri munsi y’ikirunga cya Mugabura. Amazi menshi yaturutse kuri icyo kirunga yatwaye imyaka y’abaturage irimo ibirayi, ibishyimbo n’amasaka, anuzura mu kigo nderabuzima cya Rugarama.

Ibyondo byazanywe n’umuvu byuzuyemo bibuza abantu guhita.

Ubwo umunyamakuru wa Kigali Today yageraga kuri icyo kigo nderabuzima yasanze amazi n’ibyondo byuzuye mu gice ababyeyi babyariramo. Gusa ariko ababyeyi bane bari bamaze kubyara bari bimuriwe mu kindi cyumba.

Umwe mu bahabyariye, witwa Mukambuguje Alphonsine, avuga ko babonye amazi yinjira mu nzu bakagira ubwoba.

Agira ati “Tubona rero ibizi birahurudutse, abantu baza bahungira muno! Bya bizi biza bibakurikira tubona inzu zirarengewe! Twebwe ababyeyi twahise twurira ibitanda turyama n’uduhinja (ubwoba) twabugize turi kugira ngo hari igihe (ibizi) biraturengera n’uduhinja dupfiremo!”

Uko niko ku kigo nderabuzima cya Rugarama hameze.

Gusa ariko uwo mwuzure wateye muri icyo kigo ndera buzima ntacyo wangije. Kuko abaganga ngo babonye amazi atangiye kuza bimura imiti ngo itangirika.

Ukurikije uburyo amazi n’ibyondo byuzuye mu kigo nderabuzuma cya Rugarama bigaragara ko bisabaza izindi mbaraga kugira ngo hongere kugaruka isuku.

Ku murenge wa Rugarama naho huzuye amazi.

Habumuremeyi Evaritse, umuyobozi wungirije w’Akarere ka Burera, ushinzwe iterambere ry’ubukungu, avuga ko kuri uyu wa gatatu tariki ya 20 Mata 2016, abaturage babyuka bahakora umuganda, mu gukumira ibindi biza.

Agira ati “Umuganda w’abaturage watangiye gukuramo amazi yari arimo ariko birakomeza. Ariko ubwo ikindi kirakurikiraho ni ukureba inzira zayo (amazi) niba zarasibamye zisiburwe n’ibyobo biyafata kuburyo byakongera bikongerwa.”

Uyu musore ufite imyaka 34 y’amavuko, utuye mu Kagari ka Nyagahinga, mu Murenge wa Cyanika, avuga ko yatsindiye ayo mafaranga yose tariki 11 Mata 2016, nyuma yo gutega ku makipe 20, yateze ko yose agomba gutsinda, bikamuhira. Amafaranga yayashyikirijwe tariki ya 15 Mata 2016.

Uwayisaba Bernard watsindiye agatubutse mu mukino wo guteka ku makipe.

Nyuma yo kwegukana amafaranga angana na 2.465.620Frw, yashoye 300Frw gusa, yavuze ko byamushimishije cyane, avuga ko ayo mafaranga yose agiye kumufasha mu buhinzi ndetse no kuzuza inzu arimo yubaka ifite agaciro ka miliyoni 3Frw, bityo bimuhe ubushobozi bwo gushaka umugore.

Agira ati “Ngiye kuyashyira ku nyubako yanjye nari nsanzwe nubaka, nyine yuzure ngere ku muhigo nari mfite. Narimo nteganya kuzana umugore, ngomba kumuzana nubundi. (Aya mafaranga) aramfashije! Ni inyongera mu byo nari ndimo gukora.”

Akomeza avuga ko nyuma yo gukora ubuhinzi, gutega ku mikino abifata nk’umurimo wa kabiri ku buryo ngo buri musi agomba gutega. Amafaranga menshi aheruka gutsindira ni ibihumbi 250Frw. Yatangiye ibyo gutega ku mikino mu mwaka wa 2013.

Abakozi ba LPS, Ishami rya Kidaho, bashyikiriza Uwayisaba amafaranga yatsindiye.

Imyaka itatu ishize, ishami rya LPS rigeze ahitwa mu Kidaho, ni ubwa mbere uwateze atsindiye amafaranga arenga miliyoni 2Frw. Uheruka gutsindira menshi yatsindiye miliyoni imwe n’ibihumbi 800 by’amafaranga y’ Rwanda.

Abaturage bo mu mirenge 17 igize Akarere ka Burera, batanze iyo nkunga mu cyumweru cy’icyunamo cyo kwibuka ku nshuro ya 22 Jenoside yakorewe Abatutsi mu Rwanda.

Abanyaburera batanze inkunga ingana na miliyoni 44Frw yo gufasha abarokotse Jenoside yakorewe Abatutsi.

Kuva tariki ya 7 Mata 2016 ubwo icyumweru cy’icyunamo cyatangiraga kugeza tariki ya 13 Mata 2016 gishojwe, Abanyaburera batangaga uko bifite, bagashyira mu gaseke, nyuma y’ibiganiro byaberaga mu midugudu yabo.

Ubuyobozi bw’Akarere ka Burera buvuga ko iyo nkunga izakomeza gukemura ibibazo bitandukanye abacitse ku icumu rya Jenoside yakorewe Abatutsi bo muri ako karere basigaranye, bityo bakomeze kwiteza imbere no kubaho neza.

Umuyobozi w’Akarere ka Burera, Uwambajemariya Florence, avuga ko nyuma yo kubona iyo nkunga ingana n’amafaranga 44.120.135Frw, bazicarana n’abarokotse Jenoside bakarebera hamwe iby’ingenzi bakeneye, iyo nkunga yabafashamo cyane.

Agira ati “Harimo gukomeza kurimbisha amacumbi yabo ku buryo bujyanye n’igihe tugezemo, no gukomeza kubafasha mu mishinga itandukanye. Hazakomeza igikorwa cyo gushyira imbaraga mu mishinga yabo no kubaha amahugurwa atuma koko bakora imishinga ku buryo babona inyungu mu buryo burambye.”

Iyo nkunga kandi ngo izafasha bamwe mu banyeshuri barokotse Jenoside yakorewe Abatutsi mu rwego rwo gukomeza kububakira ubumenyi muri gahunda y’uburezi.

Ubuyobozi bw’Akarere ka Burera busaba abaturage gukomeza gufasha abarokotse Jenoside mu buryo butandukanye ariko cyane cyane babegera, bakababa hafi kandi bakabumva kuko bituma barushaho gukira ibikomere byo ku mutima.

Hari kuri uyu wa 13 Mata 2016 mu muhango wo gusoza icyumweru cy’icyunamo, cyo kwibuka ku nshuro ya 22 abazize Jenoside yakorewe abatutsi mu Rwanda mu 1994.

Depite Semasaka asaba Abanyaburera guhaguruka bakarandura ingengabitekerezo ya Jenoside ikinangiye mu mitima ya bamwe.

Muri uwo muhango wabereye ku Rwibutso rwa Jenoside rwa Rusarabuye rushyinguyemo imibiri 67 y’abazize Jenoside yakorewe abatutsi, Hon Semasaka yabwiye Abanyaburera ko ingengabitekerezo ya Jenoside ikigaragara muri bamwe mu baturage ku buryo habayeho kurangara yasubiza u Rwanda ahabi.

Yatanze urugero avuga ko mu cyumweru cy’icyunamo, mu Murenge wa Kinyababa, mu Karere ka Burera, hagaragaye umusaza ufite imyaka 63 y’amavuko, wagiye mu biganiro maze akavuga ngo “Nimugire vuba dutahe ntabatarapfushije!”

Yavuze ko uwo ari uwagaragaye kuko hashobora kuba hari n’abandi. Agahamya ko kurwanya ingengabitekerezo ya Jenoside bisaba imbaraga nyinshi kuko ikiri mu mitima ya bamwe.

Babanje gushyira indabo ku Rwibutso rwa Jenoside rwa Rusarabuye rushyinguyemo imibiri 67.

Ati “Nubwo baba babiri cyangwa batatu bafite ingengabitekerezo ya Jenoside, turangaye u Rwanda barutwika! Guhagarika Jenoside byakozwe n’Abanyarwanda ariko guhagarika ingengabitekerezo ya Jenoside birasaba ndetse ingufu zirenze izakoreshejwe mu guhagarika Jenoside.

Guhagarika Jenoside hakoreshejwe ingufu n’imbunda n’amasasu ariko uyu munsi turarwana n’ibiri mu mitima y’abantu, bigoye kubona.”

Akomeza avuga ko kurwanya ingengabitekerezo ya Jenoside bigomba gukorwa n’Umunyarwanda wese ariko cyane cyane binyuze mu babyeyi ndetse n’abarezi bo ku mashuri atandukanye.

Gusaza icyumweru cy’icyunamo byabimburiwe n’urugendo rwo kwibuka abazize Jenoside yakorewe Abatutsi.

Depite Semasaka ufata ingengabitekerezo ya Jenoside nk’uburozi, asaba ababyeyi kwirinda kuroga abana babo naho abarezi bo bakegera abana barera ku ishuri bakabigisha ibyiza, bakarogora ababa barozwe n’ababyeyi babo.

Agira ati “Ababyeyi dufite inshingano yo kurera abana bacu neza kugira ngo bazabeho neza, bazabe mu Rwanda rwiza tukirinda kubaroga. Barezi mufite inshingano ikomeye yo kurogora abana baba barozwe n’ababyeyi babo.”

Ubushakashatsi buherutse gukorwa na CNLG bugaragaza ko abagifite ingengabitekerezo ya Jenoside mu Rwanda babarirwa muri 20%.

Minisitiri Francis Kaboneka yabitangaje tariki ya 11 Mata 2016, mu kiganiro cyahise kuri KT Radio kivuga ku buryo u Rwanda rwagiye rwiyubaka nyuma ya Jenoside yakorewe Abatutsi mu mwaka wa 1994.

Minisitiri Kaboneka avuga ko nta kintu kihariye Leta igenera abayobozi b’ubuturere basoza manda ariko ngo aho bibaye ngombwa babafasha gusubira mu buzima busanzwe.

Ubwo umunyamakuru Jean Noel Mugabo, wari uyoboye icyo kiganiro, yabazaga Minisitiri Kaboneka niba hari ikintu cyihariye Leta igenera abayobozi b’uturere bashoje manda, uyu muyobozi yashubije ko nta kihariye bagenerwa bose.

Yagize ati “Ntabwo navuga ngo hari ikintu runaka kimwe kibateganyirijwe bose…icy’ingenzi ni uko abantu bashimirwa akazi bakoze, kandi aho bishoboka bakaba banafashwa kugira ngo babe basubira mu buzima busanzwe bakora ibintu bitandukanye mu buryo butandukanye.”

Gusa ariko, Minisitiri Kaboneka yakomeje avuga ko hari abasoza manda, Leta ikabona ikibakeneye bakabona akazi mu myanya itandukanye. Ati “N’abangaba barangije manda bashobora kugenda babona imyanya.”

Yungamo avuga ko hari n’abandi bayobozi b’uturere basoza manda bakavuga ko bakoreye Leta igihe gihagije bagatangira kwikorera, bakajya mu bucuruzi. Hakaba n’abandi bahitamo gukomeza kwiga, bagakomeza kwiyungura ubwenge.

Kuri ubu, abayobozi b’uturere bashoje manda nk’uko biteganywa n’amategeko, babarirwa muri 11. Muri bo Kangwagye Justus, wayoboraga Akarere ka Rulindo, yamaze gutorerwa kuba umuhuzabikorwa w’urubyiruko rw’abakorerabushake mu gukumira no kurwanya ibyaha (Youth Volunteers in Community Policing).

Abandi bayobozi b’uturere bashoje manda zabo harimo Sembagare Samuel wayoboraga Akarere ka Burera, Mpembyemungu Winifrida wayoboraga aAkarere ka Musanze na Paul Jules Ndamage wayoboraga Akarere ka Kicukiro.

Haza kandi Gédéon Ruboneza wayoboraga Akarere ka Ngororero, Fred Sabiiti Atuhe wayoboraga Akarere ka Nyagatare, Louis Rwagaju wayoboraaga Akarere ka Bugesera, Karekezi Léandre wayoboraga Akarere ka Gisagara, Murenzi Abdallah wayoboraga Akarere ka Nyanza, Mutakwasuku Yvonne wayoboraga Akarere ka Muhanga na Rutsinga Jaques wayoboraga Akarere ka Kamonyi.

Babisabwe na Depite Nyiramadirida Fortunée mu kiganiro yabagejejeho ubwo hatangizwaga icyumweru cy’icyunamo, cyo kwibuka ku nshuro ya 22 Jenoside yakorewe Abatutsi mu Rwanda mu 1994.

Hon. Depite Nyiramadirida yaburiye ababyeyi batoza abana babo ingengabitekerezo ya Jenoside.

Muri icyo kiganiro yatangiye mu murenge wa Rugarama, yabwiye abaturage ko mu gihe Abanyarwanda bibuka ku nshuro ya 22 Jenoside yakorewe Abatutsi, hari abagifite ingabitekerezo ya Jenoside babarirwa muri 20%, k uburyo banayigisha abana babo.

Hon Nyiramadirida yahaye abo baturage urugero rw’umwana wigaga mu mwaka wa mbere w’amashuri abanza, ababyeyi be bari barigishije ko mu ishuri atagomba kwicarana n’umwana w’umututsi.

Yagize ati “Ageze mu ishuri aho kugira ngo yige, abandi bana barimo biga, we agashakisha mu ishuri umututsi. Mwarimu aramwitegereza, abona umwana yabuze amahoro. Aramubaza ati ‘ese bite?’

Aramufata nk’umwarimu aragenda aramwihererana, aramwigisha, aramubaza ati ‘ufite kibazo ki?’ (umwana) aramubwira ati ‘iwacu barambwiye ngo sinkicarane n’abatutsi!”

Nubwo atavuze aho byabereye nyir’izina, akomeza avuga ko biteye agahinda kubona hakiri ababyeyi bakigisha abana babo amacakubiri aho kubigisha urukundo n’ibindi bibateza imbere. Aha ni ho ahera asaba ababyeyi guha uburere bwiza abana babo aho kubatoza urwango.

Agira ati “Mwa babyeyi mwe ndagira ngo mbabwire ko abana bazajya babavamo. Bimwe mubabwira mwicaranye, bimwe mubabwira muri hamwe bazajya babavamo, bagere ahantu babavuge.”

Hon Nyiramadirida akomeza asaba abaturage gukomeza kurwanya ingenabitekerezo ya Jenoside kuko nta terambere rirambye u Rwanda rwageraho hakigaragara abantu bakirangwa n’urwango n’amacakubiri.

Agira ati “Tugomba kubirwanya (ingengabitekerezo ya Jenoside), n’iyo yaba umwe tukamurwanya kuko ni ikizira muri twebwe, ni ikizira mu Banyarwanda, nta nyungu irimo.”

Yongeraho avuga ko ariyo mpamvu Abanyarwanda bibuka Jenoside yakorewe abatutsi kugira ngo uko umwaka ushize undi ugataha abantu bumve ko hari ibyo bagomba guhindura.

Ku itariki 04 Mata 2008 ni bwo ibi byamamare mu kuririmba byakoze ubukwe mu ibanga rikomeye, mu Mujyi wa New York ho muri Leta Zunze Ubumwe z’Amerika.

Ubukwe bwa Beyonce na Jay Z bwagizwe ibanga rikomeye.

Igitangazamakuru ESSENCE gitangaza ko bahisemo gukora ubukwe ku munsi wa kane w’ukwezi kwa kane mu rwego rwo guha agaciro umubare “4” ufatwa nk’uw’amahirwe kuri bo.

Beyonce yavutse tariki ya 04 Nzeli 1981 naho Jay Z avuka tariki ya 04 Ukuboza 1969. N’umwana babyaranye bamwise Blue Ivy IV (IV=4mu mibare y’Ikiromani). Nyina wa Beyonce na we yavutse tariki ya 04 Mutarama 1954.

Ubwo bakoraga ubukwe, batumiye abantu 40 gusa. Kandi na bo ntibari bemerewe kuzana terefone zabo mu bukwe mu rwego rwo kugira ibanga ibyo birori. Ikindi kandi ntabwo bigeze bagira abantu babambarira ku bukwe (best men/maids).

Ku bukwe bwabo bakoze ku wa 4/4 bari batumiye abantu 40.

Ari Beyonce ndetse na Jay Z nta numwe wagize ubushake bwo kuririmba ku munsi w’ubukwe bwabo. Ahubwo ngo bifatanyije n’abatumirwa kubyiza zimwe mu ndirimbo zo mu njyana ya R&B na HIP HOP zacurangwaga muri ibyo birori.

Ikindi ngo ni uko ibirori byo kwishimira ubukwe bwabo byagejeje saa kumi n’imwe za mu gitondo, ku munsi ukurikiyeho, abatumirwa baba ari bwo bataha.

Ibi byamamare kuva byakora ubukwe byarushijeho kwinjiza akayabo k’amadorali kubera ibikorwa bitandukanye by’umuziki bibinjiriza harimo ibitaramo bakoranye hirya no hino ku isi, byitwa “On The Run”.

Kuva ku munsi w’ubukwe bwabo, uyu mugabo n’umugore bafatanyije, bamaze kwinjiza Amadorali y’Amerika arenga miliyoni 790 (arenga miliyari 600 FRW).

Hari mu ma saa tatu z’ijoro zo ku itariki ya 12 Werurwe 2016, ubwo umunyonzi witwa Rushingabigwi bakundaga kwita Sebeni, yatahaga avuye mu kazi ke akanyura mu kabari kamwe kari muri Santere ya Rwibikonde, iri hagati y’imirenge wa Cyanika na Kagogo, kunywa inzoga.

Abaturage bavuga ko iyi santere ibamo urugomo rwinshi.

Mu ma saa yine ubwo yatahaga, avuye mu kabari, yahuye n’abantu baramufata, bamuteragura ibyuma mu muhogo, benda guca ijosi, baramwica, umurambo we bawusiga munsi y’iteme riri hafi y’iyo santere.

Abamuzi bavuga ko abamwishe baba baramukekagaho amafaranga ngo kuko yari amaze iminsi avuye muri Uganda gupagasa, ngo ndetse yari anamaze iminsi afashe amafaranga y’u Rwanda ibihumbi 100 mu kimina yabagamo.

Kuri ubu bamwe mu bakekwaho kumwica batawe muri yombi, nyakwigendera we yamaze gushyingurwa.

Urupfu rw’uwo munyonzi rwateye ubwoba abaturiye n’abatuye muri Santere ya Rwibikonde bavuga ko yongeye kugarukamo umutekano muke, ko kandi atari ubwa mbere hicirwa umuntu.

Muri Mutarama 2013, na bwo muri iyo santere harasiwe umucuruzi witwa Habimana Sostene, ahasiga ubuzima, ubwo yahanyuraga mu ma saa moya z’umugoroba atwaye FUSO ye yari irimo amasaka, yari akuye muri Uganda, ayajyanye mu Mujyi wa Musanze.

Mu ntangiriro za 2013, muri Santere ya Rwibikonde harasiwe umucuruzi wari utwaye Fuso.

Abandi bantu babiri bari bari kumwe n’wo mucuruzi mu modoka barakomeretse bikomeye bajyanwa kwa muganga.

Amakuru yatanzwe mu rubanza rw’abakekwagaho kumwica, avuga ko iyicwa rye ryaturutse ku makimbirane ashingiye ku bucuruzi, yaturutse ku kutumvikana hagati ye n’undi mucuruzi bari bafatanyije ubucuruzi bw’imyaka.

Si ibyo gusa kuko no mu mwaka wa 2015, hafi y’iyo santere hiciwe umugore witwa Nyiramakoma, ku mugoroba ubwo yari avuye muri Uganda gupagasa.

Hari uwahakubitiwe ku manywa y’ihangu

Nshimiyimana Jean Claude, uturiye Santere ya Rwibikonde, ahamya ko iyo santere ibamo urugomo rukomeye rukururwa n’abasinzi b’ibiyobyabwenge birimo kanyanga. Ahamya ko nawe yahakubitiwe ku manywa y’ihangu kandi ntacyo avuganye n’abamukubise.

Agira ati “Nigeze kuhaca kandi nta n’icyo mvuganye n’umuntu, numva umuntu ankubise igikoni cya hano (ku rutugu)! Ni uko nagize amahirwe sinapfa, ni Imana yandokoye…jye sinywa inzoaga ariko niyo naba nzinywa sinahanywera sa kumi n’ebyiri (z’umugoroba).”

Nkunzwenimana Samson, na we ahamya ko santere ya Rwibikonde irimo umutekano muke utuma abayituriye n’abayituyemo bahora bafite ubwoba bwo kugirirwa nabi. Avuga ko uwo mutekano muke ukururwa n’ibirara bihaba.

Agira ati “Haba ibirara! Noneho kenshi na kenshi hakaba n’abahasohorera bavuye muri za kanyanga…noneho (ibyo birara) byaba byabuze nk’amafaranga yo kujya kunywa, bakumva ko bakwica umuntu ngo bamwake amafaranga.”

Akomeza avuga ko abaturage bamwe badapfa kwegera iyo santere batinya kugirirwa nabi n’ibyo birara. Yongeraho avuga ko urugomo ruhabera ari urwo kuva kera. Ababyeyi babo na bo ngo barabizi.

Nkunzwenimana, uri mu kigero cy’imyaka 50 y’amavuko, avuga ko bibaza impamvu iyo santere ihoramo urugomo, rutajya rucika, kuko ngo nta kwezi kwashira hatumvikanye abantu baharwaniye cyangwa bahakubitiwe kandi andi masantere bituranye atuje.

Agira ati “Sinzi! Ni nka satani yahateye kubera ko abasaza ba kera bahanyweraga, tujya twumva ngo na bo bakundaga kurwana cyane. Abasaza bahavuye n’ubundi abasore barakura, bahamenyera n’ubundi ugasanga nabwo bari gukunda kuharwanira.”

Aha ni ho hiciwe umunyonzi Rushingwabigwi.

Santere ya Rwibikonde iri ku muhanda wa kaburimbo Musanze-Cyanika. Imirenge ibiri ihuriye kuri iyo santere, ari yo Kagogo ifite igice cyo hepfo y’umuhanda na ho Cyanika ikagira icyo haruguru.

Abatuye n’abaturiye iyo santere bahamya ko abahohotera abantu baturuka muri iyo mirenge. Basaba ubuyobozi gushakira abo bantu muri ako gace. Gusa ariko ngo hari abamara gukora ayo mahano bagahita bahungira muri Uganda.

Basaba ko abafatwa bajya bahanwa by’intangarugero

Aba baturage bavuga ko urugomo rubera muri Santere ya Rwibikonde rubatera ubwoba. Bakaba basaba ubuyobozi kuhafatira ingamba kugira ngo hatazongera kwicirwa umuntu.

Mukambuguje Beatrice, waganiriye na Kigali Today nyuma y’urupfu rw’umunyonzi Rushingabigwi, asaba ko uzahamwa n’icyaha cyo kwica uwo munyonzi yazahanwa by’intangarugero.

Agira ati “Jyewe ikintu nabona, nabona ko umuntu wafatwa yishe uyu musore, na we yahanishwa ikintu cyo kwicwa, icyo gusa. Naho kumufunga, bakamufungura, akagaruka ari gusekera uwabuze uwe, ntabwo byacamo. Undi na we ubikora cyangwa ubitekereza akarekera aho.”

Ubuyobozi bw’Umurenge wa Kagogo bufatanyije n’ubw’uwa Cyanika busaba abaturage baturiye Santere Rwibikonde n’abayituyemo gukomeza kurara amarondo kandi bagatanga amakuru kugira ngo ibyaha bikumire bitaraba.

Ibyo ngo byatuma urugomo rwo muri iyo santere rucika burundu; nk’uko Butoyi Jean Louis uyobora Umurenge wa Kagogo abisobanura. Avuga ko bafatanyije n’Umurenge wa Cyanika bagiye gushyira muri iyo santere irondo rihoraho.

Ahamya ko ubusanzwe irondo ryabaga riri ku biro by’Akagari ka Kayenzi ko mu Murenge wa Kagogo, kari hafi y’iyo santere, yo ntibayiteho.

Agira ati “Tugiye kuhashyira gahunda y’amarondo akurikirana, tukahakurikirana umunsi ku munsi kandi abaturage bagatanga amakuru hakiri kare, bamenyesha amakuru y’ibihabera. Ku buryo mu minsi itaha haraba hari ku murongo.”

Nubwo uyu muyobozi atangaza ibi ariko, abaturage bavuga ko n’ubusanzwe bararaga irondo. Ariko bahamya ko n abo batajyaga barirara muri Santere ya Rwibikonde, batinya ko bagirirwa nabi.

Ariko bakomeza bavuga ko kuba ubuyobozi bwabasabye kurara irondo muri iyo santere bagiye kubikora kuko bizeye ko n’inzego z’ umutekano zizabatera ingabo mu bitugu.

Ntawizera utuye mu Murenge wa Gahunga, mu Karere ka Burera, avuga ko ako kazi agakora buri munsi; abo atwariye imizigo bakamuha amafaranga akuramo ayo kurya, andi akayashyira mu “kimina”.

Uku ni ko Ntawizera asunika ingorofani ihetse imitwaro.

Amaze imyaka irindwi asunika ingorofani. Amafaranga yose yakoreye muri iyo myaka ngo ni yo yatumye atangira kubaka inzu kuri ubu igiye kuzura. Imaze kumutwara amafaranga y’u Rwanda abarirwa mu ibihumbi 350.

Agira ati “Ndi kubaka inzu, maze kuyisakara hasigaye kuyitera ibyondo (igishahuro). Ubu inzu y’amabati 23 ndayifite. Ifite ibyumba bitatu n’uruganiriro (salon).”

Uyu mugabo ufite imyaka 32 y’amavuko, afite umugore n’abana bane. Avuga ko atwara imizigo y’abantu bo mu gace atuyemo. Baba abagiye cyangwa abavuye mu masoko ya Rugarana na Gahunga ari muri ako gace, bitabujije ko atwarira n’abagiye ahandi.

Bitewe n’aho ajyanye umuzigo, abamuhaye akazi bamwishyura amafaranga ari hagati ya 100 na 500. Kure ashobora kujya ni ahareshya n’ibilometero bitanu. Ingorofani ye yikorera ibiro bibarirwa mu 150.

Aha ni mu isoko rya Rugarama, Ntawizera arindiriye abamuha akazi ko gutwara imizigo.

Ntawizera ahamya ko mu kwezi, ashyira mu kimina amafaranga 6000. Naho ku munsi bitewe n’ayo yakoreye, akuramo ayo guhahira umuryango we, abarirwa muri 800. Akomeza avuga ko aba yakuyeho n’ayo kurya, mu gihe ari mu kazi, angana na 300.

Uyu mugabo arata ingorofani ye ko imufatiye runini ku buryo nta cyo yayigurana. Ahamya ko n’uwamuha igare ngo bagurane ataryemera.

Agira ati “Ariko buriya umpaye igare sinanaryiga ngo ndimenye. N’iyo narimenya, kurikoresha byangora. Nk’ubungubu, imyaka [mu murima] yera wenda hamaze nk’amezi atanu, atandatu. None se ubwo byakwera ndimo kurya iki?”

Akomeza avuga ko nubwo ako kazi akora kamusaba imbaraga nyinshi, agakora yishimye kuko kamutunze.

Ntawizera asaba abagasuzugura, gukura amaboko mu mufuka na bo bakihangira imirimo aho kwicara gusa.

Uyu munyonzi bakundaga kwita Sebeni, wari utuye mu Murenge wa Cyanika, yiciwe muri santere ya Rwibikonde, mu Kagari ka Kayenzi, mu Murenge wa Kagogo. Umurambo we bawusiga munsi y’iteme iri hafi y’iyo santere.

Aha niho biciye umunyonzi Rushingabigwi.

Nkunzwenimana Samson, watabaye uwo murambo ukiboneka mu ma saa kumi n’ebyiri za mu gitondo ku cyumweru tariki 13 Werurwe 2016, yavuze ko basanze abamwishe bamukase ijosi bakoresheje icyuma.

Yagize ati “Twese twahuruye tuza kureba, tukihagera twasanze umuntu bamufashe bamukata umuhogo, ubwo ahasigaye baragenda.”

Akomeza avuga ko umurambo wa nyakwigendera bahise bawujyana mu bitaro bya Ruhengeri, ngo bawusuzume.

Nyakwigendera ngo yishwe mu ma saa yine z’ijoro, ubwo yari atashye avuye ku kazi ke ko kunyonga. Mbere yo kujya mu rugo ngo yabanje kunyura mu kabari, kari muri santere ya Rwibikonde kunywa inzoga. Avuye mu kabari atashye ngo nibwo bamwishe.

Iyi santere ya Rwibikonde yiciwemo Rushingabigwi si ubwa mbere yicirwamo umuntu.

Rushingabigwiw’imyaka 23 wari akiri ingaragu, yari amaze kuzuza inzu. Ikindi kandi ngo yari amaze hafi ukwezi ageze mu Rwanda, avuye muri Uganda gupagasa. Muri Uganda ngo yamazeyo amezi abiri.

Nshimiyimana Jean Claude, wari uziranye na nyakwigendera, avuga ko abamwishe baba bamukekagaho amafaranga yakuye muri Uganda. Kandi ngo no ku munsi yiciweho yari yafashe amafaranga mu kimina yabagamo, abarirwa mu bihumbi 100Frw.

Ati “Mu bigaragara bakekaga ko afite amafaranga yaba yarakuye i Bugande, n’amwe yaba yafashe mu kimina.”

Kuri ubu ubuyobozi bufatanyije n’inzego z’umutekano, baracyakora iperereza ngo hamenyekane abihishe inyuma y’urupfu rw’uwo munyonzi.

Abatuye n’abaturiye santere ya Rwibikonde bavuga ko ibamo urugomo ruterwa n’abanywi b’ibiyobyabwenge birimo kanyanga. Si ubwa mbere hicirwa umuntu. Mu ntangiriro za 2013 hiciwe umugabo arasiwe mu modoka. Muri 2015, hafi yaho hiciwe umukecuru.

Babitangaje kuwa kane tariki 10 Werurwe 2016, nyuma y’uko abo mu Murenge wa Cyeru bahawe telefone zizajya zibafasha mu guhanahana amakuru, kugira ngo akazi kabo karushaho kugenda neza.

Abunzi ngo uwabaha na bote zabafasha cyane.

Kantarama Sousane, umwe muri bo, avuga ko telefone ahawe izamufasha cyane mu kuvugana na bagenzi be bahanahana amakuru ndetse anageza ku buyobozi ibibazo yaba afite, mu kazi ke ko kunga abaturage kuko mbere byamugoraga.

Avuga ko ariko ikindi kibazo asigaranye kandi asangiye na bagenzi be ari icyo kutagira inkweto za bugenewe zimufasha kugenda mu misozi igihe imvura yaguye, ari ho ahera asaba ko babaha inkweto za bote.

Agira ati “Tujya mu misozi nta bote dufite mu mvura, mu byondo, ubwo tukaba dukeneye za bote. Iyo muntu yambaye bote yanyura aho ashaka.”

Akarere ka Burera kagizwe ahanini n’imisozi. Gusa ariko kuri iyo misozi hariho imihanda nyabagendwa, inyurwamo n’ibinyabiziga bitandukanye birimo n’amagare.

Telefone bahawe ni uko zimeze.

Aba bunzi bavuga ko imihanda nyabagerwa baramutse bafite amagare yabafasha gukora akazi kabo ku gihe kandi vuba.

Bagiramenshi Bernard, afite telefone yahawe mu ntoki, avuga ko bahawe n’amagare byamufasha cyane. Avuga ko atuye kure yaho bakorera ku kagari, kuburyo ngo kuhagera bimusaba gukoresha isaha imwe n’amaguru.

Ati “Baduhaye nk’akagare byadushimisha. Ahantu tumanuka ni umusozi no kwambuka umugezi, hakaba igihe wuzuye kandi mu gihe nakagombye kunyura umuhanda n’igare, meee! imvura yagwa ngahita nsiba byo!”

Umuyobozi w’Akarere ka Burera, Uwambajemariya Florence, asaba abunzi gufata neza telefone bahawe bakajya bazikoresha icyo baziherewe, bakageza ku buyobozi amakuru ndetse n’ibibazo baba bafite.

Akomeza ababwira ko kandi n’ibindi bibazo bafite bizajya bigenda bikemuka buhoro buhoro. Yongeraho abasaba kuba inyangamugayo.

Yabitangaje tariki ya 10 Werurwe 2016, ubwo yahaga impamuro aba-DASSO bashya 32 bo mu Karere ka Burera, nyuma yo kurahirira imirimo yabo.

Abayobozi batandukanye bari bitabiriye umuhango w’irahira rya ba-DASSO

Uyu muyobozi yabibukuje ko umu-DASSO atari umuntu w’igitangaza ahubwo ngo agomba kubaha umuturage, agafatanya na Polisi, ingabo ndetse n’ubundi buyobozi kubungabunga umutekano w’uwo muturage.

Yagize ati “Ntabwo muje kwiremereza imbere y’umuturage. Ntabwo muje kwishongora imbere y’umuturage, ngo uzabone umuturage umubwire ngo ‘sha uzi icyo ndi cyo! Uzi aho mvuye! Amahugurwa nabonye warayabonye!

Amagambo nkayongayo ntabwo ajyanye n’umuco w’imiyoborere y’igihugu cyacu. Twahisemo kubaha abaturge bacu. DASSO muzirinde guhutaza umuturage. Mugomba kuzafata umuturage nka shobuja. Umuturage ni zahabu.”

Aba-DASSO bo mu karere ka Burera bahamya ko kubaha umuturage ari cyo kibanze bashyira mu bikorwa

Yakomeje abibutsa ko kandi gukubita umuturage kizira. Ahubwo ngo icyo DASSO ishinzwe ni ugufatanya n’izindi nzego z’ubuyobozi, gushyira abaturage ku murongo.

Abo ba-DASSO bashya bakiriwe mu karere ka Burera batangaza ko impanuro bahawe bazazishyira mu bikorwa kandi ngo usibye kuba bibukijwe inshingano zabo ngo baranahuguwe cyane ko bagomba kubaha umuturage.

DASSO Manimfashe Jean Baptiste agira ati “Umuturage impamvu ngomba kumufata neza ni uko ari we nshinzwe kureberera…nzamufata muganirize numve impamvu yahuye n’ikibazo…muhe ubufasha n’ubutabazi nzaba mfite.”

Kuri ubu Akarere ka Burera kagize aba-DASSO 97 harimo ab’igitsinagore 17. Ubuyobozi bw’ako karere buhamya ko urwo rwego rubafasha cyane mu kubungabunga umutekano batanga amakuru, ibyaha bigakumirwa bitaraba.

Aba-DASSO bashya 32 bo mu karere ka Burera nibo barahiriye imirimo yabo

Uwambajemariya Florence, umuyobozi w’Akarere ka Burera, avuga ko aba-DASSO babafasha cyane cyane mu gukumira ikiyobyabwenge cya kanyanga gituruka muri Uganda kiza gucuruzwa mu Rwanda.

Agira ati “Gahunda yo gukomeza kurwanya ibiyobyabwenge, bazakomeza kudufasha…mu buryo dukora dufatanyije n’inzego z’umutekano, no kurwanya ibiyobyabwenge baradufasha cyane.”

Akomeza avuga ko usibye kurwanya iboyobyabwenge, DASSO zinabafasha kureba niba gahunda za Leta zigenewe abaturage zishyirwa mu bikorwa uko bikwiye.

Nizeyimbabazi Jean de Dieu, Umukozi ushinzwe Ubuhinzi n’Ubworozi mu Karere ka Burera, avuga ko kuri ubu barimo kugenda basobanurira abaturage kugira ngo hatazongera kugaragara umuturage wahinze amasaka ahagenewe guhingwa ibihingwa byatoranyijwe.

Uyu murima wo muri Burera uhinzemo amasaka kandi warugenewe guhingwamo ibigori.

Akomeza avuga ko bizeye ko abaturage bazabyubahiriza ariko ngo utazabyubahiriza hari ingamba zizamufatirwa zirimo no kwamburwa ubwo butaka.

Agira ati “Itegeko ryo kubungabunga ubutaka rirahari, umuturage udakoresha ubutaka bw’iwe ashobora kuba abwambuwe by’agateganyo bukaragizwa abandi bantu, amakoperative, babasha kubukoresha bityo akaba yigishwa uburyo yabukoresha, nyuma akabusubizwa.”

Ubusanzwe, ibihingwa byatoranyijwe guhingwa mu Karere ka Burera ni ibirayi, ibigori, ibishyimbo ndetse n’ingano. Bihingwa ku buso bw’ubutaka bwahujwe ubundi amasaka n’ibindi bihingwa, bigahingwa ku bundi butaka busigaye.

Ubuyobozi bw’ako karere ntibuhwema gusobanurira abaturage ko bagomba kubahiriza gahunda yo guhinga ibyo bihingwa byatoranyijwe kuko ari byo bitanga umusaruro mwinshi utuma batakwibasirwa n’inzara. Ariko usanga bamwe mu bahinzi batabyubahiriza.

Amasaka yerera amezi ari hagati y’atandatu n’arindwi. Abaturage bahamya ko nubwo atinda mu butakagusarurwa atanga umusaruro mwinshi bityo bakabona n’amafaranga. Bahamya ko ahavuye ibiro 70 by’ibigori, hava ibiro 100 by’amasaka.

Umuyobozi w’ubuhinzi n’ubworozi mu karere ka Burera avuga ko bari gusobanurira abaturage kugira ngo hatazagira uwongera kurenga ku mabwiriza

Ikindi ngo ni uko ikilo cy’ibigori gishobora kugura amafaranga y’u Rwanda ari hagati ya 100 na 150, mu gihe icy’amasaka kigura 300.

Kubura imbuto kubera ubushobzi buke nabyo ngo bituma bahinga amasaka. Bavuga ko ahantu hatewe imbuto y’ibirayi ingana n’ibilo 100 hashobora kujya ibiro nka bitatu by’amasaka. Ikilo kimwe cy’imbuto y’ibirayi kigura amafaranga 400 mu gihe icy’amasaka kigura amafaranga 300.

Uwineza Theogene, umwe muri abo bahinzi, agira ati “Babura imbuto rero bakavuga bati ‘ese noneho turaraza umurima! Aho kuwuraza reka dushyiremo udusaka”.

Ubuyobozi bw’Akarere buvuga ko hasanzweho gahunda ya nkunganire ku mbuto z’ibigori n’ibishyimbo ariko ngo no ku birayi bari gushaka uburyo yajyaho.

Guverineri Bosenibamwe Aimé avuga ko kuri uwo mupaka hakwiye kubakwa amacumbi, amazu y’ubucuruzi n’amahoteli byiza kubera ko ari ku irembo ry’u Rwanda, rinyurwaho n’abantu benshi bakenera serivisi zitandukanye.

Guverineri Bosenimamwe asaba abikorera bo mu karere ka Burera kubaka amazu agezweho ku mupaka wa Cyanika

Kubera ko ibyo nta bihari bituma abinjira mu Rwanda bashaka aho kwiyakirira cyangwa aho kurara heza, hafi ku mupaka bahabura bakigira mu mujyi wa Musanze.

Guverineri Bosenibamwe ubwo tariki ya 24 Gashyantare 2016, yitabiraga umuhango wo gutangiza ibikorwa byo kubaka isoko mpuzamahanga ku mupaka wa Cyanika, yavuze ko ayo mafaranga ajya i Musanze akwiye gusigara muri Burera.

Avuga ko iryo soko rigiye kuhubakwa rigomba kubabera imbarutso bityo nabo bakubaka amazu agezweho. Ariko yibutsa abikorera bo muri ako karere ko ibyo byose bazabigeraho ari uko bishyize hamwe bakareka ingeso yo kuba nyamwigendaho.

Yagize ati “Ntabwo bizumvikana ko muzaba mufite isoko ryatwaye guverinoma akayabo k’amafaranga (Miliyari 1.3Frw) hanyuma ngo mukomeze mwubake twa nyakatsi tw’utubati turi ahongaho. Mwegeranye imbaraga zanyu. Buri wese ku giti cye ntabwo yabishobora. Nutekereza ko uzubaka amagorofa(Etages), ntabwo wabivamo. Nta mafaranga wabona na Banki ntiyayaguha wenyine.”

Abikorera bo mu karere ka Burera bahamya ko nabo bamaze kumenya akamaro ko kwishyira hamwe. Batangiye kwishyira hamwe kugira ngo barebe ibikorwa by’iterambere bakora mu Karere kabo.

Ku mupaka wa Cyanika nta mazu meza y’ubucuruzi ahari

Nizeyimana Evariste, ukuriye abikorera bo mu Karere ka Burera, avuga ko hari ibikorwa bateganya gukora ahantu hatandukanye muri ako Karere harimo no ku mupaka wa Cyanika. Icyo bazaheraho ngo ni icyo kugura imigabane muri iryo soko rigiye kuhubakwa.

Ibindi nko kubaka amazu meza ku mupaka bizajya bigenda bikorwa uko imyaka igenda ishira.

Agira ati “Kuri uyu munsi tumaze gukusanya miliyoni 16 kugira ngo tuzaguremo imigabane, itazagurwa n’abanyamahanga…ni intangiriro ariko guhera uyu munsi ejo, ejo bundi, bizaba birenze.”

Kuri uyu wa kane tariki 24 Gashyantare 2016, nibwo Minisitiri w’Ubucuruzi n’Inganda, Francois Kanimba n’abayobozi batandukanye, bashyize ibuye ry’ifatizo aho iri soko rizubakwa mu Murenge wa Cyanika mu Karere ka Burera.

Minisitiri Kanimba ashyira ibuye ry’ifatizo ahazubakwa isoko mpuzamahanga rya Cyanika.

Byafashwe nka kimwe mu bimenyetso bigaragaza ko noneho iryo soko mpuzamahanga rigiye kubakwa kuko na ho rizubakwa hangana na Hegitari ebyiri hatangiye gusizwa, haranazitirwa hifashishijwe amabati, bigaragaza ko hari gukorerwa imirimo y’ubwubatsi.

Ubwo Minisitiri Kanimba yari amaze gushyiraho iryo buye ry’ifatizo yahise atangariza Abanyaburera ko noneho iryo soko bategereje igihe kirekire rigiye gutangira kubakwa kandi ko rizuzura bidatinze.

Abayobozi batandukanye batemberezwa aho iryo soko rizubakwa.

Yagize ati “Kiriya ni igikorwa mu by’ukuri cyari kituri ku mutima kandi kinatubabaje. Byari byaratinze rero ariko ntabwo byaheze! Kandi abubaka batwijeje ko mu gihe cy’amezi 10 gusa umushinga uzaba urangiye.”

Muri Kamena 2013 nibwo Minisiteri y’Ubucuruzi n’Inganda (MINICOM) yamuritse igishushanyo mbonera cy’iryo soko, biteganywa ko rigomba gutangira kubakwa mu Gushyingo uwo mwaka.

Ariko uko kwezi kwarageze ntihagira igikorwa kubera ko ngo amafaranga yo kuryubaka yari ataraboneka. Nyuma yaho nabwo abaturage bategereza ko ryubakwa baraheba imyaka itatu yose irinda ishira ntagikozwe.

Aho isoko mpuzamahanga ryo ku mupaka wa Cyanika rizubakwa.

Abaturage bo muri aka karere bavuga ko bizeye ko noneho iryo soko rigiye kubakwa kubera na Minisitiri Kanimba ubwe yahigereye. Bakavuga ko ariko muri iyo myaka yose ishize bari bazi ko babijeje ibitangaza.

Sindikubwabo Theogene, ukorera ubucuruzi ku mupaka wa Cyanika, agira ati “Dukurikije igihe babivugiye n’igihe cyari gishize, twari tumaze kubona ko bitazapfa gushoboka. Ariko noneho dukurikije igikorwa gikozwe uyu munsi tugize icyizere gihagije.”

Kuki ryaratinze kubakwa?

Igishushanyo mbonera cy’iryo soko ni uku kimeze.

Nyuma y’uko umwaka wa 2013 urangiye ritubatswe, ubuyobozi bw’Akarere ka Burera bwahise butangaza ko rigomba gutangira kubakwa mu ntangiriro za Mutarama 2014 ku buryo mu gihe cy’umwaka umwe ryari kuba ryuzuye.

Ibyo na byo ntibyakunze kubera ko umushoramari witwa Jean Marie Niyonzima, ufite sosiyete yitwa “Nogushi Holdings”, wagombaga kuryubaka yaje kubatenguha ahagarika iyo gahunda, avuga ko ashobora guhomba.

Uwo mushoramari yavuze ko impamvu zatumye ahagarika kubaka iryo soko ari uko ku cyambu cya Mombasa muri Kenya hagiyeho gasutamo imwe, ihuriweho n’ibihugu bigize umuryango w’Afurika y’Iburasirazuba.

Umupaka wa Cyanika uhoraho urujya n’uruza rw’abantu n’imodoka.

Niyonzima yateganyaga ko parikingi y’imodoka n’ububiko bw’ibicuruzwa byongewe kuri iryo soko byari kuzajya bimwinjiriza amafaranga bitewe n’imodoka zikoreye ibicuruzwa zari kuzajya zihaparika, zitanga imisoro.

Kuba rero ku cyambu cya Mombasa haragiyeho gasutamo imwe bivuze ko amahoro ya gasutamo yishyurirwa i Momabasa ubundi ibicuruzwa bikinjira mu Rwanda nta handi bihagaze. Umushoramari yagaragaje ko ngo ibyo byamuteza igihombo.

Ikindi ngo ni uko iyo yubaka iryo soko gusa adashyizeho Parikingi n’amazu y’ububiko bw’ibicuruzwa nabwo yari kubona inyungu nke. Ngo yari kubona inyungu ibarirwa muri 15% gusa kandi muri banki ho bamusaba kwishyura inyungu ibarirwa muri 19%.

Uwo mushoramari amaze kubatenguha, hakomeje gushakishwa undi mufatanyabikorwa watanga amafaranga yo kuryubaka.

Amafaranga na yo yakomeje kubura

Kubura kw’amafaranga yo kuba iri soko ryari ritegerejwe na benshi, byatumye mu Gushyingo 2014 mu mujyi wa Musanze, Guverineri w’Intara y’Amajyaruguru, Bosenibamwe Aimé, agirana inama n’abarebwa n’umushinga wo kubaka iryo soko.

Hafatiwe umwanzuro ko imirimo yo kuryubaka igomba gutangira mu Kuboza 2014. Ariko nabwo ntibyakunda kuko hari hataraboneka amafaranga.

Muri Mutarama 2015, ubuyobozi bw’Akarere ka Burera na MINICOM bagiranye ibiganiro maze bemeza ko habonetse umufatanyabikorwa mushya ufite umushinga witwa EIF (Enhance Integrated Framework), ufite icyicaro mu gihugu cy’Ubusuwisi (Suisse).

Uwo muterankunga yatanze amafaranga y’u Rwanda abarirwa muri Miliyari imwe na Miliyoni 200, agomba kubaka iryo so kugeza ryuzuye.

Icyo gihe uwari umuyobozi w’Akarere ka Burera, Sembagare Samuel, yijeje ko muri Werurwe 2015 imirimo yo kubaka isoko rya Cyanika igombaga gutangira. Ariko nabwo ntibyashobotse. Ubuyobozi buhamya ko byatewe nuko hari hagitangwa amasoko ndetse hanakorwa n’inyigo.

Nibwo ubuyobozi bw’Akarere ka Burera bwahise buhindura itariki noneho buvuga ko iryo soko rizatangira kubakwa bitarenze ukwezi kwa Gicurasi 2015. Icyo gihe Zaraduhaye Joseph, wari umuyobozi wungirije w’Akarere ka Burera, ushinzwe iterambere ry’ ubukungu, yatanze icyizere.

Ati “Amafaranga yarabonetse yo kuryubaka ubu ibirimo ni ugutanga amasoko”.

Ukwo kwezi nakwo kwararangiye nta gikorwa na kimwe gikozwe.

Gutanga isoko na byo byajemo ikibazo

Muri Kanama 2015, Sembagare yatangarije Kigali Today ko kuba iryo soko ritaratangira kubakwa ari uko mu gutanga isoko hajemo ikibazo bigatuma riseswa, rikongera gutangwa bundi bushya.

Yavuze ko muri babiri bapiganiraga iryo soko, umwe yatsinze undi akajurira bituma byoherezwa mu Kigo cy’u Rwanda gishinzwe Amasoko ya Leta (RPPA), iryo soko riraseswa.

Ati “Twatanze isoko noneho utsinze wa mbere, undi wa kabiri arajurira. Ajuriye rero na we barabisuzuma tubyohereza muri RPPA, bigezeyo barabisesa byose. Basanga bose badafite ibyangombwa byuzuye.

Ubu rero isoko ryongeye gutangwa…ubungubu ibitabo byaranditswe, amatangazo yaratanzwe, dusigaje ko hakorwa igenzura ry’ibyangombwa ry’abahatanira isoko kugira ngo batangaze uwatsindiye isoko.”

Nyuma yo gutangaza ibyo ubuyobozi bw’Akarere ka Burera bwahise bufata umwanzuro ko bitarenze Ukuboza 2015 imirimo yo gutangira kubaka isoko mpuzamahanga ryo ku mupaka wa Cyanika, igomba kuba yatangiye. Ariko umwaka warangiye ridatangiye kubakwa.

Mu ntangiriro za 2016 nibwo byagaragaye ko aho rizubakwa hatangiye gusizwa ku buryo bitanga icyizere ko noneho rigiye kubakwa.

Kuri ubu abari bahatuye bamaze kwimurwa nyuma yo kwishurwa. Ibikorwa byo kwimura abo baturage byatwaye amafaranga y’u Rwanda miliyoni 78.

Igishushanyo mbonera cy’iryo soko kigaragaza ko rigizwe n’inzu ndende y’ubucuruzi y’amagorofa atatu, hakiyongeraho ububiko bw’ibicuruzwa ndetse n’isoko ryo hanze ritwikiriye.

Iryo soko rigomba kubakwa mu rwego rwo guteza imbere ubucuruzi bwambukiranya imipaka, kuko ubusanzwe ku mupaka wa Cyanika nta mazu y’ubucuruzi akomeye ahabarizwa. Ibyo byose bizafasha abacuruzi bakoresha umupaka wa Cyanika kurangurira hafi.

Ikindi ni uko umupaka wa Cyanika uhoraho urujya n’uruza rw’abantu baba Abanyarwanda, Abagande n’abaturage bo muri Repubulika Iharanira Demokrasi ya Congo.

Byatangajwe n’abahinga mu gice cy’amakoro, munsi y’Ikirunga cya Muhabura. Ahantu hazwiho kwera ibirayi byinshi mu Karere ka Burera.

Uku ni ko ubusanzwe abahinzi b’i Burera babika imbuto y’ibirayi. Gusa, muri iki gihe barataka ko ntayo bafite.

Aba bahinzi bavuga ko mu gihembwe cy’ihinga A (2015-2016), bahinze ibirayi ariko mu mpera za Nzeri 2015 hagwa imvura nyinshi ivanze n’urubura irabyangiza. Igihe cyo gusarura na bwo imvura yaragwaga bituma n’ibyo bari bagiye guhunika bibora.

Twagirayezu Alphonse, umwe muri abo bahinzi, agira ati “Muri ibi bihe turimo imbuto y’ibirayi ntayo. N’abari barabihinze, barabitsemo imbuto, imbuto yaragiye irabora, ubu imbuto ntayo dufite.”

Akomeza avuga ko ibirayi ari byo bituma abaturage bo mu gace atuyemo barushaho kuva mu bukene. Kutabona imbuto zabyo ngo ni ikibazo kibahangayikishije.

Aba bahinzi bakomeza bavuga ko kubera kubura imbuto usanga bayigura amafaranga menshi ku buryo ikilo kimwe hari igihe bakigura ku mafaranga y’u Rwanda 500.

Abashinzwe iby’ubuhinzi mu Karere ka Burera bavuga ko iyo abahinzi b’ibirayi batabashije kwibikira imbuto yabyo bayigura ku batubuzi b’imbuto babigize umwuga. No muri iki gihe ngo ni ho bazayigura kuko ihari.

Gusa ariko, ngo abahinzi bamwe bagira uruhare mu kutabona imbuto kuko usanga ngo badakurikiza inama bagirwa ugasanga beza ibirayi ariko bikabora. Abandi na bo ngo usanga bagurisha ibyo bejeje byose ntibanasige n’imbuto.

Simpenzwe Celestin, umukozi w’akarere ka Burera ushinzwe ubuhinzi, avuga ko usanga hari bamwe mu bahinzi bafumbiza ibirayi ifumbuire ya DAP itemewe mu birayi, bavuga ko ariyo ituma ibirayi bibyibuha. Ifumbire igenewe ibirayi ngo ni iyitwa NPK ituma ikirayi gikomera.

Agira ati “Iyo ukoresheje DAP (ubwoko bw’ifumbire) ikirayi kigira amazi, ugiye kukibikamo imbuto kirabora. Mu gihe NPK iyo uyikoresheje (ikirayi) kirumuka (kikamara igihe).”

Akomeza avuga ko bakomeza kwigisha abo bahinzi bakabasaba kandi kujya bamenya gusigaza ibirayi byiza bazakuramo imbuto.

Babitangaje tariki ya 22 Gashyantare 2016 ubwo mu Rwanda hose abaturage babyukiraga mu gikorwa cy’amatora y’Abajyanama rusange b’Uturere.

Kuri bimwe mu biro by’itora byo mu karere ka Burera mu ma saa sita za kumanywa hazaga gutora abaturage bake bake

Musekura Kalisa wo mu karere ka Burera asaba umuyobozi yatoye ko yakomeza kubagezaho amazi meza n’amashanyarazi kuko hari henshi muri ako karere bitari byagera. Agahamya ko bihageze hose byatuma abaturage bagira ubuzima bwiza kandi bakajijuka.

Yongeraho avuga ko ariko abanyaburera benshi bakurwa mu bukene n’ubuhinzi cyane cyane ubw’ibirayi. Ariko ngo bagorwa no kubona imbuto zabyo. Umuyobozi yatoye ngo abafashije kujya babona imbuto mu buryo bworoshye abaturage barushaho kuva mu bukene.

Abaturage bo mu karere ka Musanze basaba kugezwaho imihanda myiza ndetse n’umujyi wabo ukabamo inyubako z’ijyanye n’iterambere

Si ibyo gusa abaturage basaba abayobozi bitoreye. Abo mu karere ka Musanze bo bahamya ko kugira imihanda myiza ndetse n’inyubako nziza mu mujyi wa Musanze byatuma barushaho gutera imbere.

Ntabanganyimana Velancila asaba uwo yatoye agira ati “Atugeze ku bikorwa bya kijyambere duture heza… amazu asukuye yubatse kijyambere…”

Umuturage wo mu karere ka Gicumbi ubwo yari amaze gutora. Abanyagicumbi bifuza ko abo batoye barushaho kubegera

Abaturage bo mu ntara y’Amajyaruguru bakomeza basaba abayobozi bitoreye ko kandi barushaho kubaba hafi aho kuguma mu biro; nk’uko Ntagozera Gregoire wo mu karere ka Gicumbi abisobanura.

Ati “Icyo twifuza ku bayobozi b’Uturere ni uko badufasha igihe tubatoye bakabasha kumva ko tubakeneye noneho bakajya bamanuka bakaza bakumva ibibazo byacu bakanabikemura”.

Abaturage bo mu ntara y’Amajyaruguru kandi bavuga ko barushaho gutera imbere bakava mu bukene abayobozi bitoreye bavugishije ukuri, bagashyira mu bikorwa ibyo bemereye abaturage ubwo biyamamazaga.

Bamwe mu batoresha mu karere ka Rulindo bategereje abaturage baza gutora

Rugwiro Jean Claude wo mu karere ka Rulindo avuga ko usanga hari bamwe mu bayobozi bemerera abaturage ko bazabagezaho ibikorwa by’iterambere ariko ngo ugasanga manda yabo irangiye ntabyo babagejejeho.

Muri rusange abaturage bo mu ntara y’Amajyaruguru bemeza ko abayobozi batoye barushijeho kubegera, bakabagezaho ibikorwa by’iterambere birimo amazi, amashanyarazi n’imihanda, bagafasha abahinzi guteza imbere ubuhinzi bwabo, nta kabuza intara yabo yatera imbere.

Aba baturage babarirwa mu 142 ni abahinga mu gishanga cya Kamiranzovu kiri mu Murenge wa Butaro, ahantu hangana na hegitari 15. Bahamya ko ubwo muri Nzeri 2015 biteguraga guhinga ibirayi ubuyobozi bwahise bubabuza.

Zimwe muri Stevia bari bahinze bari mu igerageza muri icyo gishanga.

Maniraguha Patricia avuga ko ubuyobozi bwababwiye ko hari rwiyemezamirimo ugiye guhinga muri icyo gishanga igihingwa ngengabukungu cyitwa Stevia kizazana amadovize mu Rwanda, ntibazuyaza kubyemera.

Ariko ngo kuva icyo gihe kugeza ubu igishanga cyararaye, bababujije kugihingamo kandi ntibanabwirwa igihe rwiyemezamirimo azatangira guhingamo Stevia.

Byibura ngo n’iyo haba harahinzwemo icyo gihingwa uwo rwiyemezamirimo aba yarabahayemo akazi akabahemba bakabona ikibatunga.

Maniraguha ahamya ko kuri ubu bafite inzara kuko imirima iri muri icyo gishanga ari yo bakuragamo amaramuko.

Agira ati “Ubu turi gutya abana ni ukuturirana, inzara irenda kutwica…iki gishanga ni cyo twakuragamo amaramuko none ubuzima bwacu busa nk’aho bwahagaze, bitewe n’inzara nyine no kudahinga. Akarayi (ibirayi) kari katugejeje kuri byinshi. Iterambere ryose twari turifite mu gishanga.”

Izo hegitari 15 zigomba guhingwamo Stevia ni agace gato k’igishanga cya Kamiranzovu. Abafite imirima ku ruhande rw’aho hazahingwa Stevia bejeje ibirayi. Ibyo ni bimwe mu bibabaza abaturage babujijwe guhinga, bavuga ko na bo ubu baba bari gusarura.

Nyirarucaba Speciose, umukecuru uri mu kigero cy’imyaka 60 y’amavuko, w’umupfakazi ubana n’abana bane, avuga ko muri izo hegitari 15 afitemo akarima, atabasha kuvuga ingano yako. Kutagahinga ngo byamuteje ubukene kuko ngo nta mbaraga afite zo kujya gupagasa.

Agira ati “Sinshoboye kujya gukorera amafaranga ngo mpahe! Ariko muri iki gihe mba ndi gukura ibirayi…nkazanamo agasafuriya ngakura, nkajya kugaburira abuzukuru banjye, nanjye inda yanjye ikarya. Nta handi turajya guhahira! Ntiturajya mu Bugande (guhahirayo)! Nkanjye ubu najyayo! Ntabwo nshoboye!”

Hegitari 15 z’iki gishanga ni zo zigomba guhingwaho stevia.

Abaturage bakomeza bavuga ko iyo baba barahinzemo ibirayi ubu baba barasaruye, baratangiye guhingamo ibigori. Bavuga ko icyo gishanga kibafatiye runini kuko kirimo amazi menshi ku buryo no mu gihe cy’izuba bahinga bakeza.

Icyo gishanga ni icya Leta

Icyo gishanga abaturage babujijwe guhingamo kigengwa n’Akarere ka Burera. Ako karere karakibakodesha bakagihinga ubundi bakishyura.

Hishyura umuhinzi ufite umurima ungana na Are imwe (metero 10 ku 10) kuzamura. Are imwe yishyurwa amafaranga y’u Rwanda 600 ku mwaka.

Ayo mafaranga yose anyuzwa ku buyobozi bwa koperative bubahagarariye, bubacungira hafi kugira ngo batarwanira imirima, ubundi akagezwa ku karere.

Ikindi ngo ni uko bababujije guhinga igihe bari barakodesheje kitarangiye. Gusa ariko bavuga ko ubwo bababuzaga guhinga babizezaga mu magambo ko bazabasubiza amafaranga yari asigayemo. Ariko ngo ntayo bigeze babaha.

Aba baturage bose basaba ubuyobozi ko bwabemerera bakongera bagahinga cyangwa bakabasubiza ayo mafaranga angana na ½ cy’ayo bishyuye.

Gusa ariko ngo n’iyo babemerera guhinga ubu ntacyo baba bagihinzemo kuko igihe cy’ihinga cyarenze. Keretse bongeye guhingamo muri Gicurasi 2016.

Babanje guteguza abaturage

Ubuyobozi bw’Akarere ka Burera buvuga ko ikibazo cy’abo baturage bukizi. Bugahamya ko mbere y’uko bubabuza kongera guhinga, bwabanje kubateguza.

Ubu buyobozi bwongeraho ko umushoramari ufite kompanyi yitwa Stevia Life Ltd ari we wagombaga guhinga Stevia kuri izo hegitari 15. Ngoari yarabijeje ko azatangira guhinga bitarenze Muri Mutarama 2016.

Ariko ngo na bo batunguwe no kubona ukwezi kwa mbere kugera ariko ntibabone imyiteguro yo gutangira guhinga.

Nizeyimbabazi Jean de Dieu, Umukozi ushinzwe Ubuhinzi n’Ubworozi mu Karere ka Burera, avuga ko bahamagaye ndetse banandikira kenshi umuyobozi w’iyo kompanyi bamubwira ko igihe cyo guhinga Stavia cyageze ariko ntihagire igikorwa.

Kabiligi Jean Marie Vianney, Umukozi w’Akarere ka Burera ukurikiranira hafi umushinga wo guhinga Stevia muri ako karere, ahamya ko iyo kompanyi yananiwe iby’uwo mushinga igasezera. Agira ati “(Stevia Life Ltd) Irananirwa ubu yarasezeye yavuyeho.”

Uzahinga Stevia bamuhaye igihe ntarengwa

Kabiligi akomeza avuga ko ariko nyuma y’uko uwo mushoramari asezeye bategereje undi ufite sosiyete yitwa Stevia Life Sweeteners.

Uyu na we ariko ngo bamuhaye igihe kitarenga ibyumweru bibiri (kuva tariki ya 16 Gashyantare 2016) yaba ataraza guhinga Stevia bagahita bafata umwanzuro ko icyo gihingwa kitagihinzwe mu Karere ka Burera mu mwaka wa 2016.

Akomeza avuga ko guhinga icyo gihingwa biri mu mihigo y’Akarere ka Burera ya 2015-2016, kiramutse kidahinzwe, uwo muhigo bahita bawuvana mu yindi.

Bruce Irambona, Umuyobozi wa Kompanyi Stevia Life Ltd mu Rwanda, we avuga ko itaretse guhinga Stevia mu karere ka Burera ahubwo ngo yaratinze. Ariko ntasobanura neza icyatumye itinda.

Ariko hari amakuru amwe avuga ko gutinda byaba byaratewe no kubura abatera nkunga bagombaga gutera inkunga ubuhinzi bwa Stevia mu Karere ka Burera.

Irambona avuga ko ahubwo muri uko gutinda byatumye havuka indi kompanyi yitwa Stevia Life Sweeteners, izakora ibyo iyo kampani yindi yagombaga gukora.

Agira ati “Harimo ibintu bitagenze neza byakosowe…uburenganzira bwa nyuma (bwo guhinga Stevia) burashyirwaho umukono muri MINAGRI (Minisiteri y’Ubuhinzi n’Ubworozi) muri kino cyumweru (cyatangiye tariki ya 15 Gashyantare 2016) hanyuma ibintu bisubukurwe…”

Jean Marie Munyaneza, Umukozi w’agashami k’Ibihingwa bitandukanye mu kigo cy’u Rwanda gishinzwe kohereza mu mahanga ibikomoka ku buhinzi mu Rwanda (NAEB), na we ahamya ko Stevia Life Ltd itasezeye. Ahubwo ngo “Barakitunganya kugira ngo barebe niba ubwo butaka bwose Burera inavuga babukoresha.”

Akomeza avuga ko igihingwa cya Stevia ari igihingwa gifitiye u Rwanda akamaro gakomeye akaba ari yo mpamvu bari gutunganya neza uwo mushinga wo kugihinga muri Burera kugira ngo kizatange umusaruro uko bikwiye.

Igihingwa cya Stevia kivamo isukari ishobora kunyobwa n’abarwaye Diyabeti. Abahanga mu binyabuzima bavuga ko uburyohe bwayo buruta inshuro 300 zose ubw’isukari isanzwe ikorwa mu bisheke.

Leta y’u Rwanda yashyize ingufu mu buhinzi bw’icyo gihingwa kuko gishakishwa ku isi n’inganda zikora ibinyobwa zirimo urwo muri Amerika rwa Coca Cola.

Ikiro kimwe cya Stevia itunganyije kigura amafaranga y’u Rwanda arenga ibihumbi 18 mu gihe icy’ibibabi byacyo kigura amafaranga arenga 1500.

Icyo gihembo yagihawe mu birori ngarukamwaka byo guha ibihembo abahanzi bagaragaje ubudashyikirwa mu bihangano byabo mu mwaka watambutse Grammy Awards 2016, byabereye muri Leta Zunze Ubumwe z’Amerika ku wa mbere tariki ya 15 Gashyantare 2016.

Kijdo afite igihembo cya gatatu cya Grammy Awards.

Kidjo yahawe icyo gihembo kubera Album yise “Sings”, iriho indirimbo zivanze n’injyana ya “Classic” imenyerewe mu bihugu by’u Burayi n’Amerika. Iyo album yayikoze afatanyije n’itsinda ry’abacuranzi n’abaririmbyi ba “Classic” ryitwa “Orchestre Philharmonique du Luxembourg”.

Ubwo yajyaga gufata icyo gihembo yagize ati “Iki gihembo ngituye abahanzi bose b’indirimbo za gakondo muri Afurika, mu gihugu cyanjye ndetse no ku bandi bose bakizamuka.

Afrika yarahagurutse, Afurika iteye ibyishimo. Nimucyo dushyire hamwe, tube umwe muri muzika ubundi twamagane urwango n’imvururu.”

Kidjo atsindiye icyo gihembo ahigitse abo bari bahanganye mu gice kiswe “Best World Music Album” aribo Anoushka Shankar, Gilberto Gil wo muri Brazil, Korali y’abagabo bo muri Afrika y’Epfo yitwa Ladysmith Black Mambazo, hakiyongeraho indirimbo zikusanyije ziswe Zomba Prison Project zaririmbwe n’abagororwa bo muri Malawi.

Muri 2015 nabwo yahawe icyo gihembo kubera indi album ye yise “Eve” naho muri 2008 ari nabwo bwa mbere yari agitsindiye kubera album yise “Djin Djin.”

Angelique Kidjo ubundi witwa Angélique Kpasseloko Hinto Hounsinou Kandjo Manta Zogbin Kidjo, yavutse mu 1960. Yamenyekanye mu Rwanda no ku isi yose kubera indirimbo ze zirimo iyitwa “Agolo”, “We We”, “Adouma”, “Wombo Lombo”, “Afirika” n’indirimbo yasubiyemo yakunzwe cyane yitwa “Malaika.”

Aba baturage babitangaje kuri uyu wa gatanu tariki 12 Gashyantare 2016, ubwo bamwe mu biyamamariza kujya mu Nama Njyanama y’akarere ka Burera, biyamamarizaga mu murenge wa Cyanika.

Abaturage ba Nyagahinga basaba ko bagezwaho amashanyarazi bahora bemererwa.

Abanyagahinga bavuga ko kuva mu myaka yatambutse abiyamamariza kujya mu nzego zitandukanye z’ubuyobozi, baza kwiyamamariza mu murenge wabo bakabizeza ko bazabakemurira ikibazo cy’umuriro w’amashanyarazi nyamara bikarangira ntawo babonye.

Nsabimana Theogene uri mu kigero cy’imyaka 30 y’amavuko, avuga ko kuva yamenya ubwenge bahoraga babibabwira.

Agira ati “Ni abantu baba baza batubeshya gusa! Kutwizeza ibitangaza bidashoboka! Namenye ubwenge umuriro bawutubeshya na n’uyu munsi baracyawutubeshya. Nta n’uwaza ngo avugishe ukuri cyangwa se ngo bamanike amaboko bavuge ngo umuriro byaratunaniye, tumenye ko ntawo.

N’ubwo babivuze ntabwo tubyeme! Ni ugupfa kwikiriza ariko ntabwo tubyemeye, ni kenshi babitubeshya ntabwo tubyemereye!”

Abacururiza muri iri soko rya Nyagahinga bavuga ko imbogamizi bafite ari iyo kutagira amashanyarazi.

Akagari ka Nyagahinga karimo santere ikomeye y’ubucuruzi ikomeye. Icururizwamo ibintu bitandukanye byiganjemo ibirayi n’ibishyimbo. Abahacururiza bavuga ko kutagira amashanyarazi ariyo mbogamizi ya mbere bafite.

Aba bacuruzi bavuga ko bacuruririza muri butike zabo ariko kubera umwijima bagafunga mu ma saa kumi n’ebyiri z’umugoroba. Baramutse bafite umiriro ngo bafunga mu ma saa tatu z’ijoro cyangwa na nyuma yaho.

Dusabimana Theogene agira ati “Inaha hari abantu bize gusudira inzugi, bakaziteranyije ariko kubera ko nta muriro abongabo baricaye nta kazi. Kubera ko nta muriro nta “computer” wabonamo. Kubera ko nta muriro nta banki yaza hano.”

Abaturage ba Nyagahinga bari barijejwe ko bitarenze ukwezi kwa Kamena 2015, amashyanyarazi aba yarabagezeho.

Aba baturage bongeye gusaba abazatorwa kujya mu nama njayanama y’akarere ka Burera kubakemurira icyo kibazo nabo bakava mu mwijima.

Kuri ubu Abanyaburera bafite amashanyarazi babarirwa muri 20, ariko biteganywa ko ko muri 2017 bazaba bageze kuri 70%.

Byavuzwe n’abo mu Kagari ka Gisovu mu Murenge wa Cyanika ku wa 08 Gashyantare 2016, nyuma yo gutora abagore bazabahagararira mu kagari no mu murenge.

Abagore ba Burera barasaba bagenzi babo batoye kubakorera ubuvugizi bakabona uko bigobotora ubukene.

Abo bagore bavuga ko ikibazo bafite gikomeye, nk’abagore bo mu cyaro, ari ubukene. Bakavuga ko ubushobozi bubafasha gukora bakiteza imbere.

Karwera Vanessa, umwe muri abo bagore, asaba abagore bazabahagararira kubakorera ubuvugizi na bo bakajya babona ku mafaranga yagenewe abagore aza mu karere.

Agira ati “Tujya twumva ngo hari amafaranga ajya aza y’abadamu…ariko noneho twamara kubatora, amafaranga agaherayo ntibajye kuyatubariza, tugaheruka twabatora. Ariko buriya ubwo dutoye neza, bazatubariza ayo mafaranga noneho bitume n’umugore wo mu cyaro azamuka.”

Ayo mafaranga agenerwa abagore anyura mu kige BDF. Afasha abagore kubona ingwate bityo bakaka inguzanyo muri banki bagashyira mu bikorwa imishinga yabo. Abagore badafite ubushobozi bahabwa ingwate ya 75%.

Baje gutora ari benshi ngo barebe ko babona impinduka bakava mu bukene.

Ibi babivuga ariko mu gihe mu mpera za 2015, uhagarariye Inama y’Igihugu y’Abagore mu Karere ka Burera, Mujawayezu Leonie, yatangaje ko muri ako karere abagore bari kwikura mu bukene. Yavuze ko kabarirwamo abakoperative y’abagore 56 hakaba n’ibimina 242 bizwi by’abagore.

Abagore usanga bitabira ibimina cyane. Ibyo bimina ngo ni byo bibakemurira ibibazo bya buri munsi mu rugo.

Barahura, bagateranya amafaranga, yamara kugwira bagatanga mitiweri, bakaguriranamo amatungo magufi, nk’ihene, ndetse n’imifariso, bagaca nyakatsi yo ku buriri.

Nubwo abagore ngo batari bumva neza akamaro k’amakoperative, Mujawayezu ahamya ko abari muri ibyo bimina ari bo bazigishwa, banasobanurirwe ibyiza by’amakoperative bityo na bo bayatangize.

Mu myaka yatambutse kenshi humvikanaga ibinyabiziga byafashwe bipakiye ifumbire mvaruganda yagenewe abahinzi, bigiye gucuruza forode muri Uganda. Ariko guhera mu mpera za 2013 kugeza ubu ntiharongera kumvikana abafatanwe forode y’iyo fumbire.

Iyi santere ya Mugu niyo yanyuragamo forode y’ifumbire mvaruganda.

Simpenzwe Celestin, umukozi w’Akarere ka Burera ushinzwe ubuhinzi, avuga ko ingamba zitandukanye bafashe ari zo zatumye forode y’ifubire mvaruganda icika burundu.

Agira ati “Amabwiriza yavugaga ko imodoka yafashwe, itanga amande ya miliyoni imwe y’amafaranga y’u Rwanda noneho n’imodoka igafatirwa ukwezi kose. Igare (na moto) ryafatwaga, bamwamburaga ifumbire noneho agatanga n’amande y’ibihumbi 50Frw; kandi byatanze umusaruro.”

Akomeza avuga ko ifumbire bamburaga abo baforoderi bahitaga bayisubiza muri Minisiteri y’Ubuhinzi n’Ubworozi mu Rwanda (MINAGRI) kuko ari yo nubundi isanzwe iyiha abahinzi.

Simpenzwe akomeza avuga ko banifashishije abacuruzi b’iyo fumbire, batangaga amakuru hakamenyekana abayicuruza mu buryo butemewe.

Akenshi muri Burera hafatirwaga imodoka zikoreye ifumbire mvaruganda ya forode.

Abacuruzi b’ifumbire mvaruganda bo muri aka karere bahamya ko ifumbire ya forode yafatwaga ipakiye mu mudoka, yabaga iturutse mu tundi turere, aka Burera kakaba icyambu kuko yikorerwaga ku mutwe cyangwa igahekwa ku magare na moto.

Habiyakare Jerome, Perezida w’abacuruzi b’inyongeramusaruro mu Karere ka Burera, na we ahamya ko nta nyerezwa ry’ifumbire rikirangwa muri ako karere.

Ati “Ifumbire yose ikoreshwa hano, ikoreshwa n’abahinzi. Dufatanyije n’inzego z’umutekano n’ubuyobozi bw’ibanze. Ibyo byose biri mu bintu bikumira forode; ni yo mpamvu aka kanya nta nyerezwa ry’ifumbire rikihaba.”

Abahinzi na bo bahamya ko ifumbire bayibona neza. Nziyumvira Faustin, umwe muri bo, agira ati “Ifumbire rirahari tuyibona neza.”

Santere ya Mugu yo mu Karere ka Burera iri ku mupaka uhuza u Rwanda na Uganda, ni ho hanyuraga forode y’ifumbire mvaruganda igiye gucuruzwa muri Uganda. Imodoka ziyipakiye zarahafatirwaga cyangwa zigafatwa zerekezayo.

Ubwo hizihizwaga umunsi ngarukamwaka w’Intwari z’u Rwanda, ni bwo Abanyacyanika bibukijwe kurwanya ibyo biyobyabwenge.

Abanyacyanika basabwa gufatanya n’ubuyobozi kurwanya kanyanga.

Umunyamabanga Nshingwabikorwa w’Umurenge wa Cyanika, Kayitsinga Faustin, asaba abaturage gufatanya n’umuyobozi kurwanya bivuye inyuma icyo kiyobyabwenge.

Agira ati “Umunyarwanda nanywa ibiyobyabwenge akayoba ubwenge, azaba intwari ate? Birashoboka ko umuntu anywa kanyanga akaba intwari?... Duharaniye ubutwari twubaka ejo hazaza. Ntabwo tuzubaka ejo hazaza tunywa ibiyobyabwenge.”

Umurenge wa Cyanika ni umwe mu mirenge yo mu Karere ka Burera ituriye umupaka uhuza u Rwanda na Uganda. Muri uwo murenge hakunze gufatirwa abantu bikoreye cyangwa se bacuruza ibiyobyabwenge byiganjemo kanyanga.

Icyo kiyobyabwenge gituruka muri Uganda, kikazanwa mu Rwanda n’abo bita Abarembetsi banyura inzira zitazwi zitwa “panya”. Iyo bakigejeje mu Rwanda kiracuruzwa, abaturage bakakinywa, bigatuma bamwe batitabira umurimo cyangwa bagateza amakimbirane kubera gusinda.

Umunyamabanga Nshingwabikorwa w’Umurenge wa Cyanika, Kayitsinga Faustin, avuga ko kunywa ibiyobyabwenge bitagira umuntu intwari.

Nubwo muri uwo murenge haragara bamwe banywa ndetse bakanacuruza kanyanga, bigaragara ko abawutuye bazi ububi bwayo. Bavuga ko ntako batagira ngo batange amakuru ngo kanyanga icike burundu ariko ntibikunde kubera indonke y’amafaranga ibamo.

Zirimabagabo Jean Claude, uhamya ko ari umunywi wa kanyanga, avuga ko nubwo ayinywa nta cyiza cyayo. Usibye kuba imumaraho amafaranga, ngo inatuma nta kindi akora kuko iyo amaze kuyinywa ahita acika intege.

Agira ati “Iyo usomyeho rero (kuri kanyanga) urabizi, ni cyo gituma ubona usanze ndyamye hano, ntabwo ndi kumva mu mutwe nterereye (meze neza). Iyo nsomyeho gato, nta mutekano ngira mu mutwe. Ntabwo twagira ubutwari uri kureba uko meze.”

Akomeza avuga ko kureka kunywa kanyanga byamunaniye kuko ngo iyo abonye aho abandi bayinywa, na we ahita ayishaka akayigura.

Uyu mugabo unacuruza avuga ko ashobora gucuruza ibihumbi 15 by’amafaranga y’u Rwanda ku munsi akarara abinywereye byose.

Yabibasabye kuri uyu wa 29 Mutarama 2016 ubwo mu Karere ka Burera habaga ihererekenyabubasha hagati ya Sembagare Samuel, wari umuyobozi w’akarere n’abari bamwungirije na Kamanzi Raymond, Umunyamabanga Nshingwabikorwa w’ako karere, ugiye kuba akayobora mu nzibacyuho y’iminsi 30.

Abakozi b’Akarere ka Burera baha impano Sembagare, wari umuyobozi w’ako karere, mu rwego rwo kumushimira.

Guverineri Bosenibamwe yashimye Akarere ka Burera muri rusange kuko ngo karanzwe n’ubumwe n’ubufatanye bigatuma gakunda kuza mu turere twa mbere mu Rwanda mu kwesa imihigo.

Yakomeje asaba abakozi bako gukomeza ubwo bumwe n’ubufatanye. Yababwiye ko batagomba kudohoka ku ntego ngo ni uko abayobozi basezeye.

Ahubwo ngo bakwiye kurushaho gukora cyane bumvira amabwiriza y’umuyobozi mushya ugiye kuyobora mu nzibacyuho.

Yagize ati “Muzumvire umuyobozi mushya ugiye kubayobora! Ni umugabo ucisha make, umugabo utiremereza, ntabwo yigira umutegetsi, arasuzuma.”

Sembagare ashyikiriza Kamanzi, ugiye gusigara ayobora akarere, igitabo gikubiyemo ibikorwa byose by’akarere.

Yakomeje asaba kandi Kamanzi, gukomereza aho Nyobozi yasezeye yari igereje mu gihe hagitegerejwe abandi bazayisimbura.

Kamanzi avuga ko nubwo agiye kuyobora, agakora akazi ka Nyobozi ndetse na Njyayanama kandi ari wenyine, yizeye neza ko inzibacyuho izarangira akarere kadasubiye inyuma na gato.

Agira ati “Ni byo ni akazi gakomeye ariko hari inzego nyinshi tuzafatanya: intara iri hano hari n’inzego z’umutekano, zose zari ziri hano zemeye ko tuzafatanya.”

Sembagare yemereye Kamanzi ubufasha bwose bushoboka mu gihe cy’inzibacyuho.

Abakozi b’Akarere ka Burera ndetse n’abayobozi kuva ku mudugudu kugeza ku murenge bijeje Guverineri Bosenibamwe ko bazakomeza ubufatanye bagateza imbere akarere kabo. Na Guverineri ubwe yabijeje gukomeza kubaba hafi mu gihe cy’inzibacyuho.

Sembagare Samuel, wahoze ayobora Akarere ka Burera, na we yemereye Kamanzi ko azakomeza kumuba hafi akamuha ubufasha bwose bushoboka muri icyo gihe cy’inzibacyuho. Akaba yanamusabye gukomeza gushyira mu bikorwa imihigo y’akarere.

Muri Gahunda ya VUP (Vision 2020 Umurenge Program) abaturage bafashwa kwikura mu bukene binyuze mu nkunga y’ingoboka, abakora imirimo y’amaboko bagahembwa ndetse n’abahabwa inguzanyo bakayikoresha mu mishinga itandukanye, bakazishyura ku nyungu y’amafaranga 2%.

Umuhuzabikorwa wa VUP mu karere ka Burera avuga hari bamwe bahabwa inguzanyo ntibayikoreshe icyo yagenewe

Kuva mu mwaka wa 2009, miliyoni zisaga 800 z’amafaranga y’u Rwanda yagurijwe abaturage ariko hamaze kugarurwa amafaranga abarirwa muri miliyoni 600 gusa.

Ntawukiramwabo Adrien, umuhuzabikorwa wa VUP mu karere ka Burera, avuga ko impamvu abahawe inguzanyo bose batayigarurira rimwe ari ukubera ko usanga hari bamwe bakoresha inguzanyo bahawe mu bindi aho kuyikoresha mu mushinga ugenewe iyo nguzanyo.

Agira ati “…niba yabonye amafaranga wenda akumva ko yajya kugura se ishati, kugura ibyo kurya kandi ataribyo yasabiye inguzanyo…kuko iyo ukoze ibinyuranye n’ibyo wakoze mu mushinga, umushinga ufita uhomba.”

Yongeraho avuga ariko aho batangiriye guhugura abahawe inguzanyo, bagenda bishyura kuburyo ngo n’abandi basigaye bazishyura.

Ntawukiramwabo akomeza avuga ko ari yo nayo mpamvu bateguye amahugurwa y’iminsi ine y’abagize komite zitanga inguzanyo ya VUP mu mirenge, mu rwego rwo kubungura ubumenyi mu gukoresha amafaranga.

Aba bakaba ari bo bazafasha abaturage bahabwa inguzanyo, gutegura neza imishinga iramba, izabafasha kuva mu bukene kandi bakabasha kwishyura inguzanyo neza. Ayo mafaranga akagurizwa abandi na bo bakikura mu bukene.

Ubwo kuri uyu wa kane tariki ya 20 Mutarama 2016, basozaga ayo mahugurwa, abayahawe bavuze ko azabafasha cyane mu kwigisha abaturage uburyo bagomba gukoresha neza inguzanyo ya VUP ; nkuko Nsabimana Evariste, umwe muri bo, abisonabura.

Agira ati “…tukabasobanurira ko n’ayo mafaranga azajya asubizwa kugira ngo n’abandi batari bahabwa ayo mafaranga nabo bayabone ku buryo amafaranga azagera kuri buri mugenerwabikorwa wa VUP…”

Inguzanyo ihabwa abagenerwa bikorwa ba VUP iva ku bihumbi 60 by’mafaranga y’u Rwanda kugera kuri miliyoni imwe.

Ubuyobozi bw’Akarere ka Burera buvuga ko abamaze gutanga amafaranga y’ubwisungane mu kwivuza, babarirwa muri 86%, babasha kwivuza ariko ngo n’abo basigaye batarayatanga bakorewe urutonde kugira ngo begerwe hamenyekane impamvu badatunga Mitiweri.

Uwambajemariya avuga ko abataratanga Mitiweli bari kwegerwa kugira ngo hamenyekane ikibazo bafite

Uwambajemariya Florence, umuyobozi wungirije w’Akarere ka Burera ushinzwe imibereho myiza y’abaturage, avuga ko nihamara kumenyekana ikibazo bafite nta kabuza nabo bazajya mu mubare w’abivuriza kuri Mitiweli.

Agira ati “Turi kugenda tuganira na buri wese kugira ngo turebe ikibazo cy’umwihariko afite bityo tugikemure. Yaba yishoboye tukamufasha mu myumvire, yaba atishoboye tukareba uburyo twamufasha.”

Ubusanzwe abari mu cyiciro cya mbere n’icya kabiri cy’ubudehe nibo batangirwa amafaranga ya Mitiweri.

Ariko usanga hari n’abari mu kiciro cya gatatu ariko bafite nk’uburwayi bubakomereye cyangwa izindi nzitizi zituma batabasha kubona amafaranga yo kwishyura Mitiweli. Uwamabajemariya ahamya ko bene nkabo nabo babafasha.

Abaturage bo mu karere ka Burera batandukanye bavuga ko igituma bamwe badatanga amafaranga ya Mitiweri ari ubukene.

Ibi bishimangirwa kandi na Mukankusi Immaculée ufite imyaka 65 y’amavuko, utuye mu murenge wa Cyanika, uhamya ko nawe nta Mitiweri afite kubera ko akennye.

Agira ati “Nta Mitiweli mfite nabuze amafaranga yo kuyigura. Mbura nuwo kuyingurira! Nta mafaranga mfite, nta n’ikintu nigirira mbese…nyine ndarwara umutwe urandya, ibicurane, inkorora, bigakira nkabona biragabanutse. Sinjya kwa muganga.”

Gusa ariko hari n’abanga kuyitanga babitewe n’imyumvire ikiri hasi kandi bafite ubushobozi. Bituma rero abadafite Mitiweli bamwe bajya kwivuza magendu.

Ubusanzwe umwaka w’ubwisungane mu kwivuza, Mitiweli, utangira muri Kamena cyangwa Nyakanga buri mwaka ukarangira mu mwaka ukurikiyeho muri Kamena. Usibye abishyirirwa abandi batandukanye bishyura amafaranga y’u Rwanda 3000 kugira ngo batunge iyo karita yo kwivurizaho.

Iyi modoka ifite nimero za pulaki RAB765Q yari ijyanye ibitaka ahari kubakwa umuhanda mu Murenge wa Cyanika, yakoreye impanuka mu ikorosi ry’ahitwa “Mu Ngege” riri muri uwo murenge, mu muhanda Musanze-Cyanika, mu saa tanu za mu gitondo cyo kuri uyu wa 22 Mutarama 2016.

Batatu bari bari muri iyi FUSO bavuyemo bagihumeka ariko bakomeretse bikomeye

Batatu bari bayirimo, barimo shoferi wari uyitwaye, kigingi we n’undi mwana bari batwaye, bavuyemo bagihumeka ariko bakomeretse bikomeye bahita bajyanwa kwa muganga.

Ababonye iyo mpanuka iba bahamya ko iyo FUSO nta muvuduko mwinshi yari ifite ngo ahubwo yagize ikibazo cya tekiniki.

Ibitaka yari ihetse byose byanyanyagiye mu muhanda

Umwe mu babonye iyo mpanuka iba ariko wanze kwivuga izina avuga ko icyuma cyo muri iyo FUSO gihuza amapine y’imbere n’ay’inyuma, yise “Karada, ari cyo cyacitse maze cyishinga mu muhanda.

Yibiranduye mu muhanda icy’inyuma cyenda kuvaho

Agira ati “Yaje igeze hariya ishinga ‘Karada’ iribirindura iragwa. Yibirinduye nka kabiri… imodokari yari ifite ikibazo n’ejo (tariki ya 21 Mutarama 2016) yari iri mu igaraje bari kuyikanika.”

Ubwo Kigali Today yageraga aho iyo mpanuka yabereye, yasanze iyo modoka yitambitse mu muhanda, ibitaka yari ihetse byanyanyagiye mu muhanda ku buryo imodoka ziwukoresha zanyuraga ku ruhande.

Yahise yitambika mu muhanda

Si ubwa mbere muri iryo korosi habera impanuka. Mu kwezi kwa munani 2015, habereye impanuka ya Minibisi, igonga umuntu umwe arapfa abandi icyenda bari bayirimo barakomereka bikomeye.

Iyo Fuso yakoreye impanuka mu ikorosi rizwi ku izina ryo mu Ngege

Ababonye iyo mpanuka iba bavuze ko yo yatewe n’umuvuduko mwinshi. Kuko ngo yashakaga kunyura ku yari iri imbere yayo bageze muri iryo korosi uwari uyitwaye iramunanira ihita yibirandura.

Polisi y’u Rwanda ikorera mu Karere ka Burera ihora isaba abatwara imodoka muri uwo muhanda kugabanya umuvuduko ndetse no gukoresha igenzura ngo harebwe niba imodoka zabo zujuje ibyangombwa (Controle Technique) ariko bamwe ntibabikurikiza.

Yabivugiye i Davos mu Busuwisi mu nama mpuzamahanga ngarukamwaka yiga ku bukungu bw’isi, World Economic Forum, yatangiye kuri uyu wa 20 Mutarama 2016.

Perezida Kagame muri World Economic Forum kuri uyu wa 20 Mutarama 2016.

Mu kiganiro kiswe “Transformation of Tomorrow” mu Kinyarwanda bishatse kuvuga “Guhindura ejo hazaza”, yavuze ko ikoranabuhanga ryazanye impinduka nyinshi nziza mu iterambere, rizana n’ibisubizo mu baturage.

Muri icyo kiganiro yakomeje avuga ko mu Rwanda ndetse no muri Afurica muri rusange bari mu rugendo rw’impinduka mu rwego rwo kubyaza umusaruro ugaragara ikoranabuhanga atari ukurikoresha gusa.

Ku kuba abantu badakoresha kimwe ikoranabuhanga kubera ko ritabageraho mu buryo bumwe (Digital Divide), Perezida Kagame yatangaje ko mu Rwanda hashyirwaho amategeko n’uburyo ikoranabuhanga ryakoreshwa mu rwego rwo kugabanya ibindi bibazo bimeze nk’icyo.

Minisitiri Louise Mushikiwabo na we ari mu batanze ibiganiro muri iyo nama.

Muri icyo kiganiro Perezida Kagame yari ari kumwe n’abandi banyacyubahiro nka Sheryl Sandberg, Satya Nadella, Anand Mahindra na Zachary Bookman. World Economic Forum ihuje abantu babarirwa mu2500 baturutse mu bihugu 99.

Ubuyobozi bw’Akarere ka Burera butangaza ko mu mwaka wa 2015 habarurwaga abarenga 3000 batazi gusoma, kwandika no kubara.

Gusigasira igisenge ni umwe mu mikorongiro Intore zakoze zigaragaza ubufatanye mu guteza imbere u Rwanda.

Uwambajemariya Florence, Umuyobozi w’Akarere ka Burera Wungirije ushinzwe Imibereho Myiza, avuga ko basanzwe bafite gahunda yo kwigisha abatazi gusoma, kwandika no kubara binyuze mu banyamadini batandukanye ndetse no mu bandi bafatanyabikorwa.

Uwambajemariya akomeza avuga ko abo basigaye harimo abatangiye kwigishwa. Ikaba ari yo mpamvu bagiye gufatanya n’Intore zo ku Rugerero kugira ngo n’abandi bigishwe, bityo Abanyaburera bakomeze kujijuka.

Agira ati “Izi ntore z’Inkomezabigwi tuzabaha urutonde rw’abasigaye, ku buryo Umunyarwanda azagenda atikandagira atewe ipfunwe no kuba atazi gusoma, kwandika no kubara.”

Tariki 19 Mutarama 2016 ubwo intore z’abarangije amashuri yisumbuye zo Karere ka Burera zasozaga Itorero, imwe mu mihigo zahize zizashyira mu bikorwa ku rugerero harimo kwigisha abatazi kwandika, gusoma no kubara, bakabimenya.

Izi ntore zihamya ko zizafasha ubuyobozi kujijura Abanyaburera ngo kuko kutamenya kwandika, no gusoma bigira ingaruka ku baturage mu mibereho yabo ya buri munsi, bigatuma badatera imbere.

Bapfakurera Jean Leonard, umwe muri izo ntore, avuga ko nko mu bijyanye n’ubuhinzi hari abadatera imbere kubera ubujiji.

Agira ati “Uwejeje nk’ibirayi, baza kubimugurira bakamwiba ku biro by’umunzani. Bagapima ibiro 100 ariko we bakamubwira 90 cyangwa 95.”

Akomeza avuga ko urwo ari urugero rumwe rw’ingaruka mbi zo kutamenya gusoma, kwandika no kubara. Ahamya ko nk’intore, biyemeje guhangana n’izo ngaruka.

Intore zizatangira urugerero tariki 27 Mutarama 2016.

Intore z’Inkomezabigwi zo mu Karere ka Burera zatumwe ku rugerero ni 1690. Zizatangira urugerero tariki ya 27 Mutara 2016.

Igitaramo cya Stromae i Kigali

Stromae, umuhanzi w’Umubiligi ukomoka ku Munyarwanda n’Umubiligikazi, yakoreye icyo gitaramo muri Kaminuza Yigenga ya Kigali (ULK), tariki ya 17 Ukwakira 2015.

Ubwo umuhanzi Stromae yari mu gitaramo mu Rwanda.

Icyo gitaramo cyari kitabiriwe n’abantu batandukanye babarirwa mu bihumbi n’ibihumbi, cyarangiye bamwe batabishaka kubera uburyo bari baryohewe n’imiririmbire, imibyinire ndetse n’imicurangiye y’uwo muririmbyi w’icyamamare ku isi.

Ubusanzwe Stromae yagombaga gutaramira i Kigali, tariki ya 20 Kamena 2015 mu ngendo yari arimo mu bihugu byinshi by’Afurika ariko ntibyakunda kubera ikibazo cy’uburwayi. Ibyo byatangajwe habura icyumweru kimwe gusa ngo ataramire Abanyarwanda.

Urubyiniro rwari ruteguye mu buryo budasanzwe bumenyerewe mu Rwanda.

Knowless yegukanye Guma Guma Super Star 5

Umuririmbyikazi Butera Jeanne d’Arc, uzwi ku izina rya Knowless, ni we wegukanye intsinzi mu marushanwa ngarukamwaka ya Primus Guma Guma Super Star, ubwo yabaga ku nshuro yayo ya gatanu. Yegukanye miliyoni 24 z’amafaranga y’u Rwanda.

Knowless amaze gusinyirwa na Bralirwa sheki y’intsinzi ya PGGSS5.

Tariki ya 15 Kanama 2015, ni bwo Knowless yashyikirijwe igihembo cye, mu birori byo gusoza ayo marushanwa. Yakiriye icyo gihembo nyuma y’urugendo rurerure kubera ko irushanwa rigeze hagati yatangaje ko arivuyemo ariko aza kongera kurisubiramo.

Mu marushanwa ya PGGSS5, uwo muririmbyikazi yari ahanganye n’abandi icyenda ari bo itsinda rya TNP, Rafiki, Paccy, Senderi, Jules Sentore, itsinda rya Active, Bull Dog kuwa 4, Dream Boys ndetse na Bruce Melody.

Miss Rwanda 2015

Kundwa Doriane ni we wahize abandi bakobwa 15 bahataniraga kwegukana ikamba rya Nyampinga w’u Rwanda, uzwi nka “Miss Rwanda” 2015, mu birori byabaye tariki ya 21 Gashyantare 2015.

Kundwa Doriane, Miss Rwanda 2015.

Muri Mutarama 2015 ni bwo, abo bakobwa bari bahagarariye intara zose z’u Rwanda ndetse n’Umujyi wa Kigali, bamenyekanye. Kundwa yari ahagarariye Intaraya y’Amajyaruguru y’u Rwanda.

Miss Rwanda Kundwa yakurikiwe na Vanessa watowe nk’igisonga cya mbere naho Raissa Akacu atorerwa kuba Igisonga cya kabiri.

Groove Awards

Groove Awards yatanze ibihembo ku bahanzi baririmba indirimbo zihimbaza Imana bakoze cyane kurusha abandi mu 2015 mu Rwanda.

Ku cyumweru tariki 13 Ukuboza 2015 mu ihema rya Serena Hotel ya Kigali, ni bwo umuhango wo gutanga ibi bihembo ku nshuro ya gatatu mu Rwanda, wabaye.

Umuririmbyi w’umwaka mu bagabo yabaye Israel Mbonyi naho mu bagore aba Diana Kamugisha.

Muri 2015 bimwe mu byamamare byarafunzwe

Teta Sandra

Teta Sandra ni umwe mu byamamare byo mu Rwanda byatawe muri yombi na Polisi y’u Rwanda mu mwaka wa 2015. Yatawe muri yombi inshuro ebyeri.

Teta Sandra na we igihome nticyamworoheye uyu mwaka.

Tariki ya 22 Nyakanga 2015 ni bwo yatawe muri yombi bwa mbere, arafungwa akurikiranyweho icyaha cyo gutanga sheki itazigamiye yahaye umucuruzi ukomeye muri Kigali witwa Nkusi Godfrey.

Tariki ya 3 Ugushyingo 2015 na none yatawe muri yombi, arafungwa, akurikiranyweho gutanga sheki zitazigamiye zigera muri eshanu, hiyongeraho ko amasezerano yagiranye na Nkusi Godfrey atayubahirije.

Young Grace

Umuraperikazi Young Grace, yatawe muri yombi tariki ya 1 Kamena 2015, afungwa akurikiranweho gutanga sheki itazigamiye.

Young Grace we umwaka ntiwamuhiriye kuko yafunzwemo.

Iyo sheki itazigamiye ngo yayitanze nyuma yo kuguza umuntu amafaranga y’u Rwanda agera kuri miliyoni ebyiri hanyuma igihe cyo kwishyura kigera atarabona amafaranga ahitamo kuyimuha.

Ikindi ni uko mu Gushyingo 2015, Young Grace yanavuzweho kuba yarabeshye ko yarangije amasomo y’icyiciro cya kabiri mu cyahoze ari RTUC. Ibyo byagaragaye nyuma y’aho agaragaje amafoto afite igitabo, avuga ko ari icyo yanditse asoza ayo masomo.

Nyuma yaho ni bwo ubuyobozi bw’icyahoze ari RTUC bwatangaje ko Young Grace atigeze yiga muri iyo kaminuza.

Umuhanzi Bruce Melodie yavuzweho kwihakana umwana

Iyi nkuru yumvikanye cyane mu Rwanda mu mpera za 2015. Yatangiye ubwo umukobwa witwa Agasaro Diane yajyaga mu bitangazamakuru atangaza ko atwite inda yatewe n’uyu muririmbyi ufatwa nk’umwe mu bakomeye mu Rwanda.

Bruce Melodie we yashinjwe kubyara umwana akamwihakana.

Gusa ariko Bruce Melodie yakomeje guhakana ibyo uwo mukobwa avuga. Agasaro yaje kwibaruka akomeza gusaba uyu muririmbyi indezo ariko ntihagire igikorwa. Ni bwo mu mpera z’ugushyingo 2015 yafashe umwanzuro wo gushyira umwana Bruce Melodie.

Diane yahise asanga Bruce Melode hafi y’akabare kegereye ahahoze studio ya Super Level. Uyu muhanzi akimenya ko baje kumwaka indezo yahise ajya kwihisha.

Uyu muririmbyi akaba yaratangaje ko ibyo Diane ari gukora hari abandi babyihishe inyuma mu bagamije kumwicira izina.

Ikindi ni uko ubusanzwe Bruce Melodie n’umukunzi we (utari Agasaro Diane), tariki 12 Gicurasi 2015 bibarutse umwana w’umukobwa.

Riderman yashyingiranwe na Miss Agasaro Nadia Farida

Tariki ya 16 Kanama 2015 ni bwo aba bombi basezeranye imbere y’Imana kubana haba mu bihe byiza no mu bikomeye.

Riderman we uyu mwaka usize atakiri ingaragu.

Riderman yashinganye urugo na Miss Agasaro nyuma yo gutandukana na Mukasine Asnah bari bamaranye imyaka umunani bakundana.

Muri 2015 bimwe mu byamamare bikomeye byaje mu Rwanda

Akon

Akon, umuhanzi w’icyamamare wo muri Amerika ukomoka muri Senegal, yageze i Kigali mu gitondo cyo ku wa 28 Nyakanga 2015, aje kuganira na Leta y’u Rwanda ku bijyanye n’umushinga we witwa “Akon Lighting Africa” ugamije gufasha umugabane w’Afurika mu guteza imbere ingufu zishyingiye ku mirasire y’izuba.

Akon na we yaje mu Rwanda kuganira na Leta ku mushinga we wo gukwirakwiza amashanyarazi.

Uyu mushinga wa Akon ugamije gufasha abo mu byaro kuva mu bwigunge bakabasha kubona ingufu z’amashanyarazi atangwa n’imirasire y’izuba kandi mu buryo buboroheye.

U Rwanda ruteganya ko umwaka wa 2017 uzajya kurangira amashanyarazi amaze kugera kuri 70% by’abarutuye mu gihe kuri ubu abayafite babarirwa muri 22%.

Fakoly

Umuhanzi w’icyamamare mu njyana ya Reggae, umunya Côte d’Ivoire Doumbia Moussa Fakoly uzwi ku izina rya Tiken Jah Fakoly yaje mu Rwanda tariki ya 17 gashyantare 2015.

Yari yaje kwitabira iserukiramuco bise Isano Arts Festival ryateguwe na Positive Production ifatanyije na Ministeri y’Umuco na Siporo na Institut Français du Rwanda.

Anne Kanssiime

Umunyarwenya wo muri Uganda, Anne Kanssiime, na we yaje mu Rwanda maze tariki 6 Kamena 2015, akora igitaramo cyo gusetsa ari kumwe n’abandi banyarwenya nka Kigingi wo mu Burundi n’Umunyarwanda Nkusi Arthur.

Kansiime ataramira Abanyarwanda.

Kansiime yagaragaye yahungabanye nyuma yo gusura Urwibutso rwa Jenoside rwa Kigali ku Gisozi, kuri uwo mugoroba aza kujya mu gitaramo asetsa abantu yambaye imyambaro y’ishuri ameze nk’akana kiga mu mashuri abanza.

Mu gihe abantu bari bataye icyizere ko ataza kubasetsa kubera guhungabana, Kansiime mu gitaramo yavuze ko ibyo yabonye byamuteye imbaraga zo gufasha Abanyarwanda kongera guseka nyuma y’ibihe bikomeye banyuzemo.

Radio na Weasel

Aba bahanzi bo muri Uganda bageze mu Rwanda tariki ya 02 Nyakanga 2015, baje mu gitaramo cyiswe “Kwibohora Concert” cyateguwe mu rwego rwo kwizihiza Umunsi Mukuru wo Kwibohora wabaye tariki 4 Nyakanga 2015.

Tariki ya 12 Ukuboza 2015 bongeye gutaramira Abanyarwanda mu gitaramo cyiswe “The X-mas Jungle Beach Juicy Party”, cyabereye mu Mujyi wa Rubavu kuri Kivu Serena Hotel.

Muri 2015 bamwe mu byamamare byo mu Rwanda baribarutse

Umuhanzikazi Nirere Shanel uba mu Bufaransa yibarutse imfura ye y’umukobwa. Luwano Tosh uzwi nka Uncle Austin n’umukunzi we Mwiza Joannah bibarutse umwana w’umukobwa, tariki ya 7 Ukuboza 2015.

Miss Shannel 2015 isize ari umubyeyi.

Karangwa Lionel uzwi cyane ku izina rya Lil G na we yibarutse umwana w’umukobwa mu kwezi kwa Mata 2014.

Umuririmbyi Jules Sentore na Nyampinga Innocente bibarutse umwana w’umukobwa mu ijoro ryo ku wa 17 Mutarama 2015 rishyira 18 Mutarama 2015.

Ikindi ni uko mu mwaka wa 2015 umuririmbyi wo mu Rwanda, The Ben, ubarizwa muri Leta Zunze Ubumwe za Amerika, yahawe igihembo cya “Tamin Awards of Honor 2015”, kubera indirimbo ye “I can see” yimakaza amahoro.

Byatangajwe na Minisitiri w’Ubutabera akaba n’Intumwa nkuru ya Leta, Johnston Busingye, ubwo yari ari i Arusha muri Tanzania, ku wa Kabiri tariki ya 01 Ukuboza 2015, mu muhango wo gusoza imirimo yakorwaga n’Urukiko Mpuzamahanga Mpanabyaha rwashyiriweho u Rwanda; ruburanisha abagize uruhare muri Jenoside yakorewe Abatutsi (ICTR).

Nubwo ICTR isoje imirimo, u Rwanda rusaba ibihugu bicumbikiye abakekwaho uruhare muri jenoside, kubashyikiriza ubutabera.

Mu ijambo yagejeje ku bari bitabiriye uwo muhango, Minisitiri Busingye, yavuze ko nubwo imirimo ya ICTR igeze ku musozo, gushakisha ndetse no kujyana mu butabera abakekwaho kugira uruhare muri Jenoside yakorewe Abatutsi mu Rwanda mu mwaka wa 1994, bitarangiye.

Yavuze ko hari abantu icyenda bakekwaho kugira uruhare muri Jenoside yakorewe abatutsi, ICTR yakurikiranaga ariko bari bataratabwa muri yombi. Yavuze ko izo nshingano zizakomeza gukorwa n’urundi rwego rwashyizweho rwitwa “Mechanism for International Criminal Tribunal(MICT)”.

Minisitiri Busingye kandi yakomeje avuga ko hari abantu babarirwa muri 410 u Rwanda rwagaragaje na bo bashinjwa kugira uruhare muri jenoside yakorewe Abatutsi ariko bakidegembya hirya no hino ku isi.

Aha ni ho ahera asaba ibihugu bigicumbikiye abo bantu kubata muri yombi bagashyikirizwa ubutabera kuko ngo ari umwenda ibyo bihugu bifitiye ikiremwamuntu ndetse n’abarokotse jenoside yakorewe Abatutsi mu Rwanda.

Muri uwo muhango, Minisitiri Busingye, yashimye ICTR kuko yagize uruhare rukomeye mu kurwanya umuco wo kudahana aho uva ukagera. Ariko akayinenga ko yagiye yirengagiza inyungu z’abacitse ku icumu rya jenoside nyamara Inkiko Gacaca zo zarabishoboye.

Minisitiri Busingye yasabye ko ububiko bwa ICTR bw’inyandiko, amajwi ndetse n’amashusho by’abatangabuhamya, abacitse ku icumu rya jenoside, abashinjwa, abafatanyacyaha n’abandi; bwakwimurirwa mu Rwanda.

Yavuze ko ubwo bubiko ari isoko ikomeye y’amakuru ku byabaye mu Rwanda mbere, nyuma ndetse no mu gihe cya jenoside yakorewe Abatutsi.

Prof. Neil Turok, watangije iryo shuri rizwi ku izina rya African Institute for Mathematical Sciences (AIMS), yabitangarije KT Press i Kigali, ku wa Kabiri, tariki ya 01 Ukuboza 2015, ubwo yari amaze kubonana na Perezida w’u Rwanda, Paul Kagame.

Abanyeshuri bari mu myitozo ngiro muri Laboratwari ya kimwe mu bigo by’iri shuri (Ifoto/Internet).

Yagize ati “Twafashe umugambi wo kwimurira mu Rwanda icyicaro gikuru cya AIMS, tugikuye muri Afrika y’Epfo. U Rwanda rwageze kuri byinshi bikomeye mu myaka 20 ishize. (U Rwanda) Rwagaragaje ko rwakorerwamo ibijyanye n’ubumenyi ku mugabane wa Afrika.”

AIMS ni ishuri rikuru rikorera muri Afrika. Rikorerwamo ubushakashatsi mu bijyanye n’ubumenyi mu mibare. Ubu rifite icyicaro mu mujyi wa Cape Town ho muri Afrika y’Epfo ariko rifite andi mashami muri Senegal, Ghana, Cameroun ndetse na Tanzania.

Iri shuri rikuru, ryatangijwe mu mwaka wa 2003, ni umushinga uhuriweho n’amakaminuza azwi ku isi nka Cambridge, Cape Town, Oxford, Paris Sud XI, Stellenbosch na Western Cape University.

Iri shuri rikuru riteza imbere ubumenyi n’imibare muri Afrika, rifata abanyeshuri ndetse n’abarimu b’abahanga rikabongerera ubumenyi mu rwego rwo kubaka uburezi, ubushakashasti ndetse n’ikoranabuhanga muri Afrika.

Prezida Kagame, uzwi nka perezida ukunda ibijyanye n’ikoranabuhanga, yashyize imbere ubumenyi n’ikoranabuhanga mu mugambi we wo guteza imbere u Rwanda.

Prof. Turok, aganira na KT Press, yavuze ko icyo na bo bagamije ari ukugendera muri iyo nzira ya Prezida Kagame.

Yagize ati “Tubona u Rwanda nk’ahantu h’icyitegererezo ho kwigishiriza Abanyafurika bakiri bato bakaba indashyikirwa mu bumenyi n’ikoranabuhanga. Twizera ko uko u Rwanda ruteye, bizatuma iri shuri rikurura abafatanyabikorwa baturutse ku isi hose.”

Ikindi ni uko imyiteguro yo kwimurira ikicaro gikuru cya AIMS mu Rwanda iri kurangira.

Mu kiganiro umuyobozi w ‘Akarere ka Rubavu yagiranye n’abaturage bo mu murenge wa Bugeshi tariki ya 29 Ugushyingo 2015 yasabye abagabo kureka umuco wo guharika abo bashakanye kubera gushukwa n’amafaranga ava mu buhinzi bw’ibirayi bakayakoresha mu bikorwa by’iterambere.

Abaturage bo mu murenge wa Bugeshi baganirizwa guca ubuharike

Iki kiganiro cyatanzwe gikurikira ingero z’abagabo bajya mu kabari bagatahana abagore kandi mu rugo bahasize abandi. Ku mugoroba tariki ya 28 Ugushyingo 2015 umugabo wo mu kagari ka Nsherima mu mudugudu wa Murangara mu murenge wa Bugeshi yacyuye umugore amujyana mu rugo rusanzwemo uwobashakanye biteza umutekano mucye.

Umunyamabanga Nshingwabikorwa w’Umurenge wa Bugeshi Mvano Etienne avuga ko uyu muco uterwa n’abagabo abagore bawuhagurukiye.

Agira ati “Abaturage barabizi ko ubuharike butemewe ariko hari ababikora, cyakora amahirwe tugira abagore bamaze kumenya uburenganzira bwabo kuko umugore wacyuwe bamwisohorera mu nzu.”

Umuyobozi wa Polisi mu Ntara y’Uburengerazuba CSP Mutezintare Bertin avuga ko umuco w’ubuharicye uhungabanya umutekano mu muryango, avuga ko umurenge wa Bugeshi ushimirwa ibikorwa byiza nko gukumira abashaka guhungabanya umutekano w’igihugu bagomba no gukumira ibyahungabanya umutekano mu ngo zabo.

Akavuga ko kuba hari ibibazo bikiboneka mu ngo biterwa n’uko abaturage batitabira umugoroba w’ababyeyi kuko amakimbirane yo mu muryango ariho akemurirwa.

Kora Wigire ni gahunda yashyiriweho gufasha abaturage guhanga imirimo mishya itari ubuhinzi gusa, kugira ngo intego ya gahunda y’igihugu y’imbaturabukungu ya kabiri ( EDPRS II) yo guhanga imirimo ibihumbi 200 buri mwaka, izagerwego.

Minisitiri Uwizeye yasabye ubuyobozi bw’akarere ka Burera gufasha abaturage gukora imirimo itari ubuhinzi gusa.

Minisitiri Uwizeye Judith avuga ko hari bamwe mu baturage bacyumva ko guhinga bagasarura bihagije. Bigatuma badatekereza indi mishinga itari ubuhinzi ibateza imbere kurushaho.

Kuri uyu wa mbere tariki 30 Ugushyingo 2015, ubwo Minisitiri Uwizeye yasuraba ibikorwa bitandukanye byo mu karere ka Burera, birimo za SACCO, Agakiriro n’ikaragiro ry’amata rya Burera, yavuze ko ari ngombwa gukomeza gufasha abaturage bagahindura imyumvire.

Yagize ati “Baracyumva ko iyo uhinze, ugasarura, ukarya, ukaryama, ibyo bihagije ariko tugomba no gutekereza noneho ku bintu bifite inyungu, atari ukubirya gusa ahubwo no kubikora ku buryo bigira ikindi kintu bimarira umuryango.”

Yakomeje avuga ko abaturage bagomba gukomeza gushishikarizwa kugana ibigo by’imari bakaka inguzanyo bakihangira imirimo abandi na bo, nk’urubyiruko, bakagana ibigo byigisha imyuga, bityo na bo bakiga imyuga izabafasha kugana inzira y’ubukire.

Ubuyobozi bw’Akarere ka Burera buhora bushishikariza abaturage gukora indi mirimo itari ubuhinzi kuko ubutaka ari buto.

Sembagare Samuel, umuyobozi w’ako karere, avuga ko nk’urubyiruko, barusaba kwiga imyuga. Avuga ko muri ako karere hari ikigo kigisha imyuga itandukanye (TVET) rusabwa kujya kwigamo ndetse n’agakiriro kari hafi kuzura na ko kazafasha urwo rubyiruko.

Sembagare avuga ko ubworozi bw’amatungo atandukanye na bwo ari bumwe mu buryo bufasha abaturage gukora imirimo itari ubuhinzi.

Ati “Ushobora korora amatungo magufi: ingurube, intama, inkoko, inkwavu n’ibindi. Tugira amahirwe ikirere cyacu gihoramo imvura. N’amazi arahari mu buryo buhagije, bashobora no korora amafi.”

Yongeraho ko bazakomeza kwigisha abaturage guhindura imyumvire, bityo bumve ko guhinga ibirayi atari byo bitanga amafaranga gusa.